Le Iehovasco vast na-i niciechdata prea harno

1. Sar sicadea o Moise că sas-les pachiamos ando Iehova cana încaladea avri le israelițen anda o Egipto?

O LIL Evrei del duma anda but manușa cai sas-len iech pachiamos zuralo ando Iehova. Iech mașcar lende sas o Moise, cai sas-les iech baro pachiamos. (Evr. 3:2-5; 11:23-25) Vo sicadea pesco baro pachiamos cana încaladea avri le israelițen anda o Egipto hai ci mechlea-pe astardo daratar angla o faraono hai leschi armata. Vo pachialas-pe cu sea ando Iehova hai îngărdea le manușen le Iehovasche prin i Marea Loli hai, pala codoia, prin o șuco than. (Evr. 11:27-29) But mașcar le israeliți hasarde pengo pachiamos că o Iehova daștilas te del-len so trebulas lenghe caște train. Tha, o Moise sicadea mai dur pachiamos ande pesco Del hai ci sas-lo perado, anda codoia că o Iehova cărdea miracolea caște del le israelițen so te han hai so te pien cana phirenas prin o șuco than.a (Ex. 15:22-25; Ps. 78:23-25)

2. Sostar pușlea o Del le Moises: „Oare si o vast le Iehovasco prea harno”? (Numerele 11:21-23)

² Chiar cana le Moises sas-les iech zuralo pachiamos, cam pala iech bărș de cana o Iehova încaladea avri le israelițen anda o Egipto, o Moise astardea te pușel-pe sar daștilas o Iehova te del pesche manușenghe te han mas. O Moise ci daștilas te gândil-pe sar o Iehova avelas te del mas milioanea manușenghe ando șuco than. Atunci, o Iehova pușlea le Moises: „Oare si o vast le Iehovasco prea harno?”. (Citisar Numere 11:21-23.) Ande cado verseto, le dumes „o vast le Iehovasco” den duma anda o spirito le Devlesco, sau anda Lesco zuralimos cai folosil-les cana cherel peschi voința. Aver varesar phendo, o Iehova pușlea: „Chiar pachias că ci daștiv te cherav so phendem că va avela te cherav?”.

3. Sostar si importanto te dichas so cărde o Moise hai le israeliți?

³ Daștil-pe că vi tu pușlean tut dacă o Iehova va dela tuche hai chia familiache sea le buchia cai trebun tumen caște train. Mai dur, va avela te dichas sostar o Moise hai le israeliți ci pachiaie că o Iehova daștilas te del lenghe so trebulas lenghe caște train. Sa cadea, va avela te dichas vi chichiva principii andai Biblia cai ajutin amen te zuriaras amaro pachiamos că o vast le Iehovasco na-i niciechdata prea harno.

TE SICHIOAS CATAR O MOISE HAI LE ISRAELIȚI

4. Sostar astarde te pușen-pe but israeliți dacă o Iehova daștilas te del-len le buchia cai trebunas lenghe?

⁴ Sostar but israeliți astarde te pușen-pe dacă o Iehova daștilas te lel sama lendar? Deja nachlea iech vremea de cana le israeliți sas-le încalade anda o Egipto. Le israeliți hai „iech bari mulțimea manușența de orisavo felo” (cai ci sas-le israeliți) phirenas ando șuco than, caring o Them Promiso. (Ex. 12:38; Deut. 8:15) Le but manușa cai ci sas-le israeliți camle te han vi aver vareso, na numai mana, cadea că astarde te rovaren-pe. Sa cadea cărde vi but mașcar le israeliți. (Num. 11:4-6) Von anenas penghe amintea so lașe habena hanas ando Egipto. Hai, anda codoia că le manușa astarde te rovaren-pe co Moise, vo gândisardea-pe că sas leschi buchi te arachel mas anda savore. (Num. 11:13, 14)

5, 6. So sichioas anda sar le israeliți astarde te gândin sar codola cai sas-le lența?

⁵ Codola cai ci sas-le israeliți ci sas-le mulțumime le buchianța cai o Iehova delas lenghe, hai le israeliți astarde te gândin sar von. Cadai buchi daștil te întâmplol-pe vi amenghe. Cana beșas codolența cai ci sile mulțumime le buchianța cai silen, vi amen daisaras te arăsas te na avas fericime le buchianța cai del-len amenghe o Iehova. Daisaras te arăsas te camas le buchia cai sas amen mai anglal sau le buchia cai si averen. Tha, dacă sichioas te avas mulțumime le buchianța cai si amen, i fericirea va bariola ande amare ile.

⁶ Le israeliți trebuisarde te anen penghe amintea că o Del promitisardea lenghe că va dela-len sea le buchia cai trebul lenghe caște train ando Them Promiso, cai avelas te avel lengo chăr. Vo ci promitisardea lenghe că va dela-len sea cadal buchia ando timpo so sas-le ando șuco than. So sichioas amen de cathar? Ando than te gândisaras amen ca le buchia cai ci daștin te aven amen acana, trebul te gândisaras amen ca le buchia cai promitisardea amenghe o Iehova că va dela-len amenghe andi lumea nevi. Sa cadea, daisaras te gândisaras amen ca le șucar versetea cai ajutin amen te bariaras amaro pachiamos ande amaro Dad cerisco.

7. Sostar daisaras te pachias ciaces că o vast le Iehovasco na-i niciechdata prea harno?

⁷ Tha sostar pușlea o Del le Moises: „Oare si o vast le Iehovasco prea harno?”. Daștil-pe că o Iehova camlea te ajutil le Moises te hachiarel na numai chichi de zuralo si Lesco vast, tha vi chichi de dur daștil te arăsăl. Chiar cana le israeliți sas-le ando șuco than, o Del daisardea te del-len but mas caște han. Hai o Iehova cărdea cadai buchi „pesche vastesa zuralo hai zinghiardo”. (Ps. 136:11, 12) Cadea că, cana nachas prin pharimata, te pachias ciaces că o zuralo vast le Iehovasco daștil te arăsăl ca fiesavo mașcar amende. (Ps. 138:6, 7)

8. So va ajutila amen te na cheras so cărde le israeliți ando șuco than? (Dich vi i imaginea.)

⁸ Pala țâra timpo, o Iehova pherdea peschi promisiunea hai bișialdea but prepelițe pașa o than cai sas-le le israeliți. Tha, von ci mulțumisarde le Devlesche anda cado miracolo. Hai, but anda lende sas-le lacomi, cărde buchi ghies hai riat caște chiden mai but prepelițe sar trebulas lenghe. O Iehova holiardea-pe but pe codola „cai sas-len pofte egoiste” hai pedepsisardea-len. (Num. 11:31-34) So daisaras te sichioas anda so cărde le israeliți? Trebul te las sama te na arăsas lacomi adică, te na camas mai but buchia sar trebun amenghe. Chiar cana sam ciore sau barvale, trebul te șioas po iechto than ande amari viața i buchi cai cheras-la caște chidas „barvalimata ando cerii”. Caște cheras cadaia trebul te bariaras mai dur iech amalimos chidino le Iehovasa hai le Isusosa. (Mat. 6:19, 20; Luca 16:9) Cadea, daisaras te pachias ciaces că o Iehova va dela amen sea le buchia cai trebun amenghe caște traisaras.

9. Sostar daisaras te pachias amen ciaces ando ajutorii le Iehovasco?

⁹ Vi aghies, o Iehova zinghiarel pesco vast caște ajutil pesche manușen. Cadaia ci însemnol că va avela amen sea o timpo love hai că ci va lispola amenghe niciechdata o haben.b Tha o Iehova ci va mechela amen. Prin orisave pharimata avelas te nachas, o Iehova va avela sea o timpo pașa amende. Caște hachiaras mai mișto cadai buchi, va avela te dichas dui situații ande save trebul te pachias ciaces că o Iehova va zinghiarela pesco vast hai va lela sama amendar: 1) cana si amen pharimata le lovența hai 2) cana gândisaras amen so va avela te cheras co phurimos.

CANA SI AMEN PHARIMATA LE LOVENȚA

10. Prin save pharimata le lovența daștil-pe că va avela te nachas?

¹⁰ Ando timpo so o sfârșito cadale sistemosco pașiol, daisaras te ajucăras amen te avel amen vi mai but pharimata le lovența. Vi le nehachiarimata politico, le marimata, le dezastrea naturalo hai le neve pandemii daștin te anen amenghe pharimata le lovența. Cana nachas prin cadala, daștilas te avel mai pharo te chinas le buchia cai trebun amen hai daștil-pe că va avela te hasaras amaro than buchiaco, le buchia cai si amen sau chiar amaro chăr. Daștil-pe că va trebula te arachas amenghe aver than buchiaco ando than cai beșas sau chiar te jias te beșas ande aver than amara familiasa caște daisaras te las sama latar. Dacă naches acana prin cadaia, so daștil te ajutil tut te sicaves chio pachiamos ando Iehova prin che alosarimata?

11. So daștil te ajutil tut te naches părdal le pharimata le lovența? (Luca 12:29-31)

¹¹ I mai importanto buchi cai daștis te cheres-la si te pâtres chio ilo angla o Iehova. O manglimos si iech baro ajutorii. (Prov. 16:3) Daștis te manghes le Iehovas te del tut goghiaverimos caște cheres lașe alosarimata hai te ajutil tut te așes liniștime bi ‘te îngrijoris tut’ prea but. (Citisar Luca 12:29-31.) Mang le Iehovas te ajutil tut te aves mulțumime le buchianța cai trebun tuche ciaces caște trais. (1 Tim. 6:7, 8) Rode ande amare publicații so daștis te cheres caște naches părdal le pharimata le lovența. But phrala arachle lașe sfaturi anda cadai buchi pe amaro site-o, jw.org.

12. So daștil te pușel-pe varecon cana alosarel cai te cherel buchi?

¹² Tha, so avelas te alosares dacă san achardo te cheres buchi ande aver than, dur chia familiatar? Butivar, codola cai găle te cheren buchi ande aver than, pala iech timpo, hachiarde că ci alosarde mișto. Cana cames te paruves chio than buchiaco, na gândisar tut numai că va avela tut mai but love, tha mai anglal, gândisar tut dacă codo than buchiaco va ajutila tut hai chia familia te așen pașă le Iehovastar. (Luca 14:28) Si mișto te pușes tut: „Dacă som dur mânra familiatar, sar va avela o phanglimos mașcar mande hai mânro rrom sau rromni? Va avela man timpo te jiav ca sea le întruniri, andi predicarea hai vi te beșav le phralența?”. Dacă si tut șiavorre, si zurales importanto te pușes tut: „Dacă som dur lendar, sar daștiv te bariarav-len «cadea sar camel o Iehova, pala lesco sicaimos»?”. (Ef. 6:4) Le tut pala so phenel o Iehova, na pala so phenel chi familia sau che amala cai ci train pala sar manghel o Del.c O Tony, cai trail ande iech them ando vesto la Asiaco, sas-lo achardo te cherel buchi pe bute lovende ande aver them. Pala so manglea-pe le Iehovasche hai dea duma pesca rromniasa, vo alosardea te na jial te cherel buchi ande aver them. Mai but, vo astardea te gândil-pe sar daștin te paruven penghi viața caște train mai țâra lovența. Cana gândil-pe le buchiande cai cărdea-len, o Tony phenel: „Sas man i bari pachiv te ajutiv chichiva manușen te prinjianen le Iehovas. Hai amare șiave iubin le Iehovas hai slujin lesche pherde bucuria. Savore andai familia sichileam că, cana las amen pala so phenel-pe ando Matei 6:33, o Iehova lel sama amendar”.

CANA GÂNDISARAS AMEN SO VA AVELA TE CHERAS CO PHURIMOS

13. So daisaras te cheras acana caște avel amen so trebul amenghe co phurimos?

¹³ Amaro pachiamos ando vast le Iehovasco daștil te avel zumado vi cana gândisaras amen sar va avela te traisaras co phurimos. I Biblia zuriarel amen te cheras phares buchi caște avel amen chichiva love anda o viitorii. (Prov. 6:6-11) Cadea că, si mișto te șioas love de iech rig anda le ghiesa cai va avena. Si ciaces că le love daștin te ajutin amen cana nachas prin phare ghiesa. (Ecl. 7:12) Tha, ci trebul te mechas ca le love te arăsăn i mai importanto buchi ande amari viața.

14. Sar daștil o verseto anda Evrei 13:5 te ajutil amen te na daras prea but anda le ghiesa cai va avena?

¹⁴ O Isus phendea iech paramici cai sicadea so baro dilimos avelas dacă chidas barvalimata bi te avas ‘barvale ande le Devlesche iacha’. (Luca 12:16-21) Chonic ci daștil te jianel so va avela tehara. (Prov. 23:4, 5; Iac. 4:13-15) Mai but, o Isus phendea codolenghe cai camen te len-pe pala leste că trebun te aven gata te mechen penghe barvalimata. (Luca 14:33) Ando iechto secolo, le creștini anda Iudeea sas-le gata te mechen penghe barvalimata. (Evr. 10:34) Vi ande amare ghiesa, but phrala hasarde barvalimata sau love anda codoia că ci camle te șion-pe andi politica. (Rev. 13:16, 17) So ajutisardea-len te cheren cadaia? O ciacio pachiamos andi promisiunea le Iehovaschi: „Niciechdata ci va avela te mechav tut hai niciechdata ci va avela te duriarav man tutar”. (Citisar Evrei 13:5.) Cadea că, chiar cana cheras sea so daisaras acana caște avel amen le buchia cai trebun amen co phurimos, dacă amari viața paruvel-pe bi te ajucăras amen, trebul te avel amen iech zuralo pachiamos că o Iehova va ajutila amen.

15. Sar trebun te gândin le dada hai le deia cana bariaren penghe șiaven? (Dich vi le imagini.)

¹⁵ Ande chichiva culturi, iech rrom hai iech rromni camen te avel-len șiavorre caște avel-len con te del-len love cana phurion. Tha, i Biblia phenel că o dad hai i dei trebun te len sama le șiavorrendar. (2 Cor. 12:14) Ciaces, cana phurion, o dad hai i dei daștil-pe că va trebuna ajutime, hai lenghe șiave sile bucurime te ajutin-len. (1 Tim. 5:4) Cu sea cadala, iech dad hai iech dei cai pachian-pe ando Iehova jianen că i mai bari bucuria na-i te bariaren penghe șiaven caște ajutin-len le lovența cana phurion tha, te ajutin penghe șiaven te cărdion slujitori le Iehovasche. (3 Ioan 4)

16. Sar daștin te ajutin le dada hai le deia penghe șiaven te len sama pendar corcore? (Efeseni 4:28)

¹⁶ Cana ajutis che șiaven te sichion sar te len sama pendar corcore, sicav lenghe prin chio exemplo că trebun te pachian-pe ando Iehova. Încă de cana sile țâne, sicav che șiaven te hachiaren chichi de importanto si te cheras phares buchi. (Prov. 29:21; citisar Efeseni 4:28.) Hai cana barion, ajutisar-len te cheren mișto penghi buchi cai sas lenghe dini ca i școala. Si importanto ca le dada hai le deia creștino te roden versetea andai Biblia cai daștin te ajutin penghe șiaven te alosaren mișto savi școala va avena te cheren. Cadea, le șiave va avena gata te len sama pendar corcore hai te cheren sea so daștin anda o Iehova.

17. So daisaras te pachias ciaces?

¹⁷ Le slujitori loialo le Iehovasche daștin te pachian ciaces că vo camel hai daștil te del-len so trebul lenghe. Sar pașiol o sfârșito cadala lumeaco, daisaras te ajucăras amen ca amaro pachiamos ando Iehova te avel zumado. Tha, oriso avelas, trebul te pachias mai dur că o Iehova va dela amen so trebul amenghe prin pesco zuralimos. Te pachias ciaces că o vast zuralo hai zinghiardo le Iehovasco na-i niciechdata prea harno caște arăsăl amende!