Ngond wa 8

Anch tukatin kwikal alej awamp, tufanyidin chakusambish kwikal in kwilej awamp. (1 Tim. 4:15, 16) Chilik chimwing, anch udi muntu usadidinau kudi Yehova mulong wa kuyipup antu akwau, ufanyidin kushal wikepishina ni kwitiy anch Yehova akutakela mu mwom wey. Anch antu akwau aman anch udi wikepishina, akukulimish ni chikuyiswapel kwitiy yiyul yey. Tukutwish kwilejin kusutin chilakej cha Yesu. Yesu wamuziyinang Tatukwend chisu chawonsu, ap anch chading chikasiken yisu yimwing kusal mwamu. Wayivurisha in kumutesh anch mafundish ni manangu mend mading madiokil kudi Tatukwend. (Yoh. 5:19, 30) Yesu wading wikepishina ni uziyidina, ni chinech chamukwasha kwikal mulej mwin ranaken. Antu a kashinsh asangerang kwikal pamwing ni ndiy. (Mat. 11:29) Mazu mawamp ma Yesu mayikasikesha antu ading aziyina. (Mat. 12:20) Wayikanda atwimbuy end mu mutapu uwamp ni wa rukat ap anch wajimana mulong atadikijana mulong wa kwijik nany wading mukurump nakash pakach pau.—Mar. 9:33-37; Luka 22:24-27. w18.03 25 par. 15-16

Pita wafanikesha dibatish ni kusal waat mu chirung cha Nowa. Waat wapana uman wakin kudi antu akwau anch Nowa wipana kamu ni muchim umwing mu kusal rusot ra Nzamb. Nowa wasala nich kushinshaman mudimu wamwinkishau kudi Yehova kusal. Mulong wa ritiy ra Nowa, Yehova wamupandisha ni wapandisha dijuku diend chisu cheza Mabeb. Pamanau antu waat, ijika anch Nowa ukwet ritiy mudiay Nzamb. Pameningau antu anch muntu watambul dibatish, ijing anch wapan kal mwom wend kudiay Nzamb mulong wa ritiy rend mudiay Kristu. Mudi Nowa, antu atambwiling dibatish amuziyidining Nzamb ni kusal mudimu wayinkishay anch asala. Mudi mwamupandishau Nowa kudi Yehova chisu cheza Mabeb, ukupandish kand atushalapol end ashinshamena atambwila kal dibatish chisu chikusheshay mangand minam mayimp. (Mar. 13:10; Kuj. 7:9, 10) Chidi kamu cha usey nakash kupan mwom wetu kudi Yehova ni kutambul dibatish. Chawiy, anch muntu walab kutambul dibatish, ukutwish kushadish ruchingej ra kushakam chikupu. w18.03 4 par. 3-4

Anvaj amwing atongining anch ang mwanau katambwilap dibatish, kakutwishap kumwopat. Pakwez uyimp ik udiaku mu kutong mwamu? (Jak. 1:22) Chakin kamu, anvaj kakatiningap anch anau atambula dibatish kurutu kwa awiy kupan mwom yau kudi Yehova. Pakwez chikwikal chiyimp kutong anch mwan kakutwishap kupan kuchind kudi Yehova anch katambwilap dibatish. Mwan ukat kupan kuchind kudi Yehova chisu chikatay kwijik yom yilondinay Yehova piur pa uwamp ni uyimp. (Jak. 4:17) Anvaj in manangu kakatap kuyikangesh anau kutambul dibatish. Ap anch mwan uchid kal mukemp, akat kumufundish kukat yom yilondinay Yehova anch yidi yiwamp ni kukis yom yilondinay anch yidi yiyimp, mudi musadinau niyau anvaj. (Luka 6:40) Rukat ra mwaney mulong wa Yehova rikumuchidij kusal yitil yijim, mulong ukukat kusal yom yilondinay Yehova anch yidi yiwamp.—Isay 35:8. w18.03 12-13 par. 12-13

Nowa wasala mwamu mu mivu yikwau 350 kupwa kwa Mabeb. (Dis. 9:28) Nowa wading chilakej chiwamp cha ritiy ni cha kuziyin! Tukutwish kwimburij ritiy ni kuziyin kwa Nowa chisu tukata kulondin chitongijok cha Yehova piur pa yom yiwamp, chisu tukata kulik kwiyandjik mu mangand ma Satan ni chisu tukata kumutek Yehova pa ndond ya kusambish. (Mat. 6:33; Yoh. 15:19) Chakin kamu, mulong wa mayingishin minam, mangand makat kutukis. Chilakej, mulong tukwatin mupak wa kuziyin yijil ya Nzamb piur pa kumanijan kwa ikundj ni mband ni piur pa uruw, antu akutwish kutulond yom yiyimp ku ma radio, televizion ap mu ma jurnal. (Mal. 3:17, 18) Mudi Nowa, tukatap kwov wom wa antu. Tumwoviling Yehova wom, charumburik anch tukwet kalimish kakurukina mulong wendendiy ni tukatinap anch tumurumbukina. Twij nawamp anch ndiy kwend Muntu umwing ukutwisha kutwinkish mwom wa chikupu. (Luka 12:4, 5) Iyipula anch: ‘Ov, nikudandamen kusal yom yidia yiwamp ku mes ma Nzamb ap anch antu akwau ansip ap anlond nayimp? Nichingejin anch Yehova ukutwish kuwanyish maswir ma dijuku diam, ap anch chikasiken kuman nfalang?’ Anch wamuchingejin Yehova ni kumuziyin mudi mwasalay Nowa, ukutwish kwikal nich kashinsh anch Yehova ukukulam.—Fil. 4:6, 7. w18.02 4 par. 4; 5 par. 9-10

Muntu wa ku mujimbu ukweting chitongijok cha mangand, chimedina pa maku mayimp ma ku mujimbu. Paul warumburila mwikadil winou mudi ‘spiritu ukata kuyikel pakach pa an in kubwambwil.’ (Efes 2:2) Mwikadil winou ukat kuyibachik antu avud kuyimburij antu ashichau nau. Akat kusal yom yimenau ku mes mau anch yiwapin pakad kushinshikin mbil ja Nzamb. Muntu wa ku mujimbu ukat kutong nakash pa yom ya ku mujimbu ni kutong anch ndond yikwetay, nfalang ap usu ukwetay yidi ya usey nakash kusutamu yom yawonsu. Muntu wa ku mujimbu ukat kusal yisu yivud yom yitazukinay Bibil anch ‘yisalijok ya ku mujimbu.’ (Gal. 5:19-21) Mu mukand wa kusambish wa Paul kudi in Kristu a ku Korint, wafundamu yom yikwau yisadiningau antu a ku mujimbu. Akat kwiyandjik mu matend, kusal usu wa kwauril antu, kuyibachik antu akwau kubwambwil, kufundijan ku dirumburish, akat kuyiburen kalimish antu atakedina ni amening yakudia ni kuna mudi yom ya usey nakash mu mwom yau. Muntu wa ku mujimbu kakatap kujijaman anch amupak mulong wa kusal yom yiyimp.—Jnsw. 7:21, 22. w18.02 17 par. 3-5

Chidiap chiyimp kusanger mwom mu mutapu uwamp. Antu amwing itiyijin anch chifanyidinap kwisangaresh ap pakemp, pakwez kimwauyap mukatinay Yehova mulong wetwetu. Bibil uyikasikeshin atushalapol a Nzamb ashinshamena anch: “Yang, ukadia yakudia yey nich musangar ni kuna maar mey ma nviny nawamp.” (Mul. 9:7) 2 Timote 3:4 ulondin piur pa antu akatina misangar ni amulikining Nzamb mulong wa mashakamin mau. Ijik anch verse winou kalondinap anch antu akukat misangar nakash kusutamu kumukat Nzamb. Chinech chikutwish kurumburik anch akutwish kumukat Nzamb pakemp. Pakwez verse ulondin anch ‘pa ndond pa’ Nzamb. Mwin manangu umwing wafunda anch verse winou “karumburilap kamu anch akez kumukat Nzamb mu chilik kampand. Pakwez urumburikin kamu anch kakez kamukatap kamu Nzamb ap pakemp.” Kwinoku kudi kamu kubabesh kwa usey mulong wa antu akatina misangar. Bibil urumburil antu akatina misangar anch adi mudi antu “apwepodinau” mulong wa misangar ya mwom.—Luka 8:14. w18.01 25 par. 14-15

Yehova udi Nzamb mwin kupan. Yom yawonsu tukweta yidiokil kudi ndiy. Yom yawonsu yiwamp yidia pa divu yidi yendendiy ni ukat kuyisadin mulong wa kukwash mwom. (Kus. 104:13-15; Age 2:8) Chilakej, Yehova waleta mana ni mem mulong wa muchid wa Isarel chisu chadingau mwi mpay mu mivu 40. (Kub. 16:35; Neh. 9:20, 21) Kupwa, Yehova wamwinkisha muprofet Elisha usu wa kuvudish many makemp ma mwadiamufu ushinshamena. Chipan chinech chidiokila kudi Nzamb chamukwasha kufut mabaz ni washala kand ni nfalang jivud jamukwasha ndiy nau anend kwikal ni mwom. (2 Ant 4:1-7) Nich ukwash wa Yehova, Yesu wasala chilay mulong wa kulet yakudia ni nfalang pa chisu cha maswir. (Mat. 15:35-38; 17:27) Yehova ukutwish kusadin chom chin chawonsu chitondinay chakwel akwasha yitang yend. Chawiy, uyitin atushalapol end amwinka yom yikutwishau mulong akwasha mudimu wa dirijek diend.—Kub. 36:3-7. w18.01 15 par. 1-2; 16 par. 3

Wiyovilap kal chisu chimwing anch milong yiukweta yikukasikedin kuyijijamen? Anch wiyovil mutapu winou, udiap amwiney. Atushalapol amwing ashinshamena a Nzamb a pakur niyau iyova mutapu wawiy umwing. (Job 7:7) Chom ik chayikwasha chakwel adandamena kujijaman? Amuchingejina Yehova mulong wa kuyikasikesh. Bibil ulondin anch Nzamb “ukat kupan usu kudi uziyina.” (Isay 40:29) Cha ushon, antu a Nzamb amwing amening anch mutapu uwamp wa kujijamen milong yau yikwetau mu mwom udi wa kulik kumusadin Yehova mu chisu chimwing. Akat kutong anch kumusadin Yehova chidi chisend chilimina pa ndond pa kwikal chiyukish. Chawiy akat kwimik kutang Bibil, kuya ku yikumangan, ni kulik kusal mudimu wa kulejan. Chinech chawiy chikatinay kamu Satan anch asala. Djabul kakatinap anch etu twikal ni usu. Ni wijing anch tukweting usu nakash chisu tukwatakening nakash mu mudimu wetu tumusadidina Yehova. Chawiy, chisu umena anch wovil kuziy ku mujimbu ap mu yitongijok yey, kangal umuchina Yehova. Sej piswimp kudi ndiy. Bibil ulondin anch: “Ukez kukupizurishany, ni kukukasikeshany.”—1 Pita 5:10; Jak. 4:8. w18.01 3-4 par. 2-3

Divumbuk dia kaad diasadika dilejenau mu Bibil adisala kudi muprofet Elisha. Mu musumb umwing watazukau anch Sunem, mwading mband umwing mwin Isarel kavalangap. Mulong wamwakang Elisha nawamp nakash, Yehova wamuyukisha mband winou ni nfumwend ipal ni mwan a nfumwend. Kupwa kwa mivu yikemp, mwan a nfumwend wafa. Tongin mutapu wovay maku winou ushon. Ushon wend wading upandaken nakash chawiy chasala anch aya mu weny wa makilometre 30 mulong wa kumukimb Elisha ku Mukandu wa Karimel. Elisha wamutuma Gehazi kurutu kwau, muntu wend wa mudimu ku Sunem mulong wa kumuvumbul mwan. Pakwez Gehazi katwishap kumuchirish mwan winou kwikal mwom. Chawiy maku winou ukweta ushon washika ku chikumbu chend ni Elisha. (2 Ant 4:8-31) Elisha wandama mu chikumbu mwading mujimbu wa mwan wading wafang kal, ni walembila. Yehova wakula ku malembil ma Elisha ni kusutin chilay, wamuchirisha mwan kwikal kand mwom. Pamanay maku winou mwan udi mwom, wasangara nakash! (2 Ant 4:32-37) Mu kumulangwish mwan nsand wa ku Sunem, Nzamb wamekesha anch ukwet usu wa kuvumbul afu. w17.12 4-5 par. 7-8

Manangu chidi chinyim cha usup, manangu chidi chijingidij cha kuswa. Muntu ukat kuswa mu spiritu mulong umwovil Yehova wom ni umuziyidin, kadiap kwau mulong uyil kwikal ni mivu yivud. (Kus. 111:10) Ansand aswila kal mu spiritu kadiap antu akatau ‘kusendolau kudi mambek, ap akupwepolau kudi rinkind kuya mutambu ni mutambu’ mu kukat kwau ayinau ap mulong wa yibachikin ya ansand akwau. (Efes 4:14) Pakwez, ‘usu wau wa kutond aufumbin kal mulong wa kwauril kuwap ni kuyip.’ (Heb. 5:14) Chawiy akat kukwat mipak ya manangu. Manangu ma mutapu winou madi ma usey nakash mulong wa dipandish. (Jnsw. 24:14) Chawiy, ufanyidinany kwikal nich kashinsh anch ij yom ukwatinanya nich usey. Kusutin yom ulondinanya ni usadinanya, anen akuman anch usadinany usu wa kushakam kukwatijan ni mbil ja Yehova.—Rom 2:21-23. w17.12 18 par. 12-13

Kulond anch antu akutwish kupwish milong yau ayinau kuyisangareshining antu nakash. Mulong wak? Anch chidi chakin, chikutwish kumekan anch tukwetap kwetu kuswir kwa ukwash wa Nzamb ni tukutwish kwetu chad kusal yom yawonsu tukatina. Ukutwish kutesh antu alond lel anch yom mudi njit, chisum, mayej, ni uzwendj yakepin. Rapor umwing ulondin anch: “Diyingishin dimekeshina anch ngand yiyil mu kuwap didi anch antu akwatin mupak wa kusal anch ngand yikala ndond yiwamp.” Anch watesh chitongijok chijikena nakash chimekena anch chikuletish milong ku ritiy rey, ufanyidin kwijik yilondinay Bibil pa mulong winou. Ambamb mulong winou ni mukadivar ap nambaz waswila kal. Tong mulong wak antu akatin chitongijok chinech, mulong wak chidi cha makasu, ni mutapu ukutwisha kuchilik. Tukutwish kwichidij ayinetu ku yitongijok ya mangand mu kusal yom yalonday Paul mu mufund wa nlel. w17.11 25-26 par. 14, 17

Chisu chading chitongijok cha Yesu? Afaris ‘ayidiwolang antu akwau anch adi a chamwamu,’ ni ading atongin anch kakwetap kwau kuswir kwa kuyovil riy. (Luka 18:9-14) Mwimburija Yehova, kangal Afaris. Mekesh riy ni ranaken. (Kol. 3:13) Sal anch chiyiswapela antu akwau kukwit dilikishin. (Luka 17:3, 4) Iyipula amwiney anch: ‘Nikat kuyilikishin akwetu pakad kulab, ap anch anrumbukin tupamp tuvud? Ov, nikwet rusot ra kusal chisambu ni muntu wanrumbukidina ap wansadina nayimp?’ Chakwel tulikishina, tufanyidin kwikal in kwikepish. Afaris atongang anch akwet usey nakash kusutamu antu akwau, chawiy kakatangap kwau kulikishin. Pakwez chitudia in Kristu, nich kwikepish tukat ‘kuyiman akwet mudi adi awamp’ kutusutamu ni kuyilikishin kamu. (Fil. 2:3) Tukutwish kwiyipul anch: ‘Nikat kumwimburij kamu Yehova ni kumekesh kwikepish?’ Anch tudi ikepishina, chikuyiswapel akwetu kutwit dilikishin ni chikutuswapel niyetu kuyilikishin. Swakalang kumekesh riy ni kangal kujimanang swa.—Mul. 7:8, 9. w17.11 17 par. 6-8

Ukutwish kwov usany anch wafanikesh mutapu wey wa kuwang ni wa antu akwau. Chad ukat kwov usany ap kwiman anch wijap kwey kuwang. Pakwez etu awonsu tukwet chisend cha kuwang mulong wa kumutumbish Yehova. Komb zambul buku wey wa miminy piur, ni zambwish mutu wey piur, ni sambish kuwang nich musangar! (Esi. 3:11) Yot ya Want yivud nlel yikwet matelevizion mamekeshina mazu ma miminy yetu, ni chinech chikutwish kukukwash ey kuwang nich dizu piur. Chidi kand cha musangar anch kuwang miminy ya Want chidi katat chikunku cha Shikol ya Mudimu wa Want mulong wa amakurump a chikumangen. Chinech chikasikeshidin usey ukwetau amakurump mulong wa kutakel miminy ya chikumangen ku yikumangan. Antu avud akweting wom wa kuwang mulong akweting wom anch akutwish kulet murumbu ap mulong kakwetap kwau dizu diwamp. Pakwez, tonginany pa chom ech. “Etu awonsu tukat kurumbok [tupamp tuvud]” pitukata kulond, pakwez tukatap kulikang kulond. (Jak. 3:2) Chawiy, mulong wak tukutwisha kulik anch dizu dietu diakad kuwanyin ditukangesha kuwang miminy ya kumutumbish nich Yehova? w17.11 5-6 par. 9-10

Pading payila kupwa chishimushimu cha sambwad cha Zakariy, wading ni yom yivud ya kutongin nakash. Wafanyina kwiyov ukasikeshinau kusutin ku kushilamu kwa Yehova mulong wa kuyipup antu aburedina win kashinsh. Pakwez, kwikil kwau chom chaswimpa. Antu avud ading adandamedin kusal yom yiyimp ni ya kuburen win kashinsh, ni kutungiril kwa tempel mu Yerusalem kwading kand kal kupwa. Mulong wak in Yuda alika kapamp kamwing mudimu wayinkishau kudi Yehova? Ov, achirika kwau mu Yerusalem mulong wa kuwapish mwom wau? Yehova wading wij anch antu end ading aswirikedin usu ni kutakaman. Wamwinkisha Zakariy chishimushimu cha nsudien mulong wa kuyinkish antu end kashinsh anch uyikatin ni usangaredin usu wau usadinau mulong wa kumusadin. Washilamu anch ukuyichidij anch asambishiril kand mudimu wayinkishay kusal kukwatijan ni mazu madia mu mufund wa nlel. w17.10 21 par. 1; 22 par. 5

Akadivar abatishinau kal niyau aswirikedin kutakaman ni kusal mudimu. Anch ikal ni rusot ra kusal mudi ankwash a mudimu ap amakurump, chikumangen chikutaninamu nakash. (1 Tim. 3:1) Pakwez, amwing akutwish kwidjidjek kusal mwamu. Pamwing ap mukadivar wasala yitil pakur, ni katat ukat kwiyov anch kawanyidinap kwend kusal mudi nkwash wa mudimu ap mukurump wa chikumangen. Mukadivar mukwau ukutwish kwiyov anch kakwetap kwend ukaliweny wa kusal mudimu winou. Anch wiyovil mutapu winou, Yehova ukutwish kukukwash chakwel wikala utakamena. (Fil. 4:13) Vurik chilakej cha Moses. Niyend wiyova anch kadingap kawanyidina kusal yom yamulejau kusal kudi Yehova. (Kub. 3:11) Pakwez Yehova wamukwasha kwikal utakamena ni kusal yom yading ya usey. Mutapu ik ukutwishay mukadivar wabatishinau kal kutan kutakaman mudi kwinoku? Ukutwish kulembil kudi Yehova mulong wa ukwash ni kutang Bibil dichuku diawonsu. Ukutwish kand kutongijokin pa yilakej ya antu a mu Bibil amekesha kutakaman. Ukutwish nich kwikepish kuyilej amakurump mulong amufumba ni apana ukwash ku chikumangen mu mutapu kanang ukwetau nich kuswir. w17.09 32 par. 19

Bibil amupepila kudi Nzamb. Pakwez chinech chirumburikinap anch mudimu wasalau mulong wa kukarumun Bibil wa Septante, Bibil wa Wycliffe ni Bible du roi Jacques, ap Bibil mukwau, aupepila kudi Nzamb. Chikwau kand, anch twashinshikin ma Bibil minam makarumunau, chimeken kamu patok anch Dizu dia Nzamb didandamendin kwikalaku, mudi mwashilayimu Yehova. Chinech chikasikeshin ritiy retu anch chom chin chawonsu chikushilayimu Yehova, chikuwanyin (Jos. 23:14) Pitwilejina mutapu walamay Yehova Dizu diend, ritiy retu mudiay ndiy ni rukat retu yikat kukasikan. Mulong wak Yehova watwinka Bibil pa ndond ya kusambish ni kupwa washilamu anch ukumulam? Mulong utukatin ni ukatin kutufundish chakwel ayinetu tutaninamu. (Isay 48:17, 18) Chom chinech chitubachikin kumukat ni kumuziyin.—1 Yoh. 4:19; 5:3. w17.09 19 par. 13-14

Chikutwish kwikal chikasikena nakash kuyifumb aney kulondul mbil yiney anch mbay ney wa uruw kamusadidinap Yehova. Pakwez yom ik ukusala anch mbay ney wa uruw kalimishinap mbil ja Bibil? Ukutwish kuyitekin aney chilakej chiwamp mu kumulimish mbay ney wa uruw. Tongin piur pa mikadil yend yiwamp, ni muleja mbay ney wa uruw anch umujikitishin mulong wa yom yend yawonsu yiwamp yisadinay. Kangal walond yom yiyimp piur pa mbay ney wa uruw kurutu kwa aney. Pakwez yirumburila anch muntu ni muntu ufanyidin kutond kumusadin Yehova ap bwat. Anch wayifumb aney kumulimish nvaj wakad kwikal Kaman, chilakej chau chiwamp chikumubachik mbay ney wa uruw kwilej kumwijik Yehova. Angatan amwing akat kuyikangesh akajau in Kristu kuyifundish anau piur pa Bibil ap kuya nau ku yikumangan ya win Kristu. Pakwez ap anch yom yiney yashiken, mband ukusal yom yawonsu yikutwishay mulong wa kuyifundish anend uyakin. (Mid. 16:1; 2 Tim. 3:14, 15) Palimishinay mupak wa nfumwend, ukutwish kudandamen kwambamb nau anend mulong wa yitiyij yend anch chiswapel. Mu mutapu winou, an akutwish kwilej piur pa Yehova ni mbil jend piur pa yom yiwamp ni yiyimp.—Mid. 4:19, 20. w17.10 11-12 par. 9-10

Yehova udi mwin ranaken, ni wayitanga antu mu chifu chend. Chawiy chiding cha chivadik kudi antu kuyibangin antu akwau. Ap antu akad kumwijik Yehova, akat kumekesh ranaken yisu yivud. (Dis. 1:27) Mu Bibil, tutaninamu jinsangu jivud ja antu amekesha ranaken. Chilakej, pakimbay Salomon kwijik mband ik pakach pa amband inay aad wading makwend a mwan, wayipaka palonday anch mubarilany mwan pakach. Makwend a mwan wamwanakena nakash mwan winou, chawiy wamwilembina mwant anch mwinkishay kwey mukwetu. (1 Ant 3:23-27) Chilakej chikwau cha ranaken chading cha mwan mband wa Farao. Pamutanay mwan Moses, ndiy wijika anch udi mwin Hebereu ni akutwish kumujip. Pakwez “wamwovila riy,” ni wakwata mupak wa kumulik mudi mwanend.—Kub. 2:5, 6. w17.09 9-10 par. 2-3

Yehova utwitin anch twikala ikepishina. Kwikepish kuletining yiyukish yivud. (Jnsw. 22:4) Anch tudi ikepishina, chikumangen chikwikal mu chisambu ni mu uumwing. Chikwau kand, Yehova ukutwinkish ranaken rend. Kambuy Pita walonda anch: “En awonsu, djalany kwitudish, mulong . . . Nzamb uyipompatin in kwibaz, pakwez ukat kuyanaken in kwitudish.” (1 Pita 5:5) Mu mangand ma nlel, anch muntu witudishin ni ukat kushimpish muchim, antu akwau akat kutong anch uziyin. Pakwez chinech chidiap chakin. Mikadil yiney yiwamp yidiokiling kudiay Yehova, Muntu ukweta usu nakash mu mangand mawonsu. Ndiy udia chilakej chiwamp nakash cha kwikal witudishina ni ushimpishina muchim. Chilakej, tong mutapu washimpishay Yehova muchim chisu chamwakulay Aburaham ni Lot kusutin angel end. (Dis 18:22-33; 19:18-21) Ni tong kand mutapu washimpishay Yehova muchim chisu chamubwambwilangau kudi muchid wa Isarel mu mivu 1 500 ni kusut.—Ezek. 33:11. w17.08 25 par. 13-14

Chisu chatangau akadivar a ku Filip mukand wa Paul, chom ik chatongau piur pa mukand winou? Avud pakach pau avurika yom yamushikena Paul ni Silas ni mutapu wayikwashau kudi Yehova mu mutapu wakad kuchingejin. Dilejan ik diayifundishay Paul mu mukand wend? Dilejan diading anch: Kangal wiyakamishany. Lembilany ni ukutambulany “chisambu cha Nzamb chisutila ronganyin rawonsu.” Mazu minam marumburikin ik? Ma Bibil mamwing makarumwin anch “chisutil yilat yetu yawonsu” ap anch “chisutil yitongijok ya antu awonsu.” Chawiy Paul wading ulondin anch “chisambu cha Nzamb” chishimokishen nakash mu mutapu wakad kutwish kuchitongin. Yisu yimwing twijingap mutapu ukupwa milong yetu, pakwez Yehova wij. Ni ukutwish kusal yom yakad kuchingejin. (2 Pita 2:9) Mutapu ik tukutwisha kwikal ni “chisambu cha Nzamb” ap anch tukwet milong? Tufanyidin kudandamen kukasikesh urund wetu ni Yehova. Urund mudi winou uswapel kusutin difut dia Kristu Yesu. Difut didi pakach pa midimu yishimokishena ya Yehova. Mulong wa difut, ukutwish kutulikishin yitil yetu ni tukutwish kwikal ni kom kadia zwang ni tukutwish kumusejin ndiy.—Yoh. 14:6; Jak. 4:8; 1 Pita 3:21. w17.08 11  par. 7; 14 par. 15

Yisu yimwing chikasikening kamu kurumburil nawamp runeng tukweta ap ushon twovila. Ap anch muntu wamekesh mutapu wiyovilay, chiswapelingap chisu chawonsu kudi antu akwau kutesh kurumburik kwa yom yikimbinay kulond. Chikutwish kwikal chikasikena kwijik yom ya kumulej muntu ukweta runeng. Yisu yivud, chom cha ukwash nakash ukutwisha kusal kudi ‘kudil nau antu adidina.’ (Rom 12:15) Anch umen anch chikukasikedin kumulej muntu yom ya kumwongoj nich, chiswapel kumutumin mukand ap kumufundin mesaj. Ukutwish kufundap maverse ma kwongoj nich, mikadil yiwamp uvurikina ya muntu wafang ap kumulej yom ya musangar yakushikenanya. Malembil metu makutwish kuyikwash akadivar nau anambaz netu anenganena. Tukutwish kuyilembil ap kulembil nau pamwing. w17.07 12-13 par. 13-16

Shinshikin mutapu umwing ukutwishau ambay a uruw in Kristu kukwash ukaleng wa Yehova. Ambay a uruw kakutwishap kuchingejin anch yom yitonginau yawiy yikusadika. Akutwish pamwing ap kwikal ni milong yikash. Anch chidi mwamu, akutwish kutaninamu anch atongin pa mutapu wayisadinay Yehova in Isarel a pasak. Yehova warumburila anch udi mudi ngatan kudi antu end. (Isay 54:5; 62:4) Muchid winou wamurumbukina yisu yivud Yehova. Urund wau wading mudi uruw udia mu milong yikash. Pakwez Yehova kamulikap swa Isarel. Chawiy, wayilikishina tupamp ni tupamp ni walama kushilamu kwend kudi awiy (Kus. 106:43-45) Ambay a uruw amukatina Yehova akusal usu wa kumwimburij. Ap anch akwet milong mu uruw wau, akat kukimb mu Bibil mutapu wa kupwish milong yau. Ij anch Yehova ukwatin nich usey machip ma uruw ni ukatin anch ikundj ni mband ‘alamata’ kudi umwing ni mukwau. Masandj diawiy kusu diyingishin dia Mifund dikutwisha kujip uruw ni kusal anch mwin Kristu atana ap achika kand. (Mat. 19:5, 9) Anch in Kristu asal yawonsu yikutwishau mulong wa kutwal uruw wau kurutu, akumekesh kamu anch akwashin ukaleng wa Yehova. w17.06 25-26 par. 17-18

Satan Djabul walangwisha mulong wa kwijik anch Yehova ukwet mbil ya kuyikel. Satan wakimba chakwel antu atonga anch Yehova udi nyikel muyimp ni anch kakatinap kuyinkish antu yom yiwamp. Satan walonda kand anch antu akutwish kwikal ni musangar nakash anch iyikel ayinau. (Dis. 3:1-4) Walonda anch kwikil muntu umushinshamedina Nzamb ni anch ang mashakamin makasikan, kwikil muntu ukumwitiya Nzamb kwikal Nyikel. (Job 2:4, 5) Chawiy Yehova walika chisu chisuta mulong wa kumekesh patok kudi antu awonsu anch mwom pakad winyikel wa Nzamb udi kamu wa mar. Chakin kamu, Yehova wij anch kufundan kwa Djabul kudi kwa makasu. Chad mulong wak umushidin Satan chisu cha kumekesh yom yalonday? Chakul chimutadin muntu mwawonsu, ikala mwiur ap pansh. (Kus. 83:18) Adam ni Ev alika winyikel wa Yehova, ni kudiosh pinipa antu akwau niyau asala mwamu. Chinech chikutwish kuyishikij antu amwing kutong anch Djabul uyingin nich. w17.06 16 par. 3-4

Mudimu wa kwikadish in kwilej ukufundishin kwikal ni yaku yiwamp piur pa mudimu, mutapu wa kwambamb nawamp ni mutapu wa kwikal muntu wa kuchingejin ni udimukina. (Jnsw. 21:5; 2 Tim. 2:24) Pakwez mudimu winou ukukuletin musangar wa pakampwil mulong wilejin mutapu wa kumekesh yom witiyijina mu Mifund. Wilejin kand mutapu wa kusal mudimu pamwing ni Yehova. (1 Kor. 3:9) Ukutwish kwikal ni musangar mu mudimu wa kwikadish in kwilej ap anch antu akemp mu teritwar wey awiy akatina kwilej Bibil. Mulong wa kwikadish in kwilej, chikumangen cha kabuj chisadin pamwing mudi chisak. Ap anch mukadivar ap nambaz umwing ndiy watanina muntu udia mwin kwilej, etu awonsu tukwet musangar mulong twipanin mu mudimu wa kukimb. Chilakej, Brandon wasala mivu chidivu mu mudimu wa uchibol mwi ndond mwading antu akemp ilejang Bibil, ulondin anch: “Chidi chakin anch kand kal nilejap ni muntu mu teritwar nidia waya kurutu ni kutambul dibatish, pakwez akwetu asadin mwamu. Nikwet musangar mulong nakwata mupak wa kwipan nakash mu mudimu wa kwikadish in kwilej.”—Mul. 11:6. w17.07 23-24 par. 7, 9-10

Ana wakimbang kuval an chad katwishap. Pakwez, Penina, mukajinend, wavala an avud. (1 Sam. 1:4-7) Mulong wa kupandakesh milong, Penina wasambisha kumuswingish Ana “muvu ni muvu” mulong wa kulik kuval. Chinech chamwovishang Ana ushon nakash. Yom ik yasalay mulong wa kutan rongoj? Wamulembila Yehova. (1 Sam. 1:12) Wijika anch Yehova ukutwish kumwinkish mwan ap kumwongoj mu mutapu ukwau. Mulong tudi antu akad kuwanyin ni tushich mu mangand ma Satan, tukudandamen kwikal mu mar. (1 Yoh. 5:19) Pakwez tukwet ukwash. Tukutwish kulembil kudi Yehova, “Nzamb ukata kupan kwongoj kwawonsu.” (2 Kor. 1:3) Wawiy mutapu wasalay Ana. Wamuleja Yehova patok mutapu wading wiyovilay ni wamwita chakwel amukwash. Chilik chimwing, anch tumen mar, tufanyidin kusal yivud kulik kwau ching kumulej Yehova milong yetu. Tufanyidin kumwit ukwash ni kumulej kamu patok mutapu twiyovila.—Fil. 4:6, 7. w17.06 5-6 par. 10-11

Mulong Yesu wavumbulau wading wij anch in kwilejend kandikal akwatap insh ap umwing, wayileja in kwilejend anch: “‘Tangany wand wen mutambu wa katatuku wa waat, chad ukukwatany ansh.’ Awiy ata wand, chad katwishap kuukak, mulong mwafa ansh avud.” (Yoh. 21:1-6) Yesu wayinkisha in kwilejend mukat ni insh mulong wa kudia. Kupwa wakarumuka kudiay Simon Pita ni wamwipula chipul chidia mu mufund wetu wa dichuku. Yesu wading wij anch Pita wading ukatin kuta ansh. Chikutwish kwikal anch Yesu wading umwipwil Pita ang umukatin nakash ni yom yafundishay kusutamu mutapu ukatinay mudimu wend wa kuta ansh. Pita wamwakula Yesu anch: “Mwant, ey wij kal anch am nikukatil.” (Yoh. 21:15, TMK) Kusambish pinipa, Pita wamekesha anch wova kurumburik kwa yom yading yilondinay. Wamekesha rukat rend mulong wa Kristu mu kukwatakan nakash mu mudimu wa kulejan, ni wikala muntu wa usey nakash mu chikumangen cha win Kristu. w17.05 21-22 par. 1-2

Ruchingej ra Paul mudiay Yehova ramukwasha kurish ni milong mu mwom wend. Padingay Paul ni milong yikash, kashadishap ruchingej rend mudiay Yehova. Wamuchingejina “Nzamb ukata kupan kwongoj kwawonsu, ndiy ukata kutwongoj mu mar metu mawonsu.” (2 Kor. 1:3, 4) Patulembiling, twambambining ni Yehova. Chinech chikat kusal anch chituswapel kwikal mu urund uwamp ni ndiy. (Kus. 86: 3; 1 Tes. 5:17; Rom 12:12) Anch twamulej Tatukwetu wa mwiur piur pa yitongijok ni yovil yetu yikurikina, tukat kusej piswimp ni ndiy. (Kus. 65:2) Chikwau kand, rukat retu mulong wa Yehova rikat kuya kurutu pitumening mutapu wakwilay ku malembil metu. Tukwet kashinsh anch “[Yehova] udi piswimp kudi awonsu akata kumutazuk ndiy.” (Kus. 145:18) Ruchingej retu mu rukat ra Yehova ni ukwash wend yikutukwash kurish ni milong yin yawonsu tukweta katat ni mu machuku ma kurutu. w17.05 17-18 par. 9-10

Mutapu ik ukusala anch amakurump akwat mupak wakad ey kutesh nawamp ap wakad ey kwitiy? Yom mudi yiney yikutwish yapak ritiy rey mudiay Yehova ni mutapu utenchikinay chikumangen chend nlel. Kwikepish kukukukwash mutapu ik anch akupak ni yom mudi yiney? El tushinshikinany mitapu yaad. Chakusambish, anch twikepishin, tukwitiy anch twijap kwetu yom yawonsu. Ap anch twatong anch twij yom yawonsu piur pa mulong winou, tufanyidin kwijik anch ching kwend Yehova ndiy wijing yidinga mu muchim wa muntu. Anch twavurik yom yiney, tukwijik nich kwikepish anch tukwet mimbu ni tufanyidin kuwapish mutapu wetu wa kutong. Cha kaad, anch twaman kuburen kutentam, kwikepish kukutukwash kuziyin ni kushimpish muchim ni kuchingel anch Yehova awapisha mulong winou. Bibil ulondin anch: “Pakwez kiyikwikalap yiwamp kudi mukayitil. Mwom wend ukat kusut mau.” (Mul. 8:12, 13) Anch twashal ikepishina, tukutaninamu ni muntu ni muntu ukutaninamu.—1 Pita 5:5. w17.04 24 par. 10-11

Chimeken kamu patok anch Josef amusadina nich kuburen kutentam. Walonda kand patok anch kafilap kwend nich uyimp wa mufundinau. Chawiy chamulejay nfansey anch amulondin kudi Farao. Chisu chading chitongijok chend? Walonda anch: “Chakwel niyam andioshap mu chikumbu chinech.” (Dis. 40:14) Ov, Josef witiya yom yamushikena pakad kusal usu wa kusal chom kanang? Bwat! Josef wading wij anch amusadina nich kuburen kutentam nakash. Chawiy charumburilay mulong wend kudi nfansey, nich ruchingej anch muntu winou ukutwish kumukwash. Pakwez ijik anch Mifund yilejenap anch Josef wamulejamu muntu mukwau, ap Farao, anch anamakwend amukwata ku usu. Chawiy, pezau anamakwend mu Idjibit ni kuchirish chisambu pamwing ni Josef, Farao wayaka nawamp ni wayitazuka kushakam nau mu Idjibit ni kusanger “yiwamp yawonsu ya mwi ngand.”—Dis. 45:16-20. w17.04 18-19 par. 12-13

Diyingishin dimwing dimekeshina mulong wak Yehova ndiy ukweta mbil ya kuyikel didi anch ndiy ukweta ronganyin ni manangu ma kuyikel mangand. Tumen chom chinech mu mutapu wamwinkishay Mwanend usu wa kwok mayej makadau adokter kutwish kwok. (Mat. 4:23, 24; Mar. 5:25-29) Ap anch yom yiney yimeken kwikal yilay kudi etu, yidiap kwau yilay kudi Yehova. Wij nawamp mutapu ukata kusal mujimbu ni ukutwish kwok ulim wawonsu ukutwisha kwikal ku mujimbu. Ukutwish kand kulangwish afu ni kukangesh mar ma chitangil mawonsu makutwisha kushiken. Mangand mayikedilay Satan makutwishap kulet chisambu, chikala mukach mwa ngand yimwing ap mu jingand jivud. Ching kwend Yehova ndiy ukweta manangu ma kulet chisambu mu mangand mawonsu. (Isay 2:3, 4; 54:13) Tukat kwiyov mudi mwiyovay kambuy Paul chisu chalonday mazu madia mu mufund wa nlel. w17.06 22-23 par. 6-7

Nlel mu mangand, antu avud akwet mwikadil uyimp piur pa uruw. Akat kutong ang anch yom yendinap nawamp akutwish kwau kujip uruw wau. Pakwez kiwawiyap mutapu umeningau amakundj nau amband in Kristu uruw. (1 Kor. 7:27) Ijing anch asala kal machip mulong wa uruw kurutu kwa Nzamb. Anch alik kuwanyish machip minam, chikwikal mudi amudimba ndiy, ni Nzamb ukisining antu in kudimban. (Lev. 19:12; Jnsw. 6:16-19) Yehova ukisining kujip uruw pakad mulong wakad kuwanyin. (Mal. 2:13-16) Yesu wafundisha anch diyingishin dimwing dia mu Bibil dia kujip uruw didi ang anch mbay umwing wa uruw wasal masandj chadi mbay wa uruw mukwau wakad mulong walik kumulikishin. (Mat. 19:9; Heb. 13:4) Chidi nchik piur pa kwaurik kwa ambay a uruw? Bibil ulejen patok mulong winou. (1 Kor. 7:10, 11) Kwikil diyingishin dia mu Bibil dilejena piur pa kwaurik mu uruw. Pakwez, yisu yimwing kukutwish kushiken milong yikusala anch mwin Kristu iyova anch chidi kamu cha usey kwaurik ni mbay nend wa uruw. Chilakej, amwing akutwish kuman anch mwom wau ap urund wau ni Yehova ukutwish kwikal mu ubaj nakash anch ashakam pamwing ni mbay wa uruw muyimp ap wapumbukina kal. w17.04 8 par. 14-16