Shapitre Wa Dikum Ni Chinan
“Kadiap mu Umwing Nau in Mangand”
1. (a) Ov chom ik chitay Yesu mu malembil mulong wa in kwilejend, kurutu kwa rufu rend? (b) Ov mulong wak kulik kwikal “mu umwing nau in mangand” kudi kwa usey nakash?
PA UCHUKU wa kurutu kwa kumujip, Yesu walembila mulong wa in kwilejend. Chijikay anch akez kuyipompat nakash kud Satan, Yesu wamuleja Tatukwend anch: “Am kinikulembidilap ey kuyidiosh mu mangand, nikulembidil uyichidij kudi Sakudimban, ndiy kamu Muyimp. Am kinidiap mu umwing nau in mangand, chawiy chimwing, niyau kadiap mu umwing nau in mangand.” (Yohan 17:15, 16) Ov mulong wak kwiyauril ni mangand kudi kwa usey nakash? Mulong Satan ndiy mwant wa mangand minam. In Kristu kakusotap kwikal ku mutambu wa mangand madia mwishin mwa umutakel wend.—Luka 4:5-8; Yohan 14:30; 1 Yohan 5:19.
2. Ov Yesu walika nchik kwikal mu umwing nau in mangand?
2 Kulik kwikal mu umwing nau in mangand kurumburikinap anch Yesu waburena rukat mulong wa antu akwau. Chakapul chaya mwa, ndiy wayoka ayej, wavumbula afu, ni kuyifundish antu piur pa Want wa Nzamb. Wapana kand mwom wend mulong wa antu. Pakwez ndiy kakatap mikadil yakad kwambatan ni mwom wa winzamb ni yisalijok ya antu adinga ni kumekesh spiritu wa mangand ma Satan. Mwamu, ndiy wababeshana piur pa yom mud maku ma masandj, mwom wa kulondul mapit ma ku mujimbu, ni kukimb katumb. (Mateu 5:27, 28; 6:19-21; Luka 20:46, 47) Chad lel, chidiap cha kushimok anch, Yesu wipuka kand milong ya politik ya mangand. Ap anch wadinga mwin Yuda, ndiy kiyandjikap kwend mwi ntad ja politik pakach pa in Rom nau in Yuda.
“Want Wamam Kiudiap wa Mangand Minam”
3. (a) Ov chom ik chamufundilau Yesu kud amakurump a relijon wa in Yuda kud Pilat, ni mulong wak? (b) Ov chom ik chimekeshina anch Yesu kadingap nich kuswir kwa kwikal mwant wa mangand minam?
3 Tushinshikinany yayishikena amakurump a relijon wa in Yuda pamukwatau Yesu ni kumutwal kud Pons Pilat, nyikel mwin Rom. Chakin kamu, amakurump inay adinga ni kununganijan mulong Yesu walejana patok rilemb rau. Chakwel kumubachik nyikel mwin Rom asala chom kanang padi Yesu, awiy amufunda nich kulond anch: “Twamukwatang muntu mwinou ukat kuyilej antwetu kubwambul, ukat kuyilej kand antu kulik kulambul chitad cha Sezar, mwant wa in Rom. Ukat kufa mu kan anch, ndiy Kristu Uzizidilau Many, charumburik anch, mwant.” (Luka 23:2) Mud kamu mutapu chimekena, minam madinga makasu mulong muvu wa kwinyim pasotau antu kumutek Yesu ikala mwant, ndiy walika. (Yohan 6:15) Wading wij anch ukez kwikal Mwant wa mwiur mu machuku ma kurutu. (Luka 19:11, 12) Chikwau kand, ndiy afanyidina kumudish want, chidiap kud antu, pakwez kud Yehova.
4. Ov wisu wadinga mwikadil wa Yesu pa mulong wakulambul yitad?
4 Machuku masatu kurutu kwa kumukwat Yesu, Afaris apakisha kumutil Yesu mupit chakwel alonda chom kanang chiyimp piur pa mulong wa kulambul yitad. Pakwez ndiy walonda anch: “Nlejany bil rufalang ra utad wa argent [rufalang ra in Rom]. Ov chifu chinech ni dijin yidia pa rufalang riner yidi ya nany?” Awiy amwakula anch: “Yidi ya Sezar mwant wa in Rom,” ndiy wakula anch: “Chawiy lambulany yom ya mwant wa in Rom kudi mwant wa in Rom, pakwez lambulany kand ya Nzamb kudi Nzamb.”—Luka 20:20-25.
5. (a) Ov difundish ik diayifundishay Yesu in kwilejend pezau ni kumukwat? (b) Ov mutapu ik warumburilay Yesu diyingish dia yom yasalay? (c) Ov chom ik chadinga chibudikin cha kupakiu kwinoku?
5 Bwat, Yesu kalejanap kuyibwambwil antakel a mangand. Amasalay nau antu akwau pezau kumukwat Yesu, Pita wapurila mpak yend ya musamun wamutap kamu umwing wa amakundj inay, ni kumukatul ditu. Pakwez Yesu wamwela anch: “Chirish mpak yey mu chilal, mulong muntu mwawonsu ukata kurish nich mpak ya musamun, akez kumujip kand kwi mpak ya musamun.” (Mateu 26:51, 52) Dichuku dialondulaku Yesu warumburila yisal yend kurutu kwa Pilat, walonda anch: “Want wamam kiudiap wa mangand minam. Anch Want wam wading wa mangand minam, ing, in kwilejam elang kurish chakwel kangal ampana mu makas mau amakurump a in Yuda.” (Yohan 18:36) Pilat witiya anch ‘kwadingap mulong wa kumufish nich ku yom yawonsu’ yamufundilau Yesu. Pakwez mulong wa kuziyil ku kubarok kwa antu, Pilat wamupana Yesu chakwel akamupampina pa mutond.—Luka 23:13-15; Yohan 19:12-16.
In Kwilej Alondwil Umutakel wa Yesu
6. Mutapu ik wamekeshau in Kristu a pasak anch adinga ni kulik spiritu wa mangand pakwez adinga ayikatin antu akwau?
6 In kwilej a Yesu atesha lel kurumburik kwa kulik kwikal mu umwing nau in mangand. Chading chirumburikin kwipuk spiritu wakad kwikal wa winzamb ni yisalijok ya mangand, mu yisalijok yiney mwadinga kwipuwangej kwa chisum ni masandj ya mu masengan ni yiwandj ya in Rom. Mulong wa kulik yom yiney, in kwilej ayipila anch akankuny a antu. Pakwez kulemp kamu ni kuyikis akwau antu, awiy asala mudimu nakash mulong wa kuyikwash antu akwau kutambul ukwash wa yitenchik ya Nzamb mulong wa dipandish.
7. (a) Mulong wa kulik kwikal mu umwing nau in mangand, ov chom ik chayishikena in kwilej a pasak? (b) Ov mutapu ik wadingau ni kuyiman anyikel a chipolitik ni kulambul yitad, ni mulong wak?
7 In kwilej a Yesu ayizengola mud mwamuzengolau Yesu, chisu chivud kud amakurump a in kuyikel akad kuyijik nawamp. Chikalap nchik mwamu, piswimp mu muvu wa 56 C.C., mupostol Paul wayifundina in Kristu adinga mu Rom, ni kuyikasikesh chakwel “kuziyil kudi in kutakel, mulong kwikil ulabu [anyikel a chipolitik] wa kutakel nich wakad kudiokal kudi Nzamb.” Chidiap anch Yehova ndiy ukata kuyitek ni kuyitenchik anyikel a mangand, pakwez uyilikidil ikalaku djat ni pakuyikela Want wend pa divu diawonsu. Mud chifanyidina, Paul wayiyula in Kristu kuyilimish anyikel a mangand ni kulambul yitad.—Rom 13:1-7; Titus 3:1, 2.
8. (a) Ov in Kristu akwet chilik ik cha kuziyil kud in kuyikel a piur? (b) Ov mutapu ik walondulau in Kristu a kusambish chilikej cha Yesu?
8 Pakwez, kuziyil kud anyikel a chipolitik kukwet mimbu, kudiap kwa mu yom yawonsu bwat. Anch kudi kutadikijan pakach pa yijil ya Yehova ni yijil ya antu, antu akata kumusadil Yehova afanyidin kuziyil ku yijil yend. Tal yilondila buku umwing (On the Road to Civilization —A World History) piur pa in Kristu a kusambish: “In Kristu ading ni kulik kusal midimu yimwing ya anangand a in Rom. In Kristu . . . adinga ni kuman kwandam mu mudimu wa usalay mud kujiril kwa ritiy rau. Kadingap ni chisend cha pakampwil cha chipolitik. Kadingap ni kumwifukwil mwant.” Dirumburish dijim dia in Yuda ‘pidiayijidika nakash’ in kwilej kusal mudimu wa kulejan, awiy akula anch: “Tufanyidin kumuziyil Nzamb [mud mwant, NW] kupandikan kuyiziyil antu.”—Midimu 5:27-29.
9. (a) Mulong wak in Kristu a mu Yerusalem akwata chiyul cha kusal yasalau mu muvu wa 66 C.C.? (b) Ov mutapu ik chidia chilikej cha usey?
9 Piur pa matend ma chipolitik ni ma usalay, in kwilej alama kulik kwau kwengamin ku mutambu ap umwing. Mu muvu wa 66 C.C., in Yuda a mu Yudeya amubwambwila Sezar. Amasalay a in Rom eza swa amukwata Yerusalem. Ov chom ik chasalau in Kristu adinga mu musumb? Awiy avurika chiyul cha Yesu cha kubudik mu musumb. In Rom pachirikau kwinyim mu kachisu kakemp, in Kristu achinyina ushad wa Wit Yordan djat ni ku mutambu wa mikandu ya Pela. (Luka 21:20-24) Kulik kwiyandjikamu kwau chidi chilikej kud in Kristu ashinshamena ela kwikalaku mu machuku ma kurutu.
In Kristu Akad Kwiyandjik mu Milong ya Mangand mu Machuku Minam ma Kwisudiel
10. (a) Ov mudimu ik ukwatikenau nich Atuman’a Yehova, ni mulong wak? (b) Ov alikining kwiyandjik mu milong ik?
10 Ov rusangu ra mangand rimekeshin anch kudi chisak kanang cha antu mu machuku minam ma kwisudiel alondwila kamu nakash kulik kwiyandjikamu kwa in Kristu a kusambish? Mwaning, mwamu kamu musadilingau Atuman’a Yehova. Mu chirung chinech chawonsu, akat kudandamen kulejan anch Want wa Nzamb wawiy kusu mutapu umwing wa kulet chisambu, mashakamin mawamp, ni musangar ya chikupu kud antu akatina kutentam. (Mateu 24:14) Pakwez piur pa matend pakach pa michid, akat kulam kulik kwengamin ku mutambu ap umwing.
11. (a) Ov kulik kwengamin ku mutambu ap umwing kwa Atuman kushalijadin nchik ni yisalijok ya amakurump a yikumbu ya winzamb? (b) Ov mutapu ik umeningau Atuman’a Yehova yikatau kusal antu akwau piur pa politik?
11 Pakwez chinyim nau, amakurump a yikumbu ya winzamb ya mangand ipanin kamu nakash mu milong ya politik. Mwi ngand jimwing, abishop awiy akata kutakel makampany ma mavot chakwel avota ap bwat muntu kanang. Amwing pakach pau akat kusal midimu ya politik. Akwau akat kuyibachik antu asadina midimu ya politik chakwel akasikeshina maprogram mayikatishina. Pakwez, Atuman’a Yehova kakatap kwiyandjik ap pakemp mu politik. Kakatap kuyikangesh antu akwau kwikal mu chisak kanang cha chipolitik, kukimb mudimu wa chipolitik, ap kuvot. Yesu walonda anch in kwilejend kakez kwikalap ku mutambu wa mangand, chawiy lel Atuman’a Yehova kakatap kwiyandjik ap pakemp mu politik.
12. Ov yom ik yikata kumekan mulong wa kwipan nakash kwa marelijon ma mangand minam mu politik?
12 Mud mwatakelay kulond Yesu, michid yikat kurish njit chisu ni chisu. Ap tuyisak mukach mwa muchid tukat kurish njit. (Mateu 24:3, 6, 7) Amakurump a chirelijon akat kupanang ukwash wau chisu chawonsu ku muchid ap chisak chirishina nich muchid ukwau ap chisak chikwau, ni kuyikasikesh atubwebu au kusal chilik chimwing. Chibudikin? Yidi ya relijon umwing yikat kujipijan mwi njit mulong wa kushalijan kwa muchid ap kabil. Chinech chidi chinyim nich rusot ra Nzamb. —1 Yohan 3:10-12; 4:8, 20.
13. Ov yom ik yilejena jinsangu piur pa kulik kwengamin ku mutambu ap umwing kwa Atuman’a Yehova?
13 Pakwez, Atuman’a Yehova ading kamu akad kwiyandjikang mu matend mawonsu. Tour de Garde (mu Inglish) wa Kalang 1, 1939, walonda anch: “Antu awonsu adia ku mutambu wa Mwant kakwikalap ku mutambu ap umwing wa michid yirishina njit.” Atuman’a Yehova mu michid yawonsu ni mu mikadil yin yawonsu adandamedin kulam mwikadil winou. Kakatap kushil politik ni jinjit ja mangand njil ya kuyauril antu ap kujip ukadivar wau wa mangand mawonsu. Akat “kuchil jimpak jau ja misamun jikal nkasu, ni mirumbu yau kwikal tushol.” Chidiau akad kwengamin ku mutambu ap umwing, kakatap kwilej njit ap pakemp. —Isay 2:3, 4, NW; 2 Korint 10:3, 4.
14. Ov yom ik yayishikena Atuman’a Yehova mulong wa kushal aurikina ni mangand?
14 Ov chisu chibudikin chimwing cha kulik kwiyandjik kwau mu milong ya mangand? Yesu walonda anch: “Chawiy kiudianyap a mangand, . . . chawiy chikukisilanyau kudi mangand.” (Yohan 15:19) Atuman’a Yehova avud ayikasa mu rukan mulong wa kwikal kwau atushalapol a Nzamb. Amwing ayimesha mar nakash, ap kand kuyijip, mud kamu mwayisalau in Kristu a mu mivu chitot ya kusambish. Chidi mulong Satan, ‘nzamb uyikedila mangand minam,’ ukat kuyizengol atushalapol a Nzamb, akad kwikal ku mutambu wa mangand. —2 Korint 4:4; Kujingunik 12:12.
15. (a) Ov kwisu kushejidina michid yawonsu, ni yom ik yifanyidinau kwipuk nakash Atuman’a Yehova? (b) Mulong wak kwiyauril ku mangand udi mulong umwing wa usey?
15 Atushalapol a Yehova akwet musangar anch kadiap a mangand, mulong michid yawonsu ya mangand yikat kushejin kwisudiel yau ku Harmagedon. (Daniel 2:44; Kujingunik 16:14, 16; 19:11-21) Tukwipuk chipupu chinech mulong tudiap mu umwing ni mangand. Mud antu adia mu umwing pa divu pawonsu, tudi ashinshamena ku Want wa mwiur wa Nzamb. Chakin, anch twalik kwikal a mangand, akutwish atupipej ap kutuzengol. Yawonsu yiney yikupwa katat kamu ak, mulong mangand minam mayimp matakedilay Satan akumajiyish chikupu. Ku mutambu ukwau, antu amusadidila Yehova akez kushakam chikupu mu mangand masu matentamina mwishin mwa Want wa Nzamb. —2 Pita 3:10-13; 1 Yohan 2:15-17.
Misamb ya Kuchirikin
• Ov mutapu ik wamekeshay Yesu chirumburikina kulik ‘kwikal a mangand’?
• Mwikadil ik wadingau nich in Kristu a kusambish pantaliken (a) ni spiritu wa mangand, (b) nau anyikel a mangand ni (c) kulambul kwa yitad?
• Ov mutapu ik wamekeshinau Atuman’a Yehova a pa chirung cha katat kulik kwiyandjik kwau kwa Ukristu mu milong ya mangand?
[Chipich chidia pa paj wa 165]
Yesu warumburila anch ndiy nau in kwilejend ‘kadingap a mangand’