Difundish dia 18

Ikal murund nend Nzamb chikupu!

Chifanyidin kwikasikesh chakwel kwikal ni murund; chifanyidin kwikasikesh chakwel kumulam murund. Usu wey uvud wa kwikal ni kushal murund nend Nzamb akez kuuyukish kamu nakash. Yesu walonda kud antu amwitiyija anch: “Uyakin ukez kukukwolany.” (Yohan 8:32) Ov chinech chirumburikin ik?

Ukutwish kwikal ni kukwolik katat. Ukutwish kwikal ni kukwolik ku mafundish ma makasu ni makasu mapalangeshau kud Satan. Ukutwish kukwolik ku kuburen ruchingej kwizwila mu mwom wa antu avud akad kumwijik Yehova. (Rom 8:22) Arund nend Nzamb ayikwodil kand ap ku “wom wa rufu.”—Hebereu 2:14, 15.

Ukutwish kwikal ni kukwolik mu mangand masu ma Nzamb. Kukwolik kuwamp mud ik ukutwisha kwikal nich mu machuku ma kurutu! Mu Paradis pa divu, mukez kwikal kukwolik kwi njit, ku mayej, ni ku ubaj. Kukwolik ku uzwendj ni nzal. Kukwolik ku upal ni rufu. Kukwolik ku wom, ku kuyidjatil akwau pansh, ni ku kuburen kutentam. Baibel wisambidin Nzamb anch: “Ukat kuburil chikas chend ni kuwanyish rusot ra chom chawonsu chikweta mwom.”—Kuseng 145:16.

Arund nend Nzamb akushakam chikupu. Mwom wa chikupu chidi chipan chipandakena kuwap chikupanay Nzamb kud awonsu akimbina urund wend. (Rom 6: 23) Tongap bil chikutwisha kurumburik kud ey mwom wakad nsudel!

Ukez kwikal ni chisu cha kusal yom yivud. Chitwishikin anch usotil kwilej mutapu wa kubul chisaj kanang cha mijik. Ap kand chitwishikin anch usotil kwilej kufwatul yipich ap kwilej kwikal nsongamabay. Ukutwish kusot kwilej piur pa annam ap mitond. Ap usotil kand kukas weny wa kuya ni kutal ngand kushalijan ni antu kushalijan. Kwikal ni mwom wa chikupu kukutwishish yom yawonsu yiney!

Ukez kwikal ni chisu chivud cha kwikal ni arund avud. Kushakam chikupu kukutwishish kwijikijan ni antu akwau avud ikadila kal arund nend Nzamb. Ukushiken kwijik ukaliweny wau ni ngikadil yau yipandakena kuwap, ni awiy akwikal arund ney. Ukez kuyikat, ni awiy akez kukukat. (1 Korint 13:8) Kwikal ni mwom wakad nsudel kukez kukwinkish chisu cha kushakam mud murund ni muntu mwawonsu pa divu! Kupandakan yawonsu, urund wey ni Yehova ukujimb ni kukasikan nakash mu kusut kwa mivu. Ikal amboku murund nend Nzamb chikupu!