2. So phenel amenghe i Biblia anda o Iehova?

I Biblia phenel că, mașcar sea le devla savende le manușa anen închinarea, o Iehova si o corcoro ciacio Del. Sostar? Si mai but motivea. Le Iehovas siles i mai bari autoritatea hai vo corcoro si „Codo O Mai Baro pa sea i phuv”. (Citisaren Psalmo 83:18.) I Biblia phenel anda leste că si „Codo O Mai Zuralo”, anda codoia că les siles o zuralimos te cherel oriso camel. Vo ‘cărdea sea le buchia’ – o universo hai sea so si jiuvindo pa i phuv. (Revelația 4:8, 11) O Iehova si o corcoro cai sas anda sea o timpo hai cai va avela anda sea o timpo. (Psalmo 90:2)

Anda codoia că o Iehova cărdea-ame, meritil te anas închinarea numai lesche. (Revelația 4:11) Cadaia însemnol că amaro ilo trebul te marel anda leste hai că trebul te anas închinarea numai lesche, bi te folosisaras idoli sau icoane. (Citisaren Isaia 42:8.)

Amari închinarea trebul te avel „sfânto hai plăcuto” le Iehovasche. (Romani 12:1) Cadaia însemnol că amen trebul te cheras so vo manghel amendar. Sar exemplo, codola cai iubin le Iehovas cheren anda sea lengo ilo cadea sar vo phenel anda sar te avel i căsătoria. Von nașen catar le buchia cai meliaren-le, sar avelas te țârden țigări, te len droguri sau te pien prea but pimos.a