Shapitre Wa Dikum Ni Yisatu
Chisak Chipandikena Kujimb Kurutu kwa Ditand dia Yehova
1. (a) Ikala atushalapol a Nzamb a kurutu kwa chisu cha Ukristu ap a 144 000, ov chom ik chifanyidinau kuman kurutu atambula difut diau? (b) Ov chom ik chikeza kutwishik mulong wa “chisak chipandikena kujimb” chidiaku pa chisu chinech?
ATUSHALAPOL ashinshamena a Nzamb kudiosh kudiay Abel djat ni kudiay Yohan Mubabatish ateka kusal rusot ra Nzamb pa ndond ya kusambish mu mwom wau. Ap mwamu, awonsu afa, ni akat kuchingel divumbuk diau dia kuchirik ku mwom pa divu mu mangand masu ma Nzamb. Antu 144 000, akeza kuyikel pamwing nend Kristu mu Want wa mwiur wa Nzamb, afanyidin ni yawiy kufa kurutu kwa kutambul difut diau. Pakwez, Kujingunik 7:9 (TMK) ulejen anch mu machuku minam ma kwisudiel, kukwikal “chisak chipandikena kujimb” chidiokila mu michid yawonsu, awiy kakez kufap, pakwez akwet ruchingej ra kushakam chikupu pa divu. Ov udi pakach pa antu inay?
Kujingunin Chisak Chipandikena Kujimb
2. Ov chom ik chashikija ku kutesh kurumburik nawamp kwa chijiken kwa chisak chipandikena kujimb chisambidinau mu Kujingunik 7:9?
2 Mu 1923, atushalapol a Yehova ajingunina anch “amikoku” a mu chishimu cha Yesu chidia mu Mateu 25:31-46 ni “amikoku akwau” isambinay mud muchifundilau mu Yohan 10:16 adi antu akwikala ni dilau dia kushakam chikupu panap pansh. Mu 1931 antu alondidilau mu Ezekiel 9:1-11 mud adiau ni kutek yijingidij pa jimpal jau eza kand ni yawiy kumekan mud antu akweta ruchingej ra kushakam panap pansh. Chad lel mu 1935 eza kwilej anch chisak chipandikena kujimb chisadil chikunku cha amikoku akwau isambinay Yesu. Nlel, chisak chinech chipandikena kujimb ni chitapidila dilau chikwet mamiliyon ma antu.
3. Mulong wak dizu “ading iminy kurutu kwa ditand” disambidinap chisak cha mwiur?
3 Mu Kujingunik 7:9, chisak chipandikena kujimb chimekenap mud chidi mwiur. ‘Kwiman kwau kurutu kwa ditand’ dia Nzamb kuyitinap awiy kwikal mwiur. Awiy adi kwau ku mes ma Nzamb. (Kuseng 11:4) Chom chakin chakwel anch chisak chipandikena kujimb, “chakad kutwish kuchind kudi muntu,” chidiap chisak cha mwiur achimekeshin pa kwisikej uvud wach wakad kwijikan nich yifundinau mu Kujingunik 7:4-8 ni Kujingunik 14:1-4. Kuvul kwa antu 144 000 udi uvud wa antu adioshilau pa divu kuya kuyikel mwiur.
4. (a) Ov “mar makash mapandikena” kupandina chisak chipandikena kujimb chom ik? (b) Mud mulondinau mu Kujingunik 7:11, 12, ov anany atadila chisak chipandikena kujimb ni kwinung nau mu difukwil?
4 Kujingunik 7:14 ulondil mulong wa chisak chipandikena kujimb anch: “Adi antu adiokila mu mar makash mapandakena.” Awiy apandin ku ruvundu ripandikena kuyip rezap kal kumekan mu rusangu ra ukamuntu. (Mateu 24:21) Papaninau nich kujikitish dipandish diau kud Nzamb ni Kristu, chawiy lel yitang yawonsu yishinshamena yidia mwiur yikez kwinung pamwing nau mu kulond anch: “Amen! Kushiman, ni uyaj, ni manangu, ni kujikitish, ni katumb, ni dikand, ni ukash yikala kudi Nzamb wetu chikupu ni chikupu. Amen.”—Kujingunik 7:11, 12.
Chisak Chipandikena Kujimb Chiwapidil Kumekesh Anch Chifanyidin Dipandish
5. Ov mutapu ik tukutwisha kujingunin yitinau chakwel kwikal ku mutambu wa chisak chinech chipandikena kujimb?
5 Kuchidij kwa chisak chipandikena kujimb ku mar majim kwambaten nich yany yitentamina ya Yehova. Ngikadil ya kujingunin nich antu akezau kupandish ayisambidin kamu patok mu Baibel. Mwamu, chitwishikin kud antu akatininga kutentam kusadil katat nich chitongijok cha kumekesh anch afanyidin dipandish. Ov chom ik chifanyidinau kusal?
6. Mulong wak ufanikeshinau chisak chipandikena kujimb nau amikoku?
6 Amikoku ading itudishina ni in kuziyil. Chawiy lel palonday Yesu anch ukwet amikoku akwau akad kwikal a mu chisak cha mwiur, ndiy wading ni kwisambin antu akad kusot kusu ching kushakam chikupu panap pansh pakwez kand afanyidina kwikal aziyidila ku malejan mend. Yesu walonda anch: “Amikoku am akat kutesh dizu diam. Am niyij awiy, niyau akat kwinlondul.” (Yohan 10:16, 27) Inay adi antu akata kutesh chakin kamu ni kuziyil yilondilay Yesu, antu akata kwikal in kwilejend.
7. Ov yaku ik yifanyidinau kukudish in kwilej a Yesu?
7 Ov ngikadil ik yikwau yifanyidinay umwing ni umwing wa in kwilej a Yesu kukudish? Dizu dia Nzamb diakwil anch: “Chawiy chifanyidin en ulikany yaku yen yikur, mudjolany muntu mukur . . . Chad mudjalany muntu musu watangau mudi mudiay Nzamb mu kutentam kwakin ni mu kutumb.” (Efes 4:22-24) Afanyidin kukudish yaku yikata kukasikesh uumwing wa atushalapol a Nzamb—“rukat, ni musangar, ni chisambu, ni kushimpish kwa muchim, ni kudimuk, ni kuwap, ni win yakin, ni kwitudish, ni kwilam.”— Galatia 5:22, 23.
8. Ov chom ik chikuyishikena in chisak chipandikena kujimb pakwashinau chisak cha kashal?
8 Chisak chipandikena kujimb chikat kukwash kachisak kakemp ka antu akweta ruchingej ra mwiur, antu akata kutakel mudimu wa kulejan. (Mateu 24:14; 25:40) Amikoku akwau akat kupan ukwash winou ap anch awiy ij anch akez kuyizengol mulong kwinsambishil kwa machuku minam ma nsudiel, Kristu Yesu nau angel end ayopata Satan nau ayilembil end mwiur. Chinech charumburika “riyind kudi mangand . . . mulong Sakudimban washirik kal wezil kudi en! Ujimen nakash, mulong wij anch chisu chend chashal kal chikemp.” (Kujingunik 12:7-12) Mwamu, Satan ukat kuvudish rupompat pantaliken nau atushalapol a Nzamb payila ni kusejin nsudiel ya ditenchik dined piswimp.
9. Atushalapol a Nzamb akat kuwin nchik mu kulejan rusangu ruwamp, ni mulong wak?
9 Kwikalap nchik kuzengol kukash, mudimu wa kulejan uyil kamu kurutu. Kusambish kusu ni tunan tukemp twa in kulejan kwisudiel kwa Njit ja Mangand I, kudi katat mamiliyon ma antu, mulong Yehova washilamu anch: “Ut wawonsu ukuchilau mulong wa kukurishish ukez kupandikanap bwat.” (Isay 54:17, NW) Ap nzuj umwing mu turubinal mujim wa in Yuda witiyija anch chitwishikinap kukangesh mudimu wa Nzamb. Wayileja Afaris a mu mivu chitot ya kusambish piur pa in kwilej anch: “Yilikishanyaku aya kwau! Anch yom yirijekinau ni yasadilau yidiokil kudi antu, yikez kujiy. Pakwez anch yidiokil chakin kudi Nzamb, kiukutwishanyip kuyikangesh. Palemp ap wez warishany nend Nzamb.”—Midimu 5:38, 39.
10. (a) Ov “chijingidij” pa mpal ya antu a mu chisak chipandikena kujimb chirumburikin ik ? (b) Ov mutapu ik uziyidilau atushalapol a Nzamb ku ‘dizu didiokila mwiur’?
10 Antu a mu chisak chipandikena kujimb ayimekeshin mud atekinau chijingidij mulong wa dipandish. (Ezekiel 9:4-6) “Chijingidij” udi uman wakwel anch awiy ipanin kud Yehova, ababatishinau mud in kwilej a Yesu, ni ikasikeshina kukudish untu wa Kristu. Akat kuziyil ‘dizu didiokila mwiur’ dilondila piur pa want wa relijon wa makasu wa Satan udia pa mangand mawonsu anch: “Antwam, diokalany mu musumb winou, palemp ap niyen wez wasalany yitil pamwing nendendiy, chad kand, ap niyen wez wakwachikany ku yipupu yimudjibwidilau ndiy.”—Kujingunik 18:1-5.
11. Ov mutapu ik ujim ukatau kumekesh antu a mu chisak chipandikena kujimb anch adi atushalapol a Yehova?
11 Chikwau kand, Yesu wayileja in kwilejend anch: “Anch niyen wakatijanany mwamu, chawiy antu awonsu akez kwijik anch, en udiany in kwilejam.” (Yohan 13:35) Pakwez, yid ya marelijon ma mangand minam yikat kuyijip akwau mwi njit, chisu chivud mulong kusu adi a michid kushalijan! Dizu dia Nzamb dilondil anch: “Mwamu tukutwish kujingunin patok an a Nzamb ni an a Sakudimban. Muntu mwawonsu wakad kusal yom yitentamina kadiap mwan a Nzamb, chawiy chimwing kand, ni muntu mwawonsu wakad kumukat mwanamakwend. . . . Chifanyidin tukatijanangany muntu ni mukwau. Kitufanyidinap kwikal mudi Kain watakelau kudi Sakudimban, chad wamujip mwanamakwend Abel.” —1 Yohan 3:10-12.
12. Pa chisu cha mar makash mapandikena , ov mutapu ik ukusalay Yehova nich ‘mitond’ ya chirelijon yikata kusong mabuj mayimp?
12 Yesu walonda anch: “Mutond uwamp ukat kusong mabuj mawamp, pakwez mutond uyimp ukat kusong mabuj mayimp. Mutond uwamp kiukutwishap kusong mabuj mayimp, ap mutond uyimp kiukutwishap kusong mabuj mawamp. Mutond wawonsu wakad kusong mabuj mawamp, akuukatul ni kuudjibul mu kasu. Chawiy ukez kuyijikinany aruu a makasu ku yisalijok yau.” (Mateu 7:17-20) Marelijon ma mangand masongin mabuj mayijikishina mud ‘mitond’ yiyimp, yidia piswimp ni kuyikatul kud Yehova ku mar makash mapandikena.—Kujingunik 17:16.
13. Ov mutapu ik umekeshina chisak chipandikena kujimb anch chidi kamu mu uumwing ‘chimanyidinau kurutu kwa ditand’ dia Yehova?
13 Kujingunik 7:9-15 upwitidin yitongijok ku yom yikeza kushikij ku kupand kwa chisak chipandikena kujimb. Awiy ameken inungina awonsu mu uumwing “chimanyidinau kurutu kwa ditand” dia Yehova, nich kuchidij ukaleng wend wa mwiur ni wa panap pansh. Awiy “atutin kal ankandj au ni kuyitokish mu mash ma Mwan a mukoku,” end amekesh anch awiy onganyidin yakupesh ya Yesu yidioshina chitil. (Yohan 1:29) Ipana kal ayinau kud Nzamb ni kumekesh kwipan kwau kusutin ku dibabatish dia mu mem. Chawiy lel, akwet ngikadil yishitwila kurutu kwa Nzamb, yifanikeshinau nich ankandj atok, ni akat kumusadil ndiy ‘muten ni uchuku mudimu utumbila.’ Ov kudi mitapu ukutwisha kulet mwom wey wisikana sens nich yirumburilau pinap?
Yiyukish Katat
14. Ov yisu yimwing ya yiyukish ya pakampwil yikwetau atushalapol a Yehova kudiosh kamu katat?
14 Chakin, wamen kal yiyukish ya pakampwil kudiosh kamu ap katat yitambwilau antu akata kumusadil Yehova. Chilikej, piwileja piur pa rutong ritentamina ra Yehova, watesha anch kwadinga ruchingej risangareshina mulong wa machuku ma kurutu. Chawiy lel katat ukwet rutong ra kashinsh mu mwom—kumusadil Nzamb wakin nich ruchingej ra musangar ra mwom wa chikupu mu paradis wa panap pansh. Mwaning, Mwant Yesu Kristu “ukez kuyitwal [chisak chipandikena kujimb] ku misul ya mem ma mwom.”—Kujingunik 7:17.
15. Ov ukwash ik utaninau Atuman’a Yehova kusutil mu kulam yijidik ya Baibel piur pa milong ya chipolitik ni milong ya mwikadil wa kwishitul?
15 Chiyukish chimwing chipandikena kuwap chikwetau antu a mu chisak chipandikena kujimb ridi rukat, uumwing, ni kwovijan kudia pakach pa atushalapol a Yehova mu mangand ma kabuj. Chitudila etu awonsu yakudia ya muspiritu ya chilik chimwing, tukat kuziyil etu awonsu ku yijil yimwing ni yany yimwing yidia mu Dizu dia Nzamb. Chawiy lel tudiap in kwiyauril nich milong ya chipolitik ap yitongijok ya muchid. Chikwau kand, tulamin yany ya mwikadil wishitwila witinay Nzamb kud antwend. (1 Korint 6:9-11) Mwamu, pa ndond pa kupwitijan, kwiyauril, ni masandj yipalangedina mu mangand, antu a Yehova akwet yitukutwisha kutazuk anch paradis wa muspiritu. Shinshikin mutapu umurumburilau mu Isay 65:13, 14, NW.
16. Kwikalap nchik yikokujol yikata kushiken mu mwom, ov ruchingej ik rikwetau antu a mu chisak chipandikena kujimb?
16 Bwat, atushalapol a Yehova kadiap antu awanyidina. Ni yawiy akweting yikokujol ya mwom yidia mu mangand minam, mud kuman mar ap kushadish mapit ap mwom pakad mulong mu jinjit ja michid. Akat kuyelang, amening mar, ni rufu. Pakwez akwet ritiy anch mu mangand masu, Nzamb “ukez kuyikusol mansoj mawonsu ku mes mau. Kukez kwikalap kand rufu, ap madil, ap kwishikokin, ap kusansan.”—Kujingunik 21:4.
17. Kwikalap nchik yikutwisha kutushiken katat, ov machuku ma kurutu ik mapandikena kuwap mayichingedina antu akata kumwifukwil Nzamb wakin?
17 Ap anch washadish katat mwom wey mulong wa upal, mayej, chak kanang, ap mulong wa kuzengol, Yehova ukez kukuvumbwil ku mwom mu Paradis. (Midimu 24:15) Chad lel ukez kudandamen kusanger musambu wa muspiritu mu chirung cha Winyikel wa Mivu Kanan wa Kristu. Rukat rey mulong wa Nzamb rikez kujimb nakash piumena kushiken kwa uyaj kwa jintong jend. Ni yiyukish ya ku mujimbu yikezay kulet Yehova yikez kuwejin ku kujimb kwa rukat rey kudiay ndiy. (Isay 25:6-9, NW) Madi machuku ma kurutu mapandakena kuwap mud ik mayichingedina antu a Nzamb!
Misamb ya Kuchirikin
• Ov chinship ik chipandikena kuwap chisambidinay Baibel piur pa chisak chipandikena kujimb?
• Ang tusotin chakin kwikal pakach pa antu a mu chisak chipandikena kujimb chitapidila dilau dia Nzamb, ov chom ik tufanyidina kusal katat?
• Yiyukish yisangeridinau katat antu a mu chisak chipandikena kujimb ni yikwikalau nich mu mangand masu ma Nzamb yikwet usey ik kud ey?
[Chipich chidia pa paj wa 123]
Mamiliyon ma antu a mu chisak chipandikena kujimb akat kumwifukwil Nzamb wakin mu uumwing