Roden i îndrumarea le Devleschi caște avel tume iech căsnicia fericime

O Iehovaa Del cărdea i iechto căsătoria. Andai Biblia prinjianas că vo cărdea i iechto jiuvli hai „andea-la le manușeste”. O Adam sas cadichi de fericime, încât phendea: „Cadaia si, în sfârșit, cocalo anda mânră cocala hai mas anda mânro mas!” (Geneza 2:22, 23). O Iehova camel vi acana ca le manușa căsătorime te aven fericime.

Cana varecon căsătoril-pe, daștilas te pachial că sea va avela perfecto. Tha chiar dacă iech rrom hai iech rromni iubin-pe ciaces va avela-le pharimata (1 Corinteni 7:28). Ande cadai broșura va aracheia but principii biblico save daștin te ajutin-tu. Cana va chereia so phenen cadala va avela-tu iech căsnicia fericime hai vi iech familia fericime (Psalmo 19:8-11).

1 ÎNCĂR CONTO CATAR O ROLO CAI DEA-LES TUCHE O IEHOVA

SO PHENEL I BIBLIA: O rrom si o șăro la familiaco (Efeseni 5:23).

Dacă san rrom, o Iehova ajucărel tutar te avel-tu grija catar chi rromni anda chio sasto ilo (1 Petru 3:7). Vo cărdea-la sar iech ajutorii caște potrivil-pe tuche hai camel te phiraves-tu laia pachivales hai iubireaia (Geneza 2:18). Trebul te iubis chia rromnia cadichi de but încât te cheres anda late mai but sar anda tute (Efeseni 5:25-29).

Dacă san rromni, o Iehova ajucărel tutar te avel-tu iech baro respecto caring chio rrom hai te ajutis-les te încărel o rolo cai sas lesche dino (1 Corinteni 11:3; Efeseni 5:33). Respectisar le decizii cai lel len vo hai colaborisar leia anda sea o ilo (Coloseni 3:18). Dacă va chereia cadea, va aveia mai șucar andel iacha che rromesche, hai angla o Iehova (1 Petru 3:1-6).

SO DAȘTIS TE CHERES:

• Puș che parteneros so daștis te cheres caște aves iech rrom sau rromni mai lași. Pala codoia ascutisar-les hai străduisar-tu te cheres le buchia mai mișto.

• Sicav răbdarea pentru că trebul timpo ca fiesavo anda tumende te sichiol sar te cherel fericime iech avres.

2 SICAV INTERESO SINCERO CARING LE SENTIMENTEA CHE PARTENEROSCHE

SO PHENEL I BIBLIA: Trebul te jianes so interesil che perteneros (Filipeni 2:3, 4). O Iehova manghel pesche slujitorendar te aven ‘lașe soavrănța’ (2 Timotei 2:24). Cadea, prin chio phiraimos, sicav che partenerosche că silo cuci ande che iacha. „Cana iech manuș del duma bi te gândil si sar iech sabia cai pusavel, tha i șib codolenghe goghiaver si sastiarimos.” Anda codoia, alosar mișto che dume (Proverbe 12:18). O Iehova va ajutila-tu, ca prin o felo sar des duma, te sicaves lașimos hai iubirea (Galateni 5:22, 23; Coloseni 4:6).

SO DAȘTIS TE CHERES:

• Angla te des duma anda buchia importanto che parteneroia, rughisar-tu caște așes calmo hai te avel-tu iech goghi cai primil sfaturi.

• Gândisar-tu mișto so va pheneia hai sar va deia duma.

3 GÂNDISAREN SAR IECH ECHIPA

SO PHENEL I BIBLIA: Cana căsătoris-tu, tu hai chio partenero va avena „iech corcoro mas” (Matei 19:5). Cu sea cadala, tume san dui manușa diferime, hai daștil te avel tume po iech data păreri diferime. Anda codoia trebul te sichion te aven unime cadichi andi gândirea, tha vi ande sentimentea (Filipeni 2:2). I unitatea sili importanto atunci cana trebul te len decizii. I Biblia phenel: „Cana del-pe duma mai de anglal andal planuri von înclen” (Proverbe 20:18). Cadea că, mechen tume îndrumime catar le principii biblico cana len ande iech than decizii importanto (Proverbe 8:32, 33).

SO DAȘTIS TE CHERES:

• Phen che partenosche so si ande chio ilo, na phen numa so gândis sau so pachias.

• Angla te les tuche iech obligația, de duma che parteneroia.