Ngond wa 5

Dipup dikutwish kulet kusansan, pakwez yibudikin ya kulik dipup dia Nzamb yiding yisansena nakash kupandakan. (Heb. 12:11) Tukutwish kwilejin kusutin chilakej cha Kain. Chisu chamanay Nzamb anch Kain umukisin mwanamakwend ni ukimbin kumujip, wamubabesha Kain anch: “Mulong wak wovila ujim mwamu, ni mulong wak mpal yey yakarumukang kal? Anch ey watongang kusal nawamp ing kakukutambulap? Pakwez anch ey kiwatongangap kusal nawamp, yitil yidi mudi nnam wa chidiany ukubatamidina ku chis mulong wa kukukwat, pakwez chifanyidin ey kuyipandakan.” (Dis. 4:6, 7) Kain walika dipup dia Yehova, wamujipa mwanamakwend ni wamana mar nakash mu mwom wend wawonsu mulong wa yom yasalay. (Dis. 4:11, 12) Anch Kain wamutesha Nzamb, ing kwovap kusansan mudi kwinoku. Yehova kakatinap anch twova kusansan mudi kwinoku kwa chamwamu! (Isay 48:17, 18) Komb el ‘tuteshany dipup, chakwel twikalany in manangu.’—Jnsw. 8:33. w18.03 32 par. 18-20

Anvaj a Daniel afanyina kumufundish kumukat Yehova ni Dizu diend. Ni Daniel wasala mwamu mu mwom wend wawonsu. Ap chisu chadingay ipal, wadandamena kwilej Mifund nich mushiku. Daniel wamwijika Yehova nawamp kamu. Wijika kand yom yawonsu yasalay Yehova mulong wa in Isarel. Tumen yom yiney mu kwikepish kwadingay nich Daniel ni mu malembil ma kashinsh madia mu Daniel 9:3-19. Tang malembil minam ni tongijok nawamp piur pa malembil minam. Chadingap chiswapela kudi in Yuda ashinshamena kumusadin Nzamb mu Babilon wa apagan. Chilakej, Yehova wayileja in Yuda anch: ‘Kimbany chisambu cha musumb unikukutwalanya mu winkwal.’ (Jer. 29:7) Pakwez, wayileja kand kumwifukwil ching kamu ndiy ni muchim wau wawonsu. (Kub. 34:14) Mutapu ik wafanyinay Daniel kuziyin yijil yawonsu yaad? Manangu ma Nzamb mamukwasha Daniel kwijik anch chifanyidin kumuziyin chakusambish Yehova, kupwa chad kuyiziyin anyikel a antu. Kupwa kwa yitot ya mivu, Yesu wafundisha mbil ja mutapu winou.—Luka 20:25. w18.02 12 par. 11-12

Ov, udi mu yisu yikash ni ya mar mulong uyedin, ukwetap nfalang ap mulong akuzengodin? Yisu yimwing chikukasikedining kwikal ni musangar mu mudimu wey mulong wa Yehova? Anch wiyovil mwamu, kushinshikin chilakej cha Nowa, Daniel ni Job kukutwish kukukasikesh. Amakundj inay ading akad kuwanyin ni ading arishin ni milong yimwing mudi yitukweta kand nlel. Yisu yimwing, ap mwom yau yading mu ubaj nakash. Pakwez ashala ashinshamena kudi Yehova ni wayimana mudi yilakej ya ritiy ni kuziyin. (Ezek. 14:12-14) Ezekiel wafunda mazu madia mu verse wa mutu wa mulong winou mu Babilon mu muvu wa 612 K.C.C. (Ezek. 1:1; 8:1) Mazu minam wamafunda chisu chikemp kurutu kwa kumushesh Yerusalem mu muvu wa 607 K.C.C. Ching kusu antu akemp a mu Yerusalem ading ashinshamena ni in kuziyin mudi Nowa, Daniel, ni Job awiy apanda. (Ezek. 9:1-5) Chilik chimwing ni nlel, ching antu amenay Yehova anch atentamin, antu adia mudi Nowa, Daniel ni Job, awiy akupanda kwinsudiel kwa mangand minam mayimp.—Ase. 7:9, 14. w18.02 3-4 par. 1-3

Anch udi nsand iyipula anch: ‘Ov, niyiling ku yikumangan ni mu mudimu wa kulejan mulong anvajam awiy akatining anch nisala mwamu? Ap nikwet urund wam wa piswimp ni Yehova?’ Chakin kamu etu awonsu tufanyidin kwitekin mipak ya muspiritu, twikalap nchik ansand ap amakurump. Mipak yiney yawiy yikutukwasha kwikal akasikena mu spiritu. (Mul. 12:13) Kupwa kwa kuman ndond tufanyidina kuwapish, tufanyidin chad kusambish kuswimp. Chinech chidi cha usey nakash mulong tukwikal ni usu wa kuman anch tukupand ap tukufa. (Rom 8:6-8) Yehova katuchingejidinap anch twikala kamu antu awanyidina ni utwinkishin spiritu wend utumbila mulong wa kutukwash. Pakwez tuswirikedin kusal usu nakash etu ayinetu. Ap anch dilejan dia Bibil dikutwish kwikal disangareshina, tufanyidinap kusal anch Bibil ikala mwin kutupuwangej mudi buku wa jinsangu ja chamwamu. Tufanyidin kusal usu nakash mulong wa kutan uyakin wa usey ukutwisha kutukwash. w18.02 24-25 par. 10-11

Chirumburikinap anch muntu ufanyidin kwijik yom yawonsu piur pa mafundish ma Bibil kurutu kwa kukwat mupak wa kwipan ni kutambul dibatish. Mwin kwilej mwawonsu wa Kristu ufanyidin kudandamen kwilej ap kupwa kwa kutambul dibatish. (Kol. 1:9, 10) Chawiy yom ik yifanyidinay muntu kwijik kurutu kwa kutambul dibatish? Yom yashikena ku dijuku dimwing pasak yikutwish kutukwash nlel. (Mid. 16:25-33) Mu muvu wa 50, Paul waya mu musumb wa Filip mu weny wend wa kaad wa umishoner. Padingay kwinikwa, ndiy ni Silas ayidimbena makasu, ayikwata ni ayiteka mu rukan. Chad uchuku, kwasadika kuzal kukash kwa divu kwanzurila yis yawonsu ya rukan. Kalam wa rukan watonga anch antu adia mu rukan awonsu achin kal ni wakimba kwijip. Pakwez Paul wamukangesha. Kupwa Paul ni Silas amufundisha kalam wa rukan ni dijuku diend uyakin piur pa Yesu. Itiyija yom yawosu yayilejau piur pa Yesu ni amana anch chading cha usey kumuziyin. Chawiy ayibatisha pakad kulab. w18.03 11 par. 7-8

Yehova udi Nzamb wa musangar, ni antu end adi niyau ni musangar. Chikwau kand, mu kushalijan nau antu ikatina ayinau nakash ni atongining ching yom yikutwishau kutambul, atushalapol a Yehova akwet musangar mulong akat kupan kudi akwau. (Mid. 20:35; 2 Tim. 3:2) Mutapu ik tukutwisha kwijik anch rukat mulong wa ayinetu ridi rikash kusutamu rukat mulong wa Nzamb? Tong piur pa chiyul cha manangu chilondina anch: “Kangal wasalany yom mulong wa kwitong ayinen ap mulong wa kwibaz, pakwez ikepishany, muntu ni muntu amumana mukwau mudi udi muwamp kumupandakanamu.” (Fil. 2:3, 4) Tukutwish kwiyipul ayinetu anch: ‘Ov, nikat kutesh chiyul chinech? Nikat kusal usu wa kusal yom yikatinay Nzamb anch nisala? Nikat kukimb mitapu ya kuyikwash antu akwau mu chikumangen ni mu mudimu wa kulejan?’ Chidingap chiswapela chisu chawonsu kupan usu wetu ni chisu chetu. Chikutwish kurumburik anch tufanyidin kusal usu nakash ni kupan yom yimwing tukata kusanger. Pakwez kwikil chom chikutwisha kutusangaresh kusutamu kwijik anch Mukaleng wa mangand mawonsu utusangaredin! w18.01 22-23 par. 6-7

Mutapu ik tukutwisha kusal mwamu? Tukutwish kwiyipul ayinetu anch: ‘Ov, nitiyijin kamu anch dined diawiy dirijek dimwing diatonday Yehova mulong wa kusal rusot rend? Nisadin usu nakash mulong wa kulejan ni kufundish rusangu ruwamp? Ov, yisal yam yimekeshin anch tushich machuku ma nsudiel ni nsudiel ya winyikel wa Satan yidi piswimp? Ruchingej ram mudiay Yehova ni Yesu ridi rikash mudi murading chisu nasambisha kumusadin Yehova?’ (Mat. 24:14; 2 Tim. 3:1; Heb. 3:14) Kutongijok piur pa yakul ku yipul yiney kukutukwash ‘kwipak ayinetu’ chitudia. Mutapu umwing ukutwisha kwirijek mulong wa Chivurikish udi wa kutang ni kutongijokin piur pa mitu ya milong yirumburila mulong wak musambu winou udi wa usey nakash. (Yoh. 3:16; 17:3) Mutapu umwing kamu tukutwisha etu kutambul mwom wa chikupu udi wa kwilej kumwijik Yehova ni kwikal ni ritiy mudiay Mwanend Yesu. Mulong wa kwirijek mulong wa Chivurikish, tufanyidin kwilej yom yikutwisha kutukwash twiyova anch tusejin kamu piswimp kudi awiy. w18.01 10-11 par. 5-6

Chisu utangina Bibil ni mikand yetu ni kukumangan ku yikumangan, wilejin mutapu wayikwashay Nzamb antu akwau kushal ashinshamena. Pakwez padandamedina kukasikan urund wey ni Yehova, ufanyidin kuman mutapu ukukwashinau ey kudi Yehova. Mutapu ik wezina kuman anch Yehova udi muwamp. Mwin Kristu mwawonsu wamen kal uwamp wa Yehova mu mutapu wa pakampwil. Watutazuka etu awonsu kusej piswimp ni ndiy ni Mwanend. Ov, wiyovil anch Yehova wakuleta ey kudi ndiy? Ap utongin anch: ‘Yehova wayileta anvajam kudi ndiy ni am nilondwilaku kwam’? Vurik anch chisu wipana amwiney kudi Yehova ni kutambul dibatish, wikala chad ni urund wa pakampwil ni ndiy. Bibil utulejin anch: “Muntu mwawonsu umukatila Nzamb wijiken kudi ndiy.” (1 Kor. 8:3) Sanger chisu chawonsu ndond yakwinkishay Yehova mu dirijek diend. w17.12 24-25 par. 12-13

Dizu ‘dipup’, dirumburikin yom yivud kusutamu kwau chibau. Bibil ulondin anch dipup didi diwamp mulong wetwetu ni yisu yimwing ukat kudijimbul pamwing ni ronganyin, manangu, rukat ni mwom. (Jnsw. 1:2-7; 4:11-13) Chawiy dipup dia Nzamb dimekeshin anch utukatin ni ukimbin anch tushakama chikupu. (Heb. 12:6) Ap anch mu dipup dia Nzamb muding yisu yimwing kukand antu, didingap dia chisum ap diyimp. Pakwez kurumburik kukwau kwa usey kwa dizu ‘dipup’ kurumburikin kand kufundish, mudi mafundish makatau kumwinkish mwan ukatinau kudi nvaj. Mulong tudi in Kristu, tudi antu a mu chikumbu cha Nzamb. (1 Tim. 3:15) Tatukwetu Yehova, ukwet mbil ya kukwat mupak piur pa yom yidia yiwamp ni yiyimp ni kutupup anch twamubwambwil. Chikwau kand, anch yisalijok yetu yikwet yibudikin yiyimp, dipup dia rukat dia Yehova dikutwish kutuvurish anch chidi cha usey kumuziyin.—Gal. 6:7. w18.03 27 par. 1; 28 par. 3

Pamwing ap uchid kal nsand ni umen anch anvaj ey kakuteshinap kwey ap akukangeshin kusal yom yimwing. Chinech chikutwish kukwovish ujim nakash ni kwiyipul anch ukukat kand kumusadin Yehova. Pakwez anch wamulik Yehova, ukuman anch kwikil kand muntu ukukatina nakash mu mangand omu mudi mukukatinau anvaj ey in Kristu nau arund ney a mu chikumangen. Tong piur pa chom ech: Anch anvaj ey alik kukupup, mutapu ik ukutwisha kwijik anch akubangidin kamu chakin? (Heb. 12:8) Chidi kamu chakin anch anvaj ey adi antu akad kuwanyin, chawiy mutapu ukupupinau ukutwish wakovish ujim. Pakwez ey kangal wimena pa yom yiney. Sal usu wa kwijik yom yiyibachikina kusal ni kulond mwamu. Ikuchika zong, ni kangal kwey kulondol. Itekina mupak wa kwikal muntu uswila ukata kwitiy chiyul ni kuchisadin.—Jnsw. 1:8. w17.11 32 par. 16-17

Pamwing ap wamen kal an amwing akat kutambul dibatish, pakwez mu kusut kwa machuku akat kusambish kwidjidjek anch kushakam kukwatijan ni mbil ja Nzamb kudi kuwamp kudi awiy ap bwat. Amwing alikin kal ni uyakin. Chawiy ukutwish kwakam anch ang mwaney wasambish kumusadin Yehova, ukutwish kushadish kand rukat rend radiay nich mulong wa uyakin. Mutapu ik ukutwisha kumukwash mwaney kulam rukat rikash ni ‘kukul mulong wa dipandish’? (1 Pita 2:2) Kukwatijan ni yom yamufundinau Timote kudi Paul anch: “Pakwez ey, dandamen mu malejan miwileja ni mu yom yiwitiyija anch yidi yakin, wij kand anany akuleja yom yiney. Kudiokal ku wanikanch wey, ey wij kal Mikand Yitumbila [Mifund ya Hebereu], yawiy yikweta ukash wa kukwinkish ey manangu chakwel upandila ku ritiy mu Kristu Yesu.” (2 Tim. 3:14, 15) Ijik anch Paul walonda anch Timote (1) wading wij mifund yitumbila, (2) witiyija yom yamufundishau, ni (3) wikala ni manangu mulong wa dipandish kusutin ritiy mu Yesu Kristu. w17.12 15-16 par. 2-3

Marelijon mavud makat kufundish malejan ma karung ka misiny, kuyishindin antu kulet nfalang, ap kuyikwash in kusal politik. Chidiap cha kushimok kuyitesh antu avud akat kulond anch akweting musangar pakad kwikal kwau mu relijon! Mwaning, muntu ukutwish kwikal ni musangar pakad kwikal mu relijon wa makasu. Pakwez kwikil muntu ukutwisha kwikal ni musangar pakad kwikal murund wa Yehova, ‘Nzamb wa musangar.’ (1 Tim. 1:11) Yom yawonsu yisadiningay Yehova yiyikwashining antu awonsu. Mudi atushalapol end, tukwet musangar mulong tusadin usu wa kukimb mitapu ya kuyikwash antu akwau. (Mid. 20:35) Chilakej, tong mutapu ukutwisha difukwil diakin kukwash dijuku dikala ni musangar. Twilejining mutapu wa kumulimish ni kumushinshamen mbay netu wa uruw, kulil an mu mutapu uwamp, ni kwikal ni rukat rakin mulong wa anamakwetu a mu dijuku. Difukwil diakin diyikwashining antu a Yehova kusal mudimu pamwing mu chisambu mu chikumangen ni kumekesh rukat kudi akadivar nau. w17.11 22-23 par. 6-7

Nlel, atushalapol avud ashinshamena a Nzamb akat kwov kuziy ni ushon mudi mwovangay kand Paul. Mulong wak? Mulong ap anch tukatining kumusangaresh Yehova, etu awonsu twaswana kal chitil ni kuburen kuwanyin. Chawiy tukutwish kwov nayimp chisu tukukanganya kumusangaresh ndiy. In Kristu amwing asala yitil yijim ni iyova anch Yehova kakutwishap kand wayilikishin yitil yau. Bibil utukasikeshin anch ang twachinin kudi Yehova, tufanyidinap kand kwiyakamish mulong wa kwifish nich. (Kus. 34:22) Kupwa kwa Paul kulond anch udi kwend “muntu ntany” mulong katwishap kumuziyin Yehova mudi muchifanyidina, walonda anch: “Namujikitish Nzamb mulong wa Yesu Kristu [Nsalejetu].” (Rom 7:25) Chirumburikin ik? Ap anch Paul warisha ni maswir ma chitil ni wasala yitil pakur, wakarumuka. Chawiy wachingeja anch Yehova ukumulikishin kusutin difut dia yakupesh ya Yesu. Mulong Yesu wafuta difut, tukutwish kwikal ni kom kadia zwang ni chisambu mu muchim. (Heb. 9:13, 14) Chidiay Mwin Kupesh wetu Mujim, Yesu “ukutwish kuyipandish antu ku yom yawonsu chikupu, awiy akuseja kudi Nzamb mwi ndiy, mulong ndiy udi mwom chikupu ukuyilondilap kudi Nzamb.”—Heb. 7:24, 25. w17.11 9 par. 1-2; 14 par. 15

Mutapu ik tukutwisha kudandamen kulam kushilamu kwetu kudi Yehova? “Dichuku ni dichuku” tukat kurish nich yoziu yikemp ni yijim. Tumekeshining mutapu tukasikeshining urund wetu ni Yehova kusutin mutapu turishining nich yoziu yiney. (Kus. 61:8) Chilakej, chom ik ukusala anch muntu kanang ku mudimu ap ku shikol wasambish kwizez ni yeyey? Ov, ukulik choziu chinech ni kumekesh anch ukatin kumuziyin Yehova? (Jnsw. 23:26) Ap chikwikal nchik anch mu dijuku diey yeya kwey umwifukwidina Yehova? Ov, ukat kumwit Yehova chakwel akukwasha udandamena kwendil mwi njil ya win Kristu? Chikalap nchik yom yikushikedina, ukat kumujikitish Yehova dichuku diawonsu mulong wa rukat ni ukwash wend? Ov, ukat kwitekin chisu cha kutang Bibil dichuku diawonsu? Mu mutapu winou, twashilamu kusal yom yiney patwipana kudi Yehova. Anch twamuziyin ni twamwinkish yom yetu ya usey, tumekeshin anch tumukatin Yehova ni tudi aend. Difukwil dietu udi mutapu wetu wa mashakamin. w17.10 18 par. 11-12

Mwin kufund miminy umwing wijikena walonda anch: “Mazu maletining yitongijok. Mizik yiletining yovil. Pakwez muminy usadining anch wikala ni yitongijok.” Miminy yetu yikat kumekesh ntumb ni rukat mulong wa Tatukwetu wa mwiur Yehova. Yisadining anch tuseja piswimp ni ndiy. Chawiy, chiswapel kwijik mulong wak chisend cha kuwang mudi chinech chikwet usey mu difukwil diakin, pituwangina ayinetu ap pituwangina pamwing ni akadivar nau anambaz netu. Mutapu ik ukata kwiyov piur pa kuwang nich dizu piur mu chikumangen? Chikat kukwovish usany? Mu yaku ya antu amwing, amakundj akat kwov usany wa kuwang kurutu kwa antu akwau. Chom mudi chinech chikutwish kulet yibudikin yiyimp mu chikumangen chawonsu, pakampwil anch amakurump akat kwidjidjek kuwang ap anch chisu chiwanginau awiy akwatiken nich midimu yikwau. (Kus. 30:12) Kuwang chidi chom cha usey mu difukwil dietu mulong wa Yehova. Chawiy, tufanyidinap kwendangan chisu chiwanginau muminy ap kuburen chikunku chinech cha chikumangan. w17.11 3-4 par. 1-3

Etu awonsu tukatining kwikal ni chisambu mu mwom wetu, ni tukatining kwiyep yakamish. Chawiy tujikitishin nakash mulong Yehova utwinkishin “chisambu cha Nzamb.” Chisambu chinech chikata kuninetish chikat kutuchidij ku yovil ni yitongijok yiyimp. (Fil. 4:6, 7) Mulong twipanin kal ayinetu kudi Yehova, tudi kand mu ‘chisambu ni Nzamb.’ Chinech chirumburikin anch tudi mu urund uwamp ni ndiy. (Rom 5:1) Pakwez, chisu cha Nzamb cha kulet kamu chisambu chiwanyidina pa divu kand kal chiwanyin. Tushich machuku ma nsudiel, chawiy kudi milong yivud yituletidina yakamish. Atunyingumukin kudi antu ayimp. (2 Tim. 3:1-4) Turishin kand nend Satan ni mafundish ma makasu maletinay. (2 Kor. 10:4, 5) Pakwez chom chikutwisha kand kutuletin yakamish nakash ridi rupompat ra anamakwetu akad kumusadin Yehova. Amwing pakach pau akutwish kutuswingish ap kutwel anch twauril dijuku. Akutwish kutulej anch akutwopat mu dijuku anch twadandamen kumusadin Yehova. w17.10 9-10 par. 1-2

Mutapu waswimpa mazu wasala anch mutapu wa kukarumun Bibil uswimpa kand. Bibil wa kusambish wakarumunau wading uswapela kutang kovikanap kand nawamp mu kusut kwa mivu. Chilakej chidi cha Bible du roi Jacques, wabudishau kapamp ka kusambish mu muvu wa 1611. Wikala Bibil wijikena nakash wa Inglish. Mutapu wa kulond wasadinau mu Bible du roi Jacques wikala nich usu nakash mu dizu dia Inglish. Pabudika kapamp ka kusambish Bible du roi Jacques, mazu ma Inglish masadinau mamekena anch mading ma katat. Pakwez mu kusut kwa mivu, mazu mamwing masambisha kwikal makur ni nlel chikasiken kumatesh. Yom yiney yasadika kand mwamu mu ma Bibil ma pakur makarumunau mu mazu makwau. Chawiy tujikitishin nakash mulong wa kwikal nich Les Saintes Écritures. Traduction du monde nouveau, mulong usadidin mazu malondinau katat. Bibil winou udiaku wa kabuj ap wa chikunku mu mazu 150 ni kusut. Chinech chimeken anch antu avud mu mangand akutwish katat kutang Bibil winou ukarumwinau mu mazu mau ma chivadik. Mazu movikena ni masadidinau katat yisadin anch chiswakala uruu wa Nzamb kushik ku michim yetu. w17.09 16-17 par. 5-6

Kudi yom yivud yikata kushiken yisadina anch ansand in Kristu aswirikena kutakaman mulong wa kumusadin Yehova. Aswirikedin kutakaman mulong wa kukwat mipak ya manangu mulong wa kwijik anany afanyidina kwikal arund nau, yom ik yifanyidinau kusal mulong wa kwipuwangej , mutapu ik ufanyidinau kushal ishitwila mu manangu ni chisu ik chifanyidinau kutambul dibatish. Aswirikedin kutakaman mudi kwinoku mulong kangal asala rusot ra Satan, ukata kumusaal Nzamb masaal. Chom chimwing cha usey chikutwishau ansand kusal kudi kukwat mipak ya yom yikusalau machuku ma kurutu. Mu jingand jimwing, akat kuyikasikesh ansand chakwel ileja mashikol ma piur ni kukimb mudimu ukutwisha kuyifut nfalang jivud. Pakwez mu jingand jikwau, nfalang jikasiken kumekan, ni ansand akat kwiyov anch afanyidin kusal mudimu nakash mulong wa kukwash majuku mau. Anch ansand itekin mipak nich kutakaman mu mudimu wa Yehova ni atek yisakin ya Want pa ndond ya kusambish mu mwom wau, ndiy ukuyiyukish. Ukuyikwash chakwel awanyisha maswir ma majuku mau. Mu mivu chitot ya kusambish, nsand Timote wipana mu mwom wend mulong wa kumusadin Nzamb, niyey ukutwish kusal mwamu.—Fil. 2:19-22. w17.09 29 par. 10-12

Dilejan dia Bibil dia chisu chawonsu ni dia mushiku dikutwish kuyikwash in Kristu kukudish mwikadil wa kwilam. Mutapu ik mwamu? Mu Bibil mudi yilakej yimekeshina mutapu tukutwisha kutaninamu anch twilam ni mutapu tukumana mar anch twalik kwilam. Yehova wasala anch afunda yilakej yiney mulong wa kutaninamu. (Rom 15:4) Chikwikal cha manangu kudi etu kutang, kwilej ni kutong nawamp piur pa yom yiney. Sal usu wa kwijik mutapu wa kuyisadin ni mu dijuku diey. Mwita Yehova akukwasha kusadin yiyul yidia mu Dizu diend. Anch waman anch uburedin mwikadil wa kwilam mu mitapu kanang, ufanyidin kwitiyin. Kupwa lembil piur pa mulong winou ni sal usu wa kuman mutapu wa kuwapish. (Jak. 1:5) Kimbijol mu mikand yetu mulong wa kutan yiyul ya kusadin yikutwisha kukukwash. w17.09 7-8 par. 15-16

Mu Bibil wa Les Saintes Écritures. Traduction du monde nouveau, tutanin mazu ‘wuntu usu’ tupamp twaad. (Efes 4:24) Chirumburikin wuntu ‘watangau kukwatijan ni rusot ra Nzamb.’ Ov, chikutwish kutuswapel kudjal wuntu winou usu? Mwaning. Yehova wayitanga antu mu chifu chend, chawiy tukutwish kwimburij mikadil yend yiwamp. (Dis. 1:26, 27; Efes 5:1) Paul warumburila anch kulik kwikal ni kasolikany udi mwikadil wa wuntu usu. Walonda anch: “Kwikil kand Mugrek ap Muyuda, ap uyila ku mukand ni wakad kuya ku mukand, [angendj], mwin Skitan, muswik ap mwant ipau.” Mu chikumangen, kwikil muntu ufanyidina kuman anch udi muwamp nakash kuyisutamu antu akwau mulong wa ulomb wend wa chikit, muchid wend ap ndond yikwetay. Mulong wak? Mulong tudi in kwilej a Yesu, ‘tudi etu awonsu mu uumwing.’ (Kol. 3:11; Gal. 3:28) Anch twadjal wuntu usu, tukuyilimish antu awonsu, chikalap nchik ulomb wau wa chikit ap yaku yau.—Rom 2:11. w17.08 21 par. 1; 22 par. 3-4

Yehova kakatap kutwit anch tusala yom yakaday amwinend kukat kusal. Washa chilakej chijim nakash mulong wa kuchingel. (2 Pita 3:9) Chilakej, tunan twa mivu twasutina kal mu chir cha Eden, Satan wamufunda Yehova anch udi nyikel muyimp. Yehova ukat ‘kuchingel nich kushimpish muchim’ chisu chikutumbishau kamu dijin diend. Antu ‘amuchingedina kamu ndiy’ akwikal ni yiyukish yishimwokishena nakash. (Isay 30:18) Yesu niyend wading mwin kuchingel. Chisu chadingay panap pansh, wading ushinshamena djat ni ku rufu. Mu muvu wa 33, wamekesha usey wa chipan chend kudi Yehova mwiur. Pakwez wachingela djat ni mu muvu wa 1914 mulong asambisha lel kuyikel mudi Mwant. (Mid. 2:33-35; Heb. 10:12, 13) Ap mwamu, Yesu udandamedin kuchingel djat ni kwisudiel kwa Mivu Kanan ya Winyikel wend kurutu ashesha akankuny end awonsu. (1 Kor. 15:25) Pakwez, tukutwish kwikal nich kashinsh anch chidi cha usey nakash kuchingel yiyukish yiney. w17.08 7-8 par. 16-17

Susi walonda anch: “Muvu umwing kupwa kwa kufish mwanetu, twadandamena kwov ushon nakash.” Mukadivar umwing ulondin anch kupwa kwa kufish mukajend kwa rinkank “nova ushon wakad kutwish kurumburil.” Cha ushon, antu avud akat kwikal ni ushon mudi winou. Mu chikumangen cha win Kristu nlel, akadivar nau anambaz netu avud kakatiningap anch anamakwau afa kurutu Harmagedon eza. Pamwing ap mwanamakwey wafil kal ap wij muntu ukweta ushon mulong wafishin. Anch mwawiy ukutwish kwiyipul anch: ‘Mutapu ik nikutwisha kumwongoj muntu ukweta ushon wa chidil?’ Antu amwing alondining anch chisu chikutwish kwok yitat yawonsu. Pakwez chiding kamu mwamu? Mwadia mufu umwing ulondin anch: “Namana anch chidi chakin kulond anch yom yikatay muntu kusal mu chisu chinicha, yawiy yikata kumukwash kuyerik.” Chitat cha ku mujimbu chitin chisu ni kuchok nawamp mulong chipwa. Mutapu wawiy umwing, chitin chisu ni kwipan mulong wa kupwish yovil ya ushon. w17.07 9-10 par. 1-3

Yom ik yikwitinay Yehova kusal? Mulong wa kwikal ni musangar, ufanyidin kumwijik Yehova ni kumusadin. Wawiy mutapu wayitangau antu kudi Yehova. (Kus. 128:1; Mat. 5:3) Annam akat ching kwau kudia, kuna ni kuval an. Pakwez Yehova ukwitin anch ey utenchika mwom wey chakwel wikala ni musangar. Sakatang wey udi “Nzamb wa rukat,” ‘Nzamb wa musangar,’ watanga antu mu “chifu chend.” (2 Kor. 13:11; 1 Tim. 1:11; Dis. 1:27) Ukwikal ni musangar anch wamwimburij Nzamb wetu wa rukat. Bibil ulondin anch: “Chiyukish cha mwin kupan chipandakenamu cha mwin kutambul.” (Mid. 20:35) Ov, kand kal wovangap mwamu amwiney? Winou wawiy uyakin wa pa dishin piur pa mwom. Chawiy Yehova ukimbin anch utenchika yom ukutwisha kusal machuku ma kurutu yimedina pa rukat mulong wa antu akwau ni mulong wendendiy.—Mat. 22:36-39. w17.07 22 par. 3

Nzamb ukat kutukwat nich usey ni kalimish. Ukat kutulam nawamp nakash kusutamu mutapu tukutwisha kwilam ayinetu. Yehova uyikatin antu end awonsu. Pakwez ukat kumubangin kand muntu ni muntu panrend. Tong piur pa yom yasadika pasak. Piswimp ni mivu yitot yisatu, Yehova wasadina anzwij mulong wa kutakel muchid wend ni kuyinkish usu mulong wa kuwin akankuny au. Pa chisu chinicha, Yehova wadandamena kumubangin muntu ni muntu panrend. Pakach pa antu inay pading mband umwing utazukinau anch Rut. Kadingap mwin Isarel ni washa yom yivud mulong wa kwikal mwin kumwifukwil Yehova. Nzamb wamufuta pa kumwinkish ikundj ni mwan. Pakwez kusutamu yom yiney, mwan wa Rut wikala mu mulong wa dijuku dishikijina kudi Mesia. Yehova wasala kand anch rusangu ra Rut arifunda mu Bibil mu buku ukweta dijin diend. Utongin anch Rut ukwiyov nchik chisu chikuvumbukay ni kwijik yom yiney yawonsu?—Rut 4:13; Mat. 1:5, 16. w17.06 23 par. 8-9

Mu muvu wa 1970, mukadivar utazukinau anch Peter wading ni mivu 19 ni wading wasambish kal chad kusal ku Betel wa mu Grande-Bretagne. Peter wading ulejen ku chikumbu ni chikumbu ni wamutana ikundj umwing wa mawedj ukweta mivu pakach pa 40 ap 60. Wamwipula ikundj winou anch ukutwish kusanger kutesh Bibil. Ikundj winou wading rabi wa in Yuda, ni wova nayimp nakash pa kuman anch nsand amufundisha Bibil. Mulong wa kumupim Peter, rabi wamwipula anch: “Ey nsand ey, buku wa Daniel amufunda mu dizu ik?” Peter wamwakula anch: “Chikunku cha buku winou achifunda mu dizu dia Aram.” Peter uvurikin anch: “Rabi washimwoka pa kuman anch nading nij chakul—pakwez am nashimwokap! Mutapu ik nijika chakul? Pinachirika ku chikumbu nakimba mu magazet makur ma Chinong cha Kalam ni Réveillez-vous ! ni natana mutu wa mulong urumburila anch buku wa Daniel amufunda mu dizu dia Aram.” (Dan. 2:4) Mwawiy, spiritu utumbila ukutwish kutukwash kuvurik jinsangu twatanga.—Luka 12:11, 12; 21:13-15. w17.06 13-14 par. 17

Tong mutapu ukutwishay kwiyov ikundj ni mband anch ijik anch akwikal ni mwan. Ap anch akwov musangar nakash, yisu yivud akutwish kand kwiyakamish. Akutwish kwiyipul anch madikaj makupam nawamp ni akutwish kwiyakamish piur pa ukash wa mujimbu wa mwan. Akutwish kand kwijik anch chitin kusadin nfalang jivud. Kupwa kwa mwan kuvadik, ambay a uruw afanyidin kand kutenchik yom yikwau. Maku ukusambish chad kusutish chisu chivud mulong wa kumulam mwan. Chawiy ikundj ni mband kakutwishap kand kwipan nakash umwing ni mukwau mudi mwasalangau pakur. Tatuku niyend ukwikal ni yisend yivud nakash. Ufanyidin kwikal nich kashinsh anch mukajend ni mwanend akwet yom yikwetau nich kuswir. Ambay a uruw amwing akwet niyau mar makwau. Akatin nakash kwikal ni an, pakwez kavadinap. Anch mband kimishinap, ukutwish kwov ushon nakash. w17.06 3 par. 1; 4-5 par. 5-6

Mulong tudi in Kristu, tukatin uyakin. Mu Dizu dia Nzamb mwawiy tutanina uyakin. Yesu wamuleja Tatukwend anch: “Dizu diey diawiy uyakin.” (Yoh. 17:17) Chakwel tukata uyakin wa Bibil, tufanyidin kwijik yidia mu Bibil. (Kol. 1:10) Pakwez kudi yom yivud tufanyidina kusal. Shinshikin mutapu utukwashinay nfund a Kuseng 119 kwijik yom tufanyidina kusal. (Kus. 119:97-100) Dichuku diakabuj, tufanyidin kutongijokin nakash pa yom tutangina yidia mu Bibil. Pitutongijokina pa mutapu tukata kutaninamu anch twasadin uyakin wa Bibil mu mwom yetu, tukukat kamu uyakin nakash. Chikwau kand, mikand yimedina pa Bibil yirijekinau kudi dirijek dia Nzamb yidi mudi yakudia yiwamp. Chawiy tukusanger chakin ‘mazu mawamp’ ma uyakin, ni chikutuswapel kuvurik yom tutangina ni kuyisadin mulong wa kuyikwash antu akwau.—Mul. 12:10. w17.05 18 par. 11-12

Tukatin kuyikwash antu amena mar ap antu akad kumusadin Yehova. (Luka 10:33-37) Mutapu uwamp wa kuyikwash antu udi wa kuyifundish rusangu ruwamp. Mukurump umwing wakwasha kal arefije avud walonda anch chidi cha usey kuyilej pakad kulab anch tudi Atuman a Yehova. Tufanyidin kuyijikish anch cha kusambish twezin mulong wa kuyikwash kwijik ruchingej ruwamp ripaninay Bibil kulik kwau ching kuyikwash ni yom ya ku mujimbu. Anch twamekesh rukat rakin kudi “angez adia mwi ngand yetu,” chikat kulet yibudikin yiwamp. (Kus. 146:9) Nambaz umwing utazukinau anch Alganesh wachina mu Érythrée. Kupwa kwa anend anying kusal weny uziyishena mu machuku chinan mwi mpay, Achika mu Soudan. Ulondin anch: “Kwinikwa akadivar ayikwata mudi anamakwau a piswimp, ayinka yakudia, yidjal, ni ndond ya kulal ni transpor. Anany akwau akutwisha kuyak angendj mu yikumbu yau mulong kwau amwifukwidin Nzamb umwing? Ching kwau Atuman a Yehova!”—Yoh. 13:35. w17.05 8 par. 17, 19-20

‘Ov, muntu umwing niyend ukwet ukwash kudi Nzamb? Ov muntu ukweta manangu ukwet usey kudi ndiy? Ov, komb Mwin Dikand Diawonsu usanger mulong wa kutentam kwey? Ov, chom ik chisakidilay ku yaku yey yiwanyidina?’ (Job 22:1-3) Elifaz watonga anch chakul chading bwat. Muntu mukwau wa pakach pau wading, Bilidad mwin Shuwak, nindiy wawejaku anch chikasiken kuyiman antu kudi Nzamb anch atentamin. (Job 25: 4) Elifaz ni Bilidad asala usu chakwel Job iyova anch usu usadinay mulong wa kumusadin Yehova udi kwau wa chamwamu. Antu inay akimba anch Job itiyija anch tukwetingap usey nakash kudi Nzamb kusutamu amakej, angej ap aminany. (Job 4:19; 25:6) Alonda mwamu mulong ading ikepishin? Yehova wamuleja Elifaz, Bilidad, ni muntu wa kasatu, Sofar, anch alonda makasu. Kupwa Nzamb walonda anch wading umusangaredin Job ni wamutazuka anch “kashalapol wam.” (Job 42:7) Chawiy tukutwish kwikal ni kashinsh anch ‘Nzamb ukat kuyisadin’ antu akad kuwanyin. w17.04 27 par. 1-2

Twashakamin kal mu mashakamin mayimp mu mivu yivud chawiy tukutwishap kwijik uvud wa yakamish tumening. Chilakej, antu ashiching piswimp ni ndond yikata kwimen train, kakutwishap atesh masok nakash. Ni antu ashiching piswimp ni dishitil kakutwishap atesh madjimb nakash. Pakwez, chisu chikudioshay Yehova yom yiney yiyimp, kukwikal kwiswedish nakash! Yom ik yikuswinkana yakamish yawonsu tudia nich katat? Shinshikin kushilamu kudia mu mufund wa nlel. Chikasikeshin mudi ik kwijik anch yawiy yom yikatinay Yehova mulong wetwetu! Mu chisu chinech cha yakamish, sal yawonsu ukutwisha kusal mulong ushala piswimp ni Yehova ni dirijek diend. Ruchingej rey mulong wa machuku ma kurutu ridi ra usey, pa chinech tong nakash piur pa ruchingej riner, ikal nich kashinsh anch ridi rakin kudi ey, ni yilejamu antu akwau. (1 Tim. 4:15, 16; 1 Pita 3:15) Mu kusal mwamu ukwikal nich kashinsh ang anch mangand minam amajiyish, ey ukupand ni ukwikal ni musangar chikupu! w17.04 14 par. 16-17

Chinech chiswapel kwijik, pakwez yom ik tukutwisha kusal anch twaman kurumbok kwa mukadivar? Ov, tukwimburij kutentam kwa Yehova? Chilakej, mutapu ik ukusala anch mukurump wa chikumangen wapan chakul chimekeshina kasolikany? Ukwilikidij wipwakala anch mukurump wa chikumangen walond pakad kutong chom chikutwisha kukwovish ushon ap chikukusala nayimp? Pa ndond pa kutong mau mau anch mukadivar winou kawanyidinap kwikal mukurump, ov, ukutwish kushimpish muchim ni kumuchingel Yesu udia mukurump wa chikumangen? Pa ndond pa kushinshikin kurumbuk, ukutwish kuvurik mudimu wasadinay kal mukadivar mu mivu yivud nich kushinshaman? Anch mukadivar wakurumbukinang wadandamen kusal mudi mukurump ap amwinkish yisend yikwau, ukutwish kumusanger? Anch wamulikishin kwa kwikatin, ukumekesh anch wimburijin kutentam kwa Yehova.—Mat. 6:14, 15. w17.04 26 par. 18