Yohan Ukatin Kutesh Jinsangu Piur Pa Yesu

Kudiosh pamutekau Yohan Mubatish mu rukan, wawanyish kal piswimp muvu umwing. Pakwez, ndiy udandamedin kutesh yom yishimokishina yisadinay Yesu. Tong bil mutapu mwovay Yohan pamulejau kudi in kwilejend anch Yesu wavumbulang mwan ikundj wenday mwadiamufu wa ku Nayin. Pakwez, Yohan ukatin anch Yesu amwinend amuleja yom yawonsu yisadinay. Chawiy, Yohan wayituma in kwilejend aad. Wayituma kusal ik? Ayituma mulong wa kumwipul Yesu anch: “Ov, ey Yey twadia tuchingedila kwez, anch tufanyidin kuchingel mukwau?”—Luka 7:19.

Ov, chipul chinech chimeken anch chidi chipul chisu? Yohan udi muntu mwin kwitiyij, mulong pamubatishay Yesu kwasut kal piswimp mivu yaad, wamana mutapu spiritu wa Nzamb mwamushirikinay Yesu ni watesha dizu dia Nzamb dialonda anch winou ndiy mwanam mukatish. Tufanyidinap kutong anch ritiy ra Yohan raziya. Chikwau kand, Yesu wading kandikal alondap yom yiwamp piur pa Yohan mudi mu kulonday pa chisu chinech. Pakwez, anch Yohan kidjidjekap, mulong wak wamwipula Yesu chipul chinech?

Yohan wakimba anch Yesu amwinend alonda anch ndiy Mesia. Chom chinech chela kumukasikesh Yohan wadinga ni ushon padingay mu rukan. Chimeken kamu anch chipul chipulay Yohan chading ni diyingishin dikwau dia usey nakash. Yohan wading wij nawamp uprofet wa Bibil walonda anch Uzizidilau Many kudi Nzamb ukwikal mwant ni ukwikal kand mupandish. Pakwez, angond avud asuta kupwa kwa kumubatish Yesu, Yohan wading mu rukan. Chawiy, Yohan wipula chakwel ijika anch kukwez muntu mukwau ukumuswinkana Yesu, ukeza kuwanyish kamu uprofet wawonsu wasambelau kulond piur pa Mesia.

Pa ndond pa kuyilej kapamp kamwing in kwilej a Yohan anch: ‘Chakin kamu Yam wading uchingedinanya,’ Yesu wamekesha usu wamwinkishau kudi Nzamb pokay antu avud ading ni mayej kushalijan. Kupwa, wayileja in kwilej inay anch: “ Yangany ukamulejany Yohan yom yiuteshilanya ni yiumenanya. Amputames akat kuman, ayilim akat kwend, in musong wa mak akat kuyerik, atujikamatu akat kutesh, afu akat kuvumbuk, ni rusangu ruwamp akat kurulejan kudi atuzwendj.”—Mateu 11:4, 5.

Chimeken anch pipulay Yohan chipul chinech wading ni ruchingej anch Yesu ukutwish kusal yom yivud kusutamu yom yisadinay pamwing ap ukutwish kumudiosh Yohan mu rukan. Pakwez, Yesu wamuleja Yohan anch kafanyinap kuchingej yom yikwau yisutinamu yilay yisadinay.

Pachirikau in kwilej a Yohan, Yesu wayileja antu anch Yohan udi mujim kupandakanamu muprofet. Yohan udi “muruu” wa Yehova wabwakau mu mukand wa Malakiy 3:1. Ndiy kand muprofet Elija wasambelau kulejan mu mukand wa Malakiy 4:5, 6. Yesu warumburila anch: “Chakin kamu nakulejany anch, pakach pa an avalau kudi amband kikwadingap mukwau umupandakena Yohan Mubatish kujimb; pakwez muntu [upandakena] kukep mu Want wa mwiur ndiy umupandakenamu ndiy kujimb.”—Mateu 11:11, TMK.

Palonday Yesu anch muntu upandakena kukep mu Want wa mwiur umupandakenamu Yohan kujimb, Yesu wamekesha anch Yohan kakwikalap mu Want wa mwiur. Yohan warijeka kwez kwa Yesu pakwez wasambela kufa kurutu Yesu afungula njil ya antu akuya mwiur. (Hebereu 10:19, 20) Chawiy, Yohan wading kamu muprofet ushinshamena wa Nzamb ni ukusanger kamu kushakam panap pansh mu winyikel wa Want wa Nzamb.