Daștis te pachias ciaces că o Iehova iertisardea tut

1, 2. Sar simțosaras amen cana jianas că o Iehova iertisardea amen ciaces? (Dich vi i imaginea.)

O REGE David simțosardea-pe doșalo anda le buchia nasul cai cărdea-len ando trecuto. (Ps. 40:12; 51:3; anteto) Chiar cana vo cărdea bare păcatea, o Iehova iertisardea-les cana falea-les nasul hai parudea pesco phiraimos. (2 Sam. 12:13) Cadea, le Davidos sas-les pacea ando ilo cana hachiardea că o Iehova iertisardea-les ciaces. (Ps. 32:1)

² Vi amen, cadea sar o David, daisaras te simțosaras iech bari pacea ando ilo cana hachiaras că o Iehova sicadea amenghe mila hai iertisardea amare păcatea. Chiar cana cheras iech baro păcato, sam zuriarde cana jianas că o Iehova si gata te iertil amen cana fal amen nasul, mangas amenghe iertarea, das duma le phurența hai das amari zor te na mai cheras codo păcato. (Prov. 28:13; Fap. 26:20; 1 Ioan 1:9) Lel-pe iech pharimos pa amaro ilo cana jianas că o Iehova iertisardea amaro păcato cu sea, sar cana ci sas cărdo niciechdata! (Ezec. 33:16)

3, 4. Sar simțosardea-pe iech phei pala so boldea-pe hai so va avela te dichas ande cado articolo?

³ Poiechdata, si amenghe pharo te pachias că o Iehova iertisardea amen ciaces. Te dichas so phenel i Jennifer, iech phei cai barilea ando ciacimos. Laco dad hai lachi dei sicade-la anda o Iehova. Tha cana voi barilea, astardea te cherel buchia nasul hai garadea-len pesca deiatar hai pesche dadestar. Pala chichiva bărșa, voi cărdea paruimata, dea peschi viața le Iehovasche hai boldea-pe. I Jennifer phenel: „Mai anglal, cărdem buchia sexualo melale, pilem but pimos, somas holiardi hai i mai importanto buchi anda mande sas te cherav love. Tha, pala so manglem man le Iehovasche te iertil man hai cărdem paruimata, jianglem că o merimos le Isusosco daștil te chosel mânre păcatea. Tha ande mânro ilo ci pachiaiem ciaces că o Iehova iertisardea man cu sea”.

⁴ Si vi tuche pharo poiechdata te pachias că o Iehova iertisardea tut ciaces? Te na bâstras că o Iehova camel ca vi amen, cadea sar o David, te pachias zurales că vo si pherdo mila. Ande cado articolo, va avela te dichas sostar si importanto te pachias că o Iehova iertisardea amare păcatea hai so daștil te ajutil amen te pachias cadaia.

SOSTAR TREBUL TE PACHIAS CIACES CĂ O IEHOVA IERTISARDEA TUT

5. So camel o Satan te pachias? Den iech exemplo.

⁵ Dacă pachias ciaces că o Iehova iertisardea amen, ci va avela te pachias iech anda le hohaimata le Satanosche. Te na bâstras că o Satan cherel sea so daștil caște așavel amen te slujisaras le Iehovasche. Vo camel te pachias că amare păcatea si cadea de bare, că ci daștin te aven iertime. Te gândisaras amen le murșeste anda Corinto cai sas duriardo andai congregația pala so cărdea buchia sexualo melale. (1 Cor. 5:1, 5, 13) Cana falea-les nasul anda so cărdea hai parudea pesco phiraimos, o Satan camlea ca le phrala te na iertin-les hai te na primin-les parpale andi congregația. Ande sa codo timpo, o Satan camlea ca o murș cai parudea pesco phiraimos te pachial că so cărdea sas cadichi de nasul că ci va avela iertime. Hai cadea ‘leschi bari duch te phaghel lesco ilo’, hai te arăsăl te na mai slujil le Iehovasche. O Satan ci parudea-pe hai camel vi aghies te cherel cadal buchia. Tha amen „prinjianas mișto lesche planuri”. (2 Cor. 2:5-11)

6. So daisaras te cheras cana amaro ilo doșarel amen?

⁶ Dacă pachias ciaces că o Iehova iertisardea amen, ci va avela te mai simțosaras amen doșale. Cana cheras iech păcato, si normalo te simțosaras amen doșale. (Ps. 51:17) Cadaia si iech lași buchi anda codoia că del amen o zuralimos te paruvas amen. (2 Cor. 7:10, 11) Cu sea cadala, dacă pachias că o Iehova ci iertisardea amen chiar dacă nachlea mai but timpo de cana parudeam amaro phiraimos, daisaras te arăsas te na mai slujisaras le Iehovasche. Tha cana pachias ciaces că o Iehova iertisardea amen, ci mai simțosaras amen doșale hai, pala codoia, daisaras te slujisaras le Iehovasche cadea sar vo camel: bucuriasa hai bi te doșarel amen o ilo. (Col. 1:10, 11; 2 Tim. 1:3) Tha sar daisaras te pachias anda sea o ilo că o Iehova iertisardea amen?

SO DAȘTIL TE AJUTIL TUT TE PACHIAS CIACES CĂ O IEHOVA IERTISARDEA TUT?

7, 8. So phendea o Iehova le Moisesche hai sostar daisaras te pachias cadaia? (Exodo 34:6, 7)

⁷ Te gândisaras amen ca so phendea o Iehova anda peste. Te dichas, sar exemplo, so phendea o Iehova le Moisesche po plain Sinai.a (Citisar Exodo 34:6, 7.) Mașcar sea le buchia cai daștilas te phenel-len o Iehova anda peste, vo alosardea te phenel că si „iech Del îndurătorii hai pherdo mila”. Avelas iech Del cadea de lașio sar si o Iehova te na iertil varecas cai sicavel că fal-les nasul hai paruvel pesco phiraimos? Niciech data! Numai varecon ieche ilesa barruno hai șudro daștilas te cherel cadaia. Tha jianas mișto că o Iehova na-i cadea.

⁸ Daisaras te pachias ciaces că, cana o Iehova phenel că si pherdo mila, vo phenel amenghe o ciacimos. Vo ci hohavel niciechdata. (Ps. 31:5) Cadea că daisaras te pachias ciaces so phenel amenghe o Iehova. Dacă si tuche pharo te pachias ciaces că o Iehova iertisardea tut, daștis te pușes tut: „Pachiav că o Iehova si îndurătorii hai pherdo mila hai că daștil te iertil sea codolen cai risaren-pe catar pengo phiraimos nasul? Atunci sostar te na pachiav că o Iehova iertisardea vi man?”.

9. So sichioas anda o Psalmo 32:5 anda sar iertil o Iehova amare păcatea?

⁹ Gândisar tut so sicavel amen o Iehova andi Biblia anda leschi iertarea. Te dichas, sar exemplo, so phendea o David anda i iertarea le Iehovaschi. (Citisar Psalmo 32:5.) O David phendea: „Iertisardean mânri doș hai mânre păcatea”. O verbo ebraico „iertisardea” daștil te însemnol „vazdel”, „lel” sau „îngărel”. Cana o Iehova iertisardea le Davidos, vo vazdea, te phenas cadea, lesche păcatea hai îngărdea-len dur. Cadea, o David ci mai simțosardea-pe doșalo hai iech bari pacea pherdea lesco ilo. (Ps. 32:2-4) Vi amen daisaras te simțosaras cadai pacea. Cana risaras amen catar amaro phiraimos nasul, ci mai trebul te simțosaras amen doșale anda le păcatea cai o Iehova lea-len, vazdea-len hai îngărdea-len dur amendar.

10, 11. So sichioas anda o Iehova cana phenel-pe anda leste că silo ‘gata te iertil’? (Psalmo 86:5)

¹⁰ Citisar Psalmo 86:5. Cade, o David phenel că o Iehova si ‘gata te iertil’. Cadaia însemnol că o Iehova ci holiarel-pe sigo cana cheras vareso nasul hai că sea o timpo camel te iertil codolen cai risaren-pe catar pengo phiramos nasul. Tha sostar daisaras te phenas cadaia? Andi duito partea anda o verseto, phenel-pe că o Iehova ‘si barvalo andi iubirea loialo caring sea codola cai acharen-les’. Cadea sar dichleam ando articolo cai nachlea, o Iehova va sicavela peschi iubirea loialo caring sea codola cai iubin-les hai ci va mechela-len niciechdata. Cadai iubirea loialo cherel-les te iertil bare ilesa sea codolen cai sicaven că fal-len ciaces nasul anda so cărde. (Is. 55:7) Dacă si tuche pharo te pachias că o Iehova iertisardea tut, daștis te pușes tut: „Pachiav că o Iehova si gata te iertil sea codolen cai sicaven că fal-len nasul hai manghen-les te sicavel lenghe mila? Atunci sostar te na pachiav că o Iehova iertisardea vi man cana manglem-les te sicavel manghe peschi bari mila?”.

¹¹ Daisaras te avas zuriarde vi cana gândisaras amen că o Iehova hachiarel mișto sar sam cărde hai că sam manușa imperfecto. (Ps. 139:1, 2) Te dichas so phendea o David ande aver psalmo hai sar daștil te ajutil amen cadaia te pachias ciaces că o Iehova camel te iertil amen.

TE NA BÂSTRES SO ANEL PESCHE AMINTEA O IEHOVA

12, 13. Cadea sar sicavel-pe ando Psalmo 103:14, so anel pesche amintea o Iehova anda amende hai sar phiravel-pe amența?

¹² Citisar Psalmo 103:14. O David phenel că o Iehova „anel pesche amintea că sam phuv”. Cade, o David phenel încă iech buchi cai ajutil amen te hachiaras sostar o Iehova silo gata te iertil sea codolen cai risaren-pe catar pengo phiraimos nasul. Vo anel pesche amintea sea o timpo că sam imperfecți. Te hachiaras mai mișto so camlea te phenel o David.

¹³ Vo phenel că o Iehova „jianel mișto sar sam cărde”. O Del cărdea le Adamos ‘anda phuv’, cadea că vo jianel sar si cărde le manușa hai so trebul-len. Sar exemplo, von trebun te han, te soven hai te phurden. Chiar vi le manușa perfecto trebun te cheren cadal buchia. (Gen. 2:7) Tha, de cana o Adam hai i Eva păcătuisarde, cana phenel-pe andal manușa că ‘sile phuv‘, hachiaras vi aver vareso. Cana așunas cadal dumes, gândisaras amen că savore năștisaileam imperfecto hai trebul te maras amen le păcatosa. O Iehova na numai că jianel că sam imperfecto, tha, cadea sar phenel o David, vo „anel pesche amintea” cadaia. Andi șib ebraico, cana phenes că anes tuche amintea, însemnol vi că cheres vareso ando miștimos varecasco. Cathar hachiaras că o Iehova jianel că poiechdata va avela te greșisaras, tha vo camel te sicavel amenghe mila hai te iertil amen cana dichel că risaras amen catar amaro phiraimos nasul. (Ps. 78:38, 39)

14. a) Sar phendea o David că iertil amen o Iehova? (Psalmo 103:12) b) So daisaras te sichioas anda sar iertisardea o Iehova le Davidos? (Dich vi o chenarii „Sar o Iehova iertil hai bâstrăl”.)

¹⁴ So mai daisaras te sichioas anda o Psalmo 103 anda sar iertisardea amen o Iehova? (Citisar Psalmo 103:12.) O David phenel că, cana o Iehova iertil amen, îngărel amare păcatea cadea de dur, sar si „o than catar vazdel-pe o cham le thanestar cai jial tele”. Cadal dui thana sile cadea de dur iech averestar că ci arachena-pe niciechdata. So sichioas cathar anda le păcatea cai iertisardea-len o Iehova? Ande iech lil cai del duma anda cado verseto phenel-pe: „Dacă iech păcato si îngărdo cadea de dur, atunci daisaras te pachias ciaces că ci așel chanci anda leste”. Te gândisaras amen: Iech haben cai chandel șucar sau aver buchia daștin te anen amenghe andi goghi vareso cai întâmplosardea-pe ando trecuto. Tha cana o Iehova iertil iech păcato, vo chosel-les cu sea. Ci așel chanci anda leste cai te anel lesche amintea anda codo păcato hai te cherel-les te șiol amen te pochinas anda so cărdeam. (Ezec. 18:21, 22; Fap. 3:19)

15. So daisaras te cheras dacă amaro ilo doșarel amen mai dur?

¹⁵ Sar daștil te ajutil amen so phendea o David ando Psalmo 103 te pachias ciaces că o Iehova iertisardea amen? Dacă amaro ilo doșarel amen mai dur, daisaras te pușias amen: „Bâstrav so anel pesche amintea o Iehova, adică bâstrav că vo jianel că sam păcătoși hai că iertil codolen cai risaren-pe catar pengo phiraimos nasul? Sa cadea, anav manghe andi goghi so o Iehova alosardea te bâstrel, adică anav manghe amintea catar le păcatea cai o Iehova iertisardea-len hai ci mai doșarel man anda lende?”. O Del ci mai gândil-pe ca le păcatea cai cărdeam-len mai anglal. Nici amen ci trebul te cheras cadaia. (Ps. 130:3) Cana pachias ciaces că o Iehova iertisardea amen, daisaras vi amen te iertisaras amen anda le păcatea cai cărdeam-len ando trecuto hai ta jias angle.

16. Den iech exemplo cai sicavel sostar si periculoso te gândisaras amen mai dur ca le păcatea cai o Iehova iertisardea-len. (Dich vi i imaginea.)

¹⁶ Te gândisaras amen ca iech exemplo. Varecon cai simțol-pe doșalo mai dur anda le greșeli cai cărdea-len ando trecuto daștil te avel sar iech șoferii cai dichel sea o timpo andel oglinzi ando timpo so tradel i mașina. Si mișto te dichel poiechdata andel oglinzi caște dichel dacă si iech pericolo palal. Tha, caște tradel i mașina andi siguranța, vo trebul te dichel mai dur so si angla leste. Sa cadea, daștil te avel mișto anda amende te gândisaras amen poiechdata ca le greșeli cai cărdeam-len ando trecuto. Daisaras te sichioas anda lende hai te avas hotărâme te na mai cheras so cărdeam. Tha, dacă gândisaras amen prea but ca iech păcato cai o Iehova iertisardea-les, daisaras te arăsas te hasaras amari bucuria hai te na mai daisaras te slujisaras le Iehovasche cadea sar camel vo. Avelas mai mișto te gândisaras amen mai but ca so si angla amende. Sam po drom cai îngărel ca i viața andi lumea nevi le Devleschi, cai ‘ci va avela te anas amenghe amintea le buchiandar cai nachle’. (Is. 65:17; Prov. 4:25)

ZURIAR MAI DUR CHE ILES TE PACHIAL CĂ O IEHOVA IUBIL TUT HAI IERTISARDEA TUT

17. Sostar si importanto te zuriaras mai dur amare iles te pachial că o Iehova iubil amen hai si gata te iertil amen?

¹⁷ Si importanto te zuriaras mai dur amaro pachiamos andi iubirea hai andi iertarea le Iehovaschi. (1 Ioan 3:19) Sostar? Anda codoia că o Satan va camela vi mai dur te cherel amen te pachias că o Iehova ci daștil te iubil amen sau te iertil amen. Prin cadal hohaimata, o Satan camel te cherel amen te na mai slujisaras le Iehovasche. Hai, ando timpo so o sfârșito cadala lumeaco pașiol, o Satan va camela te cherel cadaia vi mai dur anda codoia că jianel că ci mai siles but timpo. (Rev. 12:12) Tha amen trebul te așias contra le Satanosche hai te slujisaras loialo vi mai dur le Iehovasche!

18. So daisaras te cheras caște zuriaras amaro ilo te pachial că o Iehova iubil amen hai iertil amen?

¹⁸ Ando articolo cai nachlea, dichleam chichiva buchia cai ajutin amen te pachias că o Iehova iubil amen ciaces. Ande cado articolo, dichleam so daisaras te cheras caște pachias ciaces că o Iehova iertil amen. Te cheras amenghe timpo caște gândisaras amen ca so phenel i Biblia anda sar iertil o Iehova. Hai te na bâstras că vo jianel că sam păcătoși hai va avela te sicavel amenghe peschi mila. Mai but, te anas amenghe amintea că o Iehova iertil anda sea o ilo. Cadea că daisaras te pachias, cadea sar o David, că o Iehova si pherdo mila hai te phenas anda sea o ilo: „Mulțumisarav tuche, Iehova, că «iertisardean mânri doș hai mânre păcatea»”. (Ps. 32:5)