Yesu Umwokin Nsand Ukweta Chilembil

Pashirikay Yesu, Pita, Jakobu ni Yohan ku mukandu, asankana chisak chijim cha antu. Kwading chom chimwing chiyimp chashikena. Alej a yijil akumangana pamwing ndond yadingau in kwilej ni asambisha kutadikijan. Antu akashimuka pamumanau Yesu ni aya mau mulong wa kumulangwish. Yesu wayipula anch: “Ov, yom ik utadikijadinanya?”—Marko 9:16.

Muntu umwing wading mu chisak cha antu inay wasa manungun kurutu kwa Yesu ni wamuleja anch: “Nsalejam, nakuletilanganyay mwanam ikundj, mulong ukwet chilembil umukangeshina kulond. Kwawonsu kukumusarumukinay, chilembil ukat kumwas pansh, chad ukat kutupul mafuril ku kan, ni kwidia ku mazeu, ni kuumidin chau. Nayipulang in kwilejey chakwel amudioshay, pakwez awiy katwishinap kwau.”—Marko 9:17, 18.

Pamwing ap alej a yijil ayilonda nayimp in kwilej, mulong usu wau wasalangau wakanganya kumwok nsand winou. Pa ndond pa kumwakul tatukwend a nsand winou, Yesu waleja chisak cha antu anch: ‘Aa, antu a chirungu chakad ritiy ni arumbangena, Ov, machuku minch minifanyidina kushakam ni yenen? Ov, chifanyidin am kukulamany kwen mwamu? Yesu walonda mazu minam makash mulong wa alej a yijil ading aletishina kanvundangesh kudi in kwilejend padingay ndiy kwikil. Chawiy Yesu wamutala tatukwend a nsand winou wading wovila ushon nakash kupwa wamuleja anch: “Muletany mwan kudi am!”—Mateu 17:17.

Pading pamuletinau nsand winou kudi Yesu, chilembil wadingay nich wamwasa pansh ni wasambish kwikwany nakash. Nsand winou wasambisha kulangumuk pansh ni yifuril yasambisha kubudik ku kan. Yesu wamwipula tatukwend anch: “Ov, mivu yinch yalalay kal ni chilembil winou?” Tatukwend a nsand winou wakula anch: “Kudiosh kamu ku wanikanch wend. Tupamp tuvud wading ni kumudjibol mu kasu ap mu mem mulong wa kumushesh. Anch ey ukutwish kusal chom, itwovilap riy, amboku, tukwasha!”—Marko 9:21, 22.

Tatukwend a nsand winou waziya, mulong ap in kwilej a Yesu akanganya kumwok mwanend. Pamwakulay tatuku winou wading waziyang kal, Yesu wamukasikesha nich kashinsh anch: “Ov, mulong wak walonda kal anch: ‘Anch ukutwish kusal chom?’ Yom yawonsu yiswakel kwau kudi muntu ukweta ritiy.” Pakad kulab tatuku winou walonda nich dizu dia piur anch: ‘Nikwet ritiy, pakwez nkwasha chakwel ritiy ram ruwanyin!’—Marko 9:23, 24.

Yesu wamana chisak cha antu chading chiyil kudi nsand winou. Chawiy antu awonsu ading amutadin nsand winou, kupwa Yesu wamuleja chilembil anch: “Ey, chilembil, umukangeshina mwan kulond ni kutesh, nakulej kal anch: Mudiokala kamu mwan, kangal wez wamuchirikin kand!” Padiokalay chilembil winou, nsand winou watoya nakash ni wasambisha kwikwany kand. Kupwa nsand winou walengumuka. Pamanau mwamu antu avud alonda anch: “Mwan wafa kal!” (Marko 9:25, 26) Pakwez, Yesu wamukwata nsand winou ku chikas ni wamulangwisha, “pawiy pinipa mwan wayerika.” (Mateu 17:18) Chimeken patok anch, antu ashimoka nakash mulong wa yom yasalay Yesu.

Kwisambishin payitumay Yesu in kwilejend mu mudimu wa kulejan ading ni usu wa kwopat ayilembil. Chawiy padingau ayinau mu chikumbu, in kwilej amwipula Yesu ku ujindj anch: “Ov, mulong wak etu twakanganyang kumudiosh chilembil?” Yesu wayirumburila anch chading mulong wa kuburen kwau kwa ritiy chawiy wayileja anch: “Chilembil wa mutapu winou pa kudiokal ching kusu nich kulembil.” (Marko 9:28, 29) Ritiy rikash pamwing ni kumulembil Nzamb mulong apana ukash wend yawiy yading ya usey mulong wa kumwopat chilembil winou wadinga ni usu ukash.

Kupwa Yesu walonda anch: “Nakulejany chakin, anch ukwetany ritiy rujim mudi karubut ka mutond, upidilau anch mutard, ukutwishany kuwel mukandu ou anch: ‘Diokal pinap yang kwa!’ Chad mukandu ukuya. Ukutwish kusalany yom yawonsu.” (Mateu 17:20) Chita kwikal ni ritiy rikash mud ik!

Yoziu ni mar mawonsu makutwisha kukangesh kuya kurutu mu mudimu wa Yehova yikutwish kwikal mudi mikandu yimwing yijim ya chifanikesh yakad kutwish kushemunin. Chawiy anch, twakudish ritiy, tukutwish niyetu kupandakan yoziu ni mar yidia mudi mikandu yiney ya chifanikesh.