Ngond wa 2

Chisu chamulejau kudi Yehova kusal waat, Nowa kadingap kija mutapu wa kusal mwamu. Wamuchingejina Yehova ni tutangin anch ndiy wasala ‘kamu mwamu’ mudi mwamulejau kudi Yehova. Yibudikin ik yikalaku? Waat wamupandisha Nowa ni dijiku diend! Nowa wading kamu nvaj muwamp. Mulong wak? Mulong wachingejina manangu ma Nzamb. Nowa wayifundisha anend nawamp ni wayishila chilakej chiwamp, chom chinech chadingap chiswapela mu mangand minima mayimp kurutu kwa Mabeb. (Dis. 6:5) Anch udi nvaj, mutapu ik ukutwisha niyey kusal ‘kamu mwamu’? Mutesha Yehova. Mulika akukwasha kulil aney. Sadin yiyul yidia mu Dizu diend ni yiletinau kudi dirijek diend. Chakin kamu, ap anch anvaj asal yom yawonsu yikutwishau mulong wa kumulil mwanau, mwan ukutwish kumulik Yehova. Pakwez nvaj wasala usu wend wawonsu ukutwish kwikal ni kom kawamp ni ukutwish kuchingej anch dichuku dimwing mwanend ukumuchirikin Yehova. w18.03 30 par. 10-11

Watonginap kal kwakan pakwez wiyov yisu yimwing anch ukutwishap kusal mwamu? Pamwing ap wovil usany ni wiyakamishin anch angendj ey kakwiyovap nawamp. Ap pamwing ap ukwetap nfalang ni wakamin anch ukutwishap kuyinkish angendj ey yom yikatau kuyinkish kudi akadivar nau anambaz akwau. Chom cha usey nakash chidi anch chikumbu chifanyidinap kwikal cha ufun nakash mulong wa kwak angendj. Angendj akwov musangar anch chikumbu chey chinangin ni uchirijekin nawamp ni anch ukwet chisambu. Chiwapinap kwau kwiyakamish, mulong chom chidia cha usey kudi kwau kuyimekeshin angendj rukat. Chiding chiwamp nakash kuyibangin angendj. (Fil. 2:4) Antu avud akat kusangerang kwambamb piur pa yom yayishikena mu mwom wau. Tukutwish kutesh yom yijau ching anch twambamb nau pamwing. Mukurump umwing wa chikumangen niyend ufundin anch: “Kuyitazuk arund a mu chikumangen kwankwasha kuyitesh nawamp ni kwanginkisha chisu cha kuyijik nawamp, pakampwil mutapu washikenau kwijik uyakin.” Anch wayibangin kamu nakash angendj, ukutwish kwikal nich kashinsh anch muntu win mwawonsu ukusangar. w18.03 18-19 par. 15-17

Anvaj in Kristu afanyidin kuyikwash anau kukwat mipak ya manangu. Anch mwan walab kutambul dibatish pakad diyingishin diwamp dia kuchingel, chinech chikutwish kuyipish urund wa mwan ni Yehova. (Jak. 4:17) Kurutu anau atambula dibatish, anvaj akweta manangu akimbining kamu kwikal nich kashinsh anch mwanau ikundj ap mband wawanyidin kal kamu kwikal mwin kwilej wa Kristu. Atulam a minyingumuku amen anch an abarika kal usand ni akweta mivu piswimp 20 kand kal kwau atambula dibatish ap anch apamidin mu uyakin. Yisu yivud, ansand inay akat kuya ku yikumangan, mu mudimu wa kulejan ni akat kulond ayinau anch adi Atuman a Yehova. Pakwez kudi yom kanang yisadina anch alika kwipan ayinau kudi Yehova ni kutambul dibatish. Mayingishin mamwing, chidi mulong anvaj atongining anch anau kand kal awanyin kutambul dibatish. Yisu yimwing anvaj amwing akat kuyikasikesh anau kuchingel mulong wa kutambul dibatish. w18.03 3-4 par. 1-2

Mulong wa kwikal mudi Kristu, tufanyidin kwilej mutapu wadingay kutong, kwiyov ni kusal yom. Yesu washinshikinang nakash pa urund wend ni Nzamb kusutamu yom yin yawonsu. Chawiy kwikal mudi Yesu kutusadin kwikal mudi Yehova. Chawiy chidia cha usey nakash anch twileja kutong mudi mwatongangay Yesu. Mutapu ik tukutwisha kwilej kutong mudi mwatongangay Yesu? In kwilejend amumanang pasalangay yilay, amuteshang pafundishangay yisak ya antu, amumanang mutapu wayisadinangay antu a mitapu kushalijan ni amana mutapu wamutakelau kudi yitongijok ya Yehova. (Mid. 10:39) Nlel unou tukutwishap kumuman Yesu. Pakwez tukwet nsangu jidia mu ma Evanjil, jitukwashina kumwijik Yesu nawamp. Chisu tukata kutang ni kutongijokin pa mukand wa Mateu, Marko, Luka ni wa Yohan, tukat kwilej yom yivud nakash piur pa mutapu watongangay Yesu. Chinech chikat kutukwash ‘kulondul nich kushinshaman mu rizau rend’ chakwel twikala nich “chitongijok cha mutapu umwing” mudi chadingay nich.—1 Pita 2:21; 4:1. w18.02 20-21 par. 15-16

Kudiosh chisu chasambishay Adam ni Ev kuval an, antu ileja piur pa Yehova mu mitapu yisatu: kusutin yitang yend, kusutin atushalapol akwau ashinshamena a Nzamb ni kusutin yiyukish yataninawamu pamuziyinau ndiy. (Isay 48:18) Mu kushinshikin yitang, Nowa wafanyina kuman anch Nzamb udiaku chakin ni wafanyina kand kwilej piur pa mikadil yend. Mudi chibudikin, Nowa wafanyina kwijik nawamp anch Yehova udi mwin dikand ni anch ndiy kamu Nzamb umwing wakin. (Rom 1:20) Chawiy, Nowa kitiyijap kusu mudiay Nzamb kwapwa, pakwez wakasikesha kand ritiy rend mudiay ndiy. Chimeken kamu anch Nowa watesha piur pa Yehova kusutin anamakwend. Tatukwend Lamek, wading ni ritiy mudiay Nzamb ni wavadika kurutu Adam afa. Ngakend wading Metushela ni ngakiril a tatukwend a Nowa wading Jered, wafa ni pasuta mivu 366 kupwa kwa Nowa kuvadik. (Luka 3:36, 37) Nowa wakata yom yilejay ni yamubachika kumusadin Yehova.—Dis. 6:9. w18.02 10 par. 4-5

Anch mwin Kristu, mukadivar ap nambaz ap muntu wa mu dijuku walond ap wasal yom yitwovishina kuyip, tukutwish kwiyov nayimp nakash. Chikwikal nchik anch tutwishinap kuvuramen yom yasadikang? Ov, tukudandamen kulam ujim pamwing ap mu mivu yivud? Anch tukulondul chiyul cha manangu cha Bibil cha kupwish milong pakad kulab? Anch twasutish chisu chilemp pakad kwambamb ni muntu, chikutukasiken kusal chisambu. Chikwikal nchik anch wiyovil nayimp piur pa yom yakusalangay mukadivar ni utwishinap kuvuramen yom yiney? Chom ik ukutwisha kusal mulong wa kusal chisambu? Chakusambish, ukutwish kumulembil Yehova. Mwilembina akukwasha chakwel wambamba nawamp ni mukadivar ney. Vurik anch mukadivar ney udi niyend murund wa Yehova. (Kus. 25:14) Yehova uyisadidining arund nend nich ranaken, ni ukatin anch niyetu tusala mwamu. (Jnsw. 15:23; Mat. 7:12; Kol. 4:6) Cha kaad, tongin piur pa yom ukumuleja mukadivar ney. Kangal wamekesh anch wakatang kukusal nayimp. Pamwing ap kwading kurumbuk ap wateshangap nawamp mulong. Itiyin anch mu mulong winou niyey warumbukang. w18.01 14 par. 15-16

Atushalapol a Yehova ashalijadin nakash nau antu avud mu mangand mulong amekeshin rukat rakin mulong wa antu akwau. Chinech chiding chakin chisu chawonsu. Chawiy, Yesu walonda anch chijil chimwing chidia cha kusambish mu Chijil cha Moses chikweta usey nakash kusutamu chijil cha kuyikat antu akwau chading chijil cha kumukat Nzamb. (Mat. 22:38, 39) Yesu walonda kand anch in Kristu akin akuyijikin ku rukat rikumekeshau umwing ni mukwau. (Yoh. 13:35) In Kristu akin afanyidin kuyikat ap akankuny nau. (Mat. 5:43, 44) Yesu wamekesha anch wading kamu uyikatin antu. Wasala mwamu payangangay mu misumb kushalijan mulong wa kuyilej antu rusangu ruwamp ra Want wa Nzamb. Woka amputames, ayibid, in musong wa mak ni atujikamatu. Wavumbula kand antu ading afila kal kwikal kand aom. (Luka 7:22) Yesu wapana kand mwom wend mulong wa kupandish antu. Yesu wimburija kamu rukat ra Tatukwend. Pa mangand mawonsu, Atuman a Yehova amwimburijin Yesu ni amekeshin rukat kudi antu akwau. w18.01 30 par. 11-12

Ukutwish kuwanyish yom yitinau mulong wa kutambul dibatish chisu chiuchidia nsand. Pakwez, ukutwishap kwijik nawamp milong ukurisha nich machuku ma kurutu. Chakwel akukwasha ushala ushinshamena, vurik chisu chawonsu anch kwipan kwey kudi Yehova kudi kwa rawonsu. Chinech chirumburikin anch washilamu kudi Muntu wa Piur Nakash anch ukumusadin ndiy chikalap nchik yom yikushikena, ap anch arund ney nau anvajey alik kusal mwamu. (Kus. 27:10) Mu yawonsu yiney, ikal nich kashinsh ka kumwipul Yehova chakwel akukwasha ulama kushilamu kwey kudi ndiy. (Fil. 4:11, 12) Yehova ukatin anch ey wikala murund nend. Pakwez chifanyidin kusal usu chakwel ulama urund winou ukash ni kusal mudimu mulong wa dipandish diey. Filip 2:12 ulondin anch: ‘Dandamenany kusal mudimu mulong wa dipandish dien nich wom ni kwakam.’ Chawiy tong nawamp piur pa mutapu tukushala piswimp ni Yehova ni kushal ashinshamena ap anch kwasadik milong ik. Tufanyidinap kwetu ching kutong anch tukusal mwamu. Vurik anch, ap antu amusadina Nzamb mivu yivud kashalap ashinshamena. w17.12 22-23 par. 4, 6-7

Yehova utwinkishin chisend ni mutapu wa kukwash mudimu ujim wa Want. Utulejin nich kashinsh anch ang twasal mwamu, ukutuyukish. (Mal. 3:10) Yehova ukanin anch ang twapan ni muchim umwing, yom tukusala yikurumburik ni yikuwap. (Jnsw. 11:24, 25) Utulejin kand anch tukwikal ni musangar anch twapan, mulong “chiyukish cha mwin kupan chipandakenamu cha mwin kutambul.” (Mid. 20:35) Kusutin yom tulondina ni tusadina, tukutwish kuyifundish anetu ni antu adia asu mu uyakin mutapu ukutwishau niyau kusal mulong wa kukwash mudimu winou ni kusanger yiyukish yivud. Yom yawonsu tukweta yidiokil kudi Yehova. Anch twamwinkish, tumekeshin anch tumukatin ni tukwatin nich usey yom yawonsu yasalay mulong wetwetu. Paletangau in Isarel milambu mulong wa kutung tempel, awiy “asangara mulong wa yom yapanau, mulong awiy apana mulambu wakad [kuyishindil] kudi [Yehova].” (1 Jsng. 29:9) El amboku niyetu tudandamena kusangar chisu tumwinkina Yehova yom yatwinkishay kal. w18.01 20 par. 18-19

Divumbuk dia kusambish diafanyina kusadik chisu chimwing kupwa kwa kwikalaku kwa Kristu. Azizidilau many akwikala aom pa chisu cha mar makash akez ‘kuyisend pamwing mu madj.’ (1 Tes. 4:13-17; Mat. 24:31) Chirumburikin anch ang afa, “Nzamb ukez ku[yi]karumun mu kachisu kakemp mudi kufet kwa dis, pakez kubulau mpuny ya disudiel.” (1 Kor. 15:51, 52) Nlel, in Kristu avud ashinshamena kadiap azizidilau many ni kayitondinap mulong wa kuya kuyikel nend Kristu mwiur. Pakwez, akat kuchingel mulong wa “dichuku dia Yehova,” chisu chikutekay disudiel ku mangand minam mayimp. Kwikil muntu wija kamu dichuku dikweza disudiel dined, pakwez uman umekeshin anch didi piswimp. (1 Tes. 5:1-3) Chisu chikweza mangand masu ma Nzamb, kukwikal divumbuk dia mitapu kushalijan. Pa chisu chinicha, antu akuvumbulau mulong wa kwikal ni mwom panap pansh, akwikal ni ruchingej ra kwikal antu awanyidina ni akwikal ni ruchingej rakad kufa. Dined dikwikal ‘divumbuk dipandakena kuwap’ kusutamu divumbuk dia antu avumbulau pakur pakwez afa kand kapamp kakwau. w17.12 13-14 par. 15, 18-19

Anch twasal usu nakash mulong wa kwikal ni rukat ni awamp, tukutwishap kamu kwikal ni mukau. Dizu dia Nzamb dilondin anch: “Rukat rikat kushimpish muchim, [riwapin] kand. Rukat kirukwetap mukau.” (1 Kor. 13:4) Mulong wa kwikal ni kashinsh anch mukau kangal wikala mu wuntu wetu, tufanyidin kusal usu wa kuman yom mudi muyimenay Yehova. Tufanyidin kuyiman akadivar nau anambaz netu mudi antu a mujimbu umwing, charumburik anch chikumangen. Bibil ulondin anch: “Anch chid chimwing achitumbish, yid yawonsu yikusangar pamwing.” (1 Kor. 12:16-18, 26) Anch yom yiwamp yamushiken mukadivar umwing pakach pa akadivar netu, tukumwovil musangar, tukumwovilap mukau bwat. Tong piur pa chilakej chiwamp cha Jonatan mwan a Mwant Saul. Jonatan kamwovilap David mukau pamutondau kwikal Mwant pa ndond pa kumutond ndiy. Wamukasikesha David ni wamukwasha. (1 Sam. 23:16-18) Tukutwish kwikal awamp ni akweta rukat mudi Jonatan? w17.11 29-30 par. 10-11

Yehova wateka Chijil cha mansuk mu Dizu diend, Bibil. Ndiy wakimba anch twijika ni tusadina “malejan mapandakena kujimb,” mu kulond kukwau anch mbil jidia mu Chijil chinech. (Mat. 23:23) Mu Chijil cha Moses mwading “ronganyin rawonsu ni uyakin wawonsu.” Chitufundishin piur pa Yehova ni mbil jend. (Rom 2:20) Misumb ya kuchinin yilejinau mu Chijil yiyifundishin amakurump kwijik mutapu wa kusal “dirumburish ditentamina,” ni yitufundishin kand etu awonsu kumekesh ‘rukat rishinshamena ni riy’ kudi muntu ni muntu. (Zak. 7:9) Ap anch tudiap mwinshin mwa Chijil cha Moses, pakwez Yehova kaswimpinap. Kutentam ni riy yidandamedin kwikal ya usey kudi ndiy. Tukwet musangar wa kumwifukwil Nzamb mudi winou. El twimburijany mikadil yend yiwamp ni tutan diking kudi ndiy! w17.11 15-16 par. 2-3; 20 par. 18-19

Akadivar akata kulond ku chimet afanyidin kwikal nich kashinsh anch Mifund yifanyidin kwikal ya usey nakash mu diskur diau. (Yoh. 7:16) Chawiy ufanyidin kubabal nakash piur pa mutapu wey usadina diskur ni yom wamana ap yilakej ukusadina mulong kangal yimena pa manangu mey, pakwez yimena pa Bibil. Chikwau kand, ufanyidin kuvurik anch kutang mu Bibil chidiap chom chimwing ni kufundish yom yidia mu Bibil. Pakwez anch watang maverse mavud, antu kakutwishap kwau kumavurik. Chawiy tond nawamp maverse ufanyidina kusadin. Itekina chisu cha kumatang, kumarumburil, kulet yilakej ni kumasadin nawamp. (Neh. 8:8) Anch diskur diey dikwet plan, ikal nich kashinsh anch wilejin plan winou nawamp ni maverse masadidinau. Sal usu wa kwijik plan ni mutapu ukwatijadina maverse. Ni chidia cha usey nakash, mwita Yehova ukwash chakwel ulejana yitongijok yiney yiwamp yidia mu Bibil.—Esi. 7:10. w17.09 24-25 par. 11-12

Mu muvu wa 537 kurutu kwa Kristu, antu a Yehova ikala ni musangar nakash. Ading ayikwata kal mu usuk wa Babilon mu mivu 70, katat ayilikishaku kal! Ading akwet musangar wa kuchirik mu Yerusalem mulong wa kutungiril tempel ni kumwifukwil Yehova kwinikwa. Kupwa kwa muvu umwing in Isarel ateka mufulandal wa tempel. Kupwa kwa mivu 16, tempel wa Yehova ading kand kal apwisha kumutunguril. Antu a Nzamb aswirikena kuyivurish chakwel achirik kudi Yehova ni alika kutong piur pa ayinau. Chawiy mu muvu wa 520, Yehova wamutuma muprofet wend Zakariy chakwel ayikwasha antu kuvurik mulong wak Yehova wayikola kuyidiosh mu Babilon. Chidi cha musangar kwijik anch dijin Zakariy dirumburikin anch “Yehova wavurika.” Ap anch in Isarel avuramena yom yayisadilau kudi Yehova, pakwez ndiy wadandamena kwend kuyivurik. (Zak. 1:3, 4) Yehova washilamu kuyikwash mu kuchirish difukwil diend diakin. Pakwez wayibabesha kand anch ukwitiyij difukwil diau ching anch amwinkish yom yau yiwamp. w17.10 15-16 par. 2-3

In kwilej ukash wa manangu alondining anch ranaken rikat kuwapish ukash wetu wa mujimbu ni urund wetu nau antu akwau. Anch wayikwash antu amena mar, ukwov musangar, ukwikal ni ruchingej nakash, ukwiyovap anch udi amwiney ni ukwikalap ni yitongijok yiyimp. Kumekesh ranaken kudi kuwamp kudi ey. Anch rukat ratubachik kuyikwash antu akwau, tukwikal ni kom kawamp mulong twij anch tusadin yom yikatinay Yehova anch tusal. Ranaken rikutukwash kwikal anvaj awamp, ambay a uruw awamp ni arund awamp. Chikwau kand, antu amekeshining ranaken kudi antu akwau, atambwiling ukwash chisu chidiau mu maswir. (Mat. 5:7; Luka 6:38) Ap anch kumekesh ranaken kudi kuwamp kudi etu, diyingishin dijim dia kumekesh ranaken didi anch tukatin kumwimburij Yehova ni kumwinkish ntumb. Ndiy udia Musul wa rukat ni wa ranaken.—Jnsw. 14:31. w17.09 14 par. 16-17

Mulong udi Mwant ni Mwin Kupesh Mujim, Yesu amwinka chisend cha ‘kutung tempel wa Yehova.’ Mu muvu wa 1919, wasala mudimu winou wa kutung payidioshay antu a Nzamb ku yibachikin ap yisalijok ya relijon wa makasu, udia Babilon Mujim. Yesu watenchika chikumangen ni wamuteka “kashalapol ushinshamena ni kubabal.” Chisak chinech cha akadivar azizidilau many, chitakedin mudimu ujim nakash usadikina mu chikunku cha panap pansh cha tempel mujim wa mu spiritu. (Mat. 24:45, TMK) Yesu wayitokisha kand antu a Nzamb payikwashay mulong ifukwila mu mutapu wishitwila. (Mal. 3:1-3) Yesu ni in kwilejend akwikala in kupesh ni ant 144 000 akuyikel mu mivu kanan. Pa chisu chinicha, akuyikwash antu ashinshamena kwikal antu awanyidina. Chisu chikupwishau ant ni in kupesh inay mudimu winou, ching kwau in kumwifukwil Yehova awiy akushala pa divu. Kupwa, akuchirish chad difukwil diakin! w17.10 25-26 par. 15-16

Chakwel amulikishina, muntu wajipanang pakad kutongin wafanyina kuchin mulong wa kuya mu musumb wa kuchinin udia piswimp. (Jos. 20:4) Wafanyina kwikal mwom anch wachinin mu musumb winou ni kushakam djat kamu ni pakezay kafil mwin kupesh mujim. Winou udi usu ufanyidinay kusal mwin kuchin. Wafanyina kusha mudimu wend, chikumbu chend chiwamp, ni want ipau wend wa kwendangan. Pakwez chading cha usey kusal mwamu. Mukayitil ukarumukina nlel ufanyidin ni ndiy kusal yom kanang chakwel amulikishin kudi Nzamb. Ufanyidin kulik yisal yend ya yitil. Mu yisal yiney mudi kand kwipuk yom yin yawonsu yikutwisha kumutwal ku kusal yitil yijim. Anch twasal yawonsu tukutwisha kusal mulong wa kulik kusal yitil, tukumekesh kudi Yehova anch tutongidin piur pa mashakamin metu ni tutonginap anch Yehova ukutwish kutwovil riy anch tusadinap chom kanang.—2 Kor. 7:10, 11. w17.11 12 par. 10-11

Yehova utulejin kwikal in kupan kudi akadivar nau anambaz netu. (1 Yoh. 3:17) Pakwez tufanyidin kwikal ni yibachikin yiwamp ya kwikal in kwak angendj. Tufanyidin kwiyipul ayinetu anch: ‘Ov, nikat kutazukang ku chikumbu cham ching kwau arund nam a piswimp ap antu nimena anch akwet usey mu chikumangen? Ov, nikat kutazukang kwam ching antu nitongina anch akutwish niyau kwinchirishin chom kanang? Ap nidi mwin kupan kudi akadivar nau anambaz anakad kwijik nawamp ap kudi akad kutwish kwinchirishin chom kanang?’ (Luka 14:12-14) Tongin yom ey: Chikwikal nchik anch mukadivar ukwet kuswir kwa ukwash mulong wa mupak uyimp wakwatay? Ap chikwikal nchik anch muntu twatazukang ku chikumbu chetu katujikitishinap? Yehova utulejin kusadin chiyul chidia mu mufund wa dichuku dia nlel. Tukwikal ni musangar anch twapan ni yibachikin yiwamp.—Mid. 20:35. w17.10 6 par. 12

Mband wa Potifar wamukata Josef nakash mulong wading “muntu wa chimbu chiwamp ni chifu cha ufun,” ni wadandamena kumulej chisu chawonsu anch alala nend. Yom ik yamukwasha Josef kujijamen choziu chinech? Witekina kamu chisu cha kutong nakash kurutu piur pa yom yikushikena anch walal nend. Chawiy, chisu chamukwatau mu masun kudi mband winou, wamuchina mau. Yom ik twilejidina ku chilakej cha Josef? Anch atupak mulong wa kujip yijil ya Nzamb, tufanyidin kujijamen choziu. (Jnsw. 1:10) Kurutu kwa kwikal Atuman a Yehova, antu amwing ading ipanin kal mu kudia nakash, kuleu, kuna ruwand ni yom yilewishena, masandj ap yom yikwau kand. Chawiy ap kupwa kwa dibatish, akutwish kand kwikal apakinau mulong wa kusal yom yiney. Anch yom yiney yakushiken, tong nakash mutapu ukuyipa urund wey ni Yehova anch wipan kand mu kusal yom yiney. Ufanyidin kusal usu wa kujingunin yom yiletishina choziu chinech ni kukwat mupak wa kwiyep yom yiney. (Kus. 26:4, 5; Jnsw. 22:3) Anch niyey akupak mwamu, mwita Yehova akukwasha manangu ni kwilam chakwel ujijamena choziu. w17.09 5 par. 8-9

Mutapu umwing tukutwisha niyetu kwikal arund a Yehova anch twalik kwiyandjik nakash mu yom ya kwisak ya mangand minam ni anch twakimb kamu mapit “makin.” Yom yiney yawiy yasalay muntu ushinshamena Aburaham. Wamuziyina Yehova ni wadiokala mu musumb wa dipit wa Ur mulong wa kuya kushakam mu minkand mulong wading ukatin kwikal murund wa Yehova. (Heb. 11:8-10) Wamuchingejina Yehova chisu chawonsu pa ndond pa kuchingejin mapit mend ma ku mujimbu. (Dis. 14:22, 23) Yesu wayikasikesha antu akwau mulong amekesha ritiy ra mutapu winou. Chawiy chamulejay nsand wading mpich anch: “Anch usotil kwikal muntu uwanyidina, yang ukalandish yom yawonsu yiukweta, upan nfalang jinej kudi atuzwendj, chawiy ey ukez kwikal nich mapit ma mwiur. Chad wez wikal mwin kwilej wam.” (Mat. 19:21) Nsand winou kadingap nich ritiy mudi ra Aburaham. Pakwez kwading kand antu akwau amuchingejina Nzamb. w17.07 6 par. 12

Kwasuta mivu 430 kupwa kwa Aburaham kwauk Wit wa Efrat chakwel anend ikala chad muchid wafanyina kushakam mwi ngand yiniya. (Kub. 12:40-42; Gal. 3:17) Aburaham wachingela mulong wading nich kashinsh anch Yehova ukuwanyish kushilamu kwend. Wading ni ritiy mudiay Yehova. (Heb. 11:8-12) Aburaham wading ni musangar wa kuchingel ap anch kamanap kuwanyin kwa kushilamu kwawonsu kwa Nzamb kurutu kwa kufa. Pakwez tongin piur pa musangar wa Aburaham chisu chikumuvumbulau mu paradis panap pansh. Ukushimwok nakash pakutangay rusangu rend ni ra dijuku diend mu Bibil. Tongin kand piur pa musangar ukwikalay nich pa kwijik chisend chijim chadingay nich mu kuwanyin kwa rusot ra Nzamb piur pa Mesia washilaumu! Tukutwish kwikal nich kashinsh anch Aburaham ukwiyov kamu anch yiyukish yiney yading yifanyidin kuyichingel. w17.08 6 par. 10-11

Mu Bibil, “kwijond” yidiap kwau ching yom ya masandj. Yikutwish kumekesh yom mudi kuna ruwand ap kusal maswimbu mayimp. (2 Kor. 7:1; Efes 5:3, 4) Chikutwish kand kumekesh yom yikatau antu kusal mu ujindj mudi kutang mabuku malangwishina maku ma masandj ap kutal pornografi. Yom yiney yikutwish kumushikij muntu ku yisalijok yijondila mudi kwichuku. Antu akata kutalang pornografi akat kukudish ‘maku mayimp ma masandj’ ni akutwish kwikal asuk a masandj. In kukimbijol amen kal anch kwikal musuk wa pornografi kudi mudi kwikal musuk wa maar ap wa yom yikata kulewishan. Chawiy chishimokishenap kwijik anch chaku cha kutal pornografi chikwet yibudikin yiyimp nakash. Muntu ukutwish kwikal ni yovil yikash ya usany, kulik kusal mudimu nawamp, kuburen musangar mu dijuku, kujip uruw ap kwijip. w17.08 17 par. 8-9

Patongay piur pa kutungiril kwa Yerusalem, nfund a kuseng wawanga mazu madia kwiur am mulong wa Yehova. Mulong Yehova wakasikesha yis ya musumb, chinech chasala anch nfund a kuseng iyova anch udi mu diking. Chamwinkisha kashinsh anch Yehova ukuyiking antu end. Ukutwish kwiyakamish mulong wa milong yey, pakwez Yehova ukutwish kukwinkish manangu mulong wa kurish nich. Nfund a kuseng walonda anch Nzamb ukat “kutum uruu wend pansh; dizu diend dikat kuya mau nakash.” Kupwa nfund a kuseng wajimbula yom yitok ya mashik, mbundu ni ruvul wa mayal ni wipula anch: ‘Nany ukutwisha kwiman ku mashik mend?’ Walonda kand anch “dizu diend dikat kwenguril mayal ma ruvul.” (Kus. 147:15-18) Nzamb wetu, wija chom chawonsu ni ukutwisha kusal chom chawonsu, ukata kuyikel mbundu ni yom yitok ya mashik, ukutwish kand kukukwash chakwel uwina milong yin yawonsu. w17.07 19-20 par. 14-15

Mutapu wa kuyikel wa Yehova udi uwamp ni uwanyidin kumukwash ni muchim wetu wawonsu. Chawiy, ndiy ukweta mbil ya kuyikel muntu mwawonsu, ikala pansh ap mwiur. Satan katangap chom ap chimwing. Chawiy kakwetap mbil ap yimwing ya kuyikel mangand. Satan ni antu a kusambish aburena kalimish chisu chabwambwilau ukaleng wa Yehova. (Jer. 10:23) Ov, want ipau wau wayinkisha mbil ya kulik winyikel wa Yehova? Bwat. Want ipau ukat kumwinkish muntu mbil ya kutond ni kukwat mipak pakwez ukatap kumwinkish muntu mbil ya kumubwambwil Sakatang Yehova. Chakin kamu, kumubwambwil Nzamb kudi kusadin nayimp want ipau. Mulong tudi antu, tukwet kuswir kwa winyikel ni ukwash wa Yehova. w17.06 21-22 par. 2-4

Anch tukwatin nich usey mudimu wa kulejan, tukwikal mudi kambuy Paul ni tukudandamen kulejan ap anch atuzengol. (Mid. 14:19-22) Chilakej, kudiosh mu muvu wa 1930 djat ni mu muvu wa 1944, akadivar netu ading mu États-Unis ayizengola nakash. Pakwez adandamena kulejan. Papakijau antakel kuyikangesh kusal mudimu wa kulejan, akadivar netu aya ku tribinal ni ayinga nich milong yivud. Mu muvu wa 1943, Mukadivar Knorr walonda piur pa kuwin kwawinau ku Dirumburish Dijim (Cour Suprême) wa mu États-Unis. Walonda anch kwafanyinap kwikal mulong ap umwing wa kupwish ku Dirumburish anch akadivar kadandamenap kulejan. Walonda kand anch mulong akadivar a pa mangand mawonsu adandamena kulejan, amekesha anch rupompat rayikangeshap kuya kurutu. Akadivar akwau a mu jingand jikwau niyau awina milong ya mutapu winou. Mwaning, rukat retu mulong wa mudimu wa kulejan rikutwishap kusal anch kuzengol kutukangesha kulejan. Anch twakwat mudimu wetu wa kulejan nich usey, tukutwishap kutongin ching piur pa uvud wa asaa tukufunda mu rapor wetu. Tukusal yom yawonsu tukutwisha mulong wa kupan ‘uman wa rusangu ruwamp.’—2 Tim. 4:5. w17.06 12 par. 11-12

Kwikal ni rukat rikurikina mulong wa Yehova kutukwashin kuziyin ku yijil yend, kujijaman ni kukis yom yiyimp. (Kus. 97:10) Pakwez Satan ni mangand mend asadin usu wa kutuziyish ni kuyipish rukat retu mulong wa Nzamb. Mangand makwet chitongijok chiyimp piur pa rukat. Pa ndond pa kumukat Nzamb, antu avud adi “in kwikat ayinau.” (2 Tim. 3:2) Imedin nakash pa ‘maku ma mujimbu wa mbij, maku ma mes, ni kwibaz kwa yom yikwetau ni kwa yom yisadilau.’ (1 Yoh. 2:16) Kambuy Paul watubabesha piur pa yom yikutwisha kushiken anch twakat kwisangaresh ayinetu chakusambish. Walonda anch: ‘Kutek manangu ku yom ya ku mujimbu chirumburikin rufu.’ Mulong antu akata kusal mwamu akat kwikal akankuny a Nzamb. (Rom 8:6, 7) Antu akata kusutish chisu mu mwom wau mulong wa kukimb nfalang ni kusangaresh maku mau ma masandj, akat kushiken ku yom yiyimp nakash.—1 Kor. 6:18; 1 Tim. 6:9, 10. w17.05 16 par. 5-6

Anch akadivar adia arefije amekesh kujikitish mulong wa yom yiyisadidinau kudi antu akwau, pakad kwit yom yivud nakash, chinech chikutwish kuyisangaresh akadivar apanina. Chidi cha usey anch kurutu kwa machuku arefije akusal usu wa kuwanyish maswir mau ayinau. Kusal mwamu kukuyikwash kulam kalimish kau ni kwikal ni urund uwamp nau akadivar nau. (2 Tes. 3:7-9) Pakwez, arefije akwet kuswir kwa ukwash wetu. Chidiap anch ching tukwet nfalang jivud chadi twayikwash arefije. Yikwetau nich kuswir nakash chidi chisu chetu ni rukat retu. Chilakej, ukutwish kuyilej mutapu wa kwendangan ap kwi ndond kukutwishau kuland yom yiwamp ni ya usey ukemp. Ukutwish kand kuyilej mutapu wa kwikal nich mashiny ma kuchim nich ap mashiny ma kukatul nich masuku chakwel ayisadin mulong wa kwikal nich ka rufalang. Chidia cha usey nakash kudi kuyikwash chakwel ikal mu chikumangen chau chisu. Anch chiswapel, yikwashang chakwel ashikang ku yikumangan. Ufanyidin kand kuyirumburil mutapu uwamp wa kulejan kudi antu a mu teritwar, ni sal nau mudimu wa kulejan pamwing. w17.05 6-7 par. 11-12

Antu avud ashinshikidin nakash pa maku mau ni kwisangaresh, chawiy chimenau anch chikasiken kwikal ni chitongijok chiwamp piur pa yom ya ku mujimbu. (1 Kor. 2:14) Mulong katonginap nawamp, chikutwish kuyikasiken kwauril yom yidia yiwamp ni yiyimp. (Heb. 5:11-14) Maku mau ma yom ya ku mujimbu makutwish kwikal makash nakash. Ni anch ikal ni yom yivud, akukat kand kwikal ni yivud nakash. (Mul. 5:10) Pakwez kudi chom tufanyidina kusal mulong wa kurishish kutong kwa mutapu winou. Kutang Dizu dia Nzamb pakad kujing kukutukasikesh chakwel tujijamena rukat ra yom ya ku mujimbu. Yesu watongijokinang pa manangu ma Yehova, ni chinech chamukwasha kujijamen yoziu ya Djabul. (Mat. 4:8-10) Nlel kand, anch tukatin kujijamen rukat ra yom ya ku mujimbu, tufanyidin kusadin manangu ma Yehova mu mwom wetu. Chinech chikumekesh kudi Yesu anch tumukatin nakash kusutamu yom ya ku mujimbu. w17.05 26 par. 17