Ngond wa 12

Antu a pasak amekeshang kwakan mu kuyitazuk antu akwau ku yikumbu yau mulong wa yakudia, mulong wa kumekesh anch akatin kwikal arund ni mu chisambu. (Dis. 18:1-8; Ank. 13:15; Luka 24:28-30) Anany tufanyidina kamu kwak nakash? Adi akadivar nau anambaz adia mu chikumangen chetu. Mulong mangand minam madandamedin kuyip, tukwikal ni kuswir kwa akadivar nau anambaz netu ni kwikal arund nau ashinshamena. Atulam a minyingumuku akweting kuswir kwa ndond ya kushakam chisu chendidinau yikumangen. Chinech chikutwish kand kwikal mwamu kudi ansand a ku ma shikol ma uteokras ni in kwipan a kwikatin asadina mu mudimu wa kutung. Chad chikwikal nchik piur pa antu akweta yikumbu yabumwokina kupwa kwa mar ma chitangil? Akutwish kwikal ni kuswir kwa ndond ya kushakam kushik ni pakutungirilau yikumbu yau. Tufanyidinap kutong anch ching antu akweta yikumbu yijim awiy akutwisha kukwash. Akutwish kwikal akwashin kal kand mwamu yisu yivud machuku ma kwinyim. Ov, ukutwish kumukwash muntu ndond ya kushakam ap anch chikumbu chey chidi kwau chikemp? w18.03 16 par. 6; 17 par. 9

Yom ik yikumukwasha muntu ‘kulank kand’? Tukutwishap kusal mwamu ku usu wetu, ching ku spiritu wa Nzamb. (Fil. 4:13) Mu dibuj dia spiritu mudi kand kwilam, kufanikena ni kwikand amwiney. Malembil, dilejan dia Bibil ni kutongijokin kukutukwash kand kukudish mwikadil wa kwikand. Pakwez chikwikal nchik anch kwilej Bibil kukukasikedin ap ukatinap kwilej? Kangal waziy. Anch witiy, Yehova ukukukwash kwikal nich “impu yikash” mulong wa Dizu diend. (1 Pita 2:2) Mwita Yehova akukwasha kwikand amwiney chakwel utwisha kuman chisu cha kwilej Bibil. Pamwing ap ukutwish kusambish kwilej mwa aminit akemp kwau. Pakemp pakemp, chikukuswapel ni ukusanger chad kwilej nakash. Ukukat chisu chidia zong mulong wa kutongijokin piur pa yitongijok yiwamp ya Yehova.—1 Tim. 4:15. w18.03 28 par. 5-6

Kurutu kwa in kwilej a Bibil kutambul dibatish, afanyidin kwilej uyakin piur pa Nzamb, yitongijok yend mulong wa an a antu ni divu, ni kwijik yom yasalay mulong wa kuyipandish an a antu. (1 Tim. 2:3-6) Kupwa afanyidin kukudish ritiy rau, rikuyikwasha kuziyin yijil ya Nzamb ni kulik kusal yom yikisinay. (Mid. 3:19) Chinech chidi cha usey, mulong Yehova kakwitiyangap kwipan kwa muntu udandamedina kusal yom yiyimp. (1 Kor. 6:9, 10) Pakwez kudi yom yivud ya kusal. Antu akatina kupan mwom yau kudi Yehova afanyidin kukumangan ku yikumangan ni kulejan chisu chawonsu rusang ruwamp ni kuyifundish antu akwau. Yiney yawiy yimwitinau muntu win mwawonsu ukatina kumulondul Kristu. (Mid. 1:8) Mwin kwilej ufanyidin chakusambish kusal yom yiney yawonsu. Kupwa ukutwish kupan mwom wend kudi Yehova kusutin malembil ma amwinend ku ujindj ni kutambul chad dibatish. w18.03 6-7 par. 12

Yehova wamutonda kwikal makwend a Yesu mulong wading muntu wa mu spiritu. Tang yom yalonday Mariy chisu chayay kumutal mwanamakwend Zakariy ni Elizabet. (Luka 1:46-55) Tukutwish kuman anch Mariy wading ukatin Dizu dia Nzamb ni wading wij nawamp Mifund ya Hebereu. (Dis. 30:13; 1 Sam. 2:1-10; Mal. 3:12) Ni kupwa kwa Mariy ni Josef kwatijan, kamanijanap mu uruw kushik ni pavadikinay Yesu. Chisend chinech chayinkishau kudi Nzamb chading cha usey nakash kudi awiy kusutamu maswir mau. (Mat. 1:25) Chikwau kand, Mariy watalang nawamp yom yawonsu yamushikenang Yesu papamangay ni wateshang yom yafundishangay. Chimeken patok anch Mariy wading usangaredin nakash kushilamu kwa Nzamb piur pa Mesia. Ov, tukutwish kumwimburij Mariy ni kwikasikesh chisu chawonsu kusal yom yikatinay Nzamb anch tusala? w18.02 19-20 par. 11

Mutapu ik tukutwisha kwimburij ritiy ni kuziyin kwa Job? Chikalap nchik mashakamin tudia nich, tufanyidin kwikal nich kashinsh anch Yehova udi chisu chawonsu Muntu wa usey nakash mu mwom wetu. Tufanyidin kumuchingejin kamu ndiy ni kumuziyin ni muchim wetu wawonsu. Chakin kamu, tukwet mayingishin mavud ma kusal mwamu kusutamu mayingishin madingay nich Job. Tong bil pa yom yivud twija nlel. Twij yom yivud piur pa Satan ni mipit yend. (2 Kor. 2:11) Kusutin Bibil, nakash mu mukand wa Job, twij mulong wak Nzamb ukat kulik anch mar madandamena. Kusutil uprofet wa Daniel, twij anch Want wa Nzamb udi winyikel wakin uyikedinau kudi Yesu Kristu. (Dan. 7:13, 14) Ni twij anch Want winou ukuyikel piswimp ap pa divu diawonsu ni kupwish mar. Yom yamushikena Job yitufundishin kumekesh ranaken anch akadivar amen mar. Mudi Job, akutwish kulond yom ya usup. (Mul. 7:7) Pakwez tufanyidinap kuyitongin nayimp ap kuyifish nich anch asalang yom yiyimp. Pakwez, tufanyidin kusal usu wa kuyitesh. Anch twasal mwamu, tukwikal mudi Tatukwetu Yehova, udia mwin rukat ni mwin riy.—Kus. 103:8. w18.02 7 par. 16; 8 par. 19-20

Antu amwing akat kwibaz mulong akweting yifu yiwamp, ijiken nakash, ij kubul mizik nakash, akweting usu ap mulong akat kuyibaz kudi antu akwau. David wading ni yom yiney yawonsu, pakwez washala wikepishina mu mwom wend wawonsu. Chilakej, kupwa kwa David kumujip Goliat, Mwant Saul wamuleja David anch ufanyidin kumwat mwanend. Pakwez David wamwakula anch: “Ov, niyam nachadi nany, ni mwom wam chom ik, ni dijuku dia tatukwam mu Isarel didi ik, chad ing nez nikala tatuwenend wa mwant?” (1 Sam. 18:18) Mudi David, antu a Yehova nlel asadin usu wa kwikal antu ikepishina. Chikat kutushik ku michim yetu pa kwijik anch Yehova amwinend, Udia wa Piur Nakash, udi wikepishina. Tufanyidin kusadin mazu am: “Djalany riy, ni kudimuk, ni kwishikumwish, ni kuwap, ni kushimpish kwa muchim.” (Kol. 3:12) Twij kand anch rukat ‘kirikwibazangap, ap kwishimek.’ (1 Kor. 13:4) Anch antu akwau aman anch tudi ikepishina, niyau akutwish kukat kumwijik Yehova. w18.01 28-29 par. 6-7

Akutwish niyetu kutulej kupan milambu mulong wa mudimu kanang. (Mid. 4:34, 35; 1 Kor. 16:2) Pamwing ap chikumangen chen chikat kwitenchik mulong wa kurijek Chot chen cha Want ap kutung Chot chisu. Tukutwish kand kukwash ni nfalang chisu cha chitentam chetu. Ap akadivar netu a ndond yikwau amen mar mulong kwasadikin mar ma chitangil ni aswirikedin ukwash wetu. Milambu yetu yikat kuyikwashang kand amishoner, ayibol a pakampwil, atulam a minyingumuku, antu asadina ku biro mujim wa pa mangand mawonsu ni asadina ku ma biro ma mitiy mwi ngand ya kabuj. Etu awonsu tukutwish kupan chom kampand mulong wa kukwash mudimu usadinau kudi dirijek dia Yehova mu machuku minam ma nsudiel. Kalejeningap majin ma antu apanining yipan yiney. Chisu tutekining nfalang mu mishet ku Chot cha Want ap kupanin milambu yetu kusutin kapend ka jw.org, tukusalangap anch akwetu ijika uvud wa nfalang twapana kal. Pakwez chikwikal nchik anch umen anch mulambu wey udi kwau ukemp? Uyakin udi anch yipan yivud yitambwilau mu dirijek yidiokiling ku tuyipan tukemp tuvud pa ndond pa yipan yijim. w18.01 17-18 par. 10-11

Dibatish didi dia usey mulong wa kutambul dipandish ni kushakam chikupu. (Mat. 28:19, 20) Washilamu anch kumukat Yehova ni kudandamen kumusadin chawiy chom cha usey nakash mu mwom. Ov, ukutwish kand kwinan mulong wasala kushilamu kwinoku kwa usey? Bwat kamu! Ukutwishap kwinan ap pakemp anch Yehova akutakela mu mwom wey. Antu akad kumwijik Yehova adi mu mangand ma Satan. Djabul kakatap kuyibangin ap kukubangin ey ap pakemp. Pakwez, ndiy ukwikal ni musangar anch washadish ruchingej rey ra kushakam chikupu mulong wa kusut ku mutambu wend ni wamulik Yehova. Tong mutapu wakuyukishau kudi Yehova mulong wipana amwiney kudi ndiy ni watambula dibatish. Wapana mwom wey kudi Yehova, chawiy ukutwish kulond nich kashinsh anch: “[Yehova] udi niyamam, kinikwovap kwam wom. Ov, antu akwinsal yom ik?” (Kus. 118:6) Kwikil ntumb yijim mudi kwikal ku mutambu wa Yehova ni kwijik anch ukat kwibaz mulong weyey. w17.12 21-22 par. 1-3

Yisu yimwing, tukutwish kwov ujim mulong wa yom yikulondau ap yikusalau antu akwau, ap niyetu tukutwish kuyovish antu akwau ujim. Kwinoku kukutwish kwikal kupak kujim. Pakwez chinech chikat kutwinkish mutapu wa kwikal ashinshamena kudi Yehova. Mutapu ik? Mu kwilej kusal mu umwing pamwing ni akadivar nau anambaz netu. Yehova uyikatin chikalap nchik kurumbok kwau, niyetu tufanyidin kusal mwamu. Yehova kakangeshinap kuyipak atushalapol end. Twij yom yiney kusutin mwom wa Josef. Padingay Josef nsand, anamakwend amwovila mukau. Amulandisha mudi muswik, ni amutwala mu Idjibit. (Dis. 37:28) Yehova wamana nawamp yom yading yisadikina ni wiyova kamu nayimp pamanay mutapu uyimp wamusadinau murund nend, kashalapol wend ushinshamena Josef. Pakwez, Yehova kakangeshap yom yashikena. Kupwa, pamufundau Josef anch wakimbang kulal ku usu ni mband a Potifar ni pamutekau mu rukan, Yehova kakangeshap kand yom yiney kumushiken. Pakwez, ov, Nzamb wamulika Josef? Bwat. Bibil ulondin anch: “[Yehova] wading ni Josef, ni mu yom yawonsu yasalangay, [Yehova] wamukwasha kusal.”—Dis. 39:21-23. w18.01 6-7 par. 12-14

Ukwakul nchik anch muntu wakwipul anch misu mafundish ma pa dishin pimedina ritiy rey? Ukumulej chakin kamu anch witiyijin anch Yehova udi Sakatang ni ndiy watwinkisha mwom. Ukutwish ap kumwakul kand anch umwitiyijin Yesu Kristu, muntu watufila etu kwikal difut. Pakad ntad, ukwambamb nend piur pa Paradis ukwikalaku mu machuku ma kurutu panap pansh, mukushakamau antu a Nzamb chikupu. Pakwez, ov, ukutwish kulond piur pa divumbuk anch chidi chom chimwing pakach pa yom wakata kwitiyij? Tukwet mayingishin mawamp ma kuwejinaku divumbuk mudi chom chimwing pakach pa yom twitiyijina, ap anch tuchingejin anch tukupand ku mar makash ni tukushakam panap pansh chikupu. Kambuy Paul wamekesha mulong wak divumbuk didi dia usey nakash. Anch Yesu kavumbukap, ing kafanyinap kuyikel mudi Mwant mwiur, ni mudimu wetu wa kulejan wakimbang kwikal wa chamwamu. (1 Kor. 15:12-19) Pakwez, twij anch Yesu wavumbuka. Mulong twitiyijin anch wavumbuka, tudiap mudi in Yuda Asadus, ading kutaadikang anch afu kakutwishap kand kuvumbuk. Ap anch antu akwau atusip, ritiy retu anch Nzamb ukutwish kuvumbul afu rikwikal ching rikash.—Mar. 12:18; Mid. 4:2, 3; 17:32; 23:6-8. w17.12 9-10 par. 1-2

Afaris karumburishangap kwau antu ni riy. Imenang kwau pa yom yasalangay mukayitil pa ndond pa kwijik anch muntu winou udi muntu wa mutapu ik. Chisu chamumanau Yesu kudi Afaris amwing ukat kudia ku chikumbu cha Mateu, ayipula in kwilej anch: ‘Mulong wak mulej wen udil nau in kulambwish yitad nau akayitil?’ Yesu wayakula anch: “Antu akash kakuswirinangap mwingang, ching kusu antu ayedila. Yangany, ukilejany kurumburik kwa mazu . . . [malondina] anch: ‘Am, nikatil antu akweta riy kupandakanamu yakupesh yau annam.’ Am kinezap kuyitazuk antu atentamina, pakwez neza mulong wa kuyitazuk akayitil.” (Mat. 9:9-13) Ov, Yesu wayiyingisha nich akayitil? Bwat kwau. Ndiy wakimba anch akarumuka. Chom chinech chading cha usey nakash mu uruu walejanangay. (Mat. 4:17) Yesu wijika anch ‘in kulambwish yitad nau akayitil’ amwing ading akatin kuswimp. Kezap kwau ku chikumbu cha Mateu ching mulong wa kudia. Ading mwinimwa mulong amulondula Yesu. (Mar. 2:15) Cha ushon, Afaris avud kayimanangap kwau antu mutapu wayimanangay Yesu. w17.11 15-16 par. 2; 19 par. 15

Tukwet musangar wa kwikal mu chikumangen cha win Kristu. Tukat kwilej Dizu dia Nzamb ku yikumangan, ni tukwashijadining kwa rukat umwing ni mukwau. Chinech chikat kutukwash kushinshikin mes metu pa difut. Pakwez yisu yimwing kulik kuteshijan nawamp kukutwish kwaletish milong ni akadivar nau anambaz netu. Anch tupwishinap milong yiney, yikutwish yatushikij ku rukuny. (1 Pita 3:8, 9) Tufanyidinap kulik anch rukuny ritukangesha kutambul difut. Paul warumburila yom yifanyidinau kusal in Kristu palonday anch: “En udiany antu atondilay Nzamb, udiany antu atumbila akatilay. Chawiy djalany riy, ni kudimuk, ni kwishikumwish, ni kuwap, ni kushimpish kwa muchim. Kwashijanany akasikena ni aziyila, anch muntu ukwet mulong ni mukwau chifanyidin kulikishijadin umwing ni mukwau, mudi mwakulikishinanyau en kudi [Yehova]. Niyen salany kand mwamu.”—Kol. 3:12, 13. w17.11 29 par. 7-8

Anch mwin Isarel wamujip mukwau pakad kutongin, wafanyina kuchinin mu musumb wa kuchinin ni wafanyina ‘kulejan mulong wend’ kudi amakurump ading ku chis cha musumb. Amakurump afanyina kumwak nawamp. Mu kusut kwa machuku, afanyina kumuchirish mu musumb wajipenay chakwel amurumburisha kudi amakurump a musumb winiwa. (Kuch. 35:24, 25) Anch amakurump aman anch rufu riner rasadikang pakad kutongin, akutwish kwau kumuchirish muntu wajipanang mu musumb wa kuchinin. Mulong wak mwin kuchin wafanyina kuyilej amakurump? Amakurump afanyina kwikal nich kashinsh anch chikumangen cha in Isarel chafanyina kushal chishitwila ni kumukwash muntu wajipanang pakad kutongin ataninamu mu riy ra Yehova. Mwin kwilej umwing wa milong ya Bibil wafunda anch ang mwin kujipan winou kayilap kudiau amakurump, akutwish kumujip. Wawejinaku anch mwin kuchin ukwikal ni chisend cha rufu rend amwinend mulong kasadinap kwend yom yalejanay Nzamb. Mwin kujipan pakad kutongin wafanyina kwit ukwash ni kuwitiyij chakwel ikala mwom. Anch kayilap mu musumb umwing pakach pa misumb ya kuchinin, mwanamakwend wa muntu wajipangay ni ndiy ching kamu wamujip. w17.11 11 par. 6-7

Nlel unou, Yehova udandamedin kusadin angel mulong wa kuyichidij ni kuyikasikesh antu end. (Mal. 3:6; Heb. 1:7) Kudiosh mu muvu wa 1919, chisu chayikolau antu a Yehova mu chifanakesh mu Babilon Mujim, akankuny au asala usu nakash wa kukangesh kuya kurutu ni kujimb kwa difukwil diakin. (Kuj. 18:4) Pakwez katwishap kusal mwamu. Mulong angel achidijin dirijek dia Yehova, tufanyidinap kwov wom anch antu a Yehova akwikal kand aswik kapamp kakwau a relijon wa makasu. (Kus. 34:7) Pakwez tukudandamen kwikal ni musangar ni kwikal akwatikena nakash mulong wa kumwifukwil Yehova. Tukwet yisak ya angel a Yehova ku mutambu wetu. Pa chisu cha mar makash, angel a Yehova akuyichidij antu end, ni akumujiyish muntu mwawonsu ukulika wintakel wa Yehova. (2 Tes. 1:7, 8) Dikwikal dichuku dishimokishena mudi ik! w17.10 23-24 par. 10-11

Anch muntu wa mu dijuku amwopat ap wiyauril amwinend ni chikumangen, chikutwish kwikal chom chikash nakash. Chikutwish kwikal chisansena nakash ni ukwiyov mudi muntu wakutap kal mpak. Mutapu ik ukutwisha kujijamen kusansan kwinoku? Chidi cha usey kudandamen kushinshikin pa kumusadin Yehova. Anch wovil kusansan mudi kwinoku, ufanyidin kukasikesh ritiy rey. Tang Bibil chisu chawonsu, irijeka ni yang ku yikumangan, dandamen kulejan, ni mulembila Yehova akwinkisha usu wa kujijaman. (Jud 1:21) Chikwikal nchik anch usadin yom yiney yawonsu chad kusansan kudandamedin? Kangal waziy! Dandamen kushinshikin pa kumusadin Yehova. Mu kusut kwa chisu, yom yiney yikukukwash kusop yitongijok ni yovil yey. Yawiy yom yamushikena mwin kufund wa Kuseng 73. Kwading chisu chimwing chamukasikena mu mwom wend kusop yovil ni yitongijok yend. Pakwez, kumwifukwil Yehova kwamukwasha kuman kand yom mu mutapu uwamp. (Kus. 73:16, 17) Chikutwish kand kwikal mwamu kudi ey. w17.10 13-14 par. 17-18

Chisu chambambay Satan ni Ev mu chir cha Eden, yom yalonday yamekana mudi anch ukatin yom yiwamp mulong wendendiy. Pakwez yisal yend yamekesha yom yindj. (Dis. 3:4, 5) Padingay David mwant, wading ni murund nend watazukangau anch Ahitofel. Pakwez Ahitofel wamutuna David mulong wa kutaninamu kwend amwinend. Yisal yend yamekesha anch kadingap murund wakin. (2 Sam. 15:31) Nlel unou, in kupumbok ni antu akwau aletina kwaurok mu chikumangen asadidin “mazu mau mawamp ma rulemb.” (Rom 16:17, 18) Akutwish kulond anch ayibangidin antu akwau, pakwez mu uyakin adi antu akweta choy. Rukat ra makasu rikat kuletish usany mulong akat kurisadin mulong wa kuyirumbukin antu akwau. Tukutwish kuyidimb antu, pakwez tukutwishap kumudimb Yehova. Yesu walonda anch antu in rubabek akuyipup ‘mu mutapu uyimp nakash.’ (Mat. 24:51) Chawiy tufanyidin kwiyipul anch: ‘Ov, rukat ram ridi rakin, ap nikwet choy ni niburedin kashinsh?’ w17.10 4-5 par. 6-8

Anch twamutangin muntu Bibil, twitiyijin anch Yehova alonda kudi ndiy. Anch twatond verse nawamp, ukwikal nich usu nakash kusutamu yom yawonsu tukutwisha kulond. (1 Tes. 2:13) Anch udi mu mudimu wa kulejan, ov, usadining usu wa kutang mu Bibil chisu chawonsu anch chitwishikin kusal mwamu? Pakwez, tukwimenap kwetu ching pa kutang verse wa Bibil kudi antu tulejina. Antu avud kijingap kwau kurumburik kwa Bibil. Chinech chading kand chakin mu mivu chitot ya kusambish, ni chidi kand mwamu nlel. Tufanyidinap kutong anch mwin chikumbu uteshin kurumburik kwa verse twamutangina kal. Tukutwish kumukwash mu kuchirikin mazu ni yitongijok ya pa dishin ya verse ni kumurumburil chirumburikina verse winou. Anch twasal mwamu, Dizu dia Nzamb dikutwish chad kushik mu manangu ni mu michim ya antu.—Luka 24:32. w17.09 23 par. 7-8

Yehova uyilejin in Kristu amekesha ranaken kudi amutej nau ni kudi akadivar nau. (Yoh. 13:34, 35) Kurumburik kumwing kwa dizu ranaken kudi “kuman mar pamwing.” Muntu ukata kumekesh ranaken usadining usu wa kuyikwash antu akwau amena mar. Chawiy tufanyidin kukimb mitapu yiwamp ya kuyikwash akwetu, pamwing ap kwipan mulong wa kuyisadinaku midimu ya ku chikumbu ap kwitiy atutuma. Anch twaman antu akat kuman mar mulong wa mar ma chitangil, tufanyidin kamu kuyanaken. Antu a Yehova ayijing kamu nawamp mulong wa kuyikwash antu akwau mu yisu mudi yiney. (1 Pita 2:17) Chilakej, nambaz umwing wa mu Japon, wading ushich mu teritwar mwasadika kuzal kwa divu ni rinkind mukash utazukinau anch tsunami mu muvu wa 2011. Walonda anch “amukasikesha nakash ni kumwongoj” pamanay in kusal mudimu a kwisotin akat kudiokal mu mal kushalijan ma mu Japon ni ma mu jingand jikwau mulong wa kutungiril yikumbu ni Yot ya Want. Wawejinaku anch: “Yom yiney yankwasha kwijik anch Yehova ukat kwintongin. Ni akwetu Atuman akat kutubangin umwing ni mukwau. Ni akadivar ni anambaz avud a pa mangand mawonsu akat kulembil mulong wetwetu.” w17.09 12-13 par. 12-13

Mulong wak tukwet kuswir kwa kwilam? Kudi mayingishin maad ma usey. Chakusambish, antu akata kulam nawamp yovil yau ni yitongijok yau akweting milong yikemp. Chikat kuyiswapel kand kwikal ni urund uwamp ni kwiyep yovil ya ujim, ya kwiyakamish ap ya ushon. Cha kaad, mulong wa kushal mu urund ni Nzamb, tufanyidin kujijamen yoziu ni kusop maswir mayimp. Yawiy yakanganyay Adam ni Ev kusal. (Dis. 3:6) Mudi awiy, antu avud nlel akwet milong yikash mulong aburedin kwilam. Yehova wijing anch tudi antu akad kuwanyin ni chawiy chitukasikedining kwilam. Pakwez ukatin kutukwash chakwel tuyikela maku metu mayimp.—1 Ant 8:46-50. w17.09 4 par. 3-4

Mivu yasutina ey, antu a mu Afrik amen niyau yom yimwing ya pakampwil kudi Atuman a Yehova. Chisu chimwing, Atuman a ulomb wa chikit kushalijan mwi ngand ya Afrique du Sud kayitiyijap kukumangan pamwing. Pakwez, Diarubing 18 Ngond wa 12, 2011, Atuman 78 000 ni kusut a ulomb wa chikit kushalijan a mu Afrique du Sud ni a mu jingand ja piswimp akumangana pamwing mulong wa program wa pakampwil mu chiwandj chijim cha ndundu mu Johannesburg. Mwin kulam umwing wa chiwandj chinech walonda anch: “Kand kal nimanangap chisak chijim cha antu chikweta yisal yiwamp mudi chinech mu chiwandj chinech. Awonsu ading adjit nawamp. Ni antu inay arijeka chiwandj nawamp. Pakwez pa yawonsu yiney, udiany antu a ulombu wa chikit kushalijan.” Chawiy ap antu akad kwikal Atuman akutwish kuman patok anch uumwing wa ukadivar wa pa mangand mawonsu udi wa pakampwil. (1 Pita 5:9) Mulong wak tushalijadin nau antu adia mu yitenchik yikwau? Mulong ku ukwash wa Bibil ni wa spiritu utumbila, tusadin usu nakash wa kuswimp ayinetu yom yakad kumusangaresh Yehova. ‘Tudjodil wuntu ukur,’ ni tudjadil chad ‘wuntu usu.’—Kol. 3:9. w17.08 15-16 par. 2-3

Bibil ulondin anch kushimpish muchim kudiokiling ku spiritu utumbila wa Nzamb. Pakad ukwash wa Nzamb, chikasiken nakash kudi antu akad kuwanyin kwikal in kushimpish muchim chisu chidiau mu yisu yikash. Kushimpish muchim chidi chipan chidiokila kudiay Nzamb ni tumekeshin anch tumukatin Yehova ni antu akwau anch twamekesh mwikadil winou. Anch tushimpishinap muchim, rukat tukweta piur pa antu akwau rikuziy. (1 Kor. 13:4; Gal. 5:22) Kushimpish muchim kwitin ik? Kwitin kujijamen yisu yikash ni kudandamen kwikal ni chitongijok chiwamp. (Kol. 1:11; Jak. 1:3, 4) Kushimpish muchim kutukwashin kand kushal ashinshamena kudi Yehova chikalap nchik milong tukweta. Kukutukwash kand kulik kufundakesh chisu tumena mar. Bibil ulondin anch tufanyidin kwikal ni rusot ra kwitiyij kuchingel. Dined diawiy dilejan dia usey twilejidina mu mukand wa Jakobu 5:7, 8. w17.08 4 par. 4

En ansand, ukutwishany kwitiyij anch kurutu kwa kusal weny, chiding cha manangu kwirijek mulong wa ndond ukuya. Mwom udi mudi weny, ni chisu wirijekina mulong wa kuya kwi ndond ukatina kuya chawiy chisu udia nsand. Chakin kamu, chiswapelingap kwirijek mu mutapu winou. Pakwez takaman. Tongin pa yom yilondinay Yehova mu mufund wa dichuku wa nlel. Yehova ukukasikeshin urijeka kwa manangu machuku mey ma kurutu. (Mul. 12:1; Mat. 6:20) Ukatin anch wikal ni musangar. Chinech chimeken patok anch waman, watesh ni anch wapak yom yatangay. Yehova ukat kututongin mu mitapu yikwau. Utwinkishin yiyul ni utufundishin mutapu uwamp wa kushakam. Chawiy anch antu alik yiyul yend ya manangu kakatap kusangar. Ukat kuyilej antu alikining kulondul yiyul yend anch: ‘En watondanya kulik kwinziyil. . . . Talany! Atushalapol am akez kikal ni musangar, pakwez en ukez kwovany usany. Talany! Atushalapol am akez kawang nich musangar.’ (Isay 65:12-14) Anch twatond kwa manangu mu mwom wetu, tukumuletin Yehova ntumb.—Jnsw. 27:11. w17.07 21-22 par. 1-2

Nzamb wija katumbu win mwawonsu ukwij kand ey. Wij kamu nawamp ndond udia, mutapu wiyovila ni yom ukweta nich kuswir! Yehova wijing yom yikushikedina mu mwom, ni ukwet usu wa kukukwash mulong wa milong yey. (Kus. 147:5) Ukutwish kuman anch milong yey yikasiken nakash ni anch ukutwishap kurish nich. Nzamb wijing mimbu yetu, “ndiy ukat kuvurik anch, etu tudi kwetu rufunfut.” (Kus. 103:14) Tudi antu akad kuwanyin, chawiy tukat kurumbok chisu chawonsu, ni tukutwish kuziy. Tal mutapu tukata kunenganan mulong wa yom tukata kulond, mulong wa maku mayimp ap yovil ya mukau tukata kwikal nich! Yehova kakwetap uyimp ap umwing, pakwez wij kamu nawamp mutapu tukata kwiyov! (Isay 40:28) Ov, wamenap kal chikas cha usu cha Yehova chikat kukukwash mu mar?—Isay 41:10, 13. w17.07 16-17 par. 6-8

Mukadivar umwing wa mu Sri Lanka wapana rupang rend mulong wa kusadinamu yikumangan ni yitentam ni chikumbu mulong wa antu adia mu mudimu wa chisu chawonsu. Chidi chipan cha nfalang mulong wa akadivar, pakwez udi ukwash ujim kudi in kulejan adia kwinikwa aburedina nfalang jivud. Mu jingand mulikishinau mudimu wetu wa kulejan, akadivar akat kusadin yikumbu yau mudi Yot ya Want. Chinech chikat kuyikwash ayibol ni antu akwau akad kwikal ni nfalang jivud kwikal ni ndond ya kukumangen pakad kufut nfalang. Nambaz umwing upanining nfalang chisu chawonsu mulong wa kukwash mudimu wa Want ulondin anch chom chimwing chakad kutongin chamushikena mu kusut kwa mivu. Ulondin anch: “Pinidandamedina kupan nakash yom ya ku mujimbu, nimen anch nidandamedin kuswimp chitongijok cham piur pa antu akwau. Nidi mwin kulikishin nakash, nidi mwin kushimpish muchim mulong wa antu akwau ni nitiyining swa anch arumbukin ni nitiyining yiyul.” w17.07 5-6 par. 9-10

Ap anch Job wilejina ku yom yamushikena, wafanyina pamwing ap kwiyipul mulong wak Nzamb walika anch amana mar nakash mwamu. Anch Job wading ni yitongijok mudi yiney, wafanyina kuvurik yom yamulejau kudi Yehova. Yom yiney yafanyina kumukasikesh ni kumukwash kwikal ni yitongijok yiwamp. (Kus. 94:19) Kutongijokin piur pa yom yamushikena Job kukutwish kutukwash kuwapish yitongijok yetu ni kutukasikesh. Mukand wa Job mudi rusangu rafunday Yehova ‘mulong wa malejan metu, chakwel ku kujijaman kwetu ni ku rongoj ra Mifund tutwisha kwikal nich ruchingej.’ (Rom 15:4) Yom yiney yitufundishin anch tufanyidinap kutongin nakash pa milong yetu yikutwisha kutushikij ku kukangany kutongin piur pa kukwash ukaleng wa Yehova. Mudi Job, tukwashin ukaleng wa Yehova pa kushal ashinshamena kudi ndiy ap anch mashakamin makasiken. w17.06 17 par. 9; 18-19 par. 13-14

Yesu wading wij anch chading cha usey kudi in kwilejend kwiswedish. Chilakej, kupwa kwa kusal mudimu nakash mu mudimu wa kulejan, Yesu wayileja mazu madia kwiur oku. Masengan ni kwipuwangej yikutwish kutukwash kupim ap kwiswedish. Pakwez tufanyidin kubabal chakwel kangal kwisangaresh ayinetu kwikal chom cha usey nakash mu mwom wetu. Mu mivu chitot ya kusambish, antu avud ading ni chitongijok cha kulond anch: “Tudiany, tunany, mulong diamashik tukufany kwetu.” (1 Kor. 15:32) Chitongijok cha mutapu winou chidiaku kand nlel. Yom ik yikutwisha kutukwash kwijik anch tukwet chitongijok chiwamp ap bwat piur pa kwipuwangej? Chom chimwing tukutwisha kusal chidi kutond rubing ni kufund uvud wa asaa tukata kusutish mu kusal yom yikwatijadina ni mudimu wa Yehova, mudi yikumangan ya win Kristu, mudimu wa kulejan, ni dilejan dia Bibil. Kupwa tukutwish kufund kand uvud wa ma saa tusutishina pa rubing rawiy rimwing mu kwipuwangej, mudi masengan, kutal televizion ni masengan ma video. Anch twisikesh uvud wa ma saa ma yom yiney yaad, yom ik twileja kal? Ov, tukwet kuswir kwa kuswimp?—Efes 5:15, 16. w17.05 24-25 par. 11-13

Mu chishimu cha Yesu, mwin kwisak watana usang ukweta usey nakash kusutamu usang wawonsu wadingay kuman. Muntu waswirikena nakash usang winou, chawiy walandisha yom yawonsu yadingay nich mulong wa kuuland. Ukutwish kutongin usey wadinga nich usang winou kudi ndiy? Uyakin wa Want wa Nzamb udi mudi usang wa usey nakash. Anch twakat Want nakash mudi mwakatay muntu winou usang wa usey, tukusha yom yawonsu mulong wa kwikal ni kushal an a Want. (Mar. 10:28-30) Chilakej, Zakeus wikala mpich mulong wayitambulang antu nfalang. (Luka 19:1-9) Pakwez dichuku dimwing, Zakeus watesha diskur dia Yesu piur pa Want. Wakata nakash yom yateshay ni wakimba kuswimp kapamp kamwing. Walonda anch: “Mwant, teshany! Am nikez kupan chikunku cha dipit diam kudi atuzwendj. Chad kand, anch namudimba muntu, nikez kumuchirishin yom yend tupamp tunying.” Zakeus wachirisha nfalang jayitambulay antu ni walika kand kwikal ni ris ra nfalang. w17.06 10 par. 3-5

Chakin kamu, antu atondinau kudi anvaj mulong wa kuyikwash anau afanyidin chisu chawonsu kuyikasikesh an chakwel ayilimish anvajau. Akutwish kusal mwamu mu kulond nawamp piur pa anvaj ni kangal atambul chisend cha anvaj cha kulil anau. Chikwau kand, antu akwashina afanyidin kwipuk mwikadil wawonsu ukutwisha kumekan mudi uyimp pol ap mukach mwa chikumangen. (1 Pita 2:12) Ap anch anvaj akutwish kwit ukwash kudi antu akwau, pakwez chidi chisend chau cha kuyifundish anau uyakin. Afanyidin kushinshikin ukwash upaninau kudi in Kristu akwau. Anvaj, mulembilany Yehova mulong wa ukwash, ni salany yawonsu ukutwishanya. (2 Jsng. 15:7) Tekany urund wa mwanen ni Yehova pa ndond yakusambish kusutamu maswir men. Salany yawonsu ukutwishanya kusal mulong wa kwikal ni kashinsh anch dizu dia Nzamb dishikin ku muchim wa mwanen. Kangal watongany anch mwanen kakutwishap kwikal kashalapol wa Yehova. w17.05 14 par. 19-20

Antu aad ayimp amufundin ikundj umwing anch wasalang yom yiyimp nakash. Yom yilondinau yidi yamakasu. Pakwez ikundj winou amufish kal nich ni afanyidin kumujip pamwing ni anend. Tong mutapu wiyovau antu akatining kutentam pamanau muntu winou wakad mulong nau anend akat kuyas mayal chakwel afa! Chinech chidiap kwau chishimu. Yidi yom yakin yamushikena kashalapol ushinshamena wa Yehova utazukinau anch Nabot, wadingaku chisu chadingay Akab Mwant mu Isarel. (1 Ant 21:11-13; 2 Ant 9:26) Palonday Mwant Akab anch alanda chir cha Nabot cha nviny ap aswimpa ni chir chikwau chiwamp cha nviny, Nabot walika. Mulong wak? Nabot walika kuswimp chir chalonday Mwant Akab mulong yading yikwatijadinap ni chijil cha Yehova mulong wa in Isarel chilondina anch kangal kulandish chikupu uswan wa dijuku diau wayishilau. (Lev. 25:23; Kuch. 36:7) Chimeken kamu patok anch Nabot wading umuziyidin Yehova. w17.04 21 par. 1; 22 par. 4

Anany akushala anch antu ayimp ayijiyish? Yehova ushidilamu anch: “Itudishina akez kaswan ngand, akez kasangar nakash ni kuzangijal mu chisambu.” Kupwa mu kuseng ndiy winou tutangin anch: “Mwin kutentam mwawonsu ukez kaswan ngand, ukez kashakamamu chikupu.” (Kus. 37:11, 29) Antu “itudishina” ni in “kutentam” awiy anany? In kwitudish adi antu ikepishina ilejidina kudi Yehova ni kumuziyin. Antu atentamina awiy akatina kusal yom yilondinay Nzamb anch yiwapin. Nlel mu mangand, mudi antu ayimp avud nakash kusutamu antu atentamina. Pakwez mu mangand masu, mukwikal ching antu itudishina ni atentamina, ni akukarumun divu kwikal paradis! w17.04 11-12 par. 5-6

“Rukat ra Nzamb” ritubachikin kuyikat akadivar netu, pakampwil anch adi mu mar. (1 Yoh. 3:17, 18) Chilakej, padingau in Kristu akusambish a mu Yudeya mu maswir ma yakudia mulong ading mwi nzal, chikumangen chirijeka mulong wa kuyikwash. (Mid. 11:28, 29) Kambuy Paul ni Pita ayikasikesha in Kristu chakwel ikal in kwakijan amwing ni akwau. (Rom 12:13; 1 Pita 4:9) Mulong in Kristu ayikasikeshin kumekesh ranaken kudi akadivar nau ayiling kutal jindond jikwau, tufanyidin kumekesh kamu ranaken mulong wa akadivar netu adia mu ubaj ap azengodinau mulong wa ritiy rau! Machuku masutina am, tunan twa Atuman a Yehova ashil yikumbu yau ku usu mulong wa njit ni kuzengol kwasadikina kwi ngangel kwa ngand ya Ukraine. Cha ushon, amwing pakach pau ayijipa. Pakwez akadivar avud achina, ayaka kudi akadivar nau anambaz ku yikumbu yau ku mal mamwing ma ngand ya Ukraine ni mu Russie. Mu jingand jinej jaad, akadivar alika kwiyandjik mu milong ya politik, ‘alika kwikal mu umwing ni mangand,’ ni adandamena kulejan nich mushiku “rusangu ruwamp ra dizu.”—Yoh. 15:19; Mid. 8:4, TMK. w17.05 4-5 par. 6-7