LECȚIA 34
Sar daisaras te sicavas le Iehovasche că amaro ilo marel anda leste?
De cana astardean te studiis i Biblia, si mai pașă chio ilo le Devlestar? Cameias te zuriares chio amalimos leia? Dacă da, na bâstăr că chichi mai but va bariola chi iubirea anda o Iehova, cadichi mai but vo va iubila-tu hai va lela sama pe tute. Cadea că, sar daștis te sicaves le Iehovasche că chio ilo marel anda leste?
1. Sar daisaras te sicavas le Iehovasche că amaro ilo marel anda leste?
Amen sicavas le Iehovasche că amaro ilo marel anda leste cana așunas lestar. (Citisaren 1 Ioan 5:3.) Vo ci spidel chanicas te așunel lestar. Mai but, vo del fiesaves i ocazia te alosarel dacă va așunela lestar sau nici. Sostar? Anda codoia că o Iehova camel ‘te așunas anda sea o ilo’. (Romani 6:17) Cadea că, vo camel te așunes lestar anda ilo, anda codoia că iubis-les, na anda codoia că san spidime. Le părți 3 hai 4 anda cado lil va ajutina-tu te hachiares că daștis te sicaves chi iubirea caring o Iehova, cana cheres so si mișto ande lesche iacha hai cana duriares-tu le buchiandar cai vo dichel-le nasul.
2. Sostar daștil te avel pharo te sicavas le Iehovasche că amaro ilo marel anda leste?
„But sile le pharimata codolesche orta”. (Psalmo 34:19) Savore sam imperfecți hai îngăras iech marimos amența. Mai but, nachas prin pharimata le lovența, neciacimata hai but ducha. Cana nachas prin pharimata sar cadala, daștilas te avel amenghe pharo te cheras so manghel amendar o Iehova, anda codoia că iech drom nasul fal-pe că avelas mai ușoro te phiras pe leste. Tha cana cheres sea so phenel tuche o Iehova, sicaves că iubis-les mai but sar oriso hai că san lesche loialo. Anda codoia, vi o Iehova va avela loialo caring tute hai ci va mechela-tu niciechdata. (Citisaren Psalmo 4:3.)
HACHIAR MAI MIȘTO
Va avela te diches sostar le Iehovasco ilo bariol cana așunes lestar hai so va ajutila-tu te așes lesche loialo.
3. O Satan doșarel-tu vi tut
Anda o lil biblico Iov, dichas că o Satan doșardea na numai le Iovos, tha savore manușen cai camen te slujin le Iehovasche. Citisaren Iov 1:1, 6–2:10 hai pala codoia den duma:
Sostar phendea o Satan că slujilas o Iov le Iehovasche? (Dich Iov 1:9-11.)
So phendea o Satan anda sea le manușa, hai chiar vi anda tute? (Dich Iov 2:4.)
Citisaren Iov 27:5b hai pala codoia den duma:
Sar sicadea o Iov că iubilas ciaces le Iehovas?
O Iov sicadea peschi iubirea caring o Iehova cana așilea lesche loialo
Vi amen sicavas amari iubirea caring o Iehova cana așias lesche loialo
4. Bucurisar o ilo le Iehovasco
Citisaren Proverbe 27:11 hai pala codoia den duma:
So si ando ilo le Iehovasco cana dichel că san goghiaver hai așunes lestar? Sostar?
5. Daștis te așes loialo le Iehovasche
I iubirea anda o Iehova cherel-ame te phenas vi averenghe anda leste. I loialitatea cherel-ame te das duma anda leste vi cana ci si amenghe ușoro. Dichen o MATERIALO VIDEO hai pala codoia den duma:
Si tuche pharo te des duma averenghe anda o Iehova?
So ajutisardea le phrales Grayson te nachel părdal pesche daraimata?
Va avela tuche mai ușoro te așes loialo le Iehovasche dacă iubis so vo iubil hai dacă urâs so vo urâl. Citisaren Psalmo 97:10 hai pala codoia den duma:
Anda so sichilean ji acana, save si chichiva buchia cai o Iehova iubil-le? Save si chichiva buchia cai o Iehova urâl-le?
Sar daștis te sichios te iubis o lașimos hai te urâs o nasulimos?
6. Cana așunas le Iehovastar si amen miștimata
Te așunas le Iehovastar si sea o timpo ande amaro miștimos. Citisaren Isaia 48:17, 18 hai pala codoia den duma:
Pachias că o Iehova jianel sea o timpo so si o mai lașio anda amende? Sostar?
So miștimata si tut anda codoia că studiis i Biblia hai că prinjianes le ciace Devles, Iehova?
UNII MANUȘA PHENEN: „Anda o Del na-i importanto so cherav”.
So verseto daștis te folosis caște sicaves că prin so cheras daisaras te bucurisaras sau te duchavas o ilo le Iehovasco?
SO SICHILEAM
Amen sicavas le Iehovasche că amaro ilo marel anda leste cana așunas lestar hai cheras so phenel amenghe vo vi cana ci si amenghe ușoro.
So dichleam
So sichilean anda o exemplo cai mechlea-les o Iov?
Sar daștis te sicaves că chio ilo marel anda o Iehova?
So va ajutila-tu te așes loialo le Iehovasche?
RODE MAI BUT
Va avela te hachiares sar daștis te așes loialo le Iehovasche hai la congregațiache.
Va avela te diches mai but anda le buchia nasul cai o Satan phendea-le andal manușa.
„O Iov așel integro” (I Biblia – Savo si laco mesajo?, i partea 6)
Va avela te diches sar daștin vi le țâne șiavorre te sicaven penghi iubirea caring o Iehova.
Sar daștin le tărne te așen loialo le Devlesche vi cana lenghe colegi spiden-le te cheren vareso nasul?