Shapitre Wa Dikum Ni Sambwad
Sadil Mwom wa Kumulondul Nzamb mu Dijuku Diey
1. Kusadil umutakel wa Dizu dia Nzamb kwakwashin nchik uruu wa antu avud?
YEHOVA ndiy Sakatang wa uruu, ni Dizu diend diletin umutakel upandikena kuwap mulong wa majuku. Mud chibudikin cha kusadil umutakel winou, antu avud atungin uruu umwing uwamp nakash. Chisangareshin kuman anch, amwing adinga ni kushakam kusu mwamu wakad kwifundish ku leta, umutakel winou wayibachikin kuya ni kufundish uruu wau kwa mburamatad. Akwau alika kusanken pamwing wakad kwatijan. Amakundj akweta chisum adinga ni kuyimesh akajau ni anau mar, ilejin kumekesh uwamp ni rukat ridimukina.
2. Ov mwom wa dijuku dia Ukristu ukwet yom ik?
2 Mwom wa dijuku dia Ukristu ukwet yom yivud, mud mutapu wa kuman kulab kwa uruu, yitusadila mulong wa kuwanyish yisend yetu mu dijuku, ni mutapu tushicha mu dijuku dietu. (Efes 5:33–6:4) Ap anch tukutwish kwijik yilondila Baibel piur pa mwom wa dijuku, pakwez kusadil yiyul ya Baibel udi ni wawiy mulong ukwau. Kwikil muntu ap umwing pakach petu usotila kwikal mud antu afishay nich Yesu mulong wa kujiril yijil ya Nzamb. Adinga ni kutong ya makasu anch kwipan kusu mu milong ya relijon kuwanyidin. (Mateu 15:4-9) Tusotinap kwikal ni mulad umwing wa mwom wa kumulondul Nzamb pakwez tukanganya kuusadil ‘mu dijuku dietu ayinetu.’ Pakwez, tusotil kumekesh mwom wakin wa kumulondul Nzamb, “ukata kulet mapit mavud.” —1 Timote 5:4; 6:6; 2 Timote 3:5.
Ov Uruu Ufanyidin Kulab Mivu Yinch?
3. (a) Ov yom ik yishikedina mauruu mavud, ni chom ik tufanyidina kujijaman kusal? (b) Nich kusadil Baibel wey, akul ku yipul yidia mwishin mwa paragraf winou.
3 Moj wa uruu ukat kukatuk kamu chiswakela. Antu amwing atijana pasutil kal mivu yivud akat kukwat mupak wa kujip uruu ni kwatijan ni muntu mukwau. Chidingap kand chishimokishina kutesh anch ansand atijadina alikijan kal kwinyim kusu kwa machuku makemp. Yikalap nchik yisadilau antu akwau, etu tufanyidin kusot kumusangaresh Yehova. Chawiy lel, tushinshikinany yipul yilondwilay ey ni mifund chakwel kuman yilondila Dizu dia Nzamb piur pa kulab kwa uruu.
Anch ikundj ni mband atijan, ov mivu yinch yifanyidinau kushakam pamwing? (Marko 10:6-9; Rom 7:2, 3)
Ov chom ik chimwing kusu chitiyidinay Nzamb chikutwishay muntu kujipin uruu ni kwatan ap kwachik kand? (Mateu 5:31, 32; 19:3-9)
Ov mutapu ik ukatay kuman Yehova kujip uruu kwakad kulimish Dizu diend? (Malakiy 2:13-16, NW)
Ov Baibel ukasikeshidin kulikijan mud mutapu wa kupwish milong? (1 Korint 7:10-13)
Ov chisu ik chikutwishau kwitiy kulikijan? (Kuseng 11:5; Luka 4:8; 1 Timote 5:8)
4. Ov mulong wak mauruu mamwing makat kulabang?
4 Mauruu mamwing makat kusal mivu yivud, makat kulabang. Ov mulong wak? Kuchingel kukas uruu anch ngatan ni ngachik akul mu manangu ni yitongijok chiwapil, pakwez chidi kand cha usey nakash kuman mbay wa uruu ukweta yisakin ya chilik chimwing ni ukutwishay muntu kwambamb nend patok milong yawonsu. Pakwez, chipandikena kand usey, chidi kuman mbay wa uruu umukatina Yehova ni ukata kulimish Dizu diend mud dishin dia kupwishil milong. (Kuseng 119:97, 104; 2 Timote 3:16, 17) Muntu mud winou kakez kwikalap ni mwikadil wa kwel anch ang yom yidiap kand nawamp, ukutwish chisu chawonsu kulikijan ni mwin kwolikwend ap kujip nend uruu. Kakusadilap yilim ya mwin kwolikwend mud dilikishin kud ndiy dia kulik kusadil yisend yend amwinend. Kakuyichinap, pakwez, ukusal usu wa kupwish yikokujol ni kuman mutapu ufanyidina kuyipwish.
5. (a) Ov kushinshaman kud Yehova mu uruu kurumburikin ik? (b) Kwikalap nchik rupompat, ov kuwap ik kukutwisha kubudikin ku kulam yijidik ya Yehova?
5 Satan ukat kulondang anch pa chisu tumena mar, tukez kusha jinjil ja Yehova. (Job 2:4, 5, NW; Jinswir 27:11) Pakwez avud pakach pa Atuman’a Yehova amana mar mulong wa kwikal ni mband ap ikundj mwin kuyizengol kalikap machip mau ma mu uruu. Akat kudandamen kwikal ashinshamena kud Yehova ni ku yijil yend. (Mateu 5:37) Antu amwing adinga ajijamena ikala ni musangar wa kuman mwin kwolikwau wibomb nau pamwing mu kumusadil Yehova—ap kupwa kwa mivu yivud ya rupompat! (1 Pita 3:1, 2) Kud in Kristu akweta in kwolikwau akad kumekesh ap pakemp chijingidij cha kukarumuk ap akweta in kwolikwau ayilika kal mulong akat kumusadil Yehova, ni yawiy ij anch akez kuyiyukish mulong wa kumekesh kwau mwom wa kumulondul Nzamb mu dijuku. —Kuseng 55:22; 145:16.
Muntu ni Muntu Uwapidil Kusal Mudimu Wend
6. Chakwel kwikal ni uruu umwing wa musangar, ov ditenchik ik difanyidina kulimish?
6 Chakin, kwikal ni uruu umwing wa musangar kwitining yivud kupandikan kusu kushakam pamwing. Chidi cha usey anch muntu ni muntu alimisha ditenchik dia Yehova dia umutu. Chinech chikat kupwish kanvundangesh ni kulet yovil ya chisambu mu chikumbu. Mu 1 Korint 11:3 (TMK), tutangin anch: “Mutu wa muntu wawonsu ndiy Kristu; ni mutu wa mband ndiy ikundj; ni mutu wa Kristu ndiy Nzamb.”
7. Ov mutapu ik ufanyidinau kusadil umutu mu dijuku?
7 Ov wateshang yalondang verse winou cha kusambish? Mwawiy, ikundj mwawonsu ukwet Mutu, ndiy kamu Kristu, ufanyidinay kuziyil. Chirumburikin anch ikundj ufanyidin kusadil umutu wend mutapu umwing umekeshina ngikadil ya Yesu. Kristu ukat kumuziyilang Yehova, ukatining nakash chikumangen, ni kuchilam. (1 Timote 3:15) Ndiy “wipana amwinend mulong wa kuyambat awiy.” Yesu kadiap mwin kwitutul ni wakad kuyitongin antu akwau, pakwez ‘ushimpishin muchim ni kwitudish.’ Antu adia mwishin mwa umutu wend amening ‘kwiswedish kwa mipim [yau].’ Anch ikundj washakam ni dijuku diend mu mutapu winou, umekeshin anch umuziyidil kamu Kristu. Mband mwin Kristu ufanyidin chad lel kuchiman anch chidi cha ukwash ni chiswedishina chakwel kusadil pamwing ni nfumwend ni kuziyil umutu wend. —Efes 5:25-33; Mateu 11:28, 29; Jinswir 31:10, 28.
8. (a) Ov mulong wak chikutwish kumekan anch milad yimwing ya Ukristu yikwetap kway yibudikin yifanyidina mu yikumbu kampand? (b) Ov chom ik tufanyidina kusal anch mikadil mud yiney yabudikin?
8 Pakwez, kukutwish kubudikin yikokujol. Chipim kampand cha rukis ra kwikal utakedinau kud antu akwau chikutwish kwikal chatanda kal mij, kurutu kwa muntu kanang mu dijuku kusambish kusadil yany ya Baibel. Yisu yimwing kwit ap kwipul yom nich rukat ni yaku yiwamp yikutwish kumekan mud yikwetap mabuj. Twij anch Baibel ulondil anch likany “kuswej kwawonsu, ni ujim ni kubarok ni kusaalan masaal.” (Efes 4:31) Pakwez ang amwing ameken mud kateshinap mutapu ukwau wa kulond ching kusu kuswej ni kubarok, ov chom ik tufanyidina kusal? Mwaning, Yesu kadingap ni kuyilikej antu adinga ni kumuzengol ap kumusaal, pakwez wadinga ni kumuchingejin Tatukwend. (1 Pita 2:22, 23) Chawiy lel anch kwabudikin mikadil ya mar mu chikumbu, mekesh uman wa kwipan kud Nzamb kusutil kumulembil Yehova mulong wa kutambul ukwash wend pa ndond pa kulondul jinjil ja mangand. —Jinswir 3:5-7.
9. Pa ndond pa kumanang kusu ching yilim, ov yom ik yilejau amakundj avud in Kristu kusal?
9 Kukarumuk kukwezangap chisu chawonsu kapamp kamwing kamu, pakwez yiyul ya Baibel yidi ya ukwash nakash anch ayisadidil nich kushimpish muchim ni mushiku. Amakundj atena avud amana anch uruu wasambisha kuwap pijikau mutapu wadingay Yesu ni kushakam ni chikumangen. Chikumangen kachisadinap kud antu awanyidina. Pakwez, Yesu uchikatin, uchishidil chilikej chiwamp, ni usadidil Mifund mulong wa kuchikwash kuya kurutu. Wapana mwom wend mulong wa kuchambat. (1 Pita 2:21) Chilikej chend chayikasikesha amakundj atena in Kristu avud kusadil mutapu uwamp umutu wau ni kupan ukwash wa rukat mulong wa kurijek uruu wau. Chilikej chinech chikat kubudish mabuj mapandikena kuwap kupandikanamu kukimb ching yilim ap kulik kulondishijan.
10. (a) Ov mutapu ik ukutwishay ikundj ap mband—ap muntu mwawonsu ulondila anch ndiy udi mwin Kristu— kuyiletin akwau mar mu chikumbu? (b) Ov chom ik chifanyidina kusal mulong wa kurijek mwikadil winou?
10 Ov mutapu ik tukutwisha kusal anch ikundj kabangidinap kwend maswir ma muchim ma dijuku diend ap ang kakwatinap kwend mipak ya kurijek misamb ya Baibel ni mijikit yikwau mu dijuku? Ing anch mband kasadidinap kwend pamwing ni nfumwend ni kamekeshinap kuziyil kwitinay Nzamb? Amwing amening yibudikin yiwamp kusutil ku kwikal nich misamb ya dijuku ya kalimish piur pa yikokujol. (Disambishil 21:10-12; Jinswir 15:22) Pakwez ap anch yibudikin yidiap yawonsu yadingau ni kuchingejin, muntu ni muntu ukutwish kuwejin ku mwikadil umwing uwamp wa mu chikumbu nich kukudish mabuj ma spiritu wa Nzamb mu mitambu yawonsu ya mwom wetu, ni kumekesh kutongin kwa rukat mulong wa yid yikwau ya dijuku. (Galatia 5:22, 23) Kuya kurutu kukumekan, chidiap nich kuchingel anch antu akwau asala chom kanang, pakwez nich kusal yawonsu tukutwisha, ni kumekesh chad lel anch tukat kusadil mwom wa kumulondul Nzamb. —Kolosay 3:18-21.
Kwa Kuman Yakul
11, 12. Ov yom ik yapanay Yehova mulong wa kutukwash kuwapish mwom wa dijuku?
11 Kudi misul yivud kukutwishau kukarumukin antu mulong wa yiyul piur pa milong ya majuku mau. Pakwez twij anch Dizu dia Nzamb dikwet chiyul chimwing chipandikena kuwap, ni tudi in kujikitish anch kusutil dirijek diend dimekena, Nzamb ukat kutukwash kudisadil. Ov ukat kwisakin kamu sens ukwash winou? —Kuseng 119:129, 130; Mike 4:2.
12 Kuwejin ku kushikang ku yikumangan, ov witekidinaku kal yisu ya kwilej Baibel mu dijuku? Majuku masadina mutapu winou makutwish kwikal mu uumwing mu difukwil. Mwom wa dijuku diau akat kuuyukish pasadidilau Dizu dia Nzamb mu yawonsu yisadilau. —Kuvurik Yijil 11:18-21.
13. (a) Ang tukwet yipul piur pa milong ya dijuku, ov ndond ik tukutwisha chisu chivud kuman ukwash uswiridikina? (b) Ov yom ik yifanyidina kumekan mu mipak yetu yawonsu tukwatina?
13 Ukutwish kwikal ni yipul piur pa milong ya dijuku. Chilikej, mutapu ik tukutwisha kuman milong ya kulik kuval ap ya uvud wa an ufanyidina kuval? Ov chiwapin kudiosh madikaj? Anch mwan kamekeshinap kwend kusanger mu yom ya muspiritu, ov mu chisik ik chifanyidinau kumwit kwinungin ku difukwil dia dijuku? Yipul yivud mud yiney ayisambinap kal kand mu mikand yipalangeshinau kud Atuman’a Yehova. Ileja kusadil mikand yikwashina kwilej Baibel, mud ma index, mulong wa kuman yakul. Ang ukwetap mikand yijimbwilau mu index, yang ni kutal ku kapalikany ka abuku kadia ku Chot cha Want. Ap kand ukutwish kutang mikand yiney pa ordinater wey. Ukutwish kand kwisambin yipul yey nau in Kristu amakundj nau amband akudila kal muspiritu. Pakwez kangal wachingej chisu chawonsu chakul cha kwel anch mwawiy ap bwat ku chipul ni chipul. Chisu chivud ufanyidin kukwat mupak, amwiney ap mud ambay a uruu. Chad lel, kwat mipak yimekeshina anch ukat kusadil mwom wa kumulondul Nzamb chidiap kusu kurutu kwa antu awonsu pakwez ni ku chikumbu kand. —Rom 14:19; Efes 5:10.
Misamb ya Kuchirikin
• Ov kumushinshamen Yehova kwambaten nchik nich kushinshaman mu uruu wa muntu?
• Pitukweta milong mu dijuku, ov chom ik chikutukwasha kusal yimusangareshina Nzamb?
• Ap anch yid yimwing ya dijuku dietu yikat kurumbuk, ov chom ik tukutwisha kusal mulong wa kurijek mwikadil?
[Chipich chidia pa paj wa 155]
Umutu w’ikundj ufanyidin kumekesh ngikadil ya Yesu
[Chipich chidia pa paj wa 157]
Kwilej Baibel pakad kujing mu dijuku kukat kukwashang kuditek mu uumwing