Te sichioas te gândisaras sar gândin o Iehova hai o Isus!

1, 2. Sar trebul te iubisaras le Iehovas hai sar sicadea o Isus că iubisardea pesche Dades „sea la goghiasa”?

„TE IUBIS le Iehovas, chio Del, sea che ilesa, sea che sufletosa, sea che zuralimasa hai sea chia goghiasa.” (Luca 10:27) Anda so phendea o Isus, hachiaras mișto că cadaia sas i mai importanto porunca andai Legea mozaico. Cadai legea sicavel că trebul te iubisaras le Iehovas sea amare ilesa. Cadaia însemnol că amare sentimentea, amare emoții tha vi so țârdel amen o ilo te cheras, trebun te sicaven că iubisaras le Iehovas. Sa cadea, trebul te iubisaras le Iehovas sea amare sufletosa. Cadaia însemnol că trebul te das sea amari zor te cheras buchi anda leste. Tha trebul te iubisaras le Iehovas vi amara goghiasa, adică te sicavas amari iubirea caring o Iehova vi prin sar gândisaras. Si ciaces, niciechdata ci va avela te hachiaras cu sea sar gândil o Iehova. Tha, daisaras te hachiaras mai mișto sar gândil o Iehova cana sichioas anda „i goghi le Cristososchi”, anda codoia că vo sicavel perfecto sar gândil lesco Dad. (1 Cor. 2:16)

² O Isus iubisardea le Iehovas sea pesca goghiasa. Vo jianelas so camelas te cherel o Del lesa. Anda codoia, o Isus camlea te cherel i voința le Devleschi chiar cana avelas te țârdel but ducha caște cherel so si mișto. Vo dea sea peschi zor te cherel so camel lesco Dad hai ci mechlea niciech buchi te avel mai importanto sar cadaia.

3. So sichilea o apostolo Petru le Isusostar hai so zuriardea o Petru le creștinen te cheren? (1 Petru 4:1)

³ Sas iech bari pachiv anda o Petru hai le coaver apostoli te beșen mai but timpo le Isusosa hai te hachiaren sar gândil vo. Ando iechto lil cai scriisardea-les o Petru tela o zuralimos le Devlesco, vo zuriardea le creștinen te avel-len sa codo phiraimos hai gândimos sar le Cristosos. (Citisar 1 Petru 4:1.) Andi șib originalo la Bibliachi, cana o Petru scriisardea „len pe tumende”, vo folosisardea iech duma cai phenel pa iech soldato cai lel pe peste le buchia cai trebul lesche caște jial te marel-pe. Cadea că, cana iech creștino sichiol te gândil cadea sar gândil o Isus, va avela-les o zuralimos te marel-pe contra le buchia nasul cai țârdel-les lesco ilo te cherel-len hai vi te așel contra i lumea nasul le Satanoschi. (2 Cor. 10:3-5; Ef. 6:12)

4. So va avela te sichioas ande cado articolo?

⁴ Ande cado articolo, va avela te dichas sar gândil o Isus hai sar daisaras te las amen pala lesco gândimos. Va avela te sichioas trin buchia: 1) te gândisaras sar gândil o Iehova, 2) te avas umili hai 3) te avel amen iech goghi sastevesti.

TE GÂNDISARAS SAR GÂNDIL O IEHOVA

5. Sar sicadea o Petru că ci gândil sar o Iehova?

⁵ Te dichas cana ci sicadea o Petru că gândil sar o Iehova. O Isus phendea le apostolenghe că avelas te jial co Ierusalimo, te avel dino po vast le bare rașaiengo de cothar, te avel mardo hai pala codoia mudardo. (Mat. 16:21) O Petru jianglea că o Isus sas o Mesia cai trebulas te avel pi phuv caște salvil le manușen le Devlesche. Cadea că trebulas te avel pharo anda o Petru te pachial că o Iehova avelas te mechel te avel mudardo o Isus. (Mat. 16:16) O Petru lea de iech rig le Isusos hai phendea lesche: „Av lașio tusa, Raia. Ci va avela te naches prin cadala buchia”. (Mat. 16:22) O Petru ci gândilas cadea sar gândil o Iehova anda cadai buchi, cadea că les ci sas-les nici o gândimos le Isusosco.

6. Sar sicadea o Isus că gândil cadea sar gândil vi o Iehova?

⁶ O gândimos le Isusosco sas sar lesche Dadesco. O Isus phendea le Petrosche: „Jia pala mânro dumo, Satan! Ci meches man te cherav so camel o Del, anda codoia că gândis sar le manușa, na sar o Del”. (Mat. 16:23) O Isus jianglea că, caște cherel so camel o Del, trebulas te nachel prin bare ducha hai te merel. Cadea că, o Isus ci așundea catar o sfato le Petrosco, chiar cana vo camlea te ajutil-les. Ande codo ghies, o Petru sichilea că trebul te gândil cadea sar gândil vi o Del. Cado daștil te avel iech baro sicaimos vi anda amende.

7. Sar sicadea o Petru pala codoia că camlea te gândil sar gândil Iehova? (Dich i imaginea.)

⁷ Pala codoia, o Petru sicadea că camel te gândil cadea sar gândil Iehova. O Iehova camlea ca vi codola cai ci sas-le evrei hai save ci sas-le șinde împrejur te aven lesche manușa. Cadea că o Del dea le Petros i buchi te predichil le Corneliosche, cai sas anda le anglune manușa cai ci sas-le evrei hai cărdile manușa le Iehovasche. Anda codoia că le evrei butivar ci sas-len phanglimos codolența cai ci sas-le evrei, o Petru trebulas te paruvel pesco gândimos caște daștil te del duma lența hai te predichil lenghe. Tha, cana hachiardea savi si i voința le Devleschi anda cadai buchi, o Petru astardea te dichel le buchia cadea sar camlea o Del. Cadea că, cana sas achardo co Corneliu, vo gălea ‘bi te încărel-pe parpale’. (Fap. 10:28, 29) O Petru dea duma le Corneliosa hai codolența anda lesco chăr anda o Iehova, hai cadala bolde-pe. (Fap. 10:21-23, 34, 35, 44-48)

8. Sar daisaras te sicavas că las amen pala o gândimos le Iehovasco? (1 Petru 3:8)

⁸ Pala chichiva bărșa, o Petru zuriardea le creștinen te aven phangle ande „sa codo gândimos”. (Citisar 1 Petru 3:8.) Sar manușa le Iehovasche, daisaras te cheras cadaia cana sicavas că gândisaras cadea sar gândil o Iehova. Lesco Lil, i Biblia, ajutil amen te cheras cadaia. Sar exemplo, o Isus zuriardea codolen cai len-pe pala leste te șion po iechto than ande lenghi viața o Regato le Devlesco. (Mat. 6:33) Varecon andai congregația cai camel te cherel cadai buchi daștilas te astarel o pionierato sau te slujil le Iehovasche cu timp integral ande aver felo. Ando than te zuriaras-les te avel lașio pesa, daisaras te așaras-les hai te ajutisaras-les ande so alosardea te cherel.

TE AVAS UMILI

9, 10. Sar sicadea o Isus iech bari umilința?

⁹ Andi riat angla so te merel, o Isus sicadea le Petros hai le coaveren apostolen iech baro sicaimos anda i umilința. O Isus bișialdea le Petros hai le Ioanos te jian mai sigo caște lașiaren le buchia cai trebunas anda i palutni cina cai avenas te han-la ande iech than angla so te merel o Isus. Daștil-pe că le dui trebunas te dichen dacă code sas iech balai hai prosoapea, caște daștin te aven halade le pânre codolenghe cai avenas lența. Tha, con avelas cadea de umilo caște halavel le pânre le coaverenghe?

¹⁰ O Isus cărdea cadai buchi bi te încărel-pe parpale. Vo sicadea iech bari umilința. Le apostoli așile uimime cana o Isus cărdea cadai buchi cai, o mai butivar, cherelas-la iech slujitoro. Vo dea tele peschi mantia hai șiutea iech prosopo pe pesco mașcar, șiordea pai ande iech balai hai astardea te halavel le pânre le apostolenghe. (Ioan 13:4, 5) Daștil-pe că nachlea mai but vremea ji cana o Isus haladea le pânre sea le 12 apostolenghe, chiar vi le Iudasche, cai avelas te bichinel-les. Tha, o Isus cărdea cadai buchi pherdo umilința. Pala codoia, phendea pherdo răbdarea le apostolenghe: „Hachiaren so cărdem? Tumen phenen manghe «Sicaitorii» hai «Rai» hai si tumen ciacimos, anda codoia că cadea som. Cadea că, dacă me sar Rai hai Sicaitorii haladem tumare pânre, vi tumen trebun te halaven le pânre iech averesche”. (Ioan 13:12-14)

11. Sar sicadea o Petru că sichilea te avel umilo? (1 Petru 5:5 hai i nota de telal) (Dich vi i imaginea.)

¹¹ O Petru lea-pe pala o exemplo le Isusosco hai sicadea umilința. Pala so o Isus gălea parpale ando cerii, o Petru, prin iech miracolo, sastiardea ieche manușes cai sas-lo bango de cana cărdilea. (Fap. 1:8, 9; 3:2, 6-8) But manușa dichle cado miracolo hai chidine-pe pașa o Petru. (Fap. 3:11) Avelas te bucuril-pe o Petru că savore manușa denas-les atenția anda so cărdea? Nici. O Petru, cai sicadea iech bari umilința, ci camelas te țârdel i atenția caring peste, chiar cana barilea mașcar manușa cai cherenas cadaia. Vo dea sea i pachiv le Iehovasche hai le Isusosche cana phendea: „Prin o anav le Isusosco hai prin amaro pachiamos ande leste sas sastiardo cado manuș, cas dichen-les hai prinjianen-les”. (Fap. 3:12-16) Cana scriisardea le creștinenghe te sichion te aven umili, o Petru folosisardea iech duma cai anel amenghe amintea sar o Isus șiutea pe pesco mașcar iech prosopo hai haladea le apostolenghe pânre. (Citisar 1 Petru 5:5 hai i nota de telal.)

12. Sar daisaras te sichioas mai dur te avas umili cadea sar o Petru?

¹² Vi amen daisaras te las amen pala o Petru hai te sichioas te avas umili. I ciaci umilința ci dichiol-pe numai prin so phenas. O Petru folosisardea iech duma anda i „umilința”, prin savi hachiarel-pe că iech manuș sicavel umilința vi prin so gândil anda peste hai anda le coaver manușa, prin lesche mai garade gânduri. Amen slujisaras averenghe anda codoia că iubisaras le Iehovas hai le manușen, na anda codoia că camas te avas mișto dichle le coaverendar. Sicavas că sam ciaces umili cana slujisaras le Iehovasche hai amare phralenghe pherde bucuria, chiar cana aver dichen sau nici i buchi cai cheras-la. (Mat. 6:1-4)

TE AVEL AMEN „IECH GOGHI SASTEVESTI”

13. So însemnol te avel amen „iech goghi sastevesti”?

¹³ Sar sicavel iech creștino că siles „iech goghi sastevesti”? (1 Pet. 4:7) Vo del peschi zor te cherel lașe alosarimata cai sicaven că gândil cadea sar o Iehova. Vo jianel mișto că chanci na-i mai importanto sar lesco amalimos le Iehovasa. Mai but, vo ci va avela te gândil-pe prea but peste hai va hachiarela că ci jianel sea le buchia. Vo sicavel că pachial-pe ando Del cana manghel butivar lesco ajutorii ando manglimos pherdo umilința.a

14. Sar sicadea o Petru că ci pachiaia-pe ando Iehova?

¹⁴ Andi riat angla so te merel, o Isus phendea pesche discipolenghe: „Ande cadai riat, savore va mechena man cana va dichena prin so va avela te nachav”. Atunci o Petru phendea lesche: „Chiar cana savore va mechena tut cana va dichena prin so naches, me ci va avela te mechav tut niciechdata!”. Sea ande codoi riat, o Isus phendea pesche discipolenghe: „Așen uștiade hai manghen tumen sea o timpo!”. (Mat. 26:31, 33, 41) O Petru ci lea-pe pala so phendea o Isus. Daștil-pe că, dacă avelas te cherel cadaia, vo avelas te sicavel tromai hai te phenel angla savore manușa că sas-lo iech discipolo le Isusosco. Tha, o Petru phendea că ci prinjianel le Isusos hai, pala codoia, falea-les zurales nasul anda so cărdea. (Mat. 26:69-75)

15. So cărdea o Isus caște avel-les iech goghi sastevesti andi palutni riat angla so te merel?

¹⁵ O Isus pachiaia-pe cu sea ando Iehova. Chiar cana sas-lo perfecto, vo manglea-pe butivar le Iehovasche. Cadea, sas-les o tromai caște cherel so camlea o Iehova. (Mat. 26:39, 42, 44; Ioan 18:4, 5) O ciacimos si că o Petru ci bâstărdea niciechdata că o Isus manglea-pe butivar le Iehovasche andi palutni riat angla so te merel.

16. Sar sicadea o Petru că arăslea te avel-les iech goghi sastevesti? (1 Pet. 4:7)

¹⁶ La vremeasa, o Petru arăslea te pachial-pe mai but ando Iehova hai te manghel lesco ajutorii ando manglimos. Pala so o Isus sas-lo uștiado andal mule, vo phendea le Petrosche hai le coavere apostolenghe că va avela te del-len o spirito sfânto caște daștin te predichin vi mai dur. Tha o Isus phendea lenghe că, angla so te primin o spirito sfânto, von trebunas te ajucăren iech vremea ando Ierusalimo. (Luca 24:49; Fap. 1:4, 5) So cărdea o Petru ando timpo so ajucărelas? Vo hai le coaver creștini „manghenas-pe anda sea o ilo”. (Fap. 1:13, 14) Pala iech vremea, cana o Petru scriisardea pesco iechto lil, vo zuriardea le phralen te avel-len iech goghi sastevesti, te pachian-pe ando Iehova hai te manghen lesco ajutorii ando manglimos. (Citisar 1 Petru 4:7.) O Petru sichilea te pachial-pe ando Iehova hai te zuriarel le phralen hai le pheian anda i congregația anda o secolo I. (Gal. 2:9)

17. So trebul te cheras mai dur, chiar cana sam goghiaver hai jianas te cheras but buchia? (Dich vi i imaginea.)

¹⁷ Caște avel amen iech goghi sastevesti, trebul te mangas amen sea o timpo le Iehovasche. Jianas că trebul te mangas vi mai dur o ajutorii le Iehovasco ando manglimos, chiar cana sam goghiaver hai jianas te cheras but buchia. Trebul te mangas-les te sicavel amen so te cheras, vi mai but cana trebul te cheras bare alosarimata, anda codoia că vo jianel so si mai mișto anda amende.

18. Sar daisaras te las amen pala o gândimos le Iehovasco?

¹⁸ Sam zurales bucurime că o Iehova dea amen o zuralimos te daisaras te sicavas lesche șucar calități. (Gen. 1:26) Si ciaces că amen ci daisaras te avas sar o Iehova. (Is. 55:9) Tha, cadea sar o Petru, daisaras te sichioas te gândisaras sar gândil o Iehova. Daisaras te cheras cadaia cana las amen mai dur pala o gândimos le Iehovasco, cana sichioas te avas umili hai cana das amari zor te avel amen iech goghi sastevesti.