Pușimata catar amare cititori

Ji cana va avela te phenas i vestea lași?

O Isus phendea: „Cadai vestea lași anda o Regato va avela phendi pe sea i phuv, ca savore manușa te așunen anda late. Hai atunci va avela o sfârșito”. (Mat. 24:14) I duma grecisco traducime „sfârșito” ande cado verseto, hai ande le versetea 6 hai 13, si télos. Cadai duma referil-pe co timpo cana va avela chosli cu sea cadai lumea le Satanoschi co Armaghedono. (Rev. 16:14, 16) Cadea că, va avela te phenas i vestea lași ji angla so te avel codo sfârșito. Cado si iech paruimos ande sar hachiardeam ji acana cado sicaimos.

Ji acana, amen hachiardeam că i predicarea va așavela-pe cana o Babilono o Baro va avela choslo hai va astarela o baro necazo. (Rev. 17:3, 5, 15, 16) Pachiaiam că cado va avela vi o sfârșito ‘le bărșesco le lașimasco le Iehovasco’. (Is. 61:2) Pachiaiam vi că codola cai camen te așen jiuvinde pala o baro necazo va trebuna te sicaven penghi fidelitatea caring o Iehova angla te astarel o baro necazo. Phendeam că cadal manușa si sar le evrei cai așile jiuvinde cana o Ierusalimo sas-lo distrugime ando bărș 607 a.a.e. Cadal manușa așile jiuvinde anda codoia că andine închinarea le Iehovasche hai urâsarde o nasulimos. (Ezec. 5:11; 9:4) Tha, cadaia na-i pala sar phendea o Isus ando Matei 24:14. Anda cado verseto hachiarel-pe că le manușa daștin te sicaven pachiamos andi vestea lași chiar ji angla te avel chosli cu sea cadai lumea co Armaghedono.

O nevo hachiarimoas le versetosco anda Matei 24:14 paruvel vi o hachiarimos le versetosco anda Revelația 16:21 cai del-pe duma anda o mesajo cai si sar o brâșând barrența pahosche. Pala so rodeam mai but, hachiardeam că le dui versetea sile phangle iech averestar. Sar? Caște hachiaras o phanglimos trebul te dichas so phenel i Biblia anda sar le manușa va răspunzona ca o mesajo anda o Regato. O apostolo Pavel phendea că anda ‘codola cai sile po drom la salvareaco’, o mesajo si iech vestea lași, „iech parfumo la viațaco”. Tha anda le dușmani le Devlesche si iech vestea nasul, „iech chandimos le merimasco”. (2 Cor. 2:15, 16) Von urân o mesajo anda o Regato anda codoia că cado sicavel că lenghi lumea si nasul, si ando vast le Satanosco hai na pa but timpo va avela chosli. (Ioan 7:7; 1 Ioan 2:17; 5:19)

Sa cadea, o brâșând barrența andai Revelația 16:21 va avela ‘zurales baro’. Cadaia daștilas te însemnol că ando baro necazo o mesajo cai amen predichisaras-les va avela mai directo hai va arăsăla mai bute manușende sar oricana. Cadea că, o anav le Iehovasco va avela prinjiando cadea sar ci mai sas niciechdata. (Ezec. 39:7) Daștil-pe că pala so o Babilono o Baro va avela choslo, chichiva manușen te ciaiol-len amaro mesajo sar „iech parfumo la viațaco”? Da. Daștil-pe că va anena penghe amintea sau va așunena că but bărșa, le Martori le Iehovasche phende că i religia hohamni va avela chosli.

Cadaia ameal sosa întâmplosardea-pe ando Egipto purano. Pala so o Iehova ‘andea peschi cris opral sea le devla le Egiptosche’ „iech bari mulțimea manușența de orisavo felo” gălea pașa le israeliți. (Ex. 12:12, 37, 38) Daștil-pe că cadal manușa nachle de i rig le Iehovaschi cana dichle că ciaces pherdine-pe le deș plăgi cai phendea-len o Moise.

Codolen cai va nachena de i rig le Iehovaschi pala so o Babilono o Baro va avela choslo, va avela-len i pachiv te cheren miștimos le phralenghe le Cristososche cai va avena încă pi phuv. (Mat. 25:34-36, 40) Si ciaces, le manușa va daștina te aven judechime sar „bacrea”, ji cana cana codola machle va primina pengo pochinimos cerisco, țâra timposa angla te avel o Armaghedono.

Cado nevo hachiarimos sicavel încă iech data i bari iubirea hai mila le Iehovaschi caring le manușa. Si ciaces, vo „ci camel ca vroiech te merel, tha camel ca savore te arăsăn te risaren-pe catar pengo phiraimos nasul”. (2 Pet. 3:9)