Sar daștin te aven ajutime codola cai sas-le duriarde andai congregația?

1, 2. a) Sar dichel o Iehova codolen cai cheren iech păcato hai ci camen te paruven-pe? b) So ajucărel o Iehova te cheren codola cai păcătuisarde?

O IEHOVA ci camel ca pesche manușa te phiraven-pe orisar; vo dichel jiungale iachența o păcato. (Ps. 5:4-6) Vo manghel amendar te cheras le buchia cai phendea-len amenghe ande pesco lil. Orisar, o Iehova jianel că amen ci sam manușa perfecto hai ci daisaras te așunas lestar cu sea. (Ps. 130:3, 4) Sa cadea, le Iehovas ci ciaiol-les le „manușa bidevlesco, cai paruven [lesco] baro lașimos ande iech scuza caște avel-len iech phiraimos bilajiavuno”. (Iuda 4) Si ciaces, i Biblia phenel că, ando războio le Devlesco, Armaghedon, va avela „o merimos le manușengo bidevlesco”. (2 Pet. 3:7; Rev. 16:16)

² Tha o Iehova ci camel ca vroiech te merel. Mai but, cadea sar dichleam ande cado Turno, i Biblia sicavel mișto că vo „camel ca savore te arăsăn te risaren-pe catar pengo phiraimos nasul”. (2 Pet. 3:9) Le phure len-pe pala o Iehova hai den penghi zor te ajutin codoles cai păcătuisardea te risarel-pe catar pesco phiraimos nasul hai te pașiol pale le Iehovastar. Cu sea cadala, na sea le manușa cai păcătuin camen te paruven-pe. (Is. 6:9) Chiar cana le phure camen te ajutin-len mai butivar, chichiva anda lende jian mai dur pe iech drom nasul. So trebulas le phure te cheren?

„DURIAREN CODOLE MANUȘES NASUL”

3. a) So phenel i Biblia că trebun te cheren le phure codolesa cai ci camel te risarel-pe catar pesco phiraimos nasul? b) Cana iech manuș cai păcătuisardea ci camel te paruvel-pe, sostar daisaras te phenas că vo alosarel te avel duriardo andai congregația?

³ Cana iech manuș cai păcătuisardea ci camel te risarel-pe catar pesco phiraimos nasul, le phure trebun te cheren so phenel-pe ande 1 Corinteni 5:13: „Duriaren codole manușes nasul de mașcar tumende”. O manuș cai cherel iech păcato jianel că, dacă ci paruvel pesco phiraimos, va avela duriardo andai congregația. Cadea că, daisaras te phenas că voa alosarel te avel duriardo andai congregația. (Gal. 6:7) Sostar? Anda codoia că o manuș cai păcătuisardea ci camel te paruvel-pe pala so le phure dine penghi zor te ajutin-les mai butivar. (2 Regi 17:12-15) Prin so cherel, vo sicavel că ci camel te așunel le Iehovastar. (Deut. 30:19, 20)

4. Sostar phenel-pe ca iech întrunirea cana si duriardo andai congregația varecon cai ci risardea-pe catar pesco phiraimos nasul?

⁴ Cana iech manuș cai păcătuil ci paruvel pesco phiraimos, silo duriardo andai congregația hai, ca iech întrunirea, phenel-pe că vo ci mai si iech Martoro le Iehovasco.b Ci phenel-pe cadaia caște avel cărdo lajiavestar. Mai but, cherel-pe cado anunțo ca i congregația te daștil te așunel catar so phenel i Biblia – „te na mai beșen ande iech than” codole manușesa hai „nici te na han” lesa. (1 Cor. 5:9-11) O Iehova jianglea mișto sostar phendea amenghe te cheras cadaia. O apostolo Pavel scriisardea: „Iech țâra drojdia cherel te bariol sea o humer”. (1 Cor. 5:6) Cana varecon cai păcătuil ci paruvel-pe hai ci silo duriardo andai congregația, le coaver daștinas te pachian că ci mai trebulas te train pala sar manghel o Iehova. (Prov. 13:20; 1 Cor. 15:33)

5. Sar trebulas te dichas varecas cai sas duriardo andai congregația hai sostar?

⁵ Cadea că, sar trebulas te dichas ieche phrales cai si duriardo andai congregația? Chiar cana ci das duma lesa, trebul te anas amenghe amintea că codo manuș daștil te avel parpale. Vo si sar iech bacri cai hasardilea. Iech bacri cai hasarel-pe catar le coaver bacrea daștil te avel parpale. Te gândisaras amen că cadai bacri hasardi dea peschi viața le Iehovasche, tha acana ci trail peschi viața cadea sar camel o Iehova hai cadaia si iech pericolo anda late. (Ezec. 18:31) Cu sea cadala, ji cana o Iehova sicavel mila, codo manuș daștil te avel parpale. Sar daștin le phure te ajutin le manușes cai păcătuisardea hai sas-lo duriardo andai congregația?

SAR DAȘTIN LE PHURE TE AJUTIN CODOLEN CAI SAS-LE DURIARDE ANDAI CONGREGAȚIA?

6. So va cherena le phure caște ajutin vrecas cai sas-lo duriardo andai congregația?

⁶ Cana varecon si duriardo andai congregația, le phure ci mai ajutin-les te avel parpale le Iehovaste? Ci trebul te pachias cadaia! Cana le phure phenen varecasche că va avela duriardo andai congregația, von phenen lesche vi so trebul te cherel caște avel parpale andi congregația. Tha le phure va cherena vi mai but anda leste. Butivar, von phenen codolesche cai păcătuisardea te dichen-pe pale pala so nachen chichiva șiona, caște dichen dacă parudea pesco ilo. Dacă, pala chichiva șiona, o manuș camel te dichel-pe pale le phurența, von va zuriarena-les te mechel-pe catar pesco phiraimos nasul hai te avel parpale andi congregația. Hai chiar cana vo încă ci parudea-pe, le phure den penghi zor te ajutin-les vi mai dur te paruvel pesco phiraimos.

7. Sar len-pe le phure pala i mila le Iehovaschi cana varecon si duriardo andai congregația? (Ieremia 3:12)

⁷ Le phure den penghi zor te sicaven i mila le Iehovaschi cana den duma varecasa cai sas-lo duriardo andai congregația. Sar exemplo, andel purane ghiesa, o Iehova ci ajucărdea pesche manușendar, le israelițendar, te aven parpale leste angla ca vo te ajutil-len. Mai but, vo bișialdea lenghe pesche profetos chiar angla ca von te paruven-pe. Ando duito articolo anda cadai revista, dichleam sar o Iehova phendea caring o Osea te iertil pesca rromnia hai te anel-la parpale, chiar dacă voi încă cherelas iech baro păcato. Cadea, o Iehova sicadea pesche manușen că vo silo pherdo mila. (Os. 3:1; Mal. 3:7) Le phure len-pe pala o Iehova hai camen anda sea o ilo te ajutin le manușen cai păcătuisarde te aven parpale hai te na cheren mai pharo lengo drom caring o Iehova. (Citisar Ieremia 3:12)

8. Sar ajutil amen i paramici le Isusoschi anda o șiav hasardo te hachiaras mai mișto sar dichel o Iehova codolen cai sas-le duriarde andai congregația? (Luca 15:7)

⁸ Te anas amenghe amintea i paramici le Isusoschi anda o șiav hasardo, cadea sar dichleam ando duito articolo anda cadai revista. Cana o dad dichlea pesche șiaves cai risailea chăre, vo „nașlea caring leste, lea-les andi angali hai ciumidea-les pherdo iubirea”. (Luca 15:20) Trebul te dichas că o dad ci ajucărdea ca pesco șiav te manghel pesche iertarea. Mai but, dintuni-var cărdea vo vareso anda leste, cadea sar cherel orisavo dad pherdo iubirea. Le phure den penghi zor te phiraven-pe sa cadea codolența cai hasardile. Von camen ca cadal bacrea hasarde „te aven parpale chăre”. (Luca 15:22-24, 32) Si bari bucuria vi ando cerii, hai vi pi phuv cana iech păcătoso risarel-pe. (Citisar Luca 15:7.)

9. So camel o Iehova te cheren le manușa cai păcătuisarde?

⁹ Cadea sar dichleam ji acana, o Iehova ci mechel codolen cai păcătuisarde hai ci camen te paruven-pe te așen andi congregația. Cu sea cadala, vo ci risarel lenghe o dumo, hai ajucărel te aven parpale. Cana iech manuș risarel-pe catar pesco phiraimos nasul, ando ilo le Iehovasco si so phenel-pe ande Osea 14:4, cai citisaras: „Va avela te sastiarav-len chiar cana risarde manghe o dumo. Va avela te iubiv-len anda sasto ilo, anda codoia că țârdem mânri holi lendar”. Cana jianen so si ando ilo le Iehovasco, le phure roden le paruimata cărde le manușestar cai sicaven că vo astardea te paruvel pesco phiraimos nasul. Cadal dumes trebulas te cheren sea codolen cai mechle le Iehovas te pachian ciaces că vo iubil-len hai camel te aven parpale leste.

10, 11. Sar daștin le phure te ajutin codolen cai sas-le duriarde andai congregația acana mai but bărșa?

¹⁰ Tha sar daștin le phure te ajutin codolen cai sas-le duriarde andai congregația acana but bărșa? Daștil-pe că codo manuș ci mai trail ando păcato anda savo sas-lo duriardo andai congregația. Poiechdata, ci mai jianel nici sostar sas-lo duriardo andai congregația. Orisar avenas le buchia, le phure den penghi zor te jianen cai beșel hai te den duma codole manușesa. Cana dichen-pe lesa, le phure acharen-les anda sea o ilo te avel parpale andi congregația hai manghen-pe ande iech than lesa. Hai, anda codoia că beșlea dur catar i congregația mai but bărșa, trebul te prinjianel pale le Iehovas hai o ciacimos andai Biblia. Cadea că, dacă vo camel te avel parpale andi congregația, le phure daștin te lașiaren te sichiol varecasa andai Biblia, chiar cana încă ci sas-lo primime parpale. De fiesavi data, le phure va alosarena casa te sichiol vo andai Biblia.

¹¹ Le phure sicaven i mila le Iehovaschi hai camen te ajutin chichi mai bute manușen cai sas-le duriarde andai congregația te jianen că o udar si pâtărdo anda lende hai daștin te aven parpale andi congregația. Cana iech manuș cai păcătuisardea paruvel-pe hai mechel pesco drom nasul, vo daștil te avel primime parpale bi te nachel prea but timpo. (2 Cor. 2:6-8)

12. a) Cana le phure trebun te len sama mai but? b) Sostar ci trebul te pachias că o Iehova ci va sicavela peschi mila caring codola cai cărde bare păcatea? (Dich vi i nota de telal)

¹² Poiechdata, le phure trebun te len sama mai but cana primin varecas parpale. Sar avelas, dacă varecon cărdea-pe doșalo anda abuzo caring le șiave – adică buchia jiungale cărde zorasa ieche șiavorresche – sau anda i apostazia – adică cana dea duma contra i organizația le Devleschi – sau cana cărdea planuri caște șinel i căsătoria, le phure camen te jianen dacă vo parudea-pe ciaces. (Mal. 2:14; 2 Tim. 3:6) Von trebun te len sama le coavere phralendar. Tha, ande sa codo timpo, trebul te hachiaras că o Iehova va primila parpale orisave manușes cai păcătuisardea hai sicadea că parudea pesco phiraimos nasul. Cadea că, chiar cana le phure trebun te len sama mai but codolendar cai garade o nasulimos cai cărde-les, von ci trebunas te pachian că o Iehova ci va sicavela niciechdata mila caring cadal manușa.c (1 Pet. 2:10)

SO DAȘTIL TE CHEREL I CONGREGAȚIA

13. Sar phiravas amen ieche manușesa cai sas ortosardo hai sar phiravas amen iech manușesa cai sas duriardo andai congregația?

¹³ Cadea sar deam duma ando articolo cai nachlea, poiechdata phenel-pe ca iech întrunirea că iech phral sas-lo ortosardo, daisaras te beșas mai dur lesa, anda codoia că jianas că parudea-pe hai mechlea pesco drom nasul. (1 Tim. 5:20) Vo încă cherel partea andai congregația hai trebul te avel zuriardo le phralendar caște cherel mai dur so si mișto. (Evr. 10:24, 25) Cu sea cadala, cana varecon si duriardo andai congregația, le buchia ci așen sa cadea. Amen „na mai beșas ande iech than” ieche manușesa sar cado hai ‘nici na has’ lesa. (1 Cor. 5:11)

14. Sar daștin te alosaren te phiraven-pe le creștini codolența cai sas-le duriarde andai congregația? (Dich vi i imaginea.)

¹⁴ Tha, anda so dichleam ji acana, trebul te hachiaras că ci trebul te phenas chanci codolesche cai sas duriardo andai congregația? Na. Si ciaces, ci va avela te das duma lesa but. Tha iech creștino daștil te folosil peschi goghi, cai sili sicadi pala i Biblia cana alosarel te acharel cai întrunirea varecas cai sas duriardo andai congregația hai cai si lesco neamo sau cai sas lesco pașardo mai anglal. So cheras cana avel cai întrunirea? Ando trecuto, ci avelas te das-les ghies. Tha acana, iech creștino trebul te folosil peschi goghi, cai sili sicadi pala i Biblia, ande cadai buchi. Chichiva daștinas te simțon-pe mișto te den-les ghies hai te phenen lesche mișto avilean ca amari întrunirea. Cu sea cadala, ci va avela te pușias-les but buchia hai ci va avela te das duma lesa prea but.

15. Anda save păcătoși del-pe duma ando 2 Ioan 9-11? (Dich vi o chenarii „Dine duma o Ioan hai o Pavel anda sa codo păcato?”)

¹⁵ Chichiva daștinas te pușen-pe: „Ci phenel i Biblia că con del ghies manușen sar cadala cherel-pe doșalo ande iech than codolesa cai cherel buchia nasul?”. (Citisar 2 Ioan 9-11.) So phenel-pe ande cado capitolo sicavel că trebul te na das ghies codolen cai phenen hohaimata hai buchia nasul anda i organizația hai codolen cai zumaven te cheren averen te avel-len iech phiraimos nasul. (Rev. 2:20) Cadea că le phure ci va zumavena te den duma ieche manușesa cai cherel cadal buchia nasul. Cu sea cadala, încă pachias că codo manuș daștil te paruvel pesco phiraimos. Tha, ji cana vo ci va cherela cadaia, ci va avela te das-les ghies hai ci va avela nici te acharas-les ca iech întrunirea.

TE SICAVAS MILA SAR O IEHOVA

16, 17. a) So camel o Iehova te cheren codola cai păcătuisarde? (Ezechiel 18:32) b) Sar daștin le phure te sicaven că cheren buchi ande iech than le Iehovasa cana den penghi zor te ajutin varecas cai păcătuisardea?

¹⁶ So sichileam ande cadai revista? O Iehova ci camel ca vroiech te merel. (Citisar Ezechiel 18:32.) Vo camel ca savore cai cărde mai anglal păcatea te aven pale amala lesa. (2 Cor. 5:20) Anda codoia, de cana si i lumea, o Iehova zuriardea mai butivar pesche poporos hai vi avere manușen te risaren-pe catar pengo phiraimos nasul hai te aven parpale leste. Le phure de congregație silen i bari pachiv te cheren buchi ande iech than le Iehovasa cana ajutin le manușen cai păcătuisarde te risaren-pe catar pengo phiraimos nasul. (Rom. 2:4; 1 Cor. 3:9)

¹⁷ Gândisar tut so bari bucuria si ando cerii cana varecon cai păcătuisardea risarel-pe catar pesco phiraimos nasul! Le Iehovasco ilo pherel-pe bucuriatar de fiesavi data cana iech bacri hasardi avel parpale andi congregația. Hai amari iubirea anda o Iehova bariol cana gândisaras amen sar sicavel amenghe peschi mila hai pesco baro lașimos. (Luca 1:78)