Zuriar pale chio amalimos le Iehovaia

ANDE fiesavo bărș, but cuci bacrea aven parpale andi congregația creștino. De fiesavi data cana iech manuș avel parpale, ‘ando cerii si iech bari bucuria’. (Luca 15:7, 10) Dacă san vi tu mașcar cadala, av siguro că o Isus, le îngeri hai o Iehova bucurin-pe te cheres pale partea andai congregația. Ando timpo so zuriares pale chio amalimos le Iehovaia, daștil-pe că va avena tut vi chichiva pharimata. Save si cadala hai sar daștis te naches părdal lende?

LE PHARIMATA

Pala so aven parpale andi congregația, but phrala simțosaren-pe perade. Dacă cadea simțosares vi tu, daștil-pe că hachiares i duch anda ilo cai simțosardea-la vi o David. Chiar vi pala so sas-lo iertime le Iehovastar, vo phendea: „Mânre păcatea tasaven-ma”. (Ps. 40:12; 65:3) Pala so iech manuș avel parpale co Iehova, daștil-pe ca lesco ilo te doșarel-les hai te avel lesche lajiav mai but bărșa. I Isabellea, cai sas-li excluso mai but sar 20 bărșa, phendea: „Sas manghe pharo te hachiarav că o Iehova daștilas te iertil-ma”. Dacă san perado, daștil te covliol pale chio pachiamos. (Prov. 24:10) Na mech te avel cadea!

Chichiva daran că ci va daștina te cheren sea so trebul caște zuriaren pale pengo amalimos le Iehovaia. O Antoine, cai avilea parpale andi congregația, phendea: „Bâstărdem sar si te aves creștino”. Cadal sentimentea daștinas te așiaven chichivan te len partea ca le buchia spiritualo.

Te cheras iech ilustrarea. Iech manuș savesco chăr sas-lo phagărdo catar iech baro brâșând, daștilas te simțosarel-pe perado cana gândil-pe chichi timpo hai zuralimos trebul lesche caște vazdel-les pale. Sa cadea, dacă chio amalimos le Iehovaia sas-lo zurales rimome, daștil-pe că pachias că trebul te des sea chi zor caște zuriares pale chio amalimos leia. Tha ci trebul te cheres cadaia corcoro.

O Iehova phenel amenghe: „Aven te ortosaras le buchia mașcar amende”. (Is. 1:18) Tu cărdean deja sea so daștis caște ‘ortosares le buchia’ mașcar tute hai o Iehova, anda codoia, vo iubil tut zurales but. Gândisar-tu: o Iehova daștil te folosil chio exemplo caște sicavel că o Satan silo iech hohamno. (Prov. 27:11)

Caște aves parpale andi congregația, tu pașilean deja le Iehovastar. Vi vo va pașiola tutar, cadea sar phendea. (Iac. 4:8) Cu sea cadala, ci arăsăl ca aver manușa te dichen tut sar iech Martoro lesco. Trebul mai dur te bariares chi iubirea anda chio Dad hai chio Amal, Iehova. Sar?

ȘIU TUCHE OBIECTIVEA SAVENDE DAȘTIS TE ARĂSĂS

Încercosar te șios tuche obiectivea savende daștis te arăsăs. Daștil-pe că si tut prinjianimos anda o Iehova hai anda lesche promisiuni. Tha trebul te trais pale sar iech creștino hai te les partea pale ca i predicarea hai ca le întruni, hai vi te beșes ande iech than le phralența hai pheianța. Mai dur, va avela te dichas chichiva obiectivea cai daștis te șios-le tuche.

De duma butivar le Iehovaia. Chio Dad hachiarel că daștis te simțosares tut doșalo mai but timpo hai că daștil te avel tuche pharo te rughisares-tu. (Rom. 8:26) Tha trebul ‘te rughisares-tu vi mai dur’ hai te phenes le Iehovasche chichi de but cames te pașios lestar. (Rom. 12:12) O Andrej anel pesche amintea: „I doș hai o lajiav cherenas pharo mânro ilo. Tha, pala fiesavi rugăciunea, cadala cărdionas mai țâne. Sas-ma pale pacea”. Cana ci jianes so te manghes le Iehovastar, daștin te ajutin-tu le manglimata phende catar o rege David pala so căisardea-pe, scriime anel Psalmi 51 hai 65.

Cher tuche iech programo caște studiis i Biblia. Cadea, chio pachiamos va zuriarela-pe, hai chi iubirea anda o Iehova va bariola. (Ps. 19:7-11) O Felipe phenel: „Anda codoia că ci sas-ma iech programo anda i citirea hai o studio la Bibliaco, mânro pachiamos covlilea hai holiardem le Iehovas. Ci camlem te cherav pale cadai greșeala. Cadea că camlem te lav sama pe mânro sastimos spiritualo hai te citisarav i Biblia ande fiesavo ghies”. Vi tu trebul te cheres cadai buchi. Dacă cames te aves ajutime caște jianes so subiectea te alosares anda tute, de duma phralența zurale spiritualo.

Zuriar pale chio amalimos le phralența. Chichiva cai aven parpale andi congregația daran că le coaver dichen-le iachența nasul. I Larissa phenel: „Sas manghe zurales lajiav. Simțosardem că duchadem le phralen. Cadal sentimentea așile ande mânro ilo but timpo”. Av siguro că le phure hai le phrala zurale spiritualo abia ajucăren te ajutin-tu te zuriares pale chio pachiamos! (Dich o chenarii „So daștin te cheren le phure?”.) Von sile zurales bucurime că avilean parpale andi congregația hai camen te aves fericime. (Prov. 17:17)

So daștil te ajutil-tu te pașios mai but le phralendar andai congregația? Cher sea mai but buchia spiritualo ande iech than le phralența, sar avelas te jias ca le întruniri hai andi predicarea ande fiesavo curco. Sostar si importanto te cheres cadai buchi? O Felix phenel: „Le phrala abia ajucărde te avav parpale andi congregația. Hachiardem chichi de cuci somas anda lende. Savore ajutisarde-ma te simțosarav că cherav pale partea andai congregația, te hachiarav că somas iertime hai te jiav mai dur”. (Dich o chenarii „So daștis te cheres tu?”.)

NA MECH TUT!

O Satan va anela mai dur pe tute pharimata caște meches-tu ando timpo so des chi zor te zuriares pale chio amalimos le Iehovaia. (Luca 4:13) Cher vareso de acanara hai zuriar chio pachiamos.

O Iehova phendea anda pesche bacrea: „Va avela te rodav codola cai hasardea-pe, va avela te anav parpale codola hasardi, va avela te sastiarav lache ducha hai te zuriarav codola covli”. (Ezec. 34:16) O Iehova ajutisardea bute manușen te aven-le pale iech pachiamos zuralo. Daștis te pachias că va avela te ajutil vi tut te zuriares pale chio amalimos leia!