Ngond wa 7

Shebina wading “kalam mukurump wa chikumbu,” chimeken anch chikumbu cha Mwant Ezekias, ni wading ni ulabu nakash. (Isay 22:15) Pakwez Shebina wikala mwin kwibaz ni wakimba antu akwau amana anch ndiy wading wa usey nakash. (Isay 22:16-18) Mulong Shebina wasala usu wa kwikakin uyaj amwinend, Nzamb wapana chisend chend kudi muntu mukwau utazukinau anch Eliakim. (Isay 22:19-21) Chinech chasadika chisu charijekay Sanakerib Mwant wa in Asiria mulong wa kurishikish Yerusalem. Kupwa, Sanakerib watuma chisak cha antwend ni amasalay avud mulong wa kuyovish in Yuda wom ni kumulej Mwant Ezekias anch ipana. (2 Ant 18:17-25) Ezekias wamutuma Eliakim ni amakundj akwau aad mulong wa kutanijan nau antu inay. Umwing wau wading Shebina ni wading usadin mudi sekreter. Kusutin yom yiney tumen anch Shebina wileja kamu kwikal muntu wikepishina ni kiyovap anch amurumbukin kal ni kanengananap. Wakata kwikal ni ndond ya mwinshin. w18.03 29-30 par. 7-8, 10

Anch twaman anch twipanin nakash ku yom ya ku mujimbu ap mu misangar, tufanyidinap kuziy. Tufanyidin kudandamen kumwit Yehova spiritu wend utumbila chakwel atukwasha kushinshikin pa yom yiwamp. (Luka 11:13) Muvurika kambuy Pita. Chisu chawonsu katongangap mudi Kristu. (Mat. 16:22, 23; Luka 22:34, 54-62; Gal. 2:11-14) Pakwez kaziyap ni Yehova wamukwasha. Pakemp pakemp, Pita wasambisha kutong mudi Kristu. Komb niyetu tukutwish. Mukand wa Pita ujimbwil mikadil yikutwisha kutukwash. (2 Pita 1:5-8) Tufanyidin kusal usu nakash mulong wa kukudish mwikadil wa kwikand, kujijaman, rukat ra ukadivar, ni mikadil yikwau yiwamp. Dichuku diawonsu tufanyidin kwiyipul anch, ‘Ov, mikadil ik nikusadina nlel yikutwisha kwinkwash kwikal ukasikena mu spiritu?’ w18.02 26 par. 12-13

Job watesha mbil ja Nzamb nawamp nakash. Wamwijika chakin Yehova ni chinech chamubachika kusal yom mu mutapu uwamp. Chilakej, Job wading wij anch kakutwishap kulond anch umukatin Nzamb anch kayikatinap antu akwau. (Job 6:14) Katongap anch udi muwamp nakash kuyisutamu antu akwau, pakwez wayisadina mudi antu a mu dijuku diend, ikalap ampich ap atuzwendj. Job walonda anch: “Ndiy kamu Nzamb umwing wantanga am, ndiy kand wayitanga.” (Job 31:13-22) Ap padingay Job mpich ni ukweta usu, kikalap mwin kwibaz ni kayimanap antu akwau mudi kakwetap usey kusutamu ndiy. Chinech chishalijadin nakash ni mutapu usadinau antu avud adia ampich ni akweta usu nlel. Job kakatap anch chom ap chimwing, ap yom ya ku mujimbu, yikala ya usey nakash kumusutamu Yehova. Wijika anch ang yom yiney yamushiken, ukutwish kumulik “Nzamb wa piur.” (Job 31:24-28) Chikwau kand, Job wamana uruw mudi kushilamu kutumbila pakach pa ikundj ni mband. Wasala kand machip ma kulik kumutal mband nich dis diyimp.—Job 31:1. w18.02 13 par. 16; 14 par. 18-19

Nowa katongap anch chitin kwau kwikal ching kusu muntu muwamp. Wayileja antu akwau nich kutakaman piur pa ritiy rend mudiay Yehova. Bibil umutazukin anch ‘mwin kulejan wa kutentam.’ (2 Pita 2:5) Kambuy Paul walonda piur pa Nowa anch: “Ku [ritiy rend] ndiy wayifisha nich in mangand.” (Heb. 11:7) Chakin kamu antu amusipa ni apakisha kumukangesh. Pamwing ap asala yom mulong wa kumwovish nayimp. Pakwez Nowa kayovap antu wom. (Jnsw. 29:25) Wading ni ritiy, chawiy Yehova wamwinkisha kutakaman. Ni uyinkishin kand atushalapol end awonsu ashinshamena kutakaman mudi kwinoku. Nowa wading wikadin kal ushinshamena kudiay Yehova mu mivu 500 ni kusut pamulejau kudi Yehova kusal waat ujim. Waat winou afanyina kuusadin mulong wa kupandish antu amwing ni annam ku Mabeb. (Dis. 5:32; 6:14) Kusal waat ujim mudi winou kwafanyina kumekan mudi kukasiken nakash kudiay Nowa. Ni chakin kamu wijika anch antu akumusip nakash ni kusal anch mwom wikala wa mar. Pakwez Nowa wading ni ritiy ni wamuziyina Yehova. ‘Ndiy wasala kamu mudi mwamulejau.’—Dis. 6:22. w18.02 4-5 par. 4, 6-7

Mutapu umwing wa usey nakash tukutwisha kukasikesh uumwing udi wa kumwimburij Yehova mu kumekesh rukat. (1 Yoh. 4:8) Tufanyidinap kulond anch: “Nikutwish kuyikat akadivar nam, pakwez kanshindidinap kuyikat.” Anch twatong mu mutapu winou, tulondwilap chiyul cha Paul cha ‘kukwashijan muntu ni mukwau mu rukat.’ (Efes 4:2) Ijik anch Paul kalondap ching anch tufanyidin ‘kukwashijan muntu ni mukwau’ pakwez tufanyidin kusal mwamu “mu rukat.” Yidi yom yishalijadina. Kuding antu a mitapu kushalijan mu yikumangen yetu ni Yehova wayipwita awonsu kwez kudi ndiy. (Yoh. 6:44) Komb ufanyidin kwikal ni mayingishin mawamp mavud ma kuyikat. Anch akadivar nau anambaz netu awanyidin kutambul rukat ra Nzamb, ing mutapu ik tukutwisha kulond anch kawanyidinap kutambul rukat retu? Tufanyidin kwikal nich mushiku wa kuyikat akadivar netu mutapu ukatinay Yehova anch tuyikata.—1 Yoh. 4:20, 21. w18.01 13-14 par. 14

Anvaj amwing atongining anch chiding chiwamp kudi anau kurutu kwa kutambul dibatish ilejaku bil mashikol ni amanaku mudimu uwamp wa kusal. Anvaj mudi inay akutwish kamu kwikal ni yitongijok yiwamp, pakwez afanyidin kwiyipul anch: ‘Kwilej kwinoku kukumukwash kamu mwanam kwikal ni mashakamin mawamp? Yom yiney yikwatijadin kamu ni yom twilejina mu Bibil?’ Chidi chiwamp kuvurik anch mangand minam ni yom yidiamu yikwatijadinap ni yom yikatinay ni yitonginay Yehova. (Jak. 4:7, 8; 1 Yoh. 2:15-17; 5:19) Urund wa piswimp ni Yehova didi diking diwamp kudi mwan mulong wa Satan, mangand minam ni mulong wa yitongijok yiyimp ya mangand. Anch anvaj atek shikol ni mudimu uwamp pa ndond ya kusambish mu mwom, anau akwitiyij kamu anch yom yidia mu mangand yidi ya usey nakash kusutamu urund wau wa piswimp ni Yehova. Chinech chidi cha ubaj. Mudi nvaj mwin rukat, ov, ukatin anch mangand minam mamufundisha mwaney yom yitongina mangand minam anch yikumuletin musangar? Mutapu umwing wa kwikal ni mashakamin mawamp ni musangar wakin kudi kumutek Yehova pa ndond ya kusambish mu mwom wetu.—Kus. 1:2, 3. w18.03 12 par. 10-11

Atushalapol avud a Yehova asadin usu wa kupipej mwom wau. Atanin anch kusal mwamu kuyinkishin chisu chivud cha kumusadin Yehova ni kuyiletidin musangar. Jack, walandisha chikumbu chend chijim ni yom yend yadingay nich ya kwisak chakwel asala mudimu wa uchibol ni mukajend. Pakwez mu mivu yivud wachirikang ku chikumbu waziyang kal mulong wa milong ya mudimu. Ulondin anch: “Mukajam chibol wa rawonsu, wading chisu chawonsu nich musangar. Mukajend walonda anch, ‘nimukwet kamu mukurump wa mudimu upandakena kujimb!’ Katat niyam nisadin mudimu wa uchibol, etu awonsu aad tumusadidin Muntu umwing, Yehova.” Anch twashinshikin chitongijok chetu piur pa nfalang, tufanyidin kwikal ni kashinsh ni kwiyipul anch: ‘Ov, mwom wam umekeshin anch nitiyijin kamu yilondinay Bibil piur pa nfalang? Kukimb nfalang chawiy chom cha usey nakash kudi am? Nipanin nakash piur pa kukimb yom ya kumujimbu kusutamu urund wam ni Yehova ni akwetu? Nitiyijin kamu anch Yehova ukuwanyish yom niswirikedina?’ Tufanyidin kwikal nich kashinsh anch ndiy kakezap kuyidiul antu amuchingejidina! w18.01 24-25 par. 12-13

Chidi kamu chisend cha usey nakash cha kusal mudimu mulong wa dipandish diey. Chakwel usala mwamu, ufanyidin kutang ni kutongijokin pa Dizu dia Nzamb, kumulembil Yehova ni kutong kand nakash piur pa mitapu yikukwashinay ey pakampwil. Kusal yom yiney kukukukwash ey kwikal kamu nich kashinsh nakash anch Yehova udi Murund ney. Chinech chikukukwash chad kusanger kuyilej akwen piur pa yitiyij yey. (Kus. 73:28) Yesu walonda anch: “Muntu mwawonsu usotila kwibomb ni yamam, chifanyidin ndiy [kwitun] amwinend, asend mutond wend [wa mar], anlondul am.” (Mat. 16:24) Mwaning, mulong wa kumulondul Yesu, mwin Kristu mwawonsu ufanyidin kwipan amwinend kudi Yehova ni kutambul dibatish. Pakwez yiney yidi kwau nsambishil ya mwom uwamp katat, ni yikutwal ku mwom wa chikupu mwi ngand yisu ya Nzamb. Chawiy, sal yom yawonsu ukutwisha kusal chakwel udandamena kusal mudimu mulong wa dipandish diey! w17.12 26 par. 18-19

Anch anvaj afundish nich kushimpish muchim, mu kusut kwa chisu anau akusambish kutesh “kujimb . . . ni kulep, ni kulep kwa kuya piur, ni kulep kwa kukurik pansh” kwa ritiy. (Efes 3:18) Tukutwish kuyifundish kukwatijan ni mivu yikwetau ni ronganyin rau. Padandamedina kukasikan ritiy rau mu yom yilejinau, chikutwish kuyiswapel kulondin piur pa yitiyij yau kudi antu akwau, pamwing kand nau arund nau a ku shikol. (1 Pita 3:15) Chilakej, ov, mwaney ukutwish kusadin Bibil chakwel arumburila yom yikata kushikenang anch muntu wafa? Uteshin nawamp yom yirumburilay Bibil? Vurik anch ufanyidin kwikal ushimpishina muchim mulong wa kumukwash mwaney kukasikesh ritiy mu Dizu dia Nzamb, ni chinech chidi cha usey nakash. (Kuv. 6:6, 7) Chakin, yilakej yen yidi kand ya usey nakash mulong wa kuyikwash anen kukasikesh ritiy rau. Stephanie, maku ukweta an ayangadim asatu ulondin anch: “Kudiosh anam achidi akemp, nading kwiyipulang anch, ‘Nikat kuyilej anam mulong wak am nikwet kashinsh anch Yehova udiaku, piur pa rukat rend ni piur pa jinjil jend jintentamina? Anam amening kamu patok anch am nimukatin kamu Yehova?’ Nikutwishap kuchingejin anch anam itiyija chom kanang anch am nichitiyijinap.” w17.12 17-18 par. 8-10

Mulong wak Mart wading nich kashinsh anch mwanamakwend ukuvumbuk? Mulong wading wij yom kanang piur pa kuvumbuk kwasadika pakur. Pamwing ap wijikina yom yiney ku chikumbu ap mu sinagog padingay uchidi kal mwan mukemp. Wavurika piur pa kuvumbuk kusatu kwasadika kudia mu Bibil. Shinshikin kuvumbuk kwa kusambish. Kwasadika mu chisu chamwinkishau muprofet Elija usu kudi Nzamb wa kusal yilay. Kwinkaj kwa Isarel, mu musumb wa Fenisiy watazukau anch Sarepita, kwading mwadia mufu umwing kazwendj wamwaka nawamp muprofet. Chad, Yehova wasala chilay. Yehova wasala anch chimpay chend cha wung ni many yilika kupwa chakwel yimukwasha mband winou ni mwanend apanda. (1 Ant 17:8-16) Kupwa, mwanend wayela ni wafa. Pakwez Elija wamukwasha. Pakwatay mujimbu wa mwan, Elija wamulembila Yehova anch: ‘Nzamb wam, nakwilembil, amboku, muchirisha kand mwan winou kwikal mwom.’ Ni mwawiy muyasadika! Nzamb wamutesha Elija, ni mwan wikala kand mwom. Dined diading divumbuk dia kusambish diasadika dilejenau mu Bibil. (1 Ant 17:17-24) Chakin kamu, Mart wading wij piur pa rusangu riner rishimokishena. w17.12 3 par. 1; 4 par. 3, 5-6

Antu akutwish kutulej anch tusadina nakash chisu chetu ni usu wetu mu kusal mudimu wa mangand minam, pakampwil ukutwisha kusal anch twijikana nakash, twikal ni katumb, ap twikal ampich. Mulong antu avud atongining anch kwikal ni mudimu uwamp kwawiy kwikal ni musangar wakin, niyetu tukutwish chad kusambish kutong mwamu. Ov, chidi chakin anch mudimu ukusala anch akwijik nakash ap wikal ni katumb ukukuletin kamu musangar? Bwat. Tong piur pa chom ech. Satan wakata anch amwijika nakash ni ikala ni katumb. Mu kusal mwamu, watambula yom yakimbay. Pakwez ukwet ujim, kakwetap musangar. (Mat. 4:8, 9; Kuj. 12:12) Pakwez, tong piur pa musangar tukweting pituyikwashining antu akwau kwilej piur pa Nzamb ni piur pa machuku ma kurutu mawamp makanay kal. Kwikil mudimu mu mangand omu ukutwisha kukwinkish musangar mudi winou. Chikwau kand, mulong wa kwikal ni mudimu uwamp, antu akat kubambel, kurish, ap kuyovil akwau mukau. Pakwez, akat kushikenang mu kwiyov anch kakwetap kwau chom. Bibil ulondin anch akat “kumulondul rinkind.”—Mul. 4:4. w17.11 24-25 par. 11-13

Mu chisu cha Yesu, mizik yadandamena kwikal nich usey mu difukwil diakin. Tong piur pa yom yasadika uchuku wa usey nakash mu rusangu ra antu. Kupwa kwa Yesu kudia Yakudia ya Urel ya Nsalejetu pamwing nau in kwilejend, awanga miminy mulong wa kumutumbish Yehova. In Kristu akusambish asha chilakej chiwamp cha kumutumbish Nzamb nich miminy. Chinyim nau in Isarel ayangang ku tempel mulong wa kumwifukwil Yehova, in Kristu inay atanijanang ku yikumbu yau. Ap anch yikumbu yiney yadingap kwau yiwamp ni ya ufun mudi tempel, akadivar inay adandamenang kuwang nich mushiku. Chawiy, kambuy Paul wayileja akadivar nend in Kristu anch: “[Dandamenany kulejijany] ni kubabeshijanany umwing ni mukwau nich manangu mawonsu. Muwangilany Nzamb miminy ya kuseng, ni miminy ya win Kristu, ni miminy ya kumushiman, muwangilany [Yehova] nich kujikitish mu michim yen.” (Kol. 3:16) Tufanyidin kamu ‘kuyiwang nich kujikitish’ miminy yidia mu buku wetu wa miminy. Yidi pakach pa “yakudia ya pa chisu chifanyidina” yitwinkinau kudi “kashalapol ushinshamena ni kubabal.”—Mat. 24:45. w17.11 4-5 par. 7-8

Yehova watenchika misumb musamban ya kuchinin yiswapela kuchininamu. Wayileja in Isarel kutond misumb yisatu ushad ni ushad wa Yordan. Mulong wak? Mulong chimuswapel mwin kuchin kwandam mu musumb umwing pakach pa misumb yiney pakad kulab. (Kuch. 35:12-14) Jinjil jading jiyila mu misumb yiney jading jiwamp nakash. (Kuv. 19:3) Kulondwish yom yafundau in Yuda, atekang yijingidij mu jinjil jinej chakwel yimukwasha mwin kuchin kutan musumb. Mulong kwading misumb ya kuchinin mu Isarel, mwin Isarel wamujipa mukwau pakad kutongin kakutwishap kutan diking mwi ngand ya wingendj, mulong mwinimwa ukutwish chad kwifukwil anzamb a makasu. Tong piur pa chom ech: Yehova wapana mbil anch chifanyidin kumujip mwin kujipan. Pakwez wikala kand nich kashinsh anch muntu ukumujipa mukwau pakad kutongin afanyidin kumwovil riy, kumwanaken ni kumuking. Mwin jinsangu umwing wa Bibil walonda anch: “Chom chin chawonsu achisala nawamp, chiziyina ni chiswapela kamu.” Yehova kadiap Nzuj muyimp ukimbining chakwel amana mutapu wa kuyinkish atushalapol end chibau. Pakwez udi mwin “riy kupandakan.”—Efes 2:4. w17.11 16-17 par. 4-5

Muvungur utwikina, mband udia mu musans, ni amband aad akweta jimpur ja usu mudi ja nkumb atwikin. Yiney yawiy yimwing ya yishimushimu yishimokishena yamanay Zakariy. (Zak. 5:1, 7-9) Mulong wak Yehova wapana yishimushimu yiney yishimokishena kudi muprofet wend? Chishimushimu cha musamban ni cha sambwad cha Zakariy yiyibabeshin nakash antu akata kusalang yom yiyimp. Yehova kakwitiyap anch uyimp udandamena. Mulong tudi atushalapol end, tufanyidin kukis uyimp. Yishimushimu yiney yitwinkishin kand kashinsh anch ang twasal usu wa kumusangaresh Tatukwetu wa rukat, kakutushingap pakwez ukutuking ni kutuyukish. Ap chikutwish kwikal chikash kushal ishitwila mu mangand minam mayimp, pakwez nich ukwash wa Yehova, tukutwish! w17.10 15 par. 1; 20 par. 19

Anambaz ajich akwet mitapu yivud ya kumekesh kutakaman ni kumusadin Yehova. Akutwish kusal mudimu wa uchibol, kushemunikin kwi ndond kudia maswir nakash, kusal mudimu pamwing ni Biro Utadina Mudimu wa Kutung ni kuya ku Shikol ya in Kulejan a Want. Amwing akat kuyitazuk mulong wa kuya ku Shikol ya Gilead. Tuyikatin anambaz netu apamina kal, ap anch kakutwishap kand kusal yom yivud, ni tukwet kand musangar wa kwikal nau mu chikumangen! Ap anch amwing katwishinap kand kusal mudi mwasalangau pakur mu mudimu wa Nzamb, akutwish kudandamen kumekesh kutakaman ni kusal mudimu. Chilakej, nambaz wapamina kal ufanyidin kumekesh kutakaman anch amakurump amulej kuya kumuyul nambaz uchidia kal changadim piur pa kudjal nawamp. Kafanyidinap kumuswejen nambaz winou piur pa mutapu wend wa kudjal, pakwez mu mutapu uwamp, ukumukwash kutong anch masun mend makutwish kuyipwakesh antu akwau. (1 Tim. 2:9, 10) Anch anambaz amekesh rukat rau mu mitapu yiney, akutwish kukasikesh chikumangen. w17.09 31 par. 17-18

Mu kusut kwa mivu, antakel avud akweta usu asala usu wa kuyikangesh antu kutang Bibil. Pakwez antu amwovang Nzamb wom, awiy adandamena kusal usu chakwel Bibil ikala kudi antu awonsu. Umwing wa pakach pa antu inay wading John Wycliffe, muntu winou washakama mu Angleterre mu mivu ya 1400. Ndiy wamana anch muntu ni muntu ufanyidin kutang Bibil. Padingay mwom, antu avud mu Angleterre ading kand kal ateshangap uruu wa Bibil mu mazu mau ma chivadik. Mu muvu wa 1382, John Wycliffe ni antu akwau akarumuna Bibil mu dizu dia Inglish. Bibil wa Wycliffe wijikana nakash pakach pa chisak cha antu chitazukinau anch Lollards (in kwilejend). Antu inay akata Bibil. Endangana ra pansh mu ul ni ul mwi ngand yawonsu ya Angleterre. In kwilej inay ayitangina antu Bibil ni anyinkishola antu yikunku ya Bibil yafundau ku makas. Mu yitot ya mivu yalondulaku, antu avud mwi Mputu ni mu jingand jikwau ja pa mangand mawonsu asambisha kukarumun ni kuchap Bibil mu mazu kushalijan mafanyinau kutesh kudi antu avud. w17.09 18-19 par. 10-12

Anch mband kimishinap, ukutwish kwov ushon nakash. (Jnsw. 13:12) Pakur, chading cha usey nakash kudi amband kuyat ni kuval an. Chawiy Rachel, mband wa Jakobu, wova ushon nakash mulong katwishap kwimish ap anch yayend mband wading uvadin. (Dis. 30:1, 2) Pakach pa milong yikutwishau kwikal nich ambay a uruw padi rufu ra mbay umwing wa uruw. Ap anch akutwish kutong anch chinech chikutwishap kuyishiken, ambay a uruw avud ajijamedin kal mulong winou ukash. In Kristu itiyijining kamu mu kushilamu kwa divumbuk, ni chinech chikat kuyongoj nakash. (Yoh. 5:28, 29) Mu Dizu diend, Tatukwetu Yehova washidinamu kal yom yivud yikata kutwongoj mu yisu ya mar. w17.06 3 par. 1; 4-5 par. 6, 9

Chisu chimwing, Nzamb wimekesha kudiay Moses palonday mulong wa dijin Diend ni mikadil Yend yimwing. Yehova wafanyina kukasikeshin pa usu wend ap manangu mend, pakwez walonda chakusambish piur pa riy ni ranaken rend. (Kub. 34:5-7) Moses waswirikena kwijik anch Yehova ukutwish kumukwash. Chawiy Yehova wakasikeshina mikadil yimekeshina anch ukatining kamu kuyikwash atushalapol end. (Kub. 33:13) Ap anch atutanga mulong wa kumekesh ranaken, tudi antu akad kuwanyin ni tukweting maswir ma choy. Yisu yimwing chiswapelingap kukwat mupak anch tukuyikwash antu akwau ap anch tukwitongin ayinetu. Yom ik yikutwisha kutukwash kwipan nakash kudi akwetu? Chakusambish, itekina chisu mulong wa kushinshikin mutapu wamekeshay Yehova nau antu akwau ranaken. Cha kaad, shinshikin mutapu ukutwisha kwimburij ranaken ra Nzamb ni mulong wak chidi chiwamp kudi ey kusal mwamu. w17.09 9 par. 1; 10 par. 3

Usu tusadina mulong wa kudjal wuntu usu ufanyidin kumutumbish Yehova, kadiap mulong wa kututumbish kudi antu akwau. Vurik anch ap angel ading awanyidina ikala ni chibud ni asala chitil. (Ilikej ni Ezekiel 28:17.) Mulong tudi antu akad kuwanyin, chikutwish kutukasiken kwipuk chibud. Pakwez, tukutwish kudjal kwikepish. Yom ik yikutukwasha kusal mwamu? Chom chimwing chikutwisha kutukwash kwikal ikepishina kudi kutang Dizu dia Nzamb dichuku diawonsu ni kutongijokin pa yom tutangina. (Kuv. 17:18-20) Tufanyidin pakampwil kutongijokin nakash piur pa yom yatufundishay Yesu ni chilakej chend chiwamp cha kwikepish. (Mat. 20:28) Yesu wading wikepishin ni wayowisha in kwilejend ku mend. (Yoh. 13:12-17) Chom chikwau tukutwisha kusal kudi kumulembil Yehova mulong wa spiritu wend. Spiritu wend ukutwish kurish ni yitongijok ya kwiyov anch tudi awamp nakash kusutamu akwetu.—Gal. 6:3, 4. w17.08 24 par. 11-12

Pamwing ap yisu yimwing mu mwom wetu twita ukwash wa Nzamb mulong atukwasha kukwat mupak ni twiyova anch twading kulondul ukwash wa spiritu utumbila. Pakwez kupwa kwa yiney, twikala ni milong yivud ni twasala kuswimp nakash mu mwom wetu. (Mul. 9:11) Yom ik yikutwisha kutukwash chakwel kangal ‘twiyakamisha piur pa chom chawonsu’ pakwez twikala ni “chisambu cha Nzamb”? Mazu ma Paul kudi in Filip mamekeshin anch ang twiyakamishin piur pa mulong, kulembil kudi kwa usey nakash. Chawiy anch twikal ni yakamish, tufanyidin kutek yakamish yetu mu malembil. (1 Pita 5:6, 7) Anch wamulembil Yehova, ikal kamu nich kashinsh anch ukat kukubangin. Mujikitisha chisu chawonsu mulong wa yiyukish utambwila. Ni kangal wavuramen anch Yehova ukutwish “kusal yom yivud yipandakena yipul yetu ap yom yitutongila.”—Efes 3:20. w17.08 10-11 par. 4, 6; 12 par. 10

In Kristu avud asambisha mudimu wa uchibol padingau achid ansand. Ov, ukutwish kwambamb ni amwing a pakach pau piur pa mipak yey? Akadivar nau anambaz inay akukulej anch kusal mudimu wa uchibol kudi kufumb kukukwasha mu mwom wey wawonsu. Yesu wileja yom yivud nakash kudiay Tatukwend padingay mwiur. Kupwa, chisu chasalay mudimu wend panap pansh, wadandamena kand kwilej. Wovang musangar palejanangay rusangu ruwamp kudi antu akwau ni walama kujijaman mu yisu ya mar. (Isay 50:4; Heb. 5:8; 12:2) Yesu watuleja kuya ‘kwikadish in kwilej’ ni kuyifundish antu. (Mat. 28:19, 20) Anch utenchikin kusal mudimu winou mu mwom wey wawonsu, ukwikal ni mwom usangareshina umutumbishina Nzamb. Mudi muding midimu yawonsu, ukwet kuswir kwa chisu mulong wa kwikal ni ukaliweny. w17.07 22-23 par. 6-7

Pakad kwidjidjek, musul wa kusambish wa rongoj udi Tatukwetu udia mwiur ukweta ranaken, Yehova. (2 Kor. 1:3, 4) Antu akweta ushon akutwish kand kutan rongoj mu chikumangen cha win Kristu. (1 Tes. 5:11) Mutapu ik ukutwisha kuyikasikesh ni kuyongoj antu akweta “muchim wa runeng”? (Jnsw. 17:22) Vurik anch kudi “chisu chimwing cha [kuninet], kudi chisu chikwau cha kulond.” (Mul. 3:7) Mwadia mufu umwing dijin diend Dalene ulondin anch antu akweta ushon aswirikedin kulejan yitongijok yau ni mutapu wiyovilau. Pakwez chom cha usey nakash ukutwisha kusal kudi kumutesh pakad kumukaturij. Junia, ukweta mpanyend wijipa ulondin anch: “Ap anch ukutwishap kupwish ushon wa antu anenganena, cha usey nakash chidi anch ukatin kutesh mutapu wiyovilau.” Vurik kand anch, muntu mwin mwawonsu kakatap kumekesh ushon mu mutapu umwing. w17.07 10 par. 3; 11-12 par. 11-13

Kudi antu avud nlel, mulong ujim kudi awiy jidi nfalang. Akat kutongin nakash piur pa nfalang ni kwiyakamish nakash. Akat kusutish chisu chau mulong wa kusal usu wa kukimb nfalang jivud ni kulam jikwetau. Kudi antu akwau, mulong wa usey kudi awiy madi majuku mau, ukash wa mujimbu ap yom yikatinau kuwanyish mu mwom wau. Kudi mulong upandikena kujimb nakash kusutamu milong yiney. Mulong winou udi wa kukwash ukaleng wa Yehova. Chidi cha usey anch tudandamena kushinshikin nakash pa mulong winou. Anch tubabelap, tukutwish kukwatikan nakash ni yom ya mwom wetu ya dichuku diawonsu ap kwiyakamish piur pa milong yetu yikusala anch tuvuramena usey ukweta mulong winou. Anch twakwash ukaleng wa Yehova, tukutwish kamu kurish ni milong yetu ya dichuku diawonsu ni tukusej piswimp ni Yehova. w17.06 15 par. 1-2

Yehova ukat kusadin usu wend chisu chawonsu mu mutapu wa rukat. Antakel a majuku ni amakurump akatina ukaleng wa Yehova akumwimburij Yehova ni kakusadinap wintakel wau mu mutapu uyimp ap wa kusop nayimp. Kambuy Paul wasala usu nakash wa kumwimburij Nzamb ni Mwanend. Kayovishap antu akwau usany ap kuyishindil mulong asala yom yiwamp. Pakwez, wayikasikesha nich ranaken chakwel asala yom yiwamp. (Rom 12:1; Efes 4:1; Flm. 8-10) Mu kusal mwamu, Paul wamwimburija Yehova. Anch twayisadil akwetu yom nich rukat, tukwashin ukaleng wa Yehova. Tukat kukwash kand winyikel wa Yehova anch twayilimish ni twovijan nawamp nau antu atekinay kal mulong wa kututakel. Ap anch tuteshinap nawamp ap kwitiy mipak yikwatinau, tukudandamen kuyikwash. Chinech chishalijadin ni mutapu usadikina yom mu mangand, pakwez etu yawiy tusadining anch twamwitiy Yehova mudi Nyikel wetu.—Efes 5:22, 23; 6:1-3; Heb. 13:17. w17.06 24-25 par. 14-15

Akadivar nau anambaz aziyina, adia mu yakamish, ap arishina ni milong yikwau akwet kuswir kwa kuyibangin, kuyikasikesh ni kuyongoj. (Jnsw. 12:25; Kol. 4:11) Tumekeshining anch tuyikatin ‘anamakwetu mu ritiy’ kusutin yom tulondining ni tusadining. (Gal. 6:10) Bibil walonda anch mu “machuku ma kwisudiel” kwa mangand minam mayimp, antu akez kwikal in kwikat ayinau ni in kukat nfalang ni yom ya ku mujimbu. (2 Tim. 3:1, 2) Mudi in Kristu, tufanyidin kusal usu nakash wa kudandamen kukudish rukat retu mudiay Yehova, mu Dizu diend ni kukatijan umwing ni mukwau. Mulong tudi antu akad kuwanyin, yisu yimwing tukutwish kulik kovijan nau akadivar netu. Pakwez mulong tukatijadin umwing ni mukwau, tufanyidin kusal usu wa kupwish milong yin yawonsu mu mutapu uwamp ni pakad kulab. (Efes 4:32; Kol. 3:14) Chawiy, el tudandamenany kwikal ni rukat rijim mulong wa Yehova, Dizu diend, ni mulong wa akadivar netu. w17.05 19-20 par. 17-18

In Kristu akat kuchingej kuman kuburen kutentam kumwing pol pa chikumangen cha win Kristu. Pakwez, ritiy retu akutwish kuripak anch twaman yom yimekena anch yidi yakad kutentam yasadik mukach mwa chikumangen. Anch yom yiney yashiken, mutapu ik ukusala? Ukulik anch yom yiney yikupwakesh? Mulong etu awonsu tudi antu akad kuwanyin ni tukat kurumbok, chawiy chikutwish chashiken anch muntu atusadin mu mutapu wakad kutentam ap niyetu tukutwisha twamusadin muntu mukwau mu mutapu wakad kutentam mu chikumangen. Ap anch yom yiney yishikedining pachipatu, in Kristu ashinshamena kakushimokangap ap kwipwakal anch kuburen kutentam kwashiken. Yehova watwinkisha kal yiyul ya kusadin yidia mu Bibil chakwel yitukwasha kushal ashinshamena anch twaman kuburen kutentam kudi akadivar nau anambaz netu.—Kus. 55:12-14. w17.04 16 par. 4-5

Anch watijadin ni muntu wakad kumusadin Yehova, chom chinech chikutwish kulet minan ni yakamish nakash mu uruw wey. Pakwez, chidi cha usey anch umana mulong wey mudi mutapu uumenay Yehova. Ulondin anch tukutwishap kwaurik ap kujip uruw ni mbay netu wa uruw mulong kamusadidinap Yehova. (1 Kor. 7:12-16) Anch nfumwey kamusadidiningap Yehova ni kasangarediningap difukwil diakin, ufanyidin kudandamen kumulimish mudi mutu wa dijuku diey. Anch mukajey kamusadidiningap Yehova, ufanyidin kudandamen kumukat ni kumubangin nakash. (Efes 5:22, 23, 28, 29) Yom ik ufanyidina kusal anch mbay ney wa uruw wakutekin mimbu ku difukwil diey? Ikundj wa nambaz umwing wamuleja nambaz winou anch ufanyidin kusadin machuku mamwing mu rubing mulong wa kusal mudimu wa kulejan. Anch yom mudi yiney yakushiken, iyipula anch: ‘Ov mbay nam wa uruw winkangeshin kamu kumwifukwil Yehova? Anch bwat, nikutwish kamu kusal yom yinlejinay mbay nam wa uruw?’ Anch udi muntu wisikena, ukwikal ni milong yikemp mu uruw wey.—Filip 4:5. w17.10 10-11 par. 7-8

Mudi mwasambelau kulond, antu ‘a mazu ma michid yawonsu’ ezin mu dirijek dia Yehova. (Zak. 8:23) Anch anen kateshinap nawamp dizu ulondiningana, chikutwish kukukasikenany kuyifundish uyakin. An awiy in kwilejen a Bibil a usey nakash ufanyidinanya kwikal nich, ni ‘kumwijik’ Yehova kudi awiy chirumburikin mwom wau wa chikupu. (Yoh. 17:3) Pakwel anch mwanen ijika mafundish ma Yehova, ufanyidinany “kumisambangany” chisu chawonsu. (Kuv. 6:6, 7) Anen akutwish kwilej pamwing ap dizu dia ngand yidiau ku shikol ap kudi antu akwau. Pakwez akwilej dizu dien anch wambambiningan nau chisu chawonsu. Anch anen ij kulond dizu dien, chikuyiswapel kwambamb niyen ni kukulejany mutapu wiyovilau. Pakwez kudi kand kutaninamu kukwau. Anch anen asambish kulond mazu mavud, akuwapish mutapu wau wa kutong ni chikuyikwash kutesh nawamp yitongijok ya antu akwau. w17.05 10 par. 5-6

Amasalay a Jabin ading ni matemb ma njit 900 makweta makupkup ma utad ujal, pakwez in Isarel kadingap ni mat mulong wa kurish nich ap nkibu ja kwiking nich ayinau. (Ank. 4:1-3, 13; 5:6-8) Chawiy, Yehova wamwinkisha Barak mbil jidia kwiur oku. Mu kuyifanikesh nau amasalay a Jabin, in Isarel amekana anch aziyin ni aswapel kuyiwin. Kupwa Barak nau antwend aya kurish njit nau amasalay a akankuny nau kwi ndond yitazukinau anch Tanach. (Ank. 4:14-16) Yehova wayikwasha in Isarel? Mwaning. Kapamp kamwing kweza rinkind wa ruval ni ndond ya kurishin njit yading yiumina yikala malau. Chinech chayikwasha in Isarel kuwin. Barak wayilondula amasalay a Sisera mu ma kilometre 24, mwi njil yawonsu kushik ni kwi ndond kutazukinau anch Haroset. Ndond yimwing mwi njil ditemb dia Sisera diajama mu malau. Wadiokala pa ditemb ni wachin mau waya ku Zanamin, piswimp ni ku Kadesh. Kwinikwa Sisera waya kujingam mu mwinkand wa mband utazukinau anch Jayel. Sisera wading waziyang kal nakash ni walala tul. Pading palelay, Jayel nich kutakaman wamujipa. (Ank. 4:17-21) Yehova wayikwasha kamu in Isarel kuyiwin akankuny nau! w17.04 29 par. 6-8

Kupwa kwa Armagedon, kukwikal kand ditenchik dikwau panap pansh? Bibil ulondin anch: ‘Etu tukat kuchingej maur masu ni mangand masu mudi mwashilayimu Nzamb. Chad mwinimwa mwawiy mukeza kwikal kutentam.’ (2 Pita 3:13) Maur ni mangand makur mawiy mant mayimp ni antu atakedinau. Kupwa kwa kumadiosh, yom ik yikumaswinkana? “Maur masu ni mangand masu.” Maur masu marumburikin Want usu, usadinau kudi Yesu nau antu 144 000 akuyikela nend pamwing. Divu disu dirumburikin antu akuyikelau kudi Want wa Nzamb. Yesu nau antu akuyikela nend akumwimburij kamu Yehova Nzamb, udia Nzamb wakad kanvundangesh. (1 Kor. 14:33) Chawiy “mangand masu” akumatenchik nawamp. Mukwikal antu awamp akulama yom nawamp. (Kus. 45:16) Antu inay akuyitakel kudi Kristu nau antu 144 000. Tongin chisu chikupwa yitenchik yiyimp ni kuyiswinkan kudi ditenchik dimwing dikweta antu adia mu umwing ni kakutwishap kudiyipish! w17.04 12-13 par. 8-9

Uruw chidi chom chitumbila. Yehova umening machip ma uruw mudi mulong ukash nakash. Anch ngatan ni ngachik achip, ashilamu kal kurutu kwa Yehova ni kurutu kwa antu awonsu adiap. Akat kushilangamu yisu yawonsu anch akumekeshijadin rukat, kulamijan nawamp, ni kulimishijan umwing ni mukwau chisu chikushakamau pamwing panap pansh mu uruw mudi mwatenchikay Nzamb. Amwing kakutwishap kamu kulond mazu minam mudi mu mafundinau, pakwez akutwish kudandamen kulam kuchip kwau kurutu kwa Nzamb. Anch asal machip minam akutwish chadi kwikal ikundj ni mband atijadina. Uruw urumburikin kushakam pamwing machuku mawonsu. (1 Kor. 7:39) Yesu walonda anch: “Muntu kafanyidinap kwauril antu abombakeshay kal Nzamb.” Ambay a uruw atijana kal kafanyidinap kutong ang anch uruw wau wendinap nawamp, afanyidin kulikijan. (Mar. 10:9) Chawiy, mulong tudi antu akad kuwanyin, kwikiling uruw uwanyidina. Chawiy chilondinay Bibil anch antu atijadina “akez kuman mar” yisu yimwing.—1 Kor. 7:28. w17.04 8 par. 14-15