Si ande amaro miștimos te pașioas iech averestar!

1, 2. So si zurales importanto anda o Iehova hai so camel vo te cheras?

ANDA o Iehova si zurales importanto sar phiravas amen le manușența. O Isus sicadea amen că trebul te iubisaras amare pașarden cadea sar amen. (Mat. 22:37-39) Cadaia însemnol că trebul te iubisaras vi codolen cai ci slujin le Iehovasche. Cana sicavas cadai iubirea, las amen pala o Iehova Del, cai „cherel te înclel lesco cham vi pe codola nasul, hai vi pe codola lașe hai cherel te del o brâșând vi pe codola orta, hai vi pe codola neorta”. (Mat. 5:45)

² Chiar cana o Iehova iubil sea le manușen, vo iubil mai but codolen cai cheren so si mișto. (Ioan 14:21) Vo camel te las amen pala leste. O Iehova zuriarel amen te avel amen „iech iubirea zurales bari” caring amare phrala hai pheia hai te sicavas lenghe „afecțiunea tandro”. (1 Pet. 4:8; Rom. 12:10) Hachiaras mai mișto so însemnol te sicavas iubirea hai afecțiunea cana gândisaras amen ca le sentimentea cai si amen caring iech jeno drago anda amari familia sau iech lașio amal.

3. So trebul te anas amenghe amintea anda i iubirea?

³ I iubirea si sar iech lulughi, trebul te las sama latar caște bariol. O apostolo Pavel zuriardea le creștinen: „Sicaven mai dur iubirea phralicani!”. (Evr. 13:1) O Iehova camel te bariaras mai dur i iubirea cai si amen caring amare phrala. Ande cado articolo, va avela te dichas sostar trebul te pașioas amare phralendar hai sar daisaras te sicavas lenghe mai dur iubirea.

SOSTAR TREBUL TE PAȘIOAS IECH AVERESTAR

4. Cadea sar phenel-pe ando Psalmo 133:1, sar daisaras te dichas mai dur chichi de cuci si o phanglimos le phralengo? (Dich vi le imagini.)

⁴ Citisar Psalmo 133:1. Cadea sar o manuș cai scriisardea cado psalmo, vi amen pachias ciaces că si „mișto” hai „șucar” te avas amala codolența cai iubin le Iehovas. Tha, cadea sar iech manuș daștilas te na mai dichel iech șucar cașt cana nachel ande fiesavo ghies pașa leste, vi amen daisaras te arăsas te na mai dichas chichi de șucar si o phanglimos cai si mașcar amare phrala. Dichas amen butivar amare phralența hai pheianța, daștil-pe că chiar mai but ghiesa po curco. Sar daisaras te dichas mai dur chichi de cuci sile amare phrala? Trebul te gândisaras amen chichi de importanto si fiesavo mașcar lende anda i congregația hai anda amende.

5. So daștin te hachiaren chichiva cana dichen i iubirea cai si mașcar amende?

⁵ Chichiva anda codola cai aven i iechto data ca iech anda amare întruniri așen uimime cana dichen i iubirea cai si mașcar amende. Cadai buchi daștil te ajutil-len te hachiaren că arachle o ciacimos. O Isus phendea: „Prin cadaia va jianena savore că san mânre discipoli: cana si iubirea mașcar tumende”. (Ioan 13:35) Te dichas prin so nachlea i Chaithra, cai sichiolas le Martorența le Iehovasche cana sas-li cai facultatea. Voi avilea ca amaro baro congreso. Pala o iechto ghies, i tărni phendea la pheiache casa sichiolas: „Mânro dad hai mânri dei ci line man andi angali niciechdata, tha ca tumaro congreso primisardem 52 angali ande iech corcoro ghies. Simțosardem i iubirea le Iehovaschi prin cadai familia spiritualo hai camav te cherav partea anda late”. I Chaithra sichilea mai dur andai Biblia, parudea peschi viața hai cărdea o bolimos ando bărș 2024. Cana codola neve dichen le buchia lașe cai cheras-len, chiar vi i iubirea cai si mașcar amende, von va camena mai but te slujin le Iehovasche. (Mat. 5:16)

6. Sar daisaras te avas ferime dacă pașioas amare phralendar hai pheiandar?

⁶ Dacă pașioas amare phralendar hai pheiandar, daisaras te avas ferime. O Pavel phendea le creștinenghe: „Zuriaren tumen iech averes ande fiesavo ghies, . . . ca o athaimos le păcatosco te na cherel nicieches mașcar tumende te avel-les iech ilo barruno”. (Evr. 3:13) Poiechdata, daisaras te avas zurales perade hai te arăsas te na mai phiras po drom le ciacimasco. O Iehova daștilas te cherel ieche phrales sau iecha pheia te del amen o ajutorii cai trebul amen. (Ps. 73:2, 17, 23) Cana varecon zuriarel amen cadea, si ciaces ande amaro miștimos.

7. Sar ajutil amen i iubirea te încăras zuralo o phanglimos cai si mașcar amende? (Coloseni 3:13, 14)

⁷ Sam ande iech grupo manușengo cai savore den sea penghi zor te sicaven iubirea iech averesche. Cadaia anel amenghe but miștimata. (1 Ioan 4:11) Sar exemplo, i iubirea cherel amen ‘te suportisaras amen mai dur iech averes’, hai cadaia ajutil amen te încăras zuralo o phanglimos cai si mașcar amende. (Citisar Coloseni 3:13, 14; Ef. 4:2-6) Ca amare întruniri, savore simțon-pe zurales mișto, hai cadai șucar atmosfera ci arachel-pe ande nici iech aver grupo manușengo pa i phuv.

TE SICAVAS PACHIV IECH AVERESCHE

8. Sar ajutil amen o Iehova te avas phangle amare phralendar hai pheiandar?

⁸ O phanglimos cai si mașcar le phrala pa sea i phuv si iech miracolo. O Iehova cherel cadai bari buchi chiar cana sam imperfecți. (1 Cor. 12:25) I Biblia phenel că o Del „sicavel” amen te iubisaras amen iech averes. (1 Tes. 4:9) Aver varesar phendo, prin pesco Lil, o Iehova phenel amenghe claro so trebul te cheras caște pașioas amare phralendar. Daisaras te avas ‘sicade le Devlestar‘ cana sichioas atento andai Biblia hai cana cheras so sichileam. (Evr. 4:12; Iac. 1:25) Le Martori le Iehovasche den sea penghi zor te cheren cadai buchi.

9. Pala sar phenel-pe ando Romani 12:9-13, sar daisaras te sicavas pachiv iech averesche?

⁹ Sar sicavel amen o Lil le Devlesco te pașioas iech averestar? Te dichas so phendea o apostolo Pavel anda cadai buchi ando Romani 12:9-13. (Citisar.) Cadal versetea zuriaren amen: „Cana trebul te sicaven pachiv iech averesche, aven dintune”. So trebul te hachiaras de cathar? Amen trebul te rodas sar te sicavas iech „afecțiunea tandro” averenghe ande mai but feluri, sar avelas te iertisaras, te das buhle vastesa hai te avas ospitalieri. (Ef. 4:32) Ci trebul te ajucăres ieche phralestar sau iecha pheiatar te pașiol tutar. Daștis te aves tu o angluno cai cherel cadai buchi. Cadea, va avela te simțos vi tu so phendea o Isus: „Si mai but fericirea te des sar te primis”. (Fap. 20:35)

10. Sar daisaras te avas „vreanici” cana sicavas pachiv iech averesche? (Dich vi i imaginea.)

¹⁰ Si interesanto că, chiar pala so o Pavel zuriardea amen te avas le anglune cai sicavas pachiv iech averesche, vo dea amenghe o sfato te avas „vreanici, na chandine”. Iech manuș cai si vreanico cherel phares buchi iagasa ando ilo. Hai cana si lesche dini te cherel iech buchi, va cherela-la mișto, ji cana si gata. Ande Proverbe 3:27, 28 sam zuriarde: „Cana așel ande chio zuralimos te ajutisares-len, na încăr tut parpale te cheres mișto codolenghe cai silen nevoia”. Cadea că, cana dichas că varecas siles nevoia ajutorostar, trebul te cheras sea so daisaras caște ajutisaras-les. Ci va avela te încăras amen parpale te das-les iech vast ajutorostar hai ci va avela te gândisaras amen că aver varecon va cherela cadaia. (1 Ioan 3:17, 18)

11. So daștil te ajutil amen te pașioas iech averestar?

¹¹ Daisaras te sicavas pachiv averenghe vi cana iertisaras sigo. Ando Efeseni 4:26 phenel-pe: „Na mechen ca tumaro ilo te avel încă pherdo holi cana jial tele o cham”. Sostar? Anda codoia că, pala sar phenel-pe ando verseto 27, daisaras ‘te cheras than le Benghesche’ dacă na iertisaras. Ande pesco Lil, o Iehova zuriarel amen butivar te iertisaras. Ando Coloseni 3:13 phenel-pe: „Mai dur . . . iertin tumen anda sea o ilo iech averes”. Țâra buchia cheren amen te pașioas mai but amare phralendar sar i iertarea. Cana iertisaras amen iech averes, încăras „i unitatea le spiritoschi ando phanglimos la paceaco”. (Ef. 4:3) Te phenas harnes, cana iertisaras amen iech averes, încăras zuralo o phanglimos cai si mașcar amende hai așas andi pacea.

12. Sar ajutil amen o Iehova te iertisaras anda o ilo?

¹² Si ciaces că na-i sea o timpo ușoro te iertisaras codolen cai duchade amen. Tha o spirito le Devlesco daștil te ajutil amen te cheras cadaia. Pala so i Biblia zuriarel amen ‘te avas pherde afecțiunea tandro iech caring aver’ hai ‘te avas vreanici’, phenel amenghe vi ‘te avas pherde spirito’. Iech manuș cai si ‘pherdo spirito’ cherel orisavi buchi iagasa ando ilo hai pherdo entuziasmo anda codoia că o spirito sfânto cherel buchi ande leste. (Romani 12:11) Cadea că o spirito sfânto daștil te ajutil amen te sicavas afecțiunea tandro hai te iertisaras le coaveren anda sea o ilo. Anda codoia mangas zurales but le Iehovas te ajutil amen. (Luca 11:13)

„TE NA MECHEN CHANCI TE ȘINEL O PHANGLIMOS DE MAȘCAR TUMENDE”

13. So daștil te șinel o phanglimos de mașcar amende?

¹³ Andi congregația si „manușa de orisavo felo”, cai barile diferime. (1 Tim. 2:3, 4) Cadea că fiesavo de mașcar amende daștil te alosarel vareso diferime ande sar hureavel-pe, sar te lașiarel pesche bal, sar te lel sama pe pesco sastimos sau so te cherel pesche timposa libero. Dacă ci las sama, cadal diferențea daștin te șinen o phanglimos de mașcar amende. (Rom. 14:4; 1 Cor. 1:10) Anda codoia că o Del ‘sicavel amen te iubisaras amen iech averes’, trebul te las sama te na arăsas te phenas sau te pachias că amare alosarimata sile mai lașe sar averenghe. (Filip. 2:3)

14. So trebul te das amari zor te cheras sea o timpo hai sostar?

¹⁴ Daisaras te încăras zuralo o phanglimos cai si mașcar amende vi cana das amari zor de vazdas hai te zuriaras le coaveren sea o timpo. (1 Tes. 5:11) Ande palutni vremea, andi congregația avile parpale mai but manușa cai ci mai găle ca le întruniri sau andi predicarea sau aver cai sas-le duriarde andai congregația. Camas te primisaras-len parpale anda sea o ilo! (2 Cor. 2:8) Iech phei cai avilea cai sala le Regatoschi hai cai ci mai sas-li andi predicarea hai ca iech întrunirea de 10 bărșa phendea: „Savore sas-le bucurime cana dichle man hai dine o vast manța”. (Fap. 3:19) Sar simțosardea-pe cadai phei cana le phrala phirade-pe lasa pherde lașimos? Voi phenel: „Simțosardem sar o vast le Iehovasco îngărel man caring o drom la fericireaco”. Cana das amari zor te zuriaras savoren, o Cristos daștil te folosil amen caște vazdel codolen cai ‘cheren phari buchi hai pharimata phiraven’. (Mat. 11:28, 29)

15. So aver buchi daisaras te cheras caște încăras zuralo o phanglimos cai si mașcar amende? (Dich vi i imaginea.)

¹⁵ Daisaras te încăras zuralo o phanglimos cai si mașcar amende vi prin sar das duma. Ando Iov 12:11 phenel-pe: „Na zumavel o can le cuvintea cadea sar zumavel i șib o haben?”. Iech lașio bucătaro zumavel o haben caște jianel dacă si lașio angla te del-les le coaverenghe. Sa cadea, vi amen gândisaras amen mișto so va avela te phenas angla so te das duma. (Ps. 141:3) So daisaras te șioas amenghe andi goghi te cheras? Camas te avas sea o timpo siguri că amare dumes vazden, zuriaren hai „cheren mișto codolenghe cai așunen-len”. (Ef. 4:29)

16. Con trebul te lel sama mai but te zuriarel prin so phenel?

¹⁶ Si importanto ca le dada hai le rroma te len sama mai but te zuriaren prin so phenen. (Col. 3:19, 21; Tit 2:4) Vi le phure andai congregația trebun te zuriaren hai te vazden le phralen, anda codoia că len sama le cuci bacreandar le Iehovasche. (Is. 32:1, 2; Gal. 6:1) Iech goghiaver duma andai Biblia anel amenghe amintea: „So lași si iech duma phendi atunci cana trebul!”. (Prov. 15:23)

TE IUBISARAS PRIN „FAPTA HAI CIACIMOS”

17. So daisaras te cheras caște iubisaras amare phralen anda ilo?

¹⁷ O apostolo Ioan zuriarel amen te na iubisaras amen „numai prin vorba sau prin mui, tha vi prin fapta hai ciacimos”. (1 Ioan 3:18) Camas te iubisaras amare phralen hai pheian anda sea o ilo. Sar daisaras te cheras cadai buchi? Chichi timpo beșas mai but amare phralența hai pheianța, cadichi va avela te avas mai pașă lendar, hai i iubirea de mașcar amende va avela mai zurali. Cadea că, trebul te cheras amenghe timpo te beșas amare phralența ca le întruniri hai andi predicarea. Te cheras amenghe timpo te jias iech avereste. Cana cheras cadai buchi, sicavas că mechas amen îngărde le Devlestar, cai ‘sicavel amen te iubisaras amen iech averes’. (1 Tes. 4:9) Cadea, savore va avela te simțosaras mai dur „so mișto hai so șucar si ca le phrala te beșen ande iech than chidine”. (Ps. 133:1)