Ngond wa 12

Mwikadil wa pakampwil nakash wa wuntu wa Yesu udi ukaliweny wend wa kwijik milong yawonsu turishina nich mulong tudi antu akad kuwanyin. Padingay pa divu, Yesu wading kusangar “pamwing nau antu asangera” ni kwov “ushon pamwing nau antu ovila ushon.” (Rom 12:15) Chilakej, pachirikau in kwilejend 70 nich musangar mulong awanyisha nawamp chisend chau cha mudimu wa kulejan, Yesu “wasangara mu spiritu utumbila.” (Luka 10:17-21, TMK) Ku mutambu ukwau, pamanay ushon wadingau nich antu mulong wa rufu ra Lazar, Yesu “wova ushon, wanenganana nakash.” (Yoh. 11:33) Yom ik yamukwasha Yesu kwikal ni riy ni ranaken mu mashakamin mend nau antu akad kuwanyin? Chakusambish chidi mulong Yesu wading uyikatin antu. Yesu ‘wayikata nakash an a antu.’ (Jnsw. 8:31) Rukat rend mulong wa antu ramubachika kwijik nawamp mutapu ukatau antu kutong. Kambuy Yohan urumburil anch: “Wading wij yom yawonsu yidia mu michim yau [antu].”​—Yoh. 2:25. w19.03 20 par. 1-2

Satan washesha mapit mawonsu ma Job, atushalapol end, ni wajondisha kand dijin diend. Satan warishikisha dijuku dia Job ni wajipa an amakundj dikum a Job ading akatilay nakash. Wamuyedisha kand Job mayej makash ma makwalong ma yitat yiyimp ya tushiny mu mujimbu wawonsu. Mband wa Job wiyakamisha nakash ni kuzazat mulong wa mar ma Job; ni wamuleja kumushing Nzamb chakwel afa kwend. Niyend Job amwinend wakata kwend anch afa, pakwez wadandamena kulam kushinshaman kwend. Kupwa Satan wasala usu wa kusadin milad yikwau mulong wa kumurishikish. Wasadina amakundj asatu ading arund a Job. Amakundj inay eza kumutal Job mu machuku mavud, pakwez kamwongojap ap pakemp. Chawiy amulonda nayimp. Alonda anch Nzamb ndiy wading musul wa mar minam ni kadingap kabangidina kushinshaman kwa Job. Alonda kand anch Job wading muntu muyimp ni anch mar minam mading mulong wa kurumbuk kwend amwinend!​—Job 1:13-22; 2:7-11; 15:4, 5; 22:3-6; 25:4-6. w19.02 4-5 par. 7-8

Wom umwing uding uwamp mulong wetwetu. Chilakej, tufanyidin kwov wom wa kumunenganesh Yehova. Anch Adam ni Ev akudisha wom mudi winou, kelap kumubwambwil Yehova. Pakwez awiy amubwambwila. Kupwa kwa kusal mwamu, mes mau maburika, charumburik anch ajingunina kamu patok anch ikal kal akayitil. Ni afanyina kand kuyiswanish anau chitil ni rufu. Mulong ijika anch abwambwil kal ku chijil cha Nzamb, ova usany mulong ading kanzikis chawiy adjala yidjal. (Dis. 3:7, 21) Ap anch tufanyidin kwov wom wa kulik kumusangaresh Yehova, tufanyidinap kwikal ni wom uyimp wa rufu. Yehova watwinkisha kal njil ya kutambwil mwom wa chikupu. Anch twashiken ku kusal chitil ni twakarumuk kamu chakin, Yehova ukutulikishin kurumbuk kwetu. Ukutulikishin mulong wa ritiy tukweta mu yakupesh ya difut ya Mwanend. Mutapu wa kusambish tukata kumekesh ritiy, udi kusutil kwipan kudi Nzamb ni kutambul dibatish.​—1 Pita 3:21. w19.03 5-6 par. 12-13

In Isarel ading ni mayingishin mavud ma kumekesh kujikitish kwau. Ayikola mu uswik kudiay Yehova kupwa kwa kulet Yipupu Dikum mu Idjibit. Kupwa kand Nzamb wayipandisha kusutil ku kuyishesh amasalay a in Idjibit mu Karung Musuz. In Isarel amekesha kujikitish kwau kusutil ku kumuwangil Yehova muminy wa kumutumbish nich. Ov, adandamena kumekesh kujikitish kwau? Chisu chasambishau in Isarel kurish nich yikokujol yikwau, awiy avuramena kapamp kamwing yom yawonsu yiwamp yayisadinau kudi Yehova. Amekesha patok mwikadil wau uyimp wa kulik kumekesh kujikitish. (Kus. 106:7) Mutapu ik wasalau mwamu? “Chisak chin chawonsu cha in Isarel chamununganijana Moses ni Aron mwi mpay”​—chakin kamu, awiy ading amununganijadin Yehova. (Kub. 16:2, 8) Yehova kasangerap mwikadil winou wa kuburen kujikitish wamekeshau kudi antu end. Chawiy chayilejay in Isarel awonsu anch ukuyishesh mwi mpay, kudioshaku Joshua nend Kaleb.​—Kuch. 14:22-24. w19.02 17 par. 12-13

Yesu kitonginap nakash amwinend mu kusal yom yivud yikasikena mulong wa kuvurik rufu rend. Pakwez wayileja in kwilejend anch afanyidin kuvurik rufu rend kapamp kamwing pa muvu kusutil yakudia yikemp. (Yoh. 13:15; 1 Kor. 11:23-25) Yakudia yikemp pakwez ya usey nakash yimekeshin anch Yesu kadingap muntu witutwishina. Tukutwish kwikal ni musangar wa kwijik anch kwikepish kudi pakach pa mikadil ya pakampwil yikwetay Mwant wetu wa mwiur. (Fil. 2:5-8) Mutapu ik tukutwisha kwimburij kwikepish kwa Yesu? Kusutin kutek maswir ma antu akwau pa ndond ya kusambish. (Fil. 2:3, 4) Tong piur pa uchuku wa nsudien wa mwom wa Yesu panap pansh. Yesu wading wij anch mu chisu chikemp ukufa rufu risansena nakash; pakwez wayibangina atwimbuy end nakash ading afanyidina kwov ushon mulong wendendiy. Chawiy wasutisha uchuku wend wa nsudien panap pansh mu kuyifundish ni kuyikasikesh. (Yoh. 14:25-31) Nich kwikepish, Yesu wabangina nakash maswir ma antu akwau kusutamu ma amwinend. Chilakej chiwamp mud ik chatushilay! w19.01 21-22 par. 5-6

Ov, ukat kwov wom anch ukimbin kwilik muny mwiur mulong wa kwakul? Anch woviling wom, ijik anch udiap amwiney. Uyakin udi anch avud pakach petu oviling chisu chimwing wom wa kwakul. Chakin kamu, wom winou ukutwish kwikal chijingidij chiwamp. Wom winou umekeshin anch udi muntu wikepishina ni uyimen akwen mudi akupandakenamu. Yehova ukatining antu ikepishina. (Kus. 138:6; Fil. 2:3) Pakwez Yehova ukatining kand anch umushimana ni uyikasikesha akadivar nau anambaz ney ku yikumangan. (1 Tes. 5:11) Ukukatin ni ukukwinkish kutakaman uswirikedina. El tushinshikinany maverse mamwing madia mu Bibil. Bibil ulondin anch etu awonsu turumbukining mu yom tulondina ni mutapu tuyilondina. (Jak. 3:2) Yehova katwitinap anch twikala antu awanyidina ap kayitinap kand akadivar nau anambaz netu kwikal niyawiy mwamu. (Kus. 103:12-14) Adi anamakwetu a mu spiritu ni atukatining nakash. (Mar. 10:29, 30; Yoh. 13:35) Ijing anch yisu yimwing tukulondangap yom twading tukimbina kulond. w19.01 8-9 par. 3; 10-11 par. 10-11

Chinech chiswapelingap chisu chawonsu, pakwez ukutwish kusal mwamu. Yehova ukatin anch utwisha kamu mu mwom ni wikala ni mwom usangareshina. Nich ukwash wa Nzamb, ukutwish kutwish mu mwom chisu uchidia nsand ni chisu ukwikala mukurump. Mulong wa kukukukwash kutesh nawamp chom chinech, tukwisambin yom yayikwasha in Isarel kukwat Ngand ya Kushilamu. Padingau in Isarel piswimp ni kwandam mwi Ngand ya Kushilamu, mbil ik yayinkishau kudi Yehova? Ov, ayileja kwikal amasalay awamp ap kwilej kurish njit? Bwat! (Kuv. 28:1, 2) Wayileja kumuziyin ni kumuchingejin. (Jos. 1:7-9) Antu kafanyinap kov nawamp chiyul chinech, pakwez chading chiyul chiwamp nakash kudi in Isarel. Tupamp tuvud, Yehova wayikwasha antwend kuyipandikan in Kanan. (Jos. 24:11-13) Chitining ritiy mulong wa kumuziyin Nzamb, pakwez ritiy mudi riner ritwadining chisu chawonsu ku kutwish. Yom yiney yading yakin pasak ni yidi kand mwamu nlel. w18.12 22 par. 3-4

Antu amwing nlel ipwakala mulong wa kurumburil kusu kwa verse wa Bibil. Ni akwau niyawiy alondula mafundish ma makasu ma in kupumbok akata kulond makasu piur petu. Minam madi mayingishin makemp pakach pa mayingishin mavud masadina anch antu amwing amulik Yehova ni chikumangen kwa kwikatin. (Heb. 3:12-14) Chafanyina kwikal chiwamp mudi ik anch antu inay amuchingejina Yesu mudi mwasalay Pita! Antu akwau asambisha kupwepuk pakemp pakemp ku uyakin, pamwing ap pakad kuman mutapu yishikedina. Muntu udiokila ku uyakin pakemp pakemp udi mudi waat upwepwilau ku chikum. Bibil utulejin anch tufanyidin kubabal chakwel ‘kangal twapwepuk.’ (Heb. 2:1) Yisu yivud, muntu ukata kupwepuk ku uyakin kakusalangap mwamu kwa kwikatin. Pakwez ukat kulik urund wend ni Yehova kwikal uziyila, ni mu kusut kwa machuku ukutwish washadish urund winou. w18.11 10-11 par. 5-6

Ov, ukwet kuswir kwa kukufumb nakash chakwel utwisha kumusadin Yehova chipandakena? Pamwing ap ukutwish kwizwish fomu mulong wa kuya ku Shikol ya in Kulejan a Want. Shikol yiney yikat kufumb akadivar nau anambaz aswila amusadidina kal Yehova mudimu wa chisu chawonsu chakwel dirijek dia Yehova ditwisha kuyisadin nakash. Antu akata kuya ku shikol yiney adi tayad mulong wa kusadin kwi ndond kwawonsu kukuyitumau. Ov, ukat kwipan chakwel usala yom yivud mulong wa Yehova mu mutapu winou? (1 Kor. 9:23) Mulong tudi antu a Yehova, tudi in kupan, antu awamp ni in rukat. Tukat kuyibangin antu akwau dichuku diawonsu. Chinech chikat kutuletin musangar, chisambu ni kuzangijal. (Gal. 5:22, 23) Chikalap nchik mashakamin mey, ukwikal ni musangar anch wadandamen kwimburij wuntu wa kupan wa Yehova ni kwikal mwin kusal nend mudimu wa usey nakash!​—Jnsw. 3:9, 10. w18.08 26 par. 16-18

Antu amwing akutwish kwiyipul anch, ‘Ov, kwikil diyingishin ap dimwing difanyidinay mwin Kristu kujip uruw ni kwatan ap kwachik kand?’ Shinshikin yom yalonday Yesu anch: “Ikundj mwawonsu ukujipa uruw ni mukajend, chad wat mband mukwau, ikundj winou [wasal kal chitil cha kusotan]. Chawiy chimwing kand, niyend mband ukujipa uruw ni nfumwend, chad akamwat kudi ikundj mukwau, mband winou [wasal kal chitil cha kusochik].” (Mar. 10:11, 12; Luka 16:18) Chakin kamu Yesu wading ulimishin uruw ni wakata anch antu akwau niyau asal mwamu. Anch ikundj wajip uruw ni mukajend ushinshamena ni watiril mband mukwau, wasal kal chitil cha kusotan. Chidi kand mwamu anch mband wajip uruw ni nfumwend ushinshamena. Chidi mwamu mulong kujip uruw pakad mulong kukupwishangap uruw. Nzamb udandamedin kuyiman ambay a uruw anch achidi “mujimbu umwing.” Yesu walonda kand anch, ang ikundj wajip uruw ni mukajend pakad mulong, wamutek kal mband winou mu ubaj wa kusal chitil cha kusochik. Yikutwish kushiken mutapu ik? Chakin kamu, mband ukutwish kwiyov anch ufanyidin kwachik kand mulong wa kumuwanyishin maswir ma nfalang. Uruw mudi winou udi mudi kusochik. w18.12 11 par. 8-9

Mambamb ma Abakuk ni Yehova mamuletina chisambu cha mu manangu. Masala anch akwat mupak wa kumuchingel Yehova chakwel asal. Abakuk wamekesha kand mupak wend chisu chalonday anch: “Am nikez kachingel zong kushik ku chisu chikeza kalejanay Nzamb kadimu.” (Aba. 3:16) Yom ik tukutwisha kwilejin ku mupak wa Abakuk? Chakusambish, tufanyidinap kwimik kumulembil Yehova chikalap nchik milong tukweta. Cha kaad, tufanyidin kutesh yom yilondinay Yehova kusutin Dizu diend ni dirijek diend. Ni cha kasatu, tufanyidin kuchingel nich kushimpish muchim chakwel Yehova asal ni kuchingej anch ukupwish milong yetu pa chisu chikatinay. Anch twamwimburij Abakuk, tukwikal ni chisambu cha mu manangu ni tukutwish kujijaman. Ruchingej retu rikutukwash kwikal ashimpishina muchim ni kwikal ni musangar chikalap nchik milong turishina nich. Tukwet kashinsh anch Tatukwetu wa mwiur ukwakul.​—Rom 12:12. w18.11 18 par. 11-12

Mutapu ik umeningay Yehova antu ayipwakeshina akwau? Yesu walonda anch: ‘Mwawonsu ukumwipwakesha umwing wa akemp angitiyijina am, chifanyidin kumukasin muntu winou diyal dijim mwi nshing amudjibul nich mu karung.’ (Mar. 9:42) Minam madi mazu makash! Ni twij anch Yesu udi mudi Tatukwend. Chawiy tukutwish kwikal nich kashinsh anch Yehova ukisining nakash anch waman muntu kanang ukat kumupwakesh umwing wa in kwilej a Yesu. (Yoh. 14:9) Ov, tumening kuyipwakesh antu akwau mudi mumeningay Yehova ni Yesu? Yisalijok yetu yimekeshin ik? Chilakej, tukutwish kukat mutapu umwing wa kudjal, wa kukidish ap wa kukasish nsuch. Pakwez yom ik tukusala anch mupak wetu ukutwish kuyisal nayimp antu amwing mu chikumangen ap kuyisal antu akwau ikal ni yitongijok yiyimp? Ov, rukat retu mulong wa akadivar rikutubachik kulik yom yitukatina? w18.11 29 par. 9-10

Mulong wak etu awonsu tufanyidin kwikal ashinshamena? Chidi mulong Satan umurishikishin Yehova ni ukurishikishin kand ey. Mwangel winou ntombwij wasala usu wawonsu mulong wa kujondish dijin dia Yehova kusutil ku kulond anch Nzamb udi muyimp, mwin choy ni kadiap Ntakel muwamp. Cha ushon, Adam ni Ev aya ku mutambu wa Satan ni amubwambwila Yehova. (Dis. 3:1-6) Padingau mu chir cha Eden, awiy ading ni mitapu yivud ya kukasikesh rukat rau mulong wa Yehova. Pakwez, palonday Satan makasu pa chisu chinicha, rukat rau radingap rakabuj, riwanyidina, ap rakad ulim. Kwalanka chipul chikwau chilondina anch: Ov, rukat rikutwish kamu kumubachik muntu kushal ushinshamena kudi Yehova Nzamb? Mu kulond kukwau ov, antu akutwish kamu kumekesh kushinshaman? Alangwisha chipul chinech pa chirung cha Job. (Job 1:8-11) Job wading muntu wakad kuwanyin mudi etu. Niyend warumbukang. Pakwez Yehova wading umukatin Job mulong wa kushinshaman kwend. w19.02 3-4 par. 6-7

Yesu wapana chishimu piur pa mwin kwisak wading ukimbina usang wa ufun. Pamanay muntu winou usang wading wa usey nakash, walandisha pakad kulab yom yawonsu yadingay nich chakwel alanda usang winou. Usang winou umekeshin uyakin piur pa Want wa Nzamb. Kusutin chishimu chinech, Yesu wamekesha usey ukweta uyakin kudi antu aukimbina. (Mat. 13:45, 46) Pitwileja kapamp ka kusambish uyakin, charumburik anch uyakin piur pa Want wa Nzamb ni uyakin wawonsu wa usey udia mu Bibil, niyetu twalika pakad kulab chom chin chawonsu twading tukweta mulong wa kuutambul. Chawiy anch twadandamen kukwat uyakin nich usey, tukuulikap uyakin winou ap pakemp. (Jnsw. 23:23) Pakwez cha ushon, antu a Nzamb amwing alika kukwat uyakin nich usey ni aulika. Tufanyidinap kusal mwamu! Tufanyidin kulondul chiyul cha Bibil cha “[kudandamen] kwendil mu uyakin.” (3 Yoh. 2-4) Charumburik anch tufanyidin kutek uyakin pa ndond ya kusambish ni kumekesh mwamu kusutin mashakamin metu. w18.11 10 par. 3

Mwangel wamuleja Joshua anch in Isarel kafanyidinap kurishikish Yeriko. Pakwez, afanyina kunyingumuk musumb kapamp kamwing pa dichuku mu machuku musamban ni kupwa tupamp sambwad pa dichuku dia sambwad. Amasalay afanyina kutong anch, ‘Kusal mwamu kudi kushesh usu wau ni chisu chau.’ Pakwez, Ntakel wakad kumekan ku mes wa in Isarel wading wij nawamp yom yading yisadinay! Kulondul mbil jend, kwakasikesha ritiy ra in Isarel, ni kafanyinap kurish nau amasalay a mu Yeriko. (Jos. 6:2-5) Yom ik tukutwisha kwilejin ku rusangu riner? Yisu yimwing, dirijek dia Yehova dikat kusal yom mu mutapu usu, ni tukutwishap chisu chawonsu kwov kurumburik mulong wak disadin mwamu. Chilakej, twatonginap anch chading chitongijok chiwamp cha kusadin ma aparey elekitronik mulong wa dilejan dia muntu panrend, mu mudimu wa kulejan ap mulong wa yikumangan. Pakwez katat, chimeken anch tutanidinamu mu kusadin yom yiney. Anch twaman yibudikin yiwamp ya kuswimp mudi kwinoku, ritiy retu rikat kukasikan ni tukat kwikal mu umwing nau akadivar nau anambaz netu. w18.10 17-18 par. 8-9

Kuchingel piur pa kwez kwa Mesia, mudi mwading muchingedinau in kwilej a Yesu kwasala anch antu a mu Galaliya akata anch Yesu ikala mwant wau. Atonga anch wafanyina kwikal nyikel muwamp. Wading wij kulond nawamp, mwin kwok ayej ni wafanyina kulet yakudia kudi antu awonsu ading afila nzal. Kupwa kwa Yesu kudish amakundj 5000, antu ashimwoka nakash. Yesu wajingunina yom yading yikimbinau kusal. Bibil ulondin anch: “Yesu wijika anch, asotil kwez amukwat ku usu chakwel amudish want. Chawiy ndiy waya kand ku mikandu amwinend.” (Yoh. 6:10-15) Mu kwacha, chimeken anch antu ikuchika. Yesu wayirumburila anch kezap mulong wa kuwanyish maswir mau ma ku mujimbu pakwez mulong wa kuyifundish piur pa Want wa Nzamb. Wayileja anch: “Kangal wasurubany kusu yakudia yikata kuvund, pakwez surubany yakudia yikata kulet mwom wa chikupu.”​—Yoh. 6:25-27. w18.06 4-5 par. 4-5

Yesu wijikang yovil ya antu ading aziyila mudi “mushiy udia piswimp ni kubukuk” ap “kasu kadia piswimp ni kujim,” chawiy wayisadinang mu mutapu uwamp ni kushimpish muchim. Ap an akemp akata kwikal pamwing ni Yesu. (Mar. 10:14) Chakin kamu, tukutwishap kuyitesh antu ap kuyifundish mudi mutapu wasalay Yesu! Pakwez tukutwish kumekesh anch tuyibangidin antu a mu teritwar wetu kusutin mutapu twambambina nau, chisu tuyila kuyital ni kulep kwa chisu tukata kushakam nau. Nlel mamiliyon ma antu “aziyin ni kujilijil” mulong wa kwisak kwa kukatul milamu ni kwa chisum ni mulong wa antakel a chipolitik ni a relijon a mangand minam. (Mat. 9:36) Mudi chibudikin, avud kamuchingejidinap muntu ni kakwetap ruchingej. Chawiy mazu tusadidina ni mutapu wa kulond ufanyidin kumekesh kudi antu anch tukwet ranaken ni tuyibangidin! Antu avud akwet kuswir kwa kutesh uruu wetu chidiap anch mulong tusadidin Bibil nawamp pakwez mulong tuyibangidin nakash ni tuyilimishin. w18.09 31 par. 13-14

Anch twajingunin maswir metu ma mu spiritu, tukwijik anch tukwet kuswir kwa kumwijik Nzamb ni tukuswiriken ukwash ni umutakel wend. Mutapu ik tukutwisha kusal mwamu? Kusutin kwilej Bibil ni kumuziyin Nzamb, ni kusal anch difukwil diend dikala chom cha usey nakash mu mwom wetu. Kusal yom yiney kukutukwash kwikal ni musangar. Ritiy retu mu kushilamu kwa Nzamb rikwikal rakin ni rikash. (Tit. 2:13) Anch tukatin kwikal ni musangar chikalap nchik yom yishikedina mu mwom yetu, tufanyidin kudandamen kukasikesh urund wetu ni Yehova. Kambuy Paul wafunda anch: “Sangarany machuku mawonsu mwi Nsalejetu. Nilondil kand anch, Sangarany!” (Fil. 4:4) Mulong wa kwikal murund wa piswimp wa Yehova, tufanyidin kwikal ni manangu ma Nzamb. (Jnsw. 3:13, 18) Pakwez chakwel tushala ni musangar, chidi cha usey nakash anch tudandamena kusadin yom twilejina mu Bibil. Yesu wakasikeshina usey wa yom yiney palonday anch: “Anch en wijany yom yiney, wayukany kwen anch wayisadilany.” (Yoh. 13:17, TMK; Jak. 1:25) Chinech chidi cha usey anch tukatin kuwanyish maswir metu ma mu spiritu ni kushal ni musangar. w18.09 16-17 par. 4-6

Epaferas wading uyij akadivar nawamp ni wayibangina nakash. Paul wamutazuka anch ‘mbay wa rukan,’ chawiy Epaferas wading niyend ni milong yend. (Flm. 23) Pakwez wadandamena kubangin maswir ma antu akwau ni wasala chom kampand mulong wa kuyikwash. Epaferas walembila mulong wa akadivar nau anambaz nend, niyetu tukutwish kusal mwamu, kujimbul majin mau. Malembil mudi minam makweting usu nakash. (2 Kor. 1:11; Jak. 5:16) Tong piur pa muntu ukutwisha kujimbul pa dijin diend mu malembil mey. Ukutwish kwijik arund ney a mu chikumangen ap majuku wija anch arishin nich yakamish. Pamwing ap afanyidin kukwat mipak yikash nakash ap kurish ni yoziu. Ukutwish kand kulembil mulong wa antu afishina akatish nau, antu apandina ku yinship yikash yasadikina katat ap kwi njit, ap antu arishina ni milong ya nfalang. Kudi akadivar nau anambaz avud nakash akweta kuswir kwa malembil metu! w18.09 5-6 par. 12-13

Paul kisambinap kwend ching kusu pa kupan yom ya ku mujimbu. Tukutwish kand kuyikasikesh antu, kuyinkish yiyul yidiokila mu Bibil ni kuyikwash yom yikwetau nich kuswir. (Mid. 20:31-35) Kusutin yom yalonday ni yasalay Paul, watufundisha mutapu chidia cha usey kwikal in kupan chisu chetu, usu wetu, kubangin kwetu ni rukat retu. In kukimbijol akata kwilej yaku ya antu ajingunin kand anch kupan kukat kuyiletin antu musangar. Kukwatijan ni jurnal umwing, antu alondin anch akat kwov musangar nakash kupwa kwa kuyisadil antu akwau yom yiwamp. In kukimbijol alondin anch chisu tukata kuyikwash antu akwau, tukat kwiyov anch mwom wetu ukwet chitongijok ni kurumburik. Chawiy in manangu amwing alondin anch antu afanyidin kusal mudimu wa kwikatin mulong wa kwikal ni ukash wa mujimbu uwamp ni musangar. Chakin kamu, yom yajinguninau yitushimwokishinap, mulong Sakatang wetu wa rukat, Yehova walonda anch kupan kukat kutuletin musangar.​—2 Tim. 3:16, 17. w18.08 19-20 par. 17-18

Uprofet wa Isay piur pa Yesu Kristu utukasikeshin ni utwinkin ruchingej. Isay wasambela kulond anch Yesu ‘kakezap kurumburish kukwatijan ni yom yimekena ku mes mend, ap kupup kukwatijan ni yom yikutesha matu mend’ ni anch ukez “kayirumburish atuzwendj nich kutentam.” (Isay 11:3, 4) Mulong wak chinech chikasikeshin? Mulong tushich mu mangand mwizwila too nich kasolikany, ni antu akat kuyirumburish akwau kusutin yom yimenau ni mes. Tukwet kamu kuswir kwa Nzwij uwanyidina, Yesu, ndiy kakezap kuturumburish kusutin mutapu tumekena ku mes! Dichuku diawonsu, tukat kutong yom piur pa antu akwau. Pakwez tudiap awanyidina mudi Yesu, chawiy yitongijok yetu niyau yidi yakad kuwanyin. Tuswapeling kwikal abachikinau ni yom tumena ku mes. Chawiy, Yesu watuleja anch Kangal warumburishany “yiumenanya ni mes” pakwez tufanyidin kurumburish “nich dirumburish ditentamina.” Mwamu Yesu ukatin anch twikala mudi ndiy ni tulika kuyirumburish antu akwau kusutin yom tumena ni mes. w18.08 9-10 par. 1-2

Chakin kamu, tukatap kumutesh Nzamb ukat kulond kudiokal mwiur. Pakwez, wafundikisha Dizu diend Bibil ni ukat kutwinkish umutakel kusutil Dizu dined. Chikwau kand, spiritu wa Yehova ukat kumutakel ‘kashalapol ushinshamena’ mulong wa kudandamen kuyinkish atushalapol a Nzamb yakudia pa chisu chiwanyidina. (Luka 12:42) Kudi mikand yivud nakash yichapinau ni yidia pa kapend kuwejinaku mavideo ni mikand yikwatinau mazu yikutwisha kutukwash kulam ritiy retu rikash! El mazu ma Nzamb amwinend, mudi mumafundinau mu Bibil matwinkisha kashinsh anch Yehova ushinshikidin yom yawonsu ni ukutudioshin yibudikin yawonsu yiyimp yituletidinay Satan ni mangand mend. Ni tukwatany amboku mupak wa kutesh kamu nawamp dizu dia Yehova. Anch twasal mwamu tukutwish kujijamen milong yawonsu turishina nich katat ni yakamish tukurisha nich machuku ma kurutu. Bibil utuvurishin anch: ‘Ukwetany kuswir kwa kujijaman, chakwel kupwa kwa kusal rusot ra Nzamb ukutwish kutambulany yom yashilayamu.’​—Heb. 10:36. w19.03 13 par. 17-18

Moses wayitakela in Isarel mu mivu yivud, pakwez katat Joshua ndiy ukimbina kuyitakel. Chawiy wafanyina kwiyipul anch antu akutwish kumwitiy mudi ntakel wau. (Kuv. 34:8, 10-12) Kukwatijan ni Joshua 1:1, 2, buku umwing wisambidina piur pa Bibil ulondin anch, chisu chikash nakash ni cha ubaj ku muchid, pasak ap nlel chiding chisu chikatau kumuswinkan ntakel kudi ntakel mukwau. Joshua wading ni diyingishin diwamp dia kwiyakamish. Pakwez wamuchingejina Yehova ni wading ukatin kulondul mbil jend. (Jos. 1:9-11) Nzamb wamuyukisha Joshua mulong wamuchingejina ndiy ni wasadina mwangel chakwel amutakel Joshua ni in Isarel. Mwangel winou wading kamu mudi Dizu, Mwan wa kusambish wa Nzamb. (Kub. 23:20-23; Yoh. 1:1) Yehova wayikwasha in Isarel kurijek yitongijok yau piur pa kuswimp kwikalaku pikalay Joshua ntakel wau musu. w18.10 16 par. 1-2; 17 par. 3-4

Yehova wij antu akata kumusadin kwa kwikatin ni ukat kufund majim mau mu ‘mukand wa chivurikish.’ Anch tukatin anch majim metu mashala mu ‘mukand wa chivurikish’ wa Yehova, kudi chom kanang tufanyidina kusal. Malakiy ulondin anch tufanyidin kumwov Yehova wom ni kutongijokin pa dijin diend. Anch twamwifukwil muntu mukwau ap chom chikwau chin chawonsu, majin metu akumajimwangesh mu mukand wa Yehova! (Kub. 32:33; Kus. 69:28) Chawiy tufanyidinap kwetu ching kumukan Yehova anch tukusal rusot rend ni kutambul dibatish. Yiney yidi yom tukata kusal kapamp kamwing, pakwez kumwifukwil Yehova chidi chom tufanyidina kusal mu mwom wetu wawonsu. Dichuku diawonsu, patudia ni mwom, tufanyidin kumekesh kusutil yisal yetu anch tumuziyidin Yehova.​—1 Pita 4:1, 2. w18.07 22-23 par. 7-9

Tukutwishap kwikal in Kristu aswila mulong wa kwel kwau anch tukwet mivu yivud mu uyakin. Chitin kusal usu wa kwikal aswila. Tufanyidin kudandamen kupam mu ronganyin ni kutesh kwa yom. Chawiy tufanyidin kutang Bibil dichuku diawonsu. (Kus. 1:1-3) Piudandamedina kutang Bibil dichuku diawonsu, ukutesh nawamp yijil ni mbil ja Yehova. Chijil ik chidia cha usey nakash kudi in Kristu? Chidi chijil cha rukat. Yesu wayileja in kwilejend anch: “Anch niyen wakatijanany mwamu, chawiy antu awonsu akez kwijik anch, en udiany in kwilejam.” (Yoh. 13:35) Rukat aritazukin anch “chijil cha mu Want” ni anch ‘kuwanyin kwa chijil.’ (Jak. 2:8; Rom 13:10) Tukashimukinap kwijik anch rukat ridi ra usey nakash, mulong Bibil ulondin anch “Nzamb udi rukat.”​—1 Yoh. 4:8. w18.06 18-19 par. 14-15

Chawiy ap anch in Isarel amubwambwila Yehova, Moses ndiy wasula ku muchim ap wajimana. Waburena kwilam ni walonda pakad kutongijok piur pa yibudikin. Moses wimika kumutal Yehova mulong wasala anch yisal ya antu akwau yimuletina kampuw. Kapamp ka kusambish panyinyitau antu mulong wa mem, Moses wasala yom yiwamp. (Kub. 7:6) Pakwez pamwing ap waziya ni wiyakamisha mulong in Isarel abwambwila mu mivu yivud. Pamwing ap Moses wading utongidin kwend piur pa yovil yend amwinend pa ndond pa kukimb mutapu ukutwishay kumutumbish Yehova. Anch muprofet ushinshamena mudi Moses wikala ni kampuw ni kusal chitil, chom chinech chikutwish niyetu kutushiken. Moses wading piswimp ni kwandam mwi Ngand ya Kushilamu, niyetu tudi piswimp ni kwandam mwi ngand yisu. (2 Pita 3:13) Tusotinap ap pakemp kushadish dilau dined dia pakampwil. Pakwez mulong wa kwandam mwi ngand yisu, tufanyidin kudandamen kumutal Yehova ni kumuziyin chisu chawonsu.​—1 Yoh. 2:17. w18.07 12-13 par. 14-16

Satan kakutwishap kuyishindil antu kusal chom chakadau awiy kukat kusal. (Jak. 1:14) Antu avud mu mangand kakatap kujingunin anch adi ku mutambu wa Satan. Pakwez anch muntu wilej uyakin, ufanyidin kutond anch ukusut ku mutambu wa Yehova ap wa Satan. (Mid. 3:17; 17:30) Anch twakwat mupak wa kumuziyin Nzamb, Satan kakutwishap kuyipish kushinshaman kwetu. (Job 2:3; 27:5) Kudi yom yikwau yikukanganyay Satan nau ayilembil kusal. Chilakej, Bibil kalondinap anch akutwish kwijik yom yidia mu manangu ap mu michim yetu. Ching Yehova ni Yesu awiy akutwish kusal mwamu. (1 Sam. 16:7; Mar. 2:8) Anch twasal usu wa kulond ni kusal mudi mukatinay Nzamb anch tusal, tukutwish kwikal nich kashinsh anch Yehova kakutwishap kumulik Djabul atusala nayimp mu mutapu ap umwing. (Kus. 34:7) Tufanyidin kumwijik mukankuny netu, pakwez tufanyidinap kumwov wom. Ap anch tudi antu akad kuwanyin, nich ukwash wa Yehova tukutwish kumupandakan Satan! Anch twamubwambwil, ukuchin kulemp niyetwetu.​—Jak. 4:7; 1 Pita 5:9. w18.05 20 par. 15-17

Tong bil anch ukimbin kuya ku musumb wa kulemp mulong wa chinship kanang cha pakampwil. Mulong wa kusal weny winou, ufanyidin kukandam motak. Piwashika kal pa ndond yikata kwimen motak, ukurumbangan mulong padi antu avud ni ma motak mavud. Cha musangar, wij kamu nawamp kwisu uyila ni motak ik ufanyidina kukandam. Ukukandamap motak ukwau, mulong wij anch ukukutwal kwi ndond yindj. Nlel ansand arishin ni mulong ufanikena ni winou. Yisu yimwing kudi yom yivud yifanyidina kutond mu mwom ni chinech chikutwish kuyirumbangesh. Pakwez anch wij nawamp ndond uyila, chikukuswapel kutond nawamp. Ov, ukushinshikin mwom wey mu kumusangaresh Yehova? Chinech chirumburikin kulondul yiyul ya Yehova mu mipak yawonsu ukwatina mu mwom, mudi shikol ukwileja ni mudimu ukusala ap kwijik anch ukwatan ap bwat ni kuval an ap bwat. Ni chirumburikin kusal usu wa kuwanyish mipak ya mu spiritu, kwawiy kulond anch mipak ap yom yikutwisha kusal anch wikala piswimp ni Yehova. Anch washinshikin pa kumusadin Yehova, ukutwish kwikal nich kashinsh anch ukukuyukish ni ukukukwash kutwish. w18.04 27-28 par. 1-3

Jefite walama kushilamu kwend ni wamutuma mwanend mband kusadin ku dizang mivu yend yin yawonsu. (Ank. 11:30-35) Ap anch chinech chading chikasiken kudi Jefite, chading chikasiken kand nakash kudi mwanend. Pakwez, mwanend wading ukatin kusal yom yashilayimu tatukwend. (Ank. 11:36, 37) Chinech chading chirumburikin anch kakumwatap ni kakuvalap. Mulong wa dijuku diau wafanyina kusul. Wading ukwet kuswir kwa kumwongoj ni kumukasikesh nakash. Bibil ulondin anch: “Chinech chikala kamu chaku mu Isarel. An amband a in Isarel ayanga pa muvu ni muvu kudil machuku manying, mulong wa mwan mband wa Jefite mwin Galad.” (Ank. 11:39, 40) Mwan mband wa Jefite utuvurishin piur pa in Kristu a nlel ashadina ajich chakwel atwisha kusal yivud mulong wa Yehova. Ov, umenap anch chidi chiwamp kuyijikitish ni kuyikasikesh?​—1 Kor. 7:32-35. w18.04 17-18 par. 10-11

Angel avud ibomba ni Satan mu kumubwambwil Nzamb. Kurutu kwa Mabeb kwez, Satan wayoza angel amwing kuwa mu masandj nau amband. Bibil urumburil yom yiney mu mutapu wa chifanakesh palondinay anch iyazangomb wadjibulau kudiokal mwiur waturika ni chikunku chimwing cha yikunku yisatu cha atutumb. (Dis. 6:1-4; Kuj. 12:3, 4) Palikau angel inay dijuku dia Nzamb, awiy atonda ayinau kwikal ku mutambu wa Satan. Tufanyidinap kutong anch angel antombwij adi chisak chakad kurijek nawamp. Mu mangand ma mu spiritu makad kumekan, Satan watenchikin kal guvernema wend mu kwilikej Want wa Nzamb. Widishin kal amwinend want, watenchikin kal ayilembil, wayinkishin kal usu ni wayikadishin kal anyikel a mangand. (Efes 6:12) Satan usadidin ditenchik diend mulong wa kuyikel maguvernema mawonsu ma antu. w18.05 16-17 par. 5-6

Yisu yimwing Nzamb ukat kutumekeshin rukat kusutin kutuyul anch chitin kusal mwamu, mudi mukatay kusal tatuku ukweta rukat. David wakwata nich usey yiyul yiney. David watongijokinang pa yitongijok ya Nzamb, wasala anch asambisha kutong mudi mutonginay Nzamb. Witiyija anch yitongijok ya Nzamb yimuumba charumburik anch witiyija anch yimuswimpa chakwel ikala muntu muwamp. Anch niyey wasal mwamu rukat rey mulong wa Nzamb ni maswir mey ma kumusangaresh makukul, ni ukwikal mwin Kristu uswila. Nambaz Christin ulondin anch chisu chikatay kukimbijol ni kutongijokin pa yom yitanginay, ukat kwiyov anch Yehova wasala anch yom yiney ayifunda mulong kwau wendendiy! Anch udi muntu wa mu spiritu, ukuman mangand ni yom yikumashikena mu machuku ma kurutu mudi mumamenay Nzamb. Yehova ukwinkishin ronganyin ni manangu minam. Mulong wak? Ukatin wijika chom chidia cha usey mu mwom, ukwata mipak yiwamp, ni kuchingel machuku ma kurutu pakad wom!​—Isay 26:3. w18.12 23 par. 9-10