Ngond wa 11

Anch twikand ayinetu, tukat kusop mutapu tusadina yom ni tutongina. Tukatap kuvadik ni mwikadil wa kwikand pakwez tukat kwilej kuwikal nich. Chilakej, anch mwan wilejin kwendish nking, nvaj wend umwing ukutwish kumulamin chakwel nking kangal yawa. Pakwez mu kusut kwa chisu, mwan ukat kwilej mutapu wa kushakam pa nking ni nvaj wend ukutwish kumulikinaku chad mu ka chisu kakemp. Anch nvaj wikal nich kashinsh anch mwan ukutwish kushakam chad nawamp pa nking, ukutwish kumulik endisha amwinend. Chilik chimwing, anch anvaj ayifundish anau nich kushimpish muchim mu ‘kuyikand ni kuyibabesh nich malejan ma Yehova,’ akat kuyikwash anau kukudish kwikand ni manangu. (Efes 6:4) Chinech chidi kand chakin kudi antu ashikedina kumwijik Yehova chisu chidiau amakurump. Ap anch akutwish kwikal ni kwikand mu chilik kanang, kand kal ikala in Kristu aswila. Pakwez anch asambish kudjal ‘wuntu usu’ ni kusal usu wa kwikal mudi Kristu, akat kwikal aswila. (Efes 4:23, 24) Kwikand kutukwashin kwijik mutapu wa kukul. w18.03 28 par. 3-4

Yehova ni dirijek diend ditutazukin ku yikumangan. Tukatin anch muntu win mwawonsu ukumangena ku yikumangan yetu iyova nawamp, pakampwil antu asu. (Rom 15:7) Antu inay niyau adi angendj a Yehova, chawiy tufanyidin kusal anch iyova nawamp, chikalap nchik mutapu udiau ap mutapu udjadinau. (Jak. 2:1-4) Anch waman anch ngendj udi amwinend, ukutwish kumutazuk kushakam pamwing niyey? Ngendj winou ukwikal mwin kujikitish anch wamukwash kwijik yom yikusadika chisu cha yikumangan ni mutapu wa kutan maverse matanginau. Winou udi mutapu uwamp wa ‘kulondul njil ya kwakan.’ Yisu yimwing akadivar a yikumangen yikwau, atulam a munyingumuku, ap atutum a Betel akutwish kusal diskur mu chikumangen chetu. Tukutwish kusadin yisu mudi yiney mulong wa kuyak akadivar inay? (3 Yoh. 5-8) Mutapu umwing tukutwisha kusal mwamu udi wa kuyitazuk ku chikumbu chetu mulong wa kudia nau yisakol ap ruku. w18.03 16 par. 5, 7

Shinshikin chilakej cha mwin Yuda watazukau anch Saul. Muchid wa kabuj wa in Yuda wading wipanin kal kudi Nzamb, pakwez Yehova wayilika in Yuda mulong awiy alika kumuziyin. Saul witiyija anch in Yuda ading adandamedin kumusadin Nzamb mu mutapu uwamp, chawiy wasambisha kuyizengol in Kristu. Pakwez dichuku dimwing, Yesu wavumbulau ni kupwa waya mwiur, wading utonginay Saul anch wafil kal, wambamba nend Saul. Mutapu ik wasalay Saul? Witiyija nich musangar ukwash wa mwin Kristu Ananias. Bibil ulondin anch: “Walanka, chad amubatisha.” (Mid. 9:17, 18; Gal. 1:14) Kupwa kwa machuku amwijika chad anch kambuy Paul. Pijikay anch Nzamb wamusadina Yesu mulong wa kuwanyish rusot rend, Saul watambula dibatish pakad kulab. (Mid. 22:12-16) Nlel kand, chidi mutapu wawiy umwing kudi in kwilej a Bibil avud, ikala ansand ap antu apamina kal. w18.03 5-6 par. 9-11

Jakobu wading ni milong yimwing yikash mu mwom wend. Mwanamakwend Esau, wakimba kumujip. Tatuwenend wamudimba chakwel adandamena kumusadin mudimu mu mivu yivud. Pakwez ritiy ra Jakobu rashala rikash mu kushilamu kwasalay Yehova kudi Aburaham. (1 Kor. 2:14-16) Jakobu wading wij anch dijuku diend didi pakach pa antu akuwanyisha uprofet winou upandakena kuwamp, chawiy wasala usu wa kubangin dijuku diend. (Dis. 28:10-15) Jakobu kalikap mikadil ya ku mujimbu ya antu adingay nend pamwing yisala anch avuramena kushilamu kwa Yehova. Chilakej, Jakobu wamwita Yehova kumupandish chisu chatongay anch wading mu ubaj mu makas ma mwanamakwend. Walembila anch: “Ey walonda kal anch: ‘Am nikez kukuwanyish nich yiwamp, nikukuvudishin majuku mey mudi usukuril wa mu karung.’ ” (Dis. 32:6-13) Jakobu wading ni ritiy rikash mu kushilamu kwa Yehova ni wamekesha mwamu kusutin mutapu wading ushichay. w18.02 18-19 par. 9-10

Job wikala ni yishiken kushalijan mu mwom wend. Chakusambish, Job wading “muntu mujim kupandakan antu awonsu a mutambu wa kwingangel.” (Job 1:3) Wading mpich nakash, ni wading wijiken kudi antu avud ni ading amulimishin nakash. (Job 29:7-16) Chikalap nchik mwamu, Job katongap anch wading muntu muwamp nakash kusutamu antu akwau ap kuman anch kakwetap kuswir kwa Nzamb. Twij mwamu mulong Yehova wamutazuka anch “kashalapol wam.”Satan wamurishikisha Job kwa chisum tupamp ni tupamp ni wasala chakwel Job atonga anch Nzamb ndiy wading umumeshina mar. (Job 1:13-21) Kupwa amakundj adding alondina anch adi arund a Job alonda yom yiyimp piur pa Job. Alonda anch Job wading muntu muyimp chawiy Nzamb wading umupupin. (Job 2:11; 22:1, 5-10) Job kamulikap, ap anch Satan udia mpongarik mujim wamurishikisha ni kumusaal Job tupamp ni tupamp. Kupwa kwa mar minam majim, Yehova wamwinkisha Job tupamp twaad yom yadingay nich ni wamuwejina mivu 140 ya mwom. (Jak. 5:11) Pa chisu chinacha, Job wadandamena kumusadin Nzamb nimuchimwendwawonsu. w18.02 7-8 par. 16, 18

Antu akweta mikadil yiney akat kutong yisu yivud anch adi awamp nakash kuyisutamu antu akwau mulong wa kuwap kwau, yom yikutwishau kusal, yom yikwetau ap maz yikwetau mu mwom. Antu mudi inay akat kukimb yom yifanyidina ing ayibazang. Mwin manangu umwing wafunda piur pa antu mudi inay anch: “Mu michim yau muding kachintamb kakemp kakatau kwasin manungun mulong wa kwifukwil amwinend.” Antu amwing alonda anch kwibaz kuyipin nakash, mulong ap antu ibazining kakatiningap payimeningau antu akwau ibaz lel. Yehova ukisin kwibaz, kurumburilau mu Bibil anch “mwin kutal kwa kwibaz.” (Jnsw. 6:16, 17) Pakwez kwibaz kukat kumutwal muntu kulemp ni Nzamb. (Kus. 10:4) Kwibaz udi mwikadil wa Djabul. (1 Tim. 3:6) Uyakin wa ushon umekeshin anch ap antu ashinshamena a Yehova ayisamburila kwibaz. Chilakej, Mwant Ozias wa mu Yudeya wading ushinshamena mu mivu yivud. Pakwez Bibil ulondin anch: “Chikalay kal nich usu uvud, muchim wend wibaza kwa kujiy. Wasala chitil kudi [Yehova] Nzamb wend.” Ozias waya mu tempel ni wosha diseng dia malash, chom chading chakad kumufanyin kusal. Kupwa, Mwant ushinshamena Ezekias niyend wikala mwin kwibaz, ap anch wibaza mu chisu chikemp.—2 Jnsg. 26:16; 32:25, 26. w18.01 28 par. 4-5

Mu Bibil, twilejin anch antu a Yehova apanang milambu mulong wa kukwash mudimu wend. Yisu yimwing apanang mulong wa midimu ya pakampwil. (Kub. 35:5; 2 Ant 12:4, 5; 1 Jnsg. 29:5-9) Mu mivu chitot ya kusambish, in Kristu ijika anch kwading kamungun mu Yudeya ni akadivar ading akwet kuswir kwa kuyikwash. Chawiy mwin Kristu mwawonsu wakwata mupak wa kupan chom chikutwishay kupan mulong wa kuyitumin akadivar. (Mid. 11:27-30) Milambu yiney yadiokalang ku jindond kushalijan. Mu mivu chitot ya kusambish, in Kristu amwing alandisha yom yau yadingau nich, mudi yir ni yikumbu ni apanang nfalang jau kudi atwimbuy. Atwimbuy asadinang nfalang jinej mulong wa kuyikwash akadivar nau anambaz ading mu maswir. (Mid. 4:34, 35) In Kristu akwau alamang nfalang jau chisu chawonsu chakwel akutwish kujipan mulong wa kukwash nich mudimu. Chawiy, ikalap nchik mpich nakash ap kazwendj nakash, muntu ni muntu wapanang chom kanang.—Luka 21:1-4. w18.01 17 par. 7, 9

Tukutwish kwikal ni ukaliweny wa kusal yom yivud, pakwez tukwet mimbu mu yom tukutwisha kusal ku usu wetu ayinetu. Dined didi dilejan tukutwisha etu awonsu kwilej. Kambuy Paul wading ukatin kusal yom yivud, pakwez katwishap kusal yom yawonsu yakatay kusal. Pamulejay Yehova mutapu wading wiyovilay, Yehova wamuleja anch: ‘Usu wam ukat kwikal uwanyidina mu kuziy.’ Paul watesha yom yamulejau kudi Yehova. Chawiy chalonday anch: “Anch niziyil, chad nikwet [usu].” (2 Kor. 12:7-10) Chom ik chakimbay kulond? Paul wamana anch wading ukwet mipak piur pa yom yading yikimbinay kusal ni usu wend amwinend. Wading ukwet kuswir kwa kumukasikesh kudi muntu ukweta usu nakash. Spiritu utumbila wa Nzamb wafanyina kumwinkish Paul usu chisu chiziyinay. Ni spiritu winou wafanyina kand kusal yom yivud. Spiritu wa Nzamb wafanyina kumwinkish Paul usu wa kusal yom yakanganyay kusal ni usu wend amwinend. Yom mudi yiney yikutwish kand kutushiken etu. Anch Yehova watwinkish spiritu wend utumbila, tukwikal kamu ni usu! w18.01 5 par. 8-9

Mukwasha mwaney chakwel asangera kutambul dibatish. Pakwez chakusambish, tang ni ileja yom yiletinau kudi dirijek dia Yehova mulong wa kuyikwash anvaj. Kupwa, mu mutapu uwamp ni pa chisu chiwanyidina, muleja mwaney anch mupak wa kwipan amwinend kudi Yehova ni kutambul dibatish udi wa usey nakash, pakwez ukumuletin yiyukish yivud. Chiudia nvaj, ukwet chisend cha usey nakash cha ‘kuyikand ni kuyibabesh nich malejan ma Yehova.’ (Efes 6:4) Chinech chirumburikin anch ufanyidin kuyifundish aney yom yilondinay Bibil ni kuyikwash ikala kamu nich kashinsh ka yom yilejinau. Anch ritiy rau rakasikan, akwikal chad abachikinau kwipan ayinau kudi Yehova ni kumwinkish yom yau yiwamp. El Dizu dia Yehova, spiritu wend ni usu wen yiyikwasha anen mulong wa kwikal ni ‘manangu mulong wa dipandish.’ w17.12 20 par. 17, 19

Daniel wawanyisha mivu piswimp 100 ni wading piswimp ni kufa. Ov, Daniel wading uchingejin kand kwikal ni mwom? Mwaning! Kwinsudiel kwa mukand wa Daniel, tutangin anch Nzamb wamukana anch: “Ikal mwin yakin djat ni kwisudiel. Chawiy ukez kufa.” Daniel kijikap chisu chikushikena yom yiney. Daniel wading wij anch afu iswedishin ni anch “ku rufu kuukuya kwikiling midimu, ap yitongijok, ap ronganyin, ap manangu,” kwadingay kufanyidinay kuya. (Mul. 9: 10) Pakwez, chom chinech chakimbap kwikal nsudiel ya Daniel. Yehova wamwinkisha ruchingej ruwamp ra machuku ma kurutu. Uruw wamwinkishau muprofet Daniel wawiy udia mu mazu ma mufund wa nlel. Daniel kijikap chisu chikushikena yom yiney. Watesha anch ukufa ni ukwiswedish. Pakwez pateshay Daniel kushilamu kwinoku anch, “ukez kuvumbuk mulong wa kutambul difut diey,” wijika anch akumuvumbul mu machuku makweza kurutu. Chom chinech chikushiken chisu chilemp kupwa kwa Daniel kufa, “kwisudiel kwa [machuku].” Ni Bible de Jérusalem ulondin anch: “Ukez kuvumbuk mulong wa kutambul difut diey kwisudiel kwa chisu.” w17.12 8 par. 17-18

Yehova wayileja amakurump a in Isarel anch imburija kutentam kwend. Chakusambish, amakurump afanyina kwijik yom yawonsu piur pa mulong. Kupwa, afanyina kushinshikin nawamp yibachikin ya mwin kujipan, mwikadil wend ni yisal yend ya pakur pakwatau mupak wa kwijik anch chifanyidin kumwovil riy ap bwat. Amakurump afanyina kwijik anch mwin kuchin winou wading umukisin muntu wajipay ni anch wading ukimbin kamu kumujip. (Kuch. 35:20-24) Anch kwading atuman, chifanyidin kwipulap atuman aad kurutu kwa kumufish nich mwin kujipan winou. Kupwa kwa kwijik kamu yom yasadika, amakurump afanyina chad kutongin piur pa muntu winou, kafanyinap kwau ching kwimen pa yom yasalay. Amakurump aswirikena manangu mulong wa kujingunin yom ni mayingishin masala anch yom yiney yishikena. Cha usey, aswirikena spiritu utumbila wa Yehova chakwel ayikwasha kwimburij manangu, riy ni kutentam kwend.—Kub. 34:6, 7. w17.11 18-19 par. 13-14

Pitwasambisha kwilej Bibil, twileja uyakin umwing uwamp nakash. Tukutwish kuutazuk anch udi uyakin ‘ukur’ mulong wawiy twileja pa kusambish. Uyakin ik umwing udia pakach pa uyakin winou? Kwisambishin, twileja anch Yehova udi Sakatang wetu ni anch ukwet chitongijok mulong wa antu. Twileja kand anch Nzamb wamutuma Mwanend panap pansh mulong wa kupan mwom wend mudi difut chakwel tutwisha kukolik ku chitil ni ku rufu. Ni twileja kand anch Want wa Nzamb ukupwish mar mawonsu ni tukushakam chikupu pa divu mu chisambu ni mu musangar. (Yoh. 3:16; Kuj. 4:11; 21:3, 4.) Yisu yimwing, kutesh kwetu kwa uprofet wa Bibil ap kwa maverse ma Bibil akat kukwovikesh nawamp. Anch chinech chashiken, chidi cha usey kwitekin chisu cha kwilej yom yiney yisu ni kuyitongijokin. (Mid. 17:11) Tukwetap ching kuswir kwa kwijik kushalijan kudia pakach pa yom yiney yikur ni yisu, pakwez tufanyidin kand kubabal nakash mulong wa kwijik nawamp mutapu urumburilau yom yiney yisu. Kwilej mudi kwinoku kwa mushiku kukutukwash chakwel uyakin winou usu wikala pamwing ni uyakin ukwau wa Bibil twija. w17.06 13 par. 15-16

Tufanyidin kamu kwikal ababela pakampwil ku yom yikutwisha kutubachik kubwambwil kwi mbil ja piur ja Yehova. Chilakej, chidi cha manangu kudi antu atondijadina kal kwitekin mimbu kwisambishin piur pa yom mudi kukwatijan ku mujimbu, kususujan ni kwikal ayinau. (Jnsw. 22:3) Kudi yom yikwau ya ubaj yikutwisha kushiken anch twaya mu weny mulong wa kwisak ap chisu tusadina mudimu pamwing ni muntu wa mujimbu ukwau. (Jnsw. 2:10-12, 16) Yom ik ukutwisha kusal mulong wa kwichidij? Iyijikisha anch udi Kaman wa Yehova. Ikal ni yaku yiwamp ni kangal wavuramen anch kwizez ni muntu wa mujimbu ukwau kukutwish kukushikij ku ubaj. Tufanyidin kand kubabal chisu tukweta ushon ap tudia ayinetu. Tukutwish kwikal ni kuswir anch muntu kanang atwongoja. Tukutwish chad kwikal ni yovil anch muntu mwawonsu atukwasha. Chinech chidi cha ubaj kusal mwamu. Anch wiyov mwamu, kangal usala chom chikutwisha kukukangesh kutambul difut. Sej kudi Yehova ni kudi akadivar nau anambaz ney chakwel akukwasha.—Kus. 34:18; Jnsw. 13:20. w17.11 28 par. 4-5

Yehova kasangarangap anch amujip muntu. Anch mwin Isarel wamujip mukwau, mwanamakwend ikundj wa muntu wajipangau, utazukinau anch “mwin kufundakesh mash,” ni ndiy ufanyidin kumujip muntu winou. (Kuch. 35:19) Mu kusal mwamu, mwin kujipan ukufut chad mwom wend mulong wa muntu wajipangay pakad mulong. Anch muntu wajipanang kamujipinap swa, Ngand ya Kushilamu yikutwish kuyip, ap yikwikalap kand yitumbila. Yehova walonda anch: “Kangal wakayipishay mwi ngand yiushichanya” mu kwichil mash ma muntu, charumburik anch kumujip muntu. (Kuch. 35:33, 34) Pakwez yom ik yafanyina kusadik anch mwin Isarel wamujip muntu pakad kutongin? Ap anch rufu rashiken pakad kutongin, muntu wajipanang ufil kwend nich mulong wamujipang muntu pakad mulong. (Dis. 9:5) Pa mulong mudi winou, Yehova walonda anch chifanyidin kumwovil riy. Muntu wajipanang pakad kutongin wafanyina kumuchin mwin kufundakesh mash, ni kuya mu musumb umwing pakach pa misumb musamban ya kuchinin. Chad akumulik ashakam mu musumb winiwa, ni akumuking. Pakwez ukudandamen kushakam mu musumb winiwa djat ni pakufilay mwin kupesh mujim.—Kuch. 35:15, 28. w17.11 10-11 par. 3-5

Mwawiy mwasalay nambaz umwing udia mu Australie. Tatuwenend walikang nakash uyakin ni yisu yimwing wading kujiman. Chawiy, kurutu kwa kumutazuk tatuwenend ku telefon, ndiy ni nfumwend amwitang Yehova chakwel ayikwasha kwipuk kumwakul ni ujim. Mulong wa kwipuk mambamb malemp makutwisha kuyishikij ku kupwitamijan piur pa relijon, itekinang chisu kanang cha kwambamb. Anch kudi kupwitamijan, ukutwish kwikal ni yovil ya kwifish nich mulong uyikatin anamakwey ni ukatin kuyisangaresh. Pakwez vurik anch kushinshaman kwey kudi Yehova kufanyidin kwikal kukash nakash kusutamu rukat ukweta mulong wa dijuku diey. Anch anamakwey ajingunin chom chinech, akutwish kwijik anch kumusadin Yehova kudi kwa usey. Ukutwishap kumushindin muntu ap umwing kwitiy uyakin. Pakwez, ukutwish kusal anch antu akwau amana anch kulondul njil ja Yehova kukukwashin ey. Chakin kamu, Yehova uyinkishin anamakwey mutapu wawiy umwing ni utwinkishinay etu, wa kutond kumusadin ndiy.—Isay 48:17, 18. w17.10 13 par. 15-16

Tufanyidin kumekesh anch twovil kurumburik kwa yom tulondina. Chilakej, anch akadivar ap anambaz netu kakwetap yakudia yiwanyidina ap masun, aswirikedin kuyikwash pa ndond pa kuyilej kwau mazu mawamp. (Jak. 2:15, 16) Chilik chimwing, mulong tumukatin Yehova ni amutej netu, tufanyidinap kwetu ching kulembil chakwel tumana antu avud a kulejan nau, pakwez tufanyidin niyetu kwipan nakash mu mudimu wa kulejan. (Mat. 9:38) Kambuy Yohan walonda anch tufanyidin kukat ‘mu yisal ni uyakin.’ Chawiy rukat retu rifanyidin kwikal “rakad rubabek.” (Rom 12:9; 2 Kor. 6:6) Yisu yimwing muntu ukutwish kutong anch umekeshin rukat. Pakwez, ov, rukat rend ridi kamu rakin ni ridiokila ku muchim? Yom ik yimubachikina kukat? Kwikil chom chipandikena kuyip mudi kumekesh rukat ra rubabek. Rukat ra makasu ridi ra chamwamu. w17.10 4 par. 5-6

Chakwel twitiy anch Dizu dia Nzamb dikala nich usu padi etu, tufanyidin kuditang chisu chawonsu. Tufanyidin kusal usu wa kuditang dichuku ni dichuku. Avud pakach petu akwet midimu nakash ya kusal, pakwez tufanyidinap kulik anch chom chin chawonsu ap yisend tukweta yitukangesha kutang Bibil. (Efes 5:15, 16) Tukutwish kwitekin chisu cha kumutang pamanch, yisu yimwing muten ap urel. Twitiyin yom yafunday nfund a kuseng anch: “A, mudi nikatila yijil yey! Nikat kuyitong mu yisu yawonsu.” (Kus. 119:97) Pakwez, chifanyidinap kwau kwimen pa kutang Bibil. Tufanyidin kamu kutongijokin pa yom tutangina nakash ni kushinshikin pa yom twatanga kal. (Kus. 1:1-3) Chawiy tukutwish chad kusadin manangu ma Bibil mu mwom wetu. Chawiy ap anch twatang Bibil wabudishinau kal ap udia mu mashin, tufanyidin kwitiy anch Dizu dia Nzamb dituswimpa ni ditubachika kusal chom kanang. w17.09 22 par. 4-5

Chinech chirumburikinap anch chisu chawonsu chiding chiwamp kumekesh ranaken. Chilakej, Mwant Saul wamana anch wamekesha ranaken chisu chalikay kumujip Agag, wading mwant wa in Amalek ni mukankuny wa antu a Nzamb. Saul kajipap kand annam awonsu a in Amalek. Pakwez Yehova wamuleja Saul kujip in Amalek awonsu ni annam au awonsu. Mulong Saul wabwambwila, chawiy Yehova kamwitiyap kand kwikal mwant. (1 Sam. 15:3, 9, 15) Yehova udi Nzuj utentamina. Ukutwish kutang michim ya antu, ni wijing chisu chifanyidina kulik kumekesh ranaken. (Mad. 2:17; Ezek. 5:11) Kurutu oku ukulet dirumburish kudi antu awonsu alikina kumuziyin. (2 Tes. 1:6-10) Chikwikalap kand chisu kudiay Yehova cha kumekesh ranaken kudi antu ayimp. Pakwez, pakuyijiyishay antu ayimp, ndiy ukumekesh ranaken kudi antu atentamina akupandishay. Chakin kamu, chidiap chisend chetu cha kuyirumburish antu ap anch akupand ap akufa. Pakwez, tufanyidin kusal yom yawonsu tukutwisha kusal mulong wa kuyikwash antu. w17.09 12 par. 10-12

Kwilam udi mwikadil utukwashinay Yehova Nzamb kwikal nich. Yehova ukwet mwikadil wa kwikal uwanyidina. Pakwez, etu tukutwishap kuwikal nich uwanyidina mulong tudi antu akad kuwanyin. Chakin kamu, kuburen mwikadil wa kwilam udi musul wa milong yivud yikwetau antu avud nlel. Kuburen mwikadil winou kukutwish kumushikij muntu alabisha kusal yom ya usey ap akanganya kusal nawamp ku shikol ap ku mudimu. Kuburen kwilam kukutwish kand kumutwal muntu kulond yom yiyimp, kuleu, chisum, kujip uruw, kwandam mu mabaz, kwikal musuk wa chom kanang, kwandam mu rukan, kwikal ni yovil ya runeng, mayej makata kusamburok mulong wa masandj ni madikaj makad kuchingejin. (Kus. 34:11-14) Antu akad kwilam akat kwiletin milong ayinau ni antu akwau. Ni pasutina chisu, chimeken kamu anch antu adandamedin kuburen mwikadil wa kwilam. Chinech chikutwishap kutukashimwish, mulong Dizu dia Nzamb diatakela kulond anch kuburen mwikadil wa kwilam udi uman umekeshina anch tushich mu “machuku ma kwisudiel.”—2 Tim. 3:1-3. w17.09 3-4 par. 1-2

Anch tukwet “chisambu cha Nzamb,” tukwiyakamishap ni manangu ni michim yetu yikwikal zong. Twij anch Yehova ukat kutubangin ni ukatin anch tuya kurutu. (1 Pita 5:10) Ni chinech chikat kutuking ku yovil ya kwiyakamish nakash ap kuziy. Piswimp ap mar makash mezin mulong wa antu awonsu. (Mat. 24:21, 22) Twijap kamu nawamp yom yikumushikena muntu ni muntu. Pakwez, tufanyidinap kwiyakamish nakash piur pa chisu chinicha. Ap anch twijap kamu yom yawonsu yikusalay Yehova, pakwez tumwij Nzamb wetu. Twij yom yasalay pakur mulong wa atushalapol end ashinshamena. Tumen anch chikalap nchik yom yikushikena, Yehova ukwikal nich kashinsh anch chitongijok chend chiwanyin. Ni ukusal mwamu mu mutapu wakad kuchingejin! Chawiy, chisu chin chawonsu chikatay Yehova kutusadin chom kanang, tukat kuman mu mutapu ukwau anch ‘chisambu cha Nzamb chisutil ronganyin rawonsu.’ w17.08 14 par. 16-17

“Ov, kushik chisu ik?” Chinech chawiy chipul chipulau aprofet ashinshamena Isay ni Abakuk. (Isay 6:11; Aba. 1:2) Chisu chafunday Mwant David Kuseng wa 13, wipula chipul chinech tupamp tunying. Ni chisu chamunyingumukau Yesu Kristu kudi antu akad ritiy, wayipula anch: ‘Ov, kushik chisu ik?’ (Mat. 17:17) Niyetu tukutwish kwipul chipul chinech nlel. Yom ik yikutwisha kutushikij kwiyipul anch: “Ov, kushik chisu ik?” Pamwing ap chom chiyimp chatushikedin. Tukutwish kwikal ayej ap kunanap. Ap pamwing ap tukwet yakamish mulong tudi mu ‘yisu ya mar yikasikena nakash.’ (2 Tim. 3:1) Ap kand yisalijok yiyimp ya antu atunyingumukina yawiy yisadina anch tuziya nakash. Chikalap nchik diyingishin dia mutapu ik, chikasikeshin kwijik anch Yehova kayifishap nich atushalapol end a pasak amwipula chipul chinech. Yom ik yikutwisha kutukwash chisu tudia mu yisu yikash yikasikena kujijamen? Mwin kwilej Jakobu wakula nich mazu madia mu mufund wa nlel. w17.08 3-4 par. 1-3

Yesu wakata anch in kwilejend ikala nau arund mwiur kusutin kusadin ‘mapit makad kutentam.’ Mutapu umwing wa kumekesh kushinshaman nich yom yetu ya ku mujimbu udi wa kupan yipan mulong wa mudimu wa kulejan usadikina pa mangand mawonsu wasambelau kulejan kudi Yesu anch ukusadik. (Mat. 24:14) Changadim umwing uchidia mukemp wa mu Inde wasala kamushet kend kakemp ni watekangamu nfalang chisu chawonsu. Walika ni kuland yom yend ya kusengan nich mulong wa kusal mwamu. Pizula kamushet kinak, wapana nfalang jinej jawonsu jalamay mulong wa kujisadin mu mudimu wa kulejan. Mukadivar umwing wa mu Inde wading ni chir cha mis ya koko (noix de coco). Wapanang mis yivud ku biro wa in kukarumun wa ku Malayalam. Mulong biro ukweting kuswir kwa kuland mis ya koko, wamana anch chipan chend chiding cha usey nakash kusutamu kulet nfalang. Kwawiy kwinoku ‘kusadin manangu.’ Mutapu wawiy umwing, akadivar a mu Grèce akat kupan chisu chawonsu many ma mpach, mantek ni yakudia yikwau ku dijuku dia Betel. w17.07 4-5 par. 7-8

Padingau mu usuk mu Babilon, in Yuda kovap musangar wa kuwang. Michim yau yading yinenganen ni ading akwet kuswir kwa kuyikasikesh. Pakwez mudi mwatakela kulond Dizu dia Nzamb, Yehova wayikwasha antu end. Mutapu ik? Mwant Sirus wa in Peris wakwata Babilon ni walonda piur pa Yehova anch: ‘Ndiy wanginkishin kand chisend cha kumutungin chikumbu mu Yerusalem.’ Sirus wayileja kand in Isarel anch: ‘Muntu mwawonsu udia pakach penen wa antwend, el Yehova Nzamb wend ikala nend, achirik kwend.’ (2 Jsng. 36:23) Chinech chafanyina kuyikasikesh in Isarel ading mu Babilon mud ik! Yehova kakasikeshap kwend ching muchid wa Isarel pakwez wakasikesha kand mwin Isarel mwawonsu panrend. Yehova usadin kand mwamu nlel mulong wetwetu. Nfund a kuseng wafunda anch Nzamb “ukat kwok abukukina mu muchim, ukat kukas yitat yau.” (Kus. 147:3) Anch tuyedin ap tunenganen, tukutwish kwikal ni kashinsh anch Yehova utubangidin. Ukat kutwongoj ni ukat kwok yovil yisansena. (Kus. 34:18; Isay 57:15) Ukat kutwink manangu ni usu mulong tutwisha kurish nich milong yetu.—Jak. 1:5. w17.07 16 par. 4-5

Yehova udi mpich mujim nakash mu mangand mawonsu. Yom yawonsu yidi yendendiy. (1 Jsng. 29:11, 12) Pakwez Yehova ukat kupan kudi awonsu. Kujikitish mud ik tukweta mulong watwinkisha niyetu mapit ma mu spiritu! Ov, mapit minam mapit ik? Pakach pa mapit minam padi (1) Want wa Nzamb, (2) mudimu wetu wa kulejan ni (3) uyakin wa usey udia mu Dizu diend. Pakwez anch tubabelap, mu kusut kwa chisu tukutwish kuvuramen usey ukweta mapit minam. Tufanyidin kudandamen kuvurik ayinetu usey umakweta ni kumakat nakash. Mulong wa kwikal an a Want wa Nzamb, avud pakach petu aswimpa kamu nakash mu mwom yau. (Rom 12:2) Pakwez kurish kwetu kudandamedin. Tufanyidinap kulik anch rukat retu mulong wa Want ariziyisha kudi chom chin chawonsu, mudi kukat yom ya ku mujimbu ap maku mayimp ma masandj.—Jnsw. 4:23; Mat. 5:27-29. w17.06 9 par. 1; 10-11 par. 7

Yehova kamurumburilap Job mulong wak wading umen mar. Pakwez, wamukwasha chakwel ijika anch udi mukemp nakash anch wiyisikesh ni Nzamb. Wamuleja Job anch kudi milong yidia ya usey nakash kusutamu milong ya Job. (Job 38:18-20) Mazu malonday Yehova mamukwasha Job kuwapish yitongijok yend. Ov, Yehova waburena ranaken pa kwambamb ni Job mu mutapu winou kupwa kwa kuman mar mawonsu minam? Bwat, ni Job niyend katongap mwamu. Job watesha ni wakwata nich usey chiyul cha Yehova. Walonda anch: “Nifish kal nich mulong wa mazu mam, katat nakarumun kal muchim wam, ni kwibumburol pansh kurutu kwey.” (Job 42:1-6) Kupwa kwa Job kutesh yiyul ya rukat ya Yehova ni kuswimp yitongijok yend, Yehova wasala anch antu akwau ijika anch wasangera kushinshaman kwa Job.—Job 42:7, 8. w17.06 17-18 par. 11-12

Mutapu ik tukutwisha kwijik anch tukwet chitongijok chiwamp piur pa mudimu wa ku mujimbu? Tukutwish kwiyipul ayinetu anch, ‘ov, nimen anch mudimu wam wa ku mujimbu uwapin ni usangareshin pakwez nimen mudimu wam mulong wa Yehova mudi wa chamwamu ap uletishina usweral?’ Kutong piur pa yom yiney kukutwish kutukwash kwijik nawamp yom tukatina kamu chakin. Yesu watufundisha yom tufanyidina kutek pa ndond ya kusambish mu mwom wetu. Dichuku dimwing waya kuyital anambaz aad kwol kwau, Mariy ni Mart. Kapamp kamwing, Mart wasambisha kwisuk yakudia mulong wa Yesu, pakwez Mariy washakama piswimp ni Yesu ukat kutesh mafundish mend. Mart winana anch Mariy kamukwashinap kwisuk. Yesu wamwela Mart mazu madia mu mufund wa nlel. (Luka 10:38-42) Pinap, Yesu wafundisha dilejan dia usey. Mulong wa kwipuk kampuw kadiokila ku kuwanyish maswir metu ni mulong wa kumekesh rukat retu mulong wa Kristu tufanyidin kutond “chom chiwamp.” Chinech chirumburikin anch urund wetu ni Yehova ufanyidin kwikal kamu chom cha usey nakash mu mwom wetu. w17.05 23-24 par. 9-10

Yehova wayinkisha anvaj chisend cha kuyifundish anau uyakin. Kayinkishap angak ap antu akwau chisend chinech. (Jnsw. 31:10, 27, 28.) Pakwez anvaj akad kwijik dizu dia ngand yidiau akutwish kuswiriken ukwash mulong wa kuyishik anau ku michim. Anch anvaj it ukwash, chirumburikinap anch achinin chisend cha kulil anau. Pakwez winou ukutwish kwikal mutapu wa kuyilil anau “mu kuyikand ni malejan ma [Yehova].” (Efes 6:4) Chilakej, anvaj akutwish kuyit amakurump a chikumangen yiyul piur pa kutakel difukwil dia mu dijuku ni kuyikwash kukimb arund awamp mulong wa anau. Chikwau kand, mulong wa kuyikwash anau, anvaj akutwish kutazuk majuku makwau chisu ni chisu chakwel asalang nau difukwil dia mu dijuku. Chakin kamu, ansand avud akat kwilejin kudi in Kristu akwau payilingau nau mu mudimu wa kulejan ni pasadiningau nau yom yikwau.—Jnsw. 27:17. w17.05 13-14 par. 17-18

Yesu nau anvajend ikala arefije mu Idjibit kupwa kwa mwangel wa Yehova kumubabesh Josef anch Mwant Herod ukimbin kumujip Yesu. Ashakama kwinikwa kushik ni pafilay Herod. (Mat. 2:14, 19-21) Kupwa kwa mivu yivud in kwilej a Yesu “[apalangana] djimu mu makunku ma ngand ya Yudeya ni ya Samaria” mulong wa kuyizengol. (Mid. 8:1) Yesu wading wij anch in kwilejend avud akez kadiokal ku yikumbu yau ku usu palonday anch: “Anch akuzengolany mu ul umwing, chinyinany mu ul ukwau.” (Mat. 10:23) Tunan twa arefije inay adi Atuman a Yehova. Avud akat kushadish antu akatinau ni yom yau. Amwing pachininingau kwol kwau ap pashichingau mu kompony wa arefije, arishining ni mboj, kuleu maar, masengan ma nfalang, kwiy, ni kusal masandj. Avurika anch kurutu kwa machuku urefije wau mu kompony ukupwa mudi mwapwa chisu cha an a Isarel chadingau mwi mpay. Yiney yayikwasha kwikal ni chitongijok chiwamp.—2 Kor. 4:18. w17.05 3-4 par. 2-5

Pachipatu, ey ap muntu mukwau wija ukutwish kuman yom yimekena mudi ya kuburen kutentam mu chikumangen. Pakwez kangal wipwakal. Pakwez shal ushinshamena kudi Nzamb, kulembil chakwel akukwasha, ni kumuchingejin ndiy. Vurik anch mulong wa kuburen kuwanyin, ukutwish watesh yom nayimp ni pamwing ap ukutwishap kwijik nawamp yom yawonsu piur pa mulong kampand. Ipuk kulond mazu mayimp, makutwisha mapandikesh mulong. Kupwa, pa ndond pa kwichengejin amwiney, kwat mupak wa kushal ushinshamena ni kuchingel nich kushimpish muchim chakwel Yehova apwisha mulong. Chawiy ukwikal ni dilau dia Yehova ni chiyukish chend. Ukwikal nich kashinsh anch Yehova, ‘Nzuj wa mangand mawonsu,’ usadining chisu chawonsu yom yitentamina, “mulong jinjil jend jawonsu jidi [jitentamina].”—Dis. 18:25; Kuv. 32:4. w17.04 20 par. 17

Yom ik yikuyishikena antu alikina kuswimp ni akwashina mangand minam chisu chikweza mar makash? Yehova washilamu kal anch ukuyijiyish antu ayimp awonsu pa divu. (Kus. 37:10) Nlel, antu avud akat kujindjik yom yiyimp yisadiningau, ni yisu yivud kakuyipupangap kwau. (Job 21:7, 9) Pakwez Bibil utuvurishin anch: “Nzamb ukat kuman yaku ya antu awonsu, mes mend matadil kwawonsu kuyilay muntu ni muntu. Kwikil mididim ap [ndond yijingamina] yikutwisha kuyijindjik in kusal kuyip kudi Nzamb.” (Job 34:21, 22) Chawiy kwikil mutapu ap umwing wa kumujingam Yehova. Ukat kuman yom yawonsu yisadinau antu ayimp. Kupwa kwa Armagedon, tukutwish kutal ndond yading yishichau antu ayimp, pakwez tukuyimanap. Akuyijiyish chikupu!—Kus. 37:12-15. w17.04 11-12 par. 5