Si ande amaro miștimos te pașioas le Devlestar!

1, 2. a) So trebul te cheras caște avel amen iech amalimos chidino varecasa? b) So va avela te dichas ande cado articolo?

GÂNDISAR TUT ca iech anda che mai pașarde amala. So cărdean caște avel tut iech amalimos chidino lesa? Daștil-pe că beșlean mai but timpo lesa, prinjiandean prin so pharimata nachel hai hachiardean so ciaiol-les hai so ci ciaiol-les. Dichlean lesche șucar calități hai camlean vi tu te les tut pala leste. Cadea, arăslean te iubis che amales.

² Caște avel amen iech amalimos chidino varecasa, trebul te das anda amaro timpo hai anda amaro zuralimos. Sa cadea trebul te cheras vi cana camas te avel amen iech amalimos chidino le Iehovasa. Ande cado articolo, va avela te dichas sar daisaras te pașioas le Devlestar hai so miștimata si amen cana cheras cadaia. Mai anglal, te dichas sostar si mișto te pașioas amare mai lașe Amalestar, o Iehova.

3. Sostar trebul te gândisaras amen ca le miștimata cai si amen cana pașioas le Iehovastar? Cheren iech ilustrarea.

³ Jianas că vi tu pachias ciaces că si mișto te pașioas le Iehovastar. Tha, cana gândisaras amen ca le miștimata cai anel-len amenghe o amalimos le Iehovasa, camas vi mai dur te pașioas lestar. (Ps. 63:6-8) Sar exemplo, jianas că, caște avas sasteveste, trebul te las sama ca so has, trebul te cheras sporto, te sovas mișto hai te pias chichi pai trebul. Cu sea cadala, but manușa ci gândin-pe chichi de importanto si te cheren cadal buchia hai ci len sama penghe sastimastar. Tha, cana gândisaras amen ca le miștimata cai anen-len amenghe cadal buchia, camas vi mai dur te cheras-len. Sa cadea, daștil-pe că jianas că si mișto te pașioas le Iehovastar. Tha, caște pașioas vi mai dur lestar, trebul te gândisaras amen ca le miștimata cai anel-len amenghe o amalimos lesa. (Ps. 119:27-30)

4. Cadea sar sicavel-pe ando Psalmo 73:28, so simțosardea o manuș cai scriisardea cado psalmo?

⁴ Citisar Psalmo 73:28. Codo cai scriisardea o Psalmo 73 sas iech levito cai sas alosardo te slujil sar ghilabaitorii co templo le Iehovasco. Daștil-pe că vo slujisardea fidelo le Iehovasche de but bărșa. Cu sea cadala, vo simțosardea că trebul te anel pesche amintea hai vi averenghe că si ande lengo miștimos te pașion le Devlestar. Tha save si chichiva anda le miștimata cai anel-len amenghe o amalimos le Devlesa?

CANA PAȘIOAS LE DEVLESTAR SAM FERICIME

5. a) Sostar sam fericime cana pașioas mai but le Iehovastar? b) Phenen chichiva exemplea anda Proverbe 2:6-16 cai sicaven că o goghiaverimos le Iehovasco ajutil amen hai feril amen.

⁵ Chichi mai but pașioas le Iehovastar, cadichi mai but sam fericime. (Ps. 65:4) Sostar? Iech anda le motivea si că, atunci cana las amen pala le sfaturi anda lesco Lil, i Biblia, cărdioas goghiaver. Cado goghiaverimos feril amen catar le buchia nasul cai rimosaren amen hai ajutil amen te na cheras bare greșeli. (Citisar Proverbe 2:6-16.) Anda codoia, i Biblia phenel: „Fericime si o manuș cai arachel o goghiaverimos hai o manuș cai chidel discernământo”. (Prov. 3:13)

6. Sostar hasardea o psalmisto peschi bucuria?

⁶ Cu sea cadala, chiar vi le amala le Iehovasche sile perade poiechdata. Codo cai scriisardea o Psalmo 73 hasardea peschi bucuria cana astardea te gândil-pe numai le buchiande nasul. Vo astardea te holiarel-pe hai anda codoia că pachialas că lenghi viața si mai ușoro, camelas te avel sar codola manușa nasul cai ci len-pe pala o Del hai ci încăren lesche norme. Vo astardea te pachial că le manușa nasul hai baricane silen sea so camel lengo ilo, sile sasteveste hai nai-len pharimata. (Ps. 73:3-7, 12) O psalmisto sas cadea de perado, că astardea te pușel-pe dacă cărdea mișto că așilea loialo le Iehovasche. Le ilesa phagărdo, vo phendea: „Si ciaces, de ivea încărdem ujo mânro ilo hai haladem mânre vasta ando bidoșalimos”. (Ps. 73:13)

7. So daisaras te cheras cana sam perade? (Dich vi i imaginea.)

⁷ Chiar cana o psalmisto sas-lo zurales perado, vo cărdea vareso caște paruvel cadaia. Vo gălea ando „baro sanctuaro le Devlesco”, hai code o Iehova lașiardea lesco modo gândimasco. (Ps. 73:17-19) Cana sam zurales perade, o Iehova, amaro mai lașio Amal, hachiarel mișto so si amen ando ilo. Cana mangas le Iehovas te ajutil amen hai primisaras o ajutorii cai del-les amenghe prin pesco Lil hai prin le phrala andai congregația va avela amen o zuralimos cai trebul amenghe caște na mechas amen, chiar cana sam perade. Chiar vi cana va avela te nachas prin pharimata hai ci va avela te jianas so te cheras, o Iehova va zuriarela amen hai va dela amen pacea ando ilo. (Ps. 94:19)a

CANA PAȘIOAS LE IEHOVASTAR, SI AMEN IECH VIAȚA MAI LAȘI ACANA HAI IECH SPERANȚA ANDA O VIITORII

8. Phenen dui buchia cai sicaven că si ande amaro miștimos te pașioas le Devlestar.

⁸ Cana pașioas le Devlestar, si amen încă dui bare miștimata. O iechto si că daștil te avel amen iech viața mai lași acana, hai o duito, si că del amen iech ciaci speranța anda o viitorii. (Ier. 29:11) Mai dur, va avela te dichas cadal dui buchia.

9. Sostar daisaras te phenas că si amen iech viața mai lași cana pașioas le Iehovastar?

⁹ Dacă pașioas le Iehovastar, si amen iech viața mai lași. But jene phenen că o Del ci existil. Von ci jianen sostar train le manușa, hai pachian că, ando viitorii, le manușa ci va mai avena. Cu sea cadala, cana amen sichileam anda o Lil le Devlesco, arăsleam te pachias ciaces „că vo existil hai că vo cărdiol o pochinitorii codolengo cai roden-les anda sea o ilo”. (Evr. 11:6) Chiar vi acana sam mai fericime, anda codoia că cana slujisaras amare Dadesche anda o cerii, o Iehova, traisaras pala sar samas cărde te traisaras. (Deut. 10:12, 13)

10. So promitil o Iehova ando Psalmo 37:29 codolenghe cai pachian-pe ande leste?

¹⁰ But manușa gândin-pe numai le buchiande cai daștin te cheren-len ande cadai viața. Von cheren buchi, căsătorin-pe, cheren penghe șiavorren hai șion love de iech rig caște aven-len cana va phuriona. Von ci jianen so promitil o Del anda o viitorii. Tha amen pachias amen cu sea ande leste. (Ps. 25:3-5; 1 Tim. 6:17) Pachias anda sea o ilo că o Del, savestar pașileam, va pherela sea le promisiuni cai phendea-len. Ando șucar viitorii cai ajucărel amen, va avela amen i posibilitatea te slujisaras le Iehovasche anda sea o timpo ando Paradiso. (Citisar Psalmo 37:29.)

11. So aver miștimata si amen cana pașios le Devlestar hai so si ando ilo le Iehovasco cana pașioas lestar?

¹¹ Cana pașioas le Devlestar, si amen vi mai but miștimata. Sar exemplo, o Iehova promitil amenghe că iertil amen cana risaras amen catar amaro phiraimos nasul. (Is. 1:18) Cadea că ci trebul te simțosaras amen doșale sea amari viața anda le păcatea cai cărdeam-len mai anglal. (Ps. 32:1-5) Mai but, amaro ilo bariol cana bucurisaras le Iehovas. (Prov. 23:15) Si ciaces că gândis tut vi ca aver miștimata cai anel-len tuche o amalimos chidino le Devlesa. Tha so daisaras te cheras caște pașioas mai dur le Devlestar?

SAR DAISARAS TE PAȘIOAS MAI DUR LE DEVLESTAR?

12. So cărdean caște pașios le Devlestar?

¹² Dacă san iech Martoro boldo, deja pașilean le Iehovastar. Sichilean but buchia anda leste hai anda o Isus Cristos, risardean tut catar chio phiraimos nasul, sicadean iech pachiamos zuralo ando Del hai dean chi zor te trais pala sar camel vo. Tha, caște pașios vi mai but le Devlestar, trebul te cheres mai dur cadal buchia. (Col. 2:6)

13. Phenen trin buchia cai ajutin amen te pașioas mai dur le Iehovastar.

¹³ So daștil te ajutil amen te pașioas mai dur le Iehovastar? 1) Trebul te citisaras hai te sichioas mai dur anda i Biblia. Tha, cana citisaras i Biblia, trebul te cheras mai but sar te sichioas le buchia cai deja jianas-len anda o Del. Mai but, trebul te das amari zor te hachiaras so camel o Iehova te cheras hai te traisaras amari viața pala le principii cai arachas-len ande lesco Lil. (Ef. 5:15-17) 2) Trebul te zuriaras amaro pachiamos hai te gândisaras amen le buchiande prin save o Iehova sicavel amenghe că iubil amen. 3) Trebul te urâsaras le buchia cai ci ciaion le Iehovas hai te na avas amala codolența cai cheren cadal buchia. (Ps. 1:1; 101:3)

14. Cadea sar phenel-pe ando 1 Corinteni 10:31, save si chichiva buchia cai daisaras te cheras-len ande fiesavo ghies caște avas dichle lașe iachența le Iehovastar? (Dich vi le imagini.)

¹⁴ Citisar 1 Corinteni 10:31. Ci arăsăl te na cheras le buchia cai ci ciaion le Iehovas. Si zurales importanto vi te cheras le buchia cai ciaion-les. Cadaia însemnol te cheras mai but sar te jias andi predicarea hai ca le întruniri. Trebul te cheras le buchia cai ciaion le Devles ande fiesavo ghies. Sar exemplo, cana sam pachivale ande sea le buchia hai cana das vi averen anda so si amen, bucurisaras o ilo le Iehovasco. (2 Cor. 8:21; 9:7) Sa cadea, o Iehova camel te sicavas că anda amende si zurales cuci i viața. Va avela te pașioas Codolestar cai dea amen i viața cana las sama chichi de but has hai pias hai vi cana cheras aver buchia cai ajutin amen te avas sasteveste. Fiesavi buchi cai cheras-la caște avas dichle lașe iachența le Iehovastar, chiar cana si iech țâni buchi, cherel amare Dades te iubil amen vi mai but. (Luca 16:10)

15. Sar camel o Iehova te phiravas amen le coaverența?

¹⁵ O Iehova sicavel lașimos codolenghe orta, tha vi codolenghe cai ci sile orta. (Mat. 5:45) Vo ajucărel ca vi amen te phiravas amen le coaverența sa cadea. Sar exemplo, le manușa le Iehovasche trebul „te na den duma nasul chanicastar, te na han-pe, tha, . . . te sicaven sea o timpo blândețea caring sea le manușa”. (Tit 3:2) Cana încăras cadai buchi andi goghi, ci va avela te gândisaras că sam mai lașe codolendar cai ci pachian ando Iehova. (2 Tim. 2:23-25) Cana sea o timpo phiravas amen lașimasa le coaverența, pașioas le Iehovastar.

TE PAȘIOAS LE DEVLESTAR CHIAR VI ATUNCI CANA CHERAS GREȘELI

16. So simțosardea codo cai scriisardea o Psalmo 73 pala so slujisardea le Iehovasche iech timpo?

¹⁶ Daștil-pe că slujis le Iehovasche de mai but timpo. Tha, anda codoia că mai anglal cărdean chichiva greșeli, daștil-pe că simțos că ci mai meritis i iubirea le Iehovaschi. Cadea sar dichleam, vi codo cai scriisardea o Psalmo 73 simțosardea-pe sa cadea. Vo phendea: „Somas pașă ca mânro pânro te na mai phirel po ciacio drom, ci mai sas man but caște perav”. (Ps. 73:2) Vo phendea că pherdilea-pe ‘chărchimasa’ hai că arăslea te ‘hasarel pesco goghiaverimos’, „sar iech animalo bi goghiaco” angla o Iehova. (Ps. 73:21, 22) Tha simțosardea vo că o Iehova ci va mai iubila-les hai ci va mai iertila-les anda codoia că cărdea greșeli?

17. a) So cărdea o psalmisto cana sas-lo perado? b) So daisaras te sichioas anda leschi experiența? (Dich vi le imagini.)

¹⁷ Dacă o psalmisto simțosardea că o Iehova ci mai camel te avel pașa leste, cado sentimento ci încărdea prea but. Cana sas-lo perado, vo hachiardea că trebulas te pașiol le Devlestar. Hachiaras cadaia anda so phendea vo: „Tha acana som sea o timpo tusa; lean man mânre ciace vastestar. Tu phenes manghe so te cherav hai pala codoia des man pachiv”. (Ps. 73:23, 24) Vi amen trebul te jias caring o Iehova, ‘i stânca amare ileschi’, cana simțosaras amen covle sau perade. (Ps. 73:26; 94:18) Chiar vi atunci cana cheras greșeli, camas te avas parpale co Iehova hai te pachias ciaces că vo silo ‘gata te iertil amen’. (Ps. 86:5) Cana nachas prin le mai cale ghiesa anda amari viața, si zurales importanto te pașioas amare Devlestar. (Ps. 103:13, 14)

TE PAȘIOAS LE DEVLESTAR – IECH DROM CAI ÎNCĂREL SEA O TIMPO

18. Sostar daisaras te pașioas le Iehovastar anda sea o timpo?

¹⁸ Daisaras te pașioas le Iehovastar anda sea o timpo, ci va avela te așiavas amen niciechdata te sichioas mai but buchia anda leste. Pala sar sicavel i Biblia, lesche droma, lesco goghiaverimos hai lesco prinjianimos sile zurales ‘bare’. (Rom. 11:33)

19. So phenel o Psalmo 73 anda o viitorii?

¹⁹ O Psalmo 79:13 phenel: „Amen, che manușa hai le bacrea chia phuveache, va avela te anas tuche mulțumiri anda sea o timpo hai va avela te așaras tut generația andai generația!”. Ando timpo so pașios mai dur le Devlestar, daștis te pachias ciaces că vo va dela tut miștimata cai încăren veșnico. Cadea sar o psalmisto, vi tu daștis te phenes: „O Del si i stânca mânre ileschi hai mânri rig anda sea o timpo”. (Ps. 73:26)