Kwilej kusal mudimu ukash kud mud kwijidish mujimbu; ukutwish kutaninamu katat ni mu machuku ma kurutu
YITADINA ANSAND
11 MUSHIKU KU MUDIMU
KURUMBURIK
In kusal mudimu nich mushiku kakatap kuchin mudimu. Pakwez, akat kusanger kusal mudimu nakash mulong wa kuwanyish maswir mau ni mulong wa kuyikwash antu akwau—akat kusal mwamu ap anch mudimu wau ud kwau wa pansh.
MULONG WAK CHID CHA USEY
Tukata ap tulika, mwom utwitin kusal yom yivud nakash. Mulong mu mangand minam antu avud kakatinap kwau kusal mudimu nakash, kwikal mwin kusal mudimu wa mushiku kukutwish kukukwash kamu.—Mulej 3:13.
“Nileja anch ang wasal mudimu nich mushiku, ukusanger mudimu wey ni ukwikal nich musangar nakash. Kwiyov mutapu winou kwankwasha kusanger kusal mudimu. Kukudish kand chaku chiwamp cha kusal mudimu nich mushiku kukukuletin kand kalimish.”—Reyon.
MBIL YA BIBIL: “Mudimu wawonsu ukat kulet dipit.”—Jinswir 14:23.
YOM UKUTWISHA KUSAL
Ikal nich chitongijok chiwamp piur pa mudimu mu kulondul manans madia kwinshin oku.
Ileja kusal yom nawamp. Anch usadin midimu ya ku chikumbu, madevwar ma ku shikol ap usadin midimu yikwau ya ku mujimbu, ikasikesha kusal mudimu winou nich mushiku. Anch watwish kusal mudimu nawamp, kimb kand mitapu yikwau ya kuusal nawamp nakash ni mau mau. Anch wikal nich ukaliweny mu kuusal, ukuusanger kand nakash.
MBIL YA BIBIL: “Ov, umumen muntu wa mushiku ku midimu yend? Ndiy ukez kiman kurutu kwa ant, kakez kimanap kurutu antu amwamu, bwat.”—Jinswir 22:29.
Kangal witongin kwey amwiney. Yisu yivud, anch wawanyish nawamp yisend yey, antu akwau niyau akutwish kutaninamu. Chilakej, anch wasal midimu yey ya ku chikumbu nich mushiku, ukat kuyikepishinaku antu akwau a mu dijuku midimu.
MBIL YA BIBIL: “Chiyukish cha mwin kupan chipandakenamu cha mwin kutambul.”—Midimu 20:35.
Sal yivud kusutamu yikwitinau. Pa ndond pa kusal kwau yom yikwitinau, ikasikesha kusal yom yivud kusutamu kwau yakwitangau kusal. Mu mutapu winou, yeya amwiney usopina mwom wey—usadin yom yivud, kadiap mulong akushinshidil kusal mwamu, pakwez mulong yeya amwiney utondina kusal mwamu.—Mateu 5:41.
MBIL YA BIBIL: “Yom yiwamp yiukusala kangal yikal ya kukushindil, pakwez yikala mudi mudia rusot rey amwiney.”—Filimon 14.
Ikal wisikena. Antu akata kusal mudimu nich mushiku kakwetingap usweral, ap kakatap kwikal asuk a mudimu. Akat kusal usu wa kwikal isikena ni kwikal nich musangar mu kusal mudimu nich mushiku ni kusanger kand chisu cha kwiswedish.
MBIL YA BIBIL: “Chidi chiwamp kwikal nich yom yikemp nich chisambu, kupandakan kwiswidiosh nich midimu yikash yakad ukwash. Mwamu chidi kumulondul rinkind.”—Mulej 4:6.