I iubirea zuriarel amen te predichisaras vi mai dur!

1. So hachiardeam ca i întrunirea cai încărel-pe iech-var po bărș anda 2023?

CA I ÎNTRUNIREA cai încărel-pe iech-var po bărș anda 2023a, sas amenghe dine chichiva neve hachiarimata cai zuriarde amaro ilo hai așundeam chichiva șucar anunțuri anda i predicarea. Sar exemplo, hachiardeam că chichiva manușa va daștina te aven ando poporo le Iehovasco chiar vi pala so o Babilono o Baro va avela distrugime. Sa cadea, sas amenghe phendo că, anda noiembria 2023, le vestitori va dena iech raporto diferime. Tha, sicaven cadal paruimata că i predicarea ci mai si cadea de importanto sar sas mai anglal? Nici!

2. Sostar i predicarea si sea mai importanto fiesave ghiesesa cai nachel? (Marcu 13:10)

² Fiesave ghiesesa cai nachel, i predicarea si vi mai importanto. Sostar? Anda codoia că ci mai si but timpo ji cana va avela o sfârșito. Te gândisaras amen so phendea o Isus anda sar va avela cărdi i predicarea andel palutne ghiesa. (Citisar Marcu 13:10.) Andi Evanghelia anda o Matei, dichas că o Isus phendea că i vestea lași va avela predichime pe sea i phuv angla te avel „o sfârșito”. (Mat. 24:14) Cadea că, vo delas duma anda o timpo cana va avela chosli cu sea i lumea nasul le Satanoschi. O Iehova alosardea deja o ghies hai o ceaso cana va distrugila sea o sistemo nasul ande savo traisaras. (Mat. 24:36; 25:13; Fap. 1:7) Fiesavo ghies cai nachel anel amen mai pașă catar o sfârșito. (Rom. 13:11) Ando timpo so mai așilea, si importanto te predichisaras vi mai dur.

3. Sostar predichisaras?

³ Cadea că, vazdel-pe iech pușimos importanto cai avelas mișto ca savore te șioas-les amenghe: Sostar predichisaras i vestea lași? Anda codoia că i iubirea zuriarel amen te cheras cadaia. I buchi cai cheras-la andi predicarea sicavel i iubirea cai si amen anda i vestea lași, andal manușa hai, vi mai but, anda o Iehova hai anda lesco anav. Te dichas iech po iech cadal buchia cai zuriaren amen.

PREDICHISARAS ANDA CODOIA CĂ IUBISARAS I VESTEA LAȘI

4. So si ande amaro ilo cana așunas iech vestea lași?

⁴ Anes tuche andi goghi so sas ande chio ilo cana așundean iech vestea lași, sar avelas cana ande chi familia cărdilea iech țâno șiavorro sau cana arachlean tuche iech than buchiaco savestar sas tut bari nevoia? Si ciaces că abia ajucărdean te phenes cadai vestea lași chia familiache hai che amalenghe. Tha, so sas ande chio ilo cana așundean i mai lași vestea – i vestea lași anda o Regato le Devlesco?

5. So sas ande chio ilo cana așundean o ciacimos anda o Lil le Devlesco? (Dich vi le imagini.)

⁵ So sas ande chio ilo cana așundean o ciacimos anda o Lil le Devlesco? Sar exemplo, sichilean că chio Dad cerisco iubil tut hai că camel te aves ande leschi bari familia. Sau so sas ande chio ilo cana așundean că o Iehova va chosela sea le pharimata hai i duch hai că andi lumea nevi va uștiavela anda o merimos codolen drago tuche cai mule? (Mar. 10:29, 30; Ioan 5:28, 29; Rom. 8:38, 39; Rev. 21:3, 4) Cana așundean cadal ciacimata, chio ilo pherdilea-pe bucuriatar! (Luca 24:32) Arăslean te iubis cadal sicaimata hai camlean te phenes-len vi averenghe. (Dich vi Ieremia 20:9.)

6. So sichioas catar o Ernest hai i Rose?

⁶ Te dichas prin so nachlea iech phral po anav Ernestb. Cana sas-les deș bărșa, lesco dad mulea. Vo phenel: „Pușlem man: «Gălea ando cerii sau va avela mulo anda sea o timpo?». Dichlem iachența nasul le șiaven saven sas-len iech dad”. O Ernest jialas butivar ando than cai sas-lo prahome lesco dad, delas cianga code hai manghelas-pe: „Devla, ajutisar man, mangav tut, te jianav cai si mânro dad”. Pala so nachle cam 17 bărșa, o Ernest sas-lo pușlo dacă camel te sichiol andai Biblia hai vo ci încărdea-pe parpale te cherel cadaia. Lea-pe iech pharimos pa lesco ilo cana sichilea că le mule ci mai jianen chanci, că sile sar ande iech baro soimos hai că andi Biblia phenel-pe că va avena uștiade andal mule. (Ecl. 9:5, 10; Fap. 24:15) Cadea că, vo arachlea răspunso ca le pușimata cai șiute iech baro pharimos pe leste but bărșa. Le ciacimata anda o Lil le Devlesco cărde-les te avel pherdo bucuria. Vi leschi rromni, i Rose, astardea te sichiol andai Biblia hai o ciacimos arăslea ande laco ilo. Ande o bărș 1978, von bolde-pe. Lenghi iubirea anda o ciacimos zuriardea-len te phenen vi penghe neamurenghe, penghe amalenghe hai vi averenghe so sichile. Von ajutisarde mai bute sar 70 manușen te prinjianen le Iehovas hai te bolen-pe.

7. So zuriarel amen i iubirea anda o ciacimos te cheras? (Luca 6:45)

⁷ Cana i iubirea anda o ciacimos astarel te bariol ande amaro ilo, va avela te camas te phenas vi averenghe so sichileam. (Citisar Luca 6:45.) Vi amen phenas sar le discipoli le Isusosche anda o iechto secolo: „Amen ci daisaras te na mai das duma anda le buchia cai dichleam-len hai cai așundeam-len”. (Fap. 4:20) Anda codoia că iubisaras cadea de but o ciacimos, camas te cheras-les prinjiando sea mai bute manușenghe.

PREDICHISARAS ANDA CODOIA CĂ IUBISARAS LE MANUȘEN

8. So cherel amen te phenas vi averenghe i vestea lași? (Dich o chenarii „Iubin le manușen – Cheren discipoli”.) (Dich vi i imaginea.)

⁸ Vi amen iubisaras le manușen, cadea sar o Iehova hai lesco Șiavo. (Prov. 8:31; Ioan 3:16) Simțosaras iech bari mila caring codola cai ‘ci silen speranța hai sile bi Devlesco’. (Ef. 2:12) Lenghe pharimata cheren-len te aven sar ande iech bari hâv, tha amen si amen iech dori cai daștil te încalavel-len avri: i vestea lași anda o Regato le Devlesco. I iubirea hai i mila cai si amen caring lende zuriaren amen te cheras sea so daisaras caște phenas lenghe i vestea lași. Cado cuci ciacimos daștil te del-len iech speranța hai ajutil-len te avel-len i mai șucar viața acana. Sa cadea, del-len i ocazia te bucurin-pe ande iech ghies catar „i ciaci viața” andi lumea nevi, cai va traina anda sea o timpo. (1 Tim. 6:19)

9. So phenas le manușenghe că va avela pa țâra timpo hai sostar? (Ezechiel 33:7, 8)

⁹ I iubirea caring le manușa zuriarel amen te phenas lenghe că cadai lumea nasul va avela chosli pa țâra timpo. (Citisar Ezechiel 33:7, 8.) Ande amaro ilo si amen iech bari mila caring le jene anda amari familia cai ci slujin le Iehovasche hai caring aver manușa cai încă ci prinjianen-les. But train penghi viața bi te jianen că va avela „iech baro necazo, sar ci mai sas de cana astardea i lumea ji acana, nici, hai ci va mai avela vroiechdata”. (Mat. 24:21) Camas te phenas lenghe so va avela ande codo timpo la crisaco. Mai anglal, i religia neciaci va avela chosli hai, pala codoia, co Armaghedono, i lumea nasul le Satanoschi va avela chosli cu sea. (Rev. 16:14, 16; 17:16, 17; 19:11, 19, 20) Mangas amen ca i vestea lași te arăsăl ando ilo chichi mai bute manușengo hai te astaren te anen amența închinarea ciaci le Devlesche. Tha, so va avela codolența cai, acana, ci camen te aven ando poporo le Devlesco, chiar vi codolența drago amenghe andai familia?

10. Sostar si importanto mai but sar oricana te phenas le manușenghe so va avela pa țâra timpo?

¹⁰ Cadea sar dichleam vi ando articolo cai nachlea, daștil-pe că o Iehova va salvila le manușen cai va paruvena pengo phiraimos cana va dichena că o Babilono o Baro va perela. Cadea că, si importanto te das amari zor mai but sar oricana te phenas le manușenghe so va avela. Te na bâstras: So phenas lenghe acana, daștil te avel lenghe andi goghi ando viitorii. (Dich vi Ezechiel 33:33.) Daștil-pe că va gândina-pe ca so phendeam lenghe hai va camena te anen închinarea uji le Devlesche ande iech than amența, angla te avel prea târzio. Cadea sar o paznico catar o phandaimos anda Filipi, parudea pesco phiraimos numai pala so „sas iech baro izdraimos phuveaco”, daștil-pe că chichiva manușa, cai acana ci camen te așunen i vestea lași, va paruvena pengo phiraimos pala so o Babilono o Baro va perela. (Fap. 16:25-34)

AMEN PREDICHISARAS ANDA CODOIA CĂ IUBISARAS LE IEHOVAS HAI LESCO ANAV

11. Sar daisaras te das le Iehovasche așarimos, pachiv hai zuralimos? (Revelația 4:11) (Dich vi le imagini.)

¹¹ Ando dintuno than, amen predichisaras i vestea lași anda codoia că iubisaras but le Iehovas hai lesco sfânto anav. Așaras amare Devles saves iubisaras-les cana das duma anda leste andi predicarea. (Citisar Revelația 4:11.) Pachias anda sea o ilo că o Iehova meritil te avel lesche dino o așarimos, i pachiv hai o zuralimos catar lesche manușa loialo. Amen așaras hai das pachiv amare Devlesche cana sicavas le manușenghe că vo ‘cărdea sea le buchia’ hai că traisaras anda codoia că vo dea amen viața. Tha, sar daisaras te das le Iehovasche zuralimos cana vo si O Mai Zuralo? Cana das amaro timpo, amaro zuralimos hai sea so si amen caște phenas chichi mai bute manușenghe i vestea lași. (Mat. 6:33; Luca 13:24; Col. 3:23) Cadea că, ciaiol amen but te das duma le manușența anda amaro lașio Del. Sa cadea, amen camas anda sea o ilo te phenas le manușenghe o anav le Devlesco hai so sicavel cado anda leste. Sostar?

12. Sar sfințosaras o anav le Iehovasco cana das duma anda leste?

¹² I iubirea anda o Iehova zuriarel amen te sfințosaras lesco baro anav. (Mat. 6:9) Camas te ujiaras o anav le Devlesco cai sas-lo meliardo le Satanostar prin pesche jiungale hohaimata. (Gen. 3:1-5; Iov 2:4; Ioan 8:44) Cadea că, andi predicarea, das amari zor te phenas o ciacimos anda o Iehova sea le manușenghe cai așunen amen. Camas te sicavas sea le manușenghe că o Iehova si iubirea, că lesco raimos si orta hai lesco Regato va chosela sea i duch hai va anela i pacea hai i fericirea pi phuv. (Ps. 37:10, 11, 29; 1 Ioan 4:8) Cana phenas le manușenghe o ciacimos anda o Iehova, amen sfințosaras lesco anav. Sa cadea, sam zurales voime că traisaras amari viața sar Martori le Iehovasche hai bucurisaras o ilo le Devlesco. Sar?

13. Sostar das amen bare că phiravas o anav Martori le Iehovasche? (Isaia 43:10-12)

¹³ O Iehova phenel că sam lesche „martori”. (Citisar Isaia 43:10-12.) Acana chichiva bărșa, ande iech lil catar o Corpo de Guvernare phenelas-pe: „I mai bari pachiv cai daștil te avel amen si te bușioas Martori le Iehovasche!”.c Sostar? Te gândisaras amen: Te phenas că sanas doșardo că cărdean vareso nasul. Acana, trebul tuche varecon cai te sicavel le coaverenghe că so phendea-pe anda tute si iech hohaimos hai că ci avelas te cheres niciechdata cadaia. Cas avelas te alosares? Si ciaces că avelas te alosares ieche manușes saves prinjianes-les mișto, ande savo pachias tut, saves siles iech lașio anav hai savesche dumes sile demno pachiamasche. Cana o Iehova alosarel amen te avas lesche Martori, vo sicavel că prinjianel amen mișto hai că pachial-pe ande amende că daisaras te sicavas că vo si o ciacio Del. So bari pachiv sas amenghe dini! Cadea că, te cheras sea so daisaras caște phenas vi averenghe o anav le Devlesco hai te ujiaras-les catar orisavo hohaimos. Dacă cheras cadea, traisaras amari viața pala i bari pachiv cai del-la amenghe o anav cai phiravas-les, sam Martori le Iehovasche. (Ps. 83:18; Rom. 10:13-15)

TE PREDICHISARAS VI MAI DUR JI CANA AVEL O SFÂRȘITO

14. So bare buchia ajucăras te aven?

¹⁴ So bare buchia va avena pa țâra timpo! Le Iehovasa pașa amende, pachias anda sea o ilo că va avena de amari rig but aver manușa, angla so te astarel o baro necazo. Amaro ilo pherdiol-pe bucuriatar cana gândisaras amen că vi ande le mai cale ghiesa de cana si i phuv – ando baro necazo – daștil-pe că vi aver manușa va înclena andai lumea le Satanoschi, cai va avela chosli, hai va așarena le Iehovas ande iech than amența. (Fap. 13:48)

15, 16. So va avela te cheras mai dur hai ji cana?

¹⁵ Ji atunci, si amen iech buchi importanto te cheras, te phenas sea le manușenghe pa i phuv i vestea lași anda o Regato le Devlesco. Cadai buchi ci va mai avela cărdi niciechdata. Ande sea codo timpo, trebul te phenas le manușenghe că o sfârșito cadala lumeaco nasul si zurales pașă. Hai cana va avela o timpo la crisaco, von va jianena că so phendeam lenghe avelas amare Devlestar, o Iehova. (Ezec. 38:23)

¹⁶ Cadea că, so țârdel amen o ilo te cheras? I iubirea anda i vestea lași, anda le manușa hai, mai opral sar oriso, i iubirea anda o Iehova hai lesco anav cherel amen te das duma mai dur le manușența andai Biblia, ji cana o Iehova va phenela: „Arăsăl!”.