Ngond wa 4

Mutapu ik tukutwisha kutaninamu mu mudimu usadinau amakurump? Tukutwish kwimburij ritiy rau ni chilakej chau chiwamp, ni tukutwish kulondul yiyul yitwinkishinau kusutin Bibil. (Heb. 13:7, 17) Amakurump atukatin ni akatin anch tuseja piswimp ni Nzamb. Anch aman anch twezinap kand ku chikumangan ap twashadish kal mushiku wetu, akat kusal usu kapamp kamwing mulong wa kutukwash. Akat kututesh bil nawamp kupwa akutukasikesh mu mutapu wa rukat ni akutwinkish yiyul ya manangu yidia mu Bibil. Ov, ukat kuman ukwash wau mudi uman umekeshina anch Yehova ukukatin? Vurik anch chiswapelingap kudi amakurump kutwinkish chiyul. Chawiy mutapu ik ukutwisha kusal anch chiyiswapela amakurump kukwinkish chiyul? Ikal wikepishina, mwin kujikitish ni uswapela kwambamb nend. Man ukwash wau mudi uman wa rukat ra Nzamb. Ukutaninamu ni amakurump akusanger kusal mudimu wau. w18.03 31 par. 15-16

An awonsu kadingap mutapu umwing. Awonsu kakatap kuswa ni mivu yimwing. An amwing akat kutesh uyakin, akat kukwat mipak ya manangu ni akat kuyibatish pachidiau anikanch. Akwau akat kuchingel anch apamaku bil chad lel atambul dibatish. Anvaj in manangu kakatap kuyishindin anau chakwel atambul dibatish. Pakwez, akat kumukwash mwan ni mwan kuya kurutu kukwatijan ni ronganyin rend. Anvaj akat kusangar anch anau asadin mufund wa dichuku wa nlel. Pakwez afanyidin kuvurik anch chitongijok chau chidi cha kuyikwash anau kwikal in kwilej. Pakwetau chitongijok chinech mu manangu, akutwish kwiyipul anch: ‘Ov, mwanam wij kamu yom yivud mulong wa kwipan amwinend kudi Yehova ni kutambul dibatish?’ w18.03 10-11 par. 6

Anch twitiy kuya kwatutazukangau, tufanyidinap kulik kuya anch kwikil diyingishin dia usey dia kusal mwamu. Mwin kututazuk ukutwish kwikal warijekang kal nawamp mulong wa kwez kwetu, chad anch twalik kuya, usu wend wawonsu ukwikal wa chamwamu. (Mat. 5:37) Antu amwing akat kulikang kuya kwayitazukangau mulong akat kuman anch ndond yikwau yayitazukangau yidi yiwamp nakash. Ov, mwamu kudi kumekesh rukat ni kalimish? Tufanyidin kujikitish mulong wa yom yawonsu yitwinkishinau kudi muntu watutazukang. (Luka 10:7) Anch tufanyidinap kuya, chikwikal cha rukat ni cha manangu kumulej muntu watutazukang kurutu kwa chisu. Chidi kand cha usey kulimish yaku ya ndond ushicha. Mu jindond jimwing, angendj ezining pakad kukan akat kuyakang nawamp. Ku jindond jikwau, chiding chiwamp kwijikish kurutu kwa kwez kuyital antu. Ku jindond kanang, mwin kwakan ukat kuyinkishang angendj end yakudia yiwamp yikwetay, kupwa chad wayinkish antu a mu dijuku diend.Pakwez ku jindond jikwau, antu awonsu akat kuyisadin mutapu umwing. Tufanyidin kusal usu wetu wawonsu mulong wa kwikal nich kashinsh anch muntu watutazukang ukwikal ni musangar. w18.03 20 par. 20-21

Kwikal ni ronganyin ra Bibil kwawiyap kwau kukutwisha kutwikadish antu a mu spiritu. (1 Ant 4:29, 30; 11:4-6) Chawiy, yom ik yikwau tufanyidina kusal mulong wa kuwejin pa ronganyin ra Bibil? Tufanyidin kudandamen kukasikesh ritiy retu. (Kol. 2:6, 7) Mutapu uwamp udi wa kwilej buku ulondina anch Mutapu wa Kushal mu Rukat ra Nzamb. Chinech chikutwish kukukwash kwijik mutapu wa kusadin mbil ja Bibil mu mwom wey. Anch wilejin kal buku winou, kudi kand mikand yikwau ukutwisha kwilej yikukukwasha kukasikesh ritiy rey. (Kol. 1:23) Tukwet kand kuswir kwa kutongijokin pa yom twilejina ni kumwit Yehova ukwash chakwel tumana mutapu wa kuyisadin. Anch twilej ni kutongijokin, yitongijok yetu yikusal anch tukudisha maswir metu ma kumusangaresh ni kumuziyin Yehova. (Kus. 40:8; 119:97) Tufanyidin kand kudjibul chom chin chawonsu chikutwisha kutukangesh kukasikan mu spiritu.—Tit. 2:11, 12. w18.02 24 par. 7-9

Mulong wa kukudish ritiy mudi ra Nowa, chidi cha usey kwilej Dizu dia Nzamb nawamp, kukat yom twilejina ni kuyisadin mulong wa kuswimp ni kukwat mipak yiwamp mu mwom wetu. (1 Pita 1:13-15) Mwamu ritiy ni manangu ma Nzamb yikutuchidij ku mipit ya Satan ni ku yibachikin yiyimp ya mangand minam. (2 Kor. 2:11) Antu avud mu mangand akwet chisum ni mikadil yiyimp ni akat kuziyin maku mau mayimp. (1 Yoh. 2:15, 16) Kijap kwau anch tudi kamu piswimp ni disudiel dia mangand minam mayimp. Anch tukwetap ritiy rikash, tukutwish kusambish kutong mudi awiy. Kangal twavuramen anch pafanikeshay Yesu chirung chetu ni chirung cha Nowa, kalondap piur pa chisum ap mwikadil uyimp pakwez walonda piur pa ubaj wa kwikal ni kampuw mu kumusadin Nzamb. (Mat. 24:36-39) Iyipula anch: ‘Ov, mwom wam umekeshin kamu anch nimwij kamu Yehova? Ritiy ram rimbachikin kusal yom yilondinay Yehova anch yidi yiwamp ni kuyilej antu akwau yom yikatinay Nzamb anch awiy asala?’ Yakul yey ku yipul yiney yikukukwash kwijik anch niyey wendin pamwing ni Nzamb wakin mudi mwenday Nowa.—Dis. 6:9. w18.02 11-12 par. 8-10

Tukutwishap kamu kuyiyep antu in awonsu akweta mikadil yiyimp. Tukutwish kusal nau mudimu pamwing, kuya nau ku shikol pamwing ap kushakam nau pamwing. Pakwez tufanyidinap kutong ap kusal mudi musadinau. Yom ik yikutukwasha? Tukutwish kukasikesh urund wetu ni Yehova mu kwilejang Bibil ni kutond arund awamp amukatina Yehova. Tukatin kand kuyikwash antu akwau kumwijik Yehova. Kimb mitapu ya kupan uman, ni mwita Yehova akukwasha kulond yom yiwamp pa chisu chiwamp. Tukusal kand mulong antu ijika anch tudi Atuman a Yehova. Chawiy, mwikadil wetu uwamp ukulet ntumb padiay Nzamb ni chidiap kudi ayinetu. Yehova watufundisha anch tufanyidin “kulik mwom uyimp ni maku mayimp ma yom ya mangand, chakwel twikal nich mwom wa kwilam ayinetu, utentamina, wa [kwipan kudi] Nzamb mu chirung chinech.” (Tit. 2:11-14) Anch twamwimburij Yehova ni twasal yikatinay anch tusal, antu akwau akuman yom yiney. Amwing akutwish kulond anch: ‘Tusotil kubombakan ni yenen, mulong tuteshil anch, Nzamb udi ni yenen.’—Zak. 8:23. w18.01 32 par. 17-18

Ov, chinech chirumburikin anch chidi chiyimp kwikat ayinetu? Bwat, chidi chiwamp kwikat ayinetu ni chidi cha usey. Yehova watutanga mutapu winou. Yesu walonda anch: “Chifanyidin uyikatany akwen mudi muwikatilanya en ayinen.” (Mar. 12:31) Pa chinech, tukutwishap kuyikat antu akwau anch twikatinap etu ayinetu. Bibil utulejin anch: “Chifanyidin ngatan kumukat mukajend mudi muukatilay mujimbu wend amwinend. Muntu mwawonsu umukatila mukajend wikatil amwinend. Mulong kwikil muntu ukisina mujimbu wend amwinend, pakwez ukat kuudish ni kuulam nawamp.” (Efes 5:28, 29) Komb choviken kamu anch tufanyidin kwikal ni rukat ruwanyidina mulong wa ayinetu. Rukat ra kwitongin tutangina mu 2 Timote 3:2 ridiap riwamp. Ridi ra kwitongin ap ra choy. Anch muntu wikat amwinend nakash, ukat kwitongin amwinend kusutamu muchifanyidina. (Rom. 12:3) Ukat kwibangin nakash piur pa amwinend kusutamu kuyibangin antu akwau. Anch yom yayip, ukat kuyifish nich antu akwau pa ndond pa kwifish nich amwinend. Mwin kufund umwing wa nsangu ja Bibil umufanikeshin muntu winou ni kanam katazukinau anch kasak kakata kwivung mudi dibuj, kashicha mulong wa kupat chirungul ni kukarumun miy yend kudiau akwau. Muntu mudi winou kakwetingap kamu musangar. w18.01 22 par. 4-5

Chisu twilejina Bibil, tukat kumutesh Yehova, ni chisu tulembila, tukat kwambamb nend. Tufanyidinap kutong anch malembil madi kwau mudi chaku ap mudi ‘chom chiwamp’ chikutwish kutuletin musangar. Malembil madi kamu kwambamb kwakin ni Sakatang wetu. Tong bil: Yehova ukatin anch atesha yom ulondina! (Fil. 4:6) Komb, chisu wiyakamishina piur pa diyingishin din dawonsu, Bibil ulondin anch “pan yakamish yey kudi [Yehova].” (Kus. 55:22) Mamiliyon ma akadivar nau anambaz akukulej anch chiyul chinech chayikwashin kal. Niyey chikutwish kand kukukwash! Chawiy, tufanyidinap kwetu ching kulembil chisu tukatina anch Yehova atukwasha. Yisu yimwing tukat kwiyakamish nakash piur pa milong yetu ni tukat kuvuramen yom yawonsu yiwamp tudia nich. Chawiy pakish kusal mwamu: Dichuku diawonsu, tong piur pa yom yisatu upanina kujikitish, kupwa mujikitisha Yehova mulong wa yom yiney. w17.12 24 par. 10-11

Tunan twa in kwilej a Bibil akat kwipan kudi Yehova ni kutambul dibatish. Avud pakach pau adi ansand alidinau mu uyakin ni atondin njil yiwamp ya mwom. (Kus. 1:1-3) Anch udi nvaj mwin Kristu, ukutwish kwikal ni ruchingej anch dichuku dimwing kurutu oku, mwaney ikundj ap mband niyend ukutambul dibatish. (Ilikej ni 3 Yohan 4.) Chiudia nvaj mwin Kristu, ukukat anch mwaney ijika mifund yitumbila, yidia nlel unou Mifund ya Hebereu ni Mifund ya Grek ya win Kristu. Ap anch achidi kal an akemp nakash akutwish kwilej piur pa antu ni yom yidia mu Bibil. Dirijek dia Yehova diletin mabuku mavud, mabroshir ni mavideo makutwishau anvaj kusadin mulong wa kuyikwash anau. Pakach pa yom yiney, yisu yidiaku mu dizu dien? Mwaney ukwet kuswir kwa kwijik yom yidia mu Bibil chakwel akasikesha urund wend ni Yehova. w17.12 15-16 par. 1, 4

Pamwing ap udi nambaz mwin Kristu, pakwez, nfumwey kamusadidinap Yehova. Yom ik ukusala anch wiyov anch kakusadidinap yom mu mutapu waday ufanyidinay kukusadin? Ukutwish kwov ujim ni kusambish kutend nend, pakwez kusal mwamu kukutwish kuwapish milong? Ap anch uyingin nich, yom yiney yikusal anch ndiy akata kamu kumusadin Yehova? Pamwing ap bwat. Pakwez anch wamekesh kalimish mulong wa chisend chend cha ntakel wa dijuku, ukutwish kukwash dijuku diey dikala ni chisambu nakash ni kulet ntumb padiay Yehova. Chilakej chey chiwamp chikusal anch nfumwey akata kumusadin Yehova ni en awonsu aad ukutwishany kutambul difut. (1 Pita 3:1, 2) Pamwing ap udi mukadivar mwin Kristu, pakwez, mukajey kamusadidinap Yehova. Yom ik ukutwisha kusal anch umen anch kakulimishinap? Anch wapakish kumekesh anch nany udia ntakel mu kumuswejenang, ov, umen anch ukukulimish? Bwat kamu! Nzamb uchingejin anch ey wikala ikundj mwin rukat umwimburijina Yesu. Yesu, udia ntakel wa chikumangen, ushimpishining muchim chisu chawonsu ni ukweting rukat. (Luka 9:46-48) Anch wamwimburij Yesu, mu kusut kwa chisu mukajey niyend ukukat kumusadin Yehova. w17.11 30-31 par. 13-14

Antu atongining yitongijok ya mangand kijingap mbil ja Yehova, ni anch tubabelap, yitongijok yau yikutwish kuziyish pakemp pakemp kashinsh ketu mu manangu ma Nzamb. Etu awonsu atubachikin ku yitongijok ya mangand kusutin televizion, Internet, ku mudimu, ap ku shikol. Nlel, chitongijok cha kulik kumwitiyij Nzamb achikwet kudi antu avud nakash mu mangand. Antu akata kulond mutapu winou, katonginap kwau nakash mulong wa kwijik anch Nzamb udiaku ap bwat, pakwez akutwish kwau kusanger yovil ya want ipau wau wa kusal yom yikatinau. (Kus. 10:4) Akwau atongining anch chidi cha manangu kulond anch: “Nikutwish kwam kwikal ni mbil jiwamp pakad kumwitiyij Nzamb.” Ov, chidi cha manangu kwitiyij anch kwikiling kwau Sakatang? Antu amwing akweting kanrumbangesh chisu chikatau kuyipul in siyans mulong wa kuyilej yakul. Pakwez uyakin uswapel kwau kutesh. Ov, chikumbu chikutwish kwau kwitung achinach? Bwat kamu! Ching achitung kudi muntu kanang. Chawiy, yom yikweta mwom yishimokishen nakash kusutamu chikumbu. w17.11 22 par. 2-4

Mulong wak chidi cha usey kudi etu kwikal ku Chivurikish? Diyingishin dimwing didi anch kukumangan ku yikumangan udi mutapu tukata kumwifukwil Yehova. Tukutwish kwikal nich kashinsh anch Yehova ni Yesu akat kuman kamu muntu ni muntu pakach petu ukata kusal yom yawonsu yikutwishay mulong wa kushik ku chikumangan chinech cha usey cha pa muvu. Tukatin kamu anch Yehova ni Yesu atumana anch tudi ku Chivurikish, ching anch kwatushiken chom kampand chikutukangesha kwikalaku. Anch yisal yetu yamekesh anch yikumangan yikwet usey kudi etu, tukumwinkish kamu Yehova diyingishin dia kulam majin metu mu “mukand wafundau yivurikish.” Mukand winou autazukin anch “mukand wa mwom.” Mudi majin ma antu awonsu akatinay Yehova anch atambula mwom wa chikupu. (Kuj. 20:15) Mwi mbing kampand kurutu kwa Chivurikish, tukutwish kwipan nakash mu malembil ni mu kutong kamu nakash mutapu ukasikena urund wetu ni Yehova.—2 Kor. 13:5, TMK. w18.01 10 par. 4-5

Chisu chashikangay mu musumb wa kuchinin, mwin kuchin wading kamu mu diking. Yehova walonda piur pa misumb yiney anch: “Yikez kwikal ya kwikangil.” (Jos. 20:2, 3) Yehova kalondap anch mwin kuchin winou amurumburisha kand kapamp kakwau piur pa mulong wawiy umwing, bwat. Chikwau kand, mwin kufundakesh mash kamwitiyangap kwandam mu musumb chakwel amujipa. Anch mwin kuchin winou udi mu musumb, wiyovang kamu nawamp mu diking dia Yehova. Kadingap mu rukan bwat. Ukutwish kusal mudimu, kuyikwash antu akwau ni kumusadin kand Yehova mu chisambu. Inge, ukutwish kamu kwikal ni musangar ni mwom uwamp! Antu a Nzamb asala yitil yijim adandamedin kwifish nich ap kupwa kwa awiy kukarumuk. Amwing iyovil anch Yehova kakutwishap kamu kuvuramen yom yasalau. Anch wiyov mwamu, twilemb amboku, ikal nich kashinsh anch ang Yehova wakulikishin, wakulikishin kal kamu. Ufanyidinap kwifish nich ap pakemp. w17.11 11 par. 6; 12-14 par. 13-14

Mutapu umwing tukutwisha kukasikesh uumwing udi wa kutongin kamu nawamp piur pa kurumburik kwa mukat ni nviny. Tufanyidin kusal mwamu kurutu kwa Chivurikish, pakampwil kamu uchuku winiwa. (1 Kor. 11:23-25) Mukat wakad chivish umekeshin mujimbu uwanyidina wa Yesu wapanay mudi mulambu. Nviny musuz umekeshin mash mend. Pakwez tuswirikedin kusal yom yivud pa ndond kwau pa kwijik yom yiney ya pa dishin. Tukwet kuswir kwa kuvurik anch difut dia yakupesh ya Yesu dikwet kand yisal yijim yaad ya rukat. Yehova wamupana Mwanend mulong wetwetu ni Yesu wapana mwom wend kwa kwikatin mulong wetwetu. Chisu tukutonga piur pa rukat rau, rikutubachik kuyikat kamu. Ni rukat tukweta etu awonsu mulong wa Yehova rikukasikesh uumwing wetu. w18.01 13 par. 11

Yehova uyikatin antu nakash. Pa chinech, tukwet usey nakash kudi ndiy chawiy wamupana Mwanend chakwel twikala ni mwom wa chikupu. (Yoh. 3:16) Anch Yehova kawanyishinap kushilamu kwend mulong wa machuku metu ma kurutu, Satan nau akankuny akwau akuying nich. Satan ulondin anch Yehova udi mukamakasu ukata kujindjikin antu end yom yiwamp ni anch uyikedin mu mutapu uyimp. Akankuny akat kuswingish kushilamu kwa Yehova ni kulond anch: “Ndiy washilamu kuchirik, ov, kimwawiyap? Ov, katat udi kwisu? Kudiokal pafilau angaketu, yom yawonsu yidi kwau mudi muyading kudiokal patangau mangand!” (2 Pita 3:3, 4) Pakwez Yehova ukuwanyish kushilamu kwend. Waleta kashinsh anch mu kukwash ukaleng wend mukwikal kand kuyipandish antu aziyidina. (Isay 55:10, 11) Ukaleng wa Yehova wimedin pa rukat. Chawiy tukutwish kwikal nich kashinsh anch ukudandamen kuyikat ni kuyikwat nich usey atushalapol end ashinshamena.—Kub. 34:6. w17.06 16-17 par. 7

Kudiosh kamu pa chisu chashilayimu Yehova kupan difut, mudi mulejenau mu Disambishil 3:15, chading mudi wapanin kal mulambu winou. Kupwa kwa mivu 4 000, Yehova wamupana chad Mwanend kapokal mulong wa antu. (Yoh. 3:16) Tujikitishin nakash mulong wa rukat ra Yehova! Ov, tukutwish kumekesh rukat rakad choy ap anch tudi antu akad kuwanyin? Mwaning, tukutwish. Yehova watutanga mu chifu chend, chawiy tukwet ukaliweny wa kumwimburij ndiy. Abel wamekesha rukat mulong wa Nzamb papanay pakad choy yom yend yiwamp yadingay nich. (Dis. 4:3, 4) Nowa wamekesha rukat rend rakad choy padandamenay kulejan uruu wa Nzamb mu mivu yivud ap anch antu kamuteshap. (2 Pita 2:5) Aburaham niyend wamekesha anch rukat rend mudiay Nzamb rading rikash kusutamu chom chin chawonsu pipanay mulong wa kumulambul mwanend mukatish Isak. (Jak. 2:21) Mudi amakundj inay ashinshamena, komb niyetu tufanyidin kumekesh rukat ap anch chiswapelap kusal mwamu. w17.10 4 par. 3-4

Midimu ya Mwin Kupesh wetu Mujim, Yesu, yitwinkishin kashinsh anch yitil yetu akutwish kuyilikishin ni anch akutwish kutwovil “riy ni kutwanaken mulong wa kutukwash pa chisu chitukweta kuswir.” (Heb. 4:16) Chawiy, tufanyidin kwikal ni ritiy mu yakupesh ya Yesu. Kangal watong anch difut adisadidin ching mulong wa antu awonsu. Ikal ni ritiy anch ey utanidinamu mu difut dined. (Gal. 2:20, 21) Ikal ni ritiy anch mulong wa difut, Yehova ukulikishin yitil yey. Ikal ni ritiy anch difut dikwinkin ey ruchingej ra kushakam chikupu. Yakupesh ya Yesu chidi chipan cha Yehova kudi ey. Ni anch Yehova walikishin yitil yetu, tufanyidinap kand kwov wom anch ukutwish kukimb diyingishin dia kuvurik yitil yetu ap kuturumburish mulong wa yitil yiney. (Kus. 103:8-12) Mwawiy, tukutwish kamu kwikal nich kashinsh mu dilikishin dia Yehova. w17.11 13-14 par. 14-17

Uchuku pasadika musambu wa kusambish wa Yakudia ya Urel ya Nsalejetu, Yesu wasala malembil ma pakampwil. Walembila piur pa uumwing wa usey nakash ukwetay ndiy ni Tatukwend. Yesu walembila kand anch in kwilejend awonsu afanyina kwikal mu uumwing mudi wa mutapu winou. Yehova wakula kamu malembil minam ma Mwanend mukatish. Kusutamu chikumangan chin chawonsu, Chivurikish chimekeshin patok anch Atuman a Yehova adi kamu mu uumwing. Mu jindond jimwing, chiding cha pachipatu kuyiman antu a ulombu wa chikit kushalijan akat kukumangan pamwing mulong wa milong ya chirelijon, ni ap anch asal mwamu, antu akwau amening anch yiwapinap kwau. Pakwez, kimwawiyap mwiyovilingay Yehova ni Yesu. Kudi awiy, uumwing wetu ku Chivurikish udi uwamp nakash. Chitudia antu a Yehova, tukatap kukashimuk anch tudi mu uumwing mu mutapu winou. Mulong Yehova wasambela kulejan chom chinech.—Ezek. 37:15-17; Zak. 8:23. w18.01 11-12 par. 7-9

“In kutung” amulika Yesu ading antakel a in Yuda. Asala yom yivud kusutamu kwau kumudiul Yesu ap kulik kwitiy anch udi Kristu. In Yuda avud amulika Yesu pamulejau Pilat anch amujip. (Luka 23:18-23) Mwaning, awiy kamu amujipa. Anch Yesu amulika ni amujipa, mutapu ik wikalay “diyal dijim diatekau pa dikonk”? Chom chinech chakimba kwikal mwamu ching anch wavumbuka. Kambuy Pita wasadina kand verse winou padingay pambambinay nau “in kutakel au in Yuda, ni amakurump, ni alej a yijil, akumangena ku Yerusalem.” Walonda piur pa “Yesu Kristu wa ku Nazaret. Ndiy kamu Yesu wapampilanya ku mutond . . . ndiy kand wavumbulau kudi Nzamb kwikal mwom.” Chawiy walonda anch: “Diyal diwadiulanya en in kutung, diawiy dikala diyal dia usey upandakena mayal mawonsu.” (Mid. 3:15; 4:5-11; 1 Pita 2:5-7) Kupwa kwa kumuvumbul, Yesu wikala muntu umwing winkishau “dijin . . . mwinshin mwa diur dipaninau pakach pa antu mutukwipandishila etu.”—Mid. 4:12; Efes 1:20. w17.12 10-11 par. 6-9

Palonday piur pa mar makash mezina kurutu oku, walonda anch: “[Akez kumuman] Mwan a muntu ukat kwez mu madj ma mwiur nich ukash ni uyaj ujim. Akez kubul mpuny yijim, chad ukez kuyitum aruu a mwiur kuya ku mitambu ni mitambu ya ngand, mulong wa kuyikumangej antu atonday Nzamb.” (Mat. 24:29-31) Yesu “[u]kuyikumangej antu atonda[u]” chisu chikuyisenday in Kristu awonsu azizidilau many mulong wa kuya mwiur. Chinech chikusadik kupwa kwa mar makash kusambish, pakwez kurutu kwa njit ja Harmagedon. Mwi njit jinej, Yesu pamwing ni antu awonsu 144 000 akurish nau ant a pa divu ni akuyiwin. (Kuj. 17:12-14) Chivurikish cha nsudien tukusala kurutu Kristu “eza” mulong wa kukumangej azizidinau many chawiy chikwikala Chivurikish cha nsudien. w18.01 14 par. 15

Mwiur, Yesu “[kakezap] kand kufa.” Mwiur, ushich “chikupu ni chikupu. (Kuj. 1:5, 18; Rom 6:9; Kol. 1:18; 1 Pita 3:18) Yesu wakana anch atwimbuy end ashinshamena akez kuyikel nend mwiur. (Luka 22:28-30) Paul wafunda anch “Kristu wavumbukin kal mu kufa, wikal [mabuj ma kusambish] kudi awiy alela mu tul.” Paul walonda kand anch kukwikal antu akwau akuvumbulau mulong wa kuya mwiur palonday anch: “Pakwez muntu ni muntu ukez kuvumbuk pa chisu chend. Kristu mabuj ma kusambish, chad aend awonsu akez kuvumbuk kwikal kand aom pa chisu cha kwikalaku kwend.” (1 Kor. 15:20, 23) Kusambish mu muvu wa 1914 tudandamedin kushakam pa chisu chinech cha ‘kwikalaku’ kwend ni disudiel dia mangand minam didi piswimp nakash. w17.12 12-13 par. 11, 14-16

Tatukwetu wa mwiur ni ndiy wafisha anend akatish, mudi kashalapol wend Aburaham, Isak, Jakobu, Moses, ni Mwant David. (Kuch. 12:6-8; Mat. 22:31, 32; Mid. 13:22) Bibil utulejin anch Yehova uchingedin kurutu oku dichuku dikuyivumbulay amakundj inay ashinshamena. (Job 14:14, 15) Pa chisu chinicha, akusangar ni akusanger ukash wa mujimbu uwanyidina. Yehova wafisha kand Mwanend wa kusambish. Bibil ulondin anch Yesu wading muntu umwing ‘wamusangarishanga’ Nzamb. (Jnsw. 8:22, 30) Tukutwishap kutongin mutapu wovay Yehova pamanay mwanend ukat kufa rufu risansena. (Yoh. 5:20; 10:17) Tukutwish kwikal kamu ni kashinsh anch Yehova ukutukwash. Tufanyidin kumulembil Yehova yisu yawonsu ni kumulej runeng ni ushon tukweta. Chikasikeshin mudi ik kwijik anch Yehova wij nawamp yovil yetu ni utwinkishin rongoj tuswirikedina!—2 Kor. 1:3, 4. w17.07 10 par. 3-5

Nlel unou, mamiliyon ma antu mamwifukwidin Yehova. Akwet musangar wa kumwinkish “yom [yau] ya usey,” mudi chisu, usu ni yom yau ya ku mujimbu. Mu mutapu winou akwashin tempel mujim wa mu spiritu wa Yehova. (Jnsw. 3:9) Yehova kakuvuramenap mudimu tusadina ni rukat tumumekeshidina. Mu machuku minam mansudiel, antu a Yehova atwishin kusal mudimu ujim nakash. Chinech chiswapel mulong wa yiyukish wa Yehova ni wintakel wa Kristu. Tukwet musangar nakash wa kwikal mu dirijek dia chikupu, diminya dang ni mudia diking, ni twij anch chitongijok cha Yehova mulong wa difukwil dishitwila chikuwanyin kamu chakin. Chawiy sanger ndond yey pakach pa antu a Nzamb ni ‘tesh dizu dia Yehova Nzamb wey.’ (Zak. 6:15) Mwamu akukuchidij kudi Mwant wetu udia kand Mwin Kupesh Mujim ni kudi angel. Sal yawonsu ukutwisha kusal mulong wa kukwash difukwil diakin. Yehova ukudandamen kukulam mu machuku minam mashala kal ma mangand minam—ni chikupu! w17.10 26 par. 18-19

Piswimp ap, yom ya politik, ya relijon ni ya kwisak ya mangand ma Satan yikupwa. Muprofet Ezekiel ni Sofoniy asambela kulond anch utad wa or ni wa argent, yom yading yikweta usey nakash mu kwisak yikwikal ya chamwamu. (Ezek. 7:19; Sof. 1:18) Tukwiyov nchik anch tukimbin kufa chad twajingunin anch twapana mapit makin mulong wa mapit makad kutentam ma mangand minam? Tukutwish kwiyov mudi mwiyovay muntu wasala mudimu nakash mu mwom wend wawonsu mulong wa kwikal ni nfalang jivud, chad kwinsudien wajingunin anch nfalang jinej jidi ja makasu. (Jnsw. 18:11) Yom ya ku mujimbu ya mangand minam yikupwa. Kangal washadish chisend chey cha kusadin yom ya ku mujimbu mulong wa kwikal nau arund mwiur. Yom tusadina mulong wa Yehova ni mulong wa Want wend yikutuletin musangar nakash. w17.07 7-8 par. 16

In Kristu amwing asala yitil yijim apakisha kuyijindjik. Pamwing ap akama ni kakatap anch ayovisha antu akwau kuyip. (Jnsw. 28:13) Pakwez kujindjik chitil kudiap kumekesh rukat mulong chinech chikumusal nayimp mwin kusal chitil ni antu akwau. Mutapu ik? Yehova ukutwish kulik kuyukish chikumangen kusutin spiritu wend utumbila ni chikumangen chikuburen chad chisambu. (Efes 4:30) Chawiy anch mwin Kristu wasal chitil chijim, rukat rakin rikumubachik kuyilej amakurump a chikumangen ni kumwinkish ukwash uswirikedinay. (Jak. 5:14, 15) Rukat udi mwikadil ujim pa mikadil yawonsu. (1 Kor. 13:13) Rikat kuyikwash antu kuyijik in kwilej akin a Yesu, kwijik anany amwimburijina Yehova, udia Musul wa rukat. Paul walonda anch ang kakwetap rukat, wafanyina kwikal wa chamwamu. (1 Kor. 13:2) Chawiy muntu ni muntu adandamena kumekesh rukat, chidiap kwau ching kusu mu ‘mazu’ pakwez kand ‘mu yisal ni uyakin.’—1 Yoh. 3:18. w17.10 8 par. 17-18

Josef wamekesha kutakaman chisu chamwozau kudi mband wa Potifar mulong wa kusal nend masandj. Wading wij anch mwom wend wafanyina kwikal mu ubaj anch walik. Pakwez pa ndond pa kwitiyij, ndiy wamekesha kutakaman ni wamuchina mband winou kapamp kamwing. (Dis. 39:10, 12) Rahab udi kand chilakej chikwau cha kutakaman. Pezau in kutentish a Isarel ku chikumbu chend, wafanyina kwov wom ni kulik kuyikwash. Pakwez mulong wamuchingejina Yehova, wamekesha kutakaman payijindjikay amakundj inay aad ni wayikwasha chakwel achina. (Jos. 2:4, 5, 9, 12-16) Papakijau kuyikangesh kudi Asadus kufundish piur pa Yesu, awiy alika kwitiy. (Mid. 5:17, 18, 27-29) Josef, Rahab, Yesu ni atwimbuy akwata mupak wa kusal yom yading yiwamp. Amekesha kutakaman, chidiap anch mulong ading nich kashinsh mu ukaliweny wau, pakwez chidi mulong amuchingejina Yehova. Yisu tukwikala nich kuswir kwa kutakaman, niyetu tufanyidin kumuchingejin Yehova, kangal twichingejin ayinetu.—2 Tim. 1:7. w17.09 28-29 par. 6-9

Chiswapelap kudjol wuntu ukur ku usu wetu ayinetu. Antu asala mwamu yisu yivud arisha nakash mulong wa kuswimp mwom wau ukur. Yom yayikwasha wading usu wa Dizu dia Nzamb ni wa spiritu wend utumbila. (Luka 11:13; Heb. 4:12) Mulong wa kutaninamu mu usu winou, tufanyidin kutang Bibil dichuku diawonsu, kutongijokin pa yom tutangina ni kulembil chisu chawonsu mulong wa kwit manangu ni usu wa kusadin yom twilejina. (Jos. 1:8; Kus. 119:97; 1 Tes. 5:17) Tutanidinamu kand mu Dizu dia Nzamb ni spiritu wend utumbila anch twirijek ni twakumangan ku yikumangan ya chikumangen. (Heb. 10:24, 25) Ni tufanyidin kand kusadin yom yivud yitwinkinau kudi dirijek dia Yehova. (Luka 12:42) Mulong in Kristu afanyidin kudjol wuntu ukur, chinech chirumburikinap anch chawiy kwau chom chifanyidina kusal mulong wa kuyitiy kudi Nzamb. Tufanyidin kand kudjal wuntu usu.—Kol. 3:10. w17.08 20 par. 16-17

Mwant David wamana mar nakash mulong wa kuburen kutentam. Yehova wamuzizila David many mulong wa kwikal mwant wa Isarel padingay nsand. Pakwez David wafanyina kuchingel mivu 15 kurutu ikala mwant wa muchid wend. (2 Sam. 2:3, 4) Pa chisu chinicha kand, David wachinang ni wajingamang mulong wa Mwant Saul, wakimbang kumujip. Mudi chibudikin, David kadingap kwend ni chikumbu ap chimwing. Washakamang mwi ngand ja wingendj ap mu mandam mwimpay. Kupwa, Saul amujipa kwi njit. Pakwez David wadandamena kand kuchingel mivu yikwau sambwad kurutu ikala kamu chad mwant wa muchid wawonsu wa Isarel. (2 Sam. 5:4, 5) Mulong wak David wading ukwet rusot ra kuchingel nich kushimpish muchim? David wading wij anch Yehova umukatin ni wakata chisu chawonsu kumushinshamen. Watonga piur pa chisu chamukwashau kudi Yehova pakur ni wachingela chisu chikupwishau mar mend kudi Yehova. (Kus. 13:6) David wading wij anch chading chifanyidin kuchingel yiyukish ya Yehova. w17.08 7 par. 14-15

Pasutina chisu, mazu makat kuswimp. Mazu ni mutapu wa kulond yikat kushalijan yisu yimwing ni mutapu walondangau pakur. Pamwing ap ukutwish kutong chilakej cha dizu ulondining. Chinech chidi kand chakin ni mazu malondangau pakur. Dizu dia Hebereu ni dia Grek dilondinau antu nlel dishalijadin ni dizu dia Hebereu ni Grek diafundau nich Bibil. Antu avud katwishinap kutesh Bibil mu mazu mamufundau nich pakur, chawiy akwet kuswir kwa Bibil ukarumwinau. Amwing atongin anch ang ilej dizu dia Hebereu ni dia Grek wa pakur, akutwish kumutesh Bibil nawamp. Pakwez chinech chikutwishap kuyikwash nakash mudi mutonginau. Tujikitishin nakash anch Bibil ap yikunku ya Bibil ayikarumwin kal mu mazu piswimp 3 000. Yehova ndiy ukatina anch antu a “mangand mawonsu, ni a michid yawonsu, ni a jindim jawonsu” ataninamu mu Dizu diend. (Kuj. 14:6) Chakin kamu, chinech chikat kusal kamu anch tuseja piswimp ni Nzamb wetu ukweta rukat ni wakad kasolikany? w17.09 16 par. 4

Ap pamwing ap ukwet anamakwey opatinau kal mu chikumangen. Anch mwawiy, ufanyidin kushinshikin yovil yey chakwel wipuka kwambamb nend yom yakad usey. Chinech chikutwish kukasikan kusal mwamu. Pakwez chikwikal chiswapela ang wavurik anch wimburijin chilakej cha Yehova ni usadin yom yikulejinay kusal. Tukutwish kutaninamu ku chilakej cha Mwant David. Chisu chamusarumunau kudi Saul ni Shimey, David kajimanap ap kasadinap usu wend padiau awiy. (1 Sam. 26:9-11; 2 Sam. 16:5-10) Pakwez, David kadingap ni mwikadil wa kwilam chisu chawonsu. Twij mwamu pitutangina piur pa chitil chasalay ni Batisheba ni mutapu wasalay ku ris ra Nabal. (1 Sam. 25:10-13; 2 Sam. 11:2-4) Tukutwish kwilejin malejan ma usey kudi David. Chakusambish, atulam adia pakach pa antu a Nzamb afanyidin kwilam chakwel kangal asadina nayimp wintakel wau. Cha kaad, kwikil muntu ufanyidina kwichingejin ni kutong anch ndiy kakutwishap kuwil mu yoziu.—1 Kor. 10:12. w17.09 6 par. 12-13