So daștil te ajutil amen te sichioas corcore anda i Biblia ande fiesavo curco
Si tuche pharo te sichios corcoro anda i Biblia ande fiesavo curco? Sau ci ciaiol tut te cheres cadaia? Poiechdata savore daisaras te nachas prin cadaia. Tha gândisar tut avere buchiande cai cheres-len sea o timpo ande fiesavo ghies, sar avelas te halaves tut. Caște halaves tut trebul te des anda chio timpo hai zor, tha so mișto simțos tut pala codoia! Cana sichioas corcore andai Biblia daștil te avel sar cana o Del zuriarel amen cana ‘halavel amen paiesa, prin o cuvânto’ (Ef. 5:26) Dich chichiva buchia cai daștin te ajutin tut:
Alosar cana te sichios ande fiesavo curco. Te sichios corcoro andai Biblia încărel ”le buchiandar mai importanto” cai iech manuș le Devlesco trebul te cherel-len. (Filip. 1:10) Caște na bâstres o timpo cai alosardean-les tuche caște sichios corcoro andai Biblia, scriisar-les tuche pe iech lilorro hai șiu-les varecai te diches-les sea o timpo. Sau daștis te șios tuche iech alarma caște anel tuche amintea că pașiol o timpo te sichios andai Biblia.
Alosar sode timpo te sichios caște avel mișto anda tute. Si tuche pharo te așel chi goghi cothe cana sichioas mai but timpo? Tu prinjanes tut mai mișto. Alosar chichi te sichios andai Biblia pala sar si mișto anda tute. Dacă ci avel tuche te sichios andai Biblia cana pașiol o timpo cai alosardean-les, sostar te na sichios numai deș minutea? Te sichios deș minutea andai Biblia si mai mișto sar te na sichios chanci. Iech data so astares te sichios, daștil-pe, că va avela te cames te sichios mai dur. (Filip. 2:13)
Alosar de mai anglal so te sichios. Daștil-pe că, cana beșes tele hai gândisares tut so daștis te sichios ci ‘folosis chichi mai mișto chio timpo.’ (Ef. 5:16) Sostar ci scriis pe iech liloro de mai anglal so ciaiolas tuche te sichios andai Biblia? Cana si tut vroiech pușimos scriisar-les pe codo liloro. Hai de fiesavi data pala so terminis te sichios andai Biblia, daștis te scriis tuche so placialas tuche te sichios aver data.
Paruv chio program cana trebul. De chi zor te cheres paruimata ande chio programo sar avelas, te paruves o timpo ande savo sichios sau anda so sichios. Na-i importanto cana, sode, sau so sichios, importanto si te sichios ande fiesavo curco.
Si amen but miștimata cana sichioas ande fiesavo curco. Pașioas mai but le Iehovastar, sichioas te alosaras goghiaver hai va avela te avas zuriarde. (Ios. 1:8)