Shapitre Wa Dikum Ni Chidivu
Dandamen Kulejan Dizu dia Nzamb Nich Mushiku
1. (a) Ov rusangu ik ruwamp radingau ni kulejan in kwilej a Yesu, pakwez chom ik chasalau in Yuda amwing? (b) Ov yipul ik tufanyidina kwiyipul?
PASUTIL kal piswimp mivu 2 000, Mwan a Nzamb, Yesu Kristu, amuzizila many mud Mwant wa machuku ma kurutu piur pa divu diawonsu. Yesu amujipa mulong wa kafukej ka akankuny in relijon, pakwez Yehova wamuvumbula kudiokal ku rufu. Kusutin kud Yesu, mwom wa chikupu wikala katat utwishikina. In kwilej a Yesu palejanau rusangu ruwamp riner patok, chad, kuzengol kwasambisha. Amwing pakach pau ayidjibwila mu rukan, ayibula nfimbu ni kuyikand chakwel kulik kulond piur pa Yesu. (Midimu 4:1-3, 17; 5:17, 18, 40) Ov chom ik chelau kusal? Ov chom ik wela ey kusal? Ov wela kudandamen kupan uman nich mushiku?
2. (a) Ov rusangu ik ra musangar rifanyidinau kulejan pa chirung chetu? (b) Nany ukweta chisend cha kulejan rusangu ruwamp?
2 Mu muvu wa 1914, Yesu Kristu, Mwant wa Want wa Nzamb, amudisha want mwiur chakwel ayikela ‘mukach mwa akankuny nend.’ (Kuseng 110:2) Kupwa, Satan nau ayilembil end ayidjibwila piswimp ni divu. (Kujingunik 12:1-5, 7-12) Machuku ma kwisudiel ma ditenchik dined diyimp masambisha. Anch chirung chinech chapwa, Nzamb ukez kupuchol ditenchik diawonsu diakabuj dia yom ditakedinay Satan. (Daniel 2:44; Mateu 24:21) Antu akupanda akez kwikal nich ruchingej ra mwom wa chikupu pa divu dikeza kwikal paradis. Ang witiyijin rusangu ruwamp riner, uwapidil kurilejan kud antu akwau. (Mateu 24:14) Pakwez chom ik ukutwisha kuchingejin?
3. (a) Mutapu ik ukatau kwakul antu ku uruu wa Want? (b) Ov chipul ik tufanyidina kwakul?
3 Chisu chiukata kulejan rusangu ruwamp ra Want, antu amwing akutwish kuritiy, pakwez avud akudiwul kwau. (Mateu 24:37-39) Amwing akutwish kukupipej ap kukupompat. Yesu wababeshana anch rupompat rikutwish kubudikin kud anamakwey in kamu. (Luka 21:16-19) Rikutwish kand kubudikin ndond ukata kusal mudimu ap ku shikol. Ku mitambu yimwing ya divu, mburamatad walikishin kal mudimu wa Atuman’a Yehova. Anch yom ya mutapu winou yakushiken, ov ukudandamen kamu kulejan dizu dia Nzamb wakad wom ni ‘kwiman dang mu ritiy’?—1 Korint 16:13.
Kangal Twengamin pa Usu Wetu Ayinetu
4. (a) Chakwel twikala atushalapol a Nzamb ashinshamena, ov chom ik chitwitinau kusal? (b) Mulong wak yikumangan ya Ukristu yidi ya usey nakash?
4 Chom chijim mu kwikal kashalapol ushinshamena wa Yehova chidi kwengamin pa yom yisadinay mulong wa kuwap kwetu kwa muspiritu. Chimwing cha yidimukin yiney chidi yikumangan ya chikumangen. Mifund yikat kutukasikesh kulik kudiwul yikumangan. (Hebereu 10:23-25) Antu adandamena kwikal Atuman’a Yehova ashinshamena ikasikesha kwikal akad kujing ku kukumangan ku yikumangan pamwing ni in kwifukwil akwau. Ku yikumangan yiney ronganyin retu ra Mifund rikat kwiwejinaku nakash. Chikwau kand, kutesh kwetu kwa uyakin kukat kukul, ni ronganyin retu ra mutapu tufanyidina kuyisadil rikat kujijaman. Tukat kwikal piswimp nakash nau akadivar netu in Kristu mu uumwing wa difukwil ni akat kutukasikesh kusal rusot ra Nzamb. Spiritu wa Yehova ukat kupan umutakel kusutin ku chikumangen, ni kusutil kand ku spiritu winou, Yesu udi pakach petu.—Mateu 18:20; Kujingunik 3:6.
5. Anch ajidik mudimu wa Atuman’a Yehova, ov yikumangan yikat kusadikang mutapu ik?
5 Ov ukat kukumangan pakad kujing ku yikumangan yawonsu, ni kusadil yiukata kuteshang? Yisu yimwing, pakatau kujidik mudimu wa Atuman’a Yehova, chiding cha usey kusal yikumangan mu yisak yikemp yikemp ku yikumbu yayen. Ndond ni yisu yikutwish kukarumok ni yikutwishap kwikal chisu chin chawonsu yifanyidina, mulong yikumangan yimwing yikutwish kusadik uchuku nakash. Pakwez kwikalap nchik kuburen kufanyin kwa muntu ipend ap ubaj, akadivar ni anambaz ashinshamena akat kusalang usu wau wawonsu chakwel kwikalaku ku yikumangan yawonsu.
6. Ov mutapu ik tukutwisha kumekesh kwengamin kwetu padi Yehova, ni mutapu ik chikutwisha kutukwash kudandamen kulejan nich mushiku?
6 Kwengamin padi Yehova kukat kukulang anch tukat kulembil chisu ni chisu nich muchim wetu wawonsu, ni kujingunin anch tukwet kuswir kwa ukwash wa Nzamb. Ov mwamu ukata kusalang? Yesu wading ni kulembil chisu ni chisu padingay ni kusal mudimu wend panap pansh. (Luka 3:21; 6:12, 13; 22:39-44) Ni uchuku kurutu kwa kumupampin pa mutond, ndiy wayikasikesha in kwilejend anch: “Chishany ku mes, chad lembilany chakwel kangal wawany mu yoziu.” (Marko 14:38) Ang twasankan kadiwij mulong wa uruu wa Want, tukutwish kwikal ni chibachikin cha kuchirikin kwinyim mu mudimu wetu. Ang antu akat kutupipej ap kutuzengol, tukutwish kwikal ni chibachikin cha kulik mudimu wa kulejan mulong wa kwipuk milong. Pakwez ang tukat kulembil nich kashinsh mulong wa kutambul ukwash wa spiritu wa Nzamb chakwel tudandamena kulond wakad wom, akez kutuchidij ku kuwil mu yoziu yiney.—Luka 11:13; Efes 6:18-20.
Rusangu ra Kupan Uman Nich Mushiku
7. (a) Mulong wak rusangu rifundinau mu Midimu ridi ra ukwash wa pakampwil kud etu? (b) Akul ku yipul yidia kwisudiel kwa paragraf winou, ni kasikeshin mutapu rusangu riner rikutwisha kwikal ni ukwash kud etu.
7 Rusangu rifundinau mu buku wa Midimu ridi ra usey wa pakampwil kud etu awonsu. Ritulejin mutapu wapandikanau apostol ni in kwilej akwau a mu mivu chitot ya kusambish—antu adinga ni yovil mud yetwetu—yikangesh ni kwimekesh atuman akad wom ni ashinshamena a Yehova. Tushinshikinany chikunku cha rusangu riner nich ukwash wa yipul yilondwila ey ni mifund yilejenau. Pitusadila mwamu, shinshikin mutapu ukutwisha kutaninamu ukwash mu yom yiutangina.
Ov apostol adinga antu amwing ilejina mashikol majim? Ov awiy adinga antu akad wom wa chivadik, kwikalap nchik yashikena? (Yohan 18:17, 25-27; 20:19; Midimu 4:13)
Ov chom ik chamutwishisha Pita kulond pakad wom kurutu kwa dirumburish dia in Yuda diamufisha nich Mwan a Nzamb? (Mateu 10:19, 20; Midimu 4:8)
Chom ik chadingau ni kusal apostol kurutu kwa kuyitwal ku Sanedrin? (Midimu 1:14; 2:1, 42)
Anyikel payijidikau apostol kulejan mu dijin dia Yesu, ov Pita nend Yohan akula mutapu ik ? (Midimu 4:19, 20)
Kupwa kwa kuyilikishaku, ov ukwash wa nany wakimbau apostol? Ov alembila chakwel kuzengol kupwa, ap chom ik chitau? (Midimu 4:24-31)
Mutapu ik wayikwashay Yehova papakijau in kuyipompat kukangesh mudimu wa kulejan? (Midimu 5:17-20)
Ov mutapu ik wasalau apostol chakwel kumekesh anch awiy ading ija mulong wak wayikwola? (Midimu 5:21, 41, 42)
Ap pa chisu chapalanganau in kwilej avud mulong wa kuzengol, yom ik yadandamenau kusal? (Midimu 8:3, 4; 11:19-21)
8. Ov yibudikin ik yisangareshina nakash yamekana ku mudimu wa in kwilej a mu mivu chitot ya kusambish, ni mutapu ik twashikena kwinunginaku?
8 Mudimu wa kulejan rusangu ruwamp wadingap wa chamwamu. In kwilej 3 000 atambula dibabatish pa dichuku dia Pentekot mu muvu wa 33 C.C. “Amakundj ni amband avud nakash amwitiyija Nsalejetu, chad iwejaku ku chisak cha in kwitiyij.” (Midimu 2:41; 4:4; 5:14) Mu kusut kwa chisu, ap mwin kuyizengol antu a Nzamb upandikena kuswej, Saul wa ku Tarsus, wikala mwin Kristu ni ndiy wasambisha kupan uman wa uyakin nich mushiku. Weza kwijikan mud mupostol Paul. (Galatia 1:22-24) Mudimu wasambishau mu mivu chitot ya kusambish kawimikap bwat. Pakwez aukasikeshidin kand nakash mu machuku minam ma kwisudiel ni washikin kal ku mitambu yawonsu ya divu. Twitapidil dilau dia kwinungin pamwing, ni pitusadila mwamu, tukutwish kwilejin ku chilikej chashau atuman ashinshamena asala mudimu kurutu kwetu.
9. (a) Ov mitapu ik yasadilay Paul mulong wa kupan uman? (b) Ov Mu mitapu ik ukata kupalangeshin uruu wa Want kud antu akwau?
9 Pilejay Paul uyakin piur pa Yesu Kristu, ov chom ik chasalay? “Pinipa kamu ndiy . . . wasambisha kurumburil anch, Yesu wading kamu Mwan a Nzamb.” (Midimu 9:20) Wajikitisha nakash mulong wa uwamp wa muchim wa Nzamb padi ndiy, ni wijika anch muntu mwawonsu wading ukwet kuswir kwa rusangu ruwamp ratambulay. Paul wadinga Muyuda, ni kulondwish nich chaku cha pa chirung chinicha, ndiy wadinga ni kuya mu masinagog chakwel kupan uman. Wafudishang kand ku chikumbu ni chikumbu ni kutongijokin pamwing ni antu pa chiku. Ni ndiy wadinga ni rusot ra kushemunikin mu materitwar masu mulong wa kulejan rusangu ruwamp.—Midimu 17:17; 20:20; Rom 15:23, 24.
10. (a) Mutapu ik wamekeshay Paul padingay ni kulejan nich mushiku anch wading kand ni kujingunin mutapu wadingay ni kupan uman? (b) Ov mutapu ik tukutwisha kumekesh ngikadil ya Paul pitupanina uman kud anamakwetu, arund netu a mudimu, ap arund netu a shikol?
10 Paul wadinga muntu wakad wom pakwez kand mwin kudimuk, mwamu kamu tufanyidina ni yetu kwikal. Wading ni kwisamb nau Ayuda yakushilamu kwa Nzamb kud angakau. Kud Agrek wisambina yom yading yijau nawamp. Mu yisu kanang wading ni kusadil yamanay amwinend mu kwilej uyakin mud mutapu wa kupanin uman. Walonda anch: “Am nikat kusal yom yiney yawonsu mulong wa Rusangu Ruwamp chakwel nitambulap yiyukish yau.” —1 Korint 9:20-23; Midimu 22:3-21.
11. (a) Ov chom ik chasalay Paul chakwel kwipuk kutadikijan chisu ni chisu nau in kumupompat? (b) Ov chisu ik tufanyidina kulondul nich manangu chilikej cha Paul, ni mulong wak? (c) Ov kwisu kudiokila usu wa kudandamen kulond nich mushiku?
11 Pichamekana anch mulong wa rupompat chimuwapidil Paul kulejan mu mwab ukwau mu chisu kanang, waya kwinikwa pa ndond ya kukasikesh chisu ni chisu kutadikijan nau in kumupompat. (Midimu 14:5-7; 18:5-7; Rom 12:18) Pakwez kadingap ni kwov usany mulong wa rusangu ruwamp. (Rom 1:16) Ap anch Paul wamana mar ma masaal —ap ma ubaj—kudiokal kud in kumupompat akad kusanger, ‘Nzamb wetu wamukasikesha ’ chakwel kudandamen kulejan. Walonda anch: “Nsalejetu ndiy wangimanyidina, wanginkish ukash wa kurumburil Rusangu Ruwamp patok wakad wom chakwel antu a michid yikwau aritesha.” (1 Tesalonik 2:2; 2 Timote 4:17) Mutu wa chikumangen cha Ukristu, Yesu, udandamedin kupan usu tukweta nich kuswir chakwel kusal mudimu watakelay kulondin mulong wa chirung chetu.—Marko 13:10.
12. Ov chom ik chimekeshina mushiku wa in Kristu, ni dishin diau chom ik?
12 Tukwet yiyingish yivud ya kudandamen kulond dizu dia Nzamb wakad wom, mud kamu mwasalau Yesu nau atushalapol akwau ashinshamena a Nzamb mu mivu chitot ya kusambish. Chinech chirumburikinap anch twikala akad kalimish ap kupakish kushindil uruu kud antu alikina kwau kuutesh. Pakwez tukulikap mulong antu alikin kubangaku; ap kand kushil rupompat ritukangesha kulond. Mud Yesu, tulejanany Want wa Nzamb mud winyikel umwing kusu utentamina ukwikala pa divu diawonsu. Tukat kulond nich ruchingej mulong tudi antimesh a Yehova, Mwant mwin Mangand Mawonsu, ni uruu tukata kulejan udiokilap kud etu pakwez udiokil kud ndiy. Ni rukat retu mulong wa Yehova rifanyidin kwikal chibachikin chetu chikash mulong wa kumushiman ndiy.—Filip 1:27, 28; 1 Tesalonik 2:13.
Misamb ya Kuchirikin
• Mulong wak chidia cha usey kushimunin uruu wa Want kud muntu mwin mwawonsu, pakwez yom ik tukutwisha kuchingejin?
• Mutapu ik tukutwisha kumekesh anch twengamidinap pa usu wetu ayinetu chakwel kumusadil Yehova?
• Ov mafundish ik ma usey tukutwisha kwilejin kudiokal mu buku wa Midimu?
[Chipich chidia pa paj wa 173]
Mud muchadinga pakur, atushalapol a Yehova nlel alejen dizu dia Nzamb nich mushiku