Ngond wa 1

Atushalapol awonsu ashinshamena a Nzamb akatin kwilej mutapu wa ‘kuwanyish nawamp’ mudimu wayinkishau kusal. (2 Tim. 4:5) Chikwau kand, mudimu winou udi wa usey nakash, ni wa kuswapej nakash kusutamu mudimu win wawonsu mu mwom. Pakwez, chikutwish kwikal chikash kusutish chisu chivud mu mudimu wa win Kristu mudi mutukatina kusal. Midimu yikwau ya usey yitin chisu ni usu wetu. Tukutwish kusutish asaa avud mu mudimu wetu wa ku mujimbu pa dichuku mulong wa kuwanyish maswir metu ni ma dijuku dietu. Tukutwish kurish ni yisend yikwau ya dijuku, mayej, mayej makata kulet ushon ni milong yikwau yikata kushiken ku upal. Anch milong yetu yatukangesh kusutish chisu chivud mu mudimu wa Yehova, tufanyidinap kuziy. Yesu wading wij anch tukusongap etu awonsu mabuj ma Want mu mutapu umwing. (Mat. 13:23) Yehova ukwatin nich usey yom yawonsu tusadina mu mudimu wend kukwatijan ni usu wetu.—Heb. 6:10-12. w19.04 2 par. 1-3

Makasu ma Satan piur pa afu mamufukejidin Yehova. Mu makasu minam mudi mafundish malondina anch afu akat kuman mar mu kasu. Mafundish ma mutapu winou mamufukejidin Nzamb! Ov, mutapu ik? Mafundish minam mayibachikin antu kwitiyij anch Nzamb wa rukat udi mwin chisum mudi Satan. (1 Yoh. 4:8) Ey wiyovil nchik piur pa mafundish minam? Cha usey nakash, mutapu ik wiyovilay Yehova mulong wa mafundish minam? Kupwa kwa yawonsu, Yehova ukisin mitapu yawonsu ya chisum. (Jer. 19:5) Makasu ma Satan piur pa afu mapipejin yitiyij piur pa usey wa yakupesh ya difut ya Kristu. (Mat. 20:28) Makasu makwau ma Satan mawiy malondina anch antu akwet mupim wakad kufang. Anch chidi mwamu, ing muntu mwawonsu ushich chikupu. Kristu kafanyinap kupan mwom wend mudi difut mulong wetwetu chakwel tutambula mwom wa chikupu. Vurik anch yakupesh ya Kristu yimekeshin rukat ripandikena rayimekeshinau antu. (Yoh. 3:16; 15:13) Tongin piur pa mutapu wiyovilay Yehova ni Yesu piur pa mafundish mapipejina chipan chinech cha usey! w19.04 14 par. 1; 16 par. 8-9

Mafundish ma Yesu amafundin ndond ik? Ma Evanjil manying malejen yom yivud yalonday ni yasalay Yesu pa divu. Mifund yikwau ya Grek ya win Kristu—yafundau kudi antu apepilau nich spiritu utumbila ni ading ni “chitongijok cha Kristu”—yitukwashin kutesh yitongijok ya Yesu pa milong yiney. Mafundish ma Yesu madi ma ukwash mu mikadil yawonsu ya mwom. Chawiy “chijil cha Kristu” chifanyidin kutakel yom yawonsu tusadining ku chikumbu, ku shikol, ku mudimu ni mu chikumangen. (Gal. 6:2) Tukat kwilej chijil chinech pitutangina Mifund ya Grek ya win Kristu ni pitukata kuyitongijokin. Tukat kuziyin ku chijil chinech anch mashakamin metu makwatijan ni mafundish, yijidik ni mbil tutanina mu mifund yiney yapepilau ni spiritu utumbila. Anch twaziyin ku chijil cha Kristu, tukumekesh anch tumuziyidin kand Nzamb wetu wa rukat, Yehova, udia Musul wa malejan mawonsu mafundishay Yesu.—Yoh. 8:28. w19.05 3 par. 6-7

Chidi cha ushon nakash pa kuman anch antu akat kusal yom yimusangareshina Djabul. Pakwez, Yehova wij nawamp jinjil jawonsu ja Satan. Wij nawamp mutapu tumena mar, ni ukutwish kutwongoj. Tuyukin mulong tumusadidin “Nzamb ukata kupan kwongoj kwawonsu! Ndiy ukata kutwongoj mu mar metu mawonsu chakwel niyetu tukutwish kuyongoj antu akwau mu mar mau [mawonsu]. Tukuyongoj nich kwongoj kwatwongojau nich niyetu kudi Nzamb.” (2 Kor. 1:3, 4) An alikau kuchidij kudi anvajau ap ayipishau kudi antu ading achingejidinau, akutwish kwikal ni kuswir kwa kuyongoj. Nfund a kuseng David wading wij anch Yehova ndiy kusu ukutwisha kutwongoj nawamp nakash. (Kus. 27:10) David wading ni kashinsh anch Yehova ukuyilam antu awonsu alikau kudi majuku mau. Mutapu ik? Kusutil kuyisadin atushalapol end ashinshamena. Atushalapol end adi dijuku dietu dia mu spiritu. Chilakej, Yesu walonda anch awonsu ibomba nend mulong wa kumwifukwil Yehova awiy ading anamakwend.—Mat. 12:48-50. w19.05 15-16 par. 8-9

Yom ik yifanyidina kutek pa ndond ya kusambish? Tufanyidin kwitekin chisu dichuku diawonsu mulong wa kwilej Dizu dia Nzamb. Uvud wa maverse madia mu program wa kutang kwa Bibil ku chikumangan cha mukach mwa rubing aukepishin kal mulong wa kutwinkish chisu chivud cha kutongijokin pa yom tutangina ni kukimbijol nsangu jivud piur pa yom yiney. Chitongijok chetu chifanyidinap kwau kwikal cha kutang kusu maverse, pakwez chifanyidin uruu wa Bibil ushik ku michim yetu ni kutusejish piswimp ni Yehova. (Kus. 19:14) Dilejan dia Chinong cha Kalam ku yikumangan yetu dikat kutukwash kutesh Bibil. Chawiy, shinshikin maverse, pakampwil makutangau chisu cha dilejan mu chikumangen. Shinshikin chipandikena mutapu ukwatijadina mazu madia mu maverse ni chitongijok cha pa dishin chidia mu paragraf. Chikwau kand, itekina chisu cha kutongijokin pa maverse utangina, tongijok mutapu ukutwisha kumasadin.—Jos. 1:8. w19.05 27 par. 5; 28 par. 9

Yesu washa chilakej chiwamp pa mutapu wend wa kuman mudimu wa kulejan. Chom cha usey nakash mu mwom wend chading kulejan piur pa Want wa Nzamb. Wenda yitot ya akilometre mulong wa kulejan kudi antu avud. Wasadinang chisu chawonsu chamekanang mulong wa kufundish pa ndond yidia antu avud ni ku yikumbu yau. Yesu wateka mudimu wa kulejan pa ndond ya kusambish mu mwom wend. Tukutwish kumwimburij Yesu kusutil kukimb mitapu ya kuyilej antu rusangu ruwamp chisu chin chawonsu ni ndond yin yawonsu tukutwisha kuyitan. Pamwing ap tukat kusha yom yitusangareshina mulong wa kwipan mu mudimu wa kulejan. (Mar. 6:31-34; 1 Pita 2:21) Antu amwing mu chikumangen akutwish kusal mudi ayibol a pakampwil, ayibol a rawonsu, ap ayibol ankwash. Antu akwau akat kwilej kulond dizu dikwau ap akat kushemunikin kwi ndond kudia maswir ma in kulejan avud. Pakwez, chikunku chijim cha mudimu wa kulejan achisadin kudi in kulejan akad kutwish kusal yom twajimbula kal kwiur oku, pakwez akat kulejan kukwatijan ni usu wau. Tusala yom yivud ap yikemp mu mudimu wa kulejan, Yehova kakatap kutwit kusal yom yitwakad kutwish kusal. w19.04 4 par. 7-8

Iyipula amwiney anch: ‘Ov, nikwetaku tuyovil twa ris ni mukau mu muchim wam?’ (1 Pita 2:1) ‘Ov, nikwetingaku tuyovil twa kwibaz mulong wa ndond napamina, shikol nileja ap mulong wa nfalang nikweta?’ (Jnsw. 16:5) ‘Ov, nitongining anch antu akad kwikal ni yom mudi yinikweta am ap adiokila ndond jindj akwet usey ukemp?’ (Jak. 2:2-4) ‘Ov, nikat kwov ris ra yom yidiokila mu mangand ma Satan?’ (1 Yoh. 2:15-17) ‘Ov, nikat kusangerang kwipuwangej kukasikeshina yisal ya masandj ni chisum?’ (Kus. 97:10; 101:3; Amos 5:15) Yakul ku yipul yiney yikutwish kukukwash kujingunin yom ufanyidina kusal usu wa kuwapish. Arund akweting yibachikin yikash. (Jnsw. 13:20) Patudia ku mudimu ap ku shikol, antu atunyingumukina kakatap kutukwash kukudish yitongijok ya Yehova. Pakwez, tukutwish kutan arund awamp ku yikumangan yetu ya win Kristu. Kwinikwa kwawiy kukutwishau kutukasikesh kumekesh ‘rukat ni midimu yiwamp.’—Heb. 10:24, 25. w19.06 12 par. 13-14

Yehova kakatap anch muntu ap umwing wa pakach petu ikal ni milong ni arisha ni yakamish mudi turishina nich nlel. Chawiy choviken anch kashalapol ushinshamena wa Nzamb walond mazu ma usup chisu chirishinay ni yakamish. (Job 6:2, 3) Ap anch walond yom yakad kuwanyin piur pa Yehova ap piur petu, tufanyidinap kumujimen swa swa ap kumufish nich mulong wa yom yiney. Yisu yimwing, muntu urishina ni milong yikash ukweting kuswir kwa yiyul. (Gal. 6:1) Mutapu ik ukutwishau amakurump kusal mwamu? Afanyidin kumwimburij Elihu wamutesha Job nich ranaken. (Job 33:6, 7) Elihu wamuyula Job kupwa kwa kutesh nawamp yitongijok ya Job. Amakurump alondwila chilakej cha Elihu akat kutesh nawamp ni kusal usu wa kutesh nawamp mulong urishinay nich muntu. Kupwa, chisu chipaninau chiyul, afanyidin kusal usu nakash wa kupukun muchim wa muntu. w19.06 22-23 par. 10-11

Mutapu ik ukutwisha kusambish kumwifukwil Yehova anch akangesh difukwil dietu? Biro wa mutiy ukupan umutakel kudi amakurump a mu chikumangen chen ni yom yifanyidinau kusal. Anch kwikil mutapu wa kwambamb ni biro wa mutiy, amakurump akutwish kukukwash ey ni chikumangen chawonsu chakwel udandamenany kumwifukwil Yehova. Akupan umutakel wimedina pa mbil tutanina mu Bibil ni mu mikand yetu ya win Kristu. (Mat. 28:19, 20; Heb. 10:24, 25) Yehova washidinamu kal anch atushalapol end akuyidish nawamp mu spiritu. (Isay 65:13, 14; Luka 12:42-44) Chawiy ukutwish kwikal nich kashinsh anch dirijek diend dikusal usu wa kukukasikesh chakwel ushala ushinshamena. Yom ik ufanyidina kusal? Pa chisu chikangeshinau difukwil dietu, kimb ndond yiwamp ufanyidina kujindjik Bibil wey ni mikand yikwau yikweta yakudia ya mu spiritu ukweta nich kuswir. Babal chakwel kangal washa yom yiney ya usey—yikala yachapinau kal ap ya elektronik—pa ndond yikutwishau kuyijingunin swa. Muntu ni muntu pakach petu ufanyidin kukwat mupak wa kudandamen kushal ushinshamena. w19.07 10-11 par. 10-11

Mu tunan twa mivu ya kwinyim, chading chimeken anch antu avud mu mangand ading mu ma relijon kanang. Pakwez mu makum ma mivu yasutina ey, kwasadikin kuswimp kujim nakash. Antu avud nakash kadiap kand mu relijon. Chawiy, mu jingand jimwing antu avud alondin anch kadiap kwau mu relijon ap umwing. (Mat. 24:12) Mulong wak? Antu amwing akutwish kwikal ni kampuw mulong wa misangar yau ap mulong wa yakamish. (Luka 8:14) Amwing pakach pau itiyijin anch kwikiling Nzamb. Akwau itiyijin anch Nzamb udiaku pakwez akat kutong anch relijon udi yom ya pakur nakash, ni kakwatijadinap ni siyans ni kakwatijadinap kand ni yitongijok yitiyijinau antu avud. Pamwing ap akat kuyitesh arund, alej, ap kutesh nsangu jilejena anch mwom wibudikina kwau, pakwez kandikal ateshap kamu mayingishin makutwisha kuyibachik kumwitiyij Nzamb. Akwau kand akat kuyiziyish kudi antakel a chirelijon akweta kwau ris ra nfalang ni akimbina ntumb. Mu jindond jimwing, maguvernema makat kutek yijil yikangeshina mijikit ya chirelijon. w19.07 20 par. 1-2

Ukwetap kuswir kwa kwikal ni ukash wa mujimbu uwamp chakwel wikala ni ritiy rikash mudiay Yehova ni mushiku upandakena mu mudimu wend. Chawiy, antu avud akad kwikal ni ukash wa mujimbu uwamp, akat kukwat mupak wa kudandamen kuya kurutu mu spiritu. (2 Kor. 4:16) Pamwing ap wamusadidin kal Yehova mu mivu yivud pakwez, katat umen anch kuziy kwa mujimbu wey kukukangeshin kusal yom yivud mudi muwasalang pakur. Anch chidi mwamu, kangal washadish ruchingej. Ikal nich kashinsh anch Yehova ukwatin nich usey mudimu wey wasala nich kushinshaman pakur. (Heb. 6:10) Ni vurik anch kadiap uvud wa yom tusadina mulong wa Yehova umekeshina mutapu tumukatila. Pakwez, tukat kumekesh kujimb kwa rukat retu kusutil kwikal ni chitongijok chiwamp ni kusal yawonsu tukutwisha kukwatijan ni usu wetu. (Kol. 3:23) Yehova wij nawamp mimbu yetu ni katwitinap anch tusala yom yisutina usu wetu.—Mar. 12:43, 44. w19.08 3 par. 6; 5 par. 11-12

Yehova ukat kuyisejish antu kudi ndiy kusutin “yisalijok” yiwamp ya chikumangen cha win Kristu. (Mat. 5:14, 15; 1 Pita 2:12) Anch mbay ney wa uruw kadiap umwing wa pakach pa Atuman a Yehova, ov, ukat kusutishang chisu pamwing ni antu a mu chikumangen chey? Mutazuka mbay ney wa uruw chakwel akumangan ney ku yikumangan ya chikumangen. (1 Kor. 14:24, 25) Tuchingejin anch dichuku dimwing anamakwetu akwibomb ni yetwetu mulong wa kumusadin Yehova. Pakwez, chikalap nchik usu tusadina mulong wa kuyikwash anamakwetu chakwel ikal atushalapol a Nzamb, yisu yimwing kakutwishap kwau kwitiy uyakin. Anch chidi mwamu, tufanyidinap kwifish nich ayinetu mulong wa mupak wau. Tufanyidinap kumushindil muntu chakwel itiyij yitiyij yetu. Ap mwamu, pikil wapipej yibachikin ukutwisha kwikal nich padi anamakwey anch aman anch ukwet musangar mulong umusadidin Yehova. Lembil mulong wa awiy. Ikal mwin nkeu chisu wambambina nau. Pikil waziy kuyikwash! (Mid. 20:20) Ikal nich kashinsh anch Yehova ukuyukish usu wey usadina. Ni anch anamakwey akwat mupak wa kukutesh, akez kapand! w19.08 18-19 par. 15-17

Yom ik yakimbay kulond Yesu? Wading ukimbin kulond anch tufanyidin kupipej mwom wetu ni kushinshikin pa chom chimwing mulong wa kulik kwikal ni kampuw. Yesu amwinend washa chilakej chiwamp pashinshikinay pa mudimu wa kulejan mu mwom wend, ni wayileja in kwilejend kudandamen kushinshikin pa kumusadin Yehova ni pa Want wend. Tukat kumwimburij Yesu kusutin kutek mudimu wa kulejan pa ndond ya kusambish mu mwom wetu, ni ‘kukimb bil Want ni kutentam kwa Nzamb.’ (Mat. 6:33) Mutapu umwing wa kushinshikin pa mudimu wetu wa win Kristu udi wa kupipej mwom wetu mulong tutwish kusutish chisu chivud mu kuyikwash antu akwau chakwel amwijik ni amukat Yehova. Chilakej, ov, tukutwish kukepish asaa a mudimu wetu wa ku mujimbu mu rubing chakwel tutwish kusutish chisu chivud mu mudimu wetu wa win Kristu? Ov, tukutwish kukepish kwipuwangej kutusendina chisu chivud? w19.04 5-6 par. 12-13

Mu mivu yasutila ey, akadivar ni anambaz avud amusadidina kal Yehova mu mivu yivud yisend yau yaswimpin. Kuswimp kwinoku kwadingap kuswapela kudi akadivar ni anambaz inay. Mulong ading akatin nakash yisend yau yikur yasadinau kal mu mivu yivud. Amwing pakach pau arisha ni yovil ya “ushon” padandamenau kwijidin mashakamin mau masu. Mu kusut kwa machuku, atwisha kwijidin mashakamin masu. Mulong wak? Mulong wa rukat rau kudi Yehova. Ading ij anch ipana kudi Nzamb—kipanap ku mudimu, ku mwaz ap ku chisend. (Kol. 3:23) Akwet musangar wa kudandamen kumusadin Yehova nich kwikepish mu chisend chin chawonsu chikuyinkishau. Akat ‘kulet yakamish yau yawonsu kudi ndiy,’ mulong ij anch Yehova uyilamin. (1 Pita 5:6, 7) Anch twikal antu ikepishina antu akwau akat kusangar nakash kwikal pamwing netu. Tukat kutwish kujijamen nawamp milong yikata kushiken mu mwom. Cha usey nakash tukat kumusejin Tatukwetu wa mwiur. w19.09 6-7 par. 15-17

Yehova wamutonda David mudi ntakel kadiap kusu mulong wa dijuku diend pakwez kand mulong wa muchid wawonsu wa Isarel. Mulong wading mwant, David wading ni ulabu nakash. Yisu yimwing wasadina nayimp ulabu wend ni warumboka nakash. (2 Sam. 11:14, 15) Pakwez wamekesha anch umuziyidin Yehova kusutil kwitiy dipup. Chisu chalembilay, wamuleja Yehova mutapu wading wiyovilay. Ni wasala usu wa kuziyil ku chiyul cha Yehova. (Kus. 51:1-4) Chikwau kand, wikepisha ni witiya yiyul kadiap kwau ching ya amakundj pakwez kand ni yading yidiokila kudi amband. (1 Sam. 19:11, 12; 25:32, 33) David wilejina ku kurumbok kwend ni wateka mudimu wa Yehova pa ndond ya kusambish. Wading wij usey wa kumuziyin Yehova. Nlel unou, tukutwish kuman kushalijan kudia pakach pa antu amuziyidila Yehova ni adiburila chiyul chend cha rukat. Antu amuziyidila Yehova “akez kawang nich musangar [mulong wa mwikadil uwamp wa muchim].”—Isay 65:13, 14. w19.09 17 par. 15; 19 par. 21

Mu muvu wa 1935, Atuman a Yehova ashikena ku kujingunin anch chisak chipandikena kujimb chading chiminy “kurutu kwa ditand ni kwa Mwan a Mukoku” mu chifanakesh. Ap anch chisak chinech chipandikena kujimb chikushakam pa divu, chikutwish kwiman “kurutu kwa ditand” mu kwitiyij ulabu wa Yehova ni kuziyin ku ukaleng wend. (Isay 66:1) Akutwish kwiman “kurutu kwa Mwan a Mukoku” kusutil kumekesh ritiy mu chakupesh cha difut dia Yesu. Chilik chimwing kand, mu Mateu 25:31, 32, alondin anch “michid yawonsu”—pamwing ni antu ayimp—akez “kukumangan kurutu” kwa Yesu pashichay pa ditand diend dia uyaj. Chakin kamu, michid yiney yawonsu yidiap mwiur, pakwez yidi pa divu. Kurumburil kwinoku kwovikesha yom nawamp. Kwamekesha mulong wak Bibil kalondinap anch chisak chipandikena kujimb chikuya mwiur. Ching kusu chisak chimwing chawiy chakanau kutambul mwom wa chikupu mwiur—antu 144000, akeza “kuyikel [mudi ant] pa mangand” pamwing ni Yesu.—Kuj. 5:10. w19.09 28 par. 9

Yehova ukatin anch atushalapol end iyauril ni Babilon Mujim. Pakwez, kudi kand yom yikwau tufanyidina kusal kupwa kwa kwiyauril ni Babilon Mujim. Tufanyidin kukwat mupak wa kukwash relijon wakin—difukwil dishitwila dia Yehova. Shinshikin mitapu yaad tukutwisha kusal mwamu. Chakusambish, tufanyidin kudandamen kulam mbil jitentamina ja kwishitul ja Yehova. Tufanyidinap kwitiy mikadil yijondila ya mangand. Chilakej, tukatap kwitiy masandj ma mitapu yawonsu, uruw wa antu a yidi ya ruvaj yimwing ni yisal yikwau ya utun. (Mat. 19:4, 5; Rom 1:26, 27) Cha kaad, tufanyidin kudandamen kumwifukwil Yehova pamwing nau ambay netu in Kristu. Tukat kusal mwamu chikalap nchik ndond, mu Yot yetu ya Want, ap mu yikumbu anch chitin kusal mwamu, ap kand ndond yikwau ya ujindj. Chikalap nchik yom yikutwisha kushiken, tukutwishap kulik chaku chetu cha kukumangan pamwing mulong wa kwifukwil. Pakwez, tufanyidin kukumangan pamwing ‘pakampwil mulong tumen anch, dichuku dikat kusej piswimp.’—Heb. 10:24, 25. w19.10 16 par. 6-7

Yehova ukatin anch tusanger mwom, ni kwipuwangej kukutwish kutukwash kusal mwamu. Chawiy, Dizu dia Nzamb dilondin anch: “Chom chipandakena kuwap kudi muntu chidi kudia ni kuna, ni kusanger mu . . . midimu yend [yikash].” (Mul. 2:24) Pakwez kwipuwangej kuvud kudia mu mangand kukutwish kwikal ni yibachikin yiyimp padi etu. Kukat kuyipish yaku yiwamp ya antu, kuyibachik antu avud kwitiy ni kukat yom yikangeshinau mu Dizu dia Nzamb. Tukatin kwipan ching kusu kudi Yehova, chawiy tukutwishap kudia “ku mes ma [Yehova]” ni “ku mes ma ayilembil.” (1 Kor. 10:21, 22) Kudia chakudia pamwing ni muntu chidi chijingidij cha urund. Anch twatond kwipuwangej kukasikeshina yom ya chisum, ya ayilembil, ya masandj, ap maku makwau ma ku mujimbu ni yaku yiyimp, kwawiy kulond anch tudil yakudia yisukinau kudi akankuny a Nzamb. Mudi chibudikin, tukatap kwetu kwisal ching kusu ayinetu nayimp, pakwez tukat kuyipish kand urund wetu wa piswimp ni Yehova. w19.10 26 par. 2; 29-30 par. 11-12

Anch mwin kwawish ukimbin anch rinkind amukwash, ufanyidin kusal yom yaad. Chakusambish, ufanyidin kutadish waat mutambu uyila rinkind. Chikwau kand, waat ukuyap kurutu anch mwin kwawish udandamedin kwikal ku chikum, kulemp ni kusutidina rinkind. Cha kaad, ufanyidin kuzambul nakash yikay. Chikwau kand, ap anch kudi rinkind, waat ukuya kurutu ching anch rinkind wabul ku yikay. Chilik chimwing, tukudandamen mu mudimu wa Yehova ching anch tukwet ukwash wa spiritu utumbila. Chakwel spiritu winou atukwash, tufanyidin kusal yom yaad. Chakusambish, tufanyidin kusal yom yiyitakedilau antu a Nzamb kusal kudi spiritu utumbila. Cha kaad, tufanyidin “kuzambul yikay yetu” nakash, kusutil kusal midimu yiney nich usu wetu wawonsu. (Kus. 119:32) Chawiy, spiritu utumbila ukutwinkish usu wa kudandamen kumusadil Yehova nich kushinshaman. w19.11 9 par. 8; 10 par. 11

Pa dichuku diend dia nsudien panap pansh mudi muntu, muchim wa Yesu wakama nakash. Mulong kwading kwashal kal chisu chikemp mulong wa kumumesh mar ni kumujip kudi antu ayimp. Pakwez Yesu kadingap kiyakamishina kwend kusu mulong wading piswimp ni kufa. Wading umukatin Tatukwend nakash ni wading ukatin kumusangaresh. Yesu wading wij anch ang washal ushinshamena mu yoziu, wafanyina kukwash kutumbish dijin dia Yehova. Yesu wamekesha kand anch wading uyikatin antu ni wading wij anch ruchingej retu mulong wa mwom wa chikupu rading rimedin pa kushinshaman kwend kudi Yehova djat ni ku rufu. Ap anch Yesu wading mu yakamish yipandikena, wading ni chisambu. Wading ni “chisambu cha Nzamb” chidiokila ku urund uwamp ukwetay muntu ni Yehova chikata kusal anch twiyova zoong ni pee. Chisambu chinech chamukwasha Yesu kulik kwov wom. (Fil. 4:6, 7) Kwikil muntu pakach petu ukutwisha kuman mar mudi mamanay Yesu, pakwez awonsu amulondwila Yesu akurish ni yoziu. (Mat. 16:24, 25; Yoh. 15:20) Mudi Yesu, yisu yimwing michim yetu yikutwish kwakam. w19.04 8 par. 1-3

Chidi chiwamp kwiyipul anch: ‘Ov, nikat kujikitish mulong nidi mu chikunku cha pansh cha dirijek dia Yehova?’ Pa chirung cha Moses, Yehova watuma kasu kudiokal mwiur mulong wa kumekesh anch wading uyitiyijin antu atonday. Chilik chimwing, Yehova utwinkishin uman utwinkishina kashinsh anch uyukishin dirijek diend nlel. Tufanyidin chakin kamu kwikal in kujikitish. (1 Tes. 5:18) Mutapu ik tukutwisha kumekesh anch tukwashin dirijek disadidinay Yehova? Kusutil kulondul umutakel wimedina pa Bibil utwinkishinau udia mu mikand yetu, ku yikumangan, ni ku yitentam yetu yikemp ni yijim. Chikwau kand, tukutwish kumekesh anch tukwashin kusutil kwipan nakash mu mudimu wa kulejan ni kufundish. (1 Kor. 15:58) Tukatin anch Yehova itiy yakupesh yetu. El tumusadinany Yehova mulong tukatin kumujikitish. El tudandamenany kumwinkish Yehova yom yetu ya usey mulong tumukatil nich muchim wetu wawonsu. Ni el tukwashany nich muchim wawonsu dirijek diyukishinay nlel. Anch twasal mwamu, tukutwish kumekesh kudi Yehova anch tusangaredin dilau tukweta dia kumusadin mudi Atuman end! w19.11 25 par. 17-18

Yesu kakimbap kulond anch in kwilejend akusal yilay mudi mwasalay ndiy. Pakwez, in kwilejend afanyina kulejan ni kufundish ku jindond jivud nakash, kudi antu avud nakash ni mu chisu chilemp nakash kusutamu mutapu wasalay ndiy. Anch usadining mudimu wa ku mujimbu, iyipula yipul ey: ‘Ov, nijikening kwi ndond nisadining mudimu mudi nsalamudimu wa mushiku? Ov, nikat kupwishang mudimu wam pa chisu chiwanyidina ni nikat kuusalang ni usu wam wawonsu?’ Anch wakul anch mwaning, ijik anch mukurump wey wa mudimu ukutwish kukuchingejin. Kusal mwamu kukutwish kusal anch antu usadining nau mudimu itiy uruu wa Want. Ufanyidin kand kwiyipul yipul yilondwilaku ey piur pa mudimu wa kulejan ni kufundish: ‘Ov, nijikening anch nidi mwin kulejan wa mushiku nakash? Ov, nikat kwirijek nawamp mulong wa kumwendin muntu kapamp ka kusambish? Ov, nikat kuchirikang pakad kulab mulong wa kwambamb nau antu asangerang? Ov, nikat kwipanang nich mushiku mu milad kushalijan ya mudimu wa kulejan?’ Anch wakul anch mwaning, ukwikal ni musangar mu mudimu wey. w19.12 5 par. 14-15

Anch ambay a uruw akwat mupak wa kuval afanyidin kwisambin yipul yaad ya usey: Chakusambish, chisu ik chikatinau kuval? Cha kaad, akatin kuval an inch? Chisu ik chidia chiwamp nakash kudi ambay a uruw kwisambin yom yiney? Ni mulong wak yipul yaad yiney yidi ya usey nakash? Yisu yivud chiwapining nakash anch ambay ambamb piur pa an kurutu kwa kwatijan. Mulong wak? Diyingishin dimwing diwamp didi anch chidi cha usey nakash anch ikal ni chitongijok chimwing pa mulong winou. Chikwau kand, afanyidin kushinshikin anch adi tayad kusend chisend chinech. Ambay a uruw amwing akwatining mupak wa kusutishaku muvu umwing ap yaad kurutu kwa kuval, mulong kwikal nvaj kwitining chisu ni usu nakash mulong wa kuyibangin an. Akat kutong anch ang asutish chisu kanang pakad kuval, akwijidin mashakamin mau ma uruw ni akukasikesh urund wau wa piswimp umwing ni mukwau. w19.12 23 par. 4-5

Pa mangand mawonsu, atushalapol a Yehova arishin ni yishiken ya ushon ap yisansena. Ov, niyey mwawiy umena mu chikumangen chey? In Kristu amwing arishin ni mayej makash ap akwet ushon mulong wa rufu ra mukatish nau. Akwau arishin ni kusansan kukash pamenau mutapu ulikinay muntu wa mu dijuku ap murund nau wa piswimp uyakin. Akwau niyau arishin ni yibudikin yiyimp yidiokila ku mar ma yom yatangau. Akadivar ni anambaz inay awonsu akwet kuswir kwa kuyongoj. Mutapu ik tukutwisha kuyikwash? Ikal murund ushinshamena. Arund ashinshamena akat kusadin chisu chau ni usu wau mulong wa kuyikwash akadivar ni anambaz nau. Chilakej, mukadivar utazukinau anch Peter amuleja kudi dokter anch wading ukwet mayej mading mafanyidina kukasikan mu machuku makemp ni kumujip. Mukajend Kathryn ulondin anch: “Ambay amwing a uruw a mu chikumangen chetu atutwalaku ku opital kwajinguninau mayej ma Peter. Akwata mupak anch akutukwash kujijamen chishiken chinech, ni adandamena kwikal netu pamwing chisu chawonsu twading tukweta kuswir kwau.” Chidi kamu chongojina mudi ik kwikal ni arund akin, akutwisha kutukwash kujijamen yakamish yetu! w20.01 8 par. 1; 9 par. 5-6

Anch wading umwing wa pakach pa in kwilej akumangana mu kapalakany ka piur pa dichuku dinidia pa pentekot wa 33 C.C., wafanyina kwikal ni kashinsh anch udi uzizidilau many nich spiritu utumbila. (Mid. 2:5-12) Pakwez, ov, antu awonsu azizidilau many nich spiritu utumbila, akat kutambulang spiritu winou mu mutapu ukwamushena ni pa chisu chimwing mu mwom wau? Bwat. Shinshikin piur pa chisu chikatau kumuzizil muntu many. Kadiap ching kusu chisak chinicha cha in Kristu piswimp 120 chazizilau many nich spiritu utumbila pa dichuku dinidia. Urel wa dichuku dinidia, antu akwau piswimp 3000 niyau atambula spiritu utumbila wakanay Yesu. Antu inay ikala azizidilau many chisu chayibatishau. (Mid. 2:37, 38, 41) Pakwez mu mivu yalondulaku, kadiap in Kristu awonsu azizidilau many azizilau many pa chisu cha dibatish diau. In Samaria ikala azizidilau many chisu chikemp kupwa kwa dibatish diau. (Mid. 8:14-17) Ni mu mutapu ukwau wa pakampwil ushalijadina ni mitapu yawonsu, Korney ni antu a mu chikumbu chend ikala azizidilau many kurutu kwa kutambul dibatish.—Mid. 10:44-48. w20.01 20-21 par. 2-4

Mu ma Evanjil kusu kwau manying, Yesu wasadina dizu “Tatuku” mulong wa kwisambin piur pa Yehova piswimp tupamp 165. Mulong wak Yesu wisambina nakash mwamu piur pa Yehova mudi Tatuku? Diyingishin dimwing didi mulong wa kuyinkish antu kashinsh anch Yehova udi Tatuku wa rukat. (Yoh. 17:25) Shinshikin yom twilejina piur pa Yehova kusutil mutapu wamusadinay Mwanend Yesu. Chisu chawonsu, Yehova wateshang malembil ma Yesu. Kimenangap kusu kwend ching pa kutesh malembil ma Yesu, pakwez kand wamakulang. (Yoh. 11:41, 42) Chikalap nchik yoziu yarishay nich Yesu, chisu chawonsu wiyovang anch Tatukwend wading umukatin ni wamukwashang. (Luka 22:42, 43) Mulong udi Tatuku wa rukat, Yehova washinshikina chakwel Yesu ijik anch Tatukwend umukwashin. (Mat. 26:53; Yoh. 8:16) Ap anch Yehova kamuchidijap Yesu ku chom chin chawonsu chafanyina kumusal nayimp, Wamukwasha kujijamen yoziu. Yesu wikala nich kashinsh anch uyimp wawonsu ukumushikena udi kwau wa chisu chikemp. (Heb. 12:2) Yehova wamekesha anch umubangidin Yesu kusutil kumutesh, kuwanyish maswir mend, kumufumb, ni kumukwash.—Yoh. 5:20; 8:28. w20.02 3 par. 6-7; 5 par. 9

Patukwatina mupak anch tukwiyandjik ap bwat mu chishankur ap chisal kanang, tufanyidin kutongin yibudikin ya mupak wetu pa kom ka antu akwau, pakampwil ambay netu in Kristu. Chakin kamu, tukatinap kumupwakesh muntu ap umwing! (Mar. 9:42) Chikwau kand, tukatinap kuyijimesh chamwamu antu akad kwikal Atuman. Rukat rikutubachik kwambamb nau mu mutapu wa kalimish mulong wa kumutumbish Yehova. Chakin kamu, tukatinap kupwitamijan ni antu ap kuyovish usany mulong wa yitiyij yau. Vurik anch rukat rikwet usu! Anch twarimekesh mu mutapu wisikena ni wa kalimish, tukutwish pamwing ap kupukun michim ya antu atukisina. Yijikisha antu ushicha nau anch udi kaman wa Yehova. (Isay 43:10) Anch muntu wa mu dijuku diey wafa, anamakwey ni amutej ney akutwish kujiman nakash anch walik kwiyandjik mu chishankur kanang. Pakwez mulong ukutwish kuswapal anch watakela kuyilej yitiyij yey. Tukutwishap kwov usany ap pakemp wa kunung chikas ku uyakin piur pa rufu.—Rom 1:16. w19.04 17-18 par. 14-16

Atwimbuy 12 amulondula Yesu mu mudimu wend wa panap pa divu, pakwez kambuy Paul wikala mwin Kristu kupwa kwa rufu ni kuvumbuk kwa Yesu. Ap anch amutonda mulong wa kwikal ‘kambuy wa michid,’ Paul katambulap dilau dia kwikal umwing wa pakach pa atwimbuy 12. (Rom 11:13; Mid. 1:21-26) Pa ndond pa kuyovil amakundj inay 12 mukau ni kwov ris ra urund wa piswimp wasangerau ni Yesu, Paul wadandamena kusanger yadingay nich. Anch tudi ikepishina ni kusanger yitukweta, tukwikal mudi Paul ni tukulimish umutakel wayinkishinau kal antu akwau kudi Yehova. (Mid. 21:20-26) Watenchikin kal chakwel anch amakundj atondinau atakel chikumangen cha win Kristu. Chikalap nchik kuburen kuwanyin kwau, Yehova uyimen anch adi ‘yipan mudi antu.’ (Efes 4:8, 11) Anch twayilimish amakundj inay atondinau kal ni kulondul umutakel wau nich kwikepish, tukat kushal piswimp ni Yehova ni kusanger chisambu pamwing nau ambay netu in Kristu. w20.02 17 par. 13-14

Kurutu usambish kwilej nau Atuman a Yehova, pamwing ap wad wakudishin kal kalimish kakurikina mulong wa Bibil. Ni pamwing ap wad wakudishin kal rukat mulong wa Yesu. Katat washikena kal kuyijik Atuman a Yehova, ukutwish kusanger kubombakan nau. Pakwez kukat yom yiney yiwamp kukutwishap kamu kukubachik kwipan amwiney kudi Yehova ni kutambul dibatish. Rukat mulong wa Yehova Nzamb diawiy diyingishin dia usey nakash dikukubachika kutambul dibatish. Anch wamukat Yehova nakash kusutamu yom yikwau yawonsu, ukutwishap kwitiy anch muntu kanang ap chom kanang chikukangesh kumusadin ndiy. Rukat rey mulong wa Yehova rikukubachik kutambul dibatish ni rikukukwash kushal ushinshamena kudi ndiy kupwa kwa dibatish. Yesu walonda anch tufanyidin kumukat Yehova nich muchim wetu wawonsu, mupim wetu wawonsu, manangu metu mawonsu, ni usu wetu wawonsu. (Mar. 12:30) Mutapu ik ukutwisha kwilej kumukat ni kumulimish Yehova chikurikina mwamu? Anch twatongijokin pa rukat ramekeshay Yehova mulong wetwetu, chinech chikutubachik niyetu kumukat. w20.03 4 par. 4-5

Chirumburikin ik kuwanyish nawamp mudimu wetu wa win Kristu? Kuwanyish nawamp mudimu wetu wa win Kristu kurumburikin anch tufanyidin kulejan ni kufundish nakash kukwatijan ni usu wetu. Pakwez kuwanyish nawamp mudimu wetu wa win Kristu kurumburikinap kwau ching kusu uvud wa chisu tusutishina mu kulejan. Diyingishin ditubachikina kulejan didi dia usey kudi Yehova. Mulong tumukatin Yehova ni mutej netu, tukat kusal ni muchim wawonsu mudimu wetu wa win Kristu. (Mar. 12:30, 31; Kol. 3:23) Kumusadin Nzamb ni muchim wawonsu kurumburikin kwipan ayinetu mu kusadin usu wetu ni ukaliweny wetu mu mudimu wend. Anch twasanger chisend chetu cha kusal mudimu wa kulejan, tukusal usu wetu wawonsu wa kuyilej antu avud rusangu ruwamp. Tukutwish kukangany kusutish chisu chivud mu mudimu wa kulejan mudi mu tukatina. Pakwez wawiy mudimu tukatina kusal. Tukat kusal usu wa kuwapish ukaliweny wetu mulong wa kushik ku michim ya antu nich rusangu ruwamp. Tukat kutek mudimu wa kulejan pa ndond ya kusambish. w19.04 2-3 par. 3-4, 6

Makasu ma Satan mapandakeshin ushon ni mar ma antu. Anvaj akweta ushon mulong wa rufu ra mwanau akutwish kuyilej anch Nzamb wasendin mwanau, pamwing ap mulong ikala mwangel mwiur. Ov, makasu minam ma Satan makepishin ushon anch maupandakeshin? Mafundish ma makasu ma karung ka misiny amasadidin mulong wa kumekesh kuyimesh mar, ni kuyosh antu alikina mafundish ma chirelijon. Kukwatijan ni buku ulondina piur pa l’Inquisition espagnole, antu amwing pakach pa antakel inay a mafundish minam ma chisum ading atongin anch ayikwashin in kubwambwil ku mafundish ma chikatolik “kwijik piur pa mutapu ukwikala mar mu karung ka misiny” chakwel ayibachika antu kukarumuk kurutu kwa kufa ni apanda ku karung ka misiny. Mu jingand jivud, antu iyoviling kwikal abachikinau kuyifukwil angakau afila kal, kuyilimish, ni kukimb ukwash kudi awiy. Antu akwau akatining kuyidutish angakau afa kal mulong wa kwipuk dipup. Cha ushon, yitiyij yimedina pa makasu ma Satan yiletiningap rongoj rakin. Pakwez, yiletishin yakamish ap wom. w19.04 14 par. 1; 16 par. 10