Mudimu Wa Yesu Uyil Kurutu Kupandakanamu Wa Yohan

Kupwa kwa kusal musambu wa Pasak pa kapepil ka muvu wa 30 C.C., Yesu nau in kwilejend adiokal kal mu Yerusalem. Pakwez, kachirikap kapamp kamwing kwol kwau ku Galalia. Aya mwi ngand ya Yudeya, kwawiy kwabatishau antu avud. Yohan Mubatish wasala niyend mudimu winou piswimp muvu umwing, ni in kwilejend amwing adandamena kumulondul pamwing ap djat ni mwinkurubuk ya Wit wa Yordan.

Yesu kabatishap muntu ap umwing—pakwez, in kwilejend awiy asala mudimu winou wayilejay Yesu. Tukutwish kulond anch, mudimu wasalay Yesu ni mudimu wasalay kand Yohan wading wa kuyifundish in Yuda akarumuka ku yitil yau pantaliken ni Chijil cha Nzamb cha manswik.—Midimu 19:4.

Pakwez, in kwilej a Yohan ova mukau ni asambisha kwinan piur pa Yesu ni alonda anch: “Muntu wading nend [Yesu] . . . katat ukat kubatish, antu avud ayil kudi ndiy.” (Yohan 3:26) Pakwez, Yohan kwovap mukau. Wasangara mulong mudimu wa Yesu waya kurutu ni wakata anch in kwilejend niyau asangar. Yohan wayivurisha anch: “En ayinen udiany atuman amam pinalonda anch: ‘Am kinidiap Kristu, pakwez am antuma kwam kutakelaku kurutu kwend.’” Wapana chilakej mulong wa kuyovakesh pa mulong winou anch: “Mband udi wa ngatan, pakwez murund nend wa ngatan ukat kwiman piswimp nend ndiy mulong wa kutesh, ukat kwov musangar pakutesh dizu dia amwinend ngatan. Musangar winou wawiy wamam, katat wawanyin kal.”—Yohan 3:28, 29.

Yohan udia mudi murund wa ngatan wasangara nakash mwa ngond akemp kurutu apana in kwilejend kudi Yesu. In kwilej amwing amulondula Yesu djat ni payizizilau many nich spiritu utumbila. Yohan wakata anch in kwilejend ashala nend amulondul Yesu. Chawiy, chitongijok cha Yohan chading cha kurijek njil ya mudimu wa Kristu. Yohan warumburila anch: ‘Ndiy ufanyidin kuya kurutu kwimpandakanamu am.’—Yohan 3:30.

Pakwez, kwading Yohan mukwau wasambisha kumulondul Yesu, ndiy wafunda rusangu ra mwom wa Yesu ni chisend chend cha kuyikol antu anch: “Ndiy udiokila mwiur udi mujim kupandakanamu antu awonsu . . . Tatuku umukatin Mwan, ndiy wapana kal yom yawonsu ku chikas chend. Muntu mwawonsu umwitiyijina Mwan ukwet mwom wa chikupu; muntu mwawonsu wakad kumuziyil Mwan kakez kwikalap nich mwom winou, pakwez ujim wa Nzamb udi padiay ndiy.” (Yohan 3:31, 35, 36, NWT) Chid cha usey mud ik kudi antu kwijik uyakin winou!

Chisu chikemp kupwa kwa Yohan Mubatish kulond anch mudimu wend ni chisend chend yikuyap kurutu, amukwata kudiay Mwant Herod. Herod wamusenda Herodias, mukajend wa mwanamakwend Filip ni wamwata. Palonday Yohan patok piur pa chisal chinech cha makaj, Herod wamukwata ni wamuteka mu rukan. Pateshay Yesu anch Yohan amukwat kal, wadiokala mu Yudeya pamwing nau in kwilejend ni ‘waya mu Galalia.’—Mateu 4:12; Marko 1:14.