O Iehova ajutisardea amen ‘te lulughioas andi phuv cai samas șiute’

O phral hai i phei Kassholms cărde i Școala Galaad ande 1979 hai, andel bărșa cai avile, sas-le „șiute andi phuv sar iech cașt”, sau bișialde te slujin, ande mai but thana: ando Iran, Mauritius, Myanmar, Tanzania, Uganda hai Zair. Ca i Școala Galaad, iech anda le sicaitori, o phral Jack Redford, phendea lenghe o sfato de mai opral. Cado sfato ajutisardea-len zurales but cana sas-le, cadea sar iech cașt, „șiute andi phuv”, „încalade” hai „pale șiute” mai butivar. Tha te mechas len te phenen amenghe lenghi viața.

Daștin te phenen amenghe sar arachlean o ciacimos?

Mats: Mânro dad trailas andi Polonia cana sas o Duito Războio Mondialo hai dichlea but hohaimata hai nasulimos andi Changheri Catolico. Cu sea cadala, vo phenelas butivar: „Pachiav ciaces că trebul te avel varecai o ciacimos”. Ande iech ghies, hachiardem că sas-les ciacimos. Butivar chindemas manghe lila folosime. Iech data, arachlem iech lil albastro cai bușiolas O ciacimos cai îngărel ca i viața veșnico. Placialas man sar bușiol, cadea că citisardem o sasto lil ande codoi riat. Ji cana înclistea o cham, jianglem ciaces că arachlem o ciacimos.

Anda aprilia 1972, astardem te citiv but lila le Martorenghe le Iehovasche hai arachlem o răspunso ca mânre pușimata andai Biblia. Simțosardem man sar o negustoro andai paramici le Isusoschi cai, pala so arachlea iech cuci perla, bichindea sea caște chinel-la. Cadea cărdem vi me. Alosardem te slujiv le Iehovasche, ando than te cherav mai but școala caște arăsav medico. (Mat. 13:45, 46) Cărdem o bolimos ande 10 decembria 1972.

Pala nici iech bărș, mânro dad, mânri dei hai mânro phral mai țâno astarde vi von te slujin le Iehovasche hai cărde o bolimos. Ande iulia 1973, astardem te cherav o pionierato. Mașcar le lașe pionieri anda amari congregația sas vi iech phei șucar cai iubilas but le Iehovas. Voi bușiolas Ann-Catrin. Ciailea amen but iech averestar hai ande 1975 cărdeam o abiav. Ande le ștar bărșa cai avile, beșleam ando Strömsund, iech șucar foro andai Suedia, cai but manușa camenas te prinjianen o ciacimos.

Ann-Catrin: Mânro dad așundea o ciacimos ando Stockholm andel palutne bărșa cana cherelas facultatea. Atunci sas man numai trin șiona, tha mânro dad lelas man lesa ca le întruniri hai andi predicarea. Mânra deia ci ciaiolas-la cadaia hai camlea te sicavel amenghe că le Martori le Iehovasche ci sicaven o ciacimos, tha ci daisardea te cherel cadaia. Pala iech timpo, cărdea vi voi o bolimos. Me cărdem o bolimos cana sas man 13 bărșa, hai co 16, astardem o pionierato. Pala so slujisardem andi Umeå, cai sas nevoia mai bute phralendar, somas alosardi te slujiv sar sar pioniera specialo.

Pala so me hai o Mats leam amen, samas bucurime te ajutisaras bute manușen te sichion o ciacimos. Mașcar cadal manușa sas vi i Maivor, iech tărni cai mechlea peschi cariera ando sporto hai astardea te slujil sar pioniera ande iech than mânra pheiasa mai țâni. Von cărde i Școala Galaad ande 1984 hai slujin sar misionare ando Ecuador.

Sar daisardean te len tumen pala o sfato te ‘lulughion andi phuv cai sanas șiute’?

Mats: Butivar, cadea sar iech cașt cai si încalado hai silo „pale șiuto andi phuv” vi amen slujisardeam le Devlesche ande neve thana. Tha deam sea amari zor caște las amen pala o Isus hai te sicavas le calități cai vo sicadea-len, vi mai but i umilința. (Col. 2:6, 7) Sar exemplo, ando than te ajucăras amen ca le phrala ande codol thana te cheren le buchia sar amende, deam amari zor te hachiaras sostar von cherenas le buchia ande iech anumime felo. Deam amari zor te hachiaras mai mișto sar gândinas hai sar trainas. Chichi mai but leam amen pala o Isus, cadichi mai but simțosardeam amen sar „iech cașt șiuto pașa niște paia”, cai lulughiolas oricai avelas șiuto. (Ps. 1:2, 3)

Ann-Catrin: Cana o cașt silo șiuto pale andi phuv, caște bariol trebul lesche o tachimos le chamesco. O Iehova sas-lo sar „iech cham” anda amende. (Ps. 84:11) Vo dea amen but phrala hai pheia cai sicade amenghe iech bari iubirea cai tachiarelas amare ile. Sar exemplo, ande amari țâni congregația anda Teheran (Iran), le phrala sicade amenghe but lașimos, cadea sar sicade le manușa andel ghiesa purane. Placialas amen te mai așias ando Iran, tha, ande iulia 1980, i buchi le Martorenghi sas-li așadi hai sas amenghe dine dui ghiesa caște tiliaras anda o them. Samas bișialde ando Zair, iech them andai Africa cai acana bușiol Republica Democratică Congo.

Cana așundem că va avela te avas bișialde andi Africa, astardem te rovav. So așundem andal sap hai anda le but nasfalimata anda codo than daravelas man. Tha dui lașe amala, cai slujinas de but timpo andi Africa, phende amenghe: „Încă ci arăslean code. Tha jianas că va avela te placial tumen andi Africa”. Hai cadea sas! Le phrala hai le pheia de cothar sile pherde iubirea. Tha, pala șiov bărșa, cana trebuisardea te tiliaras anda o Zair anda codoia că amari buchi sas-li așadi, dem mânri sama că ciaiolas man code hai manglemas man le Iehovasche te mai așias andi Africa.

So miștimata sas tumen andi buchi le Iehovaschi?

Mats: Mânro ilo bariol cana gândiv man ca le amalimata cai cărdeam-len amenghe avere phralența cai sas-le misionari anda aver thana. Sa cadea, ande chichiva thana cai slujisardeam le Devlesche, simțosardem iech bari bucuria cana sichileam bute manușența andai Biblia. Poiechdata, me hai mânri rromni cărdeam fiesavo 20 studii! Sa cadea, ci bâstărdeam niciechdata o lașimos le phralengo andai Africa. Cana găleam te vizitisaras le congregații andai Tanzania, suteam ande amaro „chăr”, cai sas iech Volkswagen Kombi. Le phrala hai le pheia cherenas sea so daștinas caște den amen so trebulas amenghe, chiar cana sas-le ciore. (2 Cor. 8:3) Ande fiesavi riat, me hai mânri rromni cărdeam amenghe timpo te das duma anda so cărdeam ande codo ghies hai te mulțumisaras le Iehovasche anda codoia că ajutisardea amen. Cado sas iech momeno specialo anda amende!

Ann-Catrin: Iech miștimos anda mande sas te prinjianav bute phralen hai pheian anda sea i lumea. Sichileam sar train aver manușa hai sichileam neve șiba, sar avelas farsi, francezo, luganda hai swahili. Ajutisardeam bute phralen hai pheian te pașion mai but le Iehovastar, cărdeam amenghe ciace amala hai cărdeam buchi „iech pașa aver” andi buchi le Iehovaschi. (Țef. 3:9)

Iech aver baro miștimos anda amende sas că dichleam le șucar buchia cai o Iehova cărdea-len andi creația. Ande fiesavo than cai găleam, sas sar cana o Iehova jialas amența hai sicavelas amenghe o drom caring te jias. Anda codoia că o Iehova sas-lo amența, traisardeam șucar buchia cai ci va avela te bâstras-len niciechdata.

Prin so pharimata nachlean hai so ajutisardea tumen te na mechen tumen?

Mats: Poiechdata, peleam nasfale. Sas amen chiar vi malaria. Hai i Ann-Catrin trebulas te cherel sigo chichiva operații. Sa cadea, daraileam anda amare dada hai deia cai phurionas. Tha mulțumisaras codolenghe anda amari familia anda codoia că line sama lendar. Von cărde cadai buchi pherde răbdarea, bucuria hai iubirea. (1 Tim. 5:4) Cu sea cadala, duchalas amen o ilo anda codoia că ci daisardeam te cheras mai but anda amare dada hai deia.

Ann-Catrin: Ande 1983, cana slujisardeam ando Zair, pelem nasfali hai lem i holera. Somas cadichi de nasul, că o doctoro phendea mânre rromesche: „Trebun te tiliaren anda o them chiar aghies!”. O duito ghies, samas ande iech aviono cai îngărelas marfa andi Suedia. Codo aviono sas o corcoro cai daisardeam te arachas-les.

Mats: Astardeam te rovas cana gândisardeam amen că ci va avela te slujisaras mai dur sar misionari. Cu sea cadala, i Ann-Catrin sastiardea-pe, chiar cana o medico ci pachialas că va daștila. Pala iech bărș, daisardeam te jias parpale ando Zair. Acana samas bișialde ando Lubumbashi, ande iech congregația țâni cai delas-pe duma i șib swahili.

Ann-Catrin: Ande Lubumbashi, nachlem prin aver pharimos: așilem phari tha hasardem le șiavorres. Chiar cana ci camleam te avel amen șiavorre, cana hasardeam amare șiavorres, sas iech pharimos zurales baro anda mande. Tha, ande codol phare ghiesa anda amari viața, primisardeam iech șucar daro le Iehovastar. Astardeam te sichioas andai Biblia mai bute manușența sar oricana. Ande mai țâra sar iech bărș, amari congregația barilea cathar 35 phrala co 70, hai ca le întruniri, cathar 40 manușa avenas 220. Sas amen but te cheras andi buchi le Iehovaschi, hai le miștimata cai primisardeam-len lestar line o pharimos pa amaro ilo. Cu sea cadala, butivar gândisaras amen ca amaro șiavorro hai das duma anda leste. Abia ajucăras te dichas sar o Iehova va sastiarela cu sea amaro ilo andi lumea nevi.

Mats: Pala iech timpo, i Ann-Catrin astardea te simțol-pe zurales chini, hai manghe le doctori phende că si man cancero co colono hai că trebulas te cherav sigo iech operația. Acana, me simțov man mai mișto, hai i Ann-Catrin cherel sea so daștil andi buchi le Iehovaschi.

Ando timpo, hachiardeam că na numai amen nachas prin pharimata. Pala so but manușa sas-le mudarde andi Ruwanda, ande 1944, găleam te dichas mai bute phralen cai beșenas andel tabere andal refugiați. Dichleam că von ci mechenas-pe ande codol pharimata, sas-len iech pachiamos zuralo hai denas buhle vastesa anda so sas-len. Cathar sichileam că o Iehova del zuralimos hai ajutil pesche manușen ande orisavo pharimos nachen. (Ps. 55:22)

Ann-Catrin: Ande 2007, nachlem prin iech aver baro pharimos. Găleam co programo cana cărdea-pe i dedicarea ca i filiala anda Uganda hai samas po drom caring o Nairobi (Kenya) ande iech than mai bute phralența anda o Betelo hai misionari. Samas cam 25 jene andi mașina. Cana mai sas amen iech țâra te arăsas andi Kenya, iech camiono avilea anda i coaver rig le dromeschi hai dea dab i mașina ande savi amen samas. O șoferii hai panji anda amare phrala hai pheia mule pe thaneste, hai iech phei mulea pala iech țâra timpo co spitalo. Abia ajucăras te dichas amare cuci amalen ando ghies cana va uștiena le mule! (Iov 14:13-15)

Ji la urmă, mânro corpo sastiardea-pe. Tha, me hai o Mats, hai vi aver phrala anda i mașina, așileam iecha bare darasa andi goghi. Anda codoia că sas man cadai dar, cărdem atacuri de panică andi riat. Uștilem sar cana cărdemas iech infarcto. Sas zurales nasul. Tha le manglimata cai phendeam-len anda sea o ilo hai chichiva versetea cai ciaionas amen but machle amaro ilo hai dine amen zuralimos. Găleam vi ca iech doctoro cai te ajutil amen. Acana, simțosaras amen mai zurale. Mangas amen le Iehovasche te ajutil amen te zuriaras vi amen avere phralen cai nachen prin cadal buchia.

So camlean te hachiaras cana phendean că o Iehova „phiradea tumen andel vasta sar le anră”?

Mats: Si iech duma andai șib swahili, „Tumebebwa kama mayai mabichi”, cai hachiarel-pe „phiradea amen andel vasta sar le anră”. Cadea sar ieche manușes siles grija cana siles andel vast anră, sa cadea le Iehovas sas-les iech bari grija amența hai sas-lo pașa amende ande orisavo than găleam. Sas amen sea o timpo so trebulas amen, chiar vi mai but. Iech aver buchi prin savi simțosardeam i iubirea hai o ajutorii le Iehovasco sas cana dichleam că le phralen anda o Corpo de Guvernare duchalas-len amendar.

Ann-Catrin: Camav te phenav tumenghe iech exemplo cai sicavel i grija cai sicadea-la o Iehova caring amende. Ande iech ghies, varecon sunisardea man hai phendea manghe că mânro dad sas-lo zurales nasfalo ande iech spitalo andi Suedia. O Mats încă sastiarelas-pe pala so sas-les malaria. Mai but, ci sas amen love caște chinas amenghe le biletea anda o aviono caște jias chăre. Cadea că gândisardeam amen te bichinas amari mașina. Tha, pala codoia, sunisardea amen iech familia hai phende că așunde amaro pharimos hai camen te pochinen iech anda le biletea. Pala codoia, sunisardea amen iech aver phei mai phuri cai chidea chichiva love ande iech cutia pe savi scriilas „Anda varecaste cai siles iech pharimos”. Cadea, dichleam sar ande chichiva minutea o Iehova ajutisardea amen te avel amen le love anda le biletea. (Evr. 13:6)

So sichilean andel 50 bărșa ande save dean le Iehovasche sea tumaro timpo?

Ann-Catrin: Hachiardeam că, atunci cana ‘așias liniștime hai si amen pachiamos‘, sam zurale. Cana pachias amen ando Iehova, Vo silo pașa amende prin orisavo pharimos nachas. (Is. 30:15; 2 Cron. 20:15, 17) Ande fiesavo than cai slujisardeam le Iehovasche, cărdeam sea so daisardeam. Cadea, sas amen but miștimata. Jianas ciaces că, oriso avelas te cheras ande amari viața, ci anelas amenghe mai but bucuria sar te slujisaras le Iehovasche!

Mats: I mai importanto buchi cai sichilem-la sas te pachiav man ando Iehova ande orisavo pharimos hai te dichav sar Vo ajutil man. (Ps. 37:5) Dichlem că o Iehova încărdea peschi promisiunea hai ajutisardea man sea o timpo. Vi acana, o Iehova silo pașa amende hai zuriarel amen ando timpo so slujisaras ando Betelo anda o Myanmar.

Camas anda sea o ilo ca le but tărne cai camen te cheren mai but anda o Iehova te simțon leschi iubirea loialo, cadea sar simțosardeam-la vi amen. Jianas ciaces că, dacă va mechena le Iehovas te ajutil-len, von va lulughiona oricai va avena șiute!