Ngond wa 10

Manangu madiokiling kudi Yehova ni ukat kumapanang kwa kwikatin kudi antu akwau. Mutapu umwing tukutwisha kwikal ni manangu udi wa kwitiy dipup dia Nzamb. Kusal mwamu kukat kutuchidij ku kusal yom yiyimp ni kutukwashin kushal piswimp ni Yehova. (Jnsw. 2:10-12) Ni tukwikal ni ruchingej ruwamp ra mwom wa chikupu. (Jud 21) Mulong tudi antu akad kuwanyin ap mulong wa mutapu watulilau, chikasikening yisu yimwing kwitiy dipup ni kudiman anch chidi chom chiwamp. Pakwez anch twaman yiyukish yidiokila ku kwitiy dipup dia Nzamb mu mwom wetu, tukwijik kamu anch utukatin nakash. Jinswir 3:11, 12 utulejin anch: “Mwanam ikundj, kangal wadiwol [kupup kwa Yehova].” Kupwa ulondin kand anch: “[Yehova] ukat kumubabesh mwawonsu ukatilay.” Tukutwish kwikal nich kashinsh anch Yehova ukatin yom yiwamp mulong wetwetu. (Heb. 12:5-11) Mulong Nzamb utwij nawamp, dipup diend diding chisu chawonsu diwanyidina ni tukweta nich kuswir. w18.03 27-28 par. 1-2

Kambuy Pita wafunda mukand kudi in Kristu a mu Aziy Mukemp ading arishina ni “ruteng ra kasu,” ap kuzengol ni ading akwet kuswir kwa kuyikasikesh ni kuyitakel. Yom ik yafanyina kuyikwash in Kristu adia ndond yawonsu chakwel apanda mu yisu yiney ya mar? (1 Pita 1:1; 4:4, 7, 12) Pita wading uyikasikeshin akadivar nau anambaz nend kwakijan “amwing ni akwau,” ap anch ading ijikijadin amwing ni akwau ni ading asadin yom pamwing. Kwikal in kwakan kwafanyina kuyikwash mutapu ik? Kwafanyina kuyisejish piswimp pamwing. Chidi nchik piur pey? Ov, uvurikin chisu cha musangar wasutisha pakutazukau kudi muntu kanang ku chikumbu chend? Ni anch wamutazuk muntu ku chikumbu chey, chinech chikat kusal anch wikalany pamwing. Mutapu uwamp wa kuyijik akadivar nau anambaz udi wa kuyak. In Kristu ading ashicha pa chirung cha Pita ading akwet kuswir kwa kwikal pamwing umwing ni mukwau mulong milong yading yidandamedin kwikal yikash. Niyetu tufanyidin kusal mwamu mu “machuku ma kwisudiel” minam.—2 Tim. 3:1. w18.03 15-16 par. 1-3

Bibil ukasikeshidin pa kwikal antu a mu spiritu. Rom 8:6 urumburil anch tukwikal ni mwom uwamp anch twatong mudi mukatay Yehova kutong: ‘Kutek manangu ku yom ya ku mujimbu kurumburikin rufu, pakwez kutek manangu ku spiritu kurumburikin mwom ni chisambu.’ Chawiy anch twikal antu a mu spiritu, kudiosh katat tukwikal mu chisambu ni Nzamb, mu chisambu ayinetu ni tukutwish kwikal ni ruchingej ra mwom wa chikupu. Chawiy, tushich mu mangand mayimp. Mulong atunyingumukin kudi antu ayimp akad kutong mudi mutonginay Nzamb, chitin usu nakash mulong wa kulam manangu metu. Anch twizwishinap manangu metu ni yitongijok ya Yehova, mangand makwizwish manangu metu nich mikadil ni yitongijok ya ku mujimbu. Jud walonda anch antu a ku mujimbu akutwish kushadish spiritu wa Yehova.—Jud 18, 19. w18.02 17 par. 5; 18 par. 7-8

Adokiter ni amingang avud akat kusal mudimu mukach mwa antu akweta mayej ma kusamburok. Akat kuyibangin ayej au mulong akatining kamu kuyikwash. Pakwez aswirikedin niyau kwiking chakwel kangal mayej minam masadinau usu wa kwok mayisamburikina. Chitudia atushalapol a Yehova, tufaniken nau adokiter inay. Avud pakach petu ashich ni asadin mudimu pamwing nau antu akweta yisal yiyimp yishalijadina kamu nakash ni mikadil ya Nzamb. Chinech chikutwish chatukasiken kamu. Mu machuku minam ma nsudien ma ditenchik dined dia yom, antu akad kumukat Nzamb aduwiling mbil ja kuwap ni ja kuyip. Kambuy Paul warumburila mulong wa mikadil yiyimp chisu chamufundinay Timote mukand. Paul walonda anch mikadil yiney yiyimp yikumekan nakash patwaseja kal piswimp ni disudien dia mangand minam. (2 Tim. 3:1-5) Ap anch tukutwish kuman anch mikadil yiney yidi yiyimp, tukutwish kudandamen kwikal ni yibachikin yiyimp ya antu atunyingumukina piur pa mutapu wau wa kutong, wa kulond ni yisal yau. (Jnsw. 13:20) Chawiy, tufanyidin kwichidij ayinetu mulong wa kulik kwikal asamburidinau mikadil yiyimp chisu tuyikwashina antu mulong amwijik Yehova. w18.01 27-28 par. 1-2

Mu muvu wa 33, kupwa kwa kuvumbuk kwend, Yesu wisamba nau amakundj 500 ni kusut, amband, ni ap kand anikanch. Chinech chikutwish kwikal chisu chayilejay mazu madia kwiur oku. (1 Kor. 15:6) Yesu wayileja in kwilejend kwikadish niyau in kwilej. Muntu mwawonsu wakimba kwikal mwin kwilej wend, ap kusend “mpand” yend, wafanyina kutambul dibatish. (Mat. 11:29, 30) Mulong wa kumusadin Nzamb mu mutapu ukatinay, muntu ufanyidin kwitiy anch Nzamb wamusadina Yesu mulong wa kuwanyish rusot rend. Kupwa, muntu winou ukutwish chad kutambul dibatish mu mutapu ukatinay Nzamb. Bibil utwinkishin kashinsh anch in kwilej a kusambish a Yesu ading ij mutapu chidia cha usey kutambul dibatish. Katongangap anch afanyidin kuchingel ni kutambul dibatish machuku ma kurutu.—Mid. 2:41; 9:18; 16:14, 15, 32, 33. w18.03 5 par. 8

Nlel unou, tushich mu mangand mwizwila mwikadil uyimp ni difukwil dia makasu. Antu akwet yibachikin yiyimp ya Babilon Mujim, udia ditenchik dia pa mangand mawonsu dia relijon wa makasu, utazukinau kudi Bibil anch “ndond ya kushakam ayilembil.” (Kuj. 18:2) Pakwez etu tudi mudi angendj mu mangand minam. Mudi chibudikin, antu akutwish kutuman anch tushalijangen nakash ni akutwish kutusip. (Mar. 13:13) Komb, mudi Daniel, tusejany piswimp ni Nzamb wetu, Yehova. Anch tudi ikepishina, amuchingejidina Yehova ni amuziyidina, Yehova ukutuman niyetu anch tudi antu a usey nakash. (Age 2:7) Anvaj akutwish kwilej malejan ma usey kusutin anvaj a Daniel. Padingay Daniel mwan mukemp mu Yuda, antu avud adingau nau ading ayimp nakash. Pakwez, ndiy wapama mu kumukat Yehova. Ov, chinech chashikena kwau mwamu pakad kusal usu kanang? Bwat. Anvajend amufundisha piur pa Yehova. (Jnsw. 22:6) Ap dijin dia Daniel dirumburikina anch “Nzwij wam udi Nzamb,” dimekeshin anch anvajend ading amukatin Yehova. (Dan. 1:6) Chawiy en anvaj, ikalany ashimpishina muchim chisu uyifundishinanya anen piur pa Yehova. Kangal waziyany. (Efes 6:4) Lembilany pamwing nau anen. Yilembilany. Salany usu wen wawonsu wa kuyifundish kukat yom yilondinay Yehova anch yidi yiwamp ni Yehova ukukuyukishany nakash.—Kus. 37:5. w18.02 6-7 par. 12, 14-15

Tumwinkining Yehova mulong winou wawiy mutapu uwamp wa kumwifukwil. Mu chishimushimu, kambuy Yohan watesha atushalapol a Yehova mwiur akat kulond anch: “A! [Yehova], Nzamb wetu! Ey yey uwanyidina kutambul uyaj, ni katumb, ni ukash. Mulong yey watanga yom yawonsu, ni yom yawonsu yidiaku yishich mulong wa rusot rey.” (Kuj. 4:11) Chakin kamu, Yehova uwanyidin uyaj ni katumb, chawiy tufanyidin kamu kumwinkish yom yetu ya usey. Kusutin Moses, Yehova wauleja muchid wa Isarel kusal misambu tupamp tusatu pa muvu. Mu kwifukwil kwau ku misambu yiney mwading kand kumwinkish Yehova yipan. Ayileja antu anch kangal “kwimekesh kurutu kwa [Yehova] makas a makas.” (Kuv. 16:16) Nlel kand, chidi cha usey mu difukwil dietu kupan pakad choy. Mu kusal mwamu, tukumekesh anch tukwatin nich usey ni kukwash mudimu wa dirijek dia Yehova. w18.01 16 par. 4-5

Yesu wayileja in kwilejend anch: “Itwikany mpand yam.” Ni walonda kand anch: “Mipim yen yikwiswedish . . . Mulong mpand yam yiswakel kwitwik, ni chisend cham chipipel.” (Mat. 11:29, 30) Chinech chidi kamu chakin! Yisu yimwing tukutwish kuziy pituyila ku yikumangan ap pitulejena. Pakwez, mutapu ik tukata kwiyov chisu tukata kuchirik ku chikumbu? Tukat kwiyov nawamp ni irijekina mulong wa kurish ni milong yetu. Chakin kamu, mpand ya Yesu yipipel. Shinshikin chilakej cha nambaz wetu umwing. Nambaz winou uyedin mayej ma kuziy chisu chawonsu, kuziy mu manangu, ni mutu wading umuswejin nakash. Chawiy, yisu yimwing yading yimukasikedin nakash kuya ku yikumangan. Pakwez, dichuku dimwing pasalay usu wa kuya ku yikumangan, wafunda anch: “Diskur diading disambidin piur pa kuziy. Diskur dined adisala mu mutapu wa kwitek pa ndond ya muntu mukwau ni yom yalondau yading yintadin chawiy nasambisha kudil. Navurika anch ku yikumangan yawiy ndond nading nifanyidina kwikal.” Nambaz winou wova musangar nakash mulong wasala usu wa kuya ku yikumangan! w18.01 5 par. 6-7

Yom ik ukutwishanya kusal anch anen asambish kwidjidjek piur pa uyakin kupwa kwa kutambul dibatish? Chilakej, mwaney ikundj ap changadim ukutwish kwikal upwitinau ku yom yidia mu mangand. Ap mwanen ukusambish kwidjidjek anch kulondul mbil ja Bibil kudi kuwamp mu mwom wend ap bwat. (Kus. 73:1, 3, 12, 13) Mutapu ukusalanya ukutwish kusal anch adandamena kumusadin Yehova ap bwat. Kangal kutend ni mwanen piur pa yom yiney, ap anch uchidi kal mukemp ap wabarik kal usand. Pakwez, ikalany nich kashinsh anch wij anch umukatinany ni ukatinany kumukwash. Nsand utambwila dibatish wipanin kamu kudi Yehova. Mwamu washilamu kal kumukat ni kumusadin ndiy kusutamu yom yawonsu. (Mar. 12:30) Yehova ukat kuman anch kwipan kwinoku kudi kwa usey nakash, niyetu mwawiy tufanyidina kuman kwipan kwinoku.—Mul. 5:4, 5. w17.12 19-20 par. 16-17

Mudi mwading mwijay Mart, atushalapol ashinshamena a Yehova ading ij anch kukwikal divumbuk mu machuku ma kurutu. Tongin piur pa yom yamulejau Aburaham kusal kudi Yehova mulong wa mwanend Isak, mwan wachingelay mu mivu yivud nakash. Yehova walonda anch: “[Musenda] mwaney ikundj kapokal ukatila, ndiy kamu Isak, chad yang nend kwi ngand ya Moriya, ukamupeshila kwinikwa kwikal yakupesh ya kwosh pa mukandu unikakuleja.” (Dis. 22:2) Utongin anch Aburaham wiyova mutapu ik pateshay yom yiney? Yehova wakana anch ukez kuyukish michid yawonsu kusutin an a Aburaham. (Dis. 13:14-16; 18:18; Rom 4:17, 18) Yehova walonda kand anch ukupan yiyukish ‘kusutin Isak.’ (Dis. 21:12) Pakwez mutapu ik wakimba kusadik yom yiney anch Aburaham wamupesha mwanend? Paul amupepila kurumburil anch Aburaham witiyija anch Nzamb ukwet usu wa kumuvumbul Isak. (Heb. 11:17-19) Pakwez, Bibil kalondinap anch Aburaham watonga anch Isak ukuchirik ku mwom pinapa kamu, ap mu asaa akemp, mu dichuku dimwing, ap mu rubing. Aburaham kijikap chisu chikumuvumbulau mwanend. Pakwez witiyija anch Yehova ukumuchirish Isak kwikal mwom. w17.12 6-7 par. 12-14

Mudi Paul, niyetu tufanyidin kuman mwom mudi muumenay Yehova. Ukimbin anch antu awonsu akarumuka chakwel atwisha kwikal ni mwom. (2 Pita 3:9) Mulong wa kumwimburij Yehova, tufanyidin kuyikat antu. Mwikadil wa riy ukutubachik kulejan nich mushiku ni ukutwinkish musangar patusadina mwamu. Mulong wa kuman mwom mudi muumenay Yehova, tukwet kuswir kwa kwikal ni chitongijok chiwamp piur pa diking. Tufanyidin kwendish nawamp (nking, moto ap motak) ni kusal mudimu nawamp, ap anch tukat kutung, kurijek chom kanang ap patuyila kwi ndond ya difukwil. Antu, diking ni ukash wa mujimbu yiding ya usey nakash kusutamu kulam chisu ap nfalang. Nzamb wetu usadining chisu chawonsu yom yitentamina, niyetu tufanyidin kwikal mudi ndiy. Pakampwil amakurump a chikumangen afanyidin kutong piur pa diking diau ayinau, ni dia antu akwau. (Jnsw. 22:3) Anch mukurump wakuvurish piur pa yijil ap mbil yilondina piur pa diking, ufanyidin kumutesh. (Gal. 6:1) Man mwom mudi muumenay Yehova, ni ‘mash makezap kwikal padi ey.’—Kuv. 19:10. w17.11 18 par. 11-12

Mudi kambuy Paul, in Kristu azizidilau many akwet ruchingej ra usey nakash. Achingedin kushakam mwiur. Kambuy Paul watazuka ruchingej riner anch ‘difut dia kutazuk kwa Nzamb.’ (Fil. 3:14) Mwiur, akuyikel pamwing ni Yesu Kristu mu Want wend ni kusal nend mudimu pamwing mulong wa kuyikwash an a antu kwikal awanyidina. (Kuj. 20:6) Ruchingej ruwamp mudi ik! Amikoku akwau niyau achingedin difut dishalijadina ni dined. Achingedin kushakam panap pansh chikupu ni chikupu mu Paradis ni ruchingej riner rikat kulet musangar nakash! (2 Pita 3:13) Paul wakata kuyikwash anamakwend in Kristu azizidilau many chakwel ashal ashinshamena ni atambul difut. Wayileja anch: “Tongijokangany ku yom yidia mwiur.” (Kol. 3:2) Afanyina kushinshikin pa ruchingej rau rikweta usey ra mwiur. (Kol. 1:4, 5) Kutong piur pa yiyukish ya Yehova, kuyikwashin atushalapol awonsu a Nzamb kudandamen kushinshikin mes mau pa difut.—1 Kor. 9:24. w17.11 27-28 par. 1-2

Miminy yivud yidia mu buku wetu ulondina anch: ‘Tumuwangilany Yehova ni Musangar’ yidi mudi malembil. Miminy yiney yikutwish kukukwash kumulej Yehova mutapu wiyovila. Miminy yikwau yikutubachik ku “rukat ni kusal yisalijok yiwamp.” (Heb. 10:24) Tufanyidin kamu kwijik nawamp mutapu uwanginau, mutapu uyila muminy, ni mazu ma miminy yetu. Mutapu umwing tukutwisha kusal mwamu kudi kuyitesh akadivar nau anambaz akwatinau kal mu maband awangina miminy yiney. Maband minam makwatau kal madi pa kapend ka jw.org. Anch wiyijidish kuwang miminy yiney ku chikumbu, ukutwish chad kuwang nich kashinsh ni yovil. Vurik anch kuwang chidi chom cha usey mu difukwil dietu. Udi mutapu uwamp wa kumekesh kudi Yehova anch tumukatin ni tujikitishin mulong wa yom yawonsu yatusadinay. (Isay 12:5) Anch wawang nich musangar, uyikasikeshin antu akwau niyau kuwang mwamu. Antu awonsu a mu chikumangen, ikala ansand, antu apamina kal, ap antu achidia kal asu mu uyakin, akutwish kumwifukwil Yehova mu mutapu winou. Komb kangal widjidjeka kuwang nich muchim umwing. Inge, wang nich musangar! w17.11 8 par. 18-19

Nlel arefije avud adiokil mu jingand mukangeshinau mudimu wetu wa kulejan. Kujikitish mulong wa Atuman akweta mushiku, mulong tunan twa arefije ateshin “dizu dia Want wa Nzamb” kapamp ka kusambish. (Mat. 13:19, 23) Antu avud akweta “yisend yikasikena” akat kutan ukwash ni kukasikesh ku yikumangan ni akat kulond pakad kulab anch: “Nzamb udi ni yenen.” (Mat. 11:28-30; 1 Kor. 14:25) Tufanyidin kwikal ni manangu ni “kubabal” pituyilejina arefije rusangu ruwamp. (Jnsw. 22:3) Tesh ni kushimpish muchim piwambambina nau arefije, pakwez kangal kwambamb nau milong ya politik. Tufanyidin kulondul wintakel udiokila ku biro wa mutiy ni wa amakurump a ngand tudia mulong kangal twitek ayinetu ap antu akwau mu ubaj. Mulong arefije adiokil mu marelijon kushalijan ni akwet yaku yishalijangena, tufanyidin kwilej piur pau ni kulimish yovil ni yitongijok yau. Chilakej, antu a mu jingand yimwing akweting yitongijok yikash piur pa mutapu ufanyidinau amband kudjal. Chawiy pituyilejina rusangu ruwamp, chidi chiwamp kudjal mu mutapu wa kulik kuyipwakesh. w17.05 8 par. 17-18

Tukutwish kumwit Yehova spiritu wend utumbila chakwel atukwasha kwikal antu awamp ni itudishina kudi anamakwetu. Tufanyidinap kutadikijan nau piur pa yitiyij yau ya makasu. Anch twiyov nayimp piur pa yom kanang yikulondau ap yikusalau, tukutwish kuyimburij atwimbuy. Paul walonda anch: “Pakat kutusaalau masaal, etu tukat kuyiyukish. Pakat kutuzengolau, etu tukat kushimpish michim. Pakat kutulondau nayimp, etu tukat kwakul nich mazu mawamp.” (1 Kor. 4:12, 13) Ap anch kulond kwa matul kukutwish kutukwash kulam chisambu nau anamakwetu, mwikadil wetu uwamp ukutwish kwikal wa usey nakash. (1 Pita 3:1, 2, 16) Lik anamakwey amana kusutin chilakej chey anch Atuman a Yehova akweting musangar mu uruw, ayilamining anau nawamp, ashakamining kukwatijan ni mbil ja Bibil ni akweting mashakamin ma musangar. Ap anch anamakwetu kitiyinap uyakin, tukutwish kwikal ni musangar pa kwijik anch mwikadil wetu uwamp umusangareshin Yehova. w17.10 12-13 par. 13-14

Chidiap cha kushimok anch antu avud aswimpin nakash chisu chilejinau uyakin. Akadivar nau anambaz netu a mu mivu chitot ya kusambish ading ni ruchingej ra kuya mwiur aswimpa mu mutapu winou. (1 Kor. 6:9-11) Palonday Paul piur pa antu akulika kuswan Want wa Nzamb, wawejinaku anch: “Antu amwing a pakach pen ading mwamu.” Dizu dia Nzamb ni spiritu wend utumbila wayikwasha antu inay kuswimp. Pakwez ap kupwa kwa kwikal in Kristu, amwing asala yitil yijim yayipisha urund wau ni Yehova. Chilakej, Bibil ujimbwil mukadivar uzizidilau many wopatau mu chikumangen. Kupwa, waswimpa ni amuchirisha kand mu chikumangen cha win Kristu. (1 Kor. 5:1-5; 2 Kor. 2:5-8) Chikasikeshin anch akadivar nau anambaz netu asala usu wa kuswimp kamu nakash mulong wa usu wa Dizu dia Nzamb. Mulong Yehova ndiy watwinkad, tufanyidin kwikal nich kashinsh anch tudisadidin nawamp. w17.09 21-22 par. 2-3

Yehova ndiy Musul wa rukat. (1 Yoh. 4:7) Mutapu ujim wa rukat wimedin pa mbil yitentamina. Mu Bibil, mutapu winou wa rukat aurumburil mu dizu dia Grek anch a·gaʹpe. Rukat riner mudi yovil ya kumukat muntu kanang, pakwez mudi yom yikwau kand yivud kusutamu kwau kwikal ni yovil. Rukat rikat kumeken kusutin kusal yom pakad choy mulong wa uwamp wa antu akwau. Ridi rukat rikata kutubachik kuyisadin akwetu yom yiwamp. Rukat ra mutapu winou ritwinkishin musangar ni ritukwashin kwijik usey wa mwom. Yehova wamekesha rukat mulong wa antu kurutu kwa kumutang Adam ni Ev. Wasala divu mulong pikala chom chawonsu tukutwisha kuswiriken mulong wa kwikalaku. Chikwau kand, ndiy wasala anch yikala ndond yetu ya kushakam tukutwisha kusanger mwom. Yehova kasalap yom yiney mulong wendendiy amwinend. Wasala mulong wetwetu. Papwishay kutenchik ndond yetu ya kushakam, ndiy wayitanga antu ni wayinkisha ruchingej ra kushakam chikupu mu Paradis pa divu. w17.10 3-4 par. 1-2

Jakobu wawejinaku anch: “Anch en ukwetany kasolikany, [usadinany] chitil.” (Jak. 2:9) Anch tuyikatin antu, tufanyidinap kuyikis mulong wa kufumb kwau, ulomb wau wa chikit ap ndond yikwetau. Tukuyisadinap yom mu mutapu wa kumekesh kasolikany. Kulik kwikal ni kasolikany udi mutapu uwamp wa wuntu tufanyidina kwikal nich. Rukat ridi kand ‘rishimpishina muchim ni ruwamp’ ni ‘rikatap kwishimek.’ (1 Kor. 13:4) Tufanyidin kwikal ashimpishina muchim, awamp ni ikepishina mulong wa kuyilej amutej netu rusangu ruwamp. (Mat. 28:19) Mikadil yiney yisadin kand anch chituswapela kwovijan nawamp ni akadivar nau anambaz etu awonsu mu chikumangen. Anch etu awonsu twamekesh rukat mudi riner, chikumangen chetu chikwikal mu uumwing ni chikumuletin Yehova ntumb. Antu akwau akuman uumwing ni akusej ku uyakin. Parumburilay Bibil piur pa wuntu usu, upwishin ni uyakin unou ulondina anch: “Pa yom yiney yawonsu anzukeshanyap rukat, rawiy mwoj wa kukukasany mu umwing uwanyidina.”—Kol. 3:14. w17.08 26 par. 18-19

Chilik chimwing, tufanyidin kuyanaken antu akad kal kumwijik Yehova pakwez akutwisha kukarumuk ni kwikal arund nend. Yehova kakatinap anch muntu ap umwing ajiya ku dirumburish diezina. (2 Pita 3:9) Chawiy pachidia kal chisu ap, tufanyidin kulejan uruu wend wa kubabesh kudi muntu win mwawonsu tukutwisha kulej ni kukwash antu avud chakwel ataninamu mu ranaken ra Nzamb. Yesu wading chilakej chiwamp cha ranaken. Wayovila antu riy mulong wamana anch “awiy ading aziyin ni kujilijil mudi amikoku akad kafung.” Chawiy, yom ik yasalay? “Ndiy wasambisha kuyilej yom yivud.” (Mat. 9:36; Mar. 6:34) Pakwez, Afaris kadingap ni ranaken ni kakatangap kuyikwash antu. (Mat. 12:9-14; 23:4; Yoh. 7:49) Mudi Yesu, ov, niyey ukwet maswir nakash ma kuyikwash antu ni kuyifundish piur pa Yehova? w17.09 11 par. 6; 12 par. 9

Shinshikin yom yamushikena nsand Josef. Padingay mu rukan mu Idjibit, Josef katonginap anch ukez kikal muntu wa kaad ukweta usu nakash mu Ijibit ap anch Yehova ukez kamusadin mulong wa kupandish dijuku diend ku kabwakat. (Dis. 40:15; 41:39-43; 50:20) Pakad ntaad yom yasalay Yehova yading yisutinamu yom yawonsu yading kutongin Josef. Tong kand piur pa Sara, ngakiril mband wa Josef. Mulong wading wapamin kal, ov, Sara wachingejina anch Yehova wafanyina kumukwash kuval mwan, anch wachingejina anch ukukwikal ni mwan kusutin mwilomb wend? Kuvadik kwa Isak kwading kwakad kuchingejin kamu kudi Sara. (Dis. 21:1-3, 6, 7) Tuchingejidinap anch Yehova apwisha milong yetu mu chilay kurutu kwa ngand yisu kwez. Ni tumwitinap Yehova anch atusadina yom yishimokishena nakash mu mwom wetu. Pakwez twij anch Yehova wayikwasha atushalapol end a pasak mu mutapu wakad kuchingejin. Ni Yehova kaswimpinap. (Isay 43:10-12) Chinech chitwinkishin kashinsh mudiay ndiy. Tufanyidin kwikal nich kashinsh anch ukutwinkish usu tukweta nich kuswir mulong wa kusal rusot rend. (2 Kor. 4:7-9) Yehova ukutwish kutukwash ap anch tudi mu yisu yikash nakash anch twashal ashinshamena kudi ndiy. w17.08 13-14 par. 13-14

Mudimu wa chisu chawonsu ukukukwash kwikal mwin Kristu uswila mu spiritu piusadina nau antu akwau adia mu mudimu wa chisu chawonsu. Chikwau kand, antu avud amana anch kusambish mudimu wa chisu chawonsu padingau ansand kwayikwasha mu uruw wau. Yisu yivud, antu asambisha uchibol kurutu kwa kwatijan adandamedin kusal kand pamwing padiau ambay a uruw. (Rom 16:3, 4) Kuseng 20:4 ulondin piur pa Yehova anch: “Chifanyidin [Nzamb] akwinkisha yom yawonsu mudi muukatila mu muchim wey.” Piutenchikina mulong wa machuku ma kurutu, tong kamu nakash piur pa yom ukimbina kusal mu mwom wey. Tong piur pa yom yisadinay Yehova mu chirung chetu ni yom ukutwisha kusal mu mudimu wend. Kupwa, tenchik kusal yom yimusangareshina. Anch wasadin mwom wey mulong wa kumusadin Yehova nakash ni kumutumbish, ukwikal ni musangar nakash. Ukutan ‘musangar mudiay [Yehova], ndiy ukukwinkish rusot ra muchim wey.’—Kus. 37:4. w17.07 26 par. 15-18

Yisu yivud tukat kumutumbish muntu anch twasanger yom yalonday ap yasalay. Chinech chifanyidin kutubachik mud ik kumutumbish Yehova Nzamb! Tukat kumushiman mulong wa dikand diend dijim, tumena mu yom yend yatangay yishimokishena ni tukat kumutumbish mulong wa rukat rend rikurikina mulong wetwetu, tumena pamupanay Mwanend mudi difut. Anch twatang Kuseng 147, tumen patok anch mwin kufund winou wading ni maswir nakash ma kumushiman Yehova. Wayikasikesha kand antu akwau kumushiman Nzamb pamwing ni ndiy. (Kus. 147:7, 12) Twijap muntu wafunda Kuseng 147. Pakwez mwin kufund washakama pamwing ap chisu chachirikau in Isarel mu Yerusalem payikwolau kudi Yehova kudiokal mu Babilon. (Kus. 147:2) Nfund a kuseng wamutumbisha Yehova mulong kapamp kakwau antu end akutwish kumwifukwil chad mwi ngand yau. Kupwa nfund a kuseng wapana kand mayingishin makwau ma kumushiman Yehova. Mayingishin ik mamwing? Ni mayingishin ik ukweta ma kulond anch “Aleluya!” ap anch ‘Mushimanany Yah!’ mu mwom wey?—Kus. 147:1. w17.07 15-16 par. 1-3

Yesu wading wij anch in kwilejend avud afanyina kuman anch chiyikasikedin kushakam nawamp mu mangand minam makad kutentam. Ap anch Yesu karumburilap mulong wak watazuka yom ya ku mujimbu anch ‘yakad kutentam,’ Bibil ulejen patok anch kwikal ni nfalang jivud jidiokila ku yom yikwetay muntu yadingap mu chitongijok cha Nzamb. Chilakej, Yehova wamwinkisha Adam ni Ev yom yivud nakash kusutamu yading yikwetau nich kuswir mu chir cha Eden. (Dis. 2:15, 16) Kupwa, chisu chayinkau antu azizidilau many spiritu utumbila kudi Nzamb, “kwikil muntu walonda anch: ‘Yom yinipitina yidi yamam amwinam ya pa kampwil,’ pakwez awonsu anganijananga yom yadingau akwet.” (Mid. 4:32) Muprofet Isay walonda anch kwafanyina kwikal chisu chikusangerau antu awonsu yakudia yidiokila ku divu. (Isay 25:6-9; 65:21, 22) Pakwez kurutu chisu chinech chishika, in kwilej a Yesu akwet kuswir kwa kusadin ‘manangu.’ Afanyidin kusadin yom ya ku mujimbu yakad kutentam ya mangand minam mulong wa kuchidij mwom yau, ni kusal kand usu wa kumusangaresh Nzamb.—Luka 16:8. w17.07 4 par. 4-6

Mukand wa Job, udia pakach pa mikand yafundau ya kusambish, tutangin anch Satan walonda anch ang Job waman mar nakash, ukumulik Nzamb. Satan wamuleja Nzamb chakwel amumesh Job mar. Yehova kafanyinap kusal mwamu, pakwez wamulika Satan chakwel amupaka Job. Kupwa kwa yiney, Job washadisha atushalapol end ni mapit mend. Kupwa wajingunina anch anend dikum afa rufu riyimp. Satan wasala mwamu mulong yimekana anch Nzamb ndiy uletishina mar minam. (Job 1:13-19) Kupwa kand, Satan wamuyedisha Job nakash ni mayej mayimp ni masansena. (Job 2:7) Mulong wa kuyipish yom nakash, mband wa Job ni arund nend asatu a makasu alonda yom yiyimp ni ya kumuziyish nakash. (Job 2:9; 3:11; 16:2) Yibudikin ik yikalaku? Ov, yom yalonday Satan yading yakin? Bwat. Ap anch Job wamana mar mayimp nakash, kamulikap Yehova.—Job 27:5. w17.06 17 par. 9-10

Nlel kand, Yehova uyinkishin antakel a majuku chisend cha kuwanyish maswir ma majuku mau. Afanyidin kusal usu nakash mulong wa kuwanyish chisend chinech. Pakwez, mu machuku minam ma nsudien, mudimu wa ku mujimbu ukutwish kulet yakamish nakash. Chisu chawonsu kudi antu avud akimbina mudimu pakwez kudi midimu yikemp. Mulong wa chinech, antu arishin nakash mulong wa kuman mudimu. Antu avud akat kutong anch afanyidin kusal ma saa mavud kusutamu mayitinau ku mudimu ap anch ayifutin nfalang jikemp. Ma sosiete masadin usu wa kubudish yom yiwamp yivud nau in kusal mudimu akemp kusutamu mwasalangau pakur. Chawiy in kusal mudimu akutwish kwikal ni yakamish, kuziy, ap kand kuyel. Antu avud akat kwakam anch akutwish kushadish midimu yau anch alik kusal yiyitinau kudi amakurump au a midimu. Mulong tudi in Kristu, tushinshamen nakash kudi Yehova kusutamu kushinshaman kudi muntu win mwawonsu, ap kudi mukurump wetu wa mudimu. (Luka 10:27) Mudimu wetu wa ku mujimbu wawiy utukwashining kuwanyish maswir metu ni kukwash mudimu wa kulejan. Pakwez anch tubabelap, yisend yetu ya ku mudimu wa ku mujimbu yikutwish kuyipish difukwil dietu. w17.05 22-23 par. 5-7

Yisu yimwing, antu asu akutwish kutwit mulong tuyikwasha kuyifundish anau piur pa Yehova ap kwilej Bibil nau anau ansand. Anch nvaj watwit kwilej Bibil ni mwanend mband ap ikundj, chiwapin kuvurik anch tukwetap ulabu mudi ukwetau anvaj padi anau. (Efes 6:1-4) Yisu yimwing tukutwish kwilej ni mwan ukweta anvaj akad kwikal mu uyakin. Anch tukat kwilej nau an ayen, chidi cha manangu kwilej nau kwol kwau chisu chidiawap anvajau ap Kaman mukwau waswila kal ap kwilej pa ndond ya patok. Mu mutapu winou, tukutwishap kumwinkish muntu kanang chitongijok chiyimp. Mu kusut kwa chisu, pamwing ap anvaj ayinau akutwish chad kwilej nau anau piur pa Yehova. w17.06 8 par. 15-16

Anch an iyovil anch kijap yaku ya anvajau, akutwish kulik kusanger kwilej dizu ni relijon wa anvajau. Anvaj in Kristu akat kutek maswir ma anau pa ndond yakusambish kusutamu yom yikatinau awiy. (1 Kor. 10:24) Mukadivar utazukinau anch Samuel ulondin anch: “Am ni mukajam twayishinshikinang anetu chakwel tuman dizu dikutwisha kusal anch uyakin uyishik ku michim ni twalembilang mulong wa kwikal ni manangu. . . . Chisu twamana anch anetu kataninangapamu nakash ku yikumangan yasadikanga mu dizu dietu, twakwata mupak wa kuya mu chikumangen chading kusadinang dizu dia mwi ngand yiniya. Etu awonsu twayangang ku yikumangan ni mu mudimu wa kulejan pakad kujing. Twayitazukang kand arund netu a mwi ngand yiniya kudia netu ni kusutish netu chisu pamwing. Yawonsu yiney yayikwasha anetu kuyijik akadivar ni kumwijik Yehova, kadiap ching mudi Nzamb wau pakwez mudi kand Tatukwau ni Murund nau. Twamana anch yom yiney yading ya usey nakash kulik anch ching ijik dizu dietu nawamp.” w17.05 12 par. 11-13

Kurutu oku muntu win mwawonsu pa divu ukusanger winyikel wa Yehova. Tukwet kamu musangar wa kushakam pa chisu chinicha! Twiyovil mudi Debora ni Barak, awanga anch: “Mwamu mukat kujiyau akankuny ney awonsu, A! [Yehova], pakwez arund ney akat kwikal mudi muten muukata kubudik nich usu wau!” (Ank. 5:31) Chinech chikusadik pakujiyishay Yehova mangand mayimp ma Satan. Anch njit ja Armagedon jasambish, Yehova kakwikalap ni kuswir kwa antu akwipana kwa kwikatin mulong wa kuyijip akankuny. Pakwez, ‘tukwiman’ ni “kuman dipandish dia [Yehova].” (2 Jsng 20:17) Pa chisu chinech, tukwet mitapu yiwamp ya kukwash winyikel wa Yehova nich kutakaman ni mushiku. Debora ni Barak asambisha kuwang muminy wa kuwin mulong wa kumutumbish Yehova, kadiap mulong wa kuyitumbish antu. Awanga anch: ‘Mulong antu ipanin kwa kwikatin, mutumbishany Yehova!’ (Ank. 5:1, 2) Mutapu wawiy umwing, anch twamusadin Yehova mu mutapu win wawonsu uswirikedinay, antu akwau niyau akutwish kwikal akasikeshinau chakwel ‘amutumbish Yehova!’ w17.04 32 par. 17-18

Ap anch Josef kuvuramenap kuburen kutentam kwamusadinau, mu mivu 13 yamanay mar, pakwez kafundakeshap. (Dis. 45:5-8) Cha usey nakash, kalikap kurumbok ni yisalijok yiyimp ya antu akwau yimwaurila kudi Yehova. Kushinshaman kwa Josef kwamwinkisha mutapu wa kuman kurijek kuburen kutentam kudi Yehova ni chiyukish kudi amwinend ni dijuku diend. Mutapu wawiy umwing, tufanyidin kulam nawamp ni kuchidij urund wetu ni Yehova. Tufanyidinap kulik kurumbok kwa akadivar netu kutwauril ni Nzamb tukatining ni tukata kwifukwil. (Rom 8:38, 39) Pakwez, anch twaman kuburen kutentam mu chikumangen, tufanyidin kumwimburij Josef ni kusej piswimp ni Yehova. Sal usu wa kuman yom mudi mumenay Yehova. Kupwa kwa kusal yawonsu tufanyidina kusal mulong wa kupwish milong kulondwish mbil ja mu Bibil, tufanyidin kusha milong mu makas ma Yehova. Tukutwish kwikal ni kashinsh anch Yehova ukupwish milong mu chisu chiwanyidina ni mu mutapu uwamp. w17.04 18 par. 12; 19-20 par 15-16

Ana wasala mudi mwashilayimu kudi Yehova. Wamutwala Samwel kudi Mwin Kupesh Mujim Eli ku dizang dia ku Silo ni wamuleja anch: “Nalembilang mulong wa kuval mwan winou, chawiy [Yehova] wanginkishin kal am chinamwita. Katat namuchirishinay kal [Yehova]. Mu machuku mend mawonsu ma mwom wend, namuchirish kal kudi [Yehova].” (1 Sam. 1:24-28) Kudiosh pinipa, Samwel washakama ku dizang. Bibil ulondin anch “nsand Samwel wakudila kurutu kwa [Yehova].” (1 Sam. 2:21) Chadingap chiswapela kudi Ana kuwanyish machip mend. Chirumburikin anch kafanyinap kwikal ni mutapu wa kusutish chisu dichuku diawonsu pamwing ni mwanend wading ukatinay nakash. Kafanyinap kuman mutapu wading upaminay mwanend. Pakwez Ana wawanyisha kamu machip mend kudi Yehova. Witiyija kupan yom ya usey nakash mulong wa kuwanyish kushilamu kwend kwasalay kudi Nzamb.—1 Sam. 2:1, 2; Kus. 61:1, 5, 8. w17.04 5-6 par. 7-8

Kambuy Paul walonda anch mu machuku ma kwinsudien, makez kwikal ma “mar nakash.” Kupwa wawejinaku anch: “Antu ayimp ni in [makasu] akez kuya kurutu nakash mu kuyip.” (2 Tim. 3:2-5, 13) Ov, ukat kuman yom yiney? Antu avud pakach petu ayimeshin kal mar kudi antu ayimp mudi kuyitendish, katond ka ulombu wa chikit, ni kuyijip kudi antu ayimp. Amwing pakach pau kakupakishangap kwau kujindjik yom yau yiyimp yisadiningau. Akwau akat kutong mutapu wa kuyikwash antu, pakwez mu kulond win kashinsh adi antu ayimp. Mwawiy, ap anch kand kal atumeshangap mar kudi antu ayimp, pakwez adandamedin kwikal ni usu padi etu. Tukat kwov nayimp anch twatesh piur pa mutapu uyimp uyisadidinau an, antu apamina kal, nau antu akwau akad kwikal ni mutapu wa kwichidij ayinau. Antu inay ayimp akat kusal mu mutapu wa kumesh anch adi mudi annam ayidiany ap mudi ayilembil. (Jak. 3:15) Cha musangar, Dizu dia Yehova ditwinkishin ruchingej. w17.04 11 par. 4