So daștin te cheren caște aven ande relații lașe le neamurența

Andai căsătoria cherel-pe iech nevi familia. Chiar dacă va avela te iubis hai te respectis che daden, i mai importanto persoana anda tute acana si o partenero de căsătorie. Cadai buchi daștil te avel phari anda che neamuri. Le principii andai Biblia daștin te ajutin-tu te cheres iech echilibro: te aves ande relații lașe le neamurența, hai, sa cadea te străduisares-tu te zuriares chi relația conjugalo.

1 SICAVEN PACHIV TUMARE NEAMURENGHE

SO PHENEL I BIBLIA: „De pachiv che dades hai chia deia.” (Efeseni 6:2) Ci contil sode bărș si tu, trebul te des pachiv hai te respectis sea o timpo che daden. Na bâstăr că vi chio partenero, sar șiav sau șei, trebul te del atenția pesche dadenghe. Pentru că „i iubirea na-i geloso”, ci trebul te daras niciech data catar i relația so si che parteneros pesche dadența (1 Corinteni 13:4; Galateni 5:26).

SO DAȘTIS TE CHERES:

• Te na phenes cuvintea sar: „Chi familia sea o timpo phenel buchia nasul anda mande!” sau „Chia deia ci placeal-la nici iech data so cherav!”.

• Încearcosar te diches le buchia cadea sar diche-le chio partenero.

2 AVEN FERMI CANA TREBUL

SO PHENEL I BIBLIA: „Ita sostar va mechela o murș peche dades hai pescha da hai va lipila-pe pescha rromniatar hai le dui va avena iech corcoro mas.” (Geneza 2:24) Pala so căsătoris-tu, che dada daștil-pe te simțon-pe încă responsabili anda tute hai, cadea daștilas te șion-pe mai but ande chi căsnicia.

Tu hai chio partenero trebul te den duma anda chichi de but va mechena tumare daden te șion-pe ande tumari căsnicia. Pala codoia, phenen lenghe iubireaia so dean duma. Phenen lenghe so si pe tumaro ilo, tha te avel ande iech modo șucar (Proverbe 15:1). I umilința, i blândețea hai i răbdarea va ajutila tume te aven ande relații lașe tumare neamurența hai te continuin ‘te suportin-tume iech pe aver andi iubirea’ (Efeseni 4:2).

SO DAȘTIS TE CHERES:

• Dacă cheres tuche griji că che neamuri șion-pe prea but ande tumari viața, de duma anda cadai buchi che parteneroia cana san mai liniștime.

• Den duma ande iech than so va cherena anda cadai buchi.