LECȚIA 37
So phenel i Biblia anda i buchi hai anda le love
Simțosardean-tu vroiechdata perado anda codoia că sas-tu pharimata le lovența sau că sas tuche pharo ca i buchi? Poiechdata ci si ușoro te las sama pe amende hai, ande sa codo timpo, te das le Iehovas i închinarea cai meritil-la. I Biblia del-ame lașe sfaturi cai ajutin-ame.
1. So phenel i Biblia anda i buchi?
O Del camel te cheras buchi bucuriaia. I Biblia phenel că „chanci ci si mai lașio anda manuș sar . . . te bucuril-pe pesca buchiatar”. (Eclesiasto 2:24) Vi o Iehova cherel phari buchi. Cana las-ame pala leste hai sam vreanico, lesco ilo bucuril-pe hai vi amaro.
Te cheras buchi si importanto, tha ci trebul te mechas niciechdata ca i buchi te avel mai importanto sar i închinarea cai anas-la le Iehovasche. (Ioan 6:27) Vo promitil amenghe că dacă șioas-les po iechto than ande amari viața, va lela sama amendar.
2. Sar te dichas le love?
Si ciaces, i Biblia phenel că ‘le love ferin le manușes’, tha phenel vi că i fericirea ci încărel le lovendar. (Eclesiasto 7:12) Cadea că, voi phenel amenghe te na iubisaras le love, tha te avas ‘mulțumime soia si amen’. (Citisaren Evrei 13:5.) Cana sam mulțumime soia si amen, ci va avela te simțosaras-ame perade anda codoia că camas sea o timpo mai but buchia hai nici ci va avela te cheras camimata de ivea. (Proverbe 22:7) Sa cadea, ci mechas-ame athade te jias ca le jocuri de noroc hai nici ci mechas-ame țârdine catar le afaceri cai promitin că arăsas barvale de pe iech ghies pe aver, bi te cheras phari buchi.
3. Sar daisaras te sicavas lașimos cana folosisaras amare love?
O Iehova si iech Del buhle vastența, hai vi amen las-ame pala leste cana si amen ‘buhle vasta, gata te das vi averen anda so si amen’. (1 Timotei 6:18) Daisaras te sicavas lașimos cana folosisaras amare love, cana cheras donații andi congregația hai cana ajutisaras codolen ciore, vi mai but amare phralen. Andel iacha le Iehovasche ci si cuci chichi de but das, tha sostar das. Cana das anda sea o ilo so si amen, sam fericime hai bucurisaras vi o ilo le Iehovasco. (Citisaren Faptele 20:35.)
HACHIAR MAI MIȘTO
Va avela te diches so miștimata si tut cana diches i buchi cadea sar camel o Del hai cana san mulțumime soia si tut.
4. De pachiv le Iehovasche cana cheres buchi
Amaro amalimos le Iehovaia trebul te cherel-ame te dichas i buchi cadea sar vo camel. Dichen o MATERIALO VIDEO hai pala codoia den duma:
So placiaia-tu anda sar dichelas o Jason le buchia hai sar phiradea-pe vo ca peschi buchi?
So ajutisardea-les te încărel i buchi ca laco than?
Citisaren Coloseni 3:23, 24 hai pala codoia den duma:
Sostar si importanto sar dichas amari buchi?
Si importanto te cheras buchi. Tha ci trebul te mechas niciechdata ca amari buchi te arăsăl mai importanto sar i închinarea cai anas-la le Iehovasche
5. Si amen miștimata cana sam mulțumime soia si amen
But manușa camen te chiden chichi mai but love. Tha i Biblia sicavel-ame aver vareso. Citisaren 1 Timotei 6:6-8 hai pala codoia den duma:
So phenel amenghe i Biblia te cheras?
Daisaras te avas fericime vi cana si amen țâra buchia. Dichen o MATERIALO VIDEO hai pala codoia den duma:
Sostar sile fericime cadal familii chiar cana silen țâra love?
So daisaras te cheras cana si amen but buchia, tha camas te chidas vi mai but? O Isus phendea iech paramici cai sicadea cado pericolo. Citisaren Luca 12:15-21 hai pala codoia den duma:
So sichilean andai paramici cai phendea-la o Isus? (Dich o verseto 15.)
Citisaren hai dichen savi si i diferența mașcar so phenel-pe andel Proverbe 10:22 hai so phenel o 1 Timotei 6:10 hai pala codoia den duma:
So pachias că si mai importanto: le love sau o amalimos le Iehovaia? Sostar?
So pharimata si le manușen cai nașen pala love?
6. O Iehova va lela sama te avel amen so trebul-ame
Amaro pachiamos ando Iehova silo zumado cana trebul te rodas amenghe iech than buchiaco hai cana si amen pharimata le lovența. Caște diches sar daștis te naches părdal cadal zumaimata, dichen o MATERIALO VIDEO hai pala codoia den duma:
So pharimata sas le phrales anda o materialo video?
So cărdea vo caște nachel părdal lende?
Citisaren Matei 6:25-34 hai pala codoia den duma:
So promitil o Iehova codolenghe cai șion-les po iechto than ande penghi viața?
UNII MANUȘA PHENEN: „Trebul te cherav but buchi caște lav sama catar mânri familia hai anda codoia ci daștiv te jiav ande fiesavo curco ca le întruniri la congregațiache”.
Savo verseto cherel-tu te pachias că i mai lași decizia cai trebul te les-la si te șios le Iehovas po iechto than ande chi viața?
SO SICHILEAM
Trebul te cheras buchi hai te aven-ame love, tha cadala ci trebun te len o than le Iehovasco ande amari viața.
So dichleam
Sar trebulas te dichas i buchi hai le love?
So miștimata si tut cana san mulțumime soia si tut?
Sar daștis te sicaves că pachias-tu andi promisiunea le Iehovaschi că va lela sama tutar?
RODE MAI BUT
Va avela te diches dacă phenel i Biblia că le love anen sea le buchia nasul.
„Sile le love i rădăcina sea le buchianghe nasul?” (Articolo pa amaro site-o)
Va avela te diches sar daștis te bucuris o ilo le Iehovasco cana des vi averenghe anda so si tut.
„So phenel i Biblia anda sar trebul te das averen anda so si amen?” (Articolo pa amaro site-o)
Cheren amenghe nasul le jocuri de noroc?
„So phenel i Biblia anda le jocuri de noroc?” (Ușten!, martia 2015)
Va avela te hachiares so cărdea ieche manușes cai sas cior hai chelelas-pe ca le jocuri de noroc te paruvel peschi viața.
„Le curse le grastența sas mânri viața” (O Turno de veghe, 1 noiembria 2011)