Ngond wa 1

Nlel tushich piswimp ni kwinsudiel kwa machuku ma nsudiel. Tumen antu ayimp avud nakash. Akat ‘kusapurik mudi masuk.’ (Kus. 92:7) Chawiy tukatap kushimwok pitukata kuman antu avud akat kulik yom yilondinay Nzamb anch yitentamin. Paul wayileja in Kristu anch: “Ku mulong wa kuyip ikalany mudi anikanch,” pakwez “chifanyidin kutongijok mudi mukat kutongau amakurump.” (1 Kor. 14:20) Mutapu ik tukutwisha kusal mwamu? Tutanin chakul mu mufund wa nlel ukweta chikunku chilondina anch: ‘Akata kumukimb Yehova akat kutesh yom yawonsu.’ Chinech chirumburikin anch akutwish kutesh yom yin yawonsu yidia ya usey mulong wa kumusangaresh Yehova. Jinswir 2:7, 9 utufundishin kand anch Yehova ukat kupan manangu kudi antu akata kusal yom yiwamp. Mudi chibudikin, akutwish “kwijik kutentam, ni win yakin, ni kuwap, ni jinjil jawonsu jiwamp.” Nowa, Daniel ni Job ading ni manangu minam ma Nzamb. (Ezek. 14:14) Ni mwawiy kand musadinau antu a Nzamb nlel. Chidi nchik ku mutambu wey? Ov, ukwet manangu ma Nzamb? Mulong wa ‘kutesh yom yawonsu’ ukweta nich kuswir mulong wa kumusangaresh Yehova, ufanyidin kumwijik nawamp. w18.02 3-4 par. 1-3

Chakin kamu, kwikil muntu ufanyidina kumushindin ap kumubachik mwan ap mwin kwilej wa Bibil kutambul dibatish. Yehova kakutushindilangap anch tumusadin. (1 Yoh. 4:8) Chisu tuyifundishina akwetu, tufanyidin kuyikwash ijika mulong wak chidi cha usey kudi awiy kukudish urund wau ayinau ni Yehova. Kupwa anch mwin kwilej wa Bibil wasanger kamu kwijik uyakin piur pa Nzamb ni wakat kamu kusal yom yawonsu yifanyidinau in Kristu akin kusal, ukukat chad kutambul dibatish. (2 Kor. 5:14, 15) Muntu kafanyidinap kwikal ni mivu kanang chakwel atambul dibatish. Antu ashalijadin, ni in kwilej amwing akat kuya kurutu swa swa kusutamu akwau. Dichuku ditambwilingay muntu dibatish diding dichuku dia musangar nakash. Chiding kand chisu cha kutongin nakash piur pa kurumburik kwa kwipan ni dibatish. Mulong wa kusal yom yawonsu yimwitinau mwin Kristu wakin kusal udi mudimu ukash. In kwilej a Yesu kafanyidinap kand kwikal “aom mulong wa ayinau kusu, pakwez mom yau yikwikal yendendiy wayifila, chad wavumbuk wikal kand mwom mulong wa kuyambat awiy.”​—2 Kor. 5:15; Mat. 16:24. w18.03 7-8 par. 14-17

Widjidjekinap kal mulong wa kwakan? Anch chidi mwamu, washadisha chisu chiwamp cha musangar ni cha kuta urund ukudandamena chikupu. Kwikal mwin kwakan udi mutapu uwamp nakash wa kulik kwikal ni yovil ya kwikal amwiney. Chawiy mulong wak antu amwing akat kwidjidjek kwakan? Kudi mayingishin makemp. Diyingishin dimwing didi anch antu a Yehova akwatiken nakash ni akwet yisend yivud. Amwing akutwish kuman anch kakwetap chisu ap usu wa kwikal mwin kwakan. Anch chidi mwam, ukutwish kuswimp program wey chakwel utwisha kumekesh ni kwitiy kwakan. Chinech chidi cha usey mulong Bibil utukasikeshin kwikal in kwakan. Chawiy kwakijan chidi chom chiwamp nakash cha kusal. Pakwez mulong wa kumekesh kwakan, tufanyidin kusutish chisu chikemp mu kusal yom yakad usey nakash. w18. 03 18 par. 13-14

Pakach pa antu awonsu ikalaku, Yesu udi chilakej chiwamp cha muntu wa mu spiritu. Padingay mwom ni pa chisu cha mudimu wend panap pansh, wamekesha anch wading ukatin kumwimburij Tatukwend. Yesu watongang, wiyovang ni wasalang mudi Yehova. Wasala rusot ra Nzamb ni walimisha mbil jend. (Yoh. 8:29; 14:9; 15:10) Chilakej, tal bil mutapu warumburilay Isay ranaken ra Yehova ni yom yarumburilay Marko piur pa yovil ya Yesu. (Isay 63:9; Mar. 6:34) Ov, tukat kumwimburij Yesu mu kwikal in kumekesh ranaken yisu yawonsu kudi antu akimbina ukwash? Tukat kushinshikin pa mudimu wa kufundish ni kulejan rusangu ruwamp mudi mwasalay Yesu? Muntu wa mu spiritu uding mwin ranaken ni usadining usu wa kuyikwash antu akwau. w18.02 20 par. 12

Yehova wayinkisha anvaj chisend cha kulil anau mu ‘kuyikand ni kuyibabesh nich malejan ma Yehova.’ Chinech chikasiken kusal mwamu mu mangand minam ma nlel. (2 Tim. 3:1-5) Anch an avadik, kijingap kwau uwamp ni uyimp ni kom kau kadingap kakufumb. Chawiy akwet kuswir kwa dipup mulong wa kukafumb. (Rom 2:14, 15) Mwin manangu umwing wija jinsangu ja Bibil walonda anch dizu dia Grek dikarumwinau anch ‘dipup’ dikutwish kand kurumburik anch “kukul kwa mwan” ap kumulil mwan chakwel ikala mwin kulam yisend yend pakupamay. Anch anvaj ayipup anau nich rukat, an akwiyov anch adi mu diking. Akat kwilej anch want ipau ukwet mimbu ni anch chom chawonsu chikusalau mu mwom wau chikwet yibudikin. Chawiy chidia cha usey nakash kudi anvaj in Kristu kuchingejin manangu ma Yehova mulong wa kuyikwash kulil anau. Yitongijok piur pa kulil an yishalijadin nakash kukwatijan ni ndond yishichay muntu ni yitongijok yiney yidandamedin kuswimp. Pakwez, anvaj amuteshina Nzamb kakatap kwakam piur pa yom yifanyidinau kusal ap kuchingejin yitongijok ya antu. w18.03 29-30 par. 8-9

Ap anch uchidi kal ku chikumbu cha anvajey, urund wey ni Yehova chidi chisend chey amwiney. Mulong wak chidi cha usey kuvurik mwamu? Mulong katat pawabarika kal usand, ukwet yovil yisu ni yisend yisu. Changadim umwing walonda anch: “Mwan umwing ukutwish kuman anch chiwapinap kwau kwikal Kaman wa Yehova mulong kakumwinkishap chikunku cha gato ku shikol mulong wa dichuku diend dia kuvadik. Pakwez kupwa kwa mivu yikemp, anch maku ma kulal ni muntu mapandakan, ufanyidin kwikal nich kashinsh anch kuziyin yijil ya Yehova chiding ching chom chiwamp.” Kadiap ching kwau ansand akweta milong yisu. Ap antu abatishinau kal chisu chidiau amakurump, akat kupak ritiy rau mu mitapu yakad kutonginau. Kupak kwinoku kukutwish kudiokal mu uruw wau, ukash wau wa mujimbu ap ku midimu yau. Chikalap nchik mivu tukweta, etu awonsu tukwet kuswir kwa kwikal ashinshamena kudiay Yehova mu milong kushalijan.​—Jak. 1:12-14. w17.12 22 par. 4-5

Antu avud kand kal ayisadinangap nayimp mudi mwamusadinau David. Pakwez, murund winou wa Nzamb kalamap ujim. Wafunda anch: “Ikuchika ku kuswej, ulika ujim. Kangal wiswidiosh, mulong yawiy yikata kutwalan ku kuyip.” (Kus. 37:8) Diyingishin dia usey dia ‘kulik’ ujim, ap kulik kulam ujim, didi anch tukatin kumwimburij Yehova. “Ndiy kakutwilikejinangap mudi mudia yitil yetu” pakwez ukat kutulikishin. (Kus. 103:10) Kudi kand kutaninamu kukwau mu kulik kulam ujim. Chilakej, ujim ukutwish kuletish mayej ma tansion ni ma michim. Ujim ukutwish kuyipish michim yitok ni pancréas, ni ukutwish kuletish milong ya kuswej kwa divumu, kusut mwivumu, kulik kuya ku musalany, mayej ma ditont ni mayej makwau kand. Chikwau kand anch tujimen, tukatap kutong nawamp. Tukutwish kulond ap kusal yom yikutwisha kuyijimesh akwetu, ni chinech chikutwish kutuziyish nakash chisu chilemp. Chidi chiwamp nakash kwikuchik. Bibil ulondin anch: “Mwom wa mujimbu kudi kushakam zong kwa muchim.” (Jnsw. 14:30) Chawiy, chom ik tukutwisha kusal anch antu akwau atwovish kuyip, ni mutapu ik tukutwisha kusal chisambu nau akadivar netu? Tukutwish kusadin chiyul cha manangu cha mu Bibil. w18.01 13-14 par. 14-15

David kalondap anch ndiy kakez kafap ni kakumujikap. Dizu dia Nzamb dilondin kamu patok anch David wananapa ni wafa ni “wajama nau atatukwend. Amujika mu musumb wa David.” (1 Ant 2:1, 10) Chad verse winou ulondin piur pa nany? Mbing jikemp kupwa kwa Yesu kufa ni kuvumbuk, Pita wambamba ni tunan twa in Yuda ni twa akamichid. (Mid. 2:29-32) Wayivurisha anch David wafa ni amujika. Pakwez Bibil kalondinap anch kwikil muntu ap umwing pakach pau wamutadika Pita pawejinayaku anch David “wading wij yom yikez kusalay Nzamb kurutu. Chawiy ndiy walonda ya kuvumbuk” kwa Mesia. Pita wakasikeshina chitongijok chend pa kulondin mazu ma David madia mu Kuseng 110:1. (Mid. 2:33-36) Pita wasadina mifund ya Bibil mulong wa kuyikwash antu avud ikala nich kashinsh anch Yesu wading “Nsalejetu ni Kristu.” Antu ijika anch mukand wa Kuseng 16:10 wawanyina chisu chavumbukay Yesu. w17.12 11-12 par. 10-12

Chisak Chitakedila chishinshamen ni chibabel mu mutapu chisadidina milambu. (Mat. 24:45) Antu adia mu chisak chinech akat kulembil mulong wa kukwat mipak yiwamp ni akat kurijek kamu nawamp mutapu wa kusadin nfalang. (Luka 14:28) Kambuy Paul wakumangeja nfalang mulong wa kuyikwash akadivar a mu Yudeya ading mu maswir. Wading nich kashinsh anch antu apanang nfalang jinej chakwel ajisadina mulong wa “yom yitentamina ku mes ma [Yehova] ni ku mes ma antu kand.” (2 Kor. 8:18-21) Nlel, dirijek dietu dimwimburijin Esidera ni Paul ni disadidin milambu mu mutapu uwamp. (Esi. 8:24-33) Machuku minam, kudi midimu yimwing yisu yisangareshina, ni yisu yimwing, akat kusadin nfalang jivud kusutamu jikatau kwandjik. Chawiy dirijek dikat kukimb mitapu ya kulam nfalang ni kupipej midimu, chakwel ditwisha kusadin nawamp milambu yen upaninanya. w18.01 18 par. 12-13

Rukat ni kuwap yikutwish kutukwash kuyilikishin akwetu. Anch twov ujim mulong wa yom yalondangay ap yasalangay muntu, tufanyidin kuvurik anch niyetu twalonda ap twasala chom chiyimp kudi antu akwau ni atulikishina. Kujikitish mudi ik mulong wa rukat rau ni uwamp wau! (Mul. 7:21, 22) Tujikitishin anch Kristu uyitekin in kwifukwil akin mu uumwing. Etu awonsu tumukatin Nzamb umwing, tulejen uruu wawiy umwing ni tukwet milong yivud ya mutapu umwing. Anch tudi antu awamp ni in rukat ni in kulikishijadin umwing ni mukwau, chikumangen chikwikal mu uumwing ni tukushal ashinshikidina pa difut. Mukau ukutwish kutukangesh kutambul difut. Yilakej ya Bibil yimekeshin mutapu ukweta mukau ubaj. Chilakej, Kain wamwovila Abel mukau ni wamujipa. Kore, Datan, ni Abiram amwovila Moses mukau ni amubwambwila. Mwant Saul wamovila David mukau ni wakimba kumujip. w17.11 29 par. 9-10

Anch amakurump asambish kumurumburish muntu mu komite wa dirumburish, afanyidin kubabal nakash mulong wa kwijik anch muntu winou wasalang chitil chijim umekeshin kukarumuk anch bwat. Chinech chiswapelingap kusal mwamu. Kukarumuk kwitining kuman mutapu umenay mukayitil yom yend yasadinay ni yidia mu muchim wend. (Kuj. 3:3) Mukayitil ufanyidin kukarumuk chakwel amwovila riy. Yehova ni Yesu ij kamu nawamp yom yitonginay muntu ni mutapu wiyovilay mulong awiy akutwish kwijik yom yidia mu muchim wend. Pakwez amakurump a chikumangen kakutwishap kwijik yom yidia mu muchim wend. Chawiy lel anch udi mukurump wa chikumangen, ov, mutapu ik ukutwisha kwijik anch muntu ukarumukin kamu chakin? Chakusambish, lembil mulong wa manangu ni mutapu wa kujingunin. (1 Ant 3:9) Cha kaad, sadin Dizu dia Nzamb ni mikand ya kashalapol ushinshamena chakwel yikukwash umana kushalijan pakach pa “ushon udiokila ku wuntu wetu” ni “ushon udiokila kudi Nzamb,” charumburik anch kukarumuk kwakin. (2 Kor. 7:10, 11) Tal mutapu ulondinay Bibil piur pa antu akarumuka ni alika kukarumuk, ni shinshikin mutapu wiyovau, watongau, ni wasalau. w17.11 19-20 par. 16-17

Nlel, mabuku mavud, mafilim ni ma program ma televizion mamekeshin anch madi mawamp ni chidi chiwamp kudi an kuyibwambwil anvajau. Pakwez uyakin udi anch kubwambwil kukat kuyipishang dijuku, didia dishin dia uumwing wa mu chisak. Antu ading ij uyakin winou mu mivu yivud. Chilakej, mwi ngand ya Grèce wa pakur, muntu anch wayibul anvajend wafanyina kushadish mbil ja kushakam pamwing nau akwau mu chisak. Mu chijil cha in Rom, muntu wamubulang tatukwend afanyina kumusal mudi mwamusalangau mwin kujipan. Mifund ya Hebereu ni ya Grek yawonsu yaad yayileja an kuyilimish anvajau. (Kub. 20:12; Efes 6:1-3) Yom ik yikutwisha kuyikwash an kuyiziyin anvajau ap anch antu ashichau nau kaziyidinap? Anch an atongin pa yom yawonsu yiwamp yayisadinau kudi anvajau, akumekesh kujikitish ni akukimb kuyiziyin. Ansand awonsu aswirikedin kwijik anch Nzamb, udia Tatuku wetwetu awonsu, uyichingejidin anch ayiziyina anvajau. Anch an alond yom yiwamp piur pa anvajau, akuyikwash arund nau kuyilimish anvajau nakash. w18.01 29-30 par. 8-9

Nlel, mulong wa kwikal kand mu urund uwamp ni Yehova, mwin Kristu wasadina chitil chijim ufanyidin kuya kuyilej amakurump a chikumangen chakwel amukwasha. Mulong wak chidi cha usey? Chakusambish, Yehova ndiy watenchika anch amakurump arumburisha milong ya yitil yijim. (Jak. 5:14-16) Cha kaad, amakurump adiaku mulong wa kuyikwash akayitil akarumukina kuyitiyij kand kudiay Nzamb ni alik kuchirikin kand yitil yiney. (Gal. 6:1; Heb. 12:11) Cha kasatu, amakurump akwet mbil ni ayifumba mulong wa kuyikasikesh akayitil akarumukina ni kuyikwash mulong adiosh ushon wau ni yovil ya kwifish nich. Yehova uyitazukin amakurump a chikumangen inay anch “ndond ya kujingam mulong wa ruvul wa rinkind mukash.” (Isay 32:2) Ditenchik dined wawiy mutapu umwing utumekeshidinay Nzamb riy. Atushalapol a Nzamb avud iyovil nawamp payilejinau amakurump a chikumangen milong yau ni pitiyinau ukwash wau. w17.11 11-12 par. 8-9

Ap anch chikat kulet kusansan nakash anch muntu tukatina amupup, tufanyidin kwipuk kwambamb nau ku telefon, ku mesaj, kufundijadin mikand, ap kwambamb nau ku internet. Pakwez, kangal washadish ruchingej! Rukat “rikat kuchingej kwau yom yawonsu,” chawiy, tufanyidin kudandamen kwikal ni ruchingej anch anamakwetu akatish akumuchirikin Yehova. (1 Kor. 13:7, TMK) Anch ukwet uman umekeshina anch mwanamakwey ukat kuswimp mwikadil wend, ukutwish kumulembil chakwel atambula usu udiokila mu Bibil ni itiya kutazuk kwa Yehova kulondina anch: “Chirikany kudi am.” (Isay 44:22) Yesu walonda anch tufanyidin kumukat ndiy nakash kusutamu muntu win mwawonsu. Ni Yesu wading nich kashinsh anch in kwilejend akwikal nich kutakaman mulong wa kushal ashinshamena kudi ndiy ap anch majuku mau mayilik. Chawiy anch dijuku diey diakulik mulong umulondwil Yesu, muchingejina Yehova. Mwita akukwasha chakwel utwisha kujijaman. (Isay 41:10, 13) Ikal ni musangar pa kwijik anch Yehova ni Yesu akusangaredin ni akukufut mulong wa kushinshaman kwey. w17.10 14 par. 19-21

Pitumening antu amena mar mulong wa mayej ni mulong wa upal, tukat kuyanaken. Tuchingedin kuman disudiel dia yom yiney, chawiy tulembil anch Want wa Nzamb weza. Mu chisu chinech, tusadin yom yawonsu tukutwisha mulong wa kuyikwash antu ayedina nau amapal. Mwin kufund umwing wafunda anch dichuku dimwing makwend ipal, wading uyedina mayej ma Alzheimer (mayej makata kushadish pakemp pakemp manangu ma muntu), wiyipishina mu masun mend. Padingay ukat kusal usu wa kutut masun, akokala ku chis chend. Atuman ezang kumutal chisu chawonsu ashika. Anambaz inay amwipula anch akutwish kumukwash. Mband winou walonda anch: “Chikwatishen usany pakwez ukutwish kwinkwashany.” Anambaz amukwasha kutut. Kupwa amusadina chay ni ashakama pamwing mulong wa kwambamb nend. Mwanend wajikitisha nakash ni walonda anch Atuman “akat kusadin yom yifundishiningau.” Ranaken rey mulong wa antu ayedin ni amapal rikat kukubachik ey mulong wa kusal yom yawonsu ukutwisha mulong wa kuyikwash?​—Fil. 2:3, 4. w17.09 10 par. 5; 13 par. 14

Tufanyidin kuyisadin antu akwau yom yiwamp ni ya rukat pakad muntu ap umwing kwijik. (Mat. 6:1-4) Tufanyidin kand kwikal a kusambish kuyilimish antu akwau. (Rom 12:10) Yesu wayilimisha atwimbuy end chisu chayowishay mem ku mend. (Yoh. 13:3-5, 12-15) Tufanyidin kusal usu nakash wa kwikal ikepishina mudi Yesu ni kuyisadin antu akwau. Atwimbuy kateshap kamu nawamp yom yasalay Yesu kushik ni patambwilau spiritu utumbila. (Yoh. 13:7) Tumekeshin anch tuyilimishin akwetu pa kulik kutong anch tudi awamp kuyisutamu awiy mulong twileja nakash, tudi ampich, ap mulong tukwet yisend ya pakampwil. (Rom 12:3) Tukatap kwov mukau anch ayibaz akwetu, pakwez tukat kusangar nau pamwing ap anch twiyov anch niyetu afanyidin kutubaz mudi awiy. w17.10 11-12 par. 9-10

Antu avud amen kal anch kusadin Dizu dia Nzamb kukweting usu padiau antu alejiningau. Chilakej, mukadivar umwing wayangang kumutal ikundj umwing ipal watangang mikand yetu mu mivu yivud. Dichuku dimwing, pa ndond pa kumwinkish Chinong cha Kalam cha katat, ndiy wamutangina kamu verse. Watanga 2 Korint 1:3, 4, ulondina anch: “Tatuku wa riy ni Nzamb wa kwongoj kwawonsu . . . ukat kutwongoj mu mar metu mawonsu.” Mazu minam mamushika ikundj winou ipal ni chawiy wamuleja mukadivar kutangiril kand verse winou. Kupwa ikundj walonda anch ndiy ni mukajend ading akwet kuswir kwa kuyongoj. Mulong wa verse winou, wakata kamu kwijik yivud piur pa Bibil. Komb kusadin Dizu dia Nzamb mu mudimu wetu wa kulejan kukwet kamu usu nakash!​—Mid. 19:20. w17.09 23-24 par. 9-10

Chimeken anch, kufund kwa Djabul kwasala anch atushalapol ashinshamena a Nzamb adia mwiur ova nayimp, ujim ni iyova anch kakwetap usey. Pamwing ap niyey wiyovil mwamu anch watongin piur pa mar mawonsu maletishay Satan. Pakwez Yehova kajimbishap mulong winou. Wakula mu mutapu uwamp. Yehova kajimanap swa ni wakula nawamp ku wimbwambwol wa Satan. (Kub. 34:6; Job 2:2-6) Mulong wak? Yehova walika anch chisu chisuta mulong kakatinap anch muntu mwawonsu ajiya, pakwez “usotil antu awonsu kukarumuk kudiokal ku yitil yau.” (2 Pita 3:9) Chilakej cha Yehova chitufundishin anch tufanyidin kutong nawamp kurutu kwa kulond ni kangal kusal yom mau mau. Chawiy anch ukwet kuswir kwa kukwat mupak wa usey, itekina chisu cha kutong. Lembil mulong wa manangu ma kulond ni ma kusal yom yiwamp. (Kus. 141:3) Anch tukwet ujim ap twovil kuyip, chiswapel nakash kusal yom yakad kutongin. Ni chawiy chayishikija antu amwing kwinan mulong wa yom yalondau ap yasalau pakad kutong!​—Jnsw. 14:29; 15:28; 19:2. w17.09 4-5 par. 6-7

Ov, kudjikan chibangul chinech kwasala anch Mwin Kupesh Mujim Joshua ikala mwant? Bwat. Joshua kadingap mwan wa mu majuku ma David, chawiy kadingap kawanyidina kwikal mwant. Kumudjik chibangul chinech kwamekesha yom yading yifanyidina kushiken kurutu kudi mwant wa chikupu udia kand mwin kupesh, utazukinau anch Risapuril. Bibil urumburil anch Risapuril udi Yesu Kristu. (Isay 11:1; Mat. 2:23) Yesu udi Mwant ni udi kand Mwin Kupesh Mujim. Utakedin yisak ya angel a Yehova ni usadin usu nakash mulong antu a Nzamb iyova anch adi mu diking mu mangand minam ma chisum. (Jer. 23:5, 6) Piswimp ap, Kristu ukuwin michid yawonsu ni ukukwash wintakel wa Nzamb ni kuyikwash antu a Nzamb. (Kuj. 17:12-14; 19:11, 14, 15) Pakwez kurutu kwa dichuku dined kushik, Yesu, ap Risapuril ukwet mudimu ujim nakash wa kusal. w17.10 24-25 par. 12-14

Yom ik ukusala anch wijik anch masun mey mikisin ni makwet didjimb diyimp? Ukumadjol kamu swa swa. Chilik chimwing, anch twijik anch tusadin yom yikisinay Yehova, tufanyidin kamu kuswimp swa. Palonday piur pa yisalijok yiyimp yiney, Paul walonda anch: “Djibulany yom yiney yawonsu.” Mwikadil umwing uyimp pakach pa mikadil yajimbulay Paul yidi yisal ya masandj. (Kol. 3:5-9) Mu Bibil, ‘yisal ya masandj’ mudi kand yisal yawonsu ya masandj pakach pa ikundj ni mband akad kwatijan mu mutapu ufanyidina kurutu kwa antu awonsu. Paul walonda anch in Kristu afanyidin ‘kudjibul yidi yau ya mujimbu’ anch yiyibachikin ku yisal ya masandj. Chinech chirumburikin anch tufanyidin kusal usu nakash mulong wa kudiosh maku mayimp. Kusal mwamu kukutwish kukasikan, pakwez tukutwish kuwin! w17.08 16-17 par. 5-6

Muprofet Mike wajijamena mashakamin makash, mudi kand etu nlel unou. Wading ushich mu chisu chayikelay Mwant Akaz. Akaz wading mwant muyimp nakash. Mudi chibudikin, kwadinga uyimp nakash mwi ngand. Yom yayipa nakash chawiy Bibil ulondin anch antu ading “akat kusal yom yiyimp nich mushiku.” (Mike 7:1-3) Mike wading wij anch kafanyinap kuswimp yom yiney. Anch tukwet ritiy mudi ra Mike, tukwikal ni rusot mulong wa kumuchingel Yehova. Mwikadil wetu udiap mudi wa muntu udia mu rukan uchingedina dichuku dikumujipau. Udi muntu ushindidilau kuchingel ni kachingedinap kamu dichuku dinidia. Yom yishalijadin nakash niyetu! Tukwet rusot ra kumuchingel Yehova mulong twij anch pa chisu chiwanyidina ukuwanyish kushilamu kwend pakutwinkay mwom wa chikupu! Chawiy tukat ‘kujijaman ni kushimpish muchim nich musangar.’ (Kol 1:11, 12) Chisu tuchingedina, tufanyidin kubabal nakash mulong kangal twinan anch Yehova kasadinap yom swa swa. Anch twasal mwamu, Yehova kakusangarap.​—Kol 3:12. w17.08 4-5 par. 6-7

Mutapu ik tukutwisha kutaninamu mu ukwash wa Yehova? Tufanyidin kwikal ni urund wa piswimp ni ndiy. Mulong wa kwikal ni urund winou, tufanyidin kwikal antu itudishina. (Sof. 2:3) Antu itudishina akat kumuchingejin Yehova anch ukutenchik kuburen kutentam kwawonsu ni ukupwish mar mau. Antu inay akwet dilau dia Yehova. Ku mutambu ukwau Nzamb “ukat kuyishikumwish antu ayimp pansh.” (Kus. 147:6) Tukatinap anch chom chinech chitushiken! Tukatin anch Nzamb atumekeshin rukat rend rishinshamena. Chawiy tufanyidina kukis yom yikisinay. (Kus. 97:10) Chilakej, tufanyidin kukis yom ya masandj. Chinech chirumburikin anch tufanyidin kwipuk yom yawonsu yikutwisha kutushikij ku masandj, kuwejinaku ni pornografi. (Kus. 119:37; Mat. 5:28) Chinech chikutwish kukasikan nakash, pakwez chidi cha usey nakash mulong tukutambul yiyukish ya Yehova. Tukutwishap kurish njit jinej ayinetu. Tufanyidin kumuchingejin Yehova. w17.07 18-19 par. 11-13

Tumekeshin kand anch ‘tusadidin manangu’ chisu tusadidining yom yetu ya ku mujimbu mulong wa kuyikwash antu akwau mu mudimu wa kulejan. Chawiy, ap anch tukutwishap kusal mudimu wa chisu chawonsu ap kushemunikin kwi ndond kudia maswir nakash, tukudandamen kuyikwash antu akwau. Chilakej, yipan yetu yikat kukwash mulong wa kubudish mikand ni kukwash mudimu wa kulejan mu ma teritwar ma uzwendj mwitiyinau antu avud uyakin. Mu jingand mudi mu Congo, mu Madagascar ni mu Rwanda, ma Bibil makwet usey nakash. Yisu yimwing Bibil ukweting usey nakash wa makut makatau kumufut muntu pa ngond ap pa rubing. Mu mivu yivud, akadivar netu akat kutond pa kuland yakudia mulong wa majuku mau ni pa kuland Bibil. Chawiy mulong wa yipan ya antu akwau ni “kwilakej” nfalang jinej, dirijek dia Yehova dikat kukarumun ni kwangan ma Bibil chamwamu kudi antu a mu majuku mau ni kudi in kwilej a Bibil.​—2 Kor. 8:13-15. w17.07 11 par. 11

Yom yamushikena Job yikutwish kutukasikesh, mulong yimekeshinap anch Yehova utujimedin chisu tumena mar. Mar matwinkishin mutapu wa kukwash ukaleng wa Yehova. Anch twajijaman nich kushinshaman, tumusangareshin Yehova, ni ruchingej retu ra machuku ma kurutu rikat kwikal rikash. (Rom 5:3-5) Yom yamushikena Job yimekeshin anch ‘Yehova wizwil nich ranaken ni riy.’ (Jak. 5:11) Anch twakwash ukaleng wa Yehova, ukutufut. Kwijik mwamu kutukwashin “kujijaman mu yom yawonsu nich kushimpish kwa muchim nich musangar.” (Kol. 1:11) Chidi chakin anch chikutwish kukasikan kushinshikin piur pa kukwash ukaleng wa Yehova chisu tukweta milong yetu. Ap milong yikemp yikutwish kwikal yijim anch twayitongin nakash. Chawiy tufanyidin kuvurik chisu chawonsu usey ukweta kukwash ukaleng wa Yehova chikalap nchik yakamish tukutwisha kwikal nich. w17.06 24-25 par. 15-16

Antu avud nlel atongin anch afanyidin kwikal ni masun ma katat, ma telefon, ma ordinater, ni yom yikwau. Akwatiken nakash ni yom ya ku mujimbu, mashakamin ma mwom mamekeshina anch yom ya ku mujimbu ni nfalang yawiy yikweta usey kusutamu chom chikwau. Mudi mwin Kristu, chom ik chidia cha usey nakash kudi ey? Iyipula anch: ‘Ov, nikat kusutish chisu chivud mulong wa kutong piur pa motak yibudikina katat ap yom yibudikina katat kusutamu chisu nikata kusutish mulong wa kurijek yikumangan? Nikwatiken nakash ni midimu ya dichuku ni dichuku ni kusutish chisu chikemp mu kulembil ni kutang Bibil?’ Anch tubabelap, rukat mulong wa yom ya ku mujimbu rikutwish kwikal ra usey nakash kusutamu rukat retu mulong wa Kristu. Tufanyidin kutong piur pa mazu ma Yesu madia mu mufund wetu wa nlel. Yesu walonda anch “kwikil muntu ukutwisha kuyisadil ansalejend aad nawamp.” Wawejaku anch: “Kiukutwishanyap kusadil kapamp kamwing Nzamb ni mapit ma pa mangand.” Chiswapelap kumwinkish Yehova yom yetu ya usey ni mu chisu chawiy chimwing twashinshikin kand pa yom ya ku mujimbu. Yesu warumburila anch “ukumukis umwing, chad wamukat mukwau” ap “ukumulimish umwing, chad wamudiul mukwau.” (Mat. 6:24) Mulong tudi antu akad kuwanyin, tufanyidin kudandamen kurish mulong wa “maku metu ma wuntu,” kuwejaku ni kukat yom ya ku mujimbu.​—Efes 2:3. w17.05 25-26 par. 15-16

Mulong tudi antu akad kuwanyin, tudi mudi nsab ja kam. Pakwez uruu tulejena udi mudi mapit ma usey mulong ukutuletin etu mwom wa chikupu ni kudi antu atuteshina. Paul wasala mudimu nakash mulong wa kuyifundish antu akwau piur pa Want wa Nzamb. (Rom 1:14, 15; 2 Tim. 4:2) Rukat mulong wa rusangu ruwamp ramukwasha kudandamen kulejan ap anch amuzengola nakash. (1 Tes. 2:2) Mutapu ik tukutwisha kwimburij rukat ra Paul mulong wa mudimu wa kulejan? Mutapu umwing wamekeshay Paul anch ukatin mudimu wa kulejan wading wa kusadin mitapu kushalijan mulong wa kwambamb ni antu. Mudi Paul nau in Kristu a kusambish, twipanin mu kulejan rusangu ruwamp kudi antu ku chikumbu ni chikumbu, mu jindond jidia antu avud ni kwawonsu tukutwisha kuyitan. (Mid. 5:42; 20:20) Tukimbining mitapu kushalijan mulong wa kuyilej antu avud anch chiswapel. Anch tukwet chisu, tukutwish kusal mudi chibol nkwash ap chibol wa rawonsu. Ap tukutwish kwilej dizu dikwau, kushemunikin mu teritwar wa ngand yetu ap kand kuya mwi ngand yikwau.​—Mid. 16:9, 10. w17.06 11 par. 8-9

Uyimp uvud usadikina mu mangand nlel kauletinap kudi antu pakwez auletil kudi yitenchik. Yitenchik ya chirelijon yikat kudimb ma miliyon ma antu. Akat kudimban piur pa mutapu udiay Nzamb, akat kulond anch Bibil kadiap wa kuchingejin, ni akat kuyidimb antu piur pa machuku ma kurutu mulong wa divu nau antu. Mant mayimp makat kuletish njit ni makat kurish piur pa katond ka ulombu wa chikit ni kuyizengol atuzwendj nau antu akad mutapu wa kwichidij. Mant minam mikadin kal ni mapit nakash ni makwet usu mulong mamekeshin katond ap akat kumakatul milamu. Ma sosiete makweta ris makat kuyipish ndond yishichau antu, kushesh mapit matangau, ni makat kusal anch antu ataninamu, pakwez antu akemp awiy atwishina kwikal ampich. Dizu dia Nzamb diasambela kulejan anch mant ma mangand minam ni yitenchik yidiamu akumapuchol kusambishin ku mashin mau​—ap kumashesh​—pamwing ni antu awonsu ibombinau nau mulong wa kubwambwil Want wa Nzamb.​—Jer. 25:31-33. w17.04 12 par. 7-8

Yehova, ukata ‘kushinshikin michim,’ wamwovila Akab riy. (Jnsw. 17:3) Patesha dijuku dia Nabot nau arund nend anch dijuku dia Akab kakudipupap kushik ni pakufay Akab, chinech chafanyina kupak ritiy rau mudiay Nzamb. Pakwez kwikepish kwafanyina kuyikwash kuking ritiy rau. Mulong wak? Anch ading ikepishina, afanyina kudandamen kumwifukwil Yehova, ni kwitiyij anch chikasiken kudi Nzamb kuburen kutentam. (Kuv. 32:3, 4) Kurutu oku, dijuku dia Nabot dikwikal ni yiyukish pakuyimanau akatish nau avumbuk. Kukez kwikal kutentam kuwanyidina mulong wa Nabot nau anend. (Job 14:14, 15; Yoh. 5:28, 29) Muntu wikepishina wijing anch ‘Nzamb ukez karumburish yisalijok yetu yawonsu, ni yawonsu yitwasala ku ujindj mulong wa kwijik anch yidi yiwamp ap yiyimp.’ (Mul. 12:14) Yehova ukat kushinshikin yom yitwakad etu kwijik. Chawiy kwikepish kukutuking chakwel tulika kushadish ritiy retu mudiay Yehova. w17.04 22-24 par. 8-9

Mulong wa mashakamin makash madia mu mangand, akadivar netu avud akat kwikal arefije. Chinech chikutwish kuyikasiken. Tongin yom yivud yiswirikedinau kwilej kapamp kamwing: dizu disu, yaku yisu, ni yijil yisu piur pa kufutin yom (mudi yikumbu, kasu, mem) ni kulambul yitad, kwilej shikol, ni kuyilil an! Ukutwish kushimpish muchim ni kuyikwash nich kalimish akadivar nau anambaz netu akweta milong mudi yiney? (Fil. 2:3, 4) Yisu yimwing amakurump a ngand akat kusal anch chiyikasiken akadivar inay kwikal mu umwing ni chikumangen cha ndond yidiau. Yitenchik ya anyikel ya mangand yikat kukimb kwimik kuyikwash akadivar netu. Akutwish kulond anch kakuyinkap mbil ya kushakam mwi ngand anch alik kwitiy mudimu ukusala anch akangany kukumangan. Mulong oviling wom ni amening anch kakuyikwashap, amwing akat kwitiy kusal midimu yiney. Chawiy chifanyidin kusal swa swa mulong wa kuya kuyital arefije chisu chikushikau. Akwet kuswir kwa kutuman anch tuyitongidin. Kwipan ni ukwash mudi winou kukutwish kwakasikesh ritiy rau.​—Jnsw. 12:25. w17.05 5 par. 9-10

Padingay Yesu pa divu, warumburila mutapu ukujinguninau antu yijingidij ya “disudiel dia mangand.” Pakach pa yom yikwau, walonda anch: “Rukat ra antu avud rukez kakep.” (Mat. 24:3) In Yuda a mu mivu chitot yakusambish alonda anch adi antu a Nzamb pakwez alika rukat rau mulong wa Nzamb rikep. Pakwez, in Kristu avud a mu chirung chinicha ading ni yitongijok kushalijan. Alejanang nich mushiku ‘rusangu ruwamp piur pa Kristu’ ni amekesha rukat mulong wa Nzamb, mulong wa akadivar nau mu ritiy, ni kudi antu akwau ading akad kal kwijik uyakin. In Kristu inay alama rukat rau rikash mulong wa Nzamb. (Mid. 2:44-47; 5:42) Cha ushon, kwading in Kristu akusambish amwing, rukat rau rakepa. Yesu wayileja in Kristu akusambish ading mu Efes anch: “Ey washil kal rukat rey ruwading nich pakusambish.” (Kuj. 2:4, TMK) Chikutwish kwikal anch in Kristu a ku Efes ikala ni chibachikin cha antu ading ayinyingumukina ading akatina kwisangaresh ayinau.​—Efes 2:2, 3. w17.05 15-16 par. 1-3

Jefite wading ntakel utakamena ni mwin kurish njit wa usu. Ana wading mband wikepishina wamulamang nfumwend nawamp ni chikumbu chend. Awonsu aad amwifukwilang Yehova. Pakwez, asala kand chom chikwau cha mutapu umwing. Jefite ni Ana achipa kudi Yehova, ni muntu ni muntu wawanyisha kuchip kwend nich kushinshaman. Adi yilakej yiwamp kudi amakundj nau amband nlel atondina kuchip kudi Yehova. Mu Bibil, kuchip kudi kushilamu kukash tusadining kudi Nzamb. Chilakej, muntu ukutwish kushilamu kudi Yehova anch ukuwanyish yom kampand, ukupan yom kampand, ukwipan mu mudimu kampand, ap ukulik kusal yom kanang. Machip akat kumasalang mu kusadin want ipau. Kwikil muntu usadishiningau ya ku usu chakwel achip. Pakwez anch muntu watond kusal mwamu, Yehova umening kuchip kwend mudi kushilamu kukash kufanyidinay muntu kulimish ni kuwanyish. Mu Bibil, machip madi mazu makatay kulonday muntu anch ukusal ap kakusalap yom kampand.​—Dis. 14:22, 23; Heb. 6:16, 17. w17.04 3-4 par. 1-2