Ngond wa 3

Ov, kudi muntu wakwovishina nayimp mu chikumangen chen? Anch usadinap usu wa kupandakan yovil yiyimp yiney, yikuswimpap kwau. Ukutwishap kumutazuk muntu kanang ku chikumbu chey anch umukatinap. Ap pamwing ap kudi muntu wakwovisha nayimp pakur ni chikukasikedin kuvuramen. Bibil ulondin anch ukutwish kuwapish urund nau antu akwau, ap kand nau akankuny ney anch udi mwin kwakan. (Jnsw. 25:21, 22) Anch wamutazuk muntu kanang ku chikumbu chey, chikutwish kukuswapel kupandakan yovil yiyimp ni kukudish urund wa chisambu ni ndiy. Ukutwish kusambish kuman mikadil yimwing yiwamp mudiay ndiy mudi yamanay Yehova chisu chamupwitay ku uyakin. (Yoh. 6:44) Anch rukat rakubachik kumutazuk muntu kanang pakad ndiy kuchingejin, dikutwish kwikal disambishin dia kusambish urund uwamp. Mutapu ik ukutwisha kwikal nich kashinsh anch rukat rawiy rikubachikina kusal mwamu? Mutapu umwing udi wa kusadin chiyul chidia mu mufund wa dichuku wa nlel. Tufanyidin kutong piur pa mitapu yidiau akadivar nau anambaz netu awamp kutusutamu etu. Pamwing ap tukutwish kwilejin kusutin ritiy rau, kujijaman kwau ap mikadil yikwau ya win Kristu. Kutongin piur pa mikadil yau yiwamp kukukasikesh rukat retu mulong wa awiy ni kukusal anch chituswapela kwikal in kwakan. w18.03 19-20 par. 18-19

Kudi anvaj amwing, chom chimwing chikata kupak kuziyin chikat kushiken anch mwan amwopat mu chikumangen. Nambaz umwing ukweta mwanend changadim wopatau ni wadiokala ku chikumbu ulondin anch: “Nakimba kurumbuk kanang mu mikand yetu chakwel nitwisha kwiyingish nich mulong wa kusutish chisu ni mwanam mband ni mwijukuram mband.” Pakwez nfumwend wamukwasha mu mutapu uwamp kuman anch awiy kakwetap kand chisend cha mwanau ni anch afanyidin kushal ashinshamena kudi Yehova. Kupwa kwa mivu kanang, changadim winou amuchirisha mu chikumangen. Makwend ulondin anch: “Utulimishin nakash mulong wij anch twamuziyina Nzamb.” Anch mwaney ikundj ap mband amwopat, ov, ‘ukumuchingejin Yehova ni muchim wey wawonsu’? Ukumekesh kudi Ndiy anch “[uchingejidinap] ronganyin rey amwiney”? (Jnsw. 3:5, 6) Chawiy en anvaj, dandamenany kuchingejin anch dipup dia Yehova ni umutakel wend yitentamin, ap anch kuziyin kukat kulet kusansan yisu yimwing. Teshany dipup dia Yehova ni kangal wadibwambwilany. w18.03 30-31 par. 12-13

Bibil kalondinap anch muntu afanyidin kumubatish ching anch wawanyish mivu kanang. Pakwez chidi chiwamp kudi anvaj kutong nawamp chirumburikina kwikadish in kwilej. Mu dizu dia Grek, mazu ‘kwikadish in kwilej’ masadidinau mu Mateu 28:19 marumburikin kumufundish muntu ni chitongijok cha kumukwash ikala mwin kwilej Bibil ap mwin kwilej wa Yesu. Maverse makwau mu shapitre winou mamekeshin anch mwin kwilej udi muntu wilejina ni uteshina yom yafundishay Yesu ni ukatina kumuziyin. Kudiosh kamu chisu chikatau kuvadik an, anvaj afanyidin kuyifundish ni chitongijok cha kuyikwash kwipan ayinau kudi Yehova ni kwikal in kwilej a Kristu. Chakin kamu, abebe kawanyidinap kutambul dibatish. Pakwez, Bibil umekeshin anch ap an achidia kal an akemp akutwish kutesh ni kukat uyakin wa Bibil. Chilakej, Timote wading mwin kwilej wipana kumusadin Yehova pading pachidiay mwanikanch. Mudi chibudikin, wikala ni ritiy rikash. (2 Tim. 1:5; 3:14, 15) Wading uchid nsand wa mivu piswimp 20 chisu chawanyishay yom yitinau mulong wa kutambul yisend ya pakampwil mu chikumangen.​—Mid. 16:1-3. w18.03 10 par. 4-5

Chisu twasambisha kumusadin Nzamb, twasala kuswimp kwaleta yom kushalijan mu mwom wetu. Yom yiney yapwap chisu twatambula dibatish. Mulong tudi antu akad kuwanyin, tukwet kuswir kwa kudandamen kuswimp. (Fil. 3:12, 13) Twikalap nchik ansand ap antu apamina kal, tufanyidin kwishinshikin kamu nich kashinsh kawonsu. Tukutwish kwiyipul anch: ‘Ov, nimen anch nidandamedin kwikal muntu wa mu spiritu nakash? Nidi mudi mwadingay Kristu? Mwikadil wam ni mutapu nimekening ku yikumangan umekeshin ik? Mambamb mam mamekeshin ik piur pa yom nikatininga kamu mu mwom wam nakash? Yisu yaku yam ya kwilej, ya kudjal ni ya kwileng, ni mutapu wam nakwiling ku yiyul yinginkishiningau umekeshining ik? Mutapu ik nisadining anch angoz kusal chom chiyimp? Nimekening kamu anch nidi mwin Kristu waswila kal?’ (Efes 4:13) Yipul yiney yikutwish kutukwash kwijik mutapu twapamina kal mu spiritu. w18.02 23 par. 4-5

Tushich kamu pa chisu chishalijadina ni chisu cha kwinyim mu rusangu ra an a antu. Yehova ukat kukumangej chisak chijim cha antu adiokila ku “mangand mawonsu, ni ku michid yawonsu, ni ku antu awonsu, ni ku jindim jawonsu,” mudi mwatakelay kulond Bibil. Kudi “muchid wa usu” wa antu mamiliyon chinan ni kusut akweta musangar mulong akat “kumusadil [Nzamb] muten ni uchuku.” (Kuj. 7:9, 15; Isay 60:22) Kand kal kwikalangap antu avud mwamu ilejina kumukat Nzamb ni antu akwau. Chawiy, Bibil watakela kulond anch machuku minam antu akad kwikal arund a Nzamb akumekesh mutapu uyimp wa rukat udia wa kwitongin. Kambuy Paul wafunda anch mu machuku ma nsudiel antu akwikal “in kwikat ayinau, in kukat nfalang,” ni “in kukat yom ya kwisangarish ayinau [pa ndond pa] kumukat Nzamb.” (2 Tim. 3:1-4) Mutapu wa kwitongin wa rukat riner rovijadinap ni rukat mulong wa Nzamb. Kulondul mipak ya kwitongin kukatap kumuletin muntu musangar, ap anch ukutwish kutong anch ukwet musangar. Pakwez, rukat mudi riner risadin anch antu ikala in kwitongin ni kusal anch mwom wikala ukash kudi muntu mwawonsu. w18.01 21-22 par. 1-2

Mulong Nowa wileja piur pa Yehova, wakudisha ritiy ni manangu ma Nzamb. Chinech chamuchidija, pakampwil ku kulik kusal chom chikutwisha kumwovish Yehova ushon. Mutapu ik chidia mwamu? Nowa wakata kwikal murund wa Nzamb, chawiy kadingap murund wa antu akad kutek ritiy mudiay Yehova ni amulikina. Chinyim ni antu inay, Nowa kamudimbap kudi ayilembil eza pa divu. Antu ayibazang ayilembil inay akweta usu ni apakishang kuyifukwil. (Dis. 6:1-4, 9) Chikwau kand, Nowa wading wij anch Yehova wakata anch antu avala an ni izwisha divu. (Dis. 1:27, 28) Chisu ayilembil chatau amband ni pavalau nau an, Nowa wading wij anch chading chiyimp. Chinech chamekana kamu patok chisu chapamau an inay ni kwikal ayitabutabu ni akweta usu nakash kusutamu an akwau. Chawiy, Yehova wamuleja Nowa anch ukuletish mabeb chakwel ayishesha antu ayimp awonsu. Mulong Nowa wading ni ritiy mu kubabesh kwa Yehova, wasala waat, ndiy ni dijuku diend apanda.​—Heb. 11:7. w18.02 11 par. 8

Anch wasala chitil chijim, Yehova ukutwish kukulikishin. Ukatin kukukwash ey kurijek urund wey ni ndiy. Pakwez ufanyidin kwitiy ukwash uletinay kusutin amakurump. (Jnsw. 24:16; Jak. 5:13-15) Chawiy kangal wachingel! Chitin kusal mwamu mulong wa kutambul mwom wa chikupu. Pakwez tong bil anch udandamedin kwifish nich chisu chilemp kupwa kwa kulikishin chitil chey. Kwading chisu chaziyay kambuy Paul mulong wa yitil yasalay pakur. Walonda anch: “Mulong am nidi mukemp nakash kupandakan atwimbuy a Yesu awonsu. Kiniwanyidinap kwimpil anch kambuy wa Yesu, mulong am [nazengola chikumangen] cha Nzamb.” (1 Kor. 15:9) Yehova wading wij anch Paul wading muntu wakad kuwanyin. Pakwez wamwitiyija Paul mudi mwadingay, ni wakata anch Paul ijika mwamu. Anch winanin chakin mulong wa yom wasala ni wamuleja Yehova yom yiney, ni amakurump anch chading cha usey, Yehova ukukulikishin chakin kamu. Itiyij anch Yehova wakulikishidin kal ni itiy dilikishin diend!​—Isay 55:6, 7. w18.01 7-8 par. 17-18

Mulong wa kwikal murund wa Yehova, tufanyidin kumutesh ndiy ni tufanyidin kwambamb nend. Mutapu uwamp tukata kumutesh Yehova kudi kwilej Bibil. Chinech chirumburikin kutang ni kutongijokin pa Dizu dia Nzamb ni pa mikand yimedina pa Bibil. Pakwez kwilej Bibil kudiap mudi kulam yom mu manangu mudi muukutwisha kusal mulong wa ekzame wa ku shikol. Pakwez, kudi mudi kusal weny usangareshina uyila kutal ni kujingunin yom yisu piur pa Yehova. Ukusej piswimp kudi Nzamb, niyend ukusej piswimp niyey. Dirijek dia Yehova diletin yom yivud yikutwisha kukukwash mu program wey wa kwilej. Chilakej, pa kapend ka jw.org, ukutwish kutan mafish ma kwilej nich ma buku “Chom ik Chakin Kamu Chifundishinay Bibil?” Yom yiney yikutwish kukukwash kukasikesh ritiy rey ni kurumburil yitiyij yey kudi antu akwau.​—Kus. 119:105. w17.12 23-24 par. 8-9

Kuswimp mudi kwinoku kushimokishena ading akulejen kal mu uprofet wa Bibil. Tutangin mu mukand winou piur pa annam a yidiany, mudi atwingol nau antambu, akushakama pamwing mu chisambu ni annam a pol, mudi an a amikoku ni an a angomb. (Isay 11:6, 7) Akadivar nau anambaz avud ading ni chisum mudi annam ayidiany pa kusambish pakwez katat adi in chisambu. Ukutwish kutang jinsangu jimwing piur pa antu inay mu mutu wa mulong ulondina anch “Bibil Ukarumwin Mwom ya Antu,” pa kapend ka jw.org. Pakwez pakach pa antu a Yehova padi antu avud ading akweta chisum pakwez katat ‘amudjadin kal muntu musu watangau mudi mudia rusot ra Nzamb mu kutentam kwakin ni mu kutumb.’ (Efes 4:23, 24) Anch antu ilej piur pa Nzamb, akat kwijik anch aswiridin kulondul mbil jend. Mbil jinej jikat kuyikwash kuswimp yitiyij yau, mutapu wau wa kutong ni mutapu wau ukusalau. Chidiap chiswapela kusal kuswimp kwinoku, pakwez spiritu wa Nzamb ukutwish kuyikwash antu akatina kumusangaresh. w18.01 31-32 par. 15-16

Bibil ulondin anch antu ayila mwiur ayivumbwil “muntu ni muntu . . . pa chisu chend.” Chawiy tukutwish kuchingejin anch divumbuk mulong wa antu akushakama pansh, akuditenchik kand niyau nawamp. Chinech chikutwish kutushikij kwiyipul anch: Ov, antu afila katat akuyivumbul kwisambishil kwa Mivu Kanan ya Kuyikel kwa Kristu ni kuyak kudi akatish nau ayija? Ov, amakundj ashinshamena a pasak ading antakel awamp akuyivumbul bil chakusambish mulong wa kukwash kuyitenchik antu a Nzamb mwi ngand yisu? Yom ik yikushikena kudi antu alika kumusadin Yehova? Chisu ik ni kwisu kukuyivumbwilau? Kudi yipul yivud tukutwisha kwiyipul. Pakwez, tukwetap kuswir kwa kwiyakamish piur pa yom yiney katat. Chidi kwau chiwamp kuchingel ni kuman mutapu ukusadika yom yiney. Tukutwish kuchingejin anch chikwikal cha musangar kuman mutapu ukusalau yom yiney kudi Yehova. Kushik ni katat, tufanyidin kukasikesh ritiy retu mudiay Yehova. Washilamu kusutin Yesu anch antu afila adi mu manangu mend ni akuyivumbul kand.​—Yoh. 5:28, 29; 11:23. w17.12 14 par. 20-21

Ov, umen mutapu ukutwisha kukwash chiyul chinech mu dijuku diey? Yehova uyilejin amakundj anch: “En amakundj angatan, muntu ni muntu amukata mukajend wakad kumuzazimwokin.” Ikundj mwin rukat ukat kumulimish mukajend. Mutapu ik? Pa kutesh yitongijok yend ni kwitiyij anch yom yilondinay mukajend yidi ya usey kudi ndiy. (1 Pita 3:7) Ap anch kasadinap chisu chawonsu yom yitinay mukajend, kumutesh kukutwish kwamukwash kukwat mipak yiwamp. (Jnsw. 15:​22) Ikundj mwin rukat kakatap kwit anch mukajend amulimisha. Pakwez, ukat kusal usu wa kutambul kalimish kend. Anch ikundj wamukat mukajend ni anend, akwikal kamu ni musangar nakash pamusadidinau Yehova ni akutambul difut dia mwom. w17.11 30 par. 12; 31 par. 15

Kambuy Paul wayifundina in Kristu a ku Kolosay padingay mu rukan ku Rom piswimp mivu 60-61. Wayirumburila mulong wak afanyidin kwikal nich ‘kutesh kwa mu spiritu,’ charumburik anch kwikal ni ukaliweny wa kuman yom mudi muyimenay Yehova. (Kol. 1:9) Paul walonda anch: “Chawiy chinakubabeshany chakwel kangal witiyany muntu akudimbany nich mazu ma rulemb. Chawiy babalany, chakwel kangal muntu wakukwatany mu mupit wa manangu ma antu ma kudimban makad usey. Yom yiney yikat kudiokal ku malejan makat kutambulau antu mu majuku ma angakau, ni ku [spiritu muyimp ukata] kuyikel pa mangand, pakwez kiyikat kudiokalap kudi Kristu.” (Kol. 2:4, 8) Kupwa Paul warumburila kand mulong wak yitongijok yimwing yijikena nakash yidi yiyimp, pakwez antu avud ayikatin. Chilakej, pakach pa yitongijok yiney padi yitongijok yimwing yikutwisha kusal anch antu iyova anch akwet manangu nakash ni awapin kuyisutamu akwau. Chawiy Paul wafunda mukand wend mulong wa kuyikwash akadivar kwipuk yitongijok ya mangand ni kulik yisal yiyimp.​—Kol. 2:16, 17, 23. w17.11 21 par. 1

Yom ik yifanyidinay mwin Kristu kulik kusal chakwel adandamena kutambul riy ra Yehova? Ufanyidin kulik swa ap yom yisangarediningay anch yikutwish kumutwal ku chitil. (Mat. 18:9) Chilakej, anch arund ney akat kukubachik kusal yom yikisinay Yehova, ov, ukulik kubombakan nau? Anch umen anch chikasiken kusop mutapu wey wa kuna maar, ukutwish kwipuk yom yikutwisha kukwoz chakwel una maar nakash? Anch umen anch chikukasikedin kusop maku ma kusal masandj, ov, ukutwish kwipuk kutal mafilim, tupend twa web tuyimp ap yom yikwau yikutwisha kukushikij ku kwikal ni yitongijok yijondila? Vurik anch, usu win wawonsu tusadina mulong wa kuziyin yijil ya Yehova ukwet usey. Kwikil chom chipandakena kuyip mudi kwiyov anch Yehova watulikin kal kwend. Ni kwikil chom chipandakena kuwap mudi kwiyov anch tukwet ‘rukat rishinshamena ra chikupu’ ra Yehova.​—Isay 54:7, 8. w17.11 12 par. 12

Ov, umenap anch Zakariy 5:4 ulondin anch mashing mafanyina “kuya kwandam mu yikumbu ya aij” ni anch mafanyina “kashakam mu yikumbu yau, chad yikumbu yikez kashal yibumbur kusu?” Chawiy, Yehova ukutwish kujingunin patok ni kurumburish in kusal uyimp awonsu adia pakach pa antu end. Ap anch muntu ukata kwiy ukutwish kujindjik yom yisadinay kudi ampurij, amakurump end a mudimu, amakurump a chikumangen ap anvajend, kakutwishap kumujindjikin Yehova. Nzamb ukwikal nich kashinsh anch mutapu win wawonsu wa wij akuujingunin. (Heb. 4:13) Tusanger nakash kwikal pakach pa antu asadina yawonsu yikutwishau mulong wa kwikal in kashinsh “mu yom yawonsu”! (Heb. 13:18, TMK) Wij wa mitapu yin yawonsu ukat kumwovish Yehova ujim. Chidi chiwamp nakash kudi etu kwijik ni kuziyin mbil ja Yehova piur pa uwamp ni uyimp ni kushakam mu mutapu wa kulik kusaadikish dijin diend. Anch twasal mwamu, tukwipuk kurumburish kwa Yehova mulong wa antu akad kumuziyin. w17.10 16-17 par. 6-7

Ap anch twiyov anch katuteshangap nawamp ap aturumbukinang, tufanyidin kusal yom yawonsu tukutwisha mulong wa kusal chisambu. (Rom 12:17, 18) Anch twamwovishang muntu kanang ujim, tufanyidin kumwit dilikishin. Pakwez tufanyidin kwikal in kashinsh. Chisambu chidi kand cha usey nakash mu uruw. Chidi chiyimp nakash kudi ikundj ni mband kusal mudi akatijadin kurutu kwa antu, pakwez awiy mu ujindj akat kulik kulondishijan, akat kulondijan yom yiyimp umwing ni mukwau, ap kwikal in chisum. Tufanyidin kand kulikishin kwa kwikatin. Tufanyidin kusal mwamu ap anch muntu winou kajinguninap kwend anch waturumbukinang. Mulong wa kulikishin kwa kwikatin, tufanyidin kulik kutongin pa yom yatusalangay muntu. Rukat “kirukumulaminangap muntu kuyip.” (1 Kor. 13:4, 5) Pakwez anch twalam rukuny, tukutwish kuyipish urund wetu ni mukadivar ap ni nambaz netu ni tukuyipish kand urund wetu ni Yehova.​—Mat. 6:14, 15. w17.10 7-8 par. 14-15

Uruu wa Zakariy wikala ni usu ik kudi in Yuda a pa chisu chinicha? Yehova washilamu kuyikwash ni kuyichidij chakwel apwisha kutung tempel. Kushilamu kwinoku kwayinkisha ruchingej. Pakwez afanyina kudandamen kwiyipul mutapu ik ukutwishau antu akemp mwamu kusal mudimu ujim mudi winou. Chawiy Zakariy wayileja chom chimwing chafanyina kuyidiosh wom ni kwidjidjek kwau. Kudi in Yuda nau antu eza mulong wa kuyikwash mudi Heliday, Tobija ni Jedayeja, Yehova walonda anch antu akwau avud “akez kez mulong wa kukwash kutungiril chikumbu cha [Yehova].” In Yuda ading nich kashinsh anch Yehova wading ukwashin mudimu wau. Nich kutakaman achirikina mudimu wa kutungiril tempel, ap anch mwant wa Peris wading walikishin kal mudimu winou patok. Kulikish kwinoku kwading mudi mukandu ujim ujikina mwi njil yau, pakwez Yehova wadiosha chijil chinech. Kupwa, tempel apwisha kumutung mu muvu wa 515 kurutu kwa Kristu. (Esi. 6:22; Zak. 4:6, 7) Pakwez, mazu minam ma Yehova mamekeshin kand chom chimwing chijim nakash chisadikina nlel unou. w17.10 26 par. 17

Salomon watambula chisend cha pakampwil. Yehova wamutonda chakwel atakela mudimu wa kutung tempel mu Yerusalem, chading chisend chijim cha usey nakash cha kutung! Tempel winou wading ufanyidin kwikal wa “ufun nakash,” ni wading ufanyidin kwijikan mulong wa kuwap kwend. Cha usey nakash, tempel winou wafanyina kwikal ‘chikumbu cha Yehova Nzamb wakin.’ (1 Jsng. 22:1, 5, 9-11) Mwant David wading nich kashinsh anch Nzamb ukumukwash Salomon. Pakwez Salomon wading ‘uchidi mwan mukemp, kand kal ikala nich manangu.’ Ov, wafanyina kwikal utakamena mulong wa kwitiy chisend cha kutung tempel? Ap usand wend ni kuburen manangu kwakimba kumukangesh kusal mwamu? Chakwel atwisha, Salomon wading ufanyidin kwikal utakamena ni kusal mudimu. Anch Salomon kamekeshap kutakaman, wom wafanyina kumukwat ni kumukangesh chad kusambish mudimu. Mudi Salomon, tukwet kuswir kwa ukwash wa Yehova mulong wa kwikal atakamena ni kusal mudimu utwinkishinay. w17.09 27 par. 1-2; 28 par. 4-5

Mwom wey wakimba kwikal mutapu ik anch Bibil kwamwamu? Wafanyinap kwikal ni yiyul ya manangu mulong wa kukutakel dichuku diawonsu. Wafanyinap kwijik uyakin piur pa Nzamb, piur pa mwom ni piur pa machuku ma kurutu. Ni wafanyinap kwikal ni chitongijok ap chimwing piur pa yom yasalay Yehova kudi antu end pakur. Tujikitishin mulong etu tudiap mu mwikadil winou wa ushon. Yehova watwinka Dizu diend, Bibil. Washilamu anch uruu wad ukez kushakam chikupu ni chikupu. Kambuy Pita wajimbula mazu ma Isay 40:8. Ap anch verse winou kalondinap pakampwil piur pa Bibil, pakwez usadidin uruu wa Bibil. (1 Pita 1:24, 25) Tukutwish kutaninamu kamu nakash mu Bibil anch twamutang kamu mu dizu dietu dia chivadik. Antu akatina Dizu dia Nzamb ijing kamu chom chinech. Mu kusut kwa mivu yivud, antu asala usu nakash mulong wa kukarumun Bibil ni kusal anch ikalaku ap anch kwading rupompat ni milong yikash. Yehova ukatin anch antu avud ‘apanda ni kushiken ku kwijik ronganyin rakin ra uyakin.’​—1 Tim. 2:3, 4. w17.09 15-16 par. 1-2

Yom yidia mudi yamushikena Josef yiyishikedin kand ansand avud in Kristu nlel. (Dis. 39:7) Chilakej chimwing chidi cha changadim utazukinau anch Kim. Arund nend a ku shikol ibazang mu mambamb mau mutapu wasalangau masandj kwinsudiel kwa rubing. Kim kadingap ni jinsangu mudi jinej ja kuyilej. Walonda anch kwikal ushalijadina kwamusala iyova anch “amulik kal ni udi amwinend” yisu yimwing ni arund nend a shikol atonga anch usupin mulong kasadinap masandj. Pakwez Kim wading ukwet manangu. Wading wij anch choziu cha kusal masandj chikutwish kwikal chikash nakash anch uchid kal nsand. (2 Tim. 2:22) Ansand akwau amwipulang chisu chawonsu mulong wa kwijik anch uchid kal kajik. Chinech chamukwasha mutapu wa kuyirumburil mulong wak ulikining kusal masandj. Tuyijikitishin nakash ansand in Kristu akwatina mupak wa kujijamen milong ya masandj, ni Yehova uyisangaredin kamu nakash! w17.09 5 par. 8, 10

Antu amwing akat kujimanang swa ni akat kuyilond antu akwau mazu mayimp ni ma masaal. Anch chinech chashiken, antu awonsu a mu dijuku akat kwov nayimp. Bibil utubabeshin anch tufanyidin kwipuk kujiman, kuyilond antu akwau yom yiyimp ap kuyiswejin. (Efes 4:31) Yom yiney yikat kushikij ku yisal ya chisum. Nlel, antu avud mu mangand atongining anch ujim ni yisal ya chisum yidi kwau yom yiwamp. Pakwez yisalijok yiney yikat kumupipej Sakatang wetu. Akadivar netu avud aswimpin kal yisalijok yau ni adjadin kal wuntu usu. (Kol. 3:8-10) Makasu madi chikunku cha wuntu ukur. Chilakej, antu avud akat kudimban mulong wa kwiyep kuland mikand ya mbur matad ap mulong wa kwipuk kwitiyin kurumbuk kwau. Pakwez Yehova udi “Nzamb wa uyakin.” (Kus. 31:5) Chawiy witin anch in kwifukwil end awonsu ‘alonda uyakin’ ni ‘kangal alonda yom ya makasu.’ (Efes 4:25; Kol. 3:9) Chakin kamu, tufanyidin kulond uyakin ap anch chovishen usany ap chikasiken.​—Jnsw. 6:16-19. w17.08 16 par. 3, 5; 18-19 par. 12-13; 20 par. 15

Nlel unou, Yehova ukat kututakel kusutil Dizu diend, Bibil. Nfund a kuseng walonda anch dizu dia Yehova dikat ‘kuya mau nakash’ mulong wa kutukwash. Nzamb ukat kututakel mu mutapu uwamp ni pa chisu chiwanyidina. Tong mutapu utanidinamu kusutin Bibil, mu mikand ya “kashalapol ushinshamena ni kubabal,” mu program wa JW Télédiffusion, kapend ka jw.org, amakurump a chikumangen ni kusutil kand akadivar ni anambaz ney. (Mat. 24:​45) Ov, ukat kuman mu mwom wey anch Yehova ukat kusal swa mulong wa kukutakel? Nfund a kuseng wading wij anch Yehova watonda muchid wa Isarel wa pasak mulong wa kwikal antu end pakach pa michid yawonsu ya pa mangand. Wawiy muchid umwing watambula “dizu” dia Nzamb ni ‘malejan mend.’ (Kus. 147:19, 20) Nlel tukwet chisend chijim cha kututazuk pa dijin dia Nzamb. Tujikitishin nakash mulong tumwij, tukwet Dizu diend mulong wa kututakel ni anch tukutwish kwikal ni urund wa piswimp ni ndiy. Mudi mwin kufund Kuseng 147, ukwet mayingishin mavud nakash ma ‘Kumushiman Yah!’ ni kuyikasikesh antu akwau kusal niyau mwamu. w17.07 19-20 par. 15-16, 18

In kwilej a Yesu nlel, pamwing ni miliyon umwing ni kusut wa antu adia mu mudimu wa chisu chawonsu, asadin usu mulong wa kusadin chiyul cha Paul chidia kwiur oku. Akat kujijamen yoziu mulong wa kulik kwiyandjik mu mapiblisite ma mangand minam makweta ris. Akat kuvurik mbil yilondina anch: “Mwin kusondam ukat kwikal muswik wa mwin kumusondjik.” (Jnsw. 22:7) Satan ukatin anch tusutish chisu chetu ni usu wetu wawonsu mulong wa kusadin mangand mend ma kwisak. Antu amwing akat kusondam nfalang jivud nakash mulong wa kuland chikumbu, motak, kwilej shikol ap kand mulong wa kusal musambu wa uruw. Anch tubabelap, tukutwish kwandam mu dibaz dia mivu yivud. Tumekeshin anch tusadidin manangu anch twapipej mwom wetu, twiyep mabaz ni twasadin nfalang mu mutapu uwamp. Mu mutapu winou tukwishadin mulong wa kumusadin Nzamb pa ndond pa kwikal asuk a yom ya kwisak ya mangand minam.​—1 Tim. 6:10. w17.07 6-7 par. 13

Yehova ukwet mbil ya kuyikel mangand mawonsu. Ndiy ukat kusadin ulabu wend mu mutapu utentamina. Utulejin anch: ‘Am nidi Yehova, Muntu ukata kumekesh rukat rishinshamena, kutentam ni kurumburish pa divu, ni mulong wa yom yiney nikat kusangar.’ (Jer. 9:24) Yehova kakwetap kuswir kwa yijil ya antu mulong yimukwasha kukwat mipak piur pa yom yidia yiwamp. Pakwez, ndiy ukat kutek mbil mulong wa yom yidia yiwamp. Ni mulong mbil yiney yimedin pa kutentam kwend kuwanyidina, chawiy Yehova ukat kuyinkish antu yijil. Nfund a kuseng walonda anch: ‘Kutentam ni kurumburish madi manguj ma nkwas yey.’ Chawiy chijil chawonsu, mbil yawonsu ni mipak yawonsu yidiokila kudiay Yehova yiding yitentamina. (Kus. 89:14) Satan walonda anch Yehova kadiap Nyikel muwamp. Chawiy Satan kakutwishap kulet kutentam pa mangand. w17.06 22 par. 5

Yehova udi Musul wa uyakin. (Kus. 31:5) Mulong udi Tatuku mwin kupan, ukatining kwangan uyakin winou niyetwetu. Kushik ni katat, twilejin kal yom yiney yivud kusutin kutang Dizu diend ni mikand yetu, kukumangan ku yitentam ni ku yikumangan ya pa rubing. Patukumangejina uyakin uvud, tukwikal ni chom chatazukay Yesu anch “chipau cha mapit” cha uyakin wa “yom yikur ni yom yisu.” (Mat. 13:52) Yehova ukutukwash kwizwish ‘chipau chetu cha mapit’ anch twakimbijol uyakin mudi mukatau kukimb mapit ma usey majingamina. (Jnsw. 2:4-7) Ov, mutapu ik tukutwisha kusal mwamu? Tufanyidin kwilej Bibil ni mikand yetu chisu chawonsu ni kusal kukimbijol. Chinech chikutukwash kujingunin uyakin ‘usu’, utwakad kwijik. (Jos. 1:8, 9; Kus. 1:2, 3) Tufanyidin kwikal nich mushiku wa kudandamen kukimb uyakin uvud. w17.06 12-13 par. 13-14

Mukadivar umwing mujich uchidia nsand watongina piur pa mukand wa 1 Korint 7:28, ulondina anch antu atijadina ‘akez kuman mar mu mwom wau.’ Mukadivar winou wambamba ni mukurump wa chikumangen watena kal ni wapamina kal ni wamwipula anch: “Chad ‘mar’ minam mar ik ni mutapu ik nikutwisha kurish nich mar minam anch natan?” Kurutu kwa kumwakul ku chipul chinech, mukurump wamuleja mukadivar winou nsand atongina piur pa yom yikwau yafunday kambuy Paul anch: Yehova udi “Nzamb ukata kupan kwongoj kwawonsu! Ndiy ukata kutwongoj mu mar metu mawonsu,” ap mu milong. (2 Kor. 1:3, 4) Twij anch Tatukwetu Yehova utukatin ni ukat kutwongoj chisu tudia mu mar. Ukutwish kuvurik yisu yimwing pakukwashau kudi Yehova ni pakutakelay kusutin Dizu diend. Tukutwish kwikal nich kashinsh anch ukatin yom yiwamp kudi etu, mudi mwayisadinay atushalapol end a pasak.​—Jer. 29:11. w17.06 3-4 par. 1-2

Akadivar adia arefije akwet kuswir kwa yom yivud kulik kwau ching yakudia ni masun. Aswirikedin kwiyov akwashinau ni kuyikasikesh kusutin Bibil. (Mat. 4:4) Amakurump akutwish kuyikwash kukimb mikand ya mu dizu diau ni kuyikwash kumanijan nau akadivar alondina dizu diau. Chinech chidi cha usey nakash mulong arefije avud ashil kal ku usu yom yading yijidinau kal. Ashil kal majuku mau, antu ading ijikijadinau nau, ni chikumangen chau. Akwet kuswir kwa kuman rukat ni ranaken ra Yehova pakach pa akadivar nau in Kristu. Anch kasadinap mwamu, arefije akutwish kukimb ukwash kudi antu akwau a ngand yau akad kumusadin Yehova. (1 Kor. 15:33) Anch twasal iyova anch adi niyau a mu chikumangen, tusadin pamwing ni Yehova mulong wa kuyichidij ‘angez adia mwi ngand yetu.’ Arefije kakutwishap kuchirik kwol kwau chisu chichidiau kutakel antu ading ayizengodina. Iyipula anch: ‘Anch naman mar ma mutapu winou nikukat anch ansadin mutapu ik?’​—Mat. 7:12. w17.05 7-8 par. 15-16

Mulong tudi mu mangand mayimp ma Satan, kudi mayingishin mavud masadina anch tuziy yisu yimwing. (1 Yoh. 5:19) Anch twilikidij ayinetu tukuziy, ritiy retu rikuziy, ni rukat retu mulong wa Nzamb rikukep. Chilakej, tukutwish kurish ni milong yivud mulong wa upal, mulong wa mayej, ap mulong wa kuburen nfalang. Ap tukutwish kwov ushon mulong tutwishinap kusal chom kanang mudi twakatang. Tukutwish kuziy anch yom yimwing mu mwom wetu yisadikinap mudi twada tuchingejina. Yikalap nchik milong turishina nich, tufanyidinap kwiyov anch Yehova watulikin kal. Tongijokin piur pa mazu makasikeshina madia mu Kuseng 136:23 malondina anch: “Ndiy watuvurika mu machuku metu mayimp mulong rukat rend rudimukina rushiching chikupu.” Tukutwish kwikal ni kashinsh anch Yehova uteshining “dizu dia kwilemb” kwetu ni ukwakul ku malembil minam.​—Kus. 116:1; 136:24-26. w17.05 17 par. 8

Mudi mulejenau mu Galatia 2:11-14, Pita wova wom wa antu. (Jnsw. 29:25) Pita wading wij mutapu wading wiyovilay Yehova piur pa Akamichid. Pakwez, wading ukwet wom anch in Kristu in Yuda atwadinau kal ku mukand akutwish kutong nayimp pa kudiokalau ku Yerusalem anch amutan ukat kwibomb pamwing nau in Kristu Akamichid. Kambuy Paul wamwela Pita anch wading mwin rubabek. (Mid. 15:12; Gal. 2:13) Pita wading muntu wikepishina ni witiya ukwash wa Paul. Bibil kalondinap anch Pita washadisha yisend yend. Pakwez, Pita amupepila chakwel afunda mikand yaad mu Bibil. Yesu, udia mukurump wa chikumangen, wadandamena kumusadin. (Efes 1:22) Akadivar nau anambaz a mu chikumangen ading ni mutapu wa kumwimburij Yesu ni Tatukwend mu kumulikishin Pita. Nich ruchingej rawonsu, kwikil muntu ap umwing witiya anch kurumbuk kwa muntu wakad kuwanyin kumupwakesh. w17.04 25-26 par. 16-18

Yehova wajiyisha misumb yiniya ni wapwisha yom yiyimp yasadikang mwinimwa. Pakwez ‘wateka kand chilakej’ mulong wa antu ayimp nlel. Mu mutapu wapwishay Yehova yisal yawonsu yiyimp mu chisu chinicha, mwawiy mukupwishay kand nlel pakujiyishay mangand minam. Yom ik yikuswinkeshau pa midimu yiyimp? Mu mangand masu, tukukwatikan nakash ni midimu yivud yiletishina musangar. Chilakej, tukukarumun divu kwikal paradis ni tukutung yikumbu mulong wetwetu ayinetu ni mulong wa akatish netu. Tukwak kand mamiliyon ma antu akuvumbuka ni tukuyifundish piur pa Yehova ni piur pa yom yawonsu yisadiningay mulong wa antu. (Isay 65:21, 22; Mid. 24:15) Mu chisu chinicha, tukukwatikan ni midimu yikutuletina musangar ni yikumutumbisha Yehova! w17.04 13 par. 11-12

Pasalay kushilamu kwinoku, pamwing ap Jefite wading wij anch mwanend changadim wafanyina kwez wa kusambish mulong wa kumusankan. Ap anch wading wij ap bwat, kuwanyish kuchip kwend kudi Yehova chadingap chiswapela kudi Jefite ni mwanend. Jefite pamumanay mwanend changadim, walonda anch wamuletina mar nakash. Mwanend waya “ni kudil mulong ukufa wakad kwijik ikundj.” Mulong wak? Jefite kadingap ni mwan ikundj, ni kand mwanend mband kafanyinap kwachik ni kuval. Dijin dia Jefite dia mu dijuku diafanyina kushadik. Pakwez Jefite ni mwanend changadim ijika anch kuwanyish kuchip kwinoku kwading kwa usey nakash kusutamu yovil yau. Jefite walonda anch: “Mulong nachipil kal kurutu [kwa Yehova], chawiy kinikutwishap kand kuchirish kuchip kwam.” Mwanend walonda anch: “Sal kwey kudi am mudi [mudia] dizu diabudika mu kan mwey.” (Ank. 11:35-39) Jefite ni mwanend changadim ading antu ashinshamena, katongap ap pakemp kulik kuwanyish machip mau kudi Nzamb ap anch chading chiyikasikedin kusal mwamu.​—Kuv. 23:21, 23; Kus. 15:4. w17.04 4-5 par. 5-6

Josef, mwijukuril wa Aburaham wading niyend mwin kushimpish muchim. Amumekeshina kuburen kutentam kukash nakash. Chakusambish, anamakwend amulandisha mu usuk padingay pamwing ap ni mivu 17. Chikwau kand, amudimbena makasu anch wakimba kusal masandj ku usu ni mband wa mwant wend ni amudjibula mu rukan. (Dis. 39:11-20; Kus. 105:17, 18) Ap anch Josef wading kashalapol ushinshamena wa Nzamb, wamekana mudi amupupin pa ndond pa kumuyukish. Pakwez kupwa kwa mivu 13, yom yawonsu yaswimpa. Josef amubudisha mu rukan ni wikala nyikel wa kaad ukweta usu nakash mu Idjibit. (Dis. 41:14, 37-43; Mid. 7:9, 10) Ov, kuburen kutentam kwinoku kwamovisha Josef ujim? Wiyova anch Yehova wamulik kal? Bwat. Josef wachingela nich kushimpish muchim. Chom ik chamukwasha? Rading ritiy rend mudiay Yehova. Wijika anch Yehova umen yom yawonsu. Tumen mwamu kusutil yom yayilejay anamakwend anch: “Kangal wakamany kwen, bwat! Ov, yam nidia pa ndond ya Nzamb? En wasotanya kwinsalany nayimp, pakwez Nzamb wakarumuna kuyip kwikal kuwap chakwel antu avud ez apanda mudi ilel.” (Dis. 50:19, 20) Josef wading wij anch chading chifanyidin kuchingel yiyukish ya Yehova. w17.08 4 par. 6; 6-7 par. 12-13