Ngond wa 6

Yehova ukat kutukand, kutufundish ni kutufumb mulong utukatin. Ukatin anch tushala piswimp ni ndiy ni tushakama chikupu. Yisu yimwing dipup dirumburikin kand yom yivud kusutamu kwau chiyul. Anch muntu wasalang chitil chijim, kawanyidinap kand kwikal ni yisend kanang mu chikumangen. Ap anch yom yiney yashiken, dipup dimekeshin anch Nzamb umukatin. Chilakej, dikutwish kumukwash kuman usey wa kwitekin chisu chijim mulong wa kwilej Bibil, kutongijokin ni kulembil. Kusal yom yiney kukutwish kukasikesh urund wend ni Yehova. (Kus. 19:7) Mu kusut kwa chisu, ukutwish kand kwikal ni yisend yend yashadishay. Ap anch muntu amwopat mu chikumangen, chinech chimekeshin rukat ra Yehova mulong dipup dikat kuchidij chikumangen ku yibachikin yiyimp. (1 Kor. 5:6, 7, 11) Ni mulong dipup dia Nzamb diding ching ditentamina, dikutwish kumukwash muntu wopatangau kuman kujimb kwa chitil chend. Chinech chikutwish kumubachik kukarumuk.—Mid. 3:19. w18.03 22-23 par. 5-6

Kalam wa rukan kadingap kija Dizu dia Nzamb. Chawiy mulong wa kwikal mwin Kristu, wafanyina kwilej uyakin wa pa dishin wa mu Bibil, kwijik yom yiyitinay Yehova atushalapol end ni kukat kuziyin mafundish ma Yesu. Yom yilejay mu chisu chikemp chinech yamukwasha kukat kutambul dibatish. (Mid. 16:25-33) Chakin kamu, wading ufanyidin kudandamen kwilej yom yikwau yivud kupwa kwa kumubatish. Chawiy anch mwaney wakulej anch ukimbin kutambul dibatish mulong umukatin Yehova ni ukatin kumuziyin, yom ik ukutwisha kusal? Ukumulik ambamba nau amakurump a chikumangen chakwel akwata mupak anch uwanyidin kutambul dibatish. Mudi in Kristu awonsu abatishinau kal, ufanyidin kudandamen kwilej piur pa Yehova machuku mend mawonsu, ap kamu chikupu.—Rom 11:33, 34. w18.03 11 par. 8-9

Anch twasal usu wa kupam mu spiritu, spiritu utumbila ukutukwash kuswimp mutapu wetu wa kutong. Pakemp pakemp, tukwijik chad mutapu wa kutong mudi mwatongangay Kristu. Spiritu utumbila ukutwish kutukwash kudjibul maku mayimp ni kukudish mikadil yikumusangaresha Nzamb. Anch twatong mudi Kristu, yikutwish kwikal ni chibachikin chisu tudia ku mudimu ap ku shikol, mutapu wetu wa kulond ni mutapu wetu wa kukwat mipak dichuku diawonsu. Mipak yetu yikumekesh anch tusadin usu wa kumwimburij Kristu. Mulong tudi antu a mu spiritu, tukatinap anch chom kanang chiyipisha urund wetu ni Yehova. Chisu chitupakinau mulong wa kusal chom chidia chiyimp, mwikadil wetu wa mu spiritu ukutukwash kujijamen choziu chinech. Kurutu kwa kukwat mupak, tufanyidin kutong ni kwiyipul anch: ‘Mutapu ik ukutwisha kwinkwash mbil ja Bibil? Kristu wafanyinang kusal yom ik pa mulong winou? Yom ik yikumusangaresha Yehova?’ w18.02 26 par. 12, 14

Mu chirung cha Enok, ngakiril wa Nowa, antu ading ayipa kal kwau nakash. Alondang ‘yom yiyimp’ piur pa Yehova. (Jud 14, 15) Ngand yikala yiyimp nakash ni chisum. Mu chisu cha Nowa, “ngand . . . yizulijana nich chisum chikash.” Angel ayimp eza panap pansh ni adjala mijimbu ya antu ni ata amband. An avalau ading aswejin nakash ni in chisum. (Dis. 6:2-4, 11, 12) Pakwez muntu ni muntu wamana kamu anch Nowa wading ushalijadin nau. Chinyim nau antu adingay nend, ndiy wading utentamin. “[Nowa] wenda pamwing ni Nzamb [wakin].” (Dis. 6:9) Mazu minam matulejin chom ik piur pa Nowa? Chakusambish, tong piur pa mivu yivud yasalay Nowa mulong wa kumusadin Yehova nich kushinshaman mu mangand mayimp kurutu kwa Mabeb kwez. Chadingap anch wasala mwamu mu mivu 70 ap 80 kwau, pakwez yading mivu 600 ni kusut! (Dis. 7:11) Cha kaad, vurik anch kadingap ni chikumangen mudi tukweta etu nlel chafanyina kumukwash ni kumukasikesh. Chimeken anch ap anamakwend amakundj nau amband kamukwashap kwend. w18.02 4 par. 4-5

Muntu ukatining nfalang kakwiyovangap anch jamuwanyin kal. Udandamedining kwend kujikat chisu chawonsu ni wipanining nakash mu kujikimb. Chinech chikat kumuletinang “yakamish yivud.” (1 Tim. 6:9, 10; Mul. 5:10) Chakin kamu, etu awonsu tukwet kuswir kwa nfalang. Mulong jikutwish kutuking. (Mul. 7:12) Pakwez, ov, tukutwish kwikal ni musangar anch tukwet nfalang jiwanyidina mulong wa maswir metu? Mwaning! (Mul. 5:12) Agur mwan wa Jake wafunda anch: “Kangal wanginkish uzwendj ap wimpich. Ndisha nich yakudia niswiridina.” Komb chiswapel kwijik mulong wak muntu winou kakatap kwikal kazwendj nakash. Walonda anch mulong kakatap anch amwoza chakwel iya, mulong kwiy kwafanyina kumuletin Yehova kapipej. Pakwez mulong wak kakatap anch ikala mpich? Wafunda anch: “Ap chamwamu nez nakutun pinikwikuta ni kulond anch: ‘Ov, [Yehova] udi nany?’ ” (Jnsw. 30:8, 9) Yesu walonda anch: “Kwikil muntu ukutwisha kuyisadil ansalejend aad nawamp. Ukumukis umwing, chad wamukat mukwau, ap ukumulimish umwing, chad wamudiul mukwau. Kiukutwishanyap kusadil kapamp kamwing Nzamb ni mapit ma pa mangand.”—Mat. 6:24. w18.01 24 par. 9-11

Tukutwish kukasikesh uumwing mu kuyilikishin akwetu kwa kwikatin. Anch twasal mwamu, tumekeshin anch tujikitishin anch Yehova ukutwish kutulikishin yitil yetu mulong wa yakupesh ya Yesu. Mulong wa kumekesh mulong wak chidi cha usey kulikishin, Yesu walonda rusangu ra mwant ni atushalapol end. Tang amboku Mateu 18:23-34 ni iyipula amwiney anch: ‘Ov, nikasikeshin kusal yom yafundishay Yesu? Nikat kushimpish muchim ni kwovijan nawamp ni akadivar nau anambaz nam? Niswakeling kulikishin antu akata kwinrumbukin?’ Chidi chakin anch yitil yimwing yiding yijim kusutamu yikwau. Ni chikutwish kutukasiken etu antu akad kuwanyin kulikishin yitil yimwing. Pakwez rusangu ra Yesu ritufundishin yom yikatinay Yehova anch tusala. Yesu wovikesha yom yiney patok anch Yehova kakutwishap kutulikishin anch etu tuyilikishidinap akadivar netu akarumukina kamu chakin. Chinech chawiy chom tufanyidina kutongin kamu nakash. Mulong wa kuchidij ni kulam uumwing wetu ukweta usey, tufanyidin kuyilikishin akwetu mudi mwatufundishay Yesu. w18.01 13 par. 12

Ap anch chading cha ubaj, Daniel wadandamena kulembil pa ndond pakutwishau antu kumuman mulong kakatap anch antu atonga anch walikinap kumusadin Yehova. Yehova wayukisha kutakaman ni mupak ushinshamena wa Daniel. Wasala chilay ni wamupandisha Daniel pakimbau kumudia kudi antambu. Mudi chibudikin, antu awonsu a mu Want wa Mediy ni Peris ileja piur pa Yehova! (Dan. 6:25-27) Mutapu ik tukutwisha kukudish ritiy mudi ra Daniel? Mulong wa kwikal ni ritiy rikash, chifanyidinap kwau ching kusu kutang Dizu dia Nzamb. Tufanyidin kamu kuditesh nawamp. (Mat. 13:23) Tufanyidin kwijik mutapu utonginingay Yehova ni wiyovilingay piur pa milong. Chawiy tufanyidin kutongijokin nakash piur pa yom tutangina. Chidi kand cha usey nakash kulembil yisu yawonsu, pakampwil chisu tukweta yakamish ap milong. Tukutwish kwikal ni ritiy anch Yehova ukutwinkish pakad choy manangu ni usu tumwitina.—Jak. 1:5. w18.02 12-13 par. 13-15

Ap ansand abatishinau kal amusadidina Nzamb akuman uwamp wa Yehova chisu chikuyinkishau kutakaman mulong wa kulond piur pa ritiy rau kudi antu akwau, chikalap nchik mu mudimu wa kulejan ap ku shikol. Chikutwish chakukasiken kuyilej arund ney a ku shikol. Ukutwish kwiyakamish mutapu ukutwisha kukwakulau. Chikutwish kamu kwikal chovishena wom pakampwil kurumburil yitiyij yey kurutu kwa antu avud. Yom ik yikutwisha kukukwash? Tong mulong wak witiyijin yom witiyijina. Anch yom ya ukwash ya kwilej nich yidia pa kapend ka jw.org yidiaku mu dizu diey, ufanyidin kamu kuyisadin. Yikutwish kukwash kutong piur pa yom witiyijina, mulong wak uyitiyijin ni mutapu ukutwisha kurumburil yitiyij yey kudi antu akwau. Anch wikal kamu nich kashinsh ni wirijek kamu nawamp, ukukat chad kupan uman piur pa Yehova.—Jer. 20:8, 9. w17.12 24-25 par. 12, 14-15

Chifanyidinap kwau ching kwimen pa kuyifundish aney piur pa antu ni piur pa yom yidia mu Bibil. Vurik anch Timote niyend “witiyija.” Mazu ma Grek masadidinay Paul marumburikin anch “kwikal nich kashinsh ka” ap “kwitiy uyakin umwing wa yom kampand.” Timote wading wij Mifund ya Hebereu “kudiokal ku wanikanch,” chinech chirumburikin anch chisu chadingay kamu mwanikanch nakash. Kupwa, ndiy wikala kand nich kashinsh anch Yesu wading Mesia. Ritiy ra Timote rakasikana, chawiy watambula dibatish ni wasala mudimu pamwing ni Paul mudi mishoner. Mutapu ik ukutwishanya kuyikwash anen chakwel akasikesha ritiy rau mudi mwasalay Timote, chakwel niyau ‘itiyija’? Chakusambish, shimpishany muchim. Chitin chisu mulong wa kukasikesh ritiy. Chirumburikinap anch ang en witiyijan chom, anen niyau akuchitiyij kapamp kamwing. Mwan ni mwan ukwet kuswir kwa kusadin ‘usu wa manangu’ mend mulong wa kukasikesh ritiy mu Bibil. (Rom 12:1) Chiudia nvaj, ukutwish kusal yom yivud chakwel uyikwasha aney kukasikesh ritiy rau, pakampwil chisu chikwipwilau yipul. w17.12 16-17 par. 3, 5-6

Mart, murund wa piswimp ni mwin kwilej wa Yesu, wading ni ushon. Mpanyend Lazar, wafa. Ov, kwading chom chafanyina kumwongoj? Mwaning. Yesu wamuleja anch: “Mwanamakwey ukuvumbuk.” (Yoh. 11:20-23) Marta wading nich kashinsh anch kukwikal divumbuk kurutu oku. Chawiy, Yesu wasala chilay. Wamuvumbula Lazar dichuku dinidia. Tukwetap diyingishin ap dimwing dia kuchingejin anch Yesu ap Tatukwend akuyivumbul katat anamakwetu akatish afila kal. Pakwez, ov, ukwet kashinsh mudi kadingay nich Mart anch kukwikal divumbuk dia anamakwetu akatish afila kal? Pamwing ap wafishin kal nfumwey ap mukajey, makwey ap tatukwey, ngakey mukatish ap mwaney ukatina nakash. Ufanyidinap kuchingejin kuyibwikat, kwambamb nau ap kusip nau mulong afil kal. Cha musangar, mudi Mart, ukwet mayingishin mawamp ma kulond anch: ‘Am nij anch akatish nam akuvumbuk chisu cha divumbuk.’ Pakwez, chidi chiwamp kudi mwin Kristu mwawonsu kutongin piur pa mayingishin masadina anch twikala nich kashinsh kinak. w17.12 3-4 par. 1-2

Yesu wakata Chijil cha Moses. Chinech chikutwishap kutukashimwish, mulong Chijil chadiokala kudi Tatukwend Yehova, Muntu ukweta usey nakash mu mwom wa Yesu. Bibil watakela kulond piur pa rukat rikurikina ra Yesu mulong wa Chijil cha Nzamb mu mazu ma mufund wetu wa nlel. Yesu wamekesha mwamu kusutin yom yalonday ni yasalay anch Chijil cha Nzamb chading chiwanyidin, cha ukwash ni chakin mulong wa kuwanyin. (Mat. 5:17-19) Yesu wafanyina kwov ushon chisu chamanay alej a yijil nau Afaris akat kusadin Chijil cha Tatukwend mu mutapu uyimp, mu kusal anch chikwetap usey. Wayileja anch: “En ukat kupanany chadikum kudi Nzamb cha yom yikata kuwapish yakudia mudi ndung, ni tumayij, ni tuyom tukwau tukata kulet res ku yakudia,” charumburik anch ading aziyidin kwau ku tuyom tukemp tukemp twa Chijil. Chad, wisu wading mulong? Yesu warumburila anch: “Ukat kulikany kuziyil ku malejan mapandakena kujimb ma Yijil mudi dirumburish ditentamina, ni riy, ni [kushinshaman].” (Mat. 23:23) Afaris kamanangap kwau kurumburik kwa Chijil, ni atongang anch apandaken kuwap kusutamu antu akwau. Pakwez Yesu wading wij yibachikin yading kwinyim kwa Chijil ni mutapu chijil chin chawonsu chalejanang piur pa Yehova. w17.11 15-16 par. 1-2

Antu akutwish kwipul anch: “Mulong wak ukasiken mwamu? Sanger mwom wey.” Pakwez Dizu dia Nzamb dijidikin masandj. (1 Tes. 4:4-8) Yehova ukwet mbil ya kututekin yijil mulong ndiy watutanga. Ulondin anch ching ikundj ni mband atijadina awiy afanyidina kumanijan mu uruw. Yehova utwinkishin yijil mulong utukatin. Wij anch ang twayilondul, mashakamin metu makwikal mawamp. Dijuku diziyidina ku yijil ya Nzamb dikwikal ni rukat nakash ni kalimish ni dikwiyov anch didi mu diking. Pakwez Nzamb ukuyipup antu ija yijil yend pakwez akat kuyibwambwil. (Heb. 13:4) Bibil utufundishin mutapu wa kwiyep yom ya masandj. Tufanyidin kusop yom tutadining. (Mat. 5:28, 29) Komb tufanyidin kulik kutal pornografi ni kutesh mizik yiyimp.—Efes 5:3-5. w17.11 23-24 par. 9-10

In kumwifukwil Yehova asadinang mizik mulong wa kumutumbish ndiy. Cha musangar, chisu chashalangau in Isarel ashinshamena kudiay Yehova, kuwang kwading kwa usey mu difukwil diau. Chilakej, parijekay David tempel, watenchika In Levi 4 000 mulong wa kumutumbish Yehova nich mizik. Antu akwau 288, ‘ayifumba mulong wa kumuwangil Yehova, awonsu ading ij kuwang nakash.’ (1 Jsng. 23: 5; 25:7) Mizik ni kuwang yading yikwet kand usey chisu cha kuyukish tempel. Bibil utulejin anch: “In kubul jimpung ni in kuwany abombakana pamwing mulong wa kumushiman [Yehova] ni kumujikitish. Yidjimin yijim ya jimpuny ni ya manchakay, pamwing ni ya yom yikwau ya kuseng nich, yovakana. . . . Uyaj wa [Yehova] wizula sens mu Chikumbu cha [Nzamb wakin].” Tongin mutapu wafanyina kukasikan ritiy ra in Isarel mulong wa chom mudi chinech!—2 Jsng 5:13, 14; 7:6. w17.11 4 par. 4-5

Yesu wading wij anch kadiap muntu mwawonsu ukwitiyija mafundish mend. Wading wij kand anch in kwilejend akuswiriken kutakaman mulong antu amwing akuyipompat. Rupompat riner rikutwish kuyipish chisambu cha mu majuku mau. Chakin kamu, chitongijok cha Yesu chading cha kuyifundish antu uyakin piur pa Nzamb, chadingap cha kwauril majuku. (Yoh. 18:37) Pakwez in kwilejend aswirikena kwijik anch chadingap chiswapela kumulondul ndiy chisu chawonsu, pakampwil anch arund nau a piswimp ap anamakwau alik kwitiy uyakin. Yesu walonda anch rupompat ridiokila mu dijuku chading chom chimwing pakach pa yom yafanyinau in kwilejend kujijamen. Pakwez atambula yom yivud kusutamu yom yashadishau. (Mar. 10:29, 30) Ap anch anamakwetu atupompat mulong tumwifukwidil Yehova, tukudandamen kwetu kuyikat. Pakwez tufanyidin kuvurik anch rukat retu mulong wa Nzamb ni Kristu rifanyidin kwikal rikash nakash kusutamu rukat tukweta mulong wa muntu win mwawonsu. (Mat. 10:37) Tufanyidin kand kubabal mulong Satan ukutwish kusadin rukat tukweta mulong wa anamakwetu chakwel atubachika tulik kumushinshamen Yehova. w17.10 10 par. 3-6

Chishimushimu chinech chitwinkishin kashinsh anch Yehova kakutwishap kulik anch uyimp wa mitapu yin yawonsu wikala pakach pa antu end. Anch Yehova waman chom chiyimp, ukat kusal swa swa mulong wa kuchidiosh. (1 Kor. 5:13) Mwangel wamekesha mwamu chisu chabwikay kapamp kamwing nich mufunyik ujim ku musans. Chawiy chishimushimu chinech chamekesha kudi in Isarel a chirung cha Zakariy anch Yehova ukudandamen kushitwish difukwil diend. Chishimushimu chayivurisha kand in Yuda anch niyau akwet chisend cha kulam difukwil dishitwila. Uyimp kakuwitiyijap ap ukez kikalap pakach pa antu a Nzamb. Nlel unou, Yehova utuletin mu dirijek diend dishitwila, mututanina rukat ni diking diend. Muntu ni muntu pakach petu ukwet chisend cha kukwash chakwel dishala dishitwila. Uyimp ukwikalap ap pakemp pakach pa antu a Yehova. w17.10 19 par. 14-15; 26 par. 17-18

Mikand 39 ya kusambish ya Bibil ayifunda kudi in Yuda, ap anch in Isarel. Awiy antu a kusambish “inkishau mazu kudi Nzamb mulong wa kumalam.” (Rom 3:1, 2) Awiy afunda chakusambish mikand yiney mu dizu dia Hebereu ap dia Aram. Pakwez mu mivu yitot yisatu ya kusambish K.C.C., in Yuda avud kateshap kand dizu dia Hebereu. Mulong wak? Chisu chakwatay Alexandre le Grand ndond jivud mu mangand, want wa in Grek wapalangana. Mudi chibudikin, dizu dia Grek dikala dizu dialondangau nakash mu ma teritwar mayikelau kudi in Grèce, ni antu avud asambisha kulond Grek pa ndond pa kulond mazu mau ma chivadik. (Dan. 8:5-7, 20, 21) Kuswimp kwinoku kwikala kand ni usu padi in Yuda avud, chawiy niyau chayikasikena kutesh Bibil mu dizu dia Hebereu. Mutapu ik wafanyina kupwa mulong winou? Piswimp mivu 250 kurutu kwa Yesu kuvadik, mikand yitan ya kusambish ya mu Bibil ayikarumuna mu dizu dia Grek. Kupwa, akarumuna chad Mifund ya Hebereu yashalaku. Bibil winou wakarumunau amutazuka anch Bibil wa Grek wa Septante. Ndiy Bibil wijikena wakarumanau mwawonsu mu Mifund ya Hebereu. w17.09 17-18 par. 7-9

Mukurump wey wa mudimu ukutwish kukulej anch usalang mudimu mwa asaa avud kusut muukata kusalang mu machuku mawitekina kal ey kurutu mulong wa kusal difukwil diey dia mu dijuku, mudimu wa kulejan ap kuya ku yikumangan ya chikumangen. Uswirikedin kutakaman mulong wa kumulej mukurump wey wa ku mudimu anch bwat ni kuyishil aney chilakej chiwamp. Chitin kand kutakaman mulong wa kuyikwash anetu itekina ni awanyisha mipak mu mudimu wa Nzamb. Chilakej, anvaj amwing akutwish kwov wom wa kuyikasikesh anau adandamena kusal mudimu wa uchibol, kusadin kwi ndond kudia maswir nakash, kusadin ku Betel ap kand kukwash mudimu wa kutung Yot ya Want ni Yot ya Yitentam. Pamwing ap akutwish kwikal nich wom anch anau kakutwishap kuyilam chisu chikunanapau. Pakwez, anvaj akweta manangu akat kumekesh kutakaman ni ritiy anch Yehova ukuwanyish kushilamu kwend. (Kus. 37:25) Anvaj amekeshina kutakaman mudi kwinoku ni amuchingejidina kamu Yehova akuyikwash kand anau kusal mwamu.—1 Sam. 1:27, 28; 2 Tim. 3:14, 15. w17.09 30-31 par. 14-15

Mutapu ik ukutwisha kuyikwash aney kukudish mwikadil wa kwilam? Anvaj ij anch anau kavadikap ni mwikadil winou. Chawiy afanyidin kuyifundish anau mikadil yiwamp kusutin yilakej yau ayinau. (Efes 6:4) Anch waman anch aney aburedin mwikadil wa kwilam, iyipula amwiney anch umekeshin chilakej chiwamp ap bwat. Ukutwish kumekesh chilakej chiwamp mu kusal mudimu wa kulejan chisu chawonsu, mu kukumangan ku yikumangan ni mu kutakel difukwil dia mu dijuku. Ni kangal kwov wom wa kuyikangesh aney kusal yom kanang anch chidi cha usey! Yehova wamutekina Adam ni Ev mimbu. Mimbu yiney yafanyina kuyikwash kwilej kulimish wintakel wa Yehova. Mutapu wawiy umwing, anch anvaj ayipup anau ni kuyishil chilakej chiwamp, yom yiney yikutwish kuyifundish anau mwikadil wa kwilam. Rukat mulong wa wintakel wa Nzamb ni kulimish yijil yend yidi yom yimwing pakach pa yom ya usey nakash ukutwisha kuyikwash aney chakwel ikala nich.—Jnsw. 1:5, 7, 8. w17.09 8 par. 17

Antu a Yehova akuman mar kushik kamu ni pakupwila mangand ma Satan. Kuburen mudimu, mayej makash, kuzengol, mar ma chitangil ni kushadish yom ya ku mujimbu mulong wa chisum ap yom yikwau yiyimp yikutwish kutushiken etu awonsu. Mulong wa kukwashijan mu yisu yiney ya mar, tufanyidin kumekesh ranaken rakin. Ranaken ripandakena rikutubachik kuyisadin antu akwau yom yiwamp. (Efes 4:32) mikadil yiney yidi ya wuntu usu. Yikutukwash kumwimburij Nzamb ni kuyongoj antu akwau. (2 Kor. 1:3, 4) Mutapu ik tukutwisha kuyanaken antu adia mu chikumangen chetu adiokila ngand yikwau ap akad kwikal ni mutapu? Tufanyidin kuyak nawamp, kwikal nau mu urund ni kuyikwash chakwel amana anch tukwet nau kuswir mu chikumangen. (1 Kor. 12:22) Chikwau kand, Atuman avud akat kuyanaken angendj ni akat kusal usu wa kwilej dizu diau. (1 Kor. 9:23) Usu wau ukat kulet yibudikin yiwamp. w17.08 23-24 par. 7-9

Chimeken patok anch Yehova ukatin anch twikal in kushimpish michim, akweta rusot ra kuchingel. Yom yikutukwasha kusal mwamu? Tufanyidin kumulembil Nzamb mulong wa spiritu wend utumbila. Vurik anch, kushimpish muchim kukat kudiokal ku spiritu utumbila wa Nzamb. (Efes 3:16; 6:18; 1 Tes. 5:17-19) Chawiy mwita Yehova mulong akukwasha kujijaman nich kushimpish muchim! Vurik kand yom yamukwasha Aburaham, Josef nend David kuchingel nich kushimpish muchim mulong wa kuwanyin kwa kushilamu kwa Yehova. Rading ritiy rau ni ruchingej rau mudiay Yehova. Kitonginap kwau ching piur pa ayinau ni pa yom yading yikatinau. Anch twatong piur pa yom mutapu yenda nawamp kudi awiy, niyetu tukwikal akasikeshinau mulong wa kumekesh mwikadil wa kuchingel. Chawiy, ap anch turishin ni mar, tukusal usu wa kumekesh ‘mwikadil wa kuchingel.’ Chakin kamu, yisu yimwing tukutwish kwipul anch: “Ov, [Yehova], kushik kamu chisu ik?” (Isay 6:11) Pakwez mulong wa ukash wa spiritu wa Nzamb, tukutwish kuvurik mazu ma Yeremiy madia mu mufund wa nlel. w17.08 8 par. 18-20

Yesu Kristu wayishila ansand chilakej chiwamp. Padingay mwan mukemp, wafanyina kusengan. Mudi mulondina Dizu dia Nzamb anch kudi “chisu . . . cha kusip” ni “chisu chikwau cha kuja maj.” (Mul. 3:4) Yesu waseja kand piswimp ni Yehova kusutil ku kwilej Mifund. Padingay ni mivu 12, alej a mu tempel ashimwoka mulong “wakulanga kwa manangu.” (Luka 2:42, 46, 47) Yesu pikalay muntu mukurump, kusal yom yamulejau kusal kudi Nzamb kwamusangaresha. Chilakej, Nzamb wakata anch ndiy ‘arumburil rusangu ruwamp kudi atuzwendj’ ni “kuyilej amputames rusangu ra kuyerik.” (Luka 4:18) Kusal yom yamulejau kusal kudi Nzamb kwamuletina Yesu musangar. Wasangera kuyifundish antu uyakin piur pa Tatukwend wa mwiur (Luka 10:21) Kupwa kwa kwambamb ni mband umwing piur pa difukwil diakin, Yesu wayileja in kwilejend anch: ‘Yakudia yam yidi kusal rusot rendendiy wantuma am, ni kupwish mudimu wend.’ (Yoh. 4:31-34) Yesu wading ni musangar mulong wamukata Nzamb ni antu akwau. Anch niyey wasal mwamu, ukwikal ni musangar. w17.07 22 par. 4-5

Padingay panap pansh, Yesu wimburija kamu nawamp mikadil yiwamp ya Tatukwend kusutin yom yalonday ni yasalangay. (Yoh. 5:19) Yehova wamutuma Yesu panap pansh mulong wa kuyongoj antu akweta “michim ya runeng” ni “antu awonsu adidila.” (Isay 61:1, 2; Luka 4:17-21) Antu ading ij anch Yesu wading wij nawamp mar mau ni wakatang kuyikwash. (Heb. 2:17) Bibil ulejen patok anch Yesu kaswimpinap. Bibil ulondin anch: “Yesu Kristu udi kusu mutapu umwing nangalosh, ilel, ni chikupu.” (Heb. 13:8) Amutazukin anch “mwin kuyitwal antu ku dipandish” mulong usadin anch chituswapela kushakam chikupu. Yesu wijing kamu nawamp ushon wetu ni “katat Yesu ukutwish kuyikwash antu ozinau kudi Sakudimban.” (Mid. 3:15; Heb. 2:10, 18) Yesu udandamedin kwov ushon pamenau antu akwau mar. Wij ushon wau ni ukutwish kand kuyongoj ‘pa chisu chiwanyidina.’—Heb. 4:15, 16. w17.07 10-11 par. 6-7, 10

Chidi cha usey kukwat nich usey mapit metu ma mu spiritu. Pakwez tufanyidin kubabal nakash chakwel kangal Satan ni mangand mend maziyisha rukat retu mulong wa mapit minam. Anch tubabelap, tukwikal ni kampuw ku yom mudi kwikal ni mudimu utufutinau nfalang jivud, kutongin mashakamin mawamp ap kwibaz mulong wa yom ya kumujimbu tukweta. Kambuy Yohan utuvurishin anch mangand minam ni yom yidiamu yikujiy piswimp ap. (1 Yoh. 2:15-17) Chawiy tufanyidina kudandamen kujikitish mulong wa mapit metu ma mu spiritu ni kumalam nawamp. Sal usu wa kulik chom chin chawonsu chikutwisha kuziyish rukat rey mulong wa Want wa Nzamb. Dandamen kulejan nich mushiku ni kangal washadish rukat rey mulong wa mudimu wa kulejan. Dandamen kukimb uyakin wa Bibil. Anch wasal mwamu, ukwitekin ‘mapit mey mwiur. Mwinimwa makutwishap kushadik, mulong ij kakutwishap kumiy, ap amakej kakutwishap kumashesh.’—Luka 12:33. w17.06 14 par. 19-20

Winyikel wa Yehova uyipinap. Pakwez, antu amuziyidina akwet want ipau ni musangar. (2 Kor. 3:17) David walonda piur pa Yehova anch: “Kalimish ni katumb yidi kurutu kwend, ukash ni musangar yizwil kushichay.” (1 Jsng. 16:7, 27) Nfund a kuseng Etan wafunda anch: ‘Ayuk kwau antu ija dizu dia mpuny yey, A Yehova, awiy akata kwendil mu kutok kukata kudiokal mwis mwey. Akat kusangar mu dijin diey machuku mawonsu, akat kwitumbish mulong wa kutentam kwey.’ (Kus. 89:15, 16) Anch twatongijokin piur pa uwamp wa Yehova, tukwikal nich kashinsh anch winyikel wend udi uwamp. Yehova watusala ni watutanga, chawiy wij kamu nawamp yom yikutwisha kutusangaresh. Utwinkishin kwa kwikatin yom yivud nakash kusutamu yitukweta nich kuswir. Yom yawonsu yitwitinay Yehova kusal yidi mulong wa uwamp wetu. Ap anch twipan, tukwikal ching ni musangar anch twamuziyin Yehova.—Isay 48:17. w17.06 23-24 par. 10-11

Shinshikin piur pa nambaz umwing wa mu Angleterre wading ukatin nakash kuval. Pijikay anch kakutwishap kuval an mu mangand minam, waziya nakash. Chawiy ndiy ni nfumwend akwata mupak wa kulil mwan wayen. Pakwez yisu yimwing wadandamena ching kunenganan. Walonda anch, “nijika anch kulil mwan wayen kushalijadin nakash ni kuval mwan wey amwiney.” Bibil ulondin anch amband “akez kupand mulong wa kuval an.” (1 Tim. 2:15) Pakwez chinech chirumburikinap anch akutambul mwom wa chikupu mulong kwau wa kuval an. Chad verse winou urumburikin ik? Maku ukwatikening nakash mulong wa kulam anend ni chikumbu chend. Chinech chikutwish kumukwash kwiyep ku milong mudi mboj ni kwiyandjik mu milong yakad kumutal.—1 Tim. 5:13. w17.06 4-5 par. 6-8

Elihu niyend wakimba kulond anch usu wetu tusadina mulong wa kumusadin Yehova udi wa chamwamu? Bwat. Walonda anch Yehova kakwetap kuswir anch etu tumwifukwil. Yehova uwanyishin yom yawonsu. Kwikil chom tukutwisha kusal chikutwisha kumupitish ap kumwinkish usu. Pakwez mikadil yawonsu yiwamp ap ukaliweny wawonsu tukweta yidiokil kudi Nzamb, ni ukat kushinshikin mutapu tuyisadidina yom yiney. Pitumekeshining rukat rishinshamena kudi antu amwifukwidina Yehova, umening yisal yiney mudi tuyisadin kudi ndiy. Tutangin mu Jinswir 19:17 anch: “Mwin kumwovil kazwendj riy ukat kumusondjik [Yehova, ni Yehova] ukez kamuchirishin mulong wa chom chasalay.” Yehova ukat kushinshikin chisu chawonsu tukata kumekesh ranaken kudi akwetu. Ap anch udi Sakatang wa mangand mawonsu, Yehova umening yisal yiney mudi muntu umusondjikin ndiy, ni ukat kuyichirish nich yipan yiwamp yivud. Yesu Mwan a Nzamb, niyend witiyija yom yiney.—Luka 14:13, 14. w17.04 28 par. 3-4

Yom ik yikwau yikutwisha kutukwash kwikal ni rukat rikurikina mulong wa uyakin wa Bibil? Tufanyidin kukumangan ku yikumangan yawonsu, mulong kwinikwa atufundishining kudi Yehova. Dilejan dia Bibil kusutin Chinong cha Kalam rubing rawonsu uding mutapu wa pa dishin usadidiningau mulong wa kutufundish. Anch tukatin kutaninamu nakash mu chikumangan chinech, tufanyidin kwirijek kurutu kwa chisu. Chilakej, tufanyidin kutang verse win mwawonsu wa mu Bibil ujimbwilau. Nlel unou, antu avud akutwish kutambul Chinong cha Kalam kusutin telefon ap ordinater mulong udiaku mu mazu mavud pa kapend ka jw.org ni pa application JW Library. Yom ya elekitronik yikat kutukwash kutan swa maverse malejenau. Pakwez tukatining kwilej mitu ya milong yawonsu, pitutangining mifund ya Bibil nich mushiku ni pitukata kuyitongijokin nakash, rukat retu mulong wa uyakin wa Bibil rikat kukul. w17.05 18-19 par. 14

Kupwa kwa dibatish, tufanyidin kudandamen kushakam kukwatijan ni kwipan kwetu mu mudimu ushinshamena kudi Nzamb. Muntu ukutwisha kuziy mulong wa kumusadin Yehova ap ukuziya kushakam mudi mwin Kristu kakutwishap kulond anch kipanap kwend chakin kudi Nzamb ni anch dibatish diend diadingap diwanyidina. Anch muntu wipana kal kudi Yehova wasal chitil chijim, ukwirumburilap amwinend kudi Yehova ni chikumangen. Tufanyidinap kwikal mudi antu alonday Yesu anch: “Ey washil kal rukat rey ruwading nich pakusambish.” Pakwez tukatin ndiy alonda piur petu anch: “Nij yisalijok yey yawonsu, ni rukat rey, ni ritiy rey. Nij kand kuziyil kwey ku mudimu, ni kudandamen kwey, katat ey usadil yom yivud kupandakan ya kusambish.” (Kuj. 2:4, 19) Tukatin kumusangaresh Yehova kusutin mu kushakam ni mushiku kukwatijan ni kwipan kwetu. w17.04 7-8 par. 12-13

‘Nzuj wa mangand mawonsu kakusalap chitentamina?’ (Dis. 18:25) Muntu ushinshamena Aburaham kipulap chipul chinech mulong wading widjidjekin. Pakwez, chipul chend chamekesha anch wading nich kashinsh anch Yehova ukurumburish musumb wa Sodom ni Gomor nich kutentam kuwanyidina. Wading wij anch Yehova kakutwishap ‘kujip in kutentam pamwing nau antu ayimp.’ Chinech chading chom ‘chakad kutongin’ kudi Aburaham. Aburaham watwisha kumekesh kashinsh mudi kinak mulong Yehova udi chilakej chijim cha kutentam. Chawiy, mulong mbil ja Yehova jiding chisu chawonsu jitentamina, ukurumburish kamu milong mu mutapu uwanyidina. Bibil ulondin anch: “Ndiy ukatil kutentam ni uyakin.”—Kus. 33:5. w17.04 15-16 par. 1-2

Anvaj, chilakej chen chidi cha usey nakash ang ukatinany anch anen ikal mu urund ni Yehova ni ashakam chikupu. Anch anen akumanany ukat ‘kukimbany bil Want wa Nzamb,’ akwilej kumuchingejin Yehova mulong wa maswir mau ma dichuku ni dichuku. (Mat. 6:33, 34) Tekany mudimu umusadidinanya Yehova pa ndond yakusambish pa ndond pa kukimb yom yivud ya ku mujimbu. Ikalany ni mashakamin misikena ni salany usu wa kwipuk mabaz. Kimbany “mapit mwiur,” mamukatishina Yehova pa ndond pa kukimb nfalang ap “katumb kadiokila kudi antu.” (Mar. 10:21, 22; Yoh. 12:43) Kangal kukwatikan nakash mu mutapu wa kukangany chisu cha kusutish nau anen. Elany ijik anch ukat kwibazany mulong wawawiy chisu chikwatinau mupak wa kumutek Yehova pa ndond yakusambish pa ndond pa kukimb katumb ap nfalang mulong wa ayinau ap mulong wenen. Likany chitongijok chiyimp cha kulond anch an afanyidin kuyinkish anvaj yom ya usey nakash. Vurikany anch, “an kawiyip akuyipitishang anvaj, ching anvaj awiy akata kuyipitish an.”—2 Kor. 12:14, TMK. w17.05 9-10 par. 3-4