Achindilau Ku Kuwanyin Mulong Wa Kuyitwal Ku Musul Wa Dijiy Dia Mem Ma Kupand
“Mwan a mukoku . . . Ukez kayitwal ku musul wa dijiy dia mem ma kupand.”—KUBUR. 7:17.
1. Mutapu ik Dizu dia Nzamb dijingunin in Kristu azizidilau many, ni Yesu wayinkisha chisend ik?
DIZU DIA NZAMB dijingunin in Kristu azizidilau many akweta yisend ya yisakin ya Kristu pa divu mudi “kashalapol ushishamena ni kubabal.” Chisu chezay Kristu kumushinshikin “kashalapol” mu muvu wa 1918, ndiy wayitana azizidilau many inay adia pa divu kwikal ashinshamena mu kupan “yakudia [ya muspiritu] pa chisu chau.” Chawiy lel, Yesu, Mwant, wasangera kuyitek “piur pa yom yend yawonsu.” (Tang Mateu 24:45-47.) Mu mutapu winou, kurutu atambula uswan wa mwiur, azizidilau many ayisadidin in kumwifukwil Yehova akwau adia pa divu.
2. Lejan yom yikwetay Yesu.
2 Mwant ukweta ulabu pa yom yend yawonsu ap yikwetay, ni ukutwish kuyisadil mu mutapu usotinay. Mu yom yikwetay Yesu Kristu, Mwant wadishau want kudi Yehova, mudi yisakin yawonsu ya Want yidia pa divu. Kuwejaku ni “chisak chipandikena kujimb” chamanay kambuy Yohan mu chishimushimu. Yohan ulejen chisak chipandikena kujimb anch: “Naman ni kushinshik chisak chipandikena kujimb, chakad kutwish kuchind kudi muntu, mupwidil michid yawonsu ni majuku mawonsu, antu a mangand mawonsu ni jindim jawonsu, iminy kurutu kwa nkwas ni kurutu kwa Mwan a mukoku, adjit maswin matok to, nich malal ma mabu mu makas mau.”—Kubur. 7:9.
3, 4. Mutapu ik antu adia mu chisak chipandakena kujimb ayinkishin chisend chijim?
3 Yid ya chisak chijim yidi pakach pa antu atazukau kudi Yesu anch “amikoku [end] akwau.” (Yohan 10:16) Ruchingej rau ridi ra kushakam chikupu mu paradis pa divu. Akwet ruchingej anch Yesu “ukez kayitwal ku musul wa dijiy dia mem ma kupand” ni anch “Nzamb ukez kayikuswol mansoj ku mes mau.” Nich yiney mu manangu, awiy “oyishish kal maswin mau to-o, ayitokishish mu mash ma Mwan a mukoku.” (Kubur. 7:14, 17) Atekin ritiy mu chakupesh cha Yesu, ni mwamu akwet ‘maswin matok’ ku mes kwa Nzamb. Ayitazukin anch adi in kutentam mudi arund nend Nzamb, mudi Abraham.
4 Chikwau kand, mulong chisak chipandakena kujimb cha amikoku akwau chiyil ni kuvulijan achimen kudi Nzamb anch chitentamin, chikutwish kuchingejin anch chikupand ku kusheshik kwa ditenchik dia yom ku “mar mapandakena.” (Yak. 2:23-26) Akutwish kumushejin Yehova, ni mudi chisak, akwet ruchingej ramushena ra kupand ku Armagedon. (Yak. 4:8; Kubur. 7:15) Kasadinap yisotinau pakwez asadin mu wintakel wa Mwant wa mwiur ni akadivar nend azizidilau many adia pa divu.
5. Mutapu ik antu adia mu chisak chipandakena kujimb ayikwashin akadivar nau in Kristu azizidilau many?
5 In Kristu azizidilau many atana ni akudandamen kutan rupompat rikash mu mangand ma Satan. Chikalap nchik mwamu, akutwish kuchingejin ukwash wa arund nau adia mu chisak chipandakena kujimb. Pakatau kukep uvud wa in Kristu azizidilau many katat, chisak chipandakena kujimb chivulijadin yitot ya tunan muvu ni muvu. Azizidilau many akutwish kulam muntu ni muntu umwing wa yikumangan 100 000 ya in Kristu mu mangand mawonsu. Chawiy lel, mutambu umwing wa ukwash utambwilau azizidilau many kud amikoku akwau udi anch antu awanyishina yitinau adia mu chisak chipandakena kujimb asadil mudi amakurump a chikumangen. Ayikwashin kulam tunan twa in Kristu tumuchingejina katat “kashalapol ushishamena ni kubabal.”
6. Mutapu ik atakela kulejan ukwash utambwilau in Kristu azizidilau many kudi arund nau amikoku akwau?
6 Ukwash wa kwisotil uyinkishinau in Kristu azizidilau many kudi akadivar nau amikoku akwau atakela kuulejan kudi muprofet Isay. Ndiy wafunda anch: ‘[Yehova] uyilejin in Isarel anch: In mudimu akad difut in Idjibit, ni in Etiopi akez kikal enen. Antu alemp a ku Saba akez kikal aswik en, akez kwendil kwinyim kwen.’ (Is. 45:14) Mu chifanikesh, in Kristu akweta ruchingej ra kushakam pa divu nlel unou endil kwinyim kwa chisak cha kashalapol uzizidilau many ni chisak chend chitakedila, mu kulondul umutakel wau. Mudi ‘in mudimu akad difut,’ amikoku akwau asadidil usu wau ni mapit mau ni muchim wawonsu mu kukwash mudimu wa kulejan pa mangand mawonsu wapanay Kristu kudi in kwilejend azizidilau many adia pa divu.—Midimu 1:8; Kubur. 12:17.
7. Ov, chisak chipandakena kujimb achifumbin mulong wak?
7 Pakatau kuyikwash akadivar nau azizidilau many, yid ya chisak chipandakena kujimb ayifumbin chakwel ikala mufulandal wa chisak chisu cha antu chikwikalaku kupwa kwa Armagedon. Mufulandal ufanyidin kwikal ukash ni wakad kunyikek, ni yid yau yifanyidin kwisotil ni kutwish kulondul wintakel wa Mwant. Mwin Kristu ni mwin Kristu amwinkishin chisu cha kumekesh anch akutwish kumusadil kudi Mwant, Kristu Yesu. Mu kutek ritiy ni kumekesh kushinshaman katat, umekeshin anch ukwitiyij pakezay Mwant kumutakel mu mangand masu.
Chisak Chipandikena Kujimb Chimekeshin Ritiy Rau
8, 9. Mutapu ik antu a mu chisak chipandakena kujimb amekeshin ritiy rau?
8 Amikoku akwau arund nend a chikumangen cha in Kristu azizidilau many amekeshin ritiy rau mu mitapu kushalijan. Cha kusambish, ayikwashin azizidilau many mu kulejan rusangu ruwamp ra Want wa Nzamb. (Mat. 24:14; 28:19, 20) Cha kaad, aziyidil ayinau nich kwisotil ku wintakel wa Chisak Chitakedila.—Heb. 13:17; tang Zakariy 8:23.
9 Cha kasatu, yid ya chisak chipandakena kujimb yiyikwashin akadivar nau azizidilau many kusutil ku kashakam kwambatan nich yijidik yitentamina ya Yehova. Ikasikeshin kukudish “rukat, musangar, chisambu, kushimpish muchim, kudimuk, kuwap, kujijaman, kwitudish, kwishitul.” (Gal. 5:22, 23) Nlel unou, antu avud kakutwishap kumekesh mikadil yiney, pa ndond pa kumekesh ‘midimu ya mbij.’ Chikwau kand, yid ya chisak chipandakena kujimb yakwata kal mupak wa kwipuk “kusotan, kwijond, ris, akish, kubauk, jinkuny, kuchirilan, mukau, maujim, kwaurik, ntad, matend, ni kukatuk, kukwachik kwa maruvu, kukishan, ni yom yikwau yidia mwamu.”—Gal. 5:19-21.
10. Ov, mupak ik ukwatinau yidi ya chisak chipandikena kujimb?
10 Mulong tudi akad kuwanyin, chikutwish kukasikan kumekesh dibuj dia spiritu, kwipuk mudimu wa mbij, ni kurish nich yikokujol yikasikeshinau kudi mangand ma Satan. Chikalap nchik mwamu, twakwatin kal mupak wakwel kangal twalikidil kuziy kudiokila ku kuziok kwetu, kukangany pwa chisu chimwing, ap mayej yipwisha usu wa ritiy retu ap yikepisha rukat retu kudi Yehova. Twij anch Yehova ukez kusal mudi mwashilayimu—chakwel kulam mwom wa chisak chipandakena kujimb pa chirung cha mar mapandakena.
11. Ov, milad ik yasadilay Satan mu usu wend chakwel aziyisha ritiy ra in Kristu?
11 Ap mwamu, tudandamedin kwilam mulong twij anch mukankuny netu wakin udi Djabul, ni kakutwishap kulik mu mutapu uswapela. (Tang 1 Pita 5:8.) Ndiy wapakisha kuyisadil in kupumbwok ni antu akwau chakwel atuleja anch malejan metu madi ma makasu. Pakwez, mulad wa kusadil winou ukat kukanganyang. Chilik chimwing, ap anch kuzengol kwading kukat kukangesh mudimu wa kulejan, pakwez yisu yivud kwakasikesha ritiy ra antu azengolau. Pa chinech, Satan udandemedining kusadil mulad umwing wijay anch ukutwish nawamp kuziyish ritiy retu. Ukat kusadil yovil ya kuziy. In Kristu a mu mivu chitot ya kusambish ayibabesha mulong wa chak chinech pa yilejau anch: ‘Tongijokany padiay ndiy [Kristu] wasuta mu kutadikijan kwa akayitil’ Mulong wak? “Chakwel en kangal uziyany ni kukangany ku mipim yen.”—Heb. 12:3.
12. Mutapu ik chiyul cha Bibil chayikasikeshin antu aziyina?
12 Ov, wiyovil kal mudi usotil kulik kumusadil Yehova? Ov, wiyovil kal yisu yimwing anch ukangeny? Anch chidi mwamu, kangal wamulikidil Satan asadila yovil yiney mulong akukangesha kumusadil Yehova. Kwilej nakash Bibil, malembil makash, kukumangan pakad kujing ni urund pamwing ni ambay netu mu ritiy yikez kukukasikesh ni kukulam chakwel ulika ‘kushadish kujijaman kwey.’ Yehova washilamu anch ukuyikwash antu amusadidila kuchirish kand usu, ni kushilamu kwend kudi kwakin. (Tang Isay 40:30, 31.) Dandamen kuta muchim wey pa mudimu wa Want. Ipuk kuzuwol kushadishininga chisu, ni tang muchim pa kuyikwash antu akwau. Chawiy lel ukez kwikal ukasikeshinau chakwel ujijamana chikalap nchik kuziy.—Gal. 6:1, 2.
Akupandisha ku Mar Makash ni Kwandam mu Mangand Masu
13. Ov, mudimu ik uyichingedina antu akupanda ku Armagedon?
13 Kupwa kwa Armagedon, antu avud akad kutentam akuvumbuka akuswir kwilej jinjil ja Yehova. (Midimu 24:15) Akwikal nich kuswir kwa kwilej piur pa chakupesh cha Yesu; kupwa kand, afanyidin kwilej kutek ritiy mu chakupesh chinech chakwel atambula yiyukish yach. Akez kuswiridin kudjibwil kulemp yitongijok ya relijon wa makasu ni kulik mwikadil wa mwom wa pasak. Afanyidin kwilej kumudjal muntu musu uyijikishina in Kristu akin. (Ef. 4:22-24; Kol. 3:9, 10) Amikoku akwau akupanda pa chisu chinicha akwikal ni mudimu ukash wa kusal. Kukwikal musangar mudi ik wa kumusadil Yehova mudimu winou, wakad yikokujol ni kuzuwol kwa mangand minam mayimp!
14, 15. Lejan yom yikezau kwisamb pakach pa antu akupanda ku mar makash ni antu atentamina akuvumbuka.
14 Atushalapol a Yehova afila kurutu kwa mudimu wa Yesu pa divu akwikal ni awiy nich yivud ya kwilej pa chisu chinicha. Akez kwilej chidiay Mesia wa kushilamu, wadingau ni kuchingel pa chisu chilemp pakad ap kumuman. Padingau aom, amekesha rusot rau ra kuyilej kudi Yehova. Tongap bil ukwikal musangar ni katumb mud ik pa kuyikwash—chilakej, kumurumburil Daniel kuwanyin kwa uprofet wafunday pakad kutesh kurumburik!—Dan. 12:8, 9.
15 Chakin kamu ap anch antu akuvumbuka akwilej yom yivud kudi etu, tukwikal nich yipul yivud ya kuyipul. Akutwish kutulej yinship yidia mu Bibil yakad kulejan kachom pa kachom. Tongin mutapu chikwikal chikasikeshina mud ik pa kwilej kachom pa kachom pakampwil piur pa Yesu kusutil mwanamakwend Yohan Mubabatish! Yom tukwileja kudi atuman inay ashinshamena yikez kutwinkish chovu chikash cha Dizu dia Nzamb kupandakanamu chitukweta katat. Atushalapol ashinshamena a Yehova afila—kuwejaku ni antu a mu chisak chipandakena kujimb afila mu machuku ma nsudiel—akez kutan “disanguk dipandikena kuwap.” Asambisha kumusadil Yehova mu mangand mayikedilay Satan. Akwikal nich musangar mudi ik wa kudandamen mudimu wau mu mikadil yiwamp nakash mu mangand masu!—Heb. 11:35; 1 Yohan 5:19.
16. Kwambatan nich uprofet, ov, Dichuku dia Dirumburish dikusadik mutapu ik?
16 Pa chisu chimwing pa chirung cha Dichuku dia Dirumburish, akez kuburil mivungur. Pamwing ni Bibil, yikez kwikal mufulandal mulong wa kuyirumburish aom awonsu anch afanyidin kutambul mwom wa chikupu. (Tang Kuburik 20:12, 13.) Kwinsudiel kwa Dichuku dia Dirumburish, muntu ni muntu ukwikal nich chisu cha kumekesh kumutambu udiay pantaliken ni mulong wa ukaleng wa mangand mawonsu. Ov, ukez kuziyil ku Want wa Nzamb ni kulik chakwel Mwan a mukoku amutwala ku “musul wa dijiy dia mem dia kupand”? Ap ukez kubwambwil, mu kulik kuziyil amwinend ku Want wa Nzamb? (Kubur. 7:17; Is. 65:20) Kupwa, antu awonsu pa divu akwikal nich chisu cha kukwat mupak muntu ni muntu ipend, pakad kwikal ubachikinau kudi chitil chaswanay ap mwikadil uyimp. Kwikil muntu ukutwisha kwidjidjek piur pa kutentam kwa dirumburish dia nsudiel dia Yehova. Ching kusu antu ayimp awiy akezau kushesh chikupu.—Kubur. 20:14, 15.
17, 18. Ov, in Kristu azizidilau many ni amikoku akwau achingejin Dichuku dia Dirumburish nich musangar ik?
17 Nlel unou, in Kristu azizidilau many, achindau kuwanyin kutambul Want, achingejin nich mushiku kutakel pa Dichuku dia Dirumburish. Akwikal nich chisend chijim mudi ik! Ruchingej rikash riyikasikeshin kulondul chiyul cha Pita chapanay kud akadivar nau a mu mivu chitot ya kusambish anch: “Wejanyiku kutentam, ni kujamish kutazuk kwen ni kutond kwen; mulong anch wasalany yom yiney kiukez kipwakalanyip. Mulong wa chinech akez kaninkishany kwandam mu want wa chikupu wa Nsalejetu ni Mupandish Yesu Kristu.”—2 Pi. 1:10, 11.
18 Amikoku akwau asanger pamwing ni akadivar nau azizidilau many. Akwatin mupak wa kuyikwash. Chidiau arund nend Nzamb nlel unou, ayikasikeshin kusal usu wau wawonsu mu mudimu wa Nzamb. Pa chirung cha Dichuku dia Dirumburish, akusanger kupan ukwash nich muchim umwing ku yitenchik ya Nzamb payitwadilau kudi Yesu ku musul wa dijiy dia mem ma kupand. Chawiy lel—kwinsudiel— akwikal achindilau kuwanyin mulong wa kwikal atushalapol a pa divu a Yehova chikupu ni chikupu!—Rom. 8:20, 21; Kubur. 21:1-7.
Ov, Uvurikin?
• Ov, Yom ik yikwetay Yesu?
• Ov, mutapu ik antu adia mu chisak chipandakena kujimb uyikwashinau akadivar nau azizidilau many?
• Ov, antu adia mu chisak chipandakena kujimb asangaredin yisend ni ruchingej ik?
• Ov, mutapu ik umena Dichuku dia Dirumburish?
[Chipich chidia pa paj wa 25]
Antu a mu chisak chipandakena kujimb owishin kal maswin mau to-o, amatokishish mu mash ma Mwan a mukoku
[Chipich chidia pa paj wa 27]
Chom ik uchingejina kwilej kudi antu ashinshamena akuvumbuka?