I Lecția 14

Sicav save si le idei principalo

Evrei 8:1

OBIECTIVO: Ajutisar codolen cai așunen-tu te hachiaren i tema hai sicav claro ce phanglimos si mașcar fiesavi ideea principalo hai so cames te sicaves-le.

SO TREBUL TE CHERES:

Trebul te avel-tu iech obiectivo. Gândisar-tu sostar încăres i tema: caște sicaves, caște zuriares sau caște anes dovezi anda iech subiecto. Cher cadea ca sea le idei principalo te ajutin-tu ande chio obiectivo.

Șiu tuche le pușimata: Ce obiecții sau ce pușimata daștinas te aven le manușen anda cado subiecto? Ande ce ordinea vazdenas-le? Pala codoia șiu che idei ande sa codoi ordinea, cadea ca le manușa te urmărin, te hachiaren hai te acceptin le informații prezentime.
Sicav o subiecto la temachi. Daștis te cheres cadaia cana phenes mai butivar le cuvintea mai importanto sau cana folosisares aver cuvintea cai sile sa codo senso.
Prezentisar ande iech modo claro hai simplo le idei principalo. Încalav numai codola idei cai sile phanglimos la temaia hai save daștis te explichis-le ande iech modo lașio ando timpo cai situ. Na de duma anda prea but idei principalo, phen claro fiesavi ideea, cher pauza mașcar lende hai na nach sigo catar iech ideea ca aver.

Daștis te phenes le idei principalo cana des duma anda soste va avela i tema caște ajutis codolen cai așunen-tu te urmărin-le sau daștis te mai phenes-le încă iech data cana phandes chi tema, cadea von va daștina te anen penghe amintea lendar.