‘Acharen tumende le phuren’

1. Sar sicadea o Iehova că iubil pesche bacrean?

O IEHOVA iubil sea codolen cai slujin lesche hai lel sama lendar cadea sar iech lașio păstorii lel sama pesche bacreandar. Vo dea pesche cuci Șiaves anda lende hai dea-len phure cai te len sama lendar. (Fap. 20:28) O Del camel ca le phure te phiraven-pe lașimasa lesche slujitorența. Le phure len-pe pala o Isus, von zuriaren le phralen hai le pheian hai ajutin-len te așen loialo le Iehovasche. (Is. 32:1, 2)

2. Cadea sar phenel-pe ando Ezechiel 34:15, 16, castar lel sama vi mai but o Iehova?

² O Iehova lel sama sea pesche bacreandar, tha vi mai but codolendar cai sile duchade. Prin le phure, vo ajutil codolen cai sile duchade anda codoia că cărde vareso nasul. (Citisar Ezechiel 34:15, 16.) O Iehova camel te rodas lesco ajutorii de fiesavi data cana si amen nevoia. Vo na numai că camel te mangas amen lesche caște ajutil amen, tha camel vi te rodas o ajutorii codolengo cai vo șiutea-len sar „păstori hai sicaitori” andi congregația. (Ef. 4:11, 12)

3. So miștimata si amen savoren cana dichas sar folosil o Iehova le phuren?

³ Ande cado articolo, va avela te dichas sar folosil o Iehova le phuren caște ajutil codolen casco amalimos le Iehovasa ci mai si cadea de zuralo. Va avela te arachas răspunso cadale pușimatande: Cana trebul te mangas o ajutorii le phurengo? Sostar si importanto te cheras cadaia? Hai sar ajutin amen von? Chiar cana acana ci nachas prin iech pharimos, le răspunsuri cadale pușimatande va ajutina amen te dichas vi mai cuci so cherel o Iehova anda amende. Sa cadea, daștil-pe că ande iech ghies cadal sicaimata chiar va salvina amari viața.

CANA TREBUL ‘TE ACHARAS LE PHUREN’?

4. Cathar jianas că ando Iacov 5:14-16, 19, 20 del-pe duma anda iech nasfalimos spiritualo? (Dich vi le imagini.)

⁴ O discipolo Iacov phendea sar folosil o Iehova le phuren caște ajutin amen. Vo scriisardea: „Si mașcar tumende varecon nasfalo? Te acharel peste le phuren la congregațiache”. (Citisar Iacov 5:14-16, 19, 20.) Anda cadal versetea, hachiaras că o Iacov del duma anda iech nasfalimos spiritualo. Sar exemplo, o Iacov phenel că iech manuș nasfalo caște rodel ajutorii trebul te acharel peste le phuren de congregație, na ieche doctoros. Mai but, hachiaras că del-pe duma anda iech nasfalimos spiritualo, anda codoia că cado nasfalimos daștil te avel sastiardo cana le păcatea le manușesche sile iertime. Caște avel mai mișto iech manuș nasfalo, trebul te jial co doctoro, te phenel lesche sar simțol-pe hai pala codoia, te lel-pe pala so phenel lesche o doctoro. Sa cadea, cana sam nasfale spiritualo, adică si amen nevoia ajutorostar caște avas pale pașă le Iehovastar, trebul te das duma le phurența, te phenas lenghe amaro pharimos hai pala codoia, te las amen pala le sfaturi cai von den-len amenghe andai Biblia.

5. Sar daisaras te jianas dacă sam ando pericolo te peras nasfale spiritualo?

⁵ Ando Iacov, o capitolo 5, sam zuriarde te das duma le phurența de fiesavi data cana simțosaras că trebul amen ajutorii caște zuriaras amaro pachiamos. Si zurales importanto te mangas lengo ajutorii angla te rimosaras amaro amalimos le Iehovasa! Trebul te avas sincero amența. I Biblia phenel te las sama te na hohavas amen corcore că sam sasteveste spiritualo. (Iac. 1:22) Ando iechto secolo, chichiva creștini anda Sardes cărde cadaia, tha o Isus phendea lenghe sar sas ciaces lengo sastimos spiritualo. (Iac. 1:22) Tha sar jianas dacă sam sasteveste spiritualo? Daisaras te dichas dacă si amen sa codoi iubirea anda o Iehova sar atunci cana boldeam amen. (Rev. 2:4, 5) Daisaras te pușias amen: „Ci mai ciaiol man te citiv andai Biblia hai te gândisarav man ca so sichioav cadea de but sar co începuto? Ci mai si importanto anda mande te jiav ca le întruniri hai te pregătiv man anda lende? Ci mai ciaiol man te predichiv iagasa ando ilo, cadea sar mai anglal? Alosarav te cherav aver buchia sau așel mânri goghi sea o timpo ca le love?”. Dacă o răspunso ca iech anda cadal pușimata si da, cadaia daștilas te sicavel că amaro amalimos le Iehovasa ci mai silo cadea de zuralo. Hai, dacă ci cheras chanci caște lașiaras cadaia, le buchia daștinas te aven sea mai nasul. Dacă ci daisaras te zuriaras corcore amaro amalimos le Iehovasa sau dacă cărdeam vareso nasul andel iacha le Devlesche, trebul te mangas o ajutorii le phurengo.

6. So trebulas te cherel iech phral sau iech phei dacă cărde iech baro păcato?

⁶ Chichiva păcatea sile cadea de bare, că iech manuș daștilas te avel duriardo andai congregația dacă ci sicavel că fal-les ciaces nasul. Dacă iech manuș cărdea iech păcato sar cado, trebul te del duma ieche phuresa. (1 Cor. 5:11-13) Iech manuș cai cărdea iech baro păcato, ci daștil te lașiarel corcoro pesco amalimos le Iehovasa. Ca o Iehova te iertil amare păcatea prin o merimos pesche Șiavesco, trebul te sicavas prin so cheras că parudeam amen ciaces. (Fap. 26:20) Cana jias te das duma le phurența, sicavas că risaras amen ciaces cathar amaro phiraimos nasul.

7. Con mai trebulas te manghel o ajutorii le phurengo?

⁷ Le phure ci camen te ajutin numai codolen cai cărde iech baro păcato, tha vi codolen cai covlilea lengo amalimos le Iehovasa. (Fap. 20:35) Sar exemplo, daștil-pe că si tuche pharo te așes zuralo angla le buchia nasul cai țârdel tut chio ilo te cheres-len. Cadaia daștilas te avel vi mai pharo dacă, angla te prinjianes o ciacimos, țârdean droguri, dichlean pornografia sau cărdean buchia sexualo melale. Tha ci trebul te naches prin cadaia corcoro. Daștis te des duma ieche phuresa anda so si tut po ilo hai vo va așunela tut atento, va dela tut lașe sfaturi hai va anela tuche amintea că daștis te bucuris o ilo le Iehovasco dacă așes vi mai dur zuralo angla le buchia nasul cai țârdel tut chio ilo te cheres-len. (Ecl. 4:12) Daștil-pe că simțos tut bi zoraco hai perado cana mares tut le buchianța nasul cai camel-len chio ilo. Cana simțos tut cadea, le phure va anena tuche amintea că o Iehova dichel cuci că tu rodean lengo ajutorii hai cadaia sicavel că san iech manuș umilo. (1 Cor. 10:12)

8. Trebul te das duma le phurența anda orisavi greșeala cai cheras-la? Explichin.

⁸ Ci trebul te das duma le phurența anda orisavi greșeala cai cheras-la. Sar exemplo, daștil-pe că, ande iech ghies, holiardean tut zurales but hai prin so phendean duchadean but ieche phrales sau pheia. Ando than te jias ca iech phuro, mai mișto le tut pala so phendea o Isus, jia hai cher pacea che phralesa sau pheiasa. (Mat. 5:23, 24) Sa cadea, daștis te rodes vi ande amare publicații caște sichios sar daștis te sicaves mai but lașimos, te aves mai răbdătoro hai sar daștis te încăres tut mai but parpale cana san holiardo. Tha, dacă sa ci daștis te lașiares tumaro nehachiarimos, daștis te manghes o ajutorii ieche phuresco. Cana i Evodia hai i Sintiche ci daisarde te lașiaren pengo nehachiarimos, o Pavel manglea ieche phrales andai congregația te ajutil-len. Sa cadea, vi tu daștis te manghes o ajutorii ieche phuresco anda chi congregația. (Filip. 4:2, 3)

SOSTAR TREBULAS TE ACHARAS LE PHUREN?

9. Chiar cana si amenghe lajiav anda so cărdeam, sostar trebul te mangas o ajutorii le phurengo? (Proverbe 28:13)

⁹ Trebul amen pachiamos hai tromai caște mangas o ajutorii le phurengo cana cărdeam iech baro păcato sau cana si amenghe pharo te așias zurale angla iech buchi nasul cai camel-la amaro ilo. Chiar cana si amenghe lajiav, trebul te das duma le phurența. Sostar trebul te cheras cadaia? Anda codoia că o Iehova ajutil amen prin le phure te avel amen iech amalimos zuralo lesa. Cadea că, cana das duma le phurența, sicavas că si amen pachiamos ando Iehova hai că așunas lestar. Si amen pachiamos că o Iehova va ajutila amen te așias mai dur zurale angla le buchia nasul cai amaro ilo țârdel amen te cheras-len. (Ps. 94:18) Hai cana cărdeam iech păcato, si amen pachiamos că, dacă phenas le phurenghe so cărdeam hai ci mai cheras so si nasul, o Iehova va iertila amen. (Citisar Proverbe 28:13.)

10. So daștilas te întâmplol-pe dacă camas te garavas amare păcatea?

¹⁰ Cana das duma le phurența anda le păcatea cai cărdeam-len, o Iehova daștil te iertil amen hai daștil te avel amen pale iech amalimos chidino lesa. Tha, dacă ci das duma le phurența hai garavas amaro păcato, va avela te avas vi mai duchade. Cana o rege David camlea te garavel pesche păcatea, vo sas-lo zurales duchado hai nasfalo spiritualo. (Ps. 32:3-5) Cana si amen iech nasfalimos sau iech duch hai ci jias co doctoro, amaro sastimos va avela vi mai nasul. Sa cadea, cana cheras iech baro păcato hai ci jias te das duma le phurența, va avela te avas vi mai duchade hai mai nasfale spiritualo. O Iehova ci camel te întâmplol-pe cadaia, anda codoia phenel amenghe te das duma le phurența caște ajutin amen hai, cadea, te avas pale amala lesa hai te avas sasteveste spiritualo. (Is. 1:5, 6, 18)

11. So mai daștilas te întâmplol-pe cana camas te garavas le bare păcatea?

¹¹ Cana ci phenas le phurenghe anda iech baro păcato cai cărdeam-les, vi aver daștinas te aven duchade. Daștil-pe că o spirito sfânto le Iehovasco te na mai avel opral i congregația hai te cioras i pacea amare phralenghi hai pheianghi. (Ef. 4:30) Sa cadea, dacă jianas că iech jeno andai congregația cărdea iech baro păcato, trebul te zuriaras-les te jial te del duma le phurența.a Dacă garavas o păcato avere manușesco, daștil-pe că vi amen va avela te avas doșale angla o Iehova. (Lev. 5:1) I iubirea anda o Iehova va zuriarela amen te das duma le phurența dacă varecon cărdea iech baro păcato. Cana cheras cadaia, ajutisaras ca i congregația te așel uji hai ajutisaras codoles cai păcătuisardea te avel-les pale iech lașio amalimos le Iehovasa.

SAR AJUTIN AMEN LE PHURE?

12. Sar ajutin le phure codolen cai sile covle spiritualo?

¹² I Biblia zuriarel le phuren te ajutin codolen cai sile covle te aven zurale spiritualo. (1 Tes. 5:14) Dacă cărdean iech păcato, le phure daștin te șion tuche chichiva pușimata caște dichen so si ande chio ilo hai ande chi goghi. (Prov. 20:5) Daștil-pe că na-i tuche ușoro te des duma le phurența. Vi mai but dacă san lajiavuno, si tuche pharo te des duma anda so întâmplosardea-pe. Tha le phurenghe va avela mai ușoro te ajutin tut dacă tu pâtres chio ilo angla lende. Na dara că va avela te phenes vareso nasul. (Iov 6:3) Le phure ci va judechina tut sigo anda so phenes, tha va așunena tut atento caște prinjianen sea le buchia angla te den tut sfaturi andai Biblia. (Prov. 18:13) Von hachiaren că si nevoia timpostar caște len sama le bacreandar le Iehovasche. Cadea că, von jianen că, poiechdata, trebun te den duma mai butivar varecasa caște ajutin-les.

13. Sar daștin te ajutin amen le phure prin le manglimata hai le sfaturi andai Biblia? (Dich vi le imagini.)

¹³ Cana des duma le phurența, von va cherena sea so daștin caște na simțos tut vi mai doșalo. Mai but, von va manghena-pe le Devlesche anda tute. O Iehova va așunela lenghe manglimata, cai silen iech „baro zuralimos”. Cadala va ajutina tut mai but sar ajucărdean tut. Mai but, i Biblia phenel că von „machen [tut] uleiosa ando anav le Iehovasco”. (Iac. 5:14-16) Cado ‘uleio’ si o ciacimos anda o Lil le Devlesco. Prin leste, le phure va lena o pharimos pa chio ilo hai va ajutina tut te aves pale lașio amal le Iehovasa. (Is. 57:18) Prin le sfaturi cai den-len andai Biblia, von zuriaren tut te cheres mai dur so si mișto. Prin le phure daștis te așunes o glaso le Iehovasco, cai phenel tuche: ‘Dich o drom! Phir pe leste!’. (Is. 30:21)

14. Pala sar phenel-pe ando Galateni 6:1, sar ajutin le phure codolen cai cărde „iech paso greșime”? (Dich vi le imagini.)

¹⁴ Citisar Galateni 6:1. Cana iech creștino cherel „iech paso greșime”, ci cherel so camel o Iehova. Cado paso greșime daștilas te avel iech alosarimos nasul sau iech baro păcato. Pherde iubirea, le phure „roden te ortosaren ieche manușes sar cado ando spirito le lașimasco”. I duma grecisco cai si traducime prin „ortosarel” daștil te del duma anda so cherel iech doctoro cai șiol parpale thaneste iech cocalo caște ajutil le manușes te na așel bango. Iech lașio doctoro va dela sea peschi zor caște șiol parpale o cocalo bi te duchavel prea but le manușes. Sa cadea, le phure len sama te sastiaren amaro nasfalimos spiritualo bi te duchaven amen prea but. I Biblia phenel le phurenghe ‘te len sama vi pende’. Cana le phure ajutin amen te ortosaras amen, von jianen că sile imperfecți hai că daștin te cheren iech paso greșime. Von ci va prasana le coaveren hai ci va pachiana că sile mai bare sau mai orta sar aver. Mai but, von va dena sea penghi zor caște simțon i duch anda chio ilo. (1 Pet. 3:8)

15. So daisaras te cheras cana nachas prin iech pharimos?

¹⁵ Daisaras te pachias amen ande amare phure andai congregația. Von sas-le sicade te na phenen averenghe so amen phenas lenghe hai te den sfaturi andai Biblia, ando than te phenen amenghe so pachian von că si mișto. Mai but, sas-le sicade vi te ajutin amen te nachas prin amare pharimata. (Prov. 11:13; Gal. 6:2) Chiar cana le phure sile diferime iech averestar, hai iech silo phuro de mai but vremea hai iech de mai țâra, daisaras te das duma orisave phuresa caște ajutil amen. Tha ci va avela te mangas sfato mai bute phurendar, caște phenen amenghe so amen camas te așunas. Dacă avelas te cheras cadaia, sam sar codola cai camen te așunen numai so placial-len, ando than te așunen le sicaimata le Iehovasche andai Biblia. (2 Tim. 4:3) Cana das duma ieche phuresa anda amaro pharimos, vo daștilas te pușel amen dacă deam duma vi avere phuresa anda cadai buchi hai, dacă cărdeam cadaia, so sfato primisardeam. Mai but, i umilința cai sicavel-la iech phuro daștil-pe că va cherela-les te manghel ajutorii vi avere phurestar. (Prov. 13:10)

SO TREBUL TE CHEREL FIESAVO MAȘCAR AMENDE

16. So trebul te cherel fiesavo mașcar amende?

¹⁶ Chiar cana le phure len sama amendar, von ci daștin te phenen amenghe so te cheras. Fiesavo mașcar amende trebul te sicavel le Iehovasche prin so cherel hai prin so phenel ande fiesavo ghies că iubil-les hai că camel te avel dichlo lașe iachența lestar. Hai vo va ajutila amen te cheras lașe alosarimata hai te așias lesche loiali. (Rom. 14:12) Cadea că, ando than te phenen amenghe so te cheras, le phure va sicavena amenghe andi Biblia sar gândil o Iehova. Dacă las amen pala le sfaturi anda o Lil le Devlesco, daisaras te ‘sicavas amara goghia te hachiarel so si mișto hai so si nasul’ caște cheras lașe alosarimata. (Evr. 5:14)

17. So camel o Iehova te cheras?

¹⁷ O Iehova dea amen i bari pachiv te avas lesche bacrea. Vo bișialdea le Isusos, „o lașio păstorii”, caște merel anda amende hai, cadea, te daisaras te traisaras anda sea o timpo. (Ioan 10:11) O Iehova dea amen vi le phuren de congregație caște cherel so si scriime ande Ieremia 3:15: „Va avela te dav tumen păstori pala mânro ilo, hai von va dena tumen te han prinjianimasa hai hachiarimasa”. Cana sam covle sau nasfale spiritualo, ci trebul te încăras amen parpale te mangas lengo ajutorii. Te avas hotărâme te mangas ajutorii cathar le păstori pherde iubirea cai o Iehova dea-len amenghe te ajutin amen!