Yesu Wamuvumbul Kal Mwan Ikundj Wa Mwadiamufu

Kupwa kwa kumwok kashalapol wa mukurump wa amasalay, Yesu wadiokala mu Kapernaum mulong wa kuya ku Nayin, musumb wading piswimp mu akilometre 32 kwindum. Kayap amwinend. Waya pamwing ni in kwilejend ni yisak ya antu. Chimeken anch chading chisu cha urel padingau piswimp ni kushik ku Nayin. Kwinikwa kwawiy kwatanau in Yuda avud ading ayil mu kujikan. Nsand wafa ading amusendin ayil nend pol pa musumb mulong wa kumujik.

Maku wafisha nsand winou wading ni ushon nakash. Wading mwadiamufu, katat mwanend ikundj umwing kusu wafa kal kand. Pafay nfumwend, mband winou washala ni mwan winou wakatay nakash. Tong mutapu wading umukatinay mwan winou, mulong wading uchingejin anch mwan winou ndiy ukeza kumuking ni kumulam mu machuku ma kurutu. Katat mwan winou niyend wafa kal kwend. Chad, muntu ik ukutwishay kushakam nend ni kumulam?

Pamumanay mwadiamufu winou, Yesu wanenganana nakash mulong wa yom ya ushon yamushikena mband winou. Nich ranaken rawonsu wamuleja mwadiamufu winou nich kashinsh anch: “Lik kudil.” Pakwez, Yesu wasala kand yom yikwau. Yesu waseja piswimp ni wakwata ku chital chamusendinau nsand winou wading wafang kal. (Luka 7:13, 14) Yom yasalay yashimokisha antu ading adidina ni imana kapamp kamwing. Antu avud iyipula anch: ‘Yom ik yikimbinay kulond ni yom ik yikimbinay kusal?’

Chawiy, yom ik yatongau antu aya pamwing ni Yesu ni imenap ayinau yilay yivud yasalay Yesu ya kuyok antu avud? Chimeken pamwing ap anch awiy ading kandikal amumanap Yesu wayivumbul afu. Pakwez, kudi divumbuk diasadika pakur, ov, Yesu ukutwish niyend kuvumbulan? (1 Ant 17:17-23; 2 Ant 4:32-37) Yesu walonda anch: “Nsangarum, nakulej anch lank!” (Luka 7:14, TMK) Yawiy yom yasadika. Nsand winou walanka ni wasambisha kulond! Yesu wamupana nsand winou kudi makwend wading ni ushon. Mband winou kadingap amwinend.

Chisu chamanau antu anch nsand winou wavumbuk kal kamu, awiy amushimana Yehova Mwin Kupan Mwom anch: “Muprofet mujim walankin kal mukach mwetu.” Antu akwau ijika midimu yikash yasalay Yesu, alonda anch: “Nzamb wayital kal antu end.” (Luka 7:16, TMK) Rusangu riner rishimokishina rapalangana pakad kulab mu misumb yading piswimp, pamwing ap rashika mu musumb wa Nazaret mwavadikinay Yesu wadinga mu akilometre 10. Rusangu riner rashika kand kwindum kwa ngand ya Yudeya.

Yohan Mubatish wading uchidi mu rukan, pakwez, wasangera yom yasalay Yesu. In kwilej a Yohan amulejamu ni ndiy rusangu ra yilay yiney. Mutapu ik wasalay?