Ci sam niciechdata corcore

1, 2. a) Sostar daisaras te phenas că ci sam niciechdata corcore cana nachas prin pharimata? b) So va avela te dichas ande cado articolo?

CANA nachas prin bare pharimata, daisaras te simțosaras amen sar cana hasardileam corcore ande iech baro veș hai ci jianas sar te jias avri anda leste. Tha, ci sam corcore. Amaro Dad andal ceruri, cai si pherdo iubirea, jianel că nachas prin pharimata. Mai but, vo promitil amenghe că va avela pașa amende caște nachas părdal cadal pharimata. O Iehova phenel ciaces sea pesche slujitorenghe loiali: „Me va avela . . . te vazdav tut”. (Is. 41:10)

² Ande cado articolo va avela te dichas ștar buchia cai cherel-len o Iehova caște lel sama amendar: 1) sicavel amenghe so te cheras, 2) del amen le buchia cai trebun amen caște traisaras, 3) feril amen hai 4) mângâil amen. Prin orisave pharimata avelas te nachas, o Iehova promitil amenghe că ci va bâstrela amen niciechdata. Vo ci va mechela amen niciechdata. Cadea că, ci va avela te avas corcore niciechdata!

O IEHOVA SICAVEL AMENGHE SO TE CHERAS

3, 4. Sar sicavel amenghe o Iehova so te cheras? (Psalmo 48:14)

³ Citisar Psalmo 48:14. O Iehova jianel că ci daisaras te phiras corcore po drom la viațaco hai că si amen nevoia lesche ajutorostar. Tha, sar sicavel vo aghies pesche slujitorenghe loialo so te cheren? Vo cherel cadaia prin i Biblia. (Ps. 119:105) Prin pesco Lil, cai sas scriime lesche zuralimasa, o Iehova ajutil amen te cheras lașe alosarimata hai te bariaras calități cai cheren amen te avas mai fericime acana hai pâtren amenghe o drom caring i viața veșnico.a Sar exemplo, vo sicavel amen te iertisaras le coaveren hai te na încăras holi ande amaro ilo, te avas pachivale ande sea le buchia cai cheras-len hai te iubisaras le coaveren anda ilo. (Ps. 37:8; Evr. 13:18; 1 Pet. 1:22) Cana sicavas cadal calități devlicane, cărdioas mai lașe dada, rroma hai amala.

⁴ Tha, mai but, andi Biblia o Iehova phenel amenghe vi le experiențea chichiva manușenghe cai slujisarde lesche. Chichiva anda lende nachle prin pharimata sar amare hai sas-len sa codol sentimentea sar amen. (1 Cor. 10:13; Iac. 5:17) Cana jianas mai but anda lenghi viața hai cheras so sichioas anda lenghi experiența, jianas ciaces că si amen miștimata. Iech anda lende si că hachiaras că ci sam corcore anda codoia că dichas că vi aver manușa sas-len pharimata sar amen hai o Iehova ajutisardea-len te nachen părdal lende. (1 Pet. 5:9) Hai o coaver miștimos si că sichioas sar te așias zurale angla le pharimata. (Rom. 15:4)

5. Cas folosil o Iehova caște sicavel amenghe sar te phiras po drom la viațaco?

⁵ O Iehova folosil vi amare phralen hai pheian caște sicavel amenghe sar te phiras po drom la viațaco.b Sar exemplo, le phrala cai vizitin le congregații zuriaren amen de fiesavi data cana aven ande amari congregația. Lenghe cuvântări zuriaren amaro pachiamos hai ajutin amen te avas mai dur phangle iech averesa. (Fap. 15:40–16:5) Vi le phure andai congregația cheren phares buchi caște ajutin fiesaves de mașcar amende te așias pașă le Iehovastar. (1 Pet. 5:2, 3) Le dada hai le deia ajutin phenge șiavorren te avel-len iech gândimos spiritualo hai lașe obiceiuri. (Prov. 22:6) Hai vi le pheia cai sile zurale ando pachiamos ajutin codolen mai tărne prin pengo exemplo, tha vi prin lenghe lașe sfaturi hai gule dumes cai zuriaren. (Tit 2:3-5)

6. So trebul te cheras caște țârdas miștimata anda so sicavel amenghe o Iehova te cheras?

⁶ O Iehova cărdea peschi partea cana sicadea amenghe so trebul te cheras. Tha, sar daisaras te sicavas că si cuci so cărdea vo anda amende? Andel Proverbe 3:5, 6 phenel-pe: „Pachia tut ando Iehova anda sea o ilo hai na le tut pala chi goghi”. Cana cheras cadaia, vo va „lașiarela amare droma”, adică va ajutila amen te așias dur le problemendar hai te avel amen iech viața mai fericime. Sam recunoscători le Iehovasche că prinjianel amen mișto hai iubil amen cadea de but, că del amen le sfaturi cai trebun amenghe. (Ps. 32:8)

O IEHOVA DEL AMEN LE BUCHIA CAI TREBUN AMENGHE CAȘTE TRAISARAS

7. Save si chichiva buchia cai cherel-len o Iehova caște lel sama amendar? (Filipeni 4:19)

⁷ Citisar Filipeni 4:19. O Iehova na numai că phenel amenghe so te cheras caște na hasaras amaro amalimos lesa, tha vi binecuvântil i phari buchi cai cheras-la caște avel amen haben, hureaimos hai iech than cai te sovas. (Mat. 6:33; 2 Tes. 3:12) Si normalo te gândisaras amen le buchiande cai trebun amen caște traisaras, tha o Iehova zuriarel amen te na gândisaras amen prea but cadale buchiande. (Dich i nota de studiu anda o Matei 6:25.) Sostar? Anda codoia că amaro Dad ci va mechela niciechdata pesche slujitoren fideli cana nachen prin pharimata. (Mat. 6:8; Evr. 13:5) Daisaras te pachias ciaces că vo va încărela peschi duma hai va dela amen le buchia cai trebun amenghe caște traisaras.

8. So cărdea o Iehova anda o David?

⁸ Te gândisaras amen sar ajutisardea o Iehova le Davidos. But bărșa, o David trebulas te nașel le regestar Saul. Ande sea cadal cale ghiesa, o Iehova lea sama le Davidostar hai pesche manușendar hai dea-len le buchia cai trebunas lenghe caște train. Pala so o David gândisardea-pe le buchiande cai cărdea-len o Iehova ande cadal bărșa caște lel sama lestar, vo scriisardea: „Somas tărno hai phurilem, tha ci dichlem niciechdata ca o Del te mechel codoles orta, nici lesche șiaven te manghen pengo manro averendar”. (Ps. 37:25) Daștil-pe că vi tu dichlean ande chi viața sar o Iehova del pesche manușenghe, cai cheren buchi anda leste sea le ilesa, le buchia cai trebun lenghe caște train.

9. Sar lel sama o Iehova pesche slujitorendar cana avel iech dezastro naturalo? (Dich vi le imagini.)

⁹ O Iehova lel sama pesche manușendar vi andel cale ghiesa. Sar exemplo, ando iechto secolo, cana astardea iech baro bochalimos, le creștini anda mai but thana bișalde haben le phralenghe cai ci sas-len. (Fap. 11:27-30; Rom. 15:25, 26) Vi le slujitori le Iehovasche anda amare ghiesa den buhle vastesa. Cana avel iech dezastro naturalo, o Iehova zuriarel pesche slujitoren te den haben, pai, hureaimos hai medicamentea codolenghe cai nai-len. Le phrala hai le pheia anda le echipe andal construcții lașiaren le chăra hai le săli le Regatosche cai sile rimosarde. Sa cadea, le slujitori le Iehovasche zuriaren o ilo hai o pachiamos codolengo cai hasarde phenghe chăra sau varecas drago lenghe.c

10, 11. So sichios anda i experiența le Borisoschi?

¹⁰ O Iehova lel sama pherdo lașimos vi codolendar cai încă ci slujin lesche. Cadea că, vi amen rodas te sicavas lașimos codolenghe cai ci slujin le Iehovasche. (Gal. 6:10) Cana cheras cadai buchi, daisaras te ajutisaras-len te sichion mai but anda amende hai anda o Iehova. Te dichas i experiența le Borisoschi, iech directoro catar iech școala andai Ucraina. Chiar cana o Boris ci silo iech Martoro le Iehovasco, vo phiradea-pe șucar sea o timpo pesche elevența cai sas-le Martori hai sicadea pachiv caring lengo pachiamos. Cana o Boris camlea te jial ande aver than caște nașel catar o războio, le phrala ajutisarde-les. Pala codoia, o Boris gălea ca i Comemorarea le merimaschi le Isusoschi. Vo phenel: „Le Martori sas-le lașe manța hai ajutisarde man zurales but. Mulțumiv lenghe anda sea o ilo”.

¹¹ Vi amen daisaras te las amen pala amaro Dad cai sicavel mila cana ajutisaras le coaveren pherde iubirea, chiar dacă slujin sau nici le Iehovasche. (Luca 6:31, 36) Ajucăras ca i phari buchi cai cheras-la caște sicavas iubirea caring le coaver te ajutil-len te cărdion discipoli le Cristososche. (1 Pet. 2:12) Tha, oriso avelas te cheren, jianas mișto că amen va avela te avas bucurime anda codoia că si mai but fericirea te das. (Fap. 20:35)

O IEHOVA FERIL AMEN

12. Sar promitil o Iehova că feril pesche manușen sar grupo? (Psalmo 91:1, 2, 14)

¹² Citisar Psalmo 91:1, 2, 14. Aghies, o Iehova promitil că va ferila pesche manușen orisave buchiandar cai daștin te rimosaren lengo amalimos lesa. Vo ci va mechela niciechdata le Satanos te meliarel i închinarea uji. (Ioan 17:15) Hai pala so va astarela ‘o baro necazo’, daisaras te pachias ciaces că o Iehova va pherela peschi promisiunea te încărel zuralo o pachiamos pesche manușengo hai te salvil-len. (Rev. 7:9, 14)

13. Sar feril o Iehova fiesaves de mașcar amende?

¹³ Sar feril o Iehova fiesaves de mașcar amende? Prin i Biblia, vo ajutil amen te hachiaras so si nasul hai so si mișto. (Evr. 5:14) Cana traisaras pala le sfaturi anda o Lil le Devlesco, ferisaras amaro amalimos lesa hai cheras lașe alosarimata cai ajutin amen te avas fericime hai te avel amen iech traio sastevesto. (Ps. 91:4) Sa cadea, o Iehova feril amen vi prin i congregația. (Is. 32:1, 2) Cana beșas codolența cai iubin le Iehovas hai train pala sar camel vo, sam zuriarde te duriaras amen le buchiandar nasul. (Prov. 13:20)

14. a) Sostar ci feril amen o Del catar sea le pharimata? b) Cadea sar phenel-pe ando Psalmo 9:10, so daisaras te pachias ciaces? (Dich vi i nota de telal.)

¹⁴ Andel purane ghiesa, poiechdata, o Iehova ferisardea pesche manușen caște na aven duchade sau mudarde. Tha vo ci cărdea cadai buchi de fiesavi data cana varecon nachelas prin pharimata. I Biblia sicavel că savore daisaras te avas duchade anda codoia că nachas prin „buchia cai ci ajucăras-len”. (Ecl. 9:11) Sa cadea, de cana si i lumea, o Iehova mechlea te aven persecutime sau chiar mudarde chichiva anda lesche manușa caște sicavel că o Satan si iech hohamno. (Iov 2:4-6; Mat. 23:34) Sa cadea așen le buchia vi ande amare ghiesa. Chiar cana o Iehova ci va chosela sea amare pharimata, daisaras te pachias ciaces că vo ci va mechela niciechdata corcore codolen cai iubin-les.d (Ps. 9:10)

O IEHOVA MÂNGÂIL AMEN

15. Sar primisaras mângâierea prin o manglimos, i Biblia hai amare phrala? (2 Corinteni 1:3, 4)

¹⁵ Citisar 2 Corinteni 1:3, 4. Poiechdata, daisaras te nachas prin pharimata cai duchaven amen, peraven amen sau cheren amen te avas darade. Daștil-pe că naches prin pharimata chiar acana. Ande cadal situații daisaras te simțosaras amen corcore hai te astaras te pușas amen dacă si varecon cai hachiarel ciacimasa prin so nachas. Te pachias ciaces că o Iehova hachiarel amen. Cana sam duchade, vi lesco ilo si duchado hai vo „mângâil amen ande sea amare necazuri”. Sar? Cana mangas-les anda sea o ilo te ajutil amen, vo del amen „i pacea le Devleschi, cai si mai bari sar orisavo hachiarimos”. (Filip. 4:6, 7) Sa cadea, simțosaras sar o Iehova mângâil amen vi cana citisaras le dumes andai Biblia cai o Iehova phendea-len anda amende. Von sile mai cuci sar o sumnacai. Prin cadal dumes, o Iehova phenel amenghe chichi de but iubil amen, sicavel amen sar te avas goghiaver hai del amen speranța. Tha primisaras mângâierea vi ca amare întruniri, cana sichioas buchia cai zuriaren amen andai Biblia hai cana beșas amare phralența hai pheianța cai iubin amen.

16. So sichios andai experiența prin savi nachle o Nathan hai i Priscila?

¹⁶ Caște hachiaras mai mișto sar mângâil amen hai zuriarel amen o Iehova prin pesco Lil, te dichas i experiența prin savi nachle o Nathan hai i Priscila, cai train ande Statele Unite. Chichiva bărșa mai anglal, von alosarde te jian ande iech than cai sas nevoia mai bute phralendar. O Nathan phenel: „Pachiaiem ciaces că o Iehova va binecuvântila amari phari buchi”. Tha, pala so arăsle ande lenghi nevi repartiția, bi te ajucăren-pe, astarde te avel-len pharimata le sastimasa hai le lovența. Ji la urmă, von trebunas te jian parpale chăre, cai sas-len mai dur pharimata le lovența. O Nathan anel pesche amintea: „Pușlem man sostar o Del ci binecuvântisardea amen cadea sar ajucărdeam amen. Chiar astardem te pușiav man dacă cărdem vareso nasul”. Tha, le timposa, o Nathan hai i Priscila hachiarde că o Del ci mechlea-len corcore andel phare ghiesa. O Nathan mai phendea: „Ande codol cale ghiesa, i Biblia sas sar iech amal goghiaver cai zuriardea amen hai sicadea amenghe so trebul te cheras. Hachiardem chichi de importanto si te na gândisaras amen numai co pharimos, tha ca sar o Iehova ajutil amen te nachas părdal codo pharimos. Cadai buchi ajutisardea amen te avas gata te nachas pherde pachiamos prin le pharimata cai va avena”.

17. Sar primisardea mângâiere iech phei cai bușiol Helga? (Dich vi le imagini.)

¹⁷ Vi amare phrala hai pheia daștin te den amen mângâierea. Sar? Te dichas i experiența prin savi nachlea iech phei cai bușiol Helga andai Ungaria. But bărșa, voi nachlea prin phare situații cai ciorde lachi pacea hai cărde-la te simțol-pe că na-i lași chancesche. Tha, cana gândil-pe le buchiande prin save nachlea, hachiarel că o Iehova ajutisardea-la prin i congregația. I Helga scriil: „O Iehova vazdea man de fiesavi data cana simțosardem că ci mai daștiv te jiav angle anda codoia că si man prea but buchi te cherav sau că trebul te lav sama mânre șiavestar cai si nasfalo hai vi aver pharimata. Ci nachlea nici măcar iech ghies andel palutne 30 bărșa ande savo te na dichav sar o Del încărel peschi promisiunea că va mângâila man. Butivar, vo zuriarel man prin le dumes averenghe - dumes pherde lașimos, cai zuriarde man hai cărde man te simțosarav man mișto. Butivar, primisardem iech mesajo, iech lilorro sau așarimata averendar, chiar atunci cana sas man i mai bari nevoia”.

18. Sar daisaras te anas mângâierea le coaverenghe?

¹⁸ Cana anas le coaverenghe mângâierea, si amen i bari pachiv te las amen pala amaro Del. Sar daisaras te cheras cadaia? Cana așunas-len pherde răbdarea, cana zuriaras-len prin so phenas hai cana cheras vareso caște ajutisaras-len. (Prov. 3:27) Das amari zor te anas mângâierea savorenghe, chiar vi codolenghe cai încă ci slujin le Devlesche. Cana amare pașarde nachen prin pharimata cai duchavel-len, pheren nasfale sau silen anxietatea, daisaras te jias lende, te așunas-len hai te phenas lenghe chichiva versetea andai Biblia cai zuriaren-len. Cana las amen pala o Iehova „o Del cai zuriarel amen”, ajutisaras amare phralen te așen zurale andel pharimata, hai ande sa codo timpo, arăsas co ilo codolengo cai încă ci slujin le Devlesche hai țârdas-len andi închinarea uji. (Mat. 5:16)

O IEHOVA VA AJUTILA AMEN SEA O TIMPO

19. So cherel o Iehova anda amaro miștimos hai sar daisaras te las amen pala leste?

¹⁹ O Iehova camel ciaces o miștimos savorengo cai iubin-les. Prin orisave pharimata avelas te nachas, o Iehova ci va mechela amen niciechdata corcore. Cadea sar iech dad lel sama pesche șiavendar pherdo iubirea, sa cadea o Iehova lel sama pesche manușendar cai așen lesche fideli. Vo sicavel amenghe so te cheras, del amen le buchia cai trebun amenghe caște traisaras, feril amen hai mângâil amen. Las amen pala amaro Dad andal ceruri cana vazdas hai zuriaras codolen cai nachen prin pharimata. Prin orisavo pharimos avelas te nachas sau orichichi de duchado avelas amaro ilo, te pachias ciaces că o Iehova va avela pașa amende. Vo promitisardea amenghe: „Na dara, că me som tusa!”. (Is. 41:10) Cadal dumes cheren amen te pachias amen ciaces ande leste! Jianas mișto că ci sam corcore niciechdata!