Le buchia cai sichilean-len cana astardean te prinjianes i Biblia daștin te ajutin tut vi aghies

1. Sar parude chi viața le buchia cai sichilean-len cana astardean te prinjianes i Biblia?

LE BUCHIA cai sichileam-len cana astardeam te prinjianas i Biblia parude amari viața. Sar exemplo, cana sichileam că o anav le Devlesco si Iehova, astardeam te pașioas lestar. (Is. 42:8) Cana sichileam so întâmplol-pe varecasa cana merel, hachiardeam că codola drago amenghe cai mule ci mai jianen chanci. (Ecl. 9:10) Hai cana sichileam că o Del phenel că va cherela i phuv iech paradiso, ci mai daraileam anda o viitorii. Samas bucurime cana hachiardeam că daisaras te traisaras anda sea o timpo, na numai 70 sau 80 bărșa. (Ps. 37:29; 90:10)

2. Sar sicaven le versetea anda 2 Petru 1:12, 13 că vi le creștini zurale ando pachiamos trebul te gândin-pe mai dur le buchiande cai sichile-len mai anglal andai Biblia?

² Ci trebul te bâstras niciechdata chichi de importanto si le buchia cai sichileam-len cana astardeam te prinjianas i Biblia. O Petru scriisardea pesco duito lil caring chichiva creștini cai sas „zurale ando ciacimos”. (Citisar 2 Petru 1:12, 13.) Tha, ande codoi vremea, andi congregația sas chichiva manușa nasul, cai camenas te duriaren le phralen le ciacimastar. (2 Pet. 2:1-3) O Petru camlea te zuriarel le phralen caște na mechen-pe athade. So cărdea vo? Andea lenghe amintea chichiva sicaimata cai von deja prinjianenas-len. Cadal sicaimata daștinas te ajutin-len te așen pașa o Iehova anda sea o ilo ji co sfârșito.

3. Sostar sea le creștini trebun te gândin-pe mai dur le buchiande cai sichile-len cana astarde te prinjianen i Biblia? Den iech exemplo.

³ Chiar dacă sam de but bărșa co ciacimos, daisaras te țârdas mai dur miștimata anda le buchia cai sichileam-len cana astardeam te prinjianas i Biblia. Te dichas iech exemplo: iech bucătaro cai cherel buchi de but timpo hai iech bucătaro cai acana astarel te cherel buchi daștin te folosin sa codol ingredientea caște cheren iech haben. Tha, ando timpo, o bucătaro cai cherel buchi de but vremea sichilea sar te folosil cadal ingredientea caște cherel diferime hai lașe habena. Sa cadea, codola cai slujin le Iehovasche de but bărșa hai codola cai astaren acana te sichion andai Biblia daștil-pe că sichion diferime buchia anda sa codol versetea. Daștil-pe că, de cana cărdeam o bolimos, amari situația sau le buchia cai cheras-len anda o Iehova parude-pe. Cana gândisaras amen le buchiande cai sichileam-len cana astardeam te prinjianas i Biblia, hachiaras sar von daștin te ajutin amen vi aghies. Te dichas sar codola cai slujin de but bărșa le Iehovasche daștin te țârden miștimata anda trin bare sicaimata cai sichile-len cana astarde te prinjianen i Biblia.

O IEHOVA SI CODO CAI CĂRDEA SEA LE BUCHIA

4. Sar parudea-pe amari viața cana sichileam că o Iehova cărdea sea le buchia?

⁴ „Codo cai cărdea sea le buchia si o Del.” (Evr. 3:4) Jianas că i phuv hai sea so si pe late sas cărde Codolestar cai si o mai goghiaver hai o mai zuralo. Anda codoia că vo cărdea amen, vo jianel sea le țâne buchia anda amende. Mai but, les duchal-les le manușendar hai jianel so si mai mișto anda fiesavo anda amende. Cado ciacimos – că o Iehova cărdea sea le buchia – parudea amari viața hai dea amen iech scopo.

5. Savo ciacimos daștil te ajutil amen te bariaras i umilința? (Isaia 45:9-12)

⁵ O ciacimos că o Iehova cărdea sea le buchia sicavel amen te avas umili. Cana o Iov astardea te gândil-pe prea but peste hai avere manușende, o Iehova andea lesche amintea că Vo si o mai zuralo hai Codo cai cărdea sea le buchia. (Iov 38:1-4) Cadaia ajutisardea le Iovos te hachiarel că sea so cherel o Iehova si sea o timpo mișto. Pala codoia, o profeto Isaia phendea sa cadai buchi prin le dumes: „Va phenela o luto Codolesche cai dea-les forma: «So cheres?»”. (Citisar Isaia 45:9-12.)

6. Cana si importanto te gândisaras amen chichi de goghiaver hai zuralo si Codo cai cărdea sea le buchia? (Dich vi le imagini.)

⁶ Cana varecon slujil de but bărșa le Iehovasche, daștilas te arăsăl te pachial-pe mai but ande peste, ando than te pachial-pe ando Iehova hai ande lesco Lil. (Iov 37:23, 24) Tha so miștimata va avela-les cana gândil-pe mai but chichi de goghiaver hai zuralo si Codo cai cărdea sea le buchia, o Iehova? (Is. 40:22; 55:8, 9) Cado baro ciacimos va ajutila-les te așel umilo hai te hachiarel că le gânduri le Iehovasche sile mai lașe sar lesche gânduri.

7. So ajutisardea la Rahela te dichel lașe iachența iech nevo paruimos?

⁷ I Rahela, cai trail andi Slovenia, dea peschi seama că cana gândisardea-pe mai but că o Iehova si Codo cai cărdea sea le buchia, daisardea te dichel lașe iachența iech nevo paruimos cai cărdea-pe andi organizația. Voi phenel: „Ci sas manghe ușoro sea o timpo te dichav lașe iachența le alosarimata cai cheren-len codola cai sile angla amende. Sar exemplo, chiar vi pala so dichlem o Raporto 8 catar o Corpo de Guvernare – 2023, i iechto data cana dichlem că o phral cai încărelas iech cuvântarea phiravel barba, așilem le muiesa pâtărdo. Cadea că manglem le Iehovas te ajutil man te dichav cadea sar trebul cado nevo paruimos”. I Rahela hachiardea că, anda codoia că o Iehova si Codo cai cărdea le ceruri hai i phuv, vo jianel sea o timpo so si mai mișto anda peschi organizația. Dacă si tuche pharo te așunes hai te les tut pala so sicaven amenghe te cheras codola cai sile angla amende, cher tuche timpo te gândis tut mai but chichi de zuralo hai goghiaver si Codo cai cărdea amen. (Rom. 11:33-36)

SOSTAR MECHEL O DEL TE AVAS DUCHADE?

8. So miștimata si amen anda codoia că jianas sostar mechel o Del te aven duchade le manușa?

⁸ Sostar mechel o Del te aven duchade le manușa? Chichiva anda codola cai ci arachle o răspunso cadale pușimaste holiarde-pe po Del sau arăsle te pachian că vo nici na existil. (Prov. 19:3) Tha amen sichileam că le manușa sile duchade hai meren anda codoia că o Adam mechlea amenghe o păcato hai i imperfecțiunea, na anda codoia că o Iehova camel cadaia. Sa cadea, jianas că, anda codoia că o Iehova si răbdătorii hai ci choslea încă i duch pa i phuv, milioanea manușa daștin te aven leste hai te sichion sar vo va chosela sea le ducha. (2 Pet. 3:9, 15) Cadal ciacimata line o pharimos pa amaro ilo hai cărde amen te avas mai pașă lestar.

9. Cana avelas mișto te anas amenghe amintea sostar mechel o Iehova te avas duchade?

⁹ Hachiaras că trebul te avas răbdători ji cana o Iehova va chosela cu sea le ducha. Cu sea cadala, cana amen sau codola drago amenghe sam duchade anda codoia că nachas prin pharimata, neciacimata sau cana merel amenghe varecon, daisaras te astaras te pușias amen sostar o Iehova ci cherel vareso ande amaro miștimos mai sigo. (Hab. 1:2, 3) Cana nachas prin cadal buchia, si mișto te gândisaras amen mai but sostar o Iehova mechel codolen orta te nachen prin ducha.a (Ps. 34:19) Sa cadea, daisaras te gândisaras amen că o Iehova camel te chosel sea le ducha iech data anda sea o timpo.

10. So ajutisardea la pheia Anne te avel zuriardi pala so lachi dei mulea?

¹⁰ Cana jianas sostar mechel o Del te avas duchade, daisaras te așias zurale andel pharimata. I Anne, cai trail pe iech insula cai bușiol Mayotte, anda o Oceano Indiano, phenel: „Pala so mânri dei mulea acana chichiva bărșa, mânro ilo pherdilea-pe duchatar. Cu sea cadala, anav manghe amintea sea o timpo că na o Iehova si doșalo anda le ducha prin save nachas. Vo camel anda sea o ilo te chosel cu sea i duch hai te uștiavel andal mule codolen drago amenghe. Cana gândiv man cadale buchiande, iech bari pacea pherel mânro ilo chiar cana som zurales duchadi”.

11. So sam zuriarde te cheras vi mai dur cana jianas sostar mechel o Del te avas duchade?

¹¹ Anda codoia că jianas sostar mechel o Del te avas duchade, sam zuriarde te predichisaras vi mai dur. Pala so phendea că o Iehova si răbdătorii anda codoia că camel ca chichi mai but manușa te paruven-pe hai te aven salvime, o Petru scriisardea: „Den tumari zor te aven manușa savengo phiraimos si sfânto hai cheren buchia cai sicaven că slujin anda sea o ilo le Devlesche”. (2 Pet. 3:11) Mașcar le ‘buchia cai sicaven că slujisaras anda sea o ilo le Devlesche’ si vi i predicarea. Cadea sar amaro Dad, amen iubisaras le manușen. Camas ca vi von te train andi lumea nevi cai o Del va anela-la. O Iehova si pherdo răbdarea, hai camel ca vi le manușa anda o than cai tu beșes te anen lesche închinarea. So bari pachiv si te cheres buchi ande iech than le Devlesa hai te ajutis chichi mai bute manușen te prinjianen-les angla te avel o sfârșito cadala lumeaco! (1 Cor. 3:9)

TRAISARAS ANDEL „PALUTNE GHIESA”

12. Sar ajutil amen o ciacimos anda le „palutne ghiesa”?

¹² I Biblia phendea ciaces de mai anglal sar va avena le manușa andel „palutne ghiesa”. (2 Tim. 3:1-5) Cana dichas sar phiraven-pe le manușa de pașa amende, hachiaras mai mișto sar pherel-pe cadai profeția. Cana dichas că le manușa phiraven-pe sea mai nasul, amaro pachiamos andi Biblia zuriarel-pe sea mai but. (2 Tim. 3:13-15)

13. So daisaras te pușias amen cana gândisaras amen ca i paramici le Isusoschi anda Luca 12:15-21?

¹³ Cana jianas că traisaras andel palutne ghiesa anda cadai lumea, va avela te șioas po iechto than ande amari viața le buchia cai sile ciaces importanto. Daisaras te sichioas sar te cheras cadaia andai paramici cai phendea-la o Isus ando Luca 12:15-21. (Citisar.) Sostar phendea-pe anda o murș barvalo că silo „bi goghiaco”? Na anda codoia că sas-lo barvalo, tha anda codoia că ci șiutea po iechto than ande leschi viața le buchia cai trebunas. Vo ‘chidelas barvalimata anda peste, tha ci sas-lo barvalo ande le Devlesche iacha’. Tha sostar sas nasul anda leste că ci folosisardea mișto pesco timpo? Anda codoia că o Del phendea codole murșesche: „Ande cadai riat va manghela-pe chi viața”. So daiasaras te sichioas anda cadai paramici? Ci mai si but timpo ji cana cadai lumea nasul va avela chosli. Cadea că si mișto te pușias amen: „Sicaven le buchia cai cherav-len că șioav po iechto than ande mânri viața le buchia cai sile ciaces importanto? So zuriarav mânre șiavorren te cheren ande lenghi viața? Dav mânro zuralimos, mânro timpo hai mânre love caște chidav barvalimata anda mande sau barvalimata ando cerii?”.

14. Sar sicaven amenghe le buchia cai cărdea-len i Miki sostar si mișto te anas amenghe amintea că traisaras andel palutne ghiesa?

¹⁴ Cana gândisaras amen că traisaras ciaces andel palutne ghiesa, daisaras te alosaras mai mișto so te cheras amara viațasa. Prin cadaia nachlea vi iech phei cai bușiol Miki. Voi phenel: „Cana terminisardem i școala, camlem te avel man iech than buchiaco ande savo te sichioav mai but anda le animalea. Tha, ande sa codo timpo, camlem vi te avav pioniera hai te jiav ande iech than cai si nevoia mai bute phralendar. Chichiva phrala hai pheia andai congregația phende manghe te gândiv man mișto dacă daștilas te avel man iech buchi sar cadaia, hai vi te cherav pionierato sau te jiav ande iech than cai si nevoia phralendar. Von andine manghe amintea că, na pa but timpo, cadai lumea va avela chosli hai că, andi lumea nevi, va avela te sichioav andal animalea chichi de but camav. Cadea că, alosardem iech than buchiaco cai ci trebulas man but școala. Cărdem iech harno curso, cai ajutisardea man te arachav manghe iech lași buchi. Cadaia ajutisardea man te avel man love caște cherav o pionierato ando Ecuador, iech than cai sas nevoia mai bute phralendar”. Acana, i Miki slujil mai dur le Iehovasche pașa laco rrom, cai si iech phral cai vizitil le congregații ando Ecuador.

15. Sar ajutil amen o exemplo le Iacovosco te hachiaras sostar ci trebul te mechas amen cana le manușa ci camen te așunen i vestea lași? (Dich vi le imagini.)

¹⁵ Ci trebul te mechas amen perade dacă, chichiva manușa ci camen încă te așunen i vestea lași. Le manușa daștin te paruven-pe. Te dichas o exemplo le Iacovosco, o phral vitrego le Isusosco. Vo dichlea sar barilea o Isus, sar cărdilea Mesia hai sicadea le manușen cadea sar ci mai cărdea chonic angla leste. Cu sea cadala, but bărșa, o Iacov ci lea-pe pala o Isus. Numai pala so o Isus uștilea andal mule, o Iacov astardea te lel-pe pala leste – hai predichilas i vestea lași iagasa ando ilo.b (Ioan 7:5; Gal. 2:9) Cadea că, te na mechas amen cana amare neamuri ci camen încă te prinjianen mai but anda i vestea lași hai te jias parpale le manușende cai ci camle te așunen amen mai anglal. Te na bâstras că traisaras andel palutne ghiesa, cadea că i predicarea si zurales importanto. So phenas acana le manușenghe daștil te paruvel lenghi viața pala iech timpo, chiar vi pala so va astarela o baro necazo.c

TE SICAVAS CĂ SI CUCI ANDA AMENDE SO ANEL AMENGHE AMINTEA O IEHOVA

16. Sar zuriarde tut le buchia cai anel-len amenghe amintea o Iehova? (Dich vi o chenaro „Folosisar-len caște ajutis averen”.)

¹⁶ Iech partea anda o haben spiritualo cai si cărdo catar amari organizația si anda codola cai ci așunde niciechdata le bare sicaimata andai Biblia. Sar exemplo, i cuvântarea cai si încărdi co sfârșito le curchesco, chichiva articolea, materialea video pa o jw.org, hai vi le reviste anda o publico sile cărde ando iechto than anda codola cai ci sile Martori. Tha vi amen daisaras te țârdas miștimata anda cadala. Von cheren amen te iubisaras mai but le Iehovas, te pachias amen mai but ande lesco Lil hai ajutin amen te avas mai lașe cana sicavas averen le bare sicaimata andai Biblia. (Ps. 19:7)

17. Cana trebul te gândisaras amen mai but ca chichiva bare ciacimata cai sichileam-len cana astardeam te prinjianas i Biblia?

¹⁷ Sar Martori le Iehovasche, sam bucurime cana primisaras iech nevo hachiarimos. Tha sicavas vi că sile cuci anda amende le bare ciacimata cai sichileam-len cana astardeam te prinjianas i Biblia hai cai țârde amen co ciacimos. Dacă vroiechdata avel amenghe te las amen mai but pala so pachias amen, ando than te las amen pala so sicavel amen i organizația le Iehovaschi, daisaras te anas amenghe amintea pherde umilința con si angla amari organizația: Codo cai cărdea sea le buchia hai cai si o mai goghiaver hai o mai zuralo. Cana amen sau codola drago amenghe nachas prin iech pharimos, te avel amen răbdarea hai te anas amenghe amintea sostar o Iehova mechel amen te avas duchade. Hai cana alosaras sar te folosisaras amaro timpo, amaro zuralimos hai amare love, te gândisaras amen so trebul te avel mai importanto anda amende ande cadal palutne ghiesa. Le buchia cai o Iehova anel-len amenghe amintea te cheren amen mai dur goghiaver hai te ajutin amen te slujisaras le Iehovasche anda sea o ilo!