Daștis te pachias ciaces că o Iehova iubil tut

1. Sostar dean chi viața le Iehovasche? (Dich vi le imagini.)

ANES tuche amintea cana manglean tut le Iehovasche hai phendean lesche că des chi viața lesche? Cărdean cado alosarimos anda codoia că arăslean te prinjianes-les hai te iubis-les. Solahardean lesche că va avela te șios po iechto than ande chi viața leschi voința hai că va avela te iubis-les mai dur sea che ilesa, sea che sufletosa, sea chia goghiasa hai sea che zuralimasa. (Mar. 12:30) Anda codo ghies, chi iubirea anda leste cărdilea sea mai zurali. Cadea că, so avelas te phenes dacă varecon pușel tut: „Iubis ciaces le Iehovas?”. Jianas mișto că avelas te phenes anda sea o ilo: „Iubiv le Iehovas mai but sar oricas!”.

2, 3. So camel o Iehova te pachias hai so va avela te dichas mai dur? (Ieremia 31:3)

² So avelas te phenes dacă varecon pușelas tut: „Tu iubis le Iehovas, tha pachias ciaces că vo iubil tut?”. Avelas te gândis tut că ci san prea lașio caște meritis leschi iubirea? Iech phei cai nachlea prin but pharimata cana sas țâni phendea: „Jianav mișto că iubiv le Iehovas. Cu sea cadala, butivar pușiav man dacă vi o Iehova iubil man”. Tha so si ciaces ando ilo le Iehovasco cana dichel caring tute?

³ O Del camel te pachias ciaces că vo iubil tut. (Citisar Ieremia 31:3.) Daștis te pachias cadaia anda codoia că o Iehova țârdea tut leste. Hai cana dean chi viața lesche hai boldean tut, vo dea tut vareso zurales cuci: leschi iubirea loialo. Cadaia însemnol că vo iubil tut zurales but hai că ci va avela te mechel tut niciechdata. Cadai iubirea cherel le Iehovas te dichel sea codolen cai slujin lesche sar iech poporo specialo, hai cadaia însemnol că vi tu san zurales „cuci” ande lesche iacha. (Mal. 3:17) O Iehova camel te pachias ciaces că vo iubil tut, cadea sar pachialas vi o apostolo Pavel, cai scriisardea: „Pachiav ciaces că nici o merimos, nici viața, nici îngeri, nici raimata, nici buchia de acana, nici buchia cai aven, nici zuralimata, nici o ucimos, nici i adâncimea, nici aver creația ci va daștila te încăren amen dur catar i iubirea le Devleschi”. (Rom. 8:38, 39) Mai dur, va avela te dichas sostar si importanto te pachias că o Iehova iubil amen hai so daștil te ajutil amen te pachias vi mai but cadaia.

SOSTAR SI IMPORTANTO TE PACHIAS CĂ O IEHOVA IUBIL TUT?

4. So hohaimos camel o Satan te pachias hai sar daisaras te așias contra cado hohaimos?

⁴ Dacă pachias că o Iehova iubil amen, daisaras te așias zurale contra „le athaimata” le Benghesche. (Ef. 6:11) O Satan cherel sea so daștil caște așavel amen te slujisaras le Iehovasche. Iech anda le mai bare hohaimata cai phenel-len o Satan si că o Iehova ci iubil amen. I Biblia phenel că vo si sar iech leo. Le lei jian pala le animalea cana sile covle hai ci daștin te ferin-pe. Sa cadea, vi o Satan avel contra amenghe cana sam covle, chine sau simțosaras amen perade anda codoia că nachleam prin phare ghiesa ando trecuto, si amen pharimata aghies sau daras anda so va avela ando viitorii. (Prov. 24:10) O Satan camel te arăsas cadea de perade, caște na mai slujisaras le Iehovasche. Tha amen daisaras ‘te așias contra’ le Benghesche hai contra lesche athaimata cana zuriaras amaro pachiamos andi iubirea le Iehovaschi. (1 Pet. 5:8, 9; Iac. 4:7)

5. Sostar si importanto te simțosaras că o Iehova iubil amen hai dichel amen cuci?

⁵ Cana pachias că o Iehova iubil amen, va avela te pașioas mai but lestar. Sostar daisaras te phenas cadaia? O Iehova șiutea ande amaro ilo i nevoia te avas iubime hai vi te iubisaras averen. Cana varecon iubil amen, vi amen iubisaras-les. Cadea că, chichi mai but simțosaras că o Iehova iubil amen hai dichel amen cuci, cadichi mai but camas vi amen te sicavas lesche iubirea. (1 Ioan 4:19) Hai cana amari iubirea caring leste bariol, vi leschi iubirea caring amende va bariola. I Biblia phenel amenghe cadaia: „Pașion le Devlestar, hai vo va pașiola tumendar”. (Iac. 4:8) Tha so daisaras te cheras caște pachias ciaces că o Iehova iubil amen?

SO DAȘTIL TE AJUTIL TUT TE PACHIAS CIACES CĂ O IEHOVA IUBIL TUT?

6. So daștis te cheres caște pachias că o Iehova iubil tut?

⁶ Mang le Iehovas mai butivar te ajutil tut te hachiares sostar iubil tut. (Luca 18:1; Rom. 12:12) Phen le Iehovasche, chiar mai butivar po ghies, te ajutil tut te diches tut cadea sar dichel tut vo. Si ciaces, poiechdata, chio ilo daștil te doșarel tut cadea de but, cai te avel tuche pharo te pachias că o Iehova iubil tut. Tha na bâstăr că o Iehova si mai baro sar chio ilo. (1 Ioan 3:19, 20) Vo prinjianel tut mai mișto sar prinjianes-tu tut hai dichel so si lașio ande tute, chiar cana tu ci diches cadaia. (1 Sam. 16:7; 2 Cron. 6:30) Cadea că ‘șior chio ilo angla leste’ hai mang-les te ajutil tut te pachias ciaces că vo iubil tut. (Ps. 62:8) Pala so manglean tut le Iehovasche, si importanto te les tut pala le sfaturi cai aven.

7, 8. Sar ajutin amen le Psalmi te pachias ciaces că o Iehova iubil amen?

⁷ Pachia anda sea o ilo că o Iehova phenel o ciacimos. O Iehova dea pesco spirito sfânto le murșenghe cai scriisarde i Biblia, cadea că sea so phenen von anda o Iehova si ciaces. Ande iech psalmo, o David dea duma zurales șucar anda chichi de but duchal le Iehovas amendar. Vo phendea: „O Iehova silo pașa codola cai lengo ilo silo duchado; vo salvil codolen cai sile perade”. (Ps. 34:18) Cana san perado, daștil-pe că simțos tut corcoro. Tha o Iehova phenel că va avela pașa tute cana naches prin phare ghiesa anda codoia că dichel că si tut nevoia lestar mai but sar oricana. Ande iech aver psalmo, o David phendea: „Chide mânre asfa ande chio gonorro!”. (Ps. 56:8) O Iehova prinjianel mișto sea le ducha prin save naches. Les duchal-les but tutar hai jianel chio pharimos. Sar fiesavi picătura paieschi anda iech sticla morciachi si zurales cuci anda varecaste cai phirel prin o șuco than, sa cadea, sea le asfa cai șiores-len sile zurales cuci anda o Iehova hai anel peschi amintea sea chi duch hai sea le asfa cai șiordean-len. Ando Psalmo 139:3 citisaras: „Tu [Iehova] . . . prinjianes mișto sea mânre droma”. O Iehova dichel sea so cheres, tha vo dichel mai but caring le lașe buchia cai cheres-les. (Evr. 6:10) Sostar? Anda codoia că lesco ilo bariol cana dichel sea so cheres caște așunes lestar.a

⁸ Prin cadal versetea anda lesco Lil, si sar cana o Iehova phenel tuche: „Camav te jianes că iubiv tut but hai că duchal man tutar!”. Tha, cadea sar dichleam mai anglal, o Satan camel te pachias că o Iehova ci iubil amen. Cadea că, cana ci pachias ciaces că o Iehova iubil tut, beș iech țâra hai puș tut: „Castar va avela te așunav? Le Satanostar, cai si «o dad le hohaimasco», sau le Iehovastar, cai si «o Del le ciacimasco»?”. (Ioan 8:44; Ps. 31:5)

9. So promitil o Iehova codolenghe cai iubin-les? (Exodo 20:5, 6)

⁹ Gândisar tut so simțol o Iehova caring codola cai iubin-les. Gândisar tut ca so phendea o Iehova le Moisesche hai le israelițenghe. (Citisar Exodo 20:5, 6) O Iehova promitil că va sicavela mai dur iubirea loialo codolenghe cai iubin-les. Anda codoia că o Iehova si loialo, daisaras te pachias că vo sea o timpo va iubila codolen cai iubin-les. (Neem. 1:5) Cadea că, cana astares te pachias că o Iehova ci iubil tut, beș iech țâra hai puș tut: „Me iubiv le Iehovas?”. Pala codoia, gândisar tut: Dacă tu iubis le Iehovas hai cheres sea so daștis caște așunes lestar, daștis te pachias anda sea o ilo că vo iubil tut zurales but. (Dan. 9:4; 1 Cor. 8:3) Aver varesar phendo, dacă tu jianes mișto că iubis le Iehovas, sostar te pușes tut dacă o Iehova iubil-tu tut? I iubirea hai i loialitatea le Iehovaschi sile mai bare sar oriso!

10, 11. Sar camel o Iehova te dichas o merimos le Isusosco? (Galateni 2:20)

¹⁰ Gândisar tut anda caste dea o Iehova pesche Șiaves. O Iehova dea o mai baro daro le manușenghe cana bișialdea pesche Șiaves, le Isusos, te merel anda amende. (Ioan 3:16) Tha bișialdea o Iehova le Isusos te merel vi anda tute? Sar te na! Te gândisaras amen co apostolo Pavel. Vo cărdea bare păcatea angla te avel iech creștino, hai vi pala codoia vo trebulas te marel-pe pesche covlimatanța. (Rom. 7:24, 25; 1 Tim. 1:12-14) Tha vo arăslea te pachial ciaces că o Iehova dea pesche Șiaves sar iech daro vi anda leste. (Citisar Galateni 2:20.) Te anas amenghe amintea că o Iehova șiutea andi goghi le Paveloschi te scriil cadal dumes. Cadea că o Iehova camel te sichioas anda so scriisardea o Pavel. (Rom. 15:4) So phendea o Pavel sicavel că o Iehova camel ca vi tu te diches o merimos lesche Șiavesco sar iech daro cai primisardean-les anda lesche vasta. Cana gândisares tut chichi de șucar si cado daro cai dea-les tuche o Iehova, va avela te pachias vi mai but că vo iubil tut.

¹¹ Mulțumisaras anda sea o ilo le Iehovasche că bișialdea pesche Șiaves pi phuv te merel anda amende. Tha o Isus mai avilea pi phuv vi caște sicavel amen o ciacimos anda o Del. (Ioan 18:37) Mașcar cadal ciacimata, o Isus sicadea amen vi chichi de but iubil o Iehova pesche șiavorren.

O ISUS DAȘTIL TE AJUTIL TUT TE PACHIAS CIACES CĂ O IEHOVA IUBIL TUT

12. Sostar daisaras te pachias so phendea o Isus anda o Iehova?

¹² Cana sas-lo pi phuv, le Isusos ciailea-les te phenel le manușenghe sar si o Iehova. (Luca 10:22) Daisaras te pachias so phendea o Isus anda o Iehova. Sostar? Anda codoia că, angla te avel pi phuv, o Isus beșlea le Iehovasa ando cerii miliardea bărșa. (Col. 1:15) O Isus dichlea chichi de but iubil-les o Iehova. Tha vo dichlea vi chichi de but iubilas o Iehova pesche îngeren loialo hai le manușen loialo pa i phuv. Tha sar ajutil o Isus le manușen te pachian ciaces că o Iehova iubil-len?

13. Sar camel o Isus te dichas le Iehovas?

¹³ O Isus camel te jianas so si ando ilo le Iehovasco anda amende. Andel evanghelii, o Isus phendea le Iehovasche „Dade” mai but sar 160 var. Cana dea duma pesche discipolența anda o Iehova, vo phendea lenghe că si ‘tumaro Dad’ sau „tumaro Dad andal ceruri”. (Mat. 5:16; 6:26) Angla te avel o Isus pi phuv, le manușa loialo le Iehovasche phenenas lesche „o Mai Zuralo”, „o Mai Baro”, „Codo cai cărdea sea le buchia”, sau aver dumes sar cadala. Tha o Isus phendea butivar le Iehovasche „amaro Dad”. Cadaia sicavel că o Iehova camel ca lesche manușa te simțon-pe pașă lestar, cadea sar iech șiavorro simțol-pe pașă pesche dadestar iubitoro. Prin cadaia o Isus sicadea amen că o Iehova iubil amen, cadea sar iech lașio dad iubil pesche cuci șiavorren. Te sichioas mai but anda dui ocazii cana o Isus phendea i duma „Dade” anda o Iehova.

14. Sar sicadea o Isus că fiesavo mașcar amende si sumnacuno andel iacha amare Dadesche cerisco? (Matei 10:29-31) (Dich vi i imaginea.)

¹⁴ Mai anglal, te dichas so phendea o Isus ando Matei 10:29-31. (Citisar.) O Isus phendea că lesco Dad jianel mișto cai si fiesavi țâni ciricli, chiar cana iech ciricli ci iubil le Iehovas hai ci anel lesche închinarea. Dacă o Iehova dichel cadea de cuci iecha țânia ciriclia, cadichi mai but vo lel sama fiesavestar mașcar amende, anda codoia că amen iubisaras-les hai anas lesche închinarea! Sa cadea, ando verseto 30, o Isus phendea: „Vi le bala anda tumaro șăro sile sea înghine”. Anda codoia că o Iehova jianel chiar vi le țâne buchia anda amende, daisaras te pachias ciaces că les duchal-les amendar. Jianas mișto că o Isus camel te pachias ciaces că fiesavo mașcar amende si sumnacuno andel iacha amare Dadesche cerisco.

15. So sichios anda o Iehova anda so phendea o Isus ando Ioan 6:44?

¹⁵ Te dichas aver verseto ande savo o Isus phendea le Iehovasche „Dade”. (Citisar Ioan 6:44.) Chio Dad cerisco, pherdo lașimos, țârdea tut peste hai ajutisardea tut te prinjianes-les hai te iubis-les. Sostar cărdea vo cadaia? Anda codoia că dichlea că si tut iech ilo lașio. (Fap. 13:48) Cana o Isus phendea le dumes anda o Ioan 6:44, daștil-pe că vo delas duma anda so phendea o Iehova ando Ieremia 31:3. Code, o Iehova phendea pesche poporosche: „Țârdem tut mande iecha iubireasa loialo”. (Ier. 31:3; dich vi Osea 11:4.) Cathar sichioas că amaro lașio Dad andal ceruri dichel ande tute șucar buchia, cai daștil-pe că tu ci dichlean-len ji acana.

16. a) So phenel amenghe o Isus hai sostar trebul te pachias-les? b) So daștil te ajutil tut te pachias ciaces că o Iehova si o mai lașio Dad anda tute? (Dich vi o chenarii „O Iehova si o mai lașio Dad anda amende”.)

¹⁶ Cana o Isus phenel anda o Iehova că si amaro Dad, si sar cana phenel: „O Iehova na-i numai mânro Dad, si vi chio Dad. Hai phenav tuche ciaces că vo iubil tut hai duchal-les tutar!”. Cadea că, dacă poiechdata si tuche pharo te pachias că o Iehova iubil tut, an tuche amintea so phendea o Isus hai pachia tut ande leste, anda codoia că vo phenel sea o timpo o ciacimos hai vo si codo cai prinjianel o mai mișto amare Dades. (1 Pet. 2:22)

CHER SEA SO DAȘTIS CAȘTE PACHIAS MAI DUR CĂ O IEHOVA IUBIL TUT

17. Sostar trebul te cheras sea so daisaras caște pachias vi mai dur că o Iehova iubil amen?

¹⁷ Trebul te cheras sea so daisaras caște pachias vi mai dur că o Iehova iubil amen. Cadea sar dichleam mai anglal, amaro dușmano, o Satan, cherel oriso caște așavel amen te slujisaras le Iehovasche. Vo camel te pachias că o Iehova ci iubil amen. Ci trebul te pachias le hohaimata le Satanosche! (Iov 27:5)

18. So daștis te cheres caște pachias mai dur că o Iehova iubil tut?

¹⁸ Caște pachias ciaces că o Iehova iubil tut, mang-les te ajutil tut te diches tut cadea sar dichel tut vo. Gândisar tut ca le versetea andai Biblia cai sicaven chichi de but duchal le Iehovas codolendar cai iubin-les. An tuche amintea că o Iehova va iubila sea o timpo codolen cai iubin-les. Gândisar tut sostar daștis te diches o merimos le Isusosco sar iech daro cai primisardean-les andal vasta le Devlesche. Hai pachia ciaces că o Iehova si chio Dad cerisco, cadea sar phendea o Isus. Cadea că, dacă varecon pușelas tut: „Pachias ciaces că o Iehova iubil tut?”, tu va avela te phenes lesche anda sea o ilo: „Da, iubil man! Hai me cherav sea so daștiv ande fiesavo ghies caște sicavav că iubiv-les!”.