Apitisha Mwom Wau Ov, Ukutwish Kusal Mwamu Niyey?

MARC, mukadivar wa mu Canada, wadinga ni kusal mudimu mu chapu chadinga ni kusal ma mashin madingau ni kusadil mu yapu. Wasambisha kusal mudimu wa chisu chikemp ni wasala mudi chibol wa rawonsu. Kupwa, mukurump wa mudimu wamukandjika Marc pa ndond ya piur mu mudimu—amuteka pa ndond ya kusal mudimu chisu chawonsu ni ya nfalang jivud. Marc wasala nchik?

Amy, nambaz wa mu Philippines, wasala mudi wa chibol wa rawonsu pa chisu chadingay ni kwilej ku shikol. Papwishay shikol, amwinkisha ndond ya mudimu wa nfalang jivud ni yitina chisu chivud nakash. Yom ik yatonday Amy?

Marc ni Amy akwata mipak yishalijadina ni yibudikin ya kutond yilejen manangu ma chiyul chayinkishau in Kristu adinga mu Korint wa pasak. Kambuy Paul wafunda anch: “Lik . . . antu akata kusal yom ya mangand [ikal] mudi kakat kuyisalip kand.”—1 Kor. 7:29-31.

Sadil Mangand Pakwez Mudi Umasadidilap Kamu

Kurutu tujingunina yamushikena Marc ni Amy, el tushinshikinany mu winswimp chirumburikina dizu “mangand” (ap anch, koʹsmos mu Grek) diasadilay Paul mu mukand wend wayifundilay in Korint. Mu verse winou wa Bibil, dizu koʹsmos disambidin ditenchik dia mangand mutushicha—chisak chawonsu cha muntu—ni mudi kand yom yidia ya mwom wa pichuku pichuku, mudi kwikal ni chikumbu, kutan yakudia, ni maswin.a Chakwel kutan yom yiney ya usey ya pichuku pichuku, etu awonsu tufanyidin kusal mudimu. Chakin kamu, tufanyidin ching kusadil mangand chakwel tuwanyish yitwitina Bibil mulong twidisha ayinetu ni majuku metu. (1 Tim. 5:8) Pakwez, pa chisu chawiy chimwing, tujingunin anch “mangand mayil ni kujiy.” (1 Yohan 2:17) Chawiy lel, tukata kusadil mangand mu chilik kanang pakwez ‘mudi kitumasadidilap.’—1 Kor. 7:31.

Chilondwilau chiyul cha Bibil kutek mipak mu chilik kanang chitwishikina mu kusadil kwau mangand, akadivar ni anambaz avud ashinshikidin kand mikadil yau, ni akempishin chisu chisutishinau mu midimu, ni kupipesh mwom wau. Kupwa kwa kusal mwamu, ajingunina swa anch chakin kamu apitisha mwom wau mulong eza kwikal nich chisu chivud cha kusutish pamwing ni majuku mau ni mu mudimu wa Yehova. Chikwau, mwom wau uswapela wayisala ikamena pakemp pa mangand pakwez akungamena nakash-nakash padiay Yehova. Ov, ukutwish kusal mwamu niyey kuswapesh mwom wey chakwel utwala kurutu yisakin ya Want wa Nzamb?—Mat. 6:19-24, 33.

“Twiyovil Piswimp Nakash ni Yehova Kupandakanamu Mutwadinga Pasak”

Marc, ujimbwilau kwisambishil oku, watesha chiyul cha Bibil cha kulik kusadil nakash-nakash mangand. Walika ndond ya piur ya mudimu yamwinkishau. Kupwa kwa machuku makemp, mukurump wa mudimu wa Marc, wamufuta nfalang jivud mulong wa kumulembijek itiyija ndond yisu ya mudimu. Marc ulondil anch: “Kwadinga kupakiu, pakwez nalika kand.” Ndiy warumburila mulong wak chidi mwamu: “Mukajam, Paula, ni yam amwinam twasota kwikameshin mwom wetu pa kumusadil Yehova muchitwishikina. Chawy lel, twakwata mupak wa kuswapesh mashakamin metu. Twamulembila Yehova atwinkish manangu chakwel tuwanyish rutong retu ni twitekina dichuku kanang dia ngond chakwel twiyikadisha tayad, tumusadil Yehova mudi muchifanyidina.”

Paula ulondil anch: “Nadinga ni kusal machuku masatu pa rubing mudi kalerik ku rupital ni natambulanga nfalang jiwanyidina. Nasala kand mudi chibol wa rawonsu. Pakwez, mudi Marc, nasota niyikadisha tayad kumusadil Yehova kwindond kwin kwawonsu kwadinga kuswiridinau atutwambil a Want. Chikwau, panapana mukand wijikishina kulik kwam mudimu, mukurump wam wa mudimu walonda anch yam nadinga niwanyishina yitinau chakwel nikal kalerik wa biro musu wafungulau kal kamu. Wadinga wawiy mudimu wa kalerik wadingau ni kufut nfalang jivud nakash ku rupital, pakwez am nalamata ching ku mupak wam wa kulik mudimu. Panamuleja mukurump wam mayingishin nilikidina kusal mudimu winou, wanjikitisha mulong wa ritiy ram.”

Kupwa kamu pinipa, Marc ni Paula ayitonda kusadil mudi ayibol a pakampwil mu kachikumangen kakemp kadinga mu mwab wa kulemp mu Canada. Kwadinga chibudikin ik? Marc ulondil anch: “Kupwa kwa kudiokal ku mudimu wa nfalang jivud unadinga ni kusal piswimp chikunku cha mivu ya mwom wam, nova wom mulong wa dikeza diam, pakwez Yehova wayukisha mujikit wetu. Twovil musangar ujim nakash udiokila ku kuyinkish antu akwau yipan ya muspiritu. Mudimu wa chisu chawonsu wapitisha kand uruw wetu. Mambamb metu mengamidina pa yom yidia chakin kamu ya usey—jinsangu ja muspiritu. Twiyovil piswimp nakash ni Yehova kupandakanamu mutwadinga pasak.” (Midimu 20:35) Paula uwejidin anch: “Anch walik mudimu wey ni kusha chikumbu chiwamp chiwijidina, ufanyidin kumuchingejin Yehova mu yawonsu. Mwamu twasala, ni Yehova watuyukisha nakash. Akadivar ni anambaz akatish a mu chikumangen chetu chisu atusala twiyova anch atukatin ni atuswiridin nakash. Katat nisadidil usu unasadila pasak mulong wa kuyikwash antu muspiritu. Nikwet musangar ujim nakash wa kusal mudimu winou.”

‘Kiniburedinap Chom Pakwez Kinasangarap’

Amy, wajimbulangau kwiur oku, watonda mu mutapu windjing. Witiyija ndond ya mudimu ya chisu chawonsu wa nfalang jivud. Amy ulondil anch: “Mu muvu wa kusambish, nadinga mukash mu mujikit pakwez namana anch mwom wam wasidin pakemp-pakemp pa yisakin ya ndond ya mudimu wam kupandakanamu pa yisakin ya Want. Natambula yipan yambachika nisala nakash mudimu wam ni nasambisha kusadil usu wam ukash mulong wa kukandam pa ndond yijim ya chapu chetu. Pinasambisha kwikal nich yisend yivud ya mudimu wam, nasambisha kusutish chisu chikemp nakash mu mujikit. Kupwa, nalika ni kulejan kwin rawonsu.”

Pavurikay piur pa chisu chinicha, Amy ufundil anch: “Kwi nfalang, kinaburedinap chom. Nenda nakash ni nasangera ntumb ya ndond ya mudimu wam. Pakwez, kinasangarap. Chikalap nchik nfalang jinadinga nich, nadinga ni milong yivud. Nadinga nikutong anch, mulong udi kwisu. Kupwa nashikena ku kujingunin anch mu kusot mudimu wa mwom mu mangand manam, nadinga piswimp ni ‘kupumbukin kulemp ni ritiy.’ Mudi chibudikin, mudi kamu mulondila Dizu dia Nzamb, nikala nich ‘ushon mavud.’”—1 Tim. 6:10.

Chom ik chasalay Amy? Ndiy ulondil anch: “Nayita amakurump ankwasha nichirisha kand ukash wam wa muspiritu ni nisambisha kukumangan ku yikumangan. Pa chisu cha kuwang muminy, nasambisha kudil. Navurika musangar unadinga nich pa mivu yitan yinasala mudimu wa kwangul mudi chibol, ap anch nadinga kazwendj pa chisu chinicha. Nijika anch nifanyidin kulik kushesh chisu cham mulong wa kukimb nfalang ni chawiy nasambisha kutek yisakin ya Want pa ndond ya kusambish. Nitiyija ndond ya mwishin ku mudimu, yadinga yirumburikina anch kushadish 50 pa chitot pa nfalang jifutiningau, ni nasambisha kand kusal mudimu wa kulejan.” Nich musangar Amy ufundin anch: “Nikala ni musangar wa kusal mudi wa uchibol mu mivu kanang. Katat novil musangar nakash unadinga kandikal novap panadinga ni kusutish chisu cham mu kusadil mangand.”

Ov, ukutwish watenchik mikadil yey ni kuswapesh mwom wey? Anch wasadil chisu chiukweta mulong wa kutwal kurutu yisakin ya Want, niyey ukez kupitish mwom wey.—Jinsw. 10:22.

[Mazu madia kwishin kwa paj]

[Tablo wa jinsangu udia pa paj wa 19]

Ov, ukutwish watenchik mikadil yey ni kuswapesh mwom wey?

[Kamushet/​Chipich chidia pa paj wa 19]

“Niukatiningin Mudimu wa Chisu Chawonsu!”

David, mukurump mwin Kristu wa mu États-Unis, wasota inunga ni mukajend ni anau mu mudimu wa chisu chawonsu. Watwisha kutenchik mudimu wa ku mujimbu wa chisu chikemp ku chapu kwadingay ni kusal, ni wasambisha kusal mudi chibol wa rawonsu. Ov, yikarumun yiney yapitisha mwom wend? Kwinyim kwa angond akemp kusu, David wamufundina murund nend anch: “Kwikil chom chisangareshina chipandakenamu kwipan nakash mu kumusadil Yehova ni dijuku diey diawonsu. Chakin kamu natonganga anch chikez kansend chisu kanang chamam kusadil ku mudimu wa uchibol, pakwez niukatin nakash! Wintudishin nakash.”

[Chipich chidia pa paj wa 18]

Marc ni Paula adi mu mujikit