Shapitre Wa Makum Maad
Kangal Wavuramen Dichuku dia Yehova
1. Piwileja kapamp ka kusambish anch kukwolik ku ditenchik dined dikur dia yom yiyimp kudi piswimp, mutapu ik wiyova?
CHIMWING cha yom ya kusambish yiwilejina mu Baibel chading cha kwijik anch rutong ra Yehova ridi anch divu diawonsu diakabuj dikala paradis. Mu mangand minima masu, njit, chisum, uzweny, mayej, mar, ni rufu yikwikalakwap kand. Ap afu akez kuvumbuk kwikal kand ni mwom. Yidi yichingej yiwamp mud ik! Kushejin piswimp kwa yom yawonsu yiney akukasikeshidin mu uman wa kwel anch kwikalaku kwakad kumekan kwa Kristu mud Mwant uyikedila kwasambisha mu muvu wa 1914 ni kudiosh kamu pinipa tushich mu machuku ma kwisudiel ma mangand minam mayimp. Kwisudiel kwa machuku minam ma nsudiel, Yehova ukez kushesh ditenchik dined dia yom ni kusambish mangand masu makaninay!
2. Ov “dichuku dia Yehova” chom ik?
2 Baibel utazukin chirung chinech chezina anch “dichuku dia Yehova.” (2 Pita 3:10, NW) Didi “dichuku dia kadimu dia Yehova” pantaliken ni mangand ma Satan mawonsu ma kabuj. (Sofoniy 2:3, NW) Dichuku dined dikushiken pa musong wad kwi “njit ja pa dichuku dijim dia Nzamb Mwin Dikand Diawonsu. . . , yipidilau mu win Hebereu anch, Harmagedon,” mukuyijipilau “ant a mangand mawonsu.” (Kujingunik 16:14, 16) Ov mutapu wey wa kushakam umekeshin kwitiyij kwey anch ‘dichuku dined dia Yehova’ didi piswimp? —Sofoniy 1:14-18, NW; Jeremiy 25:33, NW.
3. (a) Chisu ik chikeza kwez dichuku dia Yehova? (b) Mulong wak chidia cha ukwash anch Yehova kalejanap “dichuku ap chisu”?
3 Baibel katulejinap chisu chin kamu chikwezay Yesu Kristu mud Mwin Kushikij Dirumburish wa Yehova pantaliken ni ditenchik dia yom dia Satan. Yesu walonda anch: “Kwikil muntu wija kushik kwa dichuku dinidia ap kwa chisu chinicha. Aruu a mwiur kijap, ap Mwan, ching kusu Tatuku ndiy wija amwinend.” (Marko 13:32) Ang antu kampand kamukatinap chakin Yehova, akwikal ni chibachikin cha kudiosh dichuku diend mu manangu mau ni kukarumukin ku kulondul yom ya ku mujimbu. Pakwez antu amukatina chakin kamu Yehova akumusadil ndiy nich muchim wau wawonsu, chikalap nchik chisu chikeza kushik disudiel dia ditenchik dined diyimp. —Kuseng 37:4; 1 Yohan 5:3.
4. Yom ik yalonday Yesu mud mutapu wa kubabesh?
4 Chakwel kuyibabesh antu amukatina Yehova, Yesu ulondil anch: “Babalany, chishany ku mes, mulong kiwijanyap chisu chikushika yom yiney.” (Marko 13:33-37) Utukasikeshin kulik kushil kwifund kudia, ap kukwachik maar, ap “yakamish ya mwom” yiturumbangesha yitongijok nakash chilik cha kuvuramen ukash wa yirung yiney. —Luka 21:34-36; Mateu 24:37-42.
5. Mud mwarumburilay Pita, ov yom ik yikeza kulet dichuku dia Yehova?
5 Pita ni ndiy utuyudil kulik kuvuramen ‘kwikalaku kwa dichuku dia Yehova, pa dichuku dinidia yom yawonsu ya mwiur yikez kwengurik nich kasu, chad divu ni yom yawonsu yidiamu yikez kutem.’ Winyikel wawonsu wa antu—“maur”—akez kuushesh, pamwing ni chisak chawonsu cha antu ayimp— “divu”— ni “yawonsu yidiamu,” yitongijok ni mijikit yawonsu ya mangand minam mayimp, mud mwikadil wau wa want ipau pantaliken ni Nzamb ni mulad wau wa mwom wijondila ni wa kukat nakash mapit ma mujimbu. Akez kuyiswinkan kud ‘maur masu [Want wa Nzamb wa mwiur] ni divu disu [chisak chisu cha pa divu] mukeza kwikal kutentam.’ (2 Pita 3:10-13) Yinship yiney ya mangand kusheshik yikushiken mutapu wa kukashimwish pa dichuku ni pa chisu chiwakadiany en kwijik. —Mateu 24:44.
Dandamen Kujingunin Chijingidij
6. (a) Ov chakul cha Yesu ku chipul cha in kwilejend chadinga ni kumekesh nchik disudiel dia ditenchik dia in Yuda? (b) Yikunku ik ya chakul cha Yesu yipwitidina yitongijok ku yinship ni mikadil yikwikalaku kudiosh mu muvu wa 1914 ni kuya kurutu?
6 Pa kuman yirung mutushicha, tufanyidin kujingunin kamu nawamp kachom ni kachom ka chijingidij chikasina yom yivud mu chimwing chimekeshina anch tudi mu machuku ma kwisudiel—“nsudiel ya ditenchik dia yom.” Vurik anch pakulay Yesu chipul cha in kwilejend, chifundinau mu Mateu 24:3, yimwing ya yom yarumburilay mu verse wa 4 kushik ku verse wa 22 yashikena mu ukemp piur pa ditenchik dia in Yuda pakach pa muvu wa 33 ni wa 70 C.C. Pakwez uprofet winou washikena mu kujimb kudiosh kamu pa chirung cha 1914, chirung cha ‘kwikalap kwa Kristu ni cha nsudiel ya ditenchik dia yom.’ Mateu 24:23-28 ulejen yela kushiken kudiosh mu muvu wa 70 C.C. kushik ni ku chirung cha kwikalap kwa Kristu. Milong yirumburilau mu Mateu 24:29–25:46 yikat kushiken pa chirung cha kwisudiel.
7. (a) Mulong wak tufanyidina kamu muntu ni muntu kujingunin pakampwil mutapu mikadil ya katat yiwanyishina chijingidij? (b) Akul ku yipul yidia kwisudiel kwa paragraf winou, ni kumekesh mutapu wasambisha kushiken chijingidij kudiosh mu muvu wa 1914.
7 Muntu ni muntu pakach petu ufanyidin kwikal mwin kutal neng wa yinship ni mikadil yiwanyishina chijingidij. Kulondwish yom yiney nich uprofet wa Baibel kutukwashin kuvurik dichuku dia Yehova. Kukutukwash kand kwikal in kwitiyish pa chisu tuyibabeshina antu akwau mulong wa kushej piswimp kwa dichuku dinidia. (Isay 61:1, 2, NW) Nich maloz minam mu manangu, tuchirikinany yipul yilondwila ey yisambidina yikunku ya chijingidij, mud muchifundinau mu Mateu 24:7 ni mu Luka 21:10, 11.
Mutapu ik ushimokishina twamena kushiken kwa ‘muchid ukat kurish ni muchid ukwau, ni want ni want’ kudiosh kamu mu muvu wa 1914? Piur pa jinjit, ov yom ik yasambisha kushiken kudiosh kamu pinipa?
Ov chipupu ik chashesha mwom wa antu kupandikan Njit ja Mangand I mu muvu wa 1918? Kwikalap nchik ronganyin ra chimwingang, ov mayej ik machijipina ni katat mamiliyon ma antu?
Ov chisik ik tumungun twashikena pa divu kwikalap nchik kuya kurutu kwa milong ya siyans kwa mivu chitot yasutina ey?
Chom ik chikwitiyishina chakin anch 2 Timote 3:1-5, 13 ukat kurumburil, chidiap mutapu udinga kal mwom pichuku pichuku, pakwez ukat kurumburil anch mikadil yiyimp yikat kupandikan mu kwiwejinaku pitushejidina kamu piswimp ni disudiel dia machuku ma kwisudiel?
Kuyauril Antu
8. (a) Ov chom ik chikwau, chirumburilau mu Mateu 13:24-30, 36-43, chabombinay Yesu pamwing ni nsudiel ya ditenchik dined dia yom? (b) Chishimu cha Yesu chirumburikin chom ik?
8 Kudi kand milong yikwau ya usey yisambinay Yesu piur pa nsudiel ya ditenchik dia yom. Umwing wa mu milong yiney udi kuyauril “an a want” ni “an a sakudimban.” Yesu wisambina chom chinech mu chishimu chend piur pa chir cha tidiku mwakusay mukankuny yinfananfan. “Tidiku” mu chilikej chend ufanikeshin in Kristu akin azizidilau many. “Yinfananfan” adi antu afila mu kan anch adi in Kristu pakwez awiy adi kwau “an a sakudimban” mulong alamatin ku mangand mayikedilay Djabul. Antu inay ayauril ni “an a want [wa Nzamb]” ni ayitekin chijingidij mulong wa disheshik. (Mateu 13:24-30, 36-43) Ov kwaurik kwinoku kwashikena chakin?
9. (a) Kupwa kwa Njit ja Mangand I, kwaurik ik kujim kwikalaku pakach pa awonsu adinga ni kwibul pantul anch adi in Kristu? (b) Mutapu ik wamekeshau in Kristu azizidilau many anch adinga atushalapol akin a Want?
9 Kupwa kwa Njit ja Mangand I, kwadinga kwaurik mu yisak yaad pakach pa antu awonsu adinga ni kwibul pantul anch adi in Kristu: (1) Chisak cha amakurump a Kristendom nau in kwilejau, antu imekesha kamu patok mu kupan ukwash nakash ku Kwinung kwa Michid, (kutazukinau nlel anch ONU) oku achimekeshin kushinshaman kwau muntu ni muntu ku wanangand wau, ni (2) in Kristu akin a pa chirung cha kupwa kwa njit, antu adandamena kupan ukwash wau ku Want wa Nzamb wa Umesia, pa ndond pa kukwash michid ya mangand minam. (Yohan 17:16) Antu inay imekesha kwikal atushalapol akin a Want wa Nzamb mu kwitiy chisend cha kulejan “rusangu ruwamp riner ra want” pa divu pawonsu. (Mateu 24:14) Ov yom ik yabudikinaku?
10. Ov chom ik chikala chibudikin cha kusambish cha mujikit wa kulejan Want ?
10 Cha kusambish, kwadinga kukumangej kwa atushal a antu azizidilau many nich spiritu wa Nzamb, antu akweta ruchingej ra kwikal pamwing ni Kristu mu Want wa mwiur. Ap anch adinga apalangena pakach pa michid, ayikumangeja awonsu mu uumwing mu dirijek. Kupwish kutek chijingidij pa jimpal ja azizidilau many inay kudi katat piswimp. —Kujingunik 7:3, 4.
11. (a) Mudimu ik wa kukumangej udandamedina, ni kulondulijan nich uprofet ik? (b) Ov kushiken kwa uprofet winou kurumburikin ik?
11 Kupwa, mwishin mwa umutakel wa Kristu, kwasambisha kukumangej kwa “chisak chipandakena kujimb . . mu michid yawonsu, ni majuku mawonsu ni antu a mangand mawonsu ni jindim.” Antu inay asadil chisak cha “amikoku akwau” akupanda ku “mar majim” ni kwandam mu mangand masu ma Nzamb. (Kujingunik 7:9, 14; Yohan 10:16) Mudimu winou wa kulejan Want wa Nzamb kurutu disudiel dishika udandamedin kamu djat ni nlel muten. Nich kushinshaman, chisak chipandikena kujimb cha amikoku akwau, chikweta katat mamiliyon ma antu, chikat kuyikwash atushal azizidilau many kupalangesh uruu winou wa Want upanina mwom. Uruu winou auteshin mu michid yawonsu.
Ov Chom ik Chitulamidina Machuku ma Kurutu?
12. Ov mu chilik ik chijim chifanyidinau kusal mudimu wa kulejan kurutu dichuku dia Yehova dishika?
12 Yawonsu yitwajimbulang kwiur oku yirumburikin anch tudi piswimp kamu ni disudiel dia machuku ma kwisudiel ni anch dichuku dia Yehova didi kamu piswimp nakash. Ov kudi uprofet ukwau ufanyidina kushiken kurutu kwa dichuku dined diamushena disambisha? Mwawiy. Pa mulong umwing, kwauril antu piur pa mulong wa Want kand kal kupwa. Mwi ngand kampand mwadinga kuzengol kumwing kukash mu yirung ya mivu, mudi katat kwiwejinaku kwa in kwilej asu. Ap kand mu jindond mwadingau ni kulik antu kutesh rusangu ruwamp, ranaken ra Yehova rimekedin mu kupan kwetu uman. Komb, chinech chawiy chisu cha kuya kamu kurutu mu mudimu! Yesu utulejin nich kashinsh anch piukwela mudimu wapwang kal, disudiel dikushik lel.
13. Mud muchifundinau mu 1 Tesalonik 5:2, 3, ov chinship ik chirumburikina nakash chifanyidina kushiken, ni chirumburikin chom ik kud etu?
13 Uprofet ukwau wa Baibel urumburikina nakash utakedil kulond anch: “Pakez kulondau antu anch: ‘Tukwet chisambu ni kwikang,’ pawiy pinipa kamu kusheshik kukez kuyikashimwish, mudi misong yikata kumukashimwish mband ukweta divumu. Chad kwikil umwing ukeza kukwasinik.” (1 Tesalonik 5:2, 3) Kwashal kal kuman mutapu wa kulond kwinoku kwa “chisambu ni kwikang.” Pakwez kukez kurumburikap chakin anch anyikel a mangand apwish kal chakinakin milong yawonsu ya an-a-antu. Antu avurikina dichuku dia Yehova kakezap kuyishadish nich kulond kwinoku. Ij anch kupwa kamu kwa kulond mwamu, disheshik dikwez kapamp kamwing.
14. Ov yom ik yikwikalaku pa chirung cha mar majim, ni mutapu ik yikulondulijana?
14 Kwisambishil kwa mar majim, anyikel akez kumukarumukin Babilon Mujim, winyikel wa mangand mawonsu wa relijon wa makasu, ni kumushesh shitit. (Mateu 24:21; Kujingunik 17:15, 16) Kupwa, michid yikez kuyikarumukin nich rukuny antu adandamedina ku ukaleng wa Yehova, ni kusarumun lel ujim wa Yehova pantaliken ni winyikel wa chipolitik nau atubwebu au, ni kuyishesh kamu shitit. Dipwishil dia mar majim dikez kwikal njit ja Harmagedon. Chad lel, Satan nau ayilembil end akez kuyitek mu dibuku diakad musul, chakwel kakwikalap kand ni usu padi antu. Chisal chinech chikez kutek musul ku dichuku dia Yehova pakez kutumbishau dijin diend. —Ezekiel 38:18, 22, 23; Kujingunik 19:11–20:3.
15. Mulong wak chikwikal cha usup kutong anch dichuku dia Yehova dichidi kulemp?
15 Disudiel dia ditenchik dined dikwez kamu pa chisu chifanyidina, kulondulijan kamu nich program wa Nzamb. Dikulabap bwat. (Abakuk 2:3, NW) Tuvurikany anch, kusheshik kwa Yerusalem mu muvu wa 70 C.C. kwashikena swa, pa chisu chakad kuchingejin kud in Yuda, padingau ni kutong anch chak chasutil kal. Ov mutapu ik chadinga ni Babilon wa pasak? Babilon wadinga ni dikand, ni rubumbu rimwing rijim ni rikash, ripanina ruchingej. Pakwez Babilon wawa mu uchuku kusu umwing. Komb, chawiy kand, kusheshik kukashimwishina kukez kuwil pa ditenchik dined diyimp . Pakushika kusheshik kwinoku, tuwapidil kwikal mu uumwing wa difukwil diakin, ni kuvurik dichuku dia Yehova.
Misamb ya Kuchirikin
• Mulong wak chidia cha usey kuvurik dichuku dia Yehova? Mutapu ik tukutwisha kusal mwamu?
• Kwauril kudiap katat pakach pa antu kututadil nchik muntu ni muntu ipend?
• Ov yom ik yituchingedina kurutu kwa dichuku dia Yehova kusambish? Komb, ov chom ik tufanyidina kusalang muntu ni muntu ipend?
[Chipich chidia pa paj wa 180]
Katat kamu ak machuku ma kwisudiel makusul nich kusheshik kwa ditenchik dia Satan