So daisaras te cheras cana si amen pușimata cai covliaren amaro pachiamos?

1, 2. a) So daștin chichiva andal manușa le Iehovasche te pușen-pe? b) So va avela te dichas ande cado articolo?

CHIAR cana sam tărne sau mai phure, savore pușleam amena dacă sam cuci andel iacha le Iehovasche sau dacă, mai anglal, alosardeam mișto so te cheras. Gândisar tut, sar exemplo, ca iech Martoro tărno cai pușel-pe dacă le Iehovas duchal-les ciaces lestar. Anda codoia că ci pachial ciaces cadai buchi, daștil te așiavel-les te bolel-pe. Sau te gândisaras amen ca iech phral cai, cana sas-lo tărno, alosardea te șiol po iechto than ande peschi viața i buchi anda o Iehova, ando than te alosarel te cherel love. Tha, acana, cana na-i len but love, gândil-pe dacă alosardea mișto so cărdea mai anglal. Sau te gândisaras amen ca iech phei phuri cai ci mai sila cadea de but zuralimos sar cana sas tărni. Voi daștil te avel peradi anda codoia că ci mai daștil te cherel cadea de but sar mai anglal. Daștil-pe că, vroiechdata, vi tu pușlean tut: „Duchal le Iehovas ciaces mandar? Cărdem mișto cana alosardem te cherav mai but anda o Iehova? Mai daștiv te cherav vareso anda o Iehova?”.

² Dacă ci das amari zor te arachas răspunso ca le pușimata sar cadala, von daștin te covliaren amaro pachiamos ando Iehova, sau chiar te cheren amen te na mai slujisaras lesche. Ande cado articolo, va avela te dichas sar daștil i Biblia te ajutil amen cana, poiechdata, pușias amen: 1) dacă le Iehovas duchal-les amendar, 2) dacă sas mișto so alosardeam mai anglal hai 3) dacă mai sam lașe andi buchi le Iehovaschi.

CANA SI AMEN PUȘIMATA CAI DAȘTIN TE COVLIAREN AMARO PACHIAMOS

3. So daisaras te cheras cana si amen pușimata cai covliaren amaro pachiamos?

³ Cana si amen pușimata, trebul te rodas o răpunso andi Biblia. Cana cheras cadai buchi, amaro pachiamos hai amaro amalimos le Iehovasa va avela mai zuralo. Cadea, va avela te așias „zurale ando pachiamos”. (1 Cor. 16:13)

4. Sar daisaras ‘te rodas mișto sea le buchia te dichas dacă sile ciace’? (1 Tesaloniceni 5:21)

⁴ Citisar 1 Tesaloniceni 5:21. I Biblia zuriarel amen ‘te rodas mișto sea le buchia, te dichas dacă sile ciace’. Sar daisaras te cheras cadaia? Cana rodas te dichas dacă le buchia cai pachias-len sile pala sar phenel i Biblia. Sar avelas, te gândisaras amen le tărneste cai pușelas-pe dacă le Iehovas duchal-les lestar. Trebulas te pachial că, dacă pușel-pe cadaia, însemnol că le Iehovas ci duchal-les lestar? Na. Vo trebul ‘te rodel mișto sea le buchia’ caște hachiarel sar dichel o Iehova cadaia.

5. Sar daisaras te „așunas” o răspunso le Iehovasco ca amare pușimata?

⁵ Cana citisaras anda o Lil le Devlesco si sar cana așunas le Iehovas sar del duma amența. Tha trebul te cheras mai but sar te citisaras andai Biblia dacă camas te arachas o răspunso le Iehovasco ca amaro pușimos. Trebul te arachas hai te sichioas andal versetea cai ajutin amen te hachiaras o răspunso ca amare pușimata. Caște cheras cadaia, daisaras te sichioas anda amare lila cai dea-len amenghe o Iehova prin peschi organizația. (Prov. 2:3-6) Trebul vi te mangas amen le Iehovasche hai te phenas lesche te ajutil amen te arachas o răspunso ca le pușimata cai si amen. Pala codoia, daisaras te rodas versetea andai Biblia hai sfaturi cai daștin te ajutin amen ande amari situația. Sa cadea, daisaras te dichas so cărde chichiva manușa andai Biblia cai nachle prin sa codol pharimata sar amen.

6. Sar ajutin amen le întruniri cana pușias amen vareso cai covliarel amaro pachiamos?

⁶ „Așunas” le Iehovas sar del duma amența vi cana jias co întruniri. Dacă jias ca fiesavi întrunirea, iech cuvântarea sau iech răspunso cai del-les varecon daștil te ajutil amen te arachas o răspunso ca le pușimata cai daștin te covliaren amaro pachiamos. (Prov. 27:17) Mai dur, va avela te dichas so pușimata daștin te aven ande amari goghi hai so daștil te ajutil amen te arachas o răspunso.

CANA PUȘES TUT DACĂ LE IEHOVAS DUCHAL-LES TUTAR

7. So daștinas te pușen-pe chichiva manușa?

⁷ Pușlean tut vroiechdata: „Chiar dichel o Iehova caring mande?”. Cana pachias că ci san lașio chancesche, daștis te gândis tut că si pharo te aves amal Codolesa cai cărdea o universo. Sa cadea simțosardea vi o David ande pesco ilo. Vo gândisardea-pe sar iech Del cadea de baro hai zuralo dichel caring le manușa, cai sile zurales țâne angla leste. Vo pușlea: „O, Iehova, so si o șiav le manușesco, caște șios che iacha pe leste, o șiav le manușesco cai merel, caște diches caring leste?”. (Ps. 144:3) Cai daisaras te arachas răspunso cadale pușimaste?

8. Cadea sar phenel-pe ando 1 Samuel 16:6, 7, 10-12, so dichel o Iehova le manușende?

⁸ I Biblia sicavel amen că o Del dichel codolen cai, andel iacha le manușenghe, ci sile lașe chancesche. O Iehova bișialdea le Samuelos ando chăr ieche murșesco po anav Iese caște machel le reges cai avelas te rail ando Israelo. O Iese achardea efta anda lesche ohto șiave, tha vo ci achardea le Davidos, cai sas o mai tărno anda lende.b Cu sea cadala, o Iehova alosardea chiar les. (Citisar 1 Samuel 16:6, 7, 10-12.) O Iehova jianglea so si ciaces ando ilo le Davidosco, hai dichlea vi că cado tărno iubilas-les zurales but.

9. Sostar daștis te pachias că le Iehovas duchal-les tutar? (Dich vi i imaginea.)

⁹ Gândisar tut sar sicadea o Iehova că dichel caring tute. Vo del tuche sfaturi caște jianes pe savo drom trebul te phires. (Ps. 32:8) O Iehova ci daștilas te cherel cadaia dacă ci prinjianelas tut mișto. (Ps. 139:1) Cana așunes lestar hai diches sar ajutil tut, va avela te pachias ciaces că les duchal-les tutar. (1 Cron. 28:9; Fap. 17:26, 27) O Iehova dichel sea so cheres caște daștis te slujis lesche hai te așunes lestar. Cana dichel che șucar calități, o Iehova camel te pașiol vi mai but tutar. (Ier. 17:10) Hai lesco ilo va bariola bucuriatar cana vi tu cames te aves lesco amal. (1 Ioan 4:19)

CANA PUȘES TUT DACĂ ALOSARDEAN MIȘTO MAI ANGLAL

10. So daisaras te pușias amen cana gândisaras amen ca so alosardeam te cheras mai anglal?

¹⁰ Poiechdata, chichiva daștinas te pușen-pe dacă alosarde mișto mai anglal. Daștil-pe că mechle palal iech buchi cai sas mișto pochindi sau vareso cai anelas lenghe but love. Cu sea cadala, von alosarde te slujin le Iehovasche mai but. Daștil-pe că von gândin-pe ca manușa cai ci alosarde te cheren sa codol buchia andi viața sar von. Hai, pala so nachle le bărșa, cadale manușen silen but love hai iech lașio traio. Anda codoia, von daștinas te arăsăn te pușen-pe: „Cărdem o mai lașio alosarimos te slujiv le Iehovasche, sau daștilas te avel man mai but love dacă cărdemas mai but buchi?”.

11. Sostar sas perado codo cai scriisardea o Psalmo 73?

¹¹ Dacă vi tu pușes tut sa cadal buchia, gândisar tut so sas ando ilo codolesco cai scriisardea o Psalmo 73. Vo dichlea că codola cai ci slujinas le Iehovasche sas-le sasteveste, barvale hai ci sas-len niciech pharimos. (Ps. 73:3-5, 12) Pala so dichlea că jialas lenghe mișto, simțosardea că i phari buchi cai cherelas-la caște slujil le Iehovasche sas de ivea. Cadal pușimata ci mechenas-les te avel-les pacea ando ilo. (Ps. 73:13, 14) So cărdea o psalmisto caște na mai avel-les ando ilo cadal buchia cai duchavenas-les?

12. Cadea sar phenel-pe ando Psalmo 73:16-18, sar arachlea o psalmisto peschi pacea?

¹² Citisar Psalmo 73:16-18. O psalmisto gălea co sanctuaro le Iehovasco caște arachel peschi pacea. Ande codo than, mașcar le manușa le Iehovasche, vo daștilas te gândil ujes. Vo hachiardea că, chiar dacă anda chichiva i viața sas lași, lengo viitorii sas hasardo. Cadea că, vo ci mai sas-lo perado hai, acana, jianelas ciaces că te șiol le Iehovas po iechto than ande peschi viața sas o mai lașio alosarimos. Cadaia zuriardea-les te slujil mai dur le Iehovasche. (Ps. 73:23-28)

13. Cana pușes tut dacă alosardean mișto mai anglal, so daștil te ajutil-tut te avel tut pacea ando ilo? (Dich vi le imagini.)

¹³ O Lil le Devlesco daștil te ajutil amen te avel amen pacea ando ilo. Te gândisaras amen le buchiande cai si amen – chiar vi ca le barvalimata cai si amen ando cerii – hai te gândisaras amen că sea so silen codolen cai ci slujin le Iehovasche si numai so daștil te del lenghe cadai lumea. Daștil-pe că von pachian-pe cu sea ande le buchia cai daștin te cheren-len ande cadai lumea anda codoia că ci ajucăren-len chanci ando viitorii. Tha amen, na-i amen numai cadal șucar buchia le Iehovastar acana. Vo phendea că, ando viitorii, va pâtrăla pesco vast hai va dela amen sea so camel amaro ilo. (Ps. 145:16) Sa cadea, daisaras te pușias amen: „Daștiv te jianav ciaces sar avelas mânri viața dacă alosardemas te cherav aver vareso?”. Iech buchi jianas ciaces: Cana alosaras pala i iubirea cai si amen anda o Del hai anda le coaver, va avela amen sea o timpo le buchia cai cheren amen ciaces fericime.

CANA PUȘES TUT DACĂ MAI SAN LAȘIO ANDI BUCHI LE IEHOVASCHI

14. Prin so pharimata nachen chichiva hai so daștil-pe că pușen-pe?

¹⁴ Chichiva anda le manușa le Iehovasche ci daștin te cheren cadea de but anda leste sar camen von, anda codoia că sile phure, nasfale sau silen iech baro nasfalimos cai așavel-len. Cadea că, chichiva daștin te arăsăn te pachian că ci sile cuci andel iacha le Iehovasche. Von chiar pușen-pe: „Mai daștiv te cherav vareso lașio andi buchi le Iehovaschi?”.

15. So jianglea ciaces o manuș cai scriisardea o Psalmo 71?

¹⁵ O manuș cai scriisardea o Psalmo 71 simțosardea sa codol buchia. Vo phendea ando manglimos: „Na mech man cana ci mai si man zuralimos!”. (Ps. 71:9, 18) Chiar cana pachialas anda peste că silo covlo, o psalmisto jianglea ciaces că, dacă slujilas le Devlesche pherdo pachiamos, o Iehova avelas te ajutil-les. O psalmisto hachiardea că le Iehovas ciaiol-les cana lesche manușa cheren sea so daștin ande leschi buchi, chiar cana silen pharimata cai așaven-len. (Ps. 37:23-25)

16. Save si chichiva buchia cai daștin te cheren-len le phrala hai le pheia mai phure andi buchi le Iehovaschi? (Psalmo 92:12-15)

¹⁶ Amare cuci phrala hai pheia mai phure, den tumari zor te dichen tumen cadea sar dichel tumen o Iehova. Vo daștil te ajutil tumen te slujin lesche pherde pachiamos, chiar cana si tumen pharimata cai daștil-pe că așaven tumen. (Citisar Psalmo 92:12-15.) Ando than te gândin tumen ca so ci daștin te cheren, gândin tumen mai mișto ca le buchia cai daștin te cheren-len. Sar avelas, zuriaren averen cana dichen chichi de but duchal tumen lendar sau cana dichen că tumen slujin le Iehovasche anda sea o ilo. Daștin te phenen averenghe sar dichlean o vast le Iehovasco ande tumari viața. Sa cadea, daștin te sicaven că pachian ciaces so phenel-pe andi Biblia că va avela ando viitorii. Hai mai but, na bâstrăn că le manglimata cai cheren-len anda le coaver silen iech baro zuralimos. (1 Pet. 3:12) Cadea că, prin oriso nachas, savore daisaras te das vareso le Iehovasche hai averenghe.

17. Sostar trebul te na comparisaras amen averența?

¹⁷ Cana simțos tut holiardo anda codoia că ci daștis te cheres mai but anda o Iehova, pachia ciaces că vo dichel cuci sea so cheres ande leschi buchi. Daștil-pe că avel tuche te cheres comparația mașcar so cheres tu hai so cheren aver. Tha te na peres ande cado athaimos. Sostar? Anda codoia că o Iehova ci cherel comparații. (Gal. 6:4) Sar avelas, i Maria dea le Isusosche iech uleio cai chandelas șucar hai cai bichinelas-pe bute lovența. (Ioan 12:3-5) Tha, iech phivli ciori daisardea te del co templo numai dui țânorre love. (Luca 21:1-4) Cu sea cadala, o Isus ci cărdea comparația mașcar cadal dui jiuvlea. Vo dichlea că vi i Maria, hai vi i phivli ciori sicade pengo pachiamos. Lesco Dad, o Iehova, dichel zurales cuci sea so daștis te cheres anda leste, chiar dacă si mai țâra sau mai but ande che iacha. Anda leste, si importanto te cheres-la iagasa ando ilo hai pherdo iubirea.

18. So daisaras te cheras cana si amen pușimata cai covliaren amaro pachiamos? (Dich vi o chenarii „O Lil le Devlesco daștil te ajutil amen cana si amen pușimata cai covliaren amaro pachiamos”.)

¹⁸ Poiechdata, savoren si amen pușimata cai daștin te covliaren amaro pachiamos. Tha, cadea sar dichleam, i Biblia daștil te ajutil amen te arachas răspunso cadale pușimatande. De sea chi zor te araches o răspunso ca le pușimata cai si tut. Cadea, va avela tut iech pachiamos mai zuralo, ando than te aves perado. Pachia ciaces că o Iehova dichel tut hai că ci va bâstrela tut niciechdata. Ande lesche iacha si cuci sea so cheres hai vo va pochinela tut parpale anda chi phari buchi. Na bâstăr că o Iehovas lel sama sea pesche manușendar cai slujin lesche anda sea o ilo hai iubil-len but!