Achindilau Kuwanyin Kwandam Mu Want

“Yom yiney yidi chijingidij cha kurumburish kwa Nzamb kutentamina, chakwel akunichindilany ku kuwanyin kwa kwandamin mu want wa Nzamb.”—2 TES. 1:5.

1, 2. Ov, rutong ra Nzamb ridi risu piur pa kurumburish, ni nany ukeza kurumburish?

KAMBUY Paul wading mu Aten, piswimp mu muvu wa 50 mu C.C., kambuy. Wajimana pamanay mutapu upalangena ndond yawonsu difukwil dia akish kwinikwa, chawiy chamubachika apana uman ujim nakash. Ndiy walonda mazu mend makash nich mazu mapwita manangu ma in kumutesh end akad ritiy. Ndiy walonda anch: “katat [Nzamb] wamekesh kal kudi antu chakwel awonsu ku mitambu yawonsu akarumuka. Mudi mwatonday kal dichuku dia kurumburish mangand mu kutentam kudi muntu wijikishay, chawiy kand ndiy wapana kal chijikish kudi antu awonsu mwamulangwishay mu kufa.”—Midimu 17:30, 31.

² Chidi cha usey mudi ik kutongijokin pa mutapu watekay kal Nzamb dichuku kurutu oku dikezay kuyirumburish antu! Muntu walikay Paul kujimbul mu diskur diend diasalay ku Aten pakwez utwija etu anch ndiy Yesu Kristu wasanguka, ndiy ukeza kurumburish. Dirumburish dikezay Yesu kurumburish dikez kwikal mwom kudi amwing ni rufu kudi akwau.

3. Mulong wak Yehova waswikay manswik ni Abraham, ni nany wasala mudimu wa pakampwil mulong wa kumawanyish?

³ Dichuku dined dia Dirumburish dikwikal dia mivu 1000. Yesu ukez kuyikel mu mivu yiney mu dijin dia Yehova mudi Mwant wa Want wa Nzamb, pakwez kakez kikalap amwinend. Yehova utondin antu akwau pakach pa antu chakwel ayikela pamwing ni Yesu ni akurumburish mu mivu kanan yiney. (Isikej nich Luka 22:29, 30.) Pasutin kal piswimp mivu 4 000, Yehova wateka mufulandal wa Dichuku dia Dirumburish pasukay manswik ni kashalapol wend ushinshamena Abraham. (Tang Disambishil 22:17, 18.) Manswik minam masambisha kusal mu muvu wa 1943 K.C.C. Chakin kamu, Abraham katwishap kutesh nawamp chirumburikina kamu manswik minam mulong wa antu. Pakwez, etu ilel unou, tukutwish kujingunin anch mu manswik minam ma Abraham, mbut ya Abraham yasala mudimu wa pakampwil mulong wa kuwanyish rutong ra Nzamb ra kuyirumburish antu.

4, 5. (a) Ov, nany udia chid cha kusambish cha mbut ya Abraham, ni chom ik chalonday piur pa Want? (b) Chisu ik chasambisha ruchingej ra kwikal chid cha ditenchik dia Want?

⁴ Chid cha kusambish cha mbut ya Abraham cheza kwikal Yesu, muntu wazizilau many ma spiritu utumbila mu muvu wa 29 C.C. ni wikala Mesia washilaumu, ap anch Kristu. (Gal. 3:16) Yesu wasutisha mivu yisatu ni chikunku mu kuulej muchid wa Ayuda rusangu ruwamp ra Want. Kwinyim kwa kumukas Yohan Mubabatish, Yesu walejana anch antu akwau akez kuchingejin kwikal mu Want winou palonday anch: “Kudiokal ku machuku ma Yohan Mubabatish ni katat ou want wa mwiur ukat kwezang ku kwisum, ni in kuubwitan akat kuubwitan ku kwisum.”—Mat. 11:12.

⁵ Cha musangar, pinipa kamu kurutu isambina piur pa antu akeza ‘kubwit’ Want wa mwiur, Yesu walonda anch: “Chakin kamu nakulejany anch, pakach pau avalau kudi amband, kikwadingap mukwau umupandaken Yohan Mubabatish kujimb, pakwez ching kikepishidila mu want wa mwiur kawiy kamupandakenamu ndiy kujimb.” (Mat. 11:11) Mulong wak walonday mwamu? Mulong ruchingej ra kwandam mu ditenchik dia Want diading kand kal disambisha kudi antu ashinshamena djat ni pa yizizidilau many ma spiritu utumbila ku Pentekot wa mu muvu wa 33 C.C. Pa chisu chinicha Yohan Mubabatish wading wafil kal.—Midimu 2:1-4.

Mbut ya Abraham Ayela Anch Yitentamin

6, 7. (a) Mu mutapu ik mwela mbut ya Abraham kwikal “mudi atutumbu a mwiur”? (b) Ov, chiyukish ik chatambulay Abraham, ni chiyukish ik chifanikena nich chitambwila mbut yend?

⁶ Amuleja Abraham anch mbut yend yikez kuvulijan ni yikwikal “mudi atutumbu a mwiur” ni mudi usukuril udia ku chikum cha karung. (Dis. 13:16; 22:17) Chirumburikin anch, pa chirung cha Abraham chading chikasiken kudi antu kwijik uvud wa mbut yend. Pakwez, ashikena mu kulejan uvud win kamu wa mbut yend ya muspiritu. Kuwejaku padi Yesu, uvud wading 144000.—Kubur. 7:4; 14:1.

⁷ Mulong wa ritiy ra Abraham, Dizu dia Nzamb dilondil anch: “Abram wamwitiyija [Yehova], niyend [Yehova] wamuchindila mudi mudia kutentam kwend.” (Dis. 15:5, 6) Chakin, kwikiling muntu utentamina chakin kamu. (Yak. 3:2) Chikalap nchik mwamu, mulong wa ritiy rikash ra Abraham, Yehova washakama nend mudi utentamina ni wamutazuka anch murund nend. (Is. 41:8) Antu adia mbut ya muspiritu pamwing ni Yesu ni awiy ayitazukin anch atentamina, ni chinech chiyinkishin yiyukish yijim kupandakanamu yatambulay Abraham.

8. Ov, yiyukish ik yikwetau yid ya mbut ya Abraham?

⁸ In Kristu azizidilau many ayitazukin anch atentamin mulong itiyijin difut dia chakupesh cha Yesu. (Rom 3:24, 28) Kurutu kwa Yehova, kakwetap chitil ni akutwish kuyizizil many ma spiritu utumbila chakwel ikal an a muspiritu a Nzamb, akadivar a Yesu Kristu. (Yohan 1:12, 13) Andamin mu manswik masu ni asal muchid usu wa “Isarel wa Nzamb.” (Gal. 6:16; Luka 22:20) Chisend chamushena mudi ik chidiokila ku yom yiney yawonsu! Mudi chibudikin cha yisal yiney yawonsu yiyisadidinau kudi Nzamb, in Kristu azizidilau many kachingejinap kushakam chikupu panap pansh. Alikin ruchingej riner mulong wa musangar upandakenamu kujimb wa kusal pamwing ni Yesu pa Dichuku dia Dirumburish ni kuyikel pamwing nend mwiur.—Tang Rom 8:17.

9, 10. (a) Chisu ik chayizizidilau in Kristu akusambish many ma spiritu utumbila, ni yik yadinga yiyichingedin kurutu? (b) Ov, ukwash ik watambulau in Kristu azizidilau many?

⁹ Pa Pentekot wa mu muvu wa 33 C.C., kachisak ka antu ashinshamena itapila dilau ikal pakach pa antu akuyikela ni Yesu pa Dichuku dia Dirumburish. In kwilej a Yesu piswimp 120 ayibabatisha nich spiritu utumbila ni ikala in Kristu akusambish azizidilau many. Pakwez, chom chinech chadinga nsambishil kusu kudi awiy. Kudiosh pinapa ni kuya kurutu, chayifanyidina kumekesh kushinshaman kwau kudi Yehova chikalap nchik kupakiu kwawonsu kudiokila kudi Satan. Chayifanyidina kand kushinshaman ni kushik ku rufu anch ading asotil kutambul chibangul cha mwom wa mwiur.—Kubur. 2:10.

¹⁰ Pa chinech, kusutil ku Dizu diend ni ku chikumangen cha Ukristu, Yehova wayinkisha in Kristu azizidilau many chiyul ni dikasikesh yadinga yiswiridinau. Chilakej, kambuy Paul wayifundina in Kristu azizidilau many a ku Tesalonik anch: “Mudi mukat kusalay tatuku kudi anend, twadi nikunibabesh ni kunikasikesh ni kunilej, chakwel en wendany ni kufanyin kwa Nzamb watutazukanya ku want wend ni uyaj wend.”—1 Tes. 2:11, 12.

11. Ov, mikand ik yafundishay Yehova mulong wa yid ya “Isarel a Nzamb”?

¹¹ Mu kusut kwa makum ma mivu kupwa kwa kuyitond yid ya kusambish ya chikumangen cha in Kristu azizidilau many, Yehova wamana usey wa kufundish rusangu ra chikupu ra mudimu wasalay Yesu pansh ni ra chiyul chayiyulay in Kristu azizidilau many a mu chitot cha kusambish. Chawiy lel, Yehova wawejaku mikand yapepilau ya Grek ku mikand yapepilau ya Hebreu yadingaku kal. Mikand ya Hebreu ayifunda bil cha kusambish mulong wa muchid wa Isarel wa mujimbu pa chisu chiwadinga ni urund wa pakampwil ni Nzamb. Mikand ya Grek ya win Kristu ayifunda bil cha kusambish mulong wa “Isarel a Nzamb,” antu azizidilau many mudi akadivar a Kristu ni an a Nzamb a muspiritu. Chakin kamu, chom chinech chilejenap anch antu akad kwikal in Isarel kakutaninamwap mu kwilej Mikand ya Hebreu. Chilik chimwing, in Kristu akadiau kuzizil many ma spiritu utumbila atanyidinamu yiyukish yivud mu kwilej ni kushakam kwambatan nich yiyul yidia mu Mikand ya Grek ya Ukristu.—Tang 2 Timote 3:15-17.

12. Paul wayivurisha in Kristu azizidilau many chom ik?

¹² In Kristu a mu mivu chitot ya kusambish ayela anch atentamin ni ayizizila many ma spiritu utumbila mulong wa kuyikwash atambul uswan wau wa mwiur. Kuyizizil kwau many kwayizambwishap piur pa ambay nau in Kristu azizidilau many pachidiau pa divu. Chakin kamu, in Kristu amwing akusambish avuramena chinech ni asambisha kukimb katumb pakach pa akadivar nau mu chikumangen. Chawiy chamubachika Paul ipula anch: “En wizwilany kal! Wikadilany kal ampich! Waswanany kal wakad etu! Mwawiy, ni yam novil ing en waswaninany kal chakwel ni yetu tukuswan kand nen.” (1 Kor. 4:8) Chawiy lel, Paul wayivurisha azizidilau many a pa chirung chend anch: “Kichidip mulong etu tudi ant piur pa ritiy ren; pakwez tudi in mudimu nen ku musangar wen.”—2 Kor. 1:24.

Kuwanyish Uvud Wasambelau Kulejan

13. Ov, kutondiu kwa azizidilau many kwaya kurutu mutapu ik kwinyim kwa muvu wa 33 C.C.?

¹³ In Kristu 144 000 azizidilau many kayitondap awonsu mu mivu chitot ya kusambish. Kutondiu kwau kwadandamena pa chirung chawonsu cha atwimbuy ni kupwa chimeken anch asambisha kuyitond pakemp-pakemp mu kusut kwa yitot ya mivu. Komb, kutondiu kwinoku kwadandamena mu yitot ya mivu yilondulijadina djat ni pa chirung chetu. (Mat. 28:20) Kwinsudiel, pasambishay Yesu kuyikel mu muvu wa 1914, yom yaya kurutu swa-swa.

14, 15. Chom ik chashikena pa chirung chetu kwambatan nich kutondiu kwa azizidilau many?

¹⁴ Cha kusambish, Yesu watokisha mwiur padioshayimu rupompat rin rawonsu pantaliken nich wintakel wa Nzamb. (Tang Kuburik 12:10, 12.) Kupwa wapwitina manangu mend pa kuyikumangej yid yishadilaku ya wintakel wa Want wend mulong wa kuwanyish uvud wa 144000. Kushik pakach pa mivu ya 1930, mudimu winou wading piswimp ni kupwa ni antu avud adinga itiyijina rusangu ruwamp rayilejau kadingap nich ruchingej ra kuya mwiur. Spiritu kayinkishap uman anch adi an a Nzamb. (Isikej nich Rom 8:16.) Ijingunina ayinau anch adi “amikoku akwau,” achingejina kushakam chikupu pa divu mu paradis. (Yohan 10:16) Chawiy lel, kupwa kwa muvu wa 1935 rutong ra mudimu wa kulejan rading ra kuchikumangej “chisak chipandikena kujimb,” cha antu amanay kambuy Yohan mu chishimushimu, akupanda ku “mar makash.”—Kubur. 7:9, 10, 14.

¹⁵ Chikalap nchik mwamu, mu kusut kwa mivu kudiosh mu mivu ya 1930, antu akemp ayitondin mulong wa kwikal nich ruchingej ra kuya mwiur. Mulong wak? Pamwing ap, akutwish ikal in ayiswinkena antu atazukau pakusambish afila kal mu ritiy. (Isikej nich Kuburik 3:16.) Paul wisambina antu ijay amwinend alika uyakin. (Filp. 3:17-19) Chad Yehova ukuyitazuk anany chakwel eza aswinkan? Chakin kamu, winou udi mupak wend amwinend. Chikwau, chimeken anch kakutwishap kuyitond antu asu akarumukina, pakwez ukuyitond antu—adia mudi in kwilej isamba nau Yesu patenchikay Chivurikish cha kusambish—amekeshina kal mu chilik kanang kushinshaman kwau.a—Luka 22:28.

16. Mulong wa azizidilau many, tujikitishin mulong wa chom ik, ni yik tukutwisha kwitiyij nich ruchingej?

¹⁶ Pakwez, chimeken anch, awonsu atondau mulong wa ruchingej ra kuya mwiur kudiosh 1930 kadiap mulong wa kuyiswinkan antu awila mu ritiy. Yehova utukasikeshin chakin kamu anch tukwikal nau in Kristu azizidilau many pakach petu mu machuku minam mansudiel ma ditenchik dined dia yom djat ni ku kusheshik kwa “Babilon mujim.”b (Kubur. 17:5) Tufanyidin kwikal nich kashinsh anch uvud uwanyidina wa yid ya in 144 000, Yehova ukez kuuwanyish pa chisu chau ni awonsu akez chakin kamu kusambish kuyikel mu winyikel wa Want. Tukutwish kwitiyij kand Dizu dia uprofet disambidina kujimb kudandamedina kwa chisak chijim dikudandamen kumekan anch didi diakin. Piswimp ap chikez ‘kudiokal mu mar makash’ ma kushikena mangand ma Satan ni chikez kwandam nich musangar mu mangand masu ma Nzamb.

Winyikel wa Mwiur wa Nzamb Wawanyidin Kal!

17. Kwambatan nich 1 Tesalonik 4:15-17 ni Kuburik 6:9-11, chom ik chayishikena in Kristu azizidilau many afa ashinshamena?

¹⁷ Kudiosh muvu wa 33 C.C., makum ma tunan twa in Kristu azizidilau many amekesha ritiy rikash ni ajijamana nich kushinshaman kushik ku rufu. Antu inay ayichindin kal ku kuwanyin kwa kwandamin mu Want—chimeken kwasambisha kamu mu machuku ma kwikalaku kwa Kristu—ayiyukisha nich kuyinkish matapish mau ma mwiur.—Tang 1 Tesalonik 4:15-17; Kuburik 6:9-11.

18. (a) Ruchingej ik rikwetau azizidilau many adia pansh? (b) Amikoku akwau ayimen mutapu ik in Kristu azizidilau many?

¹⁸ Azizidilau many achidia pa divu akwet ruchingej anch, ang ashinshaman, piswimp ap akutambul matapish mau mulong wa kushinshaman kwau. Tunan twa amikoku akwau, pamenau ritiy ra akadivar nau azizidilau many, itiyijin mazu ma kambuy Paul, walonda piur pa akadivar azizidilau many adinga ku Tesalonik anch: “Etu ayinetu tukwitumbishil mu en mu yikumbu ya Nzamb, mulong wa kudandamen kwen, ni ritiy ren mu yakamish yen yawonsu, ni mu mar miwitiyilanaya. Yom yiney yidi chijingidij cha kurumburish kwa Nzamb kutentamina, chakwel akunichindilany ku kuwanyin kwa kwandamin mu want wa Nzamb, ukata kumenany en mar.” (2 Tes. 1:3-5) Pakezay kufa chid chansudiel chazizidilau many chidia pansh, pa chisu chin chawonsu chikeza kushiken, winyikel wa mwiur wa Nzamb ukez chad kuwanyin. Ukez kwikal musul wa musangar mudi ik—mwiur ni pansh!

[Mazu madia kwishin kwa paj]

Ov, Ukutwish Kurumburil?

• Nzamb wamuleja Abraham chom ik chadinga chikwatina ku Dichuku dia Dirumburish?

• Mulong wak wamutazukau Abraham anch utentamin?

• Ov, kutazukiu utentamina kwayishikija mbut ya Abraham kwisu?

• Ruchingej ik rikwetau in Kristu awonsu?

[Chipich chidia pa paj wa 20]

Yesu wayikasikesha in kwilej end chakwel akimba Want

[Chipich chidia pa paj wa 21]

Pa Pentekot wa mu muvu wa 33 C.C., Yehova wasambish kuyitond yid yikwau ya mbut ya Abraham

[Chipich chidia pa paj wa 23]

Amikoku akwau ajikitishin mulong in Kristu azizidilau many achidi nau mu machuku ma nsudiel