Mambamb mad mud chilal chikukwashinanya kwauk mutambu udiay mwanen
YITADINA ANVAJ
5 MAMBAMB
KURUMBURIK
Mambamb makin makutwish kwikalaku pakach penen ni anen ching anch muntu ni muntu utwishin kulejan patok yitongijok yend ni yovil yend.
MULONG WAK CHID CHA USEY
Chikasikening yisu yimwing kwambamb ni ansand akweta mivu pakach pa 13 ni 19. Mud mulondina buku Breaking the Code, mivu ya kwinyim ey “wadingany ni mbil ya kwijik ujindj wawonsu wa mwanen. Pakwez katat chikasiken kusal mwamu mulong kakulejinanyap kand yom ni ukat kuyilejamu chad antu akwau.” Pakwez ap anch chimeken anch kakatinap kand kwambamb, chifanyidin kwijik anch chinech chawiy chisu chikwetau kuswir nakash kwa kwambamb niyenen!
YOM UKUTWISHANYA KUSAL
Ambambany ni mwanen chisu chikatinay ndiy. Ufanyidinany kusal mwamu ap anch chirumburikin kwambamb uchuku nakash.
“Pamwing ap ukutwishany kulond anch: ‘Nad niyey muten wa kabuj, pawiy pinap chad ukimbina kwambamb niyamam!’ Pakwez, ov, anvaj afanyidin kwinan anch mwanau ukimbin kuyilej yom ya mu mwom wend? Ov, kiyawiyap yom yichingediningay nvaj win mwawonsu?”—Lisa.
“Nikatining kulal kurutu kwa chisu, pakwez pakach pa mambamb mawamp minambamba kal nau anam, mamwing mading ma mu mapep ma uchuku.”—Herbert.
MBIL YA BIBIL: “Kangal wasot kusu ching kuwap kwey amwiney, pakwez sot kuwap kwau akwen.”—1 Korint 10:24.
Ipukany kwikal ni kampuw. Tatuku umwing ulondin anch: “Pakatau anam kwingambambish, yisu yimwing nikat kutongang kwam yom yikwau. Pakwez kasupinap bwat—akat kujinguninang kamu anch niyiteshinap!”
Anch ukwetany chaku chinech, piwambambinanya ni mwanen, jimishany televizion ap telefon. Tekany manangu ku yom yilondinay mwanen, ap anch mulong ukwetay umeken mudi wakad usey, salany usu wa kuushinshikin nawamp.
“Tufanyidin kuyinkish anetu kashinsh anch yovil yau yid ya usey kud etu. Anch kakwetap kashinsh kinak, kakezap kand kutulej yom yikwetau mu muchim ni akuya kukimb ukwash wa antu akwau.”—Maranda.
“Chifanyidinap kujiman, ap anch mutapu wa kutong wa mwanen uwapinap.”—Anthony.
MBIL YA BIBIL: “Chawiy babalany mutapu ukata kuteshany.”—Luka 8:18.
Pakishany kwambamb ni mwanen chisu usadinanya pamwing yom kampand. Yisu yivud, an akat kuyilej anvajau patok yom yikwetau ku muchim chisu chakadiau kuyishichik kamu mulong wa kwambamb.
“Tukat kwambambang nawamp anch tud mu motak. Kushakam pa mbet ni an pa ndond pa kutalijan nau mes ni mes kutukwashining kwambamb nawamp ni anetu.”—Nicole.
Chisu cha kudia nichawiy chiding chiwamp mulong wa kwambamb.
“Chisu tukata kudia yakudia ya urel, muntu ni muntu ukat kulejan yom yiyimp ni yiwamp yamushikenang mu dichuku. Chaku chinech chitukwashin kwikal piswimp ni kwijik anch antu awonsu a mu dijuku akutwish kutukwash kurish ni milong.”—Robin.
MBIL YA BIBIL: “Muntu mwawonsu ufanyidin kuswakal kutesh, pakwez ashimpish muchim pakulond.”—Jakobu 1:19.